☆OKHEE☆ - 24 + BONUS By Dingdi Pachuau

 ☆OKHEE☆ - 24 By Dingdi Pachuau

In ka thleng a, ka nu chuan," I lo va haw hma ve! I lèn rei deuh ka lo ring ve ngawt a?" mak tih hmel deuh hian a lo ti a," Nia, ka rei ta lo mai, tih tùr pawimawh ka nei tih ka hre chhuak leh thut a," tiin pangngai thei ang berin ka chhâng a, ka room lam ka pan nghâl vat a.

Khumah chuan ka țhu vang vang a, ka thil hriat kha ngaihtuah chhuah leh duh lo viau mah ila ka han ngaihtuah lêt leh a, ka mumang mai ni se ka ti tak zet a ni; mahse, Hminga aw ngei a ni tih hre tùrin Hminga aw ka lo hre ngun ve tawh a, amah ngei a ni tih ka hre bawk. Bâkah, inah a awm lo ngei em tih chian tùrin a in luah lamah ka tlãn chho a, a lo awm lo ngei bawk.

Chutiang ka ngaihtuah kual viau lai chuan phone chu a rawn ri a, ka han en chuan Martha-i a lo ni a, ka han chhàn chuan," I lo kal dâwn lo em ni? Halan-a pawh i rawn kal dâwn tih hre sa ang hrimin a rawn kal a, a lo nghâk reng che," a rawn ti lar lar a, kei chuan," Ka hman lo leh thut a," tiin chhuanlam tùr ka ngaihtuah chhuah hmasak ber chuan ka han chhâng a, ani chuan," A va mak dâwn ve! I hman veleh rawn kal tho la, nichin deuh lawk khân kei pawh inah ka haw ve chauh alawm, thil pawimawh tiin ka chhuak ve tho a," a rawn ti leh a.

"Ka hman chhuak kher lo maithei a ni," ka tih chuan," A va mak dâwn ve!  Vawiin chu lunghnûr takin a haw dâwn tihna a nih chu. Chuti a nih chuan, fiamthuin i thla kan lo sawisa hlut thei tihna," tiin a rawn nui ar ar a, a thaw hi a veng ve si a maw, tuna ka rilru awm dàn leh a thawven dàn hi chu inpèrsan tak a ni.

Kan inbiak zawh hnu chuan ka thil ngaihtuah ngai bawk chu ka ngaihtuah leh a, Martha-i pawh chuan Halan-a thil tum chu a hre bîk lo a ni ngei mai, ka cousin duh tak a ni a, hre ta hlauh se chuan min hrilh daih tawh ang chu, a pasalin a hria tih hre ve phei se chuan, a rilru a nain ințhen hial pawh a duh rum rumin ka ring; mahse, a pasalin a hria tih chu ka hrilh hauh lo ang.

Ka thaw hak a, sum vànga min neih tum a nih chuan a mitmeng leh cheziaa min duhna tilang ve țhìn nia ka lo hriat zawng zawng kha lemchanna mai a lo ni dâwn tihna a lo ni si a, lem chu a lo chang thiam tak zet a ni, Oscar-ah Best Actor Award dawng tlâk khawpin lemchan chu a thiam a ni, kei lahin rinhlelhna pakhat mah ka nei hauh si lo. Ka duh leh ka hmangaih êm avàngin a rilru ang ve tho kha a put ka lo ring ve char char a nia, thâwk ka la a, mihring rilru hi a lo va mak thei tak êm aw ka ti vawng vawng ringawt. Vawi hnih bum ka ni ta a, a hmasa ai kha chuan min den dàn a dang zak, Zorema kha chu ka hmangaih ve hran lo va, min duh êm avànga duh ve ta mai kha ka ni a, Hminga hi zawng, ka rilru, thinlung leh thlarau chena ka duh a nih avàngin nâ ka ti lo thei lo, min duh thu a sawi hma pawha ka duh daih tawh kha a ni miau a, a thil tum hre hauh lovin kei lah chuan ka pan ruak ruak a, kan chêtsual teuhziate ka ngaihtuah chhuah phei chuan ka zak ru ta ngawih ngawih mai.

