☆OKHEE☆ - 23 By Dingdi Pachuau

 ☆OKHEE☆ - 23 By Dingdi Pachuau

Ka rilru a hlim a, ka khawvêl chu a thar sur a ni ber ang chu, heti tak hian khawvêl hi a lo mawi thei ngai a ni tih pawh ka lo hre ngai hauh lo, ka ke pên tin chu a zãng haih mai a, ka zîng tho ațanga ka zàn mu tùr thleng hian ka hlim reng mai ti ila a dik ber ang.

Chènpuite phei chu a hre chiang ber ber an ni ang chu, ka pa phei chuan min fiam zuk zuk reng a," Ka mâkpa a nih hma hian chhawr hrep teh ang, ka mâkpa a nih hnuah chuan ka chhawr i phal tawh meuh àwm si lo," a ti țhìn a, kei erawh chuan," A tihchi nâng, tunah pawh zànah a rawn lêng hman lo a nia, i chhawr hah mah mah a nih ka lo ring hial asin," ka lo ti ve thung a.

Ka nu ve thung chuan min pawmpui hlei thei lo va, a sawi chhuak dawt lo nain a awm dàn ațang hian ka hria; mahse, ka hlim êm avàng hian ka ngaizam mai a, ani pawh hian ka hlimpui êm a ni tih a hriat avàng hian a sawisêl ngam lo a ni ber ang chu, a chhan chu sawisêl pawh ni se ka pain min țan leh tlat ang a, ka pa a ngam leh dâwn si lo.

Sunday chawhnuah Julian-ate ina lêng tùrin kan chhuak a, " I huphurh deuh em?" tia ka zawh chuan," Huphurh lo ve, i huphurh em ni?" tiin min lo zâwt lêt khauh a, nuih sak pah hian," Ka hlim lutuk zâwk a ni," ka ti sap a, ka kuta a rawn chelh chuan," Huphurh miah suh aw, an hmuh ve châk vàng che a nia, kan awm rei pawh a ngai lo ang," ka ti leh a.

"Ka bula i awm phawt chuan huphurh ka nei hleinem, Hremhmun hial pawh kal ngai dâwn mah se," a tih chuan," Over viau suh aw," tiin ka nui hak a, ani lah chuan," Ka ti tak tak asin, hmun hrehawm leh hun hrehawm berah pawh ka phunnawi hauh lo ang," thutak zet hian a lo ti thung a.

Kan han thlen chuan Julian-a nu leh pa tih loh chu an lo awm țhap mai a, Heidi chuan min lo ko nghâl chùl bawk a, Julian-a chuan," Kan lo nghâkhlel tawh khawp mai che u a," tiin hlim hmel tak hian min lo chhàwn a, Hminga chu an chibai nghâl bawk a, hlim takin an be nghâl bawrh bawrh a, kan țhut hnu chuan Hlimhlimi chuan nui sâng chung hian," In lo lêng dâwn tih kan hriat ațangin kan awm hle hle thei tawh lo va, hmuhhlàn kan nghâkhlel che uin Sunday chu engtik chiah nge kan ti ãwl lo mai a ni, tu emaw phei hi chuan, ' Ama, eng cake ber nge kan ur ang?' tiin min zâwt reng mai a, vawiin chu Bawihtei cake ur 'cial' lutuk mai kan ei thei dâwn a ni," a lo ti ve bawk a,  kei chuan," E khai, a tui ngawt ang chu, nula hmel țha tak cake ur chu a tui 'cial' dâwn tih ka hre sa khiau, ka va ei châk tawh tak êm!" ka lo ti ve vat a.

Heidi chuan Hminga chu a melh leh ralh ralh țhìn a, a la hmuh ngai loh leh a hmel a la hriat ngai loh vàng a ni tih ka hre reng a, a pa chu a bekbàwr leh sar sar țhìn a, Julian-a chuan," Ânu Lawmi țhianpa Âpa Hminga a nih hi," tiin a hrilh sà sá a, kan lo hre ve vek thei tho, an pafa hi chu an cute dùn thei asin. Chutah, Heidi chu duhawm deuh hian a nui sak reuh a, Hminga chu ka en vat a, ani pawh chu a lo nui ve suk a.

