☆OKHEE☆ - 13 By Dingdi Pachuau

 ☆OKHEE☆ - 13 By Dingdi Pachuau

Mi â ang maiin ka awmna ațang chuan che lovin an chêt dàn chu ka lo thlîr tawp a, ka thin a rim em ka hre lo va; mahse, ka thâ erawh a rawn khùr țan tih erawh ka hre thung. Zorema tlu tawh chu khawih zui a tum lêm lo a ni ang, a ding rùn a.

Chutah,"I țha em?" tiin ka lam a rawn hawi a; mahse, a inher leh nghâl vut a, a jacket hâk lai chu hlîpin rawn hawi lo chuan min rawn hâktîr a, chutah chiah chuan ka kawr hâk a țêt a ni tih ka hre chhuak leh chiah a, hlauthãwng zet hian a jacket ka hâk chu ka âwm zâwnah chuan ka țhãm khâwm a.

"Engtia ka tih nge i duh?"

Chhâng lo chuan ka en reng ringawt, ka hlauhthàwn avàngin ka chhûngril a khùr a, pâwn lamah pawh rawn lang chhuak  țan tawhin ka khûp chu a sài deuh dar dar a, min hriat ka duh loh avàng chuan ka bul hnai ber țhutna awmah, a hn deuhah chuan ka țhu thla ta nghe nghe a.

"Police ka ko ang?" 

Ka lu ka lo thing nawk nawk a, a mualphothlâk dâwn lutuk a ni, ka nu leh pate awm loh lai lehnghâlin, bâkah, ani a mualpho chuan kei ka mualpho ve nghâl dâwn bawk, ka thiam loh chu ni hran lo mah se ka nu leh pate'n an han hria ang a, chutah, ka țhiante, an rilru tùr ka han ngaihtuah chhin a, ni lo, buaina a punlun phah palh ang.

"Vawi hnihna a ni ta, i hmel ka hmua buaina i siam leh a nih ngai chuan tûn ang hian ka thlah zalèn tawh lo ang che, Lawmi kianga i hmel ka hmu leh a nih hlauh phei chuan..." tiin Zorema chu a pawt tho lawk a, kawngka lamah chuan a nawr phei ta nawk nawk a, kei ka lo thaw hlè hlé ringawt. Hminga rawn lan hma kha chuan hlauhna ka nei hran hauh lo kha a nia, a rawn lang ta chêng a, ka thla chu muan hliah hliah àwm tak, ka boruak tawn ngaihtuah lêtin, hlauhthàwnna hlîr maiin ka ķhat ta thung a nih ber hi.

"A kal tawh," aw thûm deuh dûta a rawn tih chuan ka phu deuh zuk a, mak zuk zuk chu min tiru maithei a ni. Ka bula a rawn țhut thlâk pawh chuan hlauthãwng tak hian ka lo melh vat a, inthiam loh hmel deuh hian a tho leh vut a," I thuamhnaw kha va thlâk la?" a ti ta sup a, ka tho ta vat a, ka room-ah lûtin ka room kawngkhàr chu ka kalh nghâl zat bawk a.

Ka va chhuah leh chuan dining chair-ah thatchhiat hmel zet hian a lo țhu thluang duai a; mahse, ka thãwm hriain a lo țhu țha vat a, a jacket chu pein," Ka lãwm e," ka ti sap a, ani chuan," Lo țhu rawh, thingpui ka lo siam ang che," tiin a tho vat a, jacket chu a țhutnaah chuan dahin thingpui siam tùr chuan a tho ta nghâl a.

A thingpui siam chu kan in a, chhang pawh a rawn chhawp nghâl tho a; mahse, ka ei lo. Ka ril a țâm lo va, ei châkna ka nei hauh lo a ni. 

"I zia deuh tawh em?"

"Thil thleng hi tu mah hrilh suh aw, khawngaihin? Ka nu leh pate pawh tiamin?"

Kan țawng rual deuhthaw. Ka en vat a, ani pawhin min rawn en ve chiah; mahse, ka en rei lo, kha thil thleng kha ka nu leh pate'n hre lo se ka ti tak zet si a, ngèn mak min ti ang tih pawh ka hre reng, ka la duh reng anga ngaia ka ngèn angah erawh angaih loh hrâm ka beisei.

