☆OKHEE☆ - 20 By Dingdi Pachuau

 ☆OKHEE☆ - 20 By Dingdi Pachuau

Zîngah hma takah ka tho a, ka helhhawlh tlat avàng nizànah pawh ka mu țha thei tawh lo, ka nute'n ka thãwm an hriat ka hlauh vàngin ka tho hma lo mai mai zâwk a ni. Ka nu a rawn thawh ve meuh chuan ka lo inpeih fel tawh khawp mai a, ka tlãn chhuak lo chauh tawh zâwk a ni.

"I va tho hma ve!! Khawiah chiah maw zin i tum a?" tiin ka bulah chuan a rawn țhu a, kei chu thovin a in tùr tuilum ka lo thlit vat a, pe pahin, " Sênate khuaah maw le," tiin ka chhâng a, ani chuan," A nih tak chu; mahse, tûn ang hun laia zin hi chu ka duhpui vak lo che asin, nang chauh hi kan neih i ni a, i chesual hlauh ang tih ka hlau ţhìn a ni," a ti leh a.

"Nu, ka fîmkhur viau ang," ka ti a, min ngaihtuah vàngin a rilru tihah lo se ka duh a ni, an neihchhun ka ni a, a rilru tùr ka ngaihtuahin a thil sawi hi ka hre thiam lutuk tlat, min ngaihtuah vàng a ni, min ngaihtuah êm êmtu nu leh pa ka la nei hi ka vànnei tak zet bawk.

Hminga tân tûkțhuan rawng han bàwl leh rih buaithlâk ka tih avànga zîng dâr 6: 30-a chhuah rawt kha ka ni a, ani pawh nichin lawka ka biak khân a inpeih thawthâng tawh a, ka lam chho mai dâwn a ni. 

Ka Airbag chu khaiin in hnuai lamah ka chhuk a, ka nuin min zui bawk a, min zui chhan chu a oil, inzùt nâna hman țhin ka lâk țhensak vàng a ni lo tih ka hria, kawnga tlân chak lo tùr leh fîmkhur tùr chuan min chah mawlh mawlh a, kei pawh chuan ka ngaithla kar a, Garage-a ka luh pawh chuan min chhohsan mai lo, min en liam leh ngei dâwn a ni tih ka hria, a tih dàn a nia, ka zin chhuah dâwn rêng rêng chuan hetiang hian a ti ziah.

Hminga pawhin min lo nghâk reng tawh a, in tùr ka duh em tih min zawh chuan ka in tawh thu hrilhin a inah chuan rei kan awm lo, kan chhuak a, dàwr bula dinna remchâng ka hmuhah dingin kawng laka kan ei tùr leh Hminga pa ei duh tùr zâwng deuha ka rin ka lei țeuh a,  a taksa tâna țha tùr in chi pawh ka lei tel tho bawk.

"Motor i khalh thiam em kha?" tia zâwtin ka țhutnaah chuan ka țhu lût a, ani chuan," Thiam ve sawlh sawlh e," a lo ti mai a," Chuti, Zampuimanga thlàn ațangin khalh rawh aw, i motor khalhah pawh ka chuang châk alawm," ka ti sauh sauh a, khalhtîr ka tum khawp mai. A inhmeh dâwn lutuk si a, kei a bulah lo țhu ve thungin ka titi barh barh ang a, ei tùr ka barh pah zauh zauh bawk ang a...

Zampuimanga Thlàn kan thlen chuan ka ding a," Khalh ve tawh rawh le," tiin ka chhuak ta tharh a, ani pawh chu a chhuak ve mai bawk a, kan țhutna tùra kan țhut luh ve ve hnuah pawh chuan a la tlãn chhuak mai lo, ka en phei deuh hâ a.

