☆OKHEE☆ - 21 By Dingdi Pachuau

 ☆OKHEE☆ - 21 By Dingdi Pachuau

"I putea hian bialnu a nei ve tawh maw?"  Sêna hriatah chuan makti àwm deuh chuan ka awm duh lo va, a rûk taka ka phûrzia pawh ka thup hrâm hrâm a ni. Hminga ngeiin  bialnu pakhat a neih tawh thu kha min hrilh tawh ngei a; mahse, bialnu pakhat a neih tawh thu chauh tak tak kha a ni min hrilh ni, a duat thu phei chu ka hre lo hrim hrim, Sêna hi zâwt chhuak vek teh ang.

"Țawng ring suh, a lo hre palh rêu rêu ang," a ti sar sar a, chutah," Nei ve tawh ngei e, te reuh tê a nia, a fanu ni àwm zâwk tak a ni," tiin a nui hak hak a, sawi zawm lehin," A têt reuh avàng erawh chuan a hmel chhia tihna pawh a ni lo, kan têt lai deuh ngang kha a nia, a ngo avàngin kan lo hmu hmel țha viau pawh chu a ni maithei tho bawk a," a ti leh barh barh a.

"In khuaa mi hi em ni?" ka tih chuan," Ni lo ve, an khaw hming chu ka hre tawh lo, amah kha chu 'nurse a ni' an tiin ka hria, putea'n a duatzia chu maw,  a rawn zin ve pawhin huana a kal ve pawh a phal ngai lo, inah a awmtîr mai mai a, thingpui pawh a siamsak vek zêl. Hna a thawk ve ngai lo chu kan awt thei asin,  Vaimim rawh pawh a thiam lo va, putea'n a rawhsak ziah, Vaimim a rawh thiam lo te chu mak kan tiin 'An khuaah a awm ve lo a niang' kan tia, kan ngaisâng thei râp maw le! Motor an neih thu a sawi phei chuan a pain thingrem khat tlata pawisa a neih ringin kan ngaisâng a nia aw!! Mahse, U Lawm, anni ai chuan in hausak ka ring daih zâwk, in in kha a nawm bâkah a zau bawk sia, in dàwr lah a changkãng bawk si," a ti leh duah a, he nau rilru thianghlimzia tak hi chu aw... lian thûng mah se a rilru hi chu, naupang tak a ni ringawt.

"Putea hriatah chuan sawi chhuak miah suh aw. A senior ve tawh sia, nupui nei lovin a awm rei tawh bawk nèn, ka pu hi ka khawngaih țhin a, a upa ve tawh bawk sia, putea nupui neih hma hian a thi daih ang tih pawh ka hlau țhin," a tih chuan," I pu emaw i nu emaw nang pawhin emaw nupui nei turin in hrilh țhìn lo em ni?" tiin ka lo zâwt a.

"An hrilh tawh ngai lo, a zei lo bawk sia, kan khuaa high school zirtîrtu, Lunglei ațanga rawn awm pawhin a duh țhin a; mahse, a ngaihsak duh lo, U Mary nèn an ințhen hnu ațang khân ngaihzâwng a nei tawh lo niin ka hria, U Mary kha a duh ve êm a ni, a duat thei bawk si," a ti leh barh barh a.

Kan ngawih vang vang lai chuan in chhûng lam ațangin,"Sêna, lo lût lawk teh," tiin Hminga chuan a rawn ko a, a luh dâwn chuan," Sawi miah suh," a ti leh sap a, nui sak sak chungin min luhsan ta nghâl a, Hminga a rawn chhuak ve ta thung a.

"Eng nge in lo sawi a?" a rawn tih chuan nui chungin," Thil ho mai mai, i hriat ve chi loh," ka lo ti a, min en reng lai chuan," Kan chàm chhûngin vawi khat tal leiletah kal ila?" ka ti ta daih a, ka kal a phal leh phal loh ka hre châk a ni. Sêna sawi dàn khân a bialnu hlui kha chu a duat si a, huana kal pawh a phal ngai loh kha, min duat ve leh duat ve loh ka hre châk tlat a ni. Test ve ka duh hrim hrim.

