☆OKHEE☆ - 17 By Dingdi Pachuau

 ☆OKHEE☆ - 17 By Dingdi Pachuau

Ka meng bial nasa ngawtin ka ring! Min duh tih a sawi tlat alawm. Min duh a nih chu, min lo duh ve reng tho tihna, a mak êm asin!

"Min duh maw?!!"

"Aw, ka duh che. Chuan, ka hriat sual loh chuan nang pawhin min ngei bîk lo, tiraw?" a rawn tih chuan thu dik a sawi ngei em tih hriat tumin a mit chu ka en kar reng a, amah vêk chuan,"Min ngei deuh pawh ni la ka duh tho tho che," a ti leh a.

A thil sawiin min tihhlimzia chu a hre pha hauh lo ang, ka thinlung hlimna chu nasa tak a ni. Min duhtu hi ka tawng khât a, ka hriata sawi fak phei chu ani bâk hi ka la hre lo. Ka hlimzia leh ka phùrzia erawh tilang lo tùr chuan ka insûm hrâm hrâm thung a.

"Min duh tak tak...maw?" ka ti leh sap a, a mitmeng cool deuh ruih, lang sen deuh râm si chu a han tizîm deuh hlek a, mawi ka tih rûk êm êm țhin a mitmeng cool zet tluk deuhthaw hiala aw cool hian,"Aw, ka duh hluah hluah che," a ti ta dût a.

"Kei pawhin ka duh che," ka ti lêt ve ta sap a, a inpuan duh ve laia zah ka duh lo a ni, zahna hian thil siam țhat lam aiin thil țha lamah chuan inchhìrna a thlen duh si a, chu hun chu bawhpelh ka duh bîk ta lo a ni.

A nui suk a, a bân chu a pahnihin a phar nghâl duai a, kei lah chuan naupangchhia ang maiin ka pan nghâl ruak a, kan inkuah vawng vawng mai, ka hlim êm avàng chuan ka mittui chu a rawn hnai a; mahse, a hmuh laia tlâktîr erawh ka tum hauh lo.

Zàn ka mut hmunah chuan kan pahniha chungchâng chu ka  ngaihtuah a, a rûkin ka hlim veng veng reng mai. Maimichhîngin tlai lama kan hun hman dànte chu ka ngaihtuah lêt a, tleirãwl ngaihzâwng nei thar hlim ang maiin ka hlimin ka nui deuh var var reng a, muhil thei lo chuan ka hlim luat vàngin ka let kual ka let kual a.

Ani hi Zorema ang mai kha chu a ni êm lo ang chu maw, ka thaw nghâl hawk a, ka hlimna chu hlauhthàwnna chuan a rawn thlâk nghâl bawk a. Naupangchhia ka ni tawh lo va, ngaihzâwng mai mai nei rual ka ni tawh lo, ani hi ka tân a rem lo a nih leh teh chuan...  A, ka ngaihtuah thui mai mai êm mai, vawiin tlaiah min duh thu min hrilh chauh a, tuna hlauhthàwnna rilru lo put leh hmanhmawh chu, ngaihtuah vak vak lo teh ang, tûn atân chuan, kan induhna kan inhrilh a, kan induh tawn phawt chuan a țha vek rih e.

A tûkah chuan phûr zet hian tlawh tùrin ka chhuak leh a, ka kal hmain damdawi, khawsik enna leh a ei tùr ka ken theih tâwk chu leiin ka chho a, min lo hmuh chuan,"Nula hmel țha takin min lo kan ngei ang tih ka lo hmu lâwk asin," a lo ti a.

Nuih sak chung hian,"Eng nge i lo an? Nizànah i khua a sik leh em?" tiin ka zâwt nghâl a, ka thil khai chu dawhkànah ka dah nghâl bawk a. Ani chuan," Min rawn biak ringin ka lo ngaichang reng a," a lo ti daih thung a, inthiam lo ru angreng tak chuan,"Ka be ngam lo che alawm, i muthilh tâkin ka tia," ka ti a, ani chuan," Tlangvâl inlêng i nei a ni lo maw?" a lo ti leh thung a.

"Inlêng ka nei ngai lo," ka tih chuan,"Tlangvâl kher lo pawh," a lo ti leh sup a, ka nei lo chiang, a hre ve àwm tho sia.

"Nangmah i rawn lèn loh chuan tlangvâl inlëng ka nei ngai lo," nui chunga ka tih chuan," Lo kal teh," a ti sup a, thu âwih tak chuan ka pan nghâl vat a. Duat tih hriat tak hian min kuah a, kei pawh chuan ka kuah lêt ve châk châk a, ka thla a muang siai siaiin ka hria, nizàn lama hlauhthàwnna ka neih pawh kha a bo nghâl vek nia!

