☆OKHEE☆ - 14 By Dingdi Pachuau

 

☆OKHEE☆ - 14 By Dingdi Pachuau

Ka hriat loh kârin ka lo chhâng lêt ve reng tawh niin, ani pawh chuan a lo hai teuh lo mai, ka bek tawn tawnah a kut pahniha vuanin kan indût tawn mawlh mawlh a, hei ngei hi nula leh tlangvâl infawh dàn tùr nia ka lo suangtuah ve țhin chu a ni, a tak takin ka tawng ve ta a, chuvàngin, men pawn ka meng phal lo va, uar takin ka chhâng lêt ve zêl. Nuam ka ti a, a boruakah chuan ka tui ral lo chauh a ni. 

Dìm tein bangah min nawr bet a, kan la indût mawlh mawlh reng tho. Eng thil dang mah ka ngaihtuahnaah a awm thei lo, tuna kan thil tih chauh lo hi chu. Ka thluak a tibuai vek, ti ila a tinuam veng veng a ni zâwk mah ang chu, he khawvêl hi inletling ta thawk pawh ni se ka hre tawp nâng!

"Ka naupangchhia lo aw."

Ka meng chhuak ta nghâl a, ngun zet hian hnai tâwkah min lo en reng tawh niin, zahna a rawn kal thut a, ka biang pawh a sen awp awp hialin ka ring a ni. A boruakah khân ka tui ral hneh ta lutuk a, eng thil dang mah ka ngaihtuah thei ta lo a nih kha.

"Duhawm reuh lutuk!" tiin ka biang tawn tawnah chuan a piai hlak a, a nat hlauvin a bânah chuan ka chelhsak vat a; mahse, min piai na lo hlauh, chutah, rawn a kûn hniam leh nghâl zat a, kan pahnih chauha chènna khawvêlah chuan ka chêng zui leh ta vang vang a.

Ka țhutnaa ka lêt leh hnu chuan hna thawh ka han tum ve a; mahse, ka dik thei tlat lo. Ka thâ te chu a la khùr der der thei hialin ka hria, ka hlauh vàng chu a ni lo hauh si lo, ka vài deuh riai mai a, ka rilruah hna thawh chu a awm thei mawlh lo a ni.

Mipa dik takin hmeichhia a fawh dàn tùr dik takin min fâwp a nih kha, khatiang tak kha suangtuah ve chhin țhìn mah ila ka la tawng ngai lo chu a ni. Zorema nèn kan lo infâwp ve fo tawh ngei mai a; mahse, nichin lawka min fawh dàn, nuam leh ril raih ang kha ka la thleng phâk ngai lo a ni. Khatiang tak khân infawh hi a lo nuam thei ngai a ni tih pawh ka lo hre lo hauh lo, kum heti chen lo dam thleng ve tawh hi nichin lawk khân infawh dàn tùr dik tak zirtîr ka ni, nuam ka tih ang khân nuam a ti ve tho ang em? Zei lo min ti viau ang em? Hmeichhia kei kher lo khatiang khân a fáwp ve tawh ang em le? Zawhna a rawn inhlãwm tup tup nghâl bawk.

Ka țhutna ațanga a țhutna a lan theih avàngin a rûkin ka va bih ru zauh zauh a, ka va hawi apiang chuan hawi chhuak hauh lo hian a hna chu a lo thawk mawlh mawlh reng a, nichîna kan thil tih khân amahah nghawng rêng a nei ve lo a ni ngei ang, pângngai takin a hna a thawk thei mawlh mawlh bîk a nia.

Sêna'n min rawn text chuan ka tho chhuak nghâl vat a, Hminga chu ka chhuak tawh dâwn tih va hrilh kher a ngai ang em tih ka ngaihtuah deuh a; mahse, ka chhuak dâwn tih a hre sa tawh a, va hrilh leh kher pawh a ngai chuang lo, ka Boss pawh a ni hleinem le, bâkah, ka va hmu zak.

Sêna chuan min lo nghâk tawh a, kan inhmu chiah chu kan innuih dùn var var a, a hmêl chu a dang hran miah lo nain a lo sâng tawhin a lo puitling tawh khawp mai a, a putea nèn pawh an inang viau tawh mai.