"Kan țawngțai ve dâwn lo'm ni?" a rawn ti ta, ka rin loh deuh thil a rawn sawi avàng chuan ka en reng ringawt a, ani lah chu tlàn chhuah tum hmel a pu bawk si lo. Amah lah chu țawngțai tum àwmin a awm bawk si lo nèn, ka hmui chu pet fan fanin kan hma lam chu ka en vang vang a, țawngțai thei lo han nih ringawt chu... a bula țawngțai erawh ka hreh tak zet; mahse, ka han ngaihtuah chiang a, 'Kristian ka ni' ka tih chuan hreh chung chung pawhin ka tih ngei a ngai tih ka hria. A vawi khat nân ka bialpa bulah a rìin ka țawngțai ve ta, ka chham buai deuh nuai ka ring a nia; mahse, ka buai miah lo, fel fai takin ka ti thei a, tlêmin ka aw erawh a khùr deuh. 

Ka țawngțai zo chu ka sa pup pupin ka hria, en pawh ka en ngam lo, ani chuan ka kut rawn vuanin," I ti țha e," a ti sup a, a vawn deuh vang vang hnuah chuan a tlãn chhuak ta chauh a, țawng pawh ka țawng ngam tawh hleinem le.

Mahse, a fel hlauh a, nizàn lam chanchin sawiin a titi ta daih a, a hnu deuhah chuan ka han titau ve deuh zui bawk a. A chhan chu haw a tum thu min hrilh duh lo leh a pa chanchin min hrilh duh loh vàng a ni. Ani lah chuan dam duam hian," Hetiang hi a thleng dâwn tih ka hriat vàng a nia ka hrilh loh che; mahse, hei a thleng ta tho bawk sia, ka hnial duh ta lo che a nih kha," a ti dap dap a.

"Hetianga min thlim zêl dâwn a nih chuan..." ka ti nghat a, amah pawh ka en duh lo lui ve tlat a, ani lah chuan," Ka thlim che pawh a ni lo, i pa lakah ka inthlahrung êm êm a, ka awm loha i awm loh ve zêl chuan i pa a hah dâwn lutuk asin," a ti ve thung a, ka hre thiam tho nain ka lungawi duh mai bîk rih lo," I hna thawh ka thawk thiam ve chuang hleinem," ka ti leh ţãlh a.

"Ka thawh hma pawhin i pa chu i puih reng tawh kha, ka thiam chin hi chu i thiam tih ka hria alawm, chu aia nasa pawh," a lo ti dam leh dap a, a thinrim duh teuh lo mai. A țawng dam dup mai si a, ka titau rei thei bîk lo, han tihtauh khum chu ka khawngaih ve bawk a ni.

Kawng lakah chawhmeh lei bâkin kan chàwl lo va, ei tùr pawh tlãn pahin kan ei mai. Ka barh țhìn a, nuam ka tiin ka hlim a, tu mah dang ka ngai hauh lo. Amah en reng thei tùrin aa lam hawiin ka țhu țha sauh sauh a, ani lah chuan," Min en reng hian nuam ka ti, ka zak ve hauh lo," a lo ti duh lek chauh a, chuti na nâ nâ chu ka ti a, ka en reng mai.

An khua kan thlen dâwn hnaihah chuan Sêna ka phone a, kan thlen chin chu ka hrilh a, ani pawh chu a lo phûr tawh nasa mai niin," Kan lo nghâk reng tawh che u alawm, ka pu phei chuan a hmu châk tawh lutuk che," a rawn ti ham ham a. Kei pawhin ka hmu châk reng; mahse, ka lai deuh ang em le? Tunah chuan a fapa bialnu ka ni tawh si a, ka zah thar riau ang a tiin ka ngaihtuah neuh neuh a.

An khua kan luh dâwn chuan motor dârthlalanga inenin ka sam chu ka huih țha thuak thuak a, a lam hawi lehin," Min en teh, ka lang dik lovin ka lang bawrchhawr em?" ka ti a, ani chuan min rawn thlêk chuang lo hian," I țha! Engtiklai pawhin i țha reng,"tiin a kuzungpui chu a tipir vàn a, kei erawh chuan," Min en ve phawt la?" ka ti deuh tlat thung a.

Tlãn zàwiin a ding ta dat a, a rawn hawi nghâl zat bawk a, kei pawhin ka lo en ve kar a,"khawi maw he lai hi," tiin a kut chu rawn pharin ka biang chu a rawn tawk a, chutah rawn kûn hniam deuh thutin ka hmuiah chuan a rawn nûl thuak a," A țha vek e," a ti sup a, a nui suk bawk a.