Ani chuan," Khua a hnâwng si a, i peih dâwn em ni?" a lo ti mai a, ka châk viau a ni tih chu ka thup hrâm hrâm zâwk, a pa damloh vànga haw a ni miau si a, chutih lai kâra leileta kal lo sawi ve chu ka inthlahrung ru viau a; mahse, ka châk tho bawk si a, ka zêp duh ta bîk lo va," Aw, Vaimîm kha ka kêk ve châk a, chuan, thlaite pawh ka hmu châk bawk a," ka ti sap a. Ka rin loh deuh hian,"I duh phawt chuan le, kâr tàwp lamah ni rawh se aw," a lo ti sup a, ka rilru 50-50-a a inbùk avàng chuan ka en reng ringawt a.

Mut hmunah chuan ka ngaihtuah a, Sêna sawi dàn khân a bialnu hlui kha a duat êm avàngin huana a kal ve a phal lo va, kei chu min phalsak ta a. Ka lãwm a, ka lãwm lo ru tho bawk. Ka duhna min phalsaknaah ka lãwm a; mahse, min duat ve vak lo tihna a ni mai si a, chu tak chuan min tilunghnûr a ni. Chuvàng chuan, mut dâwna min mangțha nâna min fawh pawhin a hmui ka sehsak nghe nghe a ni.

Martha-i'n min rawn bia a, ka zin tih ka hrilh chuan a rawn phûr leh hle mai a," An khuaah i zui ve maw? Awi, râpthlâk che hian! I va han duh dàwr dàwr tak!" tiin a rawn nui awr awr a, chutah," Halan-a a haw tih ka hriatin ka rawn ngaihtuah chhuak nghâl rêng che a...Nuam ti lutuk suh aw, che na viau lo la, a chhûngte bulah kha chuan i zia kha tlêmin thup ve la aw, an lo hlau viau che ang e," a ti leh zãrh zãrh a.

Ka nungchang leh zia hi thup vak ngaihna ka hre lo, ka lan dàn ang hian ka nung tawp a, inthup vak dàn pawh ka hre lo. Ka nihna anga min ngaina lo leh min duh lotu lakah inlâk fel viau ka tum chuang lo va, mize thup hi a țùlna ka hre hauh lo bawk. Thup pawh ni ila a lan chhuah hun a awm tho tho, ka peih zâwng a ni ve lo va, ka thiam hek lo.

Hminga pa pawh a zia chho a, a enkawltute'n kan zir hrim hrim nge ni, a changkâng chak kan ti a, bâkah, doctor kan râwn pah bawk a, damdawi țha a ei ve bawk nèn, kâr tàwp lamah phei chuan tiang nèn pawh a kal ve thei ta hial a, a lãwm ber ka ni hial ta ve ang, a chhan chu Hminga Aizawla a phei a ngai leh țêp tawh a, a pa ngaihtuah êm êm reng chunga hna thawk tùrin ka duh lo a ni.

Leilet kan kal tùr ni pawh a rawn inher chhuak ta, ka phùrzia chu, ka helhhawlh a, chaw pawh ka ei țha thei lo hial. Sêna'n min fiam a, a puin min fiam bawk,"Puar taka chaw i ei loh chuan nakinah i ril a țâm mai dâwn asin," tiin; mahse, ka ei țhat theih phah chuang lo. Hminga chuan," Chaw kan fûn ang a, duh leh thlâmah chawhmeh siamin chaw chu kan ei leh mai dâwn nia," a ti a, ka pawm khawp mai. Tunah hi chuan min duat ve lo tih lam kha chu ka ngaihtuahnaah a awm pha tawh lo hrim hrim, phùrna hlîrin ka khat.

Bike-a kal an sawi nain,"Kea kal a châkawm alawm," ka ti tlat a, ke chuan kan kal ta poh a, khawlaia kan kal chu min lo en duh nasa mai niin, mikhual chan ka chang ve bawk nèn, min en duh chhan chu mikhual ka nih vàng a nih ngei ka ring. Sêna chuan,"Khawpui nula hian huan leh leilet vêla an kal châk ka lo ring ngai miah lo va,"a ti chhuak ta hliai a, rang fê hian," Kei chu khawpui nula ka ni ve lo tihna," ka lo ti var a.

