☆OKHEE☆ - 15 By Dingdi Pachuau

 ☆OKHEE☆ - 15 By Dingdi Pachuau

"Tu emaw i hriat ve loh," tiin nuih liam mai ka han tum a; mahse, chutia namnùl mai theih a ni hauh lo mai, ka bân rêk ve veah chuan a kut pahniha manin kan inhmachhawn ta ràn mai a, a hmel pawh en duh lovin a âwm zâwn chu ka melh ta ràn a.

"Tu nge chu chu, min hrilh teh!"

Thâwk ka la hap phawt a, hrilh pawh ni ila awmzia a awm dâwn chuang si lo va, chuvànga hrilh duh lo kha ka ni a, bâkah, ani ang lo inrawlhna atân phei chuan ka duh teuh lo, hmeichhe thûhlã mai mai a ni si a.

Ka chhàn hma chu min thlah duh tâk si lohah chuan," Zorema nu maw le," ka ti ta nge nge a, min en leh vang vang hnuah chuan min thlah ve ta chauh a," Sawi mai a har loh nèn," a ti sup phawt a, chutah," I rilru a tihrehawm phah viau em?" a tih chhunzawm leh a.

"Țawngkam mai mai te chu a," ka lo ti hlak a, ka rilru tihrehawm viau pawh ni se ani kher hi chu ka hrilh lo ang, lo inrawlh tùrin ka duh hauh lo ka tih tawh kha, Zorema nu chuan min țawng khum mah se, keimah mualpho lovin amah kha a mualpho daih zâwk tih pawh ka hre ve kar tho.

"Kha pa kha chu a rawn kal tawh lo tiraw?" a tih chuan Zorema a sawina a ni tih hriain," Aw, ka nute an awm tawh bawk a, bâkah, a ngam tawh lo ang," ka ti a, ani pawh chu a bu nghut a. 

"Dàwrah kal i tum kha, kei pawh ka'n haw ang e," tiin amah chu ka hêl a, motor-a ka lût tùr chu min rawn man hman leh tlat, laklawh zet hian motor nghèng chuan ka ding a.

"Sêna i buaipui avàngin a aiawhin làwmthu ka hrilh che, chuan, ka thu i zàwm țha bawk a, ka lãwm khawp mai," a ti leh sup a, a engah chuan nge maw a thu chu ka zawm țhat ni? Ka hre hauh lo mai.

Kan ngawih dun leh vang vang hnuah chuan," A tlai tawh a nia, min thlah tawh teh," ka ti ta sap a, Sêna pawhin rei a lo ti viau tawhin ka ring, bâkah, miin min lo hmu palh rêu rêu ang, kan ding khawlai bawk si.

"I mumanga min hmuh min tiam phawt la?"

Ka nui hak. Ka nui lo thei lo, a thil sawi naupanthlâkzia chu, naupang kum 12 mi vêl țawngkam ni àwm tak a ni.

"Aw le... mang țha," ka ti a, ka nuih chu a la za reng; mahse, ka insûm ve a ni, tlangvâl senior kum 40 tling țêp tawh thil sawi atân chuan a mak ve êm bawk a, ka nuih a za viau pawh hi àwm tak a ni.

Ka mumangah chuan ka hmu tak tak a! Ka hmuh dàn erawh a duhawm teh chiam lo mai pawh a. Julian-a nèn an lo insual hrep a, chu pawh Zorema vàng a lo la ni zui, mumang hlimawm tak chu a ni lêm lo chiang alawm.

*******

Julian-a a zin dâwn a, zinpui atân min rawn sâwm ve a, ka châk viau nain ka zui duh ta lo. Ka țhian ni mah se mi pasal a ni tawh a, tlangvâl a ni tawh lo tih ka hre bawk a, kei nula ka la ni a, inkàwm țhìn, ințhian țha tak ni mah ila a nupui leh a chhûngte mitmei ka vèn a ngai ve a ni, bâkah, mipa leh hmeichhia kan ni a, thil mawi tak a ni lëm lo; mahse, dàn ngai têin thil eng emaw min lo hawn tùrin ka chah tho a.

Krismas a hnaih viau tawh avàngin mi tin mai chu thil thar lei tumin an hmanhlel ni maiin ka hria, chhuak ila khawi lai maiah pawh chuan mi an tam êm êm vek mai a, bazârpui phei chu ka kal chhin peih miah lo, kan innëk tãwlh tãwlh dâwn tih ka hre reng mai si a, chàu hnêpin a nia haw ngai leh dâwn ni.

