☆OKHEE☆ - 16 By Dingdi Pachuau

 ☆OKHEE☆ - 16 By Dingdi Pachuau

A thil rawn sawi chhuah chuan min tiharh chhuak nghâl zawk mai, kan pahnih inkâra thil awm hi induh tawna inhmangaih tawnna lam ni lovin tisa taka inît tawnna mai a ni. Min kuahna ata tãl chhuak nghâlin," Ka haw a hun tawh," ka ti sap a, min mangțhana hun pawh siamsak lêk lo chuan ka chhuak nghâl ta rawk rawk a.

Ka ngaihtuahna hi a dik chiah a ni. Kan hun hman dun tawh hnu te kan han ngaihtuah lêt nauh nauh a, 'Ka duh che' emaw 'Ka hmangaih che' emaw tih țawngkam hi kan la sawi chhuakin ka hre miah lo; mahse, kan inkârah hian eng emaw awm chu a awm si a, chu chu tisa taka kan induh tawnna hi a ni chiah a ni. Chu chu ani pawh hian a phâ thei lo ang, mi ã a ni bîk lo va, mi zîngah engvangin nge a tihlan duh teh rêng ang? Kan pahniha kan awm dunin a tilang țhìn ta chiah rêng a ni, kei pawhin ka lo duh ve țhìn rêng bawk a, ka phâ hauh lo, kan inhîp tawn tih hi.

Mahse, kan awm dàn hi thil țha a ni lo, hetiang kumah tawh phei hi chuan ka fîmkhur viau a ngai asin. Ani lah hian min hîp viau mai si, min fawh hlek pawhin ka insûmin ka inthunun hlei thei lo a nia, eng ang takin nge min ngaih ve ang aw?  Inngaizâwng ni miah si lo, eng emaw hleka hnar thei chuang bawk si lo nula inla eng emaw ve tak hmuhin min hmu ngei ang, ka nihna a ni deuh reuh lehnghâl, ka awm dàn hi hre rutu awm ta se, min sawi duhtu tân chuan sawi theih tak tùr ka lo ni.

Mahse, lehlamah chuan kei hi chuan ka duh tawh chiang tih ka hria. Tisa tak pawhin ka duh a, thinlung lamah pawh ka duh tel tho. Mipa hmel țha tak, khawpui mi leh hausa a ni miah lo, a eng lai ber hi nge ka duh chhan pawh ka hre chuang lo va, amah ka duh țanna pawh ka hre chuang lo; mahse, ka duh tih erawh ka hre chiang viau thung, chuvàng chuan alawm ka hnar theih țhin loh ni. Ani erawh hi chuan tisa takin min duh mai chauh a ni, tisa taka induh tawnna chauh hi zawngin rei a daih thei lo, rilru lamah min duh ve ni se min rawn ngaihvenin," Nichîn khân engati nge i haw deuh thut a?" tiin phone call kher ni lo, text message tal pawhin min rawn um zui ngei ang chu; mahse, a tih hauh loh hi.

Urlâwk zàn chu tum lâwk angin Martha-ite inah chuan kan hmang ho ta ngei a, a langah chuan hlim tak leh vènthàwn nei miah lo angin ka lang a; mahse, a rûk tak chuan ka invêng viau tawh a ni. A bulah a fâlin ka awm duh tawh lo va, ka awm dâwn deuha ka hriat pawhin Martha-i ka pan hrâm hrâm a ni.

Mi hrang kan awm lo bawk a, beer kan dawm far a, Julian-ate nèn pawh khân kan in ho fo a, pawi lua tùrah kan ngai lêm lo va, zu inah pawh kan inngai chuang lo, ina ka room-ah pawh ka stock nual tho, ka period lai phei chuan mut dâwnah ka in ziah a, ka in tam ngai lêm lo, zanin pawh can khat bâk in ka tum lo. 

"Nangni pahnih hi sawi rem tawh mai teh ang u, inneihnaa kalna tùr pawh a vâng tawh alawm, mawi taka inchei pawh a châkawm leh tawh bawk a," Martha-i chuan nui var var chung chuan a ti a, Sawmkima pawh chu lo inrawlh vatin," Ni ngawt tak mai, hun khawh ral mai mai rual pawh in ni tawh lo," a lo ti ve a, ka ngawi reng ringawt a, Hminga erawh chuan," Leh ngawt ngawt țhin a!" a lo ti sup thung a.