Kan awm rei deuh hnu chuan Julian-a leh Hminga pawh an inkàwm ve bawrh bawrh tawh a, hmeichhe pahnihin in tùr siamin Heidi'n cake a thiam ang tâwkin a lo zai ve bawk a, Hmingate pahnih titi chu ka en phei zauh zauh a, hmêlah chuan an inang lêm lo, Hminga chu a vun a sen zâwk a, ni sensa hnuaia hna thawk țhang tih takah; mahse, pà hi chu ka ti ve thlâwt a ni, ka duh êm êm bawk. Julian-a erawh a vun a ngovin ni sensa do ngai lo tih takah a sàr deuh var a, an lian dùn viau e tih lohah chuan inanna an nei lêm lo, an mitko hmul dum hlap erawh a chhah dùn khawp mai,  pakhat ka țhian a nia, pakhat ve thung chu ka duh leh ka hmangaih ngawih ngawih a ni thung. 

Ka en vang vang lai chuan Hlimhlimi chuan," In inhmehin in awm dàn ațang hian in induh tawn hmel bawk sia, ka lawmpui dùn khawp mai che u" nui sâng chunga a tih sar sar chuan ka phu zawk țêp a ni, awm țha vatin nui sâng chung vêk hian," Ka lâwm e," ka ti sap phawt a, chutah," Ka duhna ka lo tilang viau elo?" ka ti leh zat a, ani chuan," Nang changin i tilang teuh lo, ani pawhin a en dàn che ațangin a duhzia che a hriat vek alawm, i lak ațangin a mit a la sawn hlei thei lo chu a nih ber kha," a ti leh sar sar a.

Chutiangin min lo en țhìn tih ka lo hre hauh lo, kan titi ve nasa sia, ka lo en țha vak ngam lo emaw ka lo ti zâwk a, chutianga Hlimhlimi'n min lo chîk dùna kan induhna a lo hre thei chu ka lãwm angreng khawp mai.

"Bawihtei pa nèna kan lo sawi dun phei chuan rei rial lovin innei thuai ula kan lo tia, a chhan chu Ațana nèna an sawipui che pawh ni lo, i duh tak i thlan nalh a ni bawk sia, kan lo inrawlhna tùr chu a awm miah lo nain in awm dàn ka hmuh dànah hi chuan inneih lam in hnaih thuaiin ka ring," a ti leh duah a, a nui pah sâng bawk a.

"Ni e, hun hi han kal ve zêl phawt se..." ka ti ve a, kan sawi thuak tawh a ni tih erawh ka hrilh hran lo, a hunte han thleng ve phawt se...

'Zo pa hrawkah chuan thingpui nge nge hi' an tih avàngin thingpui leh cake tui zet mai chu kan chhawp a, kan han ei chuan a lo tui viau lah tak a, a siamtute kan han fak leh luam a; mahse, Heidi-te unau leh Nonoi chu choka lama an awm daih avàng erawh chuan kan fakna chu an hre ve thei ta lo a ni.

"Zanriah ei ve nghâl daih teh u a, kan sawi lâwk lo nain," Julian-a'n a tih chuan Hlimhlimi pawh chuan a lo tuihnih ve zat a, keima lamah chuan harsatna a awm hran lo, a chhànna ngaichangin Hminga lam chu ka hawi thuai a, ani erawh chuan chhuanlam mawi taka siamin a lo pha thung a, kei pawh chuan," Ni e, insàwm nân nikhua a la tlai hleinem, hun kan la nei chauh tùrah ngai ang," ka lo ti ve a.

Rei mawi tâwk tak kan lêng a, nu ber leh pa ber an rawn hâwng a, chumi hnuah chuan kan awm rei ta lo, haw kawngah chuan," I țhianpa chu a fel khawp mai, nupui pawh a nei țha e," a ti sup a, kei chuan," Țha e, Hlimhlimi hi chu a hmel a țhat bâkah a fel bawk a, hmeh pawh an inhmeh viau a ni," ka lo ti ve vat a.

"I hmel țha zâwk!"