Ka duh khawp loh avàng chuan ka hnaih sauh a, ani pawh chuan hre thiamin min rawn vuan zui leh zat bawk a, kan han inmuah leh vawng vawng a, tukina a in ka thlen chhoha kan tih bâk kha kan la ti leh ta miah lo va, ka han duh khawp lo viau pawh hi a àwm ve tho asin.

An kawtah kan ding ta dat a, veranda-ah chuan Sêna leh a țhiante pahnih chu lo awmin min lo chiauau vat a, kan lamah rawn kalin kan inchibai diat diat a, kan bag la chhuakin in chhûngah an luhpui ta nghâl a, in chhûngah chuan Sêna nu leh țhenawm hnaivaite pawh an lo awm ve nial a, Hminga pa pawh chu țhutthlèngah a lo mu a, min hmuh chuan lo thawh a tum ve a; mahse, Hminga chuan a chelh vat a.

"Lawmi chu, i dam maw? Inhmuh a va khât ve le! I rawn kal thei hlauh chu a làwmawm hle mai," muang ban zet hian a ti a, a kut vuai ve tawh tak chuan min vuan ràn a, a aw chu ring lêm lo mah se a hmelah erawh hlimna ka chhiar thei a ni, min hmu chu a lãwm tak tak a nih ngei ka ring.

"Ka dam alawm," nui sâng hian ka ti phawt a, chutah," I chanchin ka hriat veleh rawn kan che ka tum nghâl a, a zia lo tak zet a ni tiraw? Mahse, damdawite i han ei ang a, a hma aia tlangvâlin kan awm chhûng ngei hian i dam hman ngei ang," ka ti leh zat a, Hminga pawh chuan ka thu sawi chu a lo zàwm ve nghâl zat a," I huam a nih chuan Lunglei lamah pawh kan inphur thla mai ang a, hetia tawrh tawp ai chuan a țha zâwk ang," a ti dam dup a. Chutih lai chuan Sêna nu chuan Hminga nèna kan thingpui tùr chu a rawn chawi phei a.

Mi dang lêng veho chuan min en duh viau tih ka hmu ru reng a; mahse, ka haider lui ve tlat thung. Hminga pa chu a khât tâwkin a țawng ve charh charh reng a, a țawng dàn chu a hrehawm hmel si a, hrehawm ka lo ti tawp; mahse, a hnu deuhah Hminga chuan," I hah lutuk ang, chàwl hahdam rih rawh, țawngna hun chu i la ngah dâwn tho alawm," tiin a țawng chu a khapsak ta nghe nghe a, ani pawh chu a ngawi chhunzawm ve mai bawk a.

Mi dang titipui tùra  Hminga a kal sawn hnuah pawh chuan kei chu ka la țhu reng a, Hminga pa kut chêr țhiak mai chu ka hmehsak neuh neuh a, Hminga chu ka khawngaih a, a pa lah na tuarin a let reng bawk si, ka khawngaih ru vawng vawng a ni, dam țha taka inhmuh an thlâkhlelh ve dâwn tehlul nen, an inhmuh dàn hi a hlimawm viau si lo va, Hminga rilru chu a hrehawm ve ngawt ang chu, mipa a ni a, a tilang lo mai mai ni-ah ka ngai.

Tlai lam eirawng bàwl hun a lo nih pawh chuan puitling lam chu haw an la awm lo va, Sêna țhiante pahnih erawh an haw rih thung a, Sêna nu chuan a pa chu a lo awmpui chawt a ni ngei ang, ani pawh haw tum chuang lo chuan a che ve sârh sârh reng a, ka puih ve a ngai a ni. A hming ka hre bawk si lo va, koh dàn tùr ka hre hauh lo mai ka ti. 

Mahse, vànneihthlâk takin Hminga'n a ko ri chu ka hre fuh ta hlauh mai a, 'Mami' a ti a nih chu, 'U Mam' ti ve ringawt mai ang; mahse, a lo hre lo palh mai ang a...