Sêna leh a țhiante leh a pu(Hminga pa) pawhin làwmthu min rawn hrilh thar mawlh mawlh reng a, Sêna kha a Krismas pheikhawk tùr ka leisak a, a pu pawh kekawr lum, mawza lum leh Biak ina inkhâwmpui theih tùr pheikhawk, a chhûnglam lum thiap mai ka leisak bawk a, Hminga erawhin ka leisak tih a hre kher lo ang. Ka chunga an țhat êm avànga leisak ka ni, bâkah, Sêna țhiante tâ tùr pawh thil holam tak ka leisak ve bawk. An duh zâwng tak a lo ni hlawm chêk a niang chu, kei ngei pawhin an làwmzia an țawngkam ngeia ka hria chu ka hlim tak zet a ni.

Hminga pawh a haw phei ta lo. Ka ngaihven duh lêm lo nain kan inah a rawn lang zauh zauh si a, hriat loh theih pawh a ni lo atin a ni. Ka pa bula a awm tawh hi chuan vawi khat tê pawh ka lam hawiin a mit a rawn lèn ngai lo, biak pawh min be khât khawp mai, keimah hian ka be zauh zauh zâwk a. A awm dàn hi ka hre thiam chiah lo a ni, a châng chuan min duh ve viau ni àwm tak hian min ngaihsak a, kan inah lêm, melh pawh min melh ngai lo a nia, mi awm lohna laiah chauh min duh a ni ang.

Hun ãwl ka neih lai tiin Martha-ite inah ka lêng a, ka hma tawh lo viau a, ka va thlen lai chuan Hminga aw ngei mai chuan," ...ngei ang, a khal dàn hi a mawi tâwk chiah a, mipa mit la tâwk chiahin a âwmbâwr pawh a mawi," a lo ti mêk niin, chu pa mai mai chuh, tu chungchâng nge a sawi ni? A lo melh nasa viau țhìn a ni chiang mai, a va tenawm roh tak! Luh rih loha han ngaihthlâk chhunzawm zêl ka duh viau laiin Harriet-i'n min rawn hmu tlat, a rawn au chùl lehnghâl a, a luh loh theih loh.

A rawn tlãn chu ka lo pawm kâng vat a, ka biangah chuan min fâwp chak chak a, a nuin min rawn hmuh chuan," Lo kal la tiin ka lo ngaihtuah mêk che a, a tihzia hle mai, ka insûk hlànin Halan-a leh Harriet-i i lo kàwm thei dâwn a," a lo ti vat a, a dàn ngai têin a aw chu a zãngkhai leh vah mai a, harh var mai a ni bawk a, a nungchang leh a pian hi  inhmeh viau a ni, Sawmkima erawh hmuh tùr a lo awm leh tawh lo thung.

"I phakar e a, rawn kal lo ila i insu dâwn lo tihna em ni?" ka tih chuan a nui hak hak a,"Nula tlawngãwl i rawn kal te chuan keini nu tawh hi chuan chêtna tùr kan lo dap nghâl chûk lo thei lo alawm," a ti a, a kal sawn lawk a, a rawn lan leh chuan coffee no hi a rawn châwi vâ a," In ve phawt teh, kan lo in mëk a," tiin min rawn pe a.

"I lo kal tâkah chuan, hei, urlâwk zàn hman dàn tùr kan lo sawi a, kan inah hmang ila?" a ti leh zat a, Hminga piahah chuan a țhu nghâl a, kei chuan," Nu ber hi a phûr ber berah hian i la țang si a maw?" ka lo ti duh chauh a, ani lah chuan," A nuam ve alawm, ina awm mai mai ai chuan lèn khâwmte hi a nuam ve a, bâkah, kan lo thlahlel ve bawk si che u a," nui sâng chung chuan a ti leh a.

Coffee in zawhah chuan insu tùrin a kal sawn ta daih a, Harriet-i chuan phone en min dìl avàng chuan ka pe a, Hminga chuan,"Naupang hi an duh apiang pëk ringawt tùr a ni lo asin," a lo ti nghut a, kei chuan," A duh apiang min dîl ta se pêk tùr ka nei teuh lo mai," ka lo ti thung a, a ngawi ta hlauh.

Chutih lai chuan ka phone a rawn ri a, Harriet-i chuan min rawn pe vat reuh a, ka han en chuan Julian-a a lo ni a, ka han chhàn chuan,"Thil ka rawn hawn che engtikah nge i rawn lam dâwn a? I rawn kal hah ngai lovin dàwrah ka rawn kensak zui che a nia," tiin a rawn chek hlak a. Kei chuan hlim rilru zet hian," Min rawn hawn tak tak elo? A ngai hleinem maw le. Aw, vawiin chawhnu hian ka rawn lam nghâl ang," tiin ka chhâng vat a.