"I duh phawt chuan," a ngawih vung vung hnuah chuan a rawn ti chhuak ve ta chauh a. Ka lo thaw huai a, ani hi chu ka ring hmiah mai, vènthàwn tùr ber amah hi a ni mai si a, a sawi lo a nih chuan, Zorema pawhin a sawi chhuak duhin ka ring lo va, kei lahin ka duh hek lo, chuti a nih chuan rilru tihbuai a ngai lo tihna.

"Zanriah ei ve nghâl la?"

Amah en chung chuan ka hmui ka pet fan fan a, min rawn en leh avàng erawh chuan ka hawi sawn leh ta daih. Mahni chauha awm ka hreh rih si a, a chhan chu hlauhna khân chhûngril lamah min la kiansak thei meuh lo a ni, min hnial lo se, ka hlauhna chu hre thiam se ka ti kher mai. Sawi chhuah kher erawh ka hreh ve si a, hre thiam se ka ti a ni.

"I rawngbàwl ka ei dâwn phawt chuan," a rawn tih chuan ka en leh vat a, a nui hmel ka hmuh erawh chuan min fiam ve a ni tih chu ka hre thiam ve a, ka nui ve sak. A ei duh phawt chuan ka theihtàwp ka chhuah ve poh a ni ang chu, mahnia awm chu ka hreh, Zorema kha a rawn kal leh thut thei si a.

Mahnia awm ka hrehzia chu a hre thiam ve a ni ang, zanriah chu a ei ve ta a, chawhmeh lah ama siam leh vek tho a ni, ril țâm lo hle mah ila ka ei lui ve hrãm hrãm a, chaw kan ei chhûPng chuan amah ang lo tak chuan a titi ve charh charh a, college a kal lai chanchin min hrilh ve ngei a ni. 

Chaw ei khamah chuan," Sêna sawi ve ziah maniature rifle kha i la nei reng em? Hmuh ve ka duh hle mai," a rawn ti chhuak ta khauh a, en deuh hau hian," Eng atân nge i tih?" ka lo ti vat a, ani chuan," Ka hmu ve duh maw le, i phal chuan," a ti leh mai a, ka en vang vang hnuah ka room lam chu panin," Lo nghâk lawk rawh," ka ti a.

Maniature a kuta ka hlan chuan ngun zet hian a thlêk a, a han lek kual vêl bawk a, chutah min rawn en thutin," Eng atân nge i tih ve rêng rêng a?" a rawn ti ta nghâl a, kei chuan," Ka duh ve a ni mai," ka lo ti ve thung a, chutah," Kah a nuam ve alawm, inkahsiakna hmunah pawh ka kal ve fo," ka ti leh a.

A thlëk kual hrep hnuah chuan"A țha reuh khawp mai, kah pawh a nawm dâwn hi," a ti ve ta sup a, hlim rilru deuh hian," Nuam reuh tak a ni, engtikah emaw kan la inkahsiak chhin dâwn nia," ka lo ti ve a.

A tlai telh telh a, a haw hun tùr chu ngaihtuahin ka huphurh ru telh telh bawk a, riak tùrin sâwm ta mai ila a zia lo viau ang em tih mawlh chu ka ngaihtuah a ni. Mi ngaihah a mawi lo mai ni lovin riak dùn kan ni dâwn a, nula leh tlangvâl in khata riah dun chu thil ţha lo tak chu a ni; mahse, tuna ka ngaihtuahnaah hi chuan thil țha lo a ni hauh lo, mahnia riah kha ka hreh deuh ta tlat si a. Ani hi chu Zorema khawsak anga a khawsak ve duh ka ring hauh lo va, eng emaw thut pawh lo thleng mah se, ani hi a awm chuan ka hlauh loh ka ring a ni.

Vànneihthlâk takin ka sawi chhuah ngai hauh lo hian," Riahpui i ngai ang em?" a rawn ti chhuak ta zâwk a, he pa hian ka ngaihtuahna a rawn chhiar thei vek em maw ni chu aw ka ti hial a ni. Sawi chhuaha riak ve mai tùra sàwm kha ka hreh êm êm si a, a rawn sawi chhuak hmasa ta sa sa, lo 'aw'  vat teh ang.

"I hreh loh chuan...ka lãwm khawp ang," tiin ka rilru tak tak chuan ka chhâng a, ka lãwm ngawt ang chu, a riah ve theih phawt chuan tui takin ka mu thei ngei ang, keimah chauh chuan...a, ngaihtuah tawh lo teh ang.