"Pakhati lah hian senior tawh lamah a han tisual deuh a, tihsual leh hi a hlau zo tawh ni berin ka hria. Hlauh duh miah loh tùr, hmeichhia leh mipa inkâr hi chu risk thil vek a nia, kei pawhin risk takmeuhin a nia pasal ka neih ve tho ni," Martha-i chuan a tih zawm leh barh barh a, nui chung hian,"E khai a, a va hlauhawm ve! Ka ngam zâwng a ni ve lo tawp mai," ka lo ti a, ani chuan," Tu mahin kan hma lam hun kan hre hleinem, risk takmeuha innei kan ni țhûm ang chu. Nang chu fanu mal i nih bâkah nula hausa i nia, pasal neih ngai lo i inti a ni maithei; mahse, a ni ngawt lo a nia, thui tak ngaihtuah a ngai; mahse, i fing ve kur tawh àwm bawk sia, fanu mal i ni bawk nèn, i duh tui tawhin i zalènna i dah pawimawh viau tawhin ka ring bawk si," a ti leh barh barh a, a thil in chu hâk deuhin a khuh deuh khak khak a.

"Thil țûl lo deuh i sawi vàng a nih kha," tiin a hnung chu ka chumsak dat dat a, chutah," Min hmangaihtu leh ka hmangaih ka tawn hunah chuan 'Nei rawh' in tih sek a ngai tawh lo ang, chu hun lo thlen hma chu lo nghâk hrâm hrâm teh u," ka ti zui zat a, Sawmkima pawh a lo bu nghat nghat a.

"I la upa lo, i duh hunah tak pasal chu nei ang che, hmanhmawh a ngai hauh lo," Hminga chuan a lo ti ve sup a, a lam hawiin," Ka lâwm e," ka ti ve sap a, chutah, Martha-i chu en leh nghâlin," He khawvêlah hian mipa an tam êm mai a, ka ban tlang bîk lo tùrah ngai phawt ang," nui chung hian ka ti a.

Urlâwk zàn a nih vànga men rei viau țha ka tih loh avàngin dâr 9: 30 a rîk chuan haw mai ka duh thu chu ka sawi a, Martha-i chuan a lo la phal lo viau mai a; mahse, Sawmkima zâwk chuan,"Ni e, men rei viau hi a hlâwkna a awm lëm lo, naktûk lamah hmel țha taka inkhâwm kan duh vek àwm si a," a lo ti ve a, Hminga'n hàwnna tùr ke nei hek lo le, ka phurh leh mai loh chuan. Hei tak hi ka duh loh a nia, kan pahniha a fâla  awm dun hi ka duh tawh lo a ni; mahse, han hniala phurh loh theih a ni bawk si lo.

Kan tlàn chhuah hnua," Min hlau thar ta thut chu a ni êm lo tiraw? Nge ka hre sual zâwk?" a rawn tih chuan ka chhâng lawk lo, hetiang lam zawhna hi chu a rawn phuh chhuah kha ka ring sa hrim hrim a, chhàn dàn tùr erawh ka inring sa thiam lo thung.

"Engah ngawt maw?" ka tih chuan," Haider kher lo la," a rawn ti thung a, "I hre sual a nih chu," ka ti leh a, khawlaiah veivâk an la tam avàngin muangchâng leh fîmkhur takin motor chu ka khalh a, ani chuan min rawn en vung vung reng a, chutah," Nge i pawi ka sawi zâwk? Ka lak ațanga i inla hrang ta thut hian chhan chu a nei ngei ang," a ti leh a.

"Kan inkârah eng thil mah a awm hleinem, ni lo'm ni?" ka ti ve ta ngat a, min chhâng lo chuan min rawn en vung vung ringawt. 'Tisa inît tawnna mai mai chauh a ni' ka ti rilru mawlh mawlh a, sawi erawh ka sawi chhuak ngam dèr lo thung.