Amah zâwk chuan min rawn ko ta, ka koh kher pawh a ngai ta lo ve. Rei lo te hnuah, kei țawng duh mi ka lo ni bawk nèn, kan titi dùn ta bawrh bawrh a, mipaho an titi hlànin kan pahnihin rawng kan bâwl a, Sêna pawhin min lo pui ve deuh tho bawk a, bâkah, zîng lama an bàwlin tlai lam an lo bàwl kêp pah a niang, chawhmeh siam vak a lo ngai hran lo va, chawhmeh kan lei haw pawh kan siam belh hran lo.

Hminga'n a room min kian leh a, ka sawisêl lo. Ani erawh chu a pa bulah, a khum kianga thingrem lian sei țha takah chuan a mu ve mai dâwn ni àwm tak a ni, U Mami pawh Hminga nèn kan awm tawh rih bawk a, a haw ve rih ang. Sêna lah a țhiante'n an rawn riahpui leh dâwn bawk, a nuam leh viau ang chu.

Zanriah ei khamah Hminga hnênah ka nu inzùtna oil ka țhensak chu ka pe a," Ka nuin inzùt nân a hmang țhìn a, a ngeih viau țhìn asin, hmang ve chhin ila," ka ti a, bûr chu a en vang vang phawt a, chutah, min en lehin,"I ngaihtuah kim hle mai," a ti sup a, a mitmenga làwmna chu ka hmuh hmaih hauh lo. Fiam deuh salh ka duh avàng chuan,"I tân te chuan vàna arsi lâk ngai pawh ni se..." nui chung hian ka ti a, a nuih ve mai ka ring a nia; mahse, a nui ve hauh lo. Min en vang vang hnuah duat takin min kuah a," Ka lãwm e, ka sawi tùr ni àwm zâwk tak sawi mah la," a ti sup a, a room-a awm kan ni bawk a, mitmei vèn tùr a awm rih lo nèn, kan induhna chu chêtziain kan lantîr leh rih a.

Hminga haw vàng pawh a ni ang a, a pa chêtsual vàng pawh a ni thei tho bawk ang chu, an ina lo chuangkai an awm ve țak țak a, thingpui lo pêk zêl an ngaih avàng chuan Sêna chuan hnaah a lo neih tawp a, a țhiante an rawn lang ve leh tawh bawk nèn, an pathum chuan an ri ve lai lai a, ka pu pawh a room lamah la mut lovin țhutthlèngah a la mu a; mahse, inlêngte chuan rawn țhut hnaiha rawn biak kher an tum lo, U Mami chuan lo kàwmin a lo chiauau zêl a, a pa chanchin chu an zâwt psh zêl bawk a.

A ngam ang tâwka nâin a taksa chu kan zùtsak a, Hminga'n a taksa a zùtsak laiin keiin a kut leh ke ka lo zùtsak thung a, a taksa nâin a khua a tihsik lëm loh avàng chuan a taksa kan zùtna oil rimtui fahran lo chu towel huhin ka hrûk faisak leh vek a, a lo inthlahrung khawp mai,"I lo thleng hlawt a, min buaipui nghâl char char chu a ni mai si a, i hah tawh ngawt ang," a ti chuar chuar a, kei chuan," Nangmah kan tùrin alawm ka lo kal vang vang le, i nurse ka nih ber chu, inthlahrung rêng rêng suh, tihian zan tin kan zùt che ang a, i dam thuai mai ang," ka ti a, kawr kan hâktîr hnu chuan towel chu su tùrin bathroom-ah ka luhsan ta nghâl a.

Hminga pawh a pa taksa a zùtsak avàngin a thlan a tla nasa a, a inbual leh rih a, bathroom ațanga a rawn chhuak ka hmuh chuan hmuhnawm ti tak hian ka en vang vang a, towel a rawn veng chhuak mai a, thuamhnaw dang eng mah inbel a nei lo, ruaka a awm ka hmuh vawi khatna a ni a, hmuhnawm ka ti a ni, a dul sek dàn pawh ka duh dàn chiah, kuah pah khân han chùlsak riak riak ila...