Ka room ațanga hla deuh hleka room ruak ka kawh hmuh chuan a lo hnial a, ka beisei êm êm ka sawi chhuah ngam si loh ang chuan ka room hnaih laiah Dunlop phah tawpa mut a thlang ta zâwk a, ka hlauh avànga min riahpui tùr a nih hriain a mutna chu nuam thei ang ber tùrin ka siamsak a, rizai pawh pahnih lai ka thuahtîr a; mahse, pakhat chauh chu a sin thung.

Mut hmaaa intihfaina tùr atân toothbrush thar hlak, slipper leh face towel ka chhawpsak bawk a, toothbrush ka chhawpsak lai phei chuan an khuaa ka riah hun lai kha ka ngaihtuah chhuak zawk mai a, ka lu chu ka thing ta nar nar a,' Kha kha chu theihnghilh daih ang, thil țha lo hi chu hriat reng tlâk a ni lo, ani pawh hian a theihnghilh ve daih tawh ang,' ka ti rilru nauh nauh a.

Lungmuang tak chuan ka mu a, a riah ve vàng chu a ni ngei ang chu, hlauhna pawh nei lo chuan ka muhìl 

thuai a; mahse, ka mumang erawh a țha lo khawp mai thung. Chhùn lama thil thleng kha ka mangphan a ni ngei mai, Zorema bawk chuan min lo sual leh a, kan lo inchai nasa khawp mai, ka hlauh avàng chuan ka lo au tuar tuar mai a, ani lah chuan," Tu mahin an chhan dâwn lo che, engah nge i țan țùng duh ni?" tiin min lo bêng țhuai țhuai mai a, nâ ka tih vàng leh amah ka hlauh êm avàng chuan ka lo au tuar tuar reng a, ka țap pah bawk a, mumang ram kher loah pawh ka lo auvin ka lo țap chhuak a ni ang chu, Hminga'n min rawn sâwi nawk nawk paha," Lawmi, harh teh, mang țha lo i mang a nih kha," a rawn tih chuan chiang lo riai hian ka harh a, chutah pawh chuan ka la țë deuh riai riai tho chuan ka hria; mahse, ka harh chian hnuah erawh chuan mumang mai a ni tih ka hre chiang ta a, ka thaw huai thei hial a ni; mahse, ka mittui pawh chu a lo tla tak tak a ni ang, ka mit chu a hnâwng chap a, chutiangin ka biang leh bek lam pawh a ni tho.

Ka muhìl ngam tawh rih lo, ka mang chhunzawm leh ka hlau a ni. Ani pawh chuan light on-in ka khum piah deuha ka țhut țhinna chair-ah chuan a țhu ngul a, chutah, chair chu rawn hnûk hnaiin," Muthilh tum leh rawh," a rawn ti leh sup a.

Zia lo ka ti khawp mai. Nula apumpa ve si, chutia mangchhia avànga han buai viau chu, a inthlahrunawm ka ti a; mahse, kawng lehlamah chuan ka duh rêng vàng pawh a ni bîk lo va tiin ka inthiam chawp ve bawk a.

"Ka muhìl duh tawh rih lo, nang chu va mu leh tawh rawh," tiin ka țhu chhuak hlawl a, kan mut dâwn khân room kawngka kalh lo tùra min tih khân ka hre thiam lo viau kha a ni a, tunah erawh chuan ka hre thiam viau tawh a ni, hetiang lam ka mumanga ka hmuh hi a lo ring lâwk a ni ngei ang chu.

"Ka mut a chhuak rih lo," a lo ti ve bawk a, banga sana chu ka en a, zàn dâr hnih a ri țêp tawh niin, mut a tui lai hun tak a ni si a, ka țê rî kha a ring viau a ni ngei ang chu, a rawn harh vat dànah.

"A pawi khawp mai, mangchhia vàngin ka tiharh si che a," ka tih chuan," Harh ka duh alawm, chuvàng alawm room pawh kha kalh lo tùra ka tih che," a lo ti thung a, a lo nih chiah hi, a hmel chu ka en vang vang a, thawh phan nei hmel pawh a pu lo, mi harhvâng tak a nih ngei dâwn hi.

Zînga ka thawh ve chuan a lo tho daih tawh niin, a mutna pawh a lo tifel vek tawh a, ka va chhuah veleh chuan," Morning, in tùr i duh ang em?" a lo ti vat a, ka pasal ni àwm ang hrimin, tlêma tlêmah min tilai chhe viau lo chauh a ni.

