☆OKHEE☆ - 22 By Dingdi Pachuau

 ☆OKHEE☆ - 22 By Dingdi Pachuau

Tûkțhuan ei khamah kan haw phei ta a, kan tlàn chhuah dâwn chuan Sênate nèn chuan kan in-bye bye lâwp lâwp a, inhmuh leh thuai intiamin kan tlãn chhuak ta a, Hminga'n motor a khalh leh a, motor hnungah chuan kan pahniha chawhmeh tùr kan phur phei nual bawk a.

Khaw daiah chuan dingin," Kan țawngțai leh dâwn lo'm ni?" a ti sup a, fiamthu pah deuh ; mahse, nui duh miah lo hian," Han ti ve tawh la?" ka ti zauh a, ani chuan ka ti tak takah a ngai a ni ngei ang," Umm..." a ti sup a, maimichhîngin a țawngțai țan ta nghâl a, ka inhup rang kher asin.

Kan tlàn leh hnuah chuan," I tih tak tak ka ring lo va," ka ti sap a, ani chuan," Engah maw? Ka zak hleinem, A hnêna țawngțai hi chu ka hreh lovin ka zak ngai lo," a lo ti mai a, ka en vang vang a," Ka belh chian cheuh cheuh che hian ka duh telh telh mai che ka ti, min phatsan han tum nâ teh, i châk lo ang," ka ti a, ani chu a lo nui hawk a.

Kawng tluan chuan kan titi a, kan titi ti ila, ka țawng deuh char char si a, ka titi a ni mah ang chu, ani'n min lo ngaithla a, a chângin a lo inrawlh ve zeuh zeuh chauh a ni. A țawng tam lohna hian min hîp a, ngaithlatua a lo țang thei leh ka thu sawi mai mai pawh tui taka a lo ngaithla thei hi ka lãwm țhìn thlâwt a ni.

Kan tlãn chak lêm lo va, thlen pawh kan thleng hma lêm lo, a in luah kan thlen pawh chuan a lo tlai ve deuh ruih tawh a, tlai ruih tawh mah se ka han awm hnufual leh rih tho, a bula awm hi ka ning thei hlawl si lo va, ani pawh hian min thlahlel ve tho tih ka hria, hei hian min intithlahrung lo ve bawk a ni. Min kuah pah chuan kan thlen thu chu Sêna a hrilh vat a, ani lah chuan a rawn fiam zui zat zat a; mahse, an inbe rei lo.

"Ka nute pawh kan pahnih chungchâng hi ka hrilh tawh dâwn, zàna i rawn lêng thei lo leh kan inhmu khât lutuk hi ka ning tawh," ka ti a, a âwm pharh dârh chu hnung zâwng chuan ka nghèng ar ar a, ani chuan," I thu thu le; mahse, ka pu fanu i ni miau mai a, i pa hi ka zah tak zet a ni," a lo ti sup thung a.

"Chutia i zah viaute chuan a fuh thei nâng, zàn lamah kan inhmu lo reng mai dâwn tihna a ni dâwn a, keia tân lah zàna chhuah zuk zuk chu a mawi fahran si lo, chhuanlam tùr pawh ka haihchham țan dèr tawh a nia," ka lo ti hap a.

"Ka pu a nih chhûng chuan ka zah lo thei lo a ni, min ring êm êm a, a fanu ka lo duh ve ringawt pawh hi a rûk tak chuan ka inthiam lo viau asin," a ti leh sup sup a.

"A, khatiang lam kha chu sawi lo teh," tiin a hmui chu ka hupsak a, sawi zawm lehin," Zan tin lo lêng tùr chuan ka beisei ngam chuang lo che a; mahse... ka hmuh loh rei che hian ka ngai che alawm, nang chu mipa i nia, i lung a lêng lo mai mai a nih kha, kei chu hmeichhia ka nih hi aw," pangchang tak chuan ka ti a, a hmui ka hupna kut chu la sawnin a khabe chu ka khawihsak leh ta neuh neuh zâwk a.

"Lêng ve tho maithei asin, ka lo țap ru fup fup maithei bawk a," a tih chuan awih lo zet hian ka en chho a, min en duh miah lo. Inherin ka kut pahnih chuan a bek tawn tawnah ka han dawm a, a hmêl chiang taka ka hmuh theihna tùrin. Ka han en vang vang a, chutah, a hnârah chuan ka tuaisak ta zoh a," Nang aiin ka lung a lêng țhìn zâwk a nih chiah hi," ka ti a, a hnârah chuan ka fawhsak zui bawk a.