"Khawpui nulaah pawh a chhe lo ber pawl maw le," a lo tih leh chuan ka nui hak a," Ka lãwm e, ka pu," tiin Sêna chu ka en a, ani pawh chuan," Kei pawh le, ka pi,"a lo ti ve bawk a, kan nui dùn hak hak a, Hminga erawh chu a nui ve lêm lo a niang, țawng pawh a țawng ve lo. Zîng lamah ruah a tla sek a, chu chuan kawng chu a tinãl ve deuh a, vawi khat phei chu ka tawlh zawk mai a, ka hnung chiaha kal Hminga chuan min lo ban hman zâwk a, chuti chu ni lo se chuan ka tlu berh ve khawp ang le.

Leilet chu hmuh a nuam khawp mai, a hring dap reuh a, hmãn kuma thlâm kan kal tawhnaah khân thlâm thar an lo sa tawh niin, a chhãwngin an sa reuh a, a nuam reuh tawp maw le. Ka hlim leh nuam ti chu ka nui sûng reng mai a, ka țhu hle hle thei lo bawk. Sangha dìl lamah pawh khân ka kal leh châk viau mai, ka kalna kha a rei tawh a, kal kual leh vak ka châk hrim hrim bawk.

"Hna thawk tùra kal kan ni lêm lo bawk a, hmanhmawh lo ang u aw, a hmasa berin mei ka han chhêm phawt ang a. Pute, nangni pahnih chuan Vaimîm keh tùr lo han zawng ula?" Sêna'n a tih chuan," Nia, kei chu ka duh reng mai," ka lo ti vat a.

An Vaimîm chu a țha hlawm kher mai, a sângin a lian hlawm a, a țhen chu Vaimîm la awm miah lote pawh a awm tho, an tuh hun a inang lo ve a niang, a kûng a tam a, an ding sung bawk sia, hralh ta se, pawisa chu an la lût ve nualin ka ring. 

"Han kêk chhin la?" a tih chuan ka hnaih ber kûnga mi chu ka han țhuai thla tawp a, a chem chu ka dîl nghâl zat bawk a, chem min pêk chuan ka Vaimîm keh chhîp lam leh a bul lam chu tãwi têin ka han tan ve ve a, nui var var chung chuan ka kheh ta nghâl a, Vaimîm chu a lo la no kher mai.

"La zuah chan deuh hlek chi a nih àwm hi tiraw?" ka tih chuan Vaimîm ka keh chu lain a en vang vang a, a nui ta suk a," I vawi khat kehna a ni tiraw?" a ti ta sup a, kei chuan ka lu ka lo bu nghat a, Vaimím chu ka ipte ah laia rawn khung pah chuan,"I thiam lutuk e, tlêmin a la no deuh e tih mai a ni," a ti a, chutia min fak ve deuh chu nuam ka tiin ka hlim rilru khawp mai.

"Min lo zui la?" a tih chuan ka zui ta vat a, kal paha," Hetia i en tawp hian keh hun leh hun lo i hre thei em?" a tih leh chuan," Hre lo ve, ka risk tawp mai," tiin ka lo chhâng a, thûm deuh dût dam dup si hian keh hun leh hun lo hriat theih dàn chu min hrilh pahin amah chuan zei zet hian a han kêk zui nghâl a, ka keh dàn nèn chuan a inang lo nasa mai niin, ani keh ve chu keh hun dik tak a lo ni nghe nghe a.

"Ka keh ve kha, a la no sia, a rûk têin i lo ui ngawt ang a?" ka tih chuan ding datin," Engah nge ka ui ngawt ang? A tam hi," a ti mai a," A, ka hre chuang nâng, tlaw min ti ngawt ang chu," ka ti leh a. Min rawn hmachhawna dingin,"I vawi khat kehna a nia, chutiangin ka ngai hauh lo, nakina kan keh leh hunah chuan i kêk dik thlap tawh mai ang," a ti a.

Kan kal kual zêl a, maian min lâkpui leh bawk a," Maian ka lâk vawi khatna, vawiin chu ka vawi khatna zêl a nia, a nuam ka ti," tiin intithei zet hian ka han ak nghâl zat a, ani chuan," Maian chu 'sik' an ti țhìn aw," a lo ti a, nui chung hian," Aw le, ka lo hre reng tawh ang e, Boss," ka ti a.