Sawmkima a rawn haw a, a rawn phûl hlut a. Sawmkima thãwm a hria a ni ngei ang, Martha-i a rawn lang ve leh bawk a," I lêng daih zêl a, phone lah i keng chhuak ngai si lo," a rawn ti nang nang a, Sawmkima lah chuan," Thil pawi a thleng em ni?" a lo ti hluai a, rum deuha melh chung hian," Lêng chhuak hman ziah mai, țhiante lo lêng kàwm tùr tal hian awm ve la, nula țha leh ngat thei ila chuan ka nei tawh kher lo maithei che a ni," a ti leh hmarh hmarh a, Sawmkima lah chuan nui sûng chung hian," Zahngai! Zahngai! Min nei lo thei lovin ka zar buai tho ang che, ka hmangaih ber i ni leh dâwn tho si a," a lo ti thung a, Martha-i chuan,"Ka haider tlat si chuan ..." a lo ti a, chutiang mai mai sawi chuan an inhnial fiam a, a hnuah chuan Sawmkima pawh chu Martha-i insûk pui tùr chuan nui sûng chungin Martha-i chu a zui lût ta nghâl a.

Ka haw rualin Hminga chu a haw ve leh a, kawngah chuan,"Ka haw peih rih lo a nia, min phur kual ve zël mai rawh," a ti a, ka en zawk a, kawng en leh nghâlin,"I hman tho sia, engati nge in khuaah i haw ve daih loh a?" ka lo ti thung a, ani chuan," Ka haw daih te'n, ka hmu thei nãng che," a lo ti vut a, min chhànna chuan min tihamhaih deuhin a rûk tak chuan min tilai khawp mai; mahse, chutiang chuan ka awm duh lo lui ve tlat thung a.

Chhuk a tum bawk si lo va, ka phur ve ta zêl a, Julian-a dàwr thlengin ka phur zêl a. Dàwr kawt remchâng laia din paha," I lo chhuk ve dâwn em?" tia ka zawh chuan," I rei ang em?"a lo ti thung a. Sana en zauh pah chuan," Rei lêm lo ang," ka ti ve mai a.

Julian-ate nupa leh an fapa leh Nonoi an lo awm a, tlangvâl pakhat an dàwr nghâk a lo awm ve bawk a, min lo hmuh chuan Nonoi chuan," Au Lawm, kan inah i lo lêng khât tawh e," a lo ti vat a, a nau pawm lai bianga piaisak pah chuan," Chuti em ni?" tiin ka nui sak a, chutah," Tak tak chuan, hna ka thawk a, ka buai ve lutuk tawh a, ka rawn lëng hman tawh bîk lo a ni," ka ti leh a, Julian-a chuan," Nula hausa i nih kha, i tân hna thawh ve vak a ngai hleinem," a lo ti a, ner nâwngin ka en a, Hlimhlimi pawh a lo nui var var a.

Țhuin Julian-a fapa 'Julian Jr-a' ka tih mai chu ka pawm a, ka chhaih ve nasa mai, a pa a chhùn fuh lutuk hi a mak zâwk a ni, chuvànga Julian Jr-a ti țhìn pawh ka ni nghe nghe.

"Ka thil tùr chu?" ka tih chuan," La lêng ve rih rawh," an ti tlat a, min pe duh hauh lo. Ka han țhu ve ren ráwn a, rawn dàwrtu an awm zauh zauh si a, dàwr kawtah motor ka hûng bawk nèn, ka inthlahrung ru khawp mai. Julian-a chu ka en a, min rawn en duh țhak si lo, ka en lui deuh ngar ngar a, Hminga pawhin a ning tawh ngawt ang chu, rei lo tùra inngaiin ka kalsan kha a ni si a.

He ka țhianpa, hmel țha tak, mi pa ni tawh hi mipa, a rûk ka duh ţhin ngei kha a ni si a, mipa ka duh hmasak ber a la ni zui a, ka lo inthup nasa ve àwm țhìn ngawt mai. Engtin nge hrilh hre miah lova ka lo kawm char char theih ni? Ka duhna kha ka tilang zeuh tawh em le? Kum kha leh chen kha kan inkàwmin kan inzui tlâng kha a ni si a, țawngkam, mitmeng leh cheziaa vawi khat tal ka lo tilang lo a nih ngai chuan ka tâna khuanu ruat a ni lo a ni ngei ang, tunah chuan nupui fanau nei a nih tâk hi, a hun laia ka vei theihzia tak kha...