Awm dun reng theih hek lo le, ka haw ve ta nge nge a, kâr khat chhûng zet ni tin leh zan tin inhmu theiin kan khawsa tlâng kha a ni a, tunah erawh chuan kan inhmu leh lawk thei dâwn ta si lo va, ka lunghnûr lâwk tak zet a ni; mahse, ka chhûngte ka hrilh hunah chuan zànah pawh a lo lêng ve thei tawh ang chu maw.

Ka nu leh pa chu ka chawhmeh hawn vàng chuan an lo lãwm thiam khawp mai a, Vaimîm ka hawn hlek chu ka nu chuan a chhùm zui nghâl a, ka inbual a, ka inbual zawh hnu rei lo teah chuan chaw chu kan ei zui ta nghâl a. Chaw kan ei lai chuan ka zinna chanchin chu ka pain min zâwt a, ka hrilh ve malh malh a, Hminga nèna kan chanchin chu hrilh rem viau mah se ka la hrilh rih lo, nakzànah ka hrilh chauh ang.

Mut hmain kan in-video call a, mut hmaa a hmel hmuh leh ka châk tlat si alawm le! Ani pawh mut a lo tum ve tho tawh a, a kâwng chin rizaiin a khuh a, a kut lehlam a lukham a, a bân lang sek deuh hlek chu hmuhnawm ti takin ka en deuh reng, ka bulah mu nâ se chuan tàwnzau chu a hâk ka phal tawp lo ang le.

Zîngah text message-in min rawn wish a, ka chhiar nui var var mai. Chaw ei kham ațangin dàwrah ka kal leh ta a, ani pawh a buai ngawtin ka ring, chuvàngin ka be buai duh lo va, text erawh ka thawn thung. Tlaiah Martha-ite tlawh zawk ka duh avàngin ka haw hma deuh a, an in ka va thlen rual rualin min lo fiam chùl mai. Hmingate khuaah ka zin tih a hre bawk si a, a àwm ve tho, ka haw teuh lo.

"Ka han fiam hluai che a, thutak deuh tawh teh ang. An in leh lo i va hmu vek tawh a, a chhûngte nèn lam pawh, ani thingtlânga awm a ni a, nang khawpui mi i ni a, khawpui mi mai ni lovin chhûngkaw hausa ve tak ațanga chhuak i ni bawk. Lo inkawp rem thei ta ula, a pa nèn chauha awm an nih avàngin thingtlânga i lawi a ngai ngei ang a, i khawsa thiam ang em? I nu leh pa fa neih chhun ni mah la, ani'n heta awm reng hi a duh ka ring hauh lo va, mâkpa chhûngkhung tùr hlauh phei chuan.. mipa tân a tlàwmthlâk lutuk! Chuan, a pa amah chauha kalsan lah a duh ka ring hek lo, chûng chu i ngaihtuah phâk em?" a ti barh barh a.

"I ngaihtuah thui lutuk!" fiamthua ka tih chuan," A ngai alawm, inngaizâwng mai mai rual in ni tawh lo ve ve a, chûng chu ngaihtuah thlen a ngai a ni. Lo ngaihtuah char char tawh ang che, ani pawh la sawipui tùr a ni," a lo ti leh a, a dikna chen a awm tlat avàng chuan ka fiamthu duh ta bîk lo va; mahse," Ani chu sawipui lul suh, ama sawi chhuah hun hi nghah ka duh zâwk, ka duh anga min duha min thlâkhlel ve tak zet a nih ngai chuan mipa a nihna angin hma a la tùrah ka ngai, bâkah, a pa pawh khân a sawipui ngeiin ka ring bawk a, kei chuan nawr ka duh lo, kan inkawp rei leh fa mawng a bêng har dâwn tihna a ni mai a," ka ti a, ka nui sak bawk a.

Zanriah kîl laiin Hminga nèna kan chanchin chu ka sawi chhuak ta a, ka nu leh pa bula sawi ni mah ila nuam lo erawh ka ti ve viau tho mai,  kan induh tawn tih chauh ka sawi chhuak a, ka va zinna kha an khua a ni tih erawh ka sawi hran lo.