"A hma ai khân i lan naupan bâkah i hmêl pawh a țha daih zâwk mai ka ti; mahse, min be duh lo erawh ka lung a awi lo țêp a ni," nui chung hian a ti a, nuih sakin," Ka lâwm e," ka ti phawt a, chutah," Ka biak duh reng che hi maw, i ril a țâm em? Chawlh i duh chuan sawi hreh lo la," ka ti leh a.

Restaurant hnai berah ka chawlhpui a, thil ei pah chuan a titi suam suam reng a, a hlim ve bawk a niang, a nui var var reng mai, a bula awm a nawmzia leh a ngaihawmzia ka lo theihnghilh hman lek lek tawh a ni. 

Hminga'n kan ina a thlen a phal loh avàng khân kan in lam panpui duh lovin a in luahah lamah chuan ka hruai chho a, kan han thlen chuan ani pawh a thlenna a la rei lo a ni ang, a thuamhnaw pawh a la thlâk lo va, min lo hmuh chuan min en vung vung phawt a, chutah Sêna chu en lehin," I rawn thleng tluang chu a țha e, i inbual duh dâwn em?" a ti dût a, ani chuan," Ka peih teuh lo mai, a vawh vawh nèn! Ka rawn kal dâwnah ka inbual fai vek," a lo ti thung a, a bag chu dah tùrin room lamah chuan a lût zui ta nghâl a.

"Thingpui in la?" a tih chuan ka en vat a,"Dàwrah kan rawn chàwl tawh a," ka ti ringawt a, ani chu ka bulah rawn kal hnai deuhin," Ka sawi kha vawng reng ang che," a ti sup a, Sêna rawn chhuak chuan kan boruak hre ve hauh lo chuan,"Zanin chu hetah chaw ei ve la?" a rawn ti chhuak a.

"Ka chhûngte pawh ka hrilh lâwk si lo va, ni dangah ni zâwk mai rawh se. Nang pawh, chaw i la rawn ei ngei ang chu tiraw?" ka tih chuan," Loh theih nâng, kan inkhèl leh bawk ang a," a lo ti vat a," Teh rêng mai," ka lo ti ve a, phûr zet hian," Ka châk tawh, a nuam leh ngawt ang chu!" nui sûng chung hian a ti a, kei pawh chu ka nui ve tho a, Hminga lam erawh chu ka en duh lo hrim hrim.

A tûkah chuan rei lo te chauh hna ka thawk a, Sêna nèn chawhnu lama chhuah kan tum avàngin ka inthuam ho angreng viau a, Hminga chuan a țhutna ațang chuan min rawn en leh țhìn tih ka hre reng, a chhan chu a rawn hawi leh rawn hawi loh hriata ka hmuh theih nân dârthlang lian lo tê hi ka dah ru a, chu chu ka en mai țhìn a ni, ka nuih chu a za ru khawp mai. Sêna ka chhuahpui dâwn si a, ni danga ka thuamhnaw hâk leh tuna ka thuamhnaw hâk hi a inang lo bawk si a, mak min ti pawh a ni mahna.

Chawhnu lam hnaihah chuan 'Hrilh loh aiah' tiin kan chhuah tùr thu chu WhatsApp message-in ka va hrilh ve a, a chhan chu thawhpuite hmuha duh hun huna chhuak ang ka nih loh nân a ni. Message chu a en vung vung a, ka nui sak ringawt. Ka phone a rawn nghawr deuh dat chuan ka en ve leh vat a, ka chhuah hmaa amah hmu lawk tùrin min rawn hrilh a lo ni a.

Phùrna mak takin min tuam leh nghâl zat a, kan inhmu leh a nih chuan nimin lama thil thleng ang kha a thleng leh ngeiin ka ring bawk. Ka maimichhîng vang vang a, nizàn ka mutnaah pawh thil thleng kha ka ngaihtuah reng avàngin ka muhìl thei lawk lo a nih kha, thleng leh dáwn pawh ni se pawi ka ti chai lo, nuam ka ti tlat.