Thlah chhoh ka tum lêm loh avàng chuan pêng remchâng laiah chuan ka ding a; mahse, a chechàng hauh lo, a melh ngai a melh rùn mai a, min rawn en hauh lo, eng tak ngaihtuah ang maw? 

Kan din deuh vang vang hnuah chuan," Min thlah chho dâwn nange?" a rawn ti chhuak ta sup a, kei chuan," A ngai kher em ni?" ka lo ti thung a, ani chuan," Ngai e, tlãn chho rawh," a ti leh sup a, ka thlah chhoh ziah avàngin ngaiah a neih ve tawh pakhat a ni, hnial duh ta bîk lo chuan ka tlãn chho ve leh mai bawk a.

Mahse, ka rin angin engtin mah min tawk lo. A chhuk dâwnah min mang țhain min en vung vung leh rih a, dik taka sawi chuan thlah nân min fawh ka beisei a ni, a rûkin; mahse, ka lan dànin a zir lo va, a lak ațangin ka inla hrang bawk a, a ti duh bîk lo a ni ngei ang.

Krismas hlimawm tak hmang tùra ka inngaih teh lul nèn, nuam ka ti thláwt lo. Dam taka chhûngkaw kima kan hmangho thei erawh a làwmawm ka ti a; mahse, Hminga ka hmu lo va, a rawn dîkdãk bawk si lo va, lãwm viau tùr ka nih laiin ka rilru a hnîm ruih mai a, chhûngril lamah ka hlim lo tak zet a ni. Ka hlim lohna erawh tihlan loh hrãm hrãm ka tum thung a, theihnghilh tumin Julian-ate inah ka han lêng chho a, naupang bula awm chuan rilru pawh a kal ding lo ta deuh a, a zia khawp mai. Hlimhlimi a fel bawk nèn, a titi siam siam a, Julian-a a lo awm ve ziah bawk nèn, an bulah chuan ka hlim ve thei deuh; mahse, a rûk tak chuan an hlim bîk lutuk chu ka awt, anmahni anga kawppui țha deuh neih ve pawh min ti châk rum rum hial alawm.

Krismas kan hmang zo a, Kum thar kan chuang kai leh a, Hminga pawh a reh tluang zêl a, ka pain chaw eia a sàwm pawhin a hnial zêl ni hmiang ka ti mai, a rawn ei ngai si lo va, a reh tlawk tlawk a ni ber mai. 

Kum thar ni ațanga ni ngana chhùn thingpui in laiin Sêna'n min rawn phone a, zãng vah hian ka lo chhàwn vat a, ani pawh chuan eng emaw hi a rawn sawi leh țeuh phawt a, chutah," U Lawm, Putea kha a damlo niin ka hria a, ka biak khân a sawi duh lo nain a aw ațang khân dik lo chu a awm niin ka hria, khawngaihin, min lo ngaihvensak hrâm teh, a damloh ve pawh hian a sawi ve mai mai ngai si lo va, ka pu bulah phei chuan ka ngaihțhat lohna pawh ka la sawi duh lo," a rawn ti leh barh barh a.

"A nih tak chu, chutiang lam chu ka lo ngaohtuah miah lo va. Aw le, ka lo ngaihven dâwn nia," ka tih chuan," Ka lãwm ngawt ang chu, a damlo khât ve a, a damloh vêk vêk chuan a la na ve țhìn sia maw, buaithlâk thei lutuk! Chuan, ka hrilh ru ang che, a damloh chuan a bula awm tam loh hi ka tum hrâm hrâm țhìn," a rawn ti leh a. Kei chuan," Eng vàngin maw?" ka lo ti vat a, ani chuan,"Min tirhna tùr hi a hre thei lutuk a, tlàn kawi reng a ngai țhìn a," tiin a rawn nui hak hak a, kei pawh chu ka nui ve ringawt a.

Ka awmhmun rãwt thuamhnaw chu thlâkin ka chhuak chho ta a, ka nute bulah erawh chuan ka chhuahna tùr chu ka hrilh fak lêm lo, motor pawh ka keng duh lo va, a chhan chu tlàn kual a buaithlâk mai maiin ka hria atin a ni. A kual kawi ve bawk si a, kea kal theuh mai hi a fel ber mai.