Harsatna ka tawh laia ka bula a awm avàng chuan a hriat hauh loh hian ka ngaina tak zet tawh a, ani erawh chuan a hma ang tho khân min en leh tawh niin ka hria, ni tin hna thawhnaah hmu mah ila thawhpuite zîngah chuan a ze ngai kha a put leh tawh avàngin ina ka titipui bawrh bawrh ang khân ka kàwm thei lo. Ka nute rawn haw hnuah phei chuan kan inah a rawn kal khât sawt a; mahse, ka pa rawn hmuh zauh zauh a ngaih avàngin rawn kal lo tawp chu a ni bîk lo.

Ka pa rawn haw chu an zin kual nasat deuh vàng chu a nih ka ring, a chêr deuhin ka hria a, ka nu erawh chu a zia deuh. An zinna chanchin ka zawh chuan nuam an tih thu hlîrin min chhâng a, thla an la em tia an thlalâk en ka dîl chuan ka nu chuan," Vawi khat chauh kan la a, a hnu lamah chuan kan peih ta lo va," a lo ti mai a, an thlalâk pakhat chu ka han en ve chhin a, Salt Lake, Kolkatta-a Mizoram House kawta an lâk a la ni zui. An va dek ho reuh tak!

Ka pa chu ni khat chauh a office a, a room-ah rei tâwk tak mai Hminga nèn an titi a, report a pe tam viau bawk a ni ang, ka pa a zin bo rei ve êm a, a àwm ve tho mai.

Krismas kan hnaih ta viau mai a, ka pain," Kumin chu min pui law law mai rawh aw," a tih avàng chuan ni tin chuan ka kal ve a, ani erawh chuan office kal lovin in ațangin a theih ang ang chu laptop hmangin a thawk ve a, pawi ka ti lêm lo, a upa ve tawh a, indìm thiam se tih hi ka duh dàn a ni tlat.

Zan khat chu Sêna'n min rawn be nawlh mai a, kan chiar hlut mai. A rawn țawng duh lehpek khawp mai a, kan titi char char a, engtin nge ka number a neih theih ni ka ti rilru a. Kan inhmuhna leh inbiakna rei tawhzia ngaihtuah chhuakin," Kumin chu rawn bazár la, kan inhmu thei dâwn alawm, kan inah i rawn thleng ang a, i duh loh leh i putea pawh a awm reng tho a," ka ti duah a.

"Ka châk lutuk, in inhmu țhin em ni? A nih chuan, Putea hnênah khân min lo dilpui la aw?  Ka hmu châk che a nia aw... Țhiante pawhin an hmu châk che a, kan la sawi kan la sawi che a nia," a rawn ti leh bawrh bawrh a, kei chuan," A va làwmawm thei ve! Rawn zin tum ngei ang che, i putea pawh ka lo sawipui hrim hrim ang, tu hnên ațangin nge ka number hi i neih a?" tiin ka zâwt lêt a.

"Putea hnên aţangin maw le, a lo nei reng a, mak ka ti tak tak! Mahse, in lo inhmuh țhin vàng pawh chu a ni ngei ang, nula number a nei ve khut sia, mak ka ti lo thei lo a ni, ka han fiam zui hlak kha," tiin a rawn nui kar kar a.

Hminga ka hmuh leh hmasak berah, chhùna kan chawlh lai chuan Sêna thil sawi kha ka sawipui chhin a, a lo zin phei theih nân ka dìlpui a ni ber ang chu, a ngawi deuh ngul a, chutah," I pa hnuaiah ka thawk tih a la hre miah lo," a ti chhuak ta sup a, kei chuan," Eng maw?" ka lo ti vat thung a, ka pa hnuaia thawh chu a inzahpui nge ni anga a chhûngte hriat loh a duh hrim hrim?

"A phûr lutuk dâwn a, ka hrilh duh ta lo a ni," a tih chuan ringhlel ru deuh hian ka en a, sawi zawm zëlin," A ã nasa mai si a, hrilh loh mai kha ka duh zâwk a, bâkah, ani lo hriat kher kha ngai ka ti lêm lo a ni," a ti leh duah a.

"Lo zin chu? Phalsak mai rawh," ka lo ti thung a.

"Thil pakhat min tiam la?" a lo ti ve khut thung a, hre thiam chiah lo hian ka en hâ a, ani pawh chuan min lo en ve tho a, chutah," I tiam loh chuan a lo phei ka remtihsak lo ang," a ti leh sup a.