"Zanin chu kan inah chaw ei nghâl rawh se, a duh chuan riak nghâl bawk se?" ka tih chuan," Riak lo ang, sawipui miah suh," a lo ti hluk a, ka en vat a, ani erawh chuan min lo en leh rùn tawh a.

"Eng chena rei nge a duh kan zawn kual dâwn kan hre si lo va, kan inhmu khât bawk nèn, a lo kal ve chhunah chuan ngaihsak--" min rawn hnaih thutin a kut chuan ka hmui a rawn hup nghâl chat a, hlauhthâwng deuh hian ka en chho nghãl dâwrh a.

"Shhh, țawng tawh suh," a ti sup a, kan inhnaihchilh bawk a, a lung phu ve dut dut pawh chu ka hre ve thei hial nia. Chutah, a rawn kûn hniam leh zat a, ka lo rin lâwk ngei kha a thleng leh chiah e, ka duh dàn ang chiahin a la ni zui. Muang fân raiha chêt hi ka ngaithei miah lo va, duhthawh tih hriat taka min han fawh leh chuan insûm ka tum bîk hauh lo, ka lipgloss hnawih pawh a reh vek ngei ang chu. Kan chawlh deuh dat laia a hmui mawm deuh hmarh ka hmuh chuan ka nuih a za ru khawp mai a, nuih chi lah a ni hauh si lo.

"Ka sawi kha, vawng reng ang che," a ti sup a, a tupa ka ngaihsak over kha a duh lo va, ani aia ngaihsak kha a duh lo, ani hi ka lo ngaihsak rêng em ni? Min ngaihsak vàngin a chungah țhat ka chhuah ve a... ka hmui a rawn tawk leh tawh, ka ngaihtuah zawm tawh lo chiang khawp mai, mi dangin kan awm dàn chu an rawn hria ang em tih lam pawh kan ngaihtuah lo.

Ka chhuah hnua Sêna lam tùra ka tlàn chhoh chuan inngaizâwng pawh ni si lova inngaizâwngte awm dàn anga kan awm dùn tlat mai chu ka han ngaihtuah lêt a, ka hre thiam chiah lo. Kei hi chuan a bula ka awm dàn dik lo țhin ațang hian ka duh a ni tih ka hre chiang tawh a, nimin lam ațang phei kha chuan amah ka en apiang leh ka ngaihtuah apiangin ka thin rawn phu rangin leh ka mar pawh a rawn phu rang zaih zaih țhìn.  Tisa takin ka duh a niang ka ti tawp mai, senior ve deuh tawh ni mah ila hetiang lam thil hi tawn hriat ka la nei lo êm êm a, infawh hlauh phei chu Zorema nèn a ni mai a, tunah amah nèn a ni leh chiah, Zorema phei kha chuan ka thin phu a tirang chhin ngai lo, ani hi chu a dang tlat. Hetianga amah ka ngaihtuah chhuah apianga ka thin phu lo rang țhìn hi a rûk tak chuan ka lêrh vàng a ni ang te ka ti leh ringawt țhin.

Sêna nèn chuan motor dahin kein kan kal ve ta thung a, mihring kan tam ve tawh tho nain a la thâwl nuam viau thung, nuam a tiin a nui sûng reng mai a, a hlim hmel chu hmuh a nuam khawp mai. A țawng pah suam suam a," Nula hmêl țha tak mai han kalpui hi chu a nuam danglam ve chiang e," a ti a, a nui pah hak hak reng a, a putea nèn an inan lohna tak niin ka hria. Ani hi chu a țawng duhin hmêl țha min tih thu hi a sawi hreh ngai lo va, mi fak hi a hreh lo hrim hrim bawk. Min fakna thu lah chuan min tilãwm ve tumhrang bawk a, a putea sawi ni zâwk se aw ka ti rauh rauh hial a ni.