'Phone hmasaka chanchin zawh mai àwm' ka ti leh hnuhnawh a, ding meuhin a number chu ka hmet chhuak a; mahse, 'Ka thleng țêp tawh tho a, han pawh law law mai pawh chu a sualna a awm lo' ka ti leh  a, phone pawh chu ka ak țha leh rih ta zâwk a.

A kawngkhàr chu pâwn lama a inkalh loh avàng chuan a awm ngei a nih ringin ka han kik dat dat a, ka han ngaithla a, a reh vang vang mai. 'Ani hi a lo muhìl te hi a ni zâwk lo'ng maw, ka tiharh mai mai zâwk ang, mu tui lai intihharh ringawt mai chu' ka ti nauh nauh a, ka inthlahrung leh deuh si a; mahse, ka kik ve laklawh tawh bawk si. Chutah,  kawngkhàr chu chhûng lam ațangin a rawn ri rak a, a rawn inhawng nghâl a, kan inhmachhawn ta ràn mai.

A mit a sen rûm a, a lang bui deuh hlek bawk, a hmel chu ka hmu dâng deuh, a lang bawrchhawr deuh hlek bawk, a biang leh a khabe hmul a meh fai țhat loh vàng pawh chu a ni thei tho. Ka en vang vang a, ani pawh chuan min rawn en chhuk ve rùn a, a mu a tho ve chiah a nih loh pawhin ka han tiharh a ni ngei mai. Nuam lo ti ru zet hian," I dam țha em?" ka ti ta ringawt a, ani erawh chuan," Lo lût rawh," a ti ve thung a, ka zawhna chu a chhâng lo ve khawp mai; mahse, ka zui lût ta tho, Sêna vàng liau liauin. 

A in chhûng chu ka rin aiin a boruak a dai reuh, ka inha lumin ka kalna lamah ka taksa a lum rih êm zâwk a, chuti ni lo phei se chuan ka khùr bauh bauh thei hial ang chu. Ani pawh a inthuam lum êm mai, vâwt a ti ve a ni ngei ang. 

"I mu lai ka rawn tiharh che niin ka hria," ka tih chuan," Ka harhna a rei tawh," a lo ti mai a, nuam lo ti ru tak chuan ka țhu a, ani erawh chu a ding tlat a, a inkuangkuah thûn bawk a.

"Rawn lèn chhan i neih ka ring a," kan ngawih deuh vang vang hnua a rawn tih chuan,"I reh sia, i dam țha em tih ka rawn check che," ka ti ve mai a, dâwt pawh a ni bîk hleinem.

"Ka țha alawm."

A țawngkam chuan țha inti mah se a hmêlah erawh damlo hmel a lang si a ni, a aw chhuak hrim hrim pawh chu a dik chiah lo, dam țha pângngai ni se hetiang êma bawrchhawr hian a awm lo ang.

"I lan dànah kha chuan damlo hmel i pu a ni, i dam țha chiah lo chu a ni tiraw?" ka ti leh a, ani chuan," Chumi zâwt tùr ringawt chuan em ni i lo kal? Chuti a nih chuan haw leh tawh rawh, ka țha ka tih tawh kha," a ti ve thung a, a mit sen rûm chuan min melh rùn bawk si a, a nuam lo tak zet a ni.

"I țhat loh tawp kha," ring deuh țhaka ka tih leh chuan inher deuh nghutin," I lo lèn tâkah chuan thingpui ka'n lumsak ang che," a ti leh daih a, a chhuang pah nghâl zat a.

"A ngai lo, ka lo inlum mai ang, va mu leh tawh rawh," ka ti ve thung a, tunah hi chuan a lak ațanga ka inlâk hran rûkna kha ka dah bo rih, ding chhuakin a lam chu ka pan a, ani chuan," Ka mu ning tawh," a lo ti ve thung a, thingpui no lâk a tum chuan ka lo ban khalh a, a kutin ka kut a rawn tawk chuan a sa huam a ni tih ka hre thei mai a, a kut deh mai duh tâwk lo chuan a chal chu ka han dek leh zat a, a lo sa vur mai niin.