"Kha, thil pawimawhah chauh rawn kal lo hian min rawn tlawh zauh zauh tawh rawh, nang chu i la tlawngãwl deuh a," Julian-a'n box lian vak lo min pe paha a rawn tih chuan ka ngaihtuahna ram ațang chuan ka inthing harh vat a, nuih sakin," A dik ve tho mai; mahse, ka tlawngãwl vak tawh bîk lo a nia, ka pa ka pui ve char char asin aw, nilêng lêngin," ka ti lêt a. Hlimhlimi chuan," Nula fel tak hi chu aw... eng mah thawk lo pawhin awm mai mai mah la--" tia a la sawi lai mêk chuan," Chutiang chu sawi ve ziah lo teh u, in sual si, ka haw daih dâwn," ka lo ti vat a, an tlangvâl dàwr nghâk chu a lo nui hak hak a.

Motor bul thleng chu Julian-a chuan min thlah a, a la polite reng a ni, hun remchâng ka neih veleha lêng tùra ka intiam hnu chuan motor-ah chuan ka lût ta nghâl a, ka lût chu Hminga chuan ngun zet hian min lo en reng a, thuphâ chawiin," Ka rei ta zêk a," ka ti ta ringawt a.

"Tu nge a?" a tih chuan," Julian-a kha maw? Ka țhianpa a nih kha," tiin ka chhâng a, motor chu tinungin ka tlãn chhuak ta nghâl a, ani erawh chuan min la en zui reng a, chutah," Julian-a. Bialpa hlui ni lovin maw?" a ti leh sup a, chutah," Mahse... eng emaw..." tiin sawi zawm lo chuan a ngawi leh ta daih a.

He pa chuh, min dâwp deuh em maw ni? A mitah pawh ka en phei duh tawh lo, ka mitmeng ațangin tlânchhe  mitmeng a hriat thiam ka hlau ve deuh a ni, mi a chîk thei si.

"Ni nâng. Kan ințhian țhatna zah viau lo leh zakzum vak lo chu ni ila chuan ka bialpa hlui pawh chu a lo ni ve thei maithei," ka ti rilru nauh nauh a; mahse, ka sawi chhuak hauh lo," Țhian ka tih chu," ka ti leh nghat ringawt a, min zâwt zui ta bîk lo, min man chhuak lek lek niin ka hria.

Inah Julian-a thil min rawn hawnsak chu ka hawng ve chiah a, bedside lamp ang deuh chi hi niin a siam dan chu a mãwlmang viau mai, ho reuh viau angin lang mah se a thlàwna min rawn hawn ve vang vang, ka tân liau liaua a lei a ni a, ka ngai hlu lo thei lo. Ka khum bulah chuan ka dah ta nghâl a, zànah chuan ka on chhin a, a êng mawi êm êm zui lehnghâl a, a èn chhuah dàn chu ka sawi thiam chiah lo, a no nghelh maiin ka hria, a romantic ka ti a, ka lãwm khawp mai.

December ni 23 tlaiah ka pain kan in luahtu zawng zawngte tân ruai a buatsaih a, Hminga pawh a sâwm ve bawk. Hna thawh tùr a awm tawh lo bawk a, amah chauhin a awm bawk nèn, ka pa chuan chaw eiah a sâwm ãwl lo mai a; mahse, a rawn ei sek bîk lo; mahse, hemi ni hi chuan nilêngin kan inah a rawn tâp ve chawt thung, tlangvâl awm chhun a la ni zui, la tlangvâl chiah lo 3 chu an awm ve a; mahse, sa vêl buaipuia chhawr tak tak tùrin an la tuai deuh hlawm a, patling 2 leh Hminga chu an buai a nih ber chu.

Kan garage a zau țha a, motor dah lohna lamah gas thuk kan chhêm a, rawng bâwlin sa leh chaw kan chhuang vut vut a, boruak lah chu a eng emawti nawm reuh a, a țhenin speaker-ah Krismas hla an lo play a, lâm pâwl an awm a, zai pâwl an awm bawk a, kan indaih suau suau khawp mai. Kei pawh ka harh lehpek khawp a, fatu ațangin zai zîngah telin, chuta țangin lâm zîngah ka tel leh a, nuam ka ti khawp mai. Hlim hmel hmuh hi nuam ka ti a, hlim taka zai leh lâmho ka hmuh chuan ka insûm hlei thei lo a ni ber mai.