Kan vâk kual nasa a, ka kalpuinaah Kameez a duh zâwng chu kan hmu nual a; mahse, a rawng lamah a duhthusàm kan hmu rih lo. Dàwr hrang hrangah luhpuiin a duh zâwng deuh apiang chu a'n ha chhin lãwp lãwp bawk a, thingtlânga awma ni sensa hnuaia hna thawk țhin mah ni se hàng chhia a ni lo va, a inhmeh thei mai zêl. A tàwpah chuan tûnlai tlangvâl duh chi tak kan hmu fuh ta a, a han hâk chhin chuan a lo tâwk chiah bawk a, a rawng lamah pawh sawisèlna a nei lo, kan la ta nghâl a.

"I ril a țâm tawh ngawt ang, chàwl phawt ang hmiang?" ka ti a, kan han chàwl leh rih bawk a, kan chawlh zawha a kekawr tùr kan en zawh leh meuh chuan khua pawh a thim thàwthâng chu a ni.

Kan haw ta vat a, ka nute bula ka sawi lâwk tawh avàng chuan min lo la nghâk reng a, ka pa chuan a lo be vat a,"I lei mawi bawk ang chu maw? I duhthusàm ang i lei meuh maw?" a tih chuan ani chuan," Aw, lei e, U Lawmi hian min zawnpui thiam khawp a, ka lei mawi viau mai," a ti ve mai bawk a, chutah," Kan rei ta zêk a, min lo nghâk rei tawh àwm mang e," a ti zui leh zat a.

Ka pa chuan," Rei lo ve, a la hma alawm," a lo ti ve leh vat a, a thil leite kan dah fel hnu chuan chaw kan ei ta thuai a, chaw ei pah chuan ka pa chuan a pu chanchinte zâwtin an khaw lam chanchin pawh chu a zâwt pah a, ani pawh chuan fel fai takin a chhâng ve zêl a.

Zanriah ei khamah chuan a châk ber chu ka tihpui leh ta a, rei pawh kan la inkhelh hma chuan," Inbual phawt rawh aw, tui lum a awm sa vek a, i thuamhnaw hâk tùr pawh a awm sa vek," ka ti a, ani chuan," Ka peih rih lo asin le," a ti nang nang a, kei chuan," I haw hunah tui vawt chuan i inbual peih dâwn lo tih ka hria a ni, tunah hian inbual la, i haw hunah tui takin i muhìl thei bawk ang," ka ti deuh tlat a, min hnial zui ta bîk lo.

A thuamhnaw pângngai hâk leh mai a tum chuan ka phal lo va, hmeichhe nù tak ang ni lova mipa thuamhnaw hâk nuam ka tih tlat țhin chu a vànneih phah ta a ni ber ang chu.  T-shirt dum lian ve pângngai tak ka hâk țhin chu pein hoodie leh pyjamas lian hnek hnawk chu ka pe bawk a, hnial buai hauh lovin a ha nghâl vek. A inhmeh phian lehnghâl a, chumi hnuah chuan kan inkhèl leh nghâl char char a.

Haw tura ka chhuahpui meuh chuan dâr 10 a ri teuh tawh kher mai, naktûk lamah chhuah a la duh leh àwm si a ka tih vàngin a la inkhèl tui lai chu ka hnar haw a ni ber ang chu, a putea chuan a lo hau maithei a ni.

"Ka lo lût ve kher tawh lo mai ang?" ka tih chuan," Âwihawm loh, keimah chauha ka haw chuan min lo hau palh ang," a lo ti deuh tlat a, chuti na nâ nâ chu tiin ka han luhpui ve leh hrãm a. Kan lût dùn a lo hmuh chuan min lo melh dùn rulh rulh a, min lo be lêm lo, hna a lo la thawk a ni ngei ang, a lo la inchap darh nasa êm mai.

"Thingpui in phawt la?" Sêna'n a tih chuan,"A tlai tawh êm mai, ka haw nghâl zâwk ang e,"ka ti vat a, țhut pawh ka țhu lo, haw thuai chu ka duh zâwk a ni. Bâkah, a putea'n hna a thawk lehnghâl a, kan tibuai mai mai ang, min thlah chu phût ru viau mah ila a buai êm a, ka beisei ngam lo.