Làwm avàng chuan ka nui hak hak a, chutah," Zanriah ei kha chu i hreh ve deuh chu a ni tiraw?" ka ti ta daih a, ka la nui reng bawk a, ani chuan," Hreh hran lo; mahse, vawi khat lènna a nih bâkah min sàwm vawi khatna a ni a, ei nghâl kha chu ka tum lo," a lo ti mai a, " Bâkah, kan pahniha hun ãwl kan neih nî a ni a, zanriah kan ei nghâl chuan inlawmna hun kan nei thei dâwn lo va," thutak zet hian a tihzawm leh a.

A in lamah chuan a sawi dàn takin 'Inlawmna' hun chu kan hmang leh rih a, kan inning thei lo va, kan inthlahlel a, kan induhin kan taksa innghèng chiala awmtîr reng kan duh bawk, heti taka kan inthlahlel reng mai hi mak ka ti hial țhìn, ka thlahlel a, a kianga awm hi ka ning hlawl lo, nakinah kan inneih hunah pawh hetiang reng hian inthlahlel thei ila...

"Ka nghen reng lai che hian tuin nge i ngaihtuahna lo luah? Mipa dang an nih vaih chuan..."  ti nghutin ka khabeah chuan rawn dawmin amah en thei tùr chuan min kuai dâk a, ngun zet hian ka mitah chuan min en ta ngur mai, kei erawh chuan nuih sak pah hian," Nang bâk tu nge ngaihtuah se min tih a? Ka tâna mipa awm chhun i ni alawm, i ni reng bawk ang," ka lo ti hnâp a, a nghâwngah chuan kan bân pahnihin ka kuah nghâl vat bawk a, chu chu duh tâwk mai lo chuan a hmuiah chuan ka fawhsak leh a. Ani pawh chuan thil dang sawi tawh lo chuan min fâwp lêtin ka kawr chhanah chuan ka nâk chu a chûl thla zai zai bawk a,  ka kâwngah tàwp chatin ka kawr tlângah a kut chu rawn zen lûtin a kut lâwng chuan ka taksa chu a rawn chûl chho leh ta a, min la fâwp reng bawk si nèn, ka taksa chu a za chuai chuai maiin ka hria.

Kan boruak chuan a zir bawk a, kan țhutna long chair-ah chuan dìm tê hian min mut thla zui a, kei chuan a nghâwngah la kuahin duhthawh takin ka la chhâng lêt mawlh mawlh bawk a, tu dang mah ka ngai lo va, thil dang ka ngaihtuah hek lo, kan pahniha khawvêlah chuan ka chêng a, ka luang liam mêk a ni.

Eng dang mah kan ngaihtuah loh lai chuan ka phone a rawn ti ta ral ral mai, Hminga che lai chu a tàwp chawt a, kei pawh posi lai zetin a hnuaiah ka mu zar mai. Thaw hawkin min rawn en chhuk a, na angreng zeta min rawn fâwp zawkin a tho zui ta nghâl a, ka hrilh a tihai leh ta, ka phone ri zet chu ka ngei hluah hluah hi a ni tawp mai.

Martha-i a lo la ni zui, ngei zet hian ka phone chu ka tih theih tâwk tiin ka melh nghek phawt a, ka chhâng ve ta chauh.

*******

Ațana'n," A fair hlawl lo, engah nge min hrilh ve loh? Bâkah, hmuh pawh ka hmu châk ve a," a rawn tih chuan ka nui hak hak phawt a," I la hmu ve dâwn lutuk, lo vui mai lo teh, tunah hi chuan ka la tlângzarh phal vak lo va, i rawn lèn chuan ka hmuhtîr phal mial chein ka ring," ka ti a, ani pawh a rawn nui ve tho a.

"Tûn țum chu hmuh a châkawm zual bîk riau a, i duh tak a nih bâkah i ti mai mai lo niin ka lo hria a, ka lawmpui khawp mai che, chuan, pi han ni ve thuai tawh teh, i fate'n kan fate an ngam lo lutuk mai dâwn," a rawn ti leh a, rilru hlim zet hian," A,  ngam lo tih vêl mai mai, a pa an  chhùn ang a, an rawn hmel țha dâwn teh asin," ka ti fiamthu ve a, chitiang mai mai chuan kan infiam chho a, kan la inbe rei zêk zui a.

Sêna pawh a puin a lo hrilh ve tawh a ni chêk ang chu, min rawn be ngei a, a rawn au chùl zui bawk a, nuam thei a nia.

"U Lawm, putea kha ka va lawmpui tak! Nang ang nula hmel țha leh hausa a han chhai thlu thei che a nia! A zei loh loh nèn, engtin nge, a sawi hmasa ve ngei em ni? A ngam a maw?" a rawn ti làwng láwng a, a boruak hap hi a nuam danglam thei bîk a nia.

"Mipa a ni alawm le, engah nge a sawi ngam loh ang? Pà tak a ni pà tak!" ka tih chuan," I sual e, heta in awm lai khân sawi țhat ve mai tùr che a nia, chance ka han pêk nasat dâwn tehlul che u nèn!" a rawn ti leh barh barh a, ka nui hak hak a, chutah," Engtikah nge in inneih dâwn? Ka châk tawh lutuk ringawt! Innei ngei ngei r'u aw, ka va intithei dâwn tak!" a tih leh tâkah phei chuan ka nui nasa, a lawmawm thei êm asin, a ngainat loh theih loh.

Zan khat erawh chu min hrilh lâwk miah lovin a rawn lang ve tlat mai a, mak ti deuh chung chuan ka lo lâwm viau tho a, hna chungchângah ka pa a be dâwn a nih ringin hnaih pawh ka lo hnaih ngam vak lo va; mahse, ka pa nèn chuan titi phunglêng bâk an sawi lo, a hnuah phei chuan ka pa chuan ka nu chu room lama kalpuiah a rawn sâwm ta daih zui a, hre thiam lo angreng tak hian ka melh tawn chhên ringawt a.

Ka pate room lama an kal hnu chuan ka va hnaih vat a," Eng nge i lo tih a?" ka va ti sar sar ringawt a, ani lah chuan," Ka rawn lêng maw le," a lo ti mai a, chutah," Khawi maw thingpui sen hâng chu," a ti zui zat a. 

"Eng nge i lo tih tak tak?!!" ka ti nawn leh a, ka la ring ngam lo a ni, ani lah chuan min chhànna ngai tê chuan min lo chhâng leh a, ka en vang vang hnuah chuan ring ngam ve tain hlim zet hian ka nui ta var var a; mahse, tho leh rihin," Thingpui sen hâng chu ka'n thli lawk ang e," ka ti sap a, ka va siam sawk sawk a, a bul chêtah chuan țhu ve nghâlin," Âwih harsa chu ka la ti țêp a ni," ka ti leh sar sar a, ka hlim êm avàng chuan ka nui sâng reng bawk a.

"Rawn țhàwn deuh thut che kha ka duh pah bawk a, mak i lo ti dâwn tih ka hre sa reng alawm," a tih chuan," Ti lutuk e, zan tin lo lêng tawh ang che," ka han ti nghâl ringawt a, ka duhthawh leh deuh mah mah chu a ni.

Ka pate rawn chhuah leh ka hlau lêm lo bawk a, amah si chial chuan ka țhu a, ani pawh chuan min kuahin ka sam chu a chûl hliau hliau reng a, zawi tê têin kan țawng a, kan innuih a, kan inmuah leh zauh zauh bawk a, khawvêl hi a nuam tak zet a ni.

Chutah, thil ngaihtuah chhuak thutin," Mary nèn khân engtia ințhen nge in nih?" ka ti chhuak ta hlawl a, ka sam a chùlna titàwp meuhin min rawn en chhuk a, kei chuan," Ka hre châk alawm, thil kal tawh leh tûn hun atâna thil pawimawh tawh lo ni mah se," ka ti leh vat a.

"Min boralsan a ni," min chhâng dáwn tawh lo emaw ka tih hnua a rawn tih sup chuan ka melh chho leh vat a, min rawn en chhuk ve leh chiah bawk a, a âwm dawmsak pah chuan," Ka tihpalh," ka ti sap a, chutiang thil chu a chungah a thleng ang tih ka rin loh lutuk vànga zâwt kha ka ni si a, nuam lo ka tiin ka lo zâwt ta kher kher chu ka inchhîrin ka inthiam lo nghâl zat a ni.

"Hun kal tawh a ni alawm," a tih chuan duat zet hian ka kuah a," Ka tihpalh tho tho, i rilru a nat dâwn teh rêng nèn, i hrehawm lo tawrhna zawng zawng chu tihrehsak vek thei dâwn lo che mah ila, tuam damsak che ka duh a ni, hliam belhchah lo chea thawi damsak che ka tum tlat ang," thutak zet hian ka ti sap sap a, a mitah tak chuan ka en kal bawk a.

Ani chuan," Ka lâwm e, nang hian hlimna min pein min ti ã lo chauh tawh zâwk a nih ber hi, ka hlimna lah a la famkim lo deuh e tih chauh a ni tawh a, a famkim leh lek hunah phei chuan..." a ti dût a, min en chhuk ve rùn bawk a, dâwt a sawi lo niin ka hria, a sawi awmzia pawh chu ka hre thiam ve deuh nghâl mai bawk, inneih chungchâng a ni ngei ang chu.

"A nih, kan inneih hunah min duat ve viau ang em?" ka tih leh sap a, meng zîm deuh san chung hian," Engtiang chiaha duat nge i duh?" a ti sup a, Sêna'n a bialnu hlui a duatzia a sawi kha ngaihtuah vang vang pah chuan," Duat deuh," uar zet hian ka ti ta ringawt a, a lo la nui suk zui.

"Nui ringawt suh aw, min duat viau ang che, chuan, kei pawhin ka duat viau bawk ang che," ka tih leh chuan," Kan induat tawn dâwn bawk si a, khum hi kan thawhsan thei rêng rêng lo mai ang a..." nui suk suk chung chuan a lo ti ve leh a. A thil ngaihtuah àwm ang chu ka ngaihtuah ve a, ka zah avàng chuan ka bîng deuh chem chemin ka hria.

"I ngaihtuah ka hria," nui hawk chunga a tih chuan," I ngaihtuah zâwk a nih kha," ka ti teh ngawt a, a nuih a za ve ngang a niang, a nui leh hawk a, ka zah avàng chuan a bânah chuan ka hmersak vak ringawt a.

A tûk zînga tûkțhuan kan kîl laiin ka pa chuan," Nizàn lam in boruak a țha tih ka hre mai," nui sûng chung chuan a ti ve ngei a, ka nu chuan a lo melh ralh tih ka hmu hman reng, ka pa hnênah chuan," Hna chungchâng vàngin a rawn kal em maw ni ka lo ti a," ka ti ve thung a, ka nu chuan," Kei chu ka ngaih a la ngam thei chuang lo, a va sual viau ang ka ti pawh a ni chuang lo; mahse, sum vàngin a duh che a nih ka la ring bur tlat," a lo ti sap sap a.

Ka pa chuan," I ngaih tițha lo duh suh, i ngaihtuah nasa lutuk a nih kha," a lo ti vat a, ka nu chuan," Ngaihtuah loh ringawt theih a ni hleinem, kan fanu neih chhun a nih bâkah ani lo hi neih kan nei hleinem," a lo ti leh a, min hmangaih vàngin min ngaihtuah tih ka hria, tukin hian ka hre chiang thar leh viau bawk, ka neih chhun ka nu leh pate hi ka hmangaihin ka zah a, ka ngaisâng dùn viau bawk. Ka tâna țha tùr an ngaihtuah a, nu leh pa an nihna zâwnah an ngaih dàn leh an ngaihtuah dàn a inang lo mai a ni.

"A tih duh loh hmel viau nain Halan-a hi a lo zei ru phian ang ka ti, a sawi hmasak a ni ngei bawk ang chu tiraw?" ka pain nui huah huah chunga a tih leh chuan ka nu chuan," A sawi hmasa lo thei nâng, chu pawh sum vàng a ni ngei ang," a lo ti leh vat a, kei chuan," A, nula ka la ni ve a, sum vàng chauha min duh bîkna tùr a awm thei dâwn em ni? Ka hmel hi a lo chhe viau tihna a ni ngei ang," nui chunga ka tih chuan ka pa chuan," Ni chiah e, fanu hmel țha tak leh fel bawk si kan neih laia sum vàng chauha ngaizâwng duh anga inchhuah chu a dik thei lo, i ngaihtuah nasa lutuk ka tih tawh kha, ngaihtuah thui viau a ngai hleinem, Bawihtei pawhin a hlimpui êm hi, Halan-a hi a rilru a sual ka ring ve miah lo a nia, a duhãm viau lo bawk ang," tiin ka nu chu a hrilh ve mawlh mawlh a, lungthlu zet hian ka lo ngaithla a.

Inrinni a ni a, tih tùr țûl ka tih zawh hnu leh leh thuamhnaw sûk ngai ka sûk zawh hnu chuan Martha-ite ina kal zawk ka ngaih avàngin ka chhuak a, haw lamah Hminga inah  ka tlang mai zâwk teh ang, Martha-ite inah kal hmasa phawt ila a fuh zâwk ang.

An in chu a lo inhawng huai a, car engine ka off hnu chuan dìm têin ka chhuak a, Harriet-i emaw a nu emaw barakhaih thut ka tum a ni, zàwi tein ka kal țham țham a, ka hmui ka hup a, ka nui ru pãwt pãwt a, ka barakhaih huna Martha-i phu chiang lutuk tùr leh a hnu lama min hauh dàn tùr chu ka ngaihtuah kai zung zung bawk a.

Mipa țawng ri bul bul ka hriat avàng chuan ka ding dat a, beng dawhin ka han ngaithla chiang deuh a, Hminga aw a ni tlat mai, ani hi a lo va lêng a nih dâwn hi, min hrilh miah si lo va, țhâwng thut teh ang.

"...kan boruak a ni alawm, chutiang deuh chu ka tum dàn a nia," a ti dût dût a, eng thil nge an sawi chu ka hriat châk tlat avàng chuan lût duh lovin ka ngaithla leh rih a, Sawmkima nui paha a țawng ka hre leh a, Hminga pawh chu a nui ve hawk a," A dik alawm, khawvêlah hi chuan sum hi a pawimawh ve êm bawk a..." a tih dût dût chu ka hre leh a, a țawng a thùm deuh avàng chuan a thil sawi dang chu ka hre chiang thei lo va, a thûm deuh bul bul reng a, a nui leh a, a nuih zawh lama,"... kherh thlu ta a, vànnei-mei-tãwia ka ni mai," a ti leh a, ka awm hmunah chuan che lovin ka ding khawng reng titih tawh a, Sawmkima rawn țawng leh chuan ka thinlung mit del chu a rawn men fiahtîr kuar kuar mai.

"Ni e, i thil tum i tihlawhtling dâwn ta a, mâkpa chhûngkhungin awm nghâl hmak..." ka hre chiang thei leh lo va, a hnu deuha,"... an fanu ber i neih chuan an in leh lo, an rosum zawng zawng pawh hi i ta..." a tih chu ka hre leh vuai a, ngaithla chhunzawm ngam lovin ka beng ka hup ta ringawt a; mahse, Hminga nui hawk ri chu ka hre zui leh tho, chu chuan ka thinlung chu a rawn tiphu zawih zawih mai! 

A thil tum chu kei min neiha kan sum zawng zawng control nghâl vek hi a lo nih ngei dâwn chu, nui chung khân a la sawi zui, sum vàng chauha min neih a lo tum, a thil tum a tihhlawhtlin teuh tawhzia hi, a thil tum chu ka nu khân a lo ngaihtuah chhuak thiam ber a lo nih àwm hi. Car lam pan chuan thãwm dìm thei ang berin ka lêt a, seat-ah chuan ka țhu thla hnawk mai, ka thinlung hi chemte hriam taka vih tlum thawiha duh tâwka herh kual leh ang tluk zetin a nâ, engtin nge hetiang rilru hi ka chungah a lo put theih ni?!!

*I HMAA KALTE I ÛM PHA LO A NI MAITHEI, I THIL SAWI  ERAWH ÛM PHÂK TUM HRÃM ANG CHE*