"Naupangchhia!" ka ti sap a, thil pakhat tiam tùr chu eng nge? Thil țha lo tak pawh a lo ni maithei asin, a hnêna han tiam ringawt chu a... Sêna phùrzia kha ka ngaihtuah chhuak leh a," Han sawi chhin la?" ka ti ve leh a.

"Kei aiin i ngaihsak tùr a ni lo ang."

Ka beng bula a rawn kùn deuh avàng chuan kan inhnaihchilh khawp mai, a thil sawi chuan min tihhamhaih angreng khawp mai a, ka en chho deuh hau a, ani pawhin min rawn en chhuk ve a, chutah, nui sukin," I thu thu a ni e," a ti leh a.

Zanriah ei laiin ka pa chuan," Halan-a bula thawh chu eng nge a an?  A thawk țha bawk em?" tiin min zâwt a, kei chuan," A hna a tlin khawp mai, a thawkrim viau bawk, ti ila kan thawkrim tlâng vek ka ti," ka lo ti duah a.

"Nuam i ti ve viau tawh a ni maw?" a tih leh chuan,"Ka tum viau vàng pawh a ni maiithei, tunah chuan hrehawm pawh ka ti tawh lo," ka lo ti leh a, ka nu chu lo inrawlh vatin," Hrehawm tih loh chhante hi a lo awm a ni lo maw?" nui deuh chung hian a lo ti a.

"Teuh lo mai!" Ka chhànna avàng chuan an nui dùn a, kei erawh ka lai ru viau thung. Hminga chu min dem deuhah ka ngai nghâl hmiah a, ani lo mi dang min dem tùr an vâng êm asin.

Sêna rawn phei ni chuan Office kan la kal tho a, a rawn thlena min rawn biak hunah ka lam mai dáwn a ni. Ka phone chu a rawn ri dat a, phûr zet hian ka han en a, a thlen chin a rawn sawi a ni ngei ang.

*I pa Office luhna tùr bulah khân rawn kal teh*  tih hi a lo ni a, Hminga a ni tih ka hre nghâl bawk. Phone hian kan inbe ngai lo tluk a ni a, a number pawh hi ka save hran lo a ni.

Eng atân min ti chu ni maw? Hna chungchângah a ni ngei ang chu. Ka țhutna ațang chuan ka tho nghâl vat a, a țhutnaah pawh ani pawh a lo awm tawh miah lo va.

"In inah chuan a rawn awm thei lo ang," a lo ti sup ringawt a, hre thiam lo angreng tak chuan ka en a, tu chungchâng nge maw a sawi ni?

"Sêna chu hruai haw suh ka ti a nih chu," a tih leh chuan,"Engah chuan maw?" ka lo ti thung a, ani chuan," A theih loh!" a lo ti leh mai a.

"Theih loh tih ringawt mai,a chhan chu sawi mai la? Naupangchhia ang mai," ka ti hlak a, ka bânah a rawn man chat mai. Chumi pah chuan a lamah min pawt hnaiin,"Ka naupangchhia lo," a ti nghut a, kei ve thung chuan," Tuna i awm dàn kha chu a ni si alawm,"ka ti ve leh a,   țawng rin ngamna chi a ni si lo va, kan phun dùn a ni ber mai.

Ka kâwngah rawn kuah thutin a lamah min pawt hnai thut bawk a, ka inring lo nèn, ka nghèng rawk mai. Chutih pah chuan rawn kûn hniamin ka hmuiah a hmui lum thar thar chu a rawn nghat nghâl zat a, thil thleng teh thut chu a ran êm avàngin han tàl chhuahna hun pawh a awm lo.

"Nih hei hi?" tiin zei leh duhthawh fahran chuan min rawn fâwp zui ta nghâl a, a zei hrep lehnghâl a, zei piah lamah duhthawh taka min han fâwp chu ka marphute leh thinphute chuan an lo hre nasa mai niin, an  inthurual zo ta vek a ni ngei ang, an phu ta ut ut hlawm mai a, ka thisen zungzâm lah chuan chutia duhthawh taka min fâwptu chu țanpui tumin an tlân sung sung ni berin ka hria, kei ngei pawh chu fâwp lêt tùrin min tur ta sek hlawm a, ka thluak lam lahin ' Chhâng lêt ve rawh' a lo ti ve chhên bawk a.

*I INDUHKHAWP LOHNA AVÀNGA NANGMAH I INHUATNA KHA TITÀWP LA, I NIHNA ANG ANG KHÂN NANGMAH KHA INPAWMIN INHMANGAIH HLÊ RINGAWT MAI RAWH*