Thlâm lama kan lêt hnu chuan ka thak deuh sup supin ka hria a, ka ke thak hiat tùra ka han inhlîm chu Vangvat ka hmu ta, ka ding zawt a, ka țê nghâl chùl mai bawk a," Ka ke! Vangvat a awm," ka ti ţial ruaiin ka ring, Hminga chuan min rawn lâksak ta vat a, Sêna erawh chuan min nuih khiah khiah thung a.

"Engah nge min nuih a? Ka hlauh nèn chuan a," ka ti hlak hlak a, ka hlauhna avàng chuan ka thâ pawh a la khùr dar dar mai, Hminga pawh chuan a lo khap ve sup a, ani lah chuan,"Nula hmel țha pawh hi Vangvat hian a lo duh ve deuh a niang, keini'n kan kai ve hauh si lo va," la nui sûng chung chuan a ti leh a, ngei rilru deuh chuan ka en a, a nuih sûng reng vàng erawh chuan ka thin chu a rim hlei thei chuang lo.

"In Vaimîm keh chu han rawh ang hmiang," Sêna'n a tih chuan ka iptea mi chu ka pe vat a, kei erawh chuan Hminga keh zînga mi pahnih  ka la ve thung a, a mei chhèm vàm hamah chuan ka rawh ta nghâl a.

"Hei chuh, i keh a ni maw?" Sêna'n a tih chuan," Ni ang chu," ka lo ti mai a, a nui zui leh ta khiah khiah a," I va han kêk thiam tak aw, ka duh reuh tawp che," a ti a, a nui hmêl chu enin,"Min duh tùrin i tling lo, i naupang lutuk!" ka lo ti thung a.

Ka Vaimîm rawh chu a hmin hmasak zâwk avàngin Sêna chuan hmun thumah a bung a, a hâng tui si a, ka kham lo kher mai. A dang kan rawh chu a hmin leh thuai theih nân mei chu ka chhêm țha sauh sauh a, a hmin leh hnuah pawh chuan a dang chu ka rawh leh zêl a.

"Kan monu thar hi chu i fel mang e! Vaimím rawh thiam si, a keh lamah erawh lâk tlâk vak loh mah la i fel hi ka ti ve hrim hrim, hmel țha bawk si, hausa bawk si, bike leh car khalh thiam bawk si, silai nei țha bawk si," Sêna chuan a ti duah hluah a, a malah chuan ka va bensak thlawrh a.

"Sî hlîr ka lo nih chiah chu, senior ve tawh bawk si ti tel law law bawk la?" tiin ka nui a, chutah,"Maian hi kan hîk nghâl mai dâwn êm niang?" ka ti nghâl zat a, Hminga chuan," A pawi hleinem, hîk r'u, Sangha ka han en chhin ang e,"tiin a ding zui nghâl a, kei erawh chuan,"Ngai lo, ka en ve duh, Sêna, lo hîk mai rawh aw," tiin ka ding ve nghâl zat bawk a. Sêna chuan," Han kal r'u, ka lo hîk ang; mahse, nuam han ti viau lo ula aw," nui sûng chunga tiin awmze nei fê hian min rawn melh ralh pah a.

Nuam ka va ti tak! Ka phone ka lo keng lo erawh pawi ka ti thlâwt a ni, keng ila chuan thla ka lâk nasat dáwn tehlul nèn. 

Thlâma chaw kan han ei chu ka ei tui bawk a, khua a lum bawk si nèn, ka thlan a tla hluam mai a, Sëna hmarcha ràwt, purùn hnah nèna a ràwt pawlh chu a thak tui bawk nèn, sî hliam hliam chung chuan ka ei leh țhin. Hminga chuan min en  leh reng țhìn tih ka hre ru reng a; mahse, ka hre lo der tlat thung a.

Ka puar dàn chu, heti khawp hian ka lo insûm thei lo a ni maw ka tih phah hial a ni, kan eina kan seng fel hnu chuan ka țhu hlè hlé mai, Sêna chuan,"Ka rin aiin hmarcha i lo ngam reuh a, kha, i hnâr pawh a sen țha khawp mai," nui chung hian a ti a, Hminga chuan," A sexy zâwk daih," a lo ti khut roh a, chutiang a rawn sawi ve khut chu hlim ru viau mah ila min tilai ve țêp chu a ni.