A tûkah pawh chuan ka chhuahpui leh a, a pawisain a duh a lei tawh a, leisak ve ngei ka duh avàng chuan ka duhna ber pheikhawk dàwrah ka luhpui a, savun pheikhawk chu en lâwr dan danin a kawr leh a kekawr lei rawng nèna inchawih thei tùr chu ka melh kual a, ka duh deuh chu ka bun chhintîr zêl bawk a, a hnuah chuan ka hmu fuh ta a, a man pawh rin ai chuan a lo to lutuk lo ve.

"Eng atân nge i lei a?" a tih chuan," Mi pêkah," ka lo ti mai a, min zâwt zui tawh bîk lo. A haw dâwn hunah ka pe chauh ang, chuti lo chu tunah hi chuan min hnial ang a, thleng lêt hial a duh palh ang tih ka hlau a ni.

A chàm chhûng chuan a chhuah duhnaah ka chhuahpui zêl a, a inthlahrung ve tawh khawp mai a," Keimah pawhin ka kal ve thei reng sia, ka tibuai rei tawh mah mah che a ni," a ti ve ngei a; mahse, ka nuih liam mai mai a, a pu thil tùrte leh a țhiante thil tùrte chu ka leipui vek a, a lãwm thiam khawp mai.

Dàwr ațanga kan chhuak tùr chu Sêna chuan fiamthu hi a sawi zauh pek a, kan pahnih chuan kan nui chhuak hawk hawk a, Zorema nu rawn lût ve tùr chiah nèn kan intâwk ta thut mai, hmuh duh lo viau mah ila insasengna hun pawh a awm tawh lo, kan intâwk chiang lutuk si a, thil sual ti ang maiin nuam lo ka ti ru viau mai, min en rum mai duh tâwk lo chuan ka hnung chiaha kal Sêna chu a melh tel nghâl bawk a, Sêna hriat laia min àn khum chu ka duh lêm lo a ni.

Pir deuh vah hian," Khawi lam nula nge maw tih laiin, nang lo ni reng che a.. Kha, nuam in va ti àwm ve? A thar i lo nei ve ta a, ka lawmpui che. Ti kha chuan buaina a awm tawh lo ang chu maw?" a ti ham ham a, kei erawh chuan chhàn ka tum lêm lo, kalsan duh viau mah ila min dang ve deuh tlat bawk si a, bâkah, ka nu rual zet a ni a, min bia tih hriat reng laia han kalsan nul nul chu a mawi bîk chiah lo a ni.

"Mahse, a nau deuh mah mah a nih hmel; mahse, keia lo sawi tùr a awm hleinem tiraw? Ka fapa hlata i awm hi ka duh ber chu a ni mai a," a tih leh chuan ka insehruh a, insûm duh tawh bîk lo chuan," Amah kha i hrilh dâwn nia," ka ti ve ta a.

"I zak lo hle mai, i nu rual min chhâng ngam a nia, lo hnaih lo la, i tân a țha a ni mai, nupui nei tawh a ni tih hre reng chung pawhin tûnlai nulaho hi chuan in duh zâwngah hian chuan zah hi in hre tawh lo, in tenawm hlawm tak tak a ni," a ti leh hmuar hmuar a, kei chuan," Chutiang zîngah chuan ka tel ve lo tlat mai," ka ti leh sap a, a âng thãwm hriat zui zél peih lo chuan zah pawh sawi tawh lovin ka kal sawn ta nghâl a, Sêna pawh ka lo theihnghilh leh daih tawh niin, ka bâna min rawn man tâkah chuan ka ding ve ta chauh a.

"U Lawm,tu nge a? A va han hlauhawm êm êm!!" a rawn tih chuan ka nui sak a," Tu mah a ni lo, hriat zui tlâk lah a ni hek lo, amah hlat thei tùr berin kalsan vang vang daih ang," ka ti a, ka kal leh nghâl a, ani pawh chuan," Ni e, khatiang kha chu an hlauhawm êm mai, an pawi kan sawi ang a, min lim hrep ang tih ka hlauh zãwng tak a ni," min rawn zui pah chuan a ti sar sar a.