"I khua a sik a nih kha, damdawi i ei tawh em? Khawi, keiman ka lo buaipui ang, va mu teh," tiin no chu ka dah a, a bânah chuan ka kai a, ani pawh chuan min hnial ta bîk lo chuan min zui ve mai a, a kawr chhanah pawh chuan a khawsik avànga a taksa lum hum hum chu a hriat theih hial a ni.

Khuma a țhut lai chuan,"Khawnge damdawi?" tiin ka zâwt a, a mitmei chuan min hrilh ve mai a, la nghâl vatin mûm khat ka la chhuak a, tui, bottle-a mi chu novah bun chhuakin damdawi nèn chuan ka pe a, a lo ban ve mai bawk a.

"Mu rawh, i mu lum ang a, a reh vat mai ang. I in tê hi a dai reuh si a, lum tùr chuan inthuam lum ve hrep chu a ngai dâwn a nih hi," ka ti bawrh bawrh a, khuma a muta rizai ka sintîr hnu chuan," Engtik ațangin i damloh a?" ka ti leh zat a, ani chuan," Kum thar ni ațang khân," a lo ti ve mai bawk a.

"Chutiang chu sawi tùr alawm le aw," ka ti vang vang a, ka hawi kual ruai a, chutah," Rizai dang saw ka lo thuah leh dâwn em niang? I duh em?" ka ti leh a, ani chuan," Ngai lo ang," a lo ti sup a.

Thingpui chhuan ngaihtuah tùrin ka chhuak leh rih a, a thingpui tùr chu a senin ka thli chhuak phawt a, ka in tùr erawh chu bâwnghnute ka pawlh thung a, no pahnih chu room lamah ka chawi lût ta nghâl a.

"In rawh, i taksa a tilum hma dàwn asin," ka ti a, eng mah sawi lovin a in ve mai a, awm pangngai viau mah se a khawsik chu a sàn ka ring ve deuh ringawt a, khawsik enna kan ina mi ka mitthlaah ka hmu rauh rauh mai.

"I muthilh theih chuan muhìl rawh," ka tih chuan," Inlêng muthilhsan ka duh hleinem," a ti bul bul thung a, chutah," Rizai chhanah khân min lo delh teh, ka khùr dâwnin ka hria," a rawn ti leh a, a fiamthu emaw tiin ka han melh rum phawt a; mahse, a awm dàn ka hmuh chuan rang fahran hian khumah chuan lâwnin ka delh ta thuai thuai a; mahse, ka tho leh thuai a, rizai dang chu lain a rizai sin chungah chuan ka thuah leh a, chumi chungah chuan ka delh ta thung a.

A tlun zui ta chiam a, a khùr ka hmuh chuan ka mang a ang ru khawp mai, tihngaihna lah ka hre dèr mai si lo va. College kan kal laia hostel-a ka roommate țhìn Neeta-i damlo tlun ka buaipui lai mitthlaah a rawn lang chuai chuai a, a tlun nasa si a, blanket sintîr țeuh khân awmzia a nei si lo va, ka kuah tawp mai a nih kha, a hnu deuh lawkah a reh ve mai bawk a, khatiang khân tih ve mai tùr em niang?  Mahse, ani hi chu hmeichhia ni lovin mipa a ni tlat si a, a tihchi loh ang.

Mahse, a khurh nasat êm avàng chuan kawng dang ka hre lo, jacket a chung bera ka hâk chu hlîpin ka pheikhawk bun lai ka tlawh phelh a, a kiangah chuan ka mu ve ta ringawt a. Nghet takin ka kuah a, tunah tak hi chuan ka lum bîk hauh lo ang; mahse, pangti lum nei ta na nâ nâ chu, lum hun ka nei ve chêk ang chu.

Ka kuah hnuah pawh chuan rei angreng tak chu a la khùr tho a; mahse, ka thlah duh chuang lo. Damlo pangti sa tak bula mut chu lum duh ham ham tak a ni; mahse, nuam ka ti, rilru mangang lo phei ila chuan nuam ka ti zual ngawt ang chu, ka kuah thei si a, a in luah rêng rêng pawh hi, hi a vawt mah mah chu a ni, tûn ang hunah hi chuan ka ngaina fahran lo khawp mai.