Sêna aiawt en hlàn chuan thlâmah chuan kan lo awm a, nichina a thil sawi khân min la tihlim reng a, melh ralh pah chuan," Chakai chu lo man țeuh se tiraw?" ka ti a, ani chuan," A tla nual ang, i ei țeuh dâwn nia," a lo ti thung a, chutah," Hmâna chakai lei min dìl kha i la hria em?" a rawn ti leh a.

Ka en reng phawt a, chutah,"Ka dìlpa kha i ni maw?!!" ka ti ta chûl a, sawi zawm lehin," Thil hi a lo va mak thei ve!!" ka ti leh hliai a, ani chuan," To deuhin ka leitîr nghe nghe che kha, ka bum che pawh a ni chuang lo a nia, i lei ve duh tho bawk kha, khami rulh lêt nân che, zaninah, i ei țeuh thei ang," a ti a. Ka ngaihtuah lêt a, chakai ka lei khân a to pawhin ka hre si lo va, engtianga tlâwmin nge maw an lo hralh țhin ni?

"In huanah hian hlawhfa riak kha an awm em kha?" tiin ka zâwt ta daih a, ani chuan," Aw, chhak deuhah khian an awm, helaiah hi chuan an riak ngai lêm lo, a châng zeuhin an rawn chhuk ve a, vawiin pawh hian han hmu àwm tak chu ka ni a," a tih lai chuan," Kan han hmu dâwn em ni ang? Min hruai ve la?" ka lo ti hmanhmawh a, a nui hawk mai.

"Naupang duhawm deuh i ang," a la ti sup zui a, kei chuan," Hmm, naupang ber kher, ka duh teuh lo," ka lo ti vat a, ka hmui chu ka tipawrh tûrh a, ani chuan," Min thlêm lo la?" a ti sup a, ka va en kher a, thutak zet hian min lo en leh tawh niin, nichin lawk khân a nui ve bawk sia.

"Ngawi rawh tunah chuan ka bàl rih," nui chung hian ka ti a, ka hmui chu ka hup pah bawk a, ani chuan," I balh lai pawhin, balh loh lai pawhin min hîp reng tho," a lo ti sup thung a, min rawn țhut hnaih sauh bawk a; mahse, chutih lai tak chuan thlang lam ațangin Sêna chu a rawn au chho lùng lûng a," Zanin chu U Lawmi'n a bawppui lian ber a chang ang," a rawn ti a, Hminga chu a phun sup a, ka en vat nain eng nge a sawi erawh ka hre lo.

Rawn luh pah chuan," A tla tam asin, U Lawm, han en la," tiin a ipte ațang chuan chakai a dahna ip chu a rawn phawrh a, ka lo au chùl a, a ip chu a puar țhain kețang chu a che sup sup mai a, in thlen tawha bucket-a a bun hun tùr ka nghâkhlel tawh khawp mai.

Kan haw har lo va, kawng chho a nih ve tawh avàngin muangchângin kan kal a, Sêna erawh chuan min kal pelh pah chuan," Chance ka pe ang che u, insawi fel teh u," a ti a, a pên zui ta hmawk hmawk a, ka ko chiam nain min lo nghâk duh chuang lo.

In kan thlen chuan a lo inbual fai vek tawh a, a nuin rawng a lo bâwl ve tawh bawk a, kan inbualna tùr tui pawh a lo lum diam niin, thingpui min lo pêk pah chuan,"I chau ngawt lo maw? I kal ngai àwm si lo va, hrehawm i ti em?"tiin min zâwt a, kei chuan," Chau nâng, nuam ka ti lutuk," ka lo ti vat thung a, Hminga pu chuan,"Vaimîm i kêk nasa em?" a lo ti ve a, Hminga chu enin ka nui phawt a,"Keh dàn tùr ka lo hre lo va; mahse, Hminga'n min hrilh hnyah chuan ka thiam ve tawh viau," ka ti ve a, Hminga chuan,"Kan vêng nula tam takin an tluk lo ang, Vangvat erawh a hlau deuh thung a," a lo ti ve a.