Hminga'n ka bula a thil min hrilhte chu ka theih ang angin ka han ngaihtuah chhuak a, min kaltîr ngai loh tùr thu a sawite kha tunah chuan a chhan ka hre thiam ta uar uar mai, ka nu leh pa fa mal, an neih chhun niin mimir ngaih dànah chuan an ro zawng zawng hi ka chan tùr a ni miau mai a, chu chu lo îtin min duh thu min hrilh ta chiah a, chutiang êma rosum ît tùr kan lo nei rêng em ni le? Keini aia sum nei hi Aizawl khawpuiah pawh hian an ther fur mai si a, engati nge kei kher kher hi ni ang? Ka awm dàn leh chezia ațangin amah ka duhna hi a hre hnehsawh viau ngei ang a, chu chu remchângah a la ta a ni ngei ang.

Ka nu leh pa bulah chuan a pângngai thei ang berin ka awm hrâm hrâm a, kan chanchin hi ka awm dàn ațangin an hre tùr a ni lo ka ti hmiah a, ka in-control nasa viau a ni. Zànah pawh chhuak lovin tih tùr neih chhuanlamin ka room-ah ka awm tlat a, ka hma lam hun tùr chu fîm taka ngaihtuah ka duh a ni.

Hminga'n min rawn phone leh khauh mai a, chhàn loh ka han tum zet nain ka thil ngaihtuah avàng chuan ka chhâng leh ta zâwk a.

"Vawiin chuan i buai ta viau a ni maw? Ka lo nghâk deuh reng che a," ngaihawm zet hian a rawn ti sup a, a aw hi chuan bumtu aw a ang hlawl lo a ni, a damin min ngaihtuah hmel bawk si, mitthlaa hmu rauh rauh pah chuan ka maimichhîng vang vang phawt a, ka insehruh pah bawk a.

"Umm...ni mai ang chu," ka ti sap a, ka aw chhuak chu a pângngai viau mai a, ka lâwm khawp mai.

"Ka va khawngaih reuh che ve aw...! Tihpuite i ngai em?" a rawn ti leh a, kei chuan," Ngai lo ve," ka ti phawt a, chutah," Vawiin chuan i inah maw min lo nghah a?" ka ti leh a, Martha-ite ina ka aw hriat kha amah ngei a ni em tih fiah ka duh a ni.

Ani chuan," Ni lo ve, Sawmkimate inah ka lêng a, i rawn kal dâwn tih Martha-i'n a sawi a, ka lo nghâk ta che a," a ti dût  dût a, chutah," Ka hmu châk viau che asin le, nang hmu lova ni vui liam hi hrehawm ka ti thar ta riau mai," a rawn ti leh dût a.

Ka nui hak ringawt a, hei pawh hi a ruahmannaah a tel vek ngei ang chu!  A țawngkamah ka tawlh thlu tùr a ni lo, beng pakhatin ngaithla ila lehlamah chhuahtîr leh nghâl daih ang, ani pawhin a rilru chhúngril ațangin a sawi chuang hleinem. Min bumna, a tum a tihhlawhtlinna kawnga bet ve mai a nih hi, ka la âwihsak cheu chu mi mãwl tak ka ni dâwn asin.

"Ka be buai rei lo ang che, min chhàn țhat loh dànah i la buai a nih ka ring tlat; mahse, i aw tal hriat ka châk êm a, i aw hre lo hi chuan zàn mut a tui thei si lo va."

A țawngkam tin mai hian min tina ngut ngut ta mai zawng a nih hi, lo hretu awm se chuan chutiang tluka thu làwmawm chu, hriat an châk thei ngawt ang chu, kei ngei pawh hian vawiin chawhma lam zawng kha ka châk ngawih ngawih; mahse, tunah chuan a țawngkam chhuak hrim hrim pawh chu ka tân chuan hlîng ang mai an ni zo ta.