"Hetia kuah vang vang che hi ka châk fo va," a tih chuan min  tilungawi tak zet mai. Ka hlimzia chu thup tum buai lo chuan,"Min kuah vang vang reng thei tawh ang," hlim zet chuan ka lo ti ve a. Chutah, a taksa thlâwp zaih chuan min pawm kãng ta lawp a, kei ka lo rãk țhat thung.

"I damloh kha, i taksa a la chak tâwk lo, min nghat thuai teh!" ka ti chùl a, hahdam taka awm tùrin ka duh a ni, nimin lamah pawh a khua a la sik hluah hluah a nia, a nat phah leh zâwk ang. Duh leh a dam hunah a duh tâwkin min pawm zâwk rawh se.

"Bengchheng lo la," a lo ti sup thung a, a taksa thlâwp zaih tho chuan min nghat thla leh riai riai a, a chêt dàn kher kher chu, ka thâwk a ti dik lo țan dêr ringawt nia. Kan taksa a insi thlap bawk si, a taksa lo pãwng lai bîkte chu ka hre chiang ngang mai, ka thaw chhuak ngam lo lek lek hial a ni. Ka kein chhuat a deh pawh chuan min thlah mai lo chuan min thlah chuang lovin min la pawm bet tlat a.

"Nangmah vànga ka thinphu rang ta thut chu i hre thei em?" a tih chuan a thinphu dat dat chu ka hre chiang khawp mai. Kei pawh a phu rang ve tho alawm, tuna ka awm dàn hlauh phei hi chu, a hriat ka hlau tak zet. Hetiang hian ka la awm ngai miah lo, ka awm dàn chu sawi pawh ka sawi fiah thiam lo, ka marphu pawh a phu țha at at khawp mai.

"Min thlah rih la, ka thil lo ken che hi ei phawt rawh," ka ti sap a, ka aw chu a khùr deuh lek lekin ka hria, a khurh chhan lah ka hre chiang viau bawk. Ka haw ru kher mai, a thiam loh vek a ni, engah nge khatiang khân a chêt rêng rêng ni?

"Min en phawt la."

Ka en duh lawk lo va; mahse, min thlah duh si lohah chuan ka en chho leh ta nge nge a, meng zîm deuh ser ser chung hian rawn kûnin min rawn fâwp a, kei pawh chuan ka lo chhâng lêt ve vat a, ka chhàn lêt veleh chuan a duhthawh zual ta sauh a, chutiangin kei pawh, kan inthlah meuh chuan thâwk kan la dùn ham ham a.

"Tuna i mitmeng tak kha ka duh," a tih chuan ka hawi sawn rang kher mai, a lo nui hawk thung a. A thil sawi awmzia hi ka hre chiang lutuk tlat, amah ka duha ka hlimna lam mitmeng a ni dâwn lo, nichîna a thil tih effect vek kha a la ni si a.

A taksa tichak rang thei tùr ei tùr ka siam lai chuan," Tukina tui vâwta ka han inbual chu a vawt ve reuh asin aw," a rawn ti chhuak boh a, ka thil tih lai chu tàwpsan meuhin ka en vat a," Eng...tui vâwtin maw?!! I la dam chian loh kha, ti tawh miah suh," ka ti vat a, ani lah chuan chuan," Ka tih loh dàn a ni chuang hleinem, ka nat zual phah lo ang," awlsam zet hian a lo ti mai a.

"I in a vâwt si, thlasik lai a la ni zui, chubâkah, nimin lawkah pawh i khua la sikin i tlun hluah hluah a nih kha, a tihchi miah loh," ka ti leh bawrh bawrh a, kei a dam țha zâwk pawh tuilumin ka la inbual char char a nia.

"Siam zo vat vat teh, ka kuah leh châk tawh che a nia."

Nilêngin a damlo chu ka awm a ni ber ang chu. A pangchang thiam viau zui a, Sêna thil sawi kha ka hre chhuak zawk nghe nghe a ni; mahse, nuam ka ti, ka lakah a pangchang ve ni maiah ka ngaihsak a, an inah chuan pangchanna tùr kha a nei dâwn si lo va, a tirh theih chhun Sêna kha a tîr kual ve a ni mai a, Sêna khân a hre thiam lo mai mai a ni ngei ang.