Min ko ri ka hriat tâkah chuan ka ngaihtuahna ram ațangin ka harh zawk a, a hmel chu ka en chho vat a, min nuih suk pah chuan," Inbual ve la?" tiin a mit chu a'n zìm deuh hlek a, min en reng bawk a, ka thil ngaihtuah chu a hre thiam a ni ngei ang chu, ka sen deuh awp awpin a nia ka rin ni, ka ngaihtuah 'sexy' si.

Thingtlâng niin chhùn lama hna hahthlâk tak tak thawk an nih hlawm avàngin an lêng rei hlawm lo va, an haw hnu lawkah U Mami pawh a haw ve ta thuai a, Hminga chuan a pa chu room-ah pawm lûtin rem takin a mutna chu a siamsak nghâl a, kei pawh chuan a thil sin tùr lo buaipuiin ka lo sintîr vat a, chumi pah chuan zan rei lama a nuam lo deuh a nih chuan min hrilh vat tùrin ka hrilh nghâl a. Hminga mutna tùr chu ka phahsak ve nghâl bawk a, ani chuan," Nula hmel țha mutna min siamsak a ni bawk a, ka mu tui ngawt ang," tiin min fiam ve zuk a, a pa bul a ni si a, ka nuih ngam țâwk ringawt.

Ka mut tuizia mai chuh, Hminga pa bulah khân a nawmsam loha min kai harh ve mai tùr khân ka hrilh ve kha a ni a, ka harh lo hrim hrim. Zînga ka harh chuan an lo tho vek tawh a, dâr 7 a lo ri țêp tawh bawk, Sêna lahin min lo la fiam zui, zahthlâk ve duh tak a ni.

"Mo thar tûk hi chuan thawh hmât hi a har ve alawm," tiin, a nui sûng bawk si a, ngei hleih theih pawh a ni lo, Hminga chu a pa room lamah a țawng ri ka hria a, ka inphih fai hnuah ka lût ve a,"I mu thei em, ka pu?" tiin ka han zâwt nghâl a, ani chuan," Mu thei e, nau pian țha an sawi ang maiin ka muhìl chiah chiah mai, i mu țha thei em?" a lo ti ve a, kei chuan," Ka mu tui mah mah a ni, zîng thawh pawh ka hai hial a nia, a zia lo tak tak a ni, ka mu kha ka harh chhin tawh lo rêng rêng niin," ka ti a, Hminga chuan," A țhat chu," a lo ti sup a, a pa chuan,"I chau àwm si a, i mu țha thei chu a làwmawm a nih chu," a lo ti ve leh a.

Tûkțhuan kan ei hmain ka pu chu chaw kan barh a, a kîl ve theih loh avàng chuan chutia tih mai chu a ngai si a, chaw kan ei khamah Hminga chuan a pa hnênah chuan Lunglei lama kal mai chu țha a tih leh tih loh a zãwt a, ani chuan," A ngai lo ang, hei nimin lam ai chuan ka taksa pawh a zia viau a nia, min zût leh ang a, ka zia mai ang," a lo ti tlat mai a, a sawipui chhunzawm ta rih lo va.

U Mami pawh a rawn lang leh thuai a, khua a lum phian. Anni pawh chuan," Khua a lum leh dâwn mang e; mahse, tlai lamah ruah a sûr ve tawh êm ang chu maw," an ti a, fan a vir vut vut reng a, kei pawh ka thlan a tla dap dap reng mai. Upa lam deuh ina lo chuangkai an awm ve nial bawk a, Sêna pawhin eng mah a thawk lo. Leilet lama kal tum a ni a, a țhulh leh a ni,  a rùk tak chuan kal ve ka châk khawp mai, thlai a awm ve tawh àwm bawk si a, chhùna thingpui hmeh atân pawha an siam chu an leilet kianga vaimîm an tuh, la no te te an keh chhum hmin chu a ni a, a tui khawp mai, leilet chu hmuh ve ka châk bâkah vaimîm chu ka kêk ve châk bawk a ni, hun kan la nei ve êm ang chu maw.