"Hna thawh nuam le, thawh dàn tâwk erawh hria la, ka duat i nih kha."

Ka phone chu ka hmer ngawt ngawt mai a, vawiin lama ka thu hriat kha ka ringhlel deuh ta rum rum mai, tuna a thil sawite kha, ka chungah khatiang thil țha lo kha a plan thei tak tak ang em tih tùr a ni; mahse, a aw a ni ngei si, sawi pahin a nui ngei bawk a nih kha, min va bum nalh tak! Fel takin a hmâwr a bâwk hman țêp a nia. 

Min be zo chiah chu, ka lo țang nasa hle a ni tih ka hre chiah, ka inhûm ruh nasain ka phone ka hmet tàwp chiah chu ka thaw hawk hawk mai a, a hnu deuhah erawh chuan theihtâwpa tam boruak hîp lûtin muangchângin ka thaw chhuak leh țhìn a, chutianga rei vak lo ka tih hnuah chuan ka ngaihtuahna pawh a fîm țha leh ta a, thil ka ngaihtuah tùr lamah chuan ka rilru pawh ka sâwrbing țan ta a.

A hmasa berin, a thil tum hi ka tihpuitlintîr lo ang, hei hi thil tam tak ka ngaihtuah kual hnua ka thutlûkna a ni, plan fel tak siamin min ngaizâwng a, mawi takin a tàwp a khãr țêp a, aniin plan siam fela țha taka a tih theih chuan engah nge ka tih theih loh bîk ang? Ka ti thei ngei ang.

Zàn mut erawh a har lam hret chu a ni, vawiin hi bo daih se, a nih loh pawhin ka mangchhia ni daih se ti tein ka ngaihtuah a, a sâwt bawk si lo. Mu thei lo chuan ka tãl ka tãl a, mipa dang tân min phal ngai loh tùr thu a sawite kha ka ngaihtuah chhuak a, a duhthusàm ber pawh a nupui ka nih kha a nih kha. A lo ni thei khawp ang, a plan han hriat tâkah chuan a thil sawi apiang khân a plan fel tak lam an kâwk zêl mai si a, a ngaihtuah thuiin a thei ka ti tak zet a ni, ka rilru leh thinlung thlengin min bum vek thei a ni si a, nula senior bum fin theih tawh loh tùra ka lo inngaih ve tawh tehlul nèn, hmangaihna hian mit a lo tidel thei viau a lo nih hi. Ka chunga hetiang rilru a lo pu hi rin harsa ka tiin âwih harsa chu ka ti alawm, hei pawh hi ka duh êm vàng leh ka hmangaih êm vàng a ni.

Mãwl taka chêt ka duh loh avàngin a thil tum chu hre lo ang takin ka awm a, ka awm dàn pawh ka tidanglam chuang lo; mahse, ka rilru a tina ngawih ngawih si a, ho têa chhuah erawh ka tum bîk lo. Zorema anga dâwihzep taka tlànchhiatsan kha chu ka tum tawh hauh lo bawk, a hmuh theih rengin ka awm ang a, hmaichhanah ngei hian chhûngril lama indona chu ka puan khum ngei ang.

Chhùn lamah inhmu thei lo mah ila zànah a khât tâwkin a rawn leng a, ka pate lah hian chance min pein room lamah an inthiar fihlîm daih zêl si a, a rûk tak chuan min țhutpui ve rih se ka ti țhìn. A chhan chu kan pahnih chauha kan awm chuan a rûka alaka indona ka puan hi a derthãwng țhìnin ka plan hi a flop hlauh ang tih ka hlau țhìn.

Mahse, a bul hnaia ka awma ka taksa nghèng renga a awm chuan hrehawm ka va ti si êm! A taksa lum ham hamte chu a la danglam chuang hauh si lo, ka taksaa a thawh dàn a la ngai reng si, duhthawh taka min fawh pawhin nuam ka tihna a bo bawk si lo, hetiang chuan ka hnar thei tawp nâng, a thil tumah a hlawhtling ngei ngei ang, he thil hi tu mah ka hrilh ngam bawk si lo. 'Keimah chauh hi titàwp theitu chu ka ni, mawhphurtu ka ni alawm' tiin ka infuih ru sauh sauh țhìn.