"Zanriah chu ei ve tawh la? Eipui tùr ka mamawh viau a nia," a tih chuan ka hnial ngam lo, ka hnialsak duh lo a ni mah ang chu. A dam țhat loh avàngin chaw a ei țha àwm si lo va, ka ei ve hlauh chuan a lo ei tam ve phah thei a, bâkah, hna a thawk țan țêp tawh a, taksa chak lo tak chung chuan a thawk țha thei lo ang, a chak thuai theih nân chaw ei chu a tân a țha hle si a.

Ka nu ka phone a, ka eina tùr hmun sawi lang lêm lo chuan ka ei chhuak dâwn tih chu ka hrilh a, ani pawh chuan min zâwt dîlchhût bík chuang lo. Chawhmeh siam tùr enin Fridge chu ka hawng a, a chawhmeh lei sa chu a lo chhe deuh vek tawh niin, a damlo rei ve deuh tawh bawk a, a àwm ve tho mai.

Kawmthlang dàwrah chuan thlai hnah ni lo chawhmeh an zawrh chu ka zu lei a, Alu leh dãl chu siam tùrin ka buaipui nghâl a, ka bulah lo țhuin ka chawhmeh buatsaih lai chu min lo thlîr ve reng a.

"A tui ngawtin ka ring," a lo tih chuan ka lei ka chhuah khum ringawt a, chawhmeh siam thiam tak a ni a, keia siam ve tehlul chu tui a ti fahran lo ang tih chu ka hre sa reng; mahse, a dam țhat loh avàngin siamsak ve ngei chu ka duh bawk si a.

"A siamtu a zahawm êm avàngin a tui emaw tui lo emaw i ei țeuh tùr a ni ang," ka tih chuan a nui suk a," A inpëkna a ropui êm a, a tui lo thei lo ang," a lo ti leh sup a.

Kan han ei ve ngei a, pahnih chauh mah ni ila ka chaw ei chu a tui phian mai, a rûkin a chaw ei chu ka chîk reng a, a chaw ei chu a tui fahran lo tih chu ka hre thei; mahse, kei ka awm ve bawk si a, a ei lui hrãm hrãm a ni ber ang chu, ka chawhmeh siamte chu min faksak luam a.

"I theihtâwp i chhuahna kha a ropui, tui pawh a tui khawp mai, ka ei țeuh bawk," a ti a, a la damkawr bawk nèn, ei țeuh chu a har ngei ang; mahse, a ei ve nual tho a, a làwmawm tho tho e.

Ka va ngaihtuah thui lo tak! Kea ka haw a ngai dâwn, zàna hmeichhia, mahni chauha kea kal rak rak phei chu thil nuam tak a ni hauh lo ang le, ka hlau ang em? Ka hlau lo ang, ka hlau tùr a ni lo, a hriatah phei chuan ka hlauh thu ka sawi chhuak 

tùr a ni lo.

"Ke ka lo keng miah lo tih ka lo theihnghilh daih a," ka tih chuan," Ka thlah haw dâwn che nia, mahni chauha hawtîr che ka phal hauh lo," a lo ti mai a, kei erawh chuan," Ka hlau hran hleinem," ka lo ti a. Ani chuan," Ka thlah ang che ka tih chu," a ti leh mai a, ka sawi chhunzawm ta bîk lo.

Nilêng zankhua pawhin awm mah ila ka ning hauh lo ang; mahse, chutiang ringawt chu a theih bîk si lo va, bâkah, min thlah haw ngei dâwn tih ka hriat si avàngin tlai deuh taka haw chu ka duh lo a ni, zàn khaw vâwta a chhuak tùr chu duh lo viau mah ila tihngaihna a awm tawh bawk si lo.

A lum thei tùr ang berin lukhum ka khumtîr a, a nghâwngah puanlum ka bahtîr bawk a, kawrlum chungah Jacket lian zet ka hâktîr leh bawk a, lo sawisêl hauh lo chuan ka hâktîr ang ang chu a ha ve mai, amah ka ngaihtuah vàng a ni tih a hre ve miau si a.

Inkai rialin kan kal a, ka kal chakpui duh lêm lo, haw lamah pawh kal chak lo tùrin ka hrilh mawlh mawlh a, ani lah chuan," Min ngai damlo viau lo teh, i bula ka awm chuan ka dam viau a nia," a lo ti mai a, ka kut chu a hûm nghet sauh sauh a, a kut lum zet avàng chuan ka kut pawh a lum ve vang vang mai.

"I dam țhat thuai a ngai a ni, hna in țan leh țêp tawh si a," ka tih chuan," I lo kal ve leh ang chu," a lo ti a, kei chuan," Ka pa a lo kal peih tawh chuan ka țangkai tampui tawh lo ang," ka lo ti thung a. Kan la sawi  chhuak miah lo nain ka pain kal ve ngei a duh tawh ka ring a ni.

Kan in kan thlen hma chuan," Helai thleng hi ni rawh se, a tâwk tawh," ka ti sap a, ani chuan," Thleng law law ila," a lo ti thung a; mahse, ka dinpui tâk avàng chuan a sawi zawm ta lo. 

"Kal la, ka lo en zui ang che," a tih chuan ka hawi kual deuh zak zak a, tu mah ka hmuh lêm loh avàng leh kan dinna hmun chu a èn țhat loh avàng chuan kan lang chiang chuang lo ang tih hriain dingdihlîpin a hmuiah chuan ka han fâwp zawk a. A rûk chuan ka zak ve deuh tho a; mahse, helai thleng thlengin dam țha lo chung chung lehnghâlin min thlah si a, a phû ve tlatin ka hria a ni.

A lo duhkhawp lo nasa niin, kan han indût leh ngàwng ngáwng phawt a, duh tâwk chin kan nei thei dâwn chuang lo tih hriain dim téin a âwmah chuan ka namsak a, kan inthlah ve thei ta chauh a," Mut tui le," ti sapin ka kal ta nghâl a, min chhâng lo; mahse, min en zui reng ang tih ka hre ve tlat.

Ka nute an lo la meng a, ka nu chuan," Ke i keng chhuak si lo va, engtin nge i lo haw?" a lo ti var a, kei chuan," Min rawn thlah a," ka ti mai a, min zawh chhunzawm ka hlau viau a nia; mahse, ka pain thil dang a rawn sawi chhuah avàng chuan ka hlauhthàwnna chu a reh chhunzawm ve ta nghâl a.

Mut dâwna phone ka en chuan a message a lo awm ve teh tlat a! Phûr ru tak, makti ru zet si chuan ka han en a,  *Mut tui le, Lalhmelțha*  tih tê hi a lo ni a. Hlim zetin ka nui sak a, 'Lalhmelțha'  tih lai tak chuan min tihlim zual, hmel țha min ti ve tak tak a ni thei ang em? Tho lehin dârthlalangah chuan ka han inen a, khawi lai tak hi nge țha a tih lai ber chu ni ang? Ka inthlêk ka inthlêk a, ka țhatna lai hmu chhuak lêm lo mah ila amah berin hmel țha min tih chuan tiin lungawi leh hlim tak chuan khum lam chu ka pan leh ta a.

Hun a liam a, hna pawh an thawk leh țan ta. Ani pawh a țha chho zêl a,  ka pa chu hnaah a kal ve tawh avàngin kei chu dàwr lamah ka kal ve leh tawh bawk a, kan inhmu zing thei ta lo. A hma kha chuan ni tin khân kan inhmu thei kha a ni a, tunah lêm,  kan induh tawn hnuah inhmuh hun a vâng ta khawp mai si a, ka lung a lëng a, hmuh ka châk veng veng țhin. Ka pa lah chuan puih lam thu a sawi chhuak duh bawk si lo va, a fanu hian a kutke bera a neih nèn an induh a ni tih hre ta se eng angin nge a ngaih ang le? Chutiang bawkin ka nu pawhin. Ka la hrilh hauh si lo va, an hriat hunah an thin a rim ang nge an lãwm ang?

Ka chhûngte ka la hrilh loh chhan tak chu kan induh tawnna a la rei lo êm a, hun kal deuh hlek se ka hrilh ang ka ti ve reng a ni, thla khat êm pawh a la tling bawk si lo va, ka la khêk rih a nih ber chu.

Sunday chawhnuah ka lêng chhuak a, Martha-ite ina kal tum ka ni a, Hminga nèna kan chanchin hi ka hrilh ve tawh ang chu ka ti ve a nia; mahse, Hminga'n," An ina lèn ai chuan rawn lêng chho zâwk la," a tih leh tâk avàngin ka chho leh ta zâwk a, an inah pawh kal mah ila Hminga rawn kal a tum ve leh tho a,  a inah hun remchâng kan nei thei lo zâwk ang.

Kan inhmu khât deuh bawk a, insi chêtin kan țhu a, ka ngaih țhinzia leh hmuh ka châk ţhinzia hrilhin ka țawng sap sap reng a, ani erawh chu a țawng ve mang lo, ka kut chu chelh rânin, min enin a khi leh suk suk țhin a.