Nilêngin inah chuan kan awm a, khaw lum chu tawrh tham tak niin ka hria, fan tivir reng mah ila a boruak hrim hrim chu a lum a ni tawp mai, Sêna lah chuan ka thlan tla chu min fiamin," Kan khua chu i ngeih dâwn khawp mai, i thlan a tla țeuh țeuh ang a, i ngo belh telh telh bawk ang a, i no sen suah mai ang," a ti țhin a, a ni lah tak a, ka thlan ka inhrûkna lamah ka biang phei chu  ka hru tài zo vek tawh maiin ka hria; mahse, ka phunnawi hauh lo, Hminga chènna leh awmna khua a ni si a, nuam ka ti tho tho.

Zanriah chawhmeh atân U Mami'n Baibîng rêp buh nèn a bai a, ka ril a tițâm rawih rawih mai. "Hminga'n i duh tih a sawi a, ka rêp țeuh alawm, i hàwn phei ve dâwn nia," a ti sauh sauh a, ka làwmzia mai chu a. Ka lawmna belh chhah zualtu chu Hminga'n ka chawhmeh duh zâwng tak a lo la hria chu a ni, a memory a țhat viau dâwn hi, fate pa atân a țha dâwn khawp mai, ka thil ngaihtuah avàng chuan ka nui sak a.

Zanriah ei khamah ka pu chu inthiar a duh avàngin a room lamah kan chawi lût leh rih a, bedpan an lo hawh fel vek tawh niin, kan awm ve chu a duh chiah loh avàngin kan chhuak a, Hminga'n thingpui a lam avàng chuan a sen hâng ka va thlitsak a, ka pêk lai chuan," Ka lãwm e," a lo ti sup a, mi dang an awm ve avàng chuan țawngkaa chhâng ngam lovin ka thiam ang tâwka no nalh chuan ka melh zui ralh ringawt a.

Veranda-ah Sêna nèn kan țhu a, a țhiante vawiin lamah an lo lama an riah luh avàngin zanin chu an rawn lang thei lo va, a reh ve deuh ruihin a hriat a ni.

"U Lawm, thil ka zâwt ang che aw?" a tih chuan a lam ka hawi vat a," Min zâwt la?" ka ti zui zat a. Ani chuan," Putea hi nei mai la?" a ti ta chhak mai! A thil rawn sawi chhuah chu ka rin loh deuh a nih avàng chuan ka melh reng phawt a, ani chuan," A senior ve tawh tho sia, a duat thiam ngawt ang che, bâkah, a en dàn che hi, eng emaw riau a awm tlat a ni, ka putea mah ni se a rilru hi a sual lo tih ka hria a nia, nang lah i lo fel ve tho bawk a, in inkawp rem ngawt ang," a ti leh a.

Ka phùrzia chu, thup har ka ti zâwk! Phûr tak ka ni; mahse, phûr tak anga lang duh lo chuan ka nui hak a," Min duh tawp nâng, a thuhrimah, i  pu a damlo tih pawh min hrilh duh lo a nia," ka ti ve thung a, ani chuan," Kha kha chu tihbuai che a hlauh vàng alawm, ka hria, zei lo ve chi hi a ni ve bawk sia, a rilrua awm ve pawh hi i bulah chuan eng mah a sawi ngam pawhin ka ring lo," a ti leh barh barh a. A rûkin ka nui ka nui ringawt, a putea dâwih lohzia leh zeizia chu a hre hauh si lo, keiin ka hre chiang tawh nasa mai si a.

"I putea chuan keini angte chu min duh tawp nâng, ram hna thawh ka zei àwm bawk si lo, eng mah hna thawh nei si lo hian ka tlâw êm êm ringawt a, chutah, ka la thatchhe zui bawk a," ka tih chuan," A, nang chu nula hausa i nih kha, in hausak êm kha maw," a ti phawt a, chutah," Putea i neih phawt chuan hna i thawh a phal teuh lo ang, a duat viau ang che, a hmaa a bialnu pawh kha a duat teh mai a nia," a ti leh a.

A hmaa a bialnu. Tu nge ni ta ang? Ka hre zui zêl châk kher mai, khawia mi nge? An inngaizâwng rei em? A hmel a țha em? Engati nge an ințhen ni ang? Zawhna hlîr mai a ni ka rilrua awm chu.

*HLAWHCHHAMNA BUL CHIAHAH HIAN HLAWHTLINNA A AWM*