Zanriah pawh puar takin kan ei a, duh aiin ka puar mah mah a ni, mi dang pawh chuan an puar thu sawiin chaw leh sa tuizia chu an sawi barh barh a. Ka pain Krismas present atân in luah man thla hnih chhûng an free tùr thu a sawi chuan min tihlim tak zet mai, mi dang pawh chu an hlim hlawm khawpin ka hria, an tân tihtheih nei tam lo mah ila thla hnih chhûng in luah man free ringawt pawh chu an tân a hlu viau ang tih ka hria a ni. Làwmthu an sawi sap sap a, an hmel ațangin an hlim tih a hriat a, an hlim hmel ka hmuh chuan kei pawh ka lo hlim ve veng veng a ni.

Hminga chu riak ve mai tùrin ka pain a sâwm a; mahse, a lo hnial thung a, haw a tum avàngin ka pa chuan motor-a  thlah tùrin min ti leh a, a lo hnial leh tho nain ka pa chuan a lo pawm duh dêr lo thung a, thlah tùr chuan ka chhuak leh ta poh a. Motor-a kan luh veleh chuan," Vawiin nilênga ka ngaihtuah i hria em?" a ti dût a. Engtin nge maw a ngaihtuahna hria se min tih ni?  Ka han ngaihtuah chhin a, ka pa chu thil phal a ti viau pawh a lo ni thei a, chhûng leh khat pawh ni lo, thisena zawm pawh ni bawk si lote tân ruai tenau a buatsaihsak miau si a, chuta kârah, in luah man thla hnih a free bawk a.

"Hre lo," ka tih chuan," Hei hi maw le," tiin ka inrin hman hma chuan a rawn ãwn phei a, hnai set sawtah chiang zetin kan inen phawt a, chutah, ka hmui chu en thlain," He thil tê hi maw le," tiin a rawn fâwp zui nghâl a, a la duhthawh êm êm zui a. Kei pawhin lo hnial chu ka tum bîk țhak nâng, a thil sawiin min tilãwm pah bawk nèn, ka lo chhãng lêt ve mawlh mawlh a.

Garage-ah chuan minute 5 dâwn hun kan hmang ngei ang chu, ka tlàn chhuah dâwn chuan," Kan la zo hauh lo a nia, inah kan chhunzawm leh ang," tiin a nui suk a, min tiphûr laklawh a, hnial tinah pawh ka tin lo, a in thlen thuai thuai chu ka châk hial tawh zâwk!

Step-ah chuan min kai chho dat dat a, in kan luh veleh chuan kawng chu khãr nghâlin hnunglam ațang chuan min rawn kuah a, a kut chu ka lo vuan ve vat bawk a, light pawh kan on lo, thlang lama pâwn light chuan tukverh leh ventilation a rawn chhun fuh khawp a, in chhûng chu a èn ruih mai. Tuna kan boruakah tak phei hi chuan light pawh kan mamawh lëmin ka hre lo. 

Ka hnar thei ngang bîk lo a ni. Amah ka duhna hi chu thuhran, a bula awm hian thla hi a muang hliah hliah hian ka hre tlat a, chubâkah, min ngaihsakin min hauh thiam bawk si, mipa dang thîk àwm ang taka țawngkam a neih te hian mi  tilãwmin a rûkin min tihlim veng veng  a ni.

"Zanina i hlim hmel ang hi hmuh reng theih ka duh," a ti sup sup a. Nia, ka hlim ve bawk alawm, ka pa thil sawi khân min tihhlim bâkah ka bula amah a awm hian ka hlim a ni. Ka awm dàn hi 'hlim veng veng' tih hian a sawi fiah thei ber ang.

"Zanin chu riak ve mai ta che?"

Ka nui hak a, a thil sawi chu amah ngei pawhin a ring hauh lo ang le. Min thlâkhlelh vàngah erawh ka ngai hmiah a, chu chuan min tihlim veng veng a ni.

"Kan inah pawh i riah duh bîk loh kha," ka tih chuan,"A chhan i hre hauh lo," a lo ti vut a. Kei chuan," I sawi loh chuan hre tawp nâng," ka lo ti ve thung a, zah deuh angin ka awm duh bîk lo. Zah deuh hun pawh a ni chiah lo, kan pahnih chauhin kan awm bawk a.

"Zanlaia i room-a rawn luh ka duh dâwn a..."

*'THIL ȚHA ZÂWK A RAWN INHER CHHUAK MAI ANG A' TIA NGHÂK MAI LOVIN THIL ȚHA ZÂWK LO THLENG THEI TÙR CHUAN THAWK NGHÂL ZÁWK RAWH*