"Thil dang a lo ngaihtuah leh ta," tiin ka mit chu a rawn hup a, a kut lian pui leh lum thar thar chuan ka hmai chu a hup bo hmak thei hialin ka hria, chutah, ka beng bulah chuan," Mipa dang ngaihtuah hman lêk lova ka bula ka hmuh theih renga i awm reng hi a hun tawh a ni," a rawn ti leh sup a.

"Mipa dang ka ngaihtuah bawk lo ve!" ka lo ti hlak a, ka ngaihtuah hi hre nâ se chuan ka bulah pawh hian a awm kher lo maithei a ni. Duh chuan țhenna thu hrilhin kan inkâr hi ka titàwp ve hmak thei tih chu ka hre reng; mahse, chuti maia awlsama chhuah chu ka tum bîk lo, hlim takin a suangtuahna ramah la chêng rih se, a la chêng reng emaw a tih tih laiin harh chhuak thut rawh se.

A nui hawk a," Tlêm tea thin a tel hian ka làwm reuh tlat che, Pathianin rem a tiha kan inneih huna i rai hunah phei chuan i tawrhhlelawm reuh ngawt ang ka ti; mahse, chu hun chu ka nghâkhlel viau thung si, ka duat zual ngawt ang che," a ti sup sup a, kei ka rilruin ka lo insehruh char char thung. Chu hun a thlen chu Pathian hian remti lul suh se, kei pawhin rem ka ti lo. A țawngkam thluma tawlh thlûk ka tum tawh lo bur," Min duat dâwn lo, chu hun chu a thleng dâwn lo bawk," ka ti rilru țhuai țhuai a; mahse, a ri chhuakah chuan," Min duat loh vaih! Ka tirethei ngawt ang che," ka ti ve thung a.

Tûk khat chu ngaihtuahna thar neiin tûkțhuan kan kîl lai chuan ka pa hnênah chuan," Pa, dàwr lamah hi chuan ka tel lo pawhin hna an thawk thei tho sia, i office lamah min transfer leh tawh teh, puih che ka châk thar deuh tlat," tiin ka sawi chhuak a, ka pa puih ka duh vàng chu ni pakhat bawk mah se Hminga hna thawh lai hi thawhsaka a bàn theih dàn tùr ngaihtuah ka duh a ni.

Mak ti tak hian min rawn en phawt a, chutah, nui ta sukin," Halan-a bula hna thawh i duh tih sawi hreh kher mah ta che, ani pawh 'In inneih hma chu' tiin hna ka pe nasa ve deuh a, nakin lawka a enkawl vek tùr a ni tho bawk a, a sawisêl hran chuang lo, nuam a ti zâwk em maw ni tih tùr hian phûr takin a thawk thei zêl a, a thawkrim viau a ni, ka ring viau bawk a, engkim a lo hriat lâwk hi a tân pawh a țha a ni," a ti ta charh charh a, pawiti rilru tak chuan ka pa chu ka en vang vang ringawt a, tunah chuan ka thil hlauhthàwn a thleng dik țan ta tlat mai, ka lo ngaihtuah chhuak har deuh chu a ni.

"Pa, keimah ka awm reng alawm, engkim ka thiam ve tho a, min tihtîr mai tùr che a nia, vawiin ațangin ka rawn pui țan ang che, pâwn lam mi chu engkim hrilh vek a fuh lo, kan inneih hma chuan ani pawh pâwn lam mi a ni," ka ti ve ta a, ka thu sawi chu mak an tih loh nân ka nui pah bawk a.

"A dik reng mai, ka lo sawi ve tùr chu a awm hauh lo nain Bawihtei thil sawi chu dik ka ti, mihring hian kan hma hun kan hre hauh si lo va, eng thil pawh kan chungah la thleng thei a ni, Bawihtei hi thil engkim chu tihtîr zâwk teh, a inhuam tho chuan," ka nu pawh chuan a lo ti ve a, ka nu thu sawi ka pawmpui ber țum a la ni hial ang chu.