A haw phei tawh dâwn avàngin zanriah ei atân min sâwm a, ka hnial bîk lo. Kan pahnihin eirawng kan bâwl a, a putea pawh a rawn haw tlai lo ve. A hmuh veleh chuan,"Zanin chu chaw a rawn ei dâwn a, naktûk zîngah ka haw phei leh tawh dâwn si a," a putea hnênah chuan a lo ti vat a, ani pawh chuan," A țha alawm," a lo ti ve mai a, room lamah a lût ta nghâl a.

"U Lawm, hawh, zai ngaithla ang aw," a ti a, vawiin lama a lei thar bluetooth player te reuh tê chu rawn la nghâlin a phone-a hla chu a play ta a, a sound pawh a țha ve khawp e.

Krismas hla plsy-in, kan thiam lai lai chu kan lo zàwm ve zêl a, zai ngaithla tam vak lo na nâ nâ chu, ka sa dik lo nasa mai a, kan nui dùn leh rih țhìn a.

Zanriah kan han kïl chu kan inhnaih hlawm khawp mai a, tlangvâl senior mahni chauha chêng in tih takah a bungrua leh furniture pawh lian vak hlawm hek lo le, dawhkàn hnuai lama kan ke pawh a intawk fuh palh ta zauh zauh a, nuam lo ka ti ru khawp mai. Ka hmaah tak Hminga chu a țhu lehnghâl a, min tawktu chu a ke a ni tih hrilh ka ngai hauh lo, ani lah chuan engah mah ngai lo tih hriat tak hian a ngaihven eih lo; mahse, min rawn tawk lui ngei țhin tih erawh ka hre tho. A hnu deuhah phei chuan ka ke veilam chu a kherh bet ta tlat a, Sêna hriat ka hlau si, tàl chhuah ka tum nasa, ka chaw ei lai pawh chu ka ngaihtuah hlei thei lo. Rum deuh hian a en a, min rawn enin a nui suk duh chauh lehnghâl a, ka thin a rim ru țûn thung.

"Vawiinah tu emawin U Lawmi a àn khum a," Sêna'n a rawn tih chhuah chuan ka thil tih lai chu ka tàwp chat  a, tàl chhuah lam pawh ngaihtuah ta lo chuan," A ho êm mai, Sêna, chaw kha ei mai mai rawh," ka lo ti hmawk hmawk a.

"Tu nge ni chu chu?" a rawn ti ta chiah mai, min rawn en nghâl ngur mai a, nuam lo ti zeta nui luiin," Tu emaw mai mai, engah mah ka ngai lo," tiin, engah mah ngaih loh hmel tak hian," Vawiina kan thil lei kha i țhiante'n an hmuh hunah chuan an lãwm ngawt ang chu!" ka ti daih a. Vawiina kan thil tawn kha tu ma hnêna sawi chhuak lo tùra lo hrilh tùr kha ka ni asin le, a pawi thui loh hrâm ka beisei. He pa hian min zâwt chhuak kher lo se ka ti; mahse, ka ring hauh lo, min zawh chhuah tumin a dîlchhut leh ngawt ang chu.

Zanriah ei khamah chuan kan in-card a, vawiin lam boruak theihnghilh țhakin nuam ka ti lehpek a, Sêna chu ka hrem deuh reng mai a, a phun leh nung nung țhin chuan ka nuih a tiza thei kher mai.

Ka haw dâwn chuan ka hlauh rûk ang ngeiin Hminga chuan," Sêna, dàwrtê a la inhawngin ka hria, Lawmi thlah pahin thil ka'n lei nghâl lawk ang e," a ti zat a, min zui chhuak ve nghâl a, step-a kan kal lai chuan kan inbe hauh lo a; mahse, motor ka hùnna bul kan thlen chiah chuan,"Vawiina mi chu tu nge ni?" a rawn ti ta chiah a.

*MITE SAWI VÀNG LEH THIL THLENG VÀNGIN INTI-LUNGNGAI DUH SUH, NANGMAH AȚANGA TIHLÊTNA I CHHUAHTÎR LOH PHAWT CHUAN ENGTIHNA MAH AN NI LO*