☆OKHEE☆ - 19 By Dingdi Pachuau

 ☆OKHEE☆ - 19 By Dingdi Pachuau

Ni tin chhuak ni mah ila hna thawhna hmun a inang bawk si lo va, inhmuh châk viau țhìn bawk mah ila, hun kan nei thei bîk lo a ni. Kei chu tlêmin ka la zalèn thei deuh a, ani phei chu chhùn chawlh leh tlai bàn hun tih lohah chuan office ațangin chhuah pawh a chhuak ngai lo a nia, inhmuh nân hun kan nei thlâwt lo a ni, hmeichhe tân zàna chhuah ruk ruk lah a mawi si lo, bâkah, 'Ka chhuak lawk dâwn aw' tih chhûngte hrilh reng chu dik pawh a dik hek lo. Chuvàng tak chuan kan inhmu khât a, kan inhmuh chhuna kan ãm dùn viau pawh hi a àwm viau a ni.

"Eng nge min duh chhan? Keimahah hian eng hi nge min duh chhan ber ni ang?" Hei hi min duh tih min hrilh ațanga zawhna ka zawh châk a ni țhìn a, zanin chu ka zâwt ta nge nge a ni. Hmeichhe fel ka ni lo va, hmel țha tak pawh ka ni si lo va, ka pa hian sum a nei ve deuh a ni mai a, kei phei chuan 'Ka sum' tia chhuan tùr ka nei ve hauh lo lehnghâl a,ka pa sum thawh chhuah hi ka sum tiin ka sawi ve thei hauh lo, ka pa sum vànga duh a lo nih teh chuan... chuvàng tak chuan ka hre châk lo thei lo a ni.

Inhmachhawna țhu kan ni a, ngun zet hian ka mitah chuan min en vung vung a, a mitmenga min duhna chu chiang takin ka hmu thei bawk, min chhâng dâwn lo emaw ka tih hnuah chuan," Nang?" a rawn ti chhuak ta dût a.

Nuih sak pah hian," I pian a nalh a, i pà bawk a, dàr pharh hlai tak neiin mal sei pui mai i nei bawk a. Chuan, i hmêl hi țha vût ni si lo hian 'hmuh hlàn nghahhlelhawm' an tih ang chi hi i ni bawk a," ka ti duah a, chutah," Chuan, keimah min duhna chhan tak chu sawi ve la?" ka ti leh zat a.

"Ka hre lo," a tih tâk supah chuan," Chutiang chhànna chu eng nge ni ngai?!! A fair lo êm mai a," ka ti hlak a, ka hawi sawn nghâl daih bawk a; mahse, a kut pahnih chuan ka bek tawn tawnah rawn vuanin amah en thei tùr chuan min kuai her leh nghâl vat a, rawn kûn hnai pah hian," Thil tiha lantîr mai hi ka duh zâwk," a ti sup a, a hmui chuan ka hmui chu a rawn dehtîr zauh a, kei erawh chu ka lo chechâng duh hauh lo va.

"I titau lo tiraw?" tiin a kut chuan ka beng chu a khawih neuh neuh a, nui duh hauh lo hian," Titau rual pawh ka nih tawh loh hi," ka lo ti hmak a, ka hawi sawn chuang lo, kan inen ràn tho. Ani chuan,"Hetia i awm pawh hian i hmel țhatna a bo chuang miah lo a nih hi, i lang duhawm sawt zâwkin ka hria," a ti leh dût a, rawn kûn hniamin dam leh dìm tak hian min rawn fâwp dek dek  a, ka chhâng duh lo leh a; mahse, a tàwp duh mai lo, kei lah thîr hlãwma siam ka lo ni bîk si lo nèn, ka fâwp lêt leh ta nge nge a.

A hnuah chuan,"Thil min tiam la?" ka ti leh a," Sawi la?" a tih chuan," Tunah tak hi chuan sawi mai tùr ka hre rih lo, ka lo la ngaihtuah ang e," ka tih chuan a nui suk a," Duhawm viau suh aw," tih leh ka bianga piai chu a rual nghâl a, kei ka lo țê țhat thung a.

Kan inkham hlei thei lo, kan inthlahlel reng mai dâwn chu a nih hi; mahse, nupa kan nih loh avàngin kan ințhen leh rih a ngai bawk si, dâr zât ka han en a, a lo tlai leh duai tawh, a bula hun ka hman hian hun hi a liam duak duak ni berin ka hria. Heti êm êma ka thlahlel thei hi keimah ngei pawhin mak ka ti, mi dang ngaihna rêng rêng ka nei lo va, ani hi ka thupui ber a ni tawp mai. 

"Riak ve mai ta che?"

"I sual mai a nih chu a! Ka riak thei lo tih i hre reng sia," ka ti nang nang a, a bula awma han pangchan kuala han phun deuh nang nangte hi nuam ka ti a, a châng phei hi chuan ka țawngkam leh ka chêt dàn pawh hi a naupangchhia țhìn tih pawh ka hre ve reng; mahse, nuam ka ti tlat si a ni. Kum heti zât ka ni tawh tih hi a bula ka awm hi chuan ka theihnghilh tlat țhìn a ni.

Martha-i chuan an ina lêng tùrin min sâwm zut reng a," Halan-a pawh ka sâwm ve bawk ang a, kan inah rawn inhmu r'u," a ti ve ziah a, hun kan neih lohzia hi a hre pha lo a ni chêk ang chu, hun thâwl neiha lèn dunte chu kan châk ve nèn.

"Sawmkima pawh ka hrilh a, ani erawh chuan mak a ti hauh lo, a lo ring sa daih tawh niin, engtin nge a lo hriat theih bîk ni? Hei, inngaihzàwn rei viau kha a tih chi tawh loh ang aw, fa neih kha in duh ngei ang  a, in tih thuai loh chuan pahnih vêl bâk i nei thei tawh lo mai ang," a rawn ti sauh sauh a, a thil sawi chuan ka nuih a tiza ru khawp mai, fa neih thleng thleng a rawn sawi a nia, a ti râpthlâk! Hminga'n hre ve phei se... Inneih lam phei chu sawi pawh kan la sawi ri chhin lo, chutiang sawi tùrin kan la inkawp rei lo teh lam êm mai.

Hminga nèna kan chanchin hi ka nute hrilh chu ka tum ve deuh ûk ûk a; mahse, a la hma mah mahin ka hre leh deuh a, bâkah, ka nu hian a duh vak loh ka rin deuh avàngin ka la sawi duh lo deuh bawk a, ka pa hi chuan kan induh a nih phawt chuan min pawmpui leh thei mai ang tih ka ring thung a, Hminga a inthlahrun phah ka rin vàngin ka la hrilh duh rih lo bawk a ni; mahse, hrilh hun erawh ka la nei khawp ang, ka zêp reng thei nâng. Julian-a leh Ațana pawhin an hriat hunah chuan min lawmpui ve khawpin ka ring, heti khawpa duh hi ka nei ve ta mai si a.

Zorema pawh a reh ta vang vang mai, a nu pawh ka hmu ngai ta lo, hmuh loh hi ka duh zâwk, ka vui lo khawp mai. Ka rilru an tihrehawm hran lo nain mi zînga han inàn khum kha chu a zahthlâk ve a, hnâr hmuh len a awl bâkah a zawngchhangthlâk lêm loh ka ti a ni.

Mahse, vànduaithlâk takin Inrinnia Hminga chawhmeh tùr ka bazàrpui laiin Zorema chu kan hmu fuh palh ta hlauh mai a, hmuh loh der tum pawh a theih loh, kan inhmachhawn fuh chiang êm a ni. Rui hmel a pu lo va, ani pawh chuan chawhmeh tlêm a khai ve tho, a bazâr ve a ni mahna.

"E khai, in lo innei tawh a ni maw? Ka lawmpui hle mai che u," tiin a nui sûng a, min en tawn deuh sek hnuah Hminga lam hawiin a bân chu a phar a," Buaina ka siam dâwn hauh lo, thinrim hmel put a ngai lo ang. Ka khawngaih lâwk mai che a nia, ka chan ang tho kha i chan a nih ve dâwn avàngin, a rilru pum pui hi i chang hauh lo tih ka hrilh duh che a ni, a ţhianpa Julian-a duh reng chunga nang hi a nei che a nih phei chuan..." tiin a chek tlak tlak a, chutah," Free advice ti ila, in inneih tawh chuan awmzia a awm tawh lo maithei bawk, a pa sum vànga i duh tho chuan..." tiin za lo zet hian a nui a, a kal sawn zui ta nghâl a.

Hminga chu tîm deuh dai hian ka en chho zauh a, thinrim hmel a pu em tih hre chiang lo mah ila hlim hmel zawng a pu hauh lo tih ka hre tho a, a kut hùm ruh dàn ațang chuan a insûm nasa viau a ni tih ka hre thei bawk. Chawhmeh bazâr ve tho mi dangte'n min pèl ve suau suau si a, chuvàng chauh chuan a insûm tluan thei a nih ka ring.

"A thil sawi kha engah mah ngai duh suh," ka ti thla rawk a, ani erawh chuan thâwk a la deuh ham ham phawt a, chutah," Ka hnek lo kha a vànnei tak zet a ni," a ti chhuak sup a, kei chuan a kuta chulsak hoh hoh pah chuan," I ti ţha lutuk e," ka ti sap a, chawhmeh lei tùr kan la neih avàng chuan a bânah chuan kaiin kan en chhunzawm leh ta nghâl a.

In kan thlen chuan fridge-ah chawhmeh kan lei chu ka dahsak zung zung a, siam hmasak tùrte chu hrilhin ka țawng bawrh bawrh a, ani erawh chu a lo ngawi reng thung a, chawhmeh ka dah zo ka hawi chhuaha ka va en chuan ngunthlûk zet hian min lo en rùn niin, ka nuih sak a; mahse, a nui ve miah lo.

"A lum i ti em? Fan ka'n on ang e," tiin ceiling fan chu ka'n on nghâl zat a, a awm dàn rèn rùn chu Zorema kan hmuh vàng kha a nih ka ring mai a, ani kha kan inkâr tichhetu leh boruak siamtu atân ka duh hauh lo.

"Thingpui ka'n chhuang nghâl ang aw, a hmeh tùr chhang tui tâwk pawh kan lei kha," tiin ka kal sawn leh nghâl a, thingpui ka chhuang zo chiah tihah chuan," Kha pa thil sawi kha a dik em?"a rawn ti chhuak ta sup a. Ka inher vat a, ka bulah a lo ding reng tawh niin, kan inhmachhawn ta ràn mai.

"Hminga, engah mah ngai suh ka tih kha," ka tih chuan," Ani kha chu engah mah ka ngai lo, a thil sawi zâwk kha a ni, Julian-a chungchâng kha," a lo ti leh a, min melh chhuk rùn bawk a, ka thurûk nia ka hriat, ka lo thup ve êm êm țhin chu laihlanin a awm leh ta, Zorema khân a hma pawh khân a sawi tawh tak a; mahse, keimah nèn chauha kan awm lai khân a ni a, tunah chuan Hminga ngei pawhin a lo hre ve ta.

"Hmanlai thil a nih kha," ka ti ta sap a," Dâwt a nih kha," chu ka ti duh bîk lo, dâwt hlang hlak a ni bîk tlat si lo va; mahse, tûnah erawh ani ka tawn hnu hian Julian-a pawh ka theihnghilh hmin dèr tawh chu a nih hi. 

"Dàwr nei kha tiraw?" 

'Aw' tih nân ka lu chu ka bu nghat a," Mahse, ka ţhian a nia, vawi khat tê pawh ka sawi chhuak ngai lo, ka tleiràwl chhuah tirha ka duh rûk ve a nia; mahse, țhian kan nihna kha ka dah pawimawhin zahawm ka ti a, ka rilru puthmang chuan kan inkâr kha a tih chhiat ka phal hek lo, bâkah, one sided-love a ni bawk a," ka ti ve ta duah a.

"Nupui neiin fate pawh a nei tawh a ni lo'm ni?" a rawn tih leh chuan," Nei daih tawh e, ka lawmpui êm êm a ni, a hmangaih tak nupuiah a nei a, a tân chuan țhian ka ni reng a, ka ni zêl bawk ang. Hmânah kha chuan ka rilru a lo luah ve țhìn tih chu ka phâ hauh lo, ka vawi khat sawi chhuahna a nih chu, dâwt hrilh che ka duh loh avàngin; mahse, thil kal tawh niin, hmanlai thil, theiràwl hun lai a ni, hun a kal zêl a, rilru pawh a dang ve zêl bawk, tunah chuan nang ka tawng tawh che a," ka ti leh duah a.

Min en reng a, kei pawhin ka en ve reng tho, ka thil sawi chu ring se ka duh a ni. Ani ka tawn hnu hian ka hlimin nuam ka ti a, hei aia hlimna dang hi ka awt hek lo. Hausa tùrin ka duh chuang lo va, tuna a awm ang ang, a dinhmun ang ang hian ka duh vêl vek mai a ni ber, ani aia duh dang ka nei lo.

Muangchâng hian min rawn pan hnai hratin min rawn kuah ta a, kei pawh a âwmah ka bei nghâl vat, a ângchhûngah hian ka him a, ka thla a muang a, ka hlim bawk a ni.

"Ka va khawngaih reuh che êm! I rilru pawh sawi chhuak ngam lovin i up bet tlat chu a ni si a," tiin kachhîp chu a fâwp zoh a," Mahse, ka tân vànneihna a ni ta thung a nih hi, kei chuan ka chhuah dâwn hauh si lo che a," a ti leh sup sup a, a thil sawiin min tihlàwmzia chu, nghet zet hian ka kuah lêt a," Min chhuah miah suh, kei pawhin ka chhuah dâwn miah lo che," ka ti lêt ve a.

Harsatna nei lo chuan hlim takin hun leh ni chu kan hmang ve zêl a, a châng chuan kan kawng tluang tak, kan hlim dùn bawk si hi ka ngaih a ţha lo lek lek țhìn, ka chhûngte'n an la hriat loh vàng hi a ni ngei ang ti tein ka ngaihtuah a, a châng leh 'Tluang deuh chu a țha záwk alawm, harsatna leh buaina lo thleng tùrin ka duh rêng rêng em ni' tiin ka inzâwt leh țhìn bawk a, a țha lo lam lo thleng tùr chuan ngaihtuah loh hrâm ka tum țàng țâng ve țhin tho. 

Tunah chuan Hminga pawh ka pain a ring zual tak zet tawh a, a koah engkim deuhthaw a nghat ni tawh maiin ka hria, ka puihna a mamawh thu a sawi ngai bawk si lo va, han insawi luh ka hreh ve bawk si nèn, ka en liam ve mai mai a ni ber. Ka tân lah Hminga a han ring bur mai chu a hahdamthlâk viau bawk a, kan chanchin ka hrilh hunah pawh mipa dang daih chanchin kha an hre dâwn chuang lo va, ka pa mi rin êm êm kha ka bialpa a ni tih an hriat chuan buaina a awm lo ang a, a rin tlâk a ni tih an hre chiang viau tawh mai dâwn a ni.

Fùr hunpui kan thleng chho leh dâwn ta, Hminga chu ka ngaihtuah ve țhìn a, ke a nei bawk si lo va, July leh August thla a lo thlen hunah phei chuan a hrehawm duh ngawt ang chu, a thuamhnaw a huh duh dâwn bâkah inzàr hulnaa nei țha bawk si lo.

Tlai khat chu kan inah zanriah ei hma hretin a rawn kal ve tlat mai a, ka pain a lo hmu hmasa ber a, a lo chiauau vat a, ka hmu thut chu ka hlim rual rualin mak ka ti ru khawp mai, thil țûl tàwpah lo chuan a thu phei chuan a lo kal lo tawp ang le.

Ka pa nèn an inbiak avàngin kan inrawlh ve lo va, an thil sawi pawh ka hre hek lo. An serious hmel êm avàng chuan pawh pawh ka va pawh duh lo bawk, eng thil nge an sawi ang tih erawh ka hre châk thlâwt, ka pain min rawn melh zauh zauh avàng erawh chuan ka ngaih a țha lo deuh hlek a, Hminga hian kan induh a ni tih hi a hrilh ta mai em ni ang ka ti rum rum a ni; mahse, chu êm chu ka ring ngam lo leh deuh bawk si a.

Chutah, an ding ta. A haw nghâl dâwn a ni ngei ang chu, ka rilru a down nghâl sawt a, chaw ei leh se chhaih leh ka châk asin le.

"Bawihte, han thlah la?"

"A ngai lo ve, pèn kualna tùr ka la nei a, ka hmanhmawh deuh sia, ka chhuak nghâl  mai ang e," Hminga'n a tih chuan ka en vang vang ringawt. Eng thilah nge a rawn hmuh ka hre ve bawk si lo va, min hrilh loh teh chuan aw, a châk lo ang.

Zanriah ei laiin ka pa chuan Hminga'n a rawn hmuh chhan chu a sawi chhuah mai ka ring deuh ngawt a; mahse, a sawi chhuak chuang lo. Ka zâwt hreh ve bawk si a, ka melh leh rùn rûn ringawt a, ka kham tùr ka tho chiah tihah chuan," E, taka, Halan-a khân haw lawk min dîl a, a pa a dam țha lo deuh ni àwm tak a ni, Bawihte, a haw chhûng chu a hmun ruak luahin min pui la?" a rawn ti chhuak ta a, ka phu zawk thei alawm le!

Ka chhâng mai lo. Hminga chu zawh chian ka duh a, bâkah, Sêna pawh chanchin va zawh ka duh, kal ve nghâl pawh ka duh thut thei si a.

Chaw eina ka seng fel hnu chuan Hminga chu ka call a; mahse, a 'busy' char char a, vawi thum ka tih hnuah pawh min chhàn theih loh avàng chuan ka beidawng chuan Sêna ka va be ta ringawt a.

A pu chanchin chu ka zâwt a, ani chuan an in kawta a tlûk avànga insawh deuh a nih thu leh ngaihtuahawm lutuk a nih loh thu min hrilh chuan," Engati nge chutiangte chu min hrilh ve loh a?" tiin ka zâwt nghâl vat a, ani chuan," Nia, ka lo mangnghilh palh a ni e, min hre thiam rawh, bâkah, putea khân hrilh che a duh lo va," a rawn ti leh ta a.

Chuvàngin, min hrilh ve duh lo a lo nih chiah chu, chu pa mai mai chuh, ka pa hnênah zin chhuah lawk ka'n dîl ve nghâl teh ang. Hming-thingtlânga ai hian an in thleng hmasa daih ila a țha nghe nghe ang.

Ka pa bula ka sawi chuan thil dang deuh hlekin ka sawi a, Hminga awm loh dâwn lai taka zin chu ka hreh ve tho thu sawiin," Mahse, zin chhuah ka duh ve deuh thut a, ka țhianpa pu a tlù a, a insawh na deuh hlek tih nichin khân ka țhianpa chuan min rawn hrilh a, min rawn hrilh ve ta chu kan ve nghâl pah a remchâng dâwn lutuk a, bâkah,  ka awmna ngaiah ka awm rei ve leh ngar ngar tawh alawm le, rilru tihthawven ka duh pah bawk a," ka ti duah a, rin loh deuhin a lo phal ve nghâl mai bawk a," A țha alawm, i thawk ve ngar ngar bawk a, hahchawlh pawh i mamawh ve tho, i duh hun hunah i zin chhuak thei ang," a lo ti zêk a, ka làwmzia chu, pui tak hi a ni ringawt mai.  Ka nu erawh chuan," Fùr laia zin hi chu inngaihtuah a na duh êm mai a..." a lo ti thung a; mahse, ka pa berin a phal a, ka nu lo sawi pawh chu dik ti viau mah ila țhulh ka tum teuh lo mai.

Hminga chu ka text a, ka zin tùr thu chu hrilhin ka ruala kal a duh ve leh ve loh chu ka zâwt nghâl bawk a, ka zinna ka inthlâkna tùr thuamhnaw chu Airbag-ah ka dah fel mawlh mawlh a, Hminga pa kan tùra kal tum e ti lo chuan ka nui pah var var a, ka phûr thawkhat a ni e.

Min rawn chhâng ve ngei e, min rawn call thung. Min rawn hnial ka rin tehlul nèn, ka ruala phei a duh thu a rawn sawi chuan ruahmannate chu kan sawi dùn a, a tûka chhuah hun turte sawi felin phone-ah chuan kan han inmuah leh rih bawk a, ka zin tùr chu ka hlimin ka phûr tak zet a ni.

*THLAH I PHAL NGAI MIAH LOH TÙR  HNÊNA INTHLAHNA THU SAWI KHA NGE HARSAIN NÂ ANG KALSAN DUHTU CHE TIH I HRIAT RENG HNÊNA KALSAN LO TÙR CHEA NGEN KHA?*