Ka han meng uau a, ka maimichhîng leh a, a lum nuam tak zet a ni, ka khum hi thawhsan ka va hreh tak! Maimichhîng vang vang chung chuan che lovin ka han mu leh rih a, chutih pah chuan ka mumang chu ka ngaihtuah lêt neuh neuh a, motor tlãn thãwm ka han hria a, ka nu min rawn koh hmain ka thawh ngei a ngai  tihna.

Ka meng chhuak hlawl a, ka thil hmuh avàng chuan bangbo zet hian ka mit chu ka lèn kual a, hei hi khawi lai nge ni? Khawiah nge ka awm a? Tu room nge, ka room chu a ni lo chiang mai. Chêt sawn ka tum chu tu emaw bân hian min lo kuah reng niin, tu bân nge? Ka han hawi sawn deuh a, ka thil hmuh chu ka âwih loh ëm avàng chuan ka mit chu ka khap sak sak ringawt a; mahse, a ni ngei si.

"I lo harh tawh maw?" tiin a hma aia nghet chuan min kuah a, chutih rualin a bawp sei pui chuan min rawn khan bet nghâl bawk a, ka îp chãwih mai.

Thil thleng chu ka ngaihtuah a, a tlun avànga kuah lum tùra a bula ka mu kha, ka lo muhìl ve daih a lo nig chiah hi, a va zia lo țhìn êm! Ani lah chuan min la kuah nghet tak ang sauh sauh zui a!

"Min thlah teh, a tlai tawh ngawt ang," ka ti chhuak hliai a, ani chuan," Ka khawsik a reh ve chauh alawm, dârkâr khat pawh i muhìl tling lo, tunah dâr 3 chauh a la nia," a ti a, tunah tlai dâr 3 chauh a la nih àwm chu. Ka lo muhìl sek nèn, zîng emaw ka ti alawm le.

"I khawsik a reh chiang tawh maw?" tiin a pang chu ka dehsak a, a la lum deuh tho nain a khawsik tak kha chu a reh niah ka ngai mai.

"Hetiang a nih dâwn chuan tlun deuh reng mai pawh kha pawi ka va ti tehchiam lo ve aw!" a rawn tih dût dût chuan a malah ka chùm awk a, ani lah chuan,"Min duat deuh teh, damlo ka nih hi," a lo ti duh lek chauh a.

Ka tum loh deuhin zanriah tùr ka bàwlsak a, a tûk lama inentîr ka sawi  chuan," Ka țha, inentîr ka ngai tawh lo, ka dam fel vek tawh," a lo ti mai a, thu tak nge a sawia dâwt nge a sawi tih pawh ka hre thei lo.

Zanriah ei ve nghâl tùr chuan min ti a; mahse, ka lo hnial thung. Ka chhuahna tùr ka nu hnênah khân ka sawi fak lo va, min lo ngaihtuahin min lo nghâk reng ang tih a hlauhawm, bâkah, hei a zia viau tawh bawk alawm.

"Vawiin chu i bula awm a nuam, i inla hrang tawh lo va."

"I hre sual a nih chu," ka tih chuan," Ka hre sual lo, inla hrang hauh lova i nihna dik tak nèn ka bula hun i hman hian nuam ka ti a ni, nang pawhin i ti ve tho chuan ka hria, " a ti leh a.

"Eng nge ka nihna dik tak chu?" 

Hmeichhe zaidam lêm lo, țawng duh, puak phawng phawng mai, nu dêm lo leh mipa lawm ang làwm ve tlat mihring...

Mit khap hauh lo chuan min en vang vang phawt a, ka rin loh lam daih a rawn sawi chhuak ta.

"Ka duh ang tho che hian min duh lêt ve  a, ni lo'm ni?"

*MI RILRU INFIAM NÂN HMANG SUH, I HNÊNA KHA THU HRILH TÙR CHE KHÂN ENGTIANG TAKA NASAIN NGE A HUAISENNA A SÀWM KHÂWM I HRE HAUH SI LO*