Ka pa chu a ngawi vang vang a, ka nu ve thung chuan," Bawihte, a va mak dâwn ve! Ani pawhin a duh ve che a maw? Kan ina a lo kal châng lah hian induh tawn angin in lang ngai si lo, mak ka ti êm mai, " a lo ti thung a, thâwk a la nghâl hap a, ka pa chuan," An inthup ve bawk ang chu maw le," a lo ti zauh a, a nui suk a, chutah, min rawn enin thutak hmel pu hian," Thingtlâng tlangvâl a ni tih i hria tiraw?" a rawn ti leh zat a, kei chu ka lo bu nghat a.

"Chuti chung chung pawha i duh tlat chuan... a țha alawm. A mizia leh nungchang hi ka chîk ka chîk ve țhìn a, mi sual a nih ka rin loh bâkah a hna tlinin a thawkrim a, kei pawhin ka rin êm hi. Mâkpa atân pawh a țha viau ang chu, kan tân lah mi thar a nih loh bâkah a kutah engkim ka hlàn vek thei ang a, in inneih pawhin engkim hi a kut vek tùr a ni dâwn tho a," nui vur vur chung chuan a ti leh a, ka nu erawh chuan," Chutin ring nghâl bur ringawt lo teh. Bawihte, a dinhmun hre sa vekin i duh tihna a ni a, ani pawh hian i dinhmun hi a hre chiang viau ngei ang a, chuvànga duh che te hi a ni lo maw? Tûnlaiah chuan dinhmun țhat avànga induh ta hi a hmei a pain an tam a nia, fîmkhur viau a ngai a ni," a lo ti ve thung a.

Ka pa hi chu a awlsam a, keimahin ka duh a nih phawt chuan tu pawh hi min pawmpuiin min duhpui mai ang tih ka hria, ka nu erawh hi chu a ngaihtuah thui deuh țhìn a; mahse, min ngaihtuah vàng a ni tih ka hriat bâkah ka tâna țha lo hi ka kawp a hlau tawh a ni tih ka hre ràn a, a fîmkhurna pawh hi ka tân vek a ni tih ka hriat avàngin ka hre thiam êm êm a ni.

"A hmaa mi ang mai kha a ni leh ang tih ka hlau a ni," ka nuin a tih leh chuan ka pa chuan," A khai, i lo hlauthãwngin i ngaihtuah thui lutuk a nih kha, kan duh leh hmuh apiang erawh bawh rawk rawk tùr ka ti lo; mahse, Bawihtei pawh naupangchhe rilru pu a ni tawh lo va, chûng chu ngun takin a ngaihtuah pha ve tho ang chu. Bâkah, Halan-a hi zawng a sual lo tawp ang, a hmaa mi nèn kha chuan khaikhin chi-ah pawh ka ngai lo," a lo ti leh a, ka ngaih pawh a tițha sawt mai.

Tlai khat chu dàwrah Julian-a a rawn lang ve hrãwk a, ka lo chiauau vat a, kan inhmu khât ve ta viau mai, an dam țhat leh țhat lohte ka zâwt chûl a, an dam țhat thu min hrilhin min rawn hmu paha an mamawh thil a rawn lei ve dâwn thu chu a sawi nghâl a.

"I reh lutuk rêng rêng! Hmuh țha min hmuhsan te hi a ni lo maw? Nizàn ka mumangah phei chuan pasal hi i lo nei a, ka harh chuan ka uiin a tak tak ni se ka ti khawp mai a," nui chung hian a ti a, a hmel țha tak chu hmuh a la nuam reng mai, țawng pah chuan ka mitah tak chuan a rawn en a, kei pawhin ka en lêt ve chiah a, mahse, tunah chuan ka lo danglam ta a nih chiah hi, ka țhian a nihna ang bâkin ka en ta lo tih ka hre chiang ta ngang mai, mak pawh ka inti ru viau a ni.

"Hmu maithei asin," nui chung vêk hian ka ti lêt a, a lo meng phar ãk a, chutah," Uai, ka bengchhe ri chu a ni lo tiraw? Chu chanchin làwmawm zet chu, engtikah nge kan tih huk theih ang?" hlim tih hriat tak hian a ti leh sar sar a, a hlim mitmeng chu hmuh a nuam sar sar viau a ni.

"Lo la nghâk fan fan ula aw, Ațana pawh ka la hrilh chuang lo, engtikah emaw ka la rawn lènpui dâwn nia, in hmuh dàn pawh ka hre ve duh ang a," nui chung vêka ka tih leh chuan," Teh rêng mai, i sawi dàn ațangin leh  mitmeng ațangin i duh tak tak a ni tih a hriat theih nghâl mai si, hmuh pawh a châkawm zual sauh bawk. Dâr ri mawi kan hre har lo tùrah pawh ngai teh ang," a ti leh sauh sauh a, chutah, thutak zet hian," Ka thinlung zawng zawngin ka lawmpui tak zet che a ni, a hmaa i rilru lo hrehawm tawhna zawng zawng pawh kha ani chuan a thawi damsak vek che pawh ka ring e," a ti leh sap a.

Hminga nèn kan inhmuh leh hmasakna berah chuan Julian-ate ina lènpui chungchâng chu ka sawipui chhin a, Zorema kâ ațang leh ka hnên ațang ngei pawha a chanchin a hriat tawh avàngin thutak zet hian ka țhianpa mai a ni tih chu ka sawi pah zauh a, ani chuan," Zêp lovah chuan i kâ ațanga mipa dang hming a rîk hian thîkna rilru keimahah a rawn piang nghâl ziah, i țhian tia i sawi pawhin ka tân chuan mipa dang tho a ni, ani lakah phei chuan i rilru kha..." a tih lai chuan a kutah ka dawmsak vat a," Ka danglam vek tawh. Kan dàwra a rawn kala kan inhmuh khân ka hre chiang viau a ni, mipa dang hi chu mipa angin ka en thei tawh lo, nang ka tawna min duh ve a ni tih ka hriat hnu ațang kha chuan," ka lo ti vat a, ka thu sawi chu âwih se tih ka duh êm avàng chuan a mitah chuan ka en kar bawk a.

"Mipa dang tân ka phal lo che a, ka phal thei ngai lo bawk ang, mi dang tân ka thlah dâwn miah lo bawk che tih i hria tiraw? A theih loh, ka dam chhûng hi chuan ka phal thei ngai lo ang," thutak zeta a tih chuan ka lãwm kher mai, ka kuah nghâl vang vang a, ani pawhin nghet zetin min kuah lêt a, thâwk pawh a harsa lek lek thei hial mai; mahse, pawi ka ti lo, min thlah ka duh hauh si lo.

Kan inthlah dul deuh hnu chuan, "Zànah lo lêng la?" ka ti sap a, tilang mipa hliah hliahtu nia ka hriat a hrawk bâwk chu ka zûtsak zai zai pah bawk a, ani chuan," Ka lo lèn chuan palaite nèna rawn lèn rap mai asin ka tum dâwn ni," a ti dút a, ka chalah chuan a fâwp pah zauh a. A rûka ka lo nghah ve reuh reuh a rawn sawi chhuah avàng chuan a fiamthu a nih leh nih loh hriat tumin ka melh chho a, min rawn melh chhuk ve reng bawk a, a mitmenga min duhna chu ka hmuh ve reng avàng chuan ka hlim veng veng mai; mahse, zawh ve hrim hrim ka duh avàng chuan," I ti tak tak em?!!" ka ti sà sá a.

"I bula kan inkâr thil ka sawi hi chu dâwt a awm lo asin, mak min tih pawhin ka dem phal lo ang che, ka nupui ni thuai la tih hi ka duhthusàm a ni," a tih chuan làwmnain min vûr hlawp hlawp ni maiin ka hria, ka làwm êm avàng chuan ka mittui a hnai thei hial mai a, kuai kûnin a hmuiah ka fawhsak vawng vawng a, ka mittui pawh a hnâm sawk mai, ka mittui tla hi hre mah se ka pawisa lo, ka hmangaih miau alawm.

"Ka naute, i mittui ka titla elo?" min ngaihtuah tih hriat zeta a tih sup chuan ka nui hak ringawt, he pa hi ka va hmangaih ngawih ngawih tak! 'Ka naute' min ti ve ngei a nia, a inhmeh lo ka ti lo, a inhmeh lutuk tlat, min koh duatna vena a ni a, inhmeh lo ka ti phal teuh lo mai!

"Ka lâwm êm a ni," ka tih chuan min en vang vang phawt a, a mita min duhna tinrêng mai lang chhuak ka hmuh chuan tawrh har ka ti, chutah, rawn kûnin ka mittui chu dìm zet hian a rawn fâwp ta zoh a, a chêt dàn hian a lakah min tiluangliam zawih zawih a ni tih a hre tawp nâng. Ka thin chu a phu su dup dup a, heti taka ka thinphu tidanglam theitu hi amah chauh hi a ni, kan taksa a innghen reng phei chuan ka danglam nasa thei lutuk ringawt, tunah pawh hian chutiang chuan ka awm, an khuaa a room-a kan awm dun lai ang chiah khân ka awm leh tawh! Ngawi renga inenin kan mit chuan țawngkaa sawi chhuah thiam loh hmangaihna leh kan inmamawh tawnna thu chu kan inhrilh tawn mawlh mawlh ni berin ka hria.

"Ka mamawhna nasatzia che hi i hria tiraw?" 

Keimah ang ve tho a lo nih chu. A insûm thei zâwk hi ka tia, mipa chu hmeichhia aiin an châkna a chhuak hmasa tih ka hria, kei hmeichhia mah ka danglam chuan ani hi chu danglam nasa hlê tùr a ni ringawt.

"Ka ni ve tho," ka lo ti sap a, chutah, duhthawh zeta min fâwp leh tàwn tâwnin ka taksa pawh chu a chûl thuak thuak a, kei pawh chuan insùm tum hlek lo chuan ka theih ang tâwka duhthawhin ka lo fâwp lêt leh tàwn táwn tho a, ka taksa a chùl phei chuan nuam tihna nasa tak neiin, a bâk thlen châkna chuan min tur ut ut a, chutiang ti tùr pawh chuan ka in-ready khawp mai ; mahse, ka rin loh deuhin a tàwp ta thut a, min kiansan zui ta nghâl a.

Min hnungchhawn zâwnga a ding ta daih chu âng deuh pham hian ka en reng ringawt a, a thâwk lâk zâwnga a taksa che dat dat chu ka thlîr tawp a nih ber chu. Ka rilru ang tho a pu ve tho khân ka hre sia, tuna a awm dàn erawh hi chu chutiang chu a ni ta hauh si lo, ka hre thiam ta lo kher mai.

Rei fê chutianga a din hnu chuan, "Hminga...?" tih sap pah hian ka va pan hnai hrat a, a rawn hawi lo va, ka kohna chu hre àwm pawhin a awm lo. Chu tak chuan ka rilru a tinâ, ka duh lo, a lung ka ti-âwi lo thut tihna em niang?  A hnung lam ațang chuan a kâwngah ka va kuah dè dé a, a taksa khawng nghâl at pawh chu ka hre nghâl vat, a thin a rim a ni chiang mai.

"I thin ka tihrim chuan...min hrilh la?" inthlahrung tak chuan ka ti sap a, a chhan hre miah lo hian thinrimin min kalsan ringawt ang tih ka hlau alawm, ka duh lutuk tawh si a, hetianga a awm reng chuan hrehawm tiin ka ã thei mai ang.

A kâwnga ka kuahna chu phelhin min din hlat phawt a, min hmachhawn zâwnga rawn dingin a mitmeng buai nuai chuan min en vang vang a, a thinrim hmel hmuh ka inrin tehlul nèn, tlêmin ka thaw chu a veng deuh ringawt pek a.

"Tunah hian ka mamawhna che ka tihhlawhtlin nghâl chuan i pa pawi ka sawi ngei dâwn a ni, i pa hi ka zah ka tih tawh kha, tuna ka duh ka tihlawhtling a nih hlauh chuan ka tàwp mai mai theih dâwn loh bâkah ka kaltîr phal tawh dâwn si lo che a," a sam tuai puat pah chuan a ti a, insûm tih hriat tak chuan thâwk a la bawk a.

Mut hmunah chuan vawiina thil thleng kha ka ngaihtuah lêt a, ka zak deuh bawk si, ka lãwm tho bawk si chu a chângin ka nui a, a châng leh sei fê hian ka lei ka chhuah a. A insùm theihzia leh a ngaihtuah thui bîkzia ka ngaihtuah phei chuan nêp ka inti hnuhnawh a; mahse, 'Eng nge, mihring ka nia, ka duh tak bulah chuan amah ka duhna ka tilang ve a ni mai a, a tâna ka inpumpêkzia a hre chiang ting tihna a ni mai alawm' tiin thiam ka inchantîr leh a, min hmuh 'easy' lohzia pawh min hrilh ve mawlh mawlh tho kha. Tih tak takah chuan, a bulah chauh alawm khatiang khân ka awm le, Zorema bulah vawi khat mah khatiang khân ka awm ngai lo, Hminga ka duh êm avàng leh ka hmangaih êm vàng chauh a nih kha, khatiang khân ka awm ni.

*SÈLNA HI MÊNA THLÂK MAI LOVIN MAHNI INEN LÊTA INSIAM ȚHAT NÂNA HMAN THIAM CHUAN THIL ȚHA TAK A NI*