"Engati nge kan inah i rawn kal ngai tâk loh a?" ka tih chuan," Hna thilah i pa rawn hmuhna chhan tùr a awm tlat lo va," a lo ti mai a, kei chuan," I rawn kal țhin laia i awm dàn kha, min melh chu sawi loh, ka awmna lam pawh i rawn hawi ngai lo kha a nia, kha kha eng vàng nge ni deuh ber?" tiin ka zâwt leh a.

Muang ban charh hian,"I pa kha a zahawm alawm, hna chungchânga rawn kal țhìn ka ni bawk a," tiin min chhâng a, ka kut a chelh loh lama a khabe tuaisak hoh hoh pah chuan," Ka lo en ru ziah che asin; mahse, khatih hun lai khân, a châng chuan ka ngei deuh țhin che a," ka ti chhuak ta sap a.

"Eng vàngin?"

"Ka hre chuang lo, i chêt dàn kha ngeiawm ka ti țhìn che a niang," ka tih chuan," A nih, tunah hian?" a lo ti ta thung a, min rawn en chhuk nghâl bawk a.

"I hriat reng kha, min zâwt kher suh."

*******

Hminga vàng chuan ka hlim tak zet a ni. Zorema vànga khati khawpa nun hrehawm ka hman hnua heti khawpa ka hlim leh thei si hi mak ka inti lo thei lo, Zorema kha ka duh ve viau țhin kha a ni a; mahse, Hminga ka duh dàn hi chu a dang daih si, a bula awm ka thlahlel ngawih ngawih a, a bulah chuan hlim leh him ngawih ngawihin ka inhre bawk. Ka lungawi a, min duatin min fak hluak hluak lo mah se min ngaihsakin min duhna leh thlâkhlelhna chu chêtziain a tilang hreh ngai lo. Ka pa a zah thiam a, a hna thawhnaa a pu ber fanu ka nih avàng pawh hian a châng chuan min ngaihsak deuh ni te hian ka hre hial țhìn. 

Mipa ka lo dream ve țhin chu amahah hian a kim vek kher lo maithei; mahse, ka duh êm êm tho si,  ka belhchian poh leh ka duhna a zual a, a thawhrimna leh a hnaa a rinawmnate hian amah min ngaihsàntîr a, ka ngaihtuah chian cheuh cheuh hian ka duhna hi a zual tulh tulh ni berin  ka hria.

Mipa hausa a ni lo, rim taka thawkin a inhlawh ve țâng țâng a ni zâwk. Mi fate angin lìrthei pawh a nei hek lo, chumi avàng erawh chuan a zak chuang hauh lo va, ka pa fanu ka nih avàngin min duh loh phah chuang lo. Fanu neihchhun leh duat rawn niin chawhmeh siam thiam tak ni lo mah ila min sawisêl chuang lo va, min kiansan phah chuang lo. Ka nihna ang angin min pawm vek a ni ber ang chu, hei vàng hian a ni ka duh zual êm êm ni.

Min duh chhan ka zawha min chhànnate kha ka duh tiu teu viau a ni."

"Mipain hmeichhia a duh angin ka duh che a ni, mi mitah chuan i nu zêm lo a ni maithei, i duh zâwng pawh a hmeichhia vak lo pawh a ni mahna; mahse, hmeichhia i ni a, ka mitah chuan i nù tho tho, chêt nù tum viau a ngai chuang lo, hmeichhia i nih khân a tâwk chiah."

"Chu, ka lo che pà viau țhìn a ni maw?" tiin ka zâwt leh ngat a, ka pi pawh khân nula dangte anga awm tùr khân min hrilh fo țhìn kha a ni a, ka nu pawhin Bike  ka lei dâwn pawh khán a remti lo viau bawk a ni, chutah, Silai ka la nei zui bawk a, ni e, ka hre thiam reng, ka zâwt lui mai mai a ni.

"Ka sawi tawh kha, hmeichhia i ni, chêt nu viau emaw chêt pà viau emaw lam a ni lo, bike leh silai i neih avàng khân i pà ta viau e tihna a ni lo, i duh a, i nei a ni mai. Pathianin mipa tâna a siam hmeichhia tho kha i ni," a ti leh a.

Ni e, ka nihna a hre chiang. Hmeichhia ka nihzia a hre chiang a, kei ngei pawh hian a bula ka awm hian hmeichhia ka nihzia ka hre chiang zual țhìn. 

*RIN NGAMA AWM I DUH CHUAN RINAWM RAWH, RINAWM I DUH CHUAN DIK TAKIN NUNG BAWK RAWH*