Zànah chakai kan hmeh a, a bawppui lian chu ka hmaah an dah khâwm rui mai a, ei țhen tùra ka tih pawh chuan an duh mang si lo va, ka ei tâk țeuh kha. Ka puar lehpek khawp mai, châm rei viau phei ila chuan ka thau haw ngawtin ka ring. 

Zàna room-a ka awm lai chuan artui leh damdawi mûm keng hian a rawn lût a," Kha hei hi ei rawh, i rawl tùr a chhâwk deuh ang che, ka pain a ngaihtuah che a," a rawn ti a, kei chuan," A ngai hleinem, ka la rawl miah lo asin," ka lo ti a, ani erawh chuan,"Naktûk lamah i rawl ngei ang, hei hi i ei chuan a chhâwk viau thung ang che," a ti leh a, min rawn hnaihin," Mahse, i ei hmain vawiin lama kan tih tum kan țhulh tâk kha ti tawh ila," a rawn ti sup a, phâwk deuh taka ka en lai chuan rawn kûn hniamin a hmuiin ka hmui chu a rawn bawh thuah zui nghâl a.

A hnu deuhah chuan," Mi dang an awm ve reng saw, an ngaih a țha lo ang e," ka ti sar sar a, ani erawh chuan ka kawr rawn zenin," An ngaih a țha mah mah zâwk ang," a ti leh sup a, chutia ka kawr a rawn zena ka taksa a kutin a rawn deh chuan ka thaw hak a, a kut chu chelhsak vatin," Hminga...?" ka ti leh sap a, țawng rin ka hlau bawk si, a chêt dàn hian min tibuai, ka thâwk a tibuai, ka thin a tiphu rang dawt dawt viau bawk.

"Hlauthãwng suh, kan chesual dâwn hleinem," tiin duhthawh zet hian min rawn fâwp zui leh zat a, hnial tum pawhin a theih loh, a duhthawh tàwn tàwn bawk si a, ka thluak pawh a tibuai map thei hial mai.

"Min ti ã zo vek tawh, ka tâ dik tak han ni tawh mai la..." insûm tih hriat tak leh thaw hawk hawk chunga a tih sup chuan a kut chu ka âwmah ka chelh bet tlat a, kei pawh ka thinphu nasa lutuk chu a rawn sawt chhuak nawlh ang tih hlauhawm tak a ni. Ani pawh hian amah vànga hetianga awm hi ka ni tih a hre chiang ngawt ang chu, ka taksaa a thil tihin nghawng a neih nasatzia hi, hre mawlh teh se.

"Ka thâwk... a mumal... thei lo," ka tih sap chuan duat zet hian ka hmaiah chuan chûlin ka chalah chuan a fâwp zoh a, chutah, ka kawr inhlîm chho tûng chu siam țhain," Ka chhuahsan ang che, ka thil duh ka tihpuitlin hma hian," tiin a thaw ham ham a, chutah, tho vutin a chhuak ta nghâl a. A chhuah hnu chuan ka awm ngaiin ka awm reng a, ka âwm dawmin ka thaw hak hak reng bawk a, minute 5 vêl hnuah chuan tlêmin ka pângngai ve ta deuh a, ka che sawn ta chauh.

Kâr khat kan awm hnu chuan Hminga pa pawh a zia viau ta bawk a, Aizawl lamah kan phei ve leh  dâwn ta, Hminga'n kan chanchin a hrilh tawh vàng nge ni, a pa chuan min ui der ve hle mai a, kan phei dâwn zànah chuan,"Ka fanu angin ka en daih tawh che a; mahse, ka fanu tak tak i nih hun erawh ka nghâkhlel khawp mai, min nghah reitîr lutuk suh aw," a ti chuar chuar a, zah țît țêt hun a ni lo bawk a, kei pawhin ka rilru dik tak chu ka hrilh ve nghâl mai bawk a. Sêna erawh kan la hrilh duh lo va, a hriat hunah chuan min rawn fiam nasa ngawt ang chu, a rawn thinrim der chiam pawh ka ring, kan hrilh ve duh si lo va.

*I THIL SAWI LEH I NUN DÀN KHA INMIL SE, MIIN AN RING MAI ANG CHE*