Ka pa pawh chuan," A țha alawm, i ning thei viau khân ka hre si a, pasal neih i tum hnaih ka rin ve tawh nèn, sumdàwnna lam i rawn tui thar ta zâwk tihna a ni maw?" tiin a nui vur vur a, " A țha e, Halan-a hnêna ka pêk chu a pawimawh tho a; mahse, i thawh tùr chu ka thawh ang chi tho ni rawh se, ka chawlhsan hun pawha i buai loh nân, hetianga i rawn in-volunteer hun hi ka lo nghâk reng zâwk ni àwm tak a ni," a ti leh a.

Ka insiam lai chuan za lo zet hian ka nui sak a, a rin ang ngawt chuan thil a awlai lo ang, thil engkim hi a kuta awm tùr angin a suangtuah ngei ang a, a thleng dâwn hauh si lo, hei hi a ni ka plan chu. Zawi zawiin ka hlat tial tial ang a, ani pawhin min hlat tial tial bawk ang, a inrin loh lai takin he sumdàwnna leh kan inlaichìnna ațang hian a mai pâr thlawn hmiah bawk ang.

Ka pa nèna kan inzui lût an lo hmuh chuan min lo en duh viau tih ka hria a, ka nuih sak sak hlawm a, anni hi hna ka lo thawhpui tawhte kha an ni a, an fel hlawm viau a nih kha. Tunah pawh kan thawkho leh dâwn a, rilru kal ding lutuk tùr laka min vêngtu tùrte an ni ngei ang.

Ani pawh a țhutna ngaiah a lo țhu leh rùn tawh a, min lo hmuh chuan mak a ti tih ka hre mai; mahse, nui hmel deuh rawn puin a mitmeng nung deuh sar chu ka hmu zui ngjâl a. Nia, mak a ti ang chu, ka kal ve a ring tawp nâng, tunah hian a plan zawng zawng zawi zawia tițhuanawp vek tùrin ka kal a ni tih hre phei se chuan nui hmel hi a pu tawp lo ang.

Ka pa chu a țawng mawlh mawlh a, ka thawh ve tawh dâwn thu a hrilh chuan min rawn enin," I țhutna ngaiah khân em ni i țhut ang?" tiin min zâwt sup a, ka chhàn hmain ka pa chuan," Tih neuh neuh tùr a tam dâwn a, thil hrilh fiah ka duh pah bawk nèn, ka room-ah țhu ve rih mai rawh se," a lo ti ta hlauh a, ka chhàn ngai lova ka pain min chhàn khalh ka làwmzia mai chu a!

Nilêngin room inhnaih têa țhu e ti lo chuan kan inhmu lo tluk a ni, vawi khat ka pa hmu tùrin a rawn lût zawk a, ka lo en lo va, ka hnaah ka bûr lui ngar ngar a ni. Chhùnah kan chàwl lo va, in lam ațanga ei tùr kan ken chu kan ei mai a, pâwn lamah pawh kan chhuak lo.

☆OKHEE☆ (BONUS) By Dingdi Pachuau

Zànah min rawn bia a," Vawiin kha chu i zahawm khep khep khawp mai, kan 'pi' thuai lo ang che tih pawh a hriat hauh lo a nia," a rawn ti a, ka nui hak ringawt, ka nui lui pawh a ni lo, ka nui tak tak! Ni e, min 'pi' thuai ngei ang; mahse, ani hi chuan min 'pi' rei kher lo ang.

"Thil thleng thei a ni," tiin ka chhâng a, dâwt ni hek lo le, a nui hawk a," I pa tluk zetin ka zah thiam tho ang che, hotu ber nih pawh i inhmeh dâwn riau mai; mahse, min chhawr rim lutuk lo la aw," a rawn ti leh dût dût a.

"Chhawr rim ang, ka pa aiin ka khirh hrâk ang," ka tih chuan," A châkawm tawh khawp mai," a lo ti duh chauh a! Ka țhen sak ringawt, a bàn hma chu ka chhawr nasa khawp ang le, a châk bawk a.

Mahse, ka awm dàn hi chu hahthlâk chu ka ti a ni, ka pa room-a ka luh dâwn apiang hian hmân deuha kan awm dàn leh he lai room bul kan hman țangkai theihzia kha ka ngaihtuah chhuak ziah a, mitthlaah a rawn lang nghâl chuai chuai lo thei țhìn lo, hei tak hi ka duh lo țhìn a ni. Bâkah, ani hian engkim ka hria tih hre chhuak tawh ni se, inhauin inchhuahchhàl bawrh bawrh chu ni ila chuan ka zia deuh ngei ang. Chutiang chu a ni si lo va, buaithlâk ka ti ru khawp asin, a bulah amah duh leh ngai ngawih ngawih anga ka lan reng a la ngai si a, chu chu hrehawm ka ti tak zet tawh, lehlamah chuan a ângchhûnga awm ka tihna a la reh tak tak thei chuang rih si lo, lehlamah lah rilru ka pe tak tak tawh bawk si lo, tuilairap deuh reuhin ka awm ni berin ka hria, ka plan hi keimah ngei hian ka ti-flop ang tih hlauhawm tak a ni. Amah ang lo takin mahni rilru lo ang taka nun hman hi ka thiam lovin hrehawm ka ti viau mai si a, ani zawngin a hnehsawh nasa si, inang lo tak chu kan ni.

Ka pain ka hnaah chuan min fak ve khawp mai a, nuam pawh ka ti ve hle a ni. "A hma khân hetiang hian lo thawk țha duh ni la chuan keia thawh kher pawh a ngai lo tùr a nia, i lo harh chhuak har deuh chu a ni tiraw? Tunah chuan ka rilru pawh zàwi zâwiin ka chawlhtîr țan thei tawh dâwn e," a ti sauh sauh a, Hminga nèn kan chungchâng chu," Mimal nun leh hna hi chu thliar hran thiam hi a pawimawh khawp a, ka rin ang i lo ni hauh lo, Halan-a hmu tùra i chhuah sek ka ring a nia, i rilru hi a lo puitling tak tak tawh a nih dâwn hi," tiin a nui var var a, kei erawh chuan," Office hi chu hna thawhna hmun a nia, hna thawhna hmunah chuan thawh mawp mawp mai tùr, hna thawh loh hun inrìmna hun chu a tam alawm," ka ti ve a, hetia ka tih loh chuan Hminga ka be ngai lo leh ka melh ngai lo lutuk hi a hre thiam ve ang tih ka hlau a ni.

Hminga'n," Chakai leh Lakhuihthei i ei châk em? Min rawn thawn phei nual a, rawn chho la," a rawn tih chuan ka maimichhîng vang vang a, ka ei châkzia chu pui tak a ni! Anni chakai chu ei pawh a hlauhawm dâwn si lo va, Lakhuihthei lah ni se a tharlâm dâwn nasa mai si, ka ei châk tak zet a ni. Han eisak chu a pawi viau nâng, ka rilru ka han thlâk vek ang tih pawh ni hlei lo, bâkah, ka chhûngte leh a lakah pawh kan inkâr chu a la țha tak zet a ni tih lantîrna pawh a ni pah bawk ang a...

Ka chho ta nge nge a, Sêna chuan a rawn thawn phei tam viau niin, pum khat lian țha tak chu ei theih mai tùrin a lo siam tawh a, ka insûm der vêl peih lo, ka ei nghâl a, a thlum tui nasa mai si a, ka ei țeuh mai. Ka ei lai chu min lo thlîr reng niin, ka en veleh chuan a lo nui suk a," Ei ve ta che," ka tih chuan," I ei dàn kha a hmuhnawm êm a ni," a lo ti sup a, ka ner deuh sak a, ka melh rum pah bawk a.

"Ei țeuh rawh, i hàwn thla țeuh bawk dâwn nia, mahni chauh chuan a tui mawh deuh a," a tih leh chuan," A thlum tui tak zet a ni, Lakhuihthei ka ei tawh zawng zawngah chuan a la thlum tui ber maiin ka hria," tiin ka han fak ve hlak a, ka rilru tak tak pawh a ni. Ei tùr tui tak min pe a, a rilru chhûngril takin min duh lo pawh ni se ei tùr min pein min duhsak tho a, ka fak pawh a phû viau a ni.

"Zanriah i ei nghâl dâwn nia, Chakai kha i duh ve țhìn bawk sia, a thau hlawm khawpin ka ring," tiin bucket pãwla a dah chakai chu rawn khaiin min rawn entîr a, a vaiin 10 ai chuan a tlêm lo tawp ang, a lian țha hlawm hèl hùl bawk si a, chhum hmin huna an taksa han keu phel hun tùr ka lo mitthla lâwk a, ka phûr zek zek tawh mai, ka hnial phal teuh lo bawk. Bazârah chakai chu an zuar zauh zauh nain khawia mi nge tih chiang takin kan hre țhìn si lo va, ei châk viau mah ila kan lei ngam ngai lo, hei zet hi zawng ka ei ngam chiang alawm.

Ka nu ka phone a, chaw ka ei nghâl dâwn tih ka hrilh chuan," Leh ta mai mai a, nula tlangvâl nih hi chuan free lutuka awm dun hi a țha ngai lo a nia, rawn haw har lo la?" a rawn ti a," Aw le," ka ti a, ka hmet tàwp nghâl a.

"Eng nge ei châk dang i nei em? Zanin chu i ei châk apiang ka siamsak ang che," a ti sauh sauh a, a rilru puthmang hre rùn lo ila chuan ka va lãwm leh dâwn tak! 

"Ka nei chuang lo, ka duh ber Chakai kan hmeh dâwn tho a," ka lo ti ve thung a, ani chuan," Ka inhuam teh a nia, han ngaihtuah vang vang teh," a la ti țâlh a, kei erawh chuan," I siam apiang a ni mai, i siam chhûngin keiin ka siam thiam ve zâwng salad ka lo siam ve thung dâwn nia," ka ti a, vawiin chu rilru helhkam nri țûna awm lovin boruak hap tithâwl deuh teh ang, ka rilru pawh a hrisèl phah deuh mahna!

Zanriah hmeh tùr a siam vek a, a arsa kan chu a tui hmèl kher asin, a siam rimtui bawk si a, min ei chhintîr nghe nghe a, a rim a tui tluk zetin a tak pawh a tui e," Chawhmeh siam lamah hi chuan i 'cial' ve ngawt mai," tiin ka han fak zauh a, ani chuan," Ka lãwm e," a ti sup phawt a, chutah," Chakai ka chhum zawhah ka inbual lawk ang a, chaw kan ei nghâl mai dâwn nia," a ti leh zat a.

A inbual hlàn chuan a in chu ka thlêk kual a, a che fel ve roh hi ka tia, mipa che țawp tak hi chu a ni lo ve chiang alawm, ka duh chi tak pawh a ni. A rilru chhûngril kha sawi chhuak lovin han pai ta mai mai se chuan tunah pawh hian rilru hlim takin ka la awm ang a, kan inneih hunah pawh kan sum leh in leh lo zawng zawng chu a kutah a awm vek àwm tho si a, kan han rin dâwn tehlul nèn, mâkpa rangkachak leh pasal duhawm tàwp a ni mai dâwn asin..

"Mak thei vung vung ve...!" a rawn tih chuan ka en vat a, towel a rawn veng leh țah a, tawnzau dum a rawn ha chhuak bawk a, a pian nalh tak erawh a tawnzau hâk chuan a khuh bo lo kher mai. Ka en reng a, a dàr pharh dârh leh a bân sei thlurh, thahrui ngah hmel, ni leh lo, a ngah tih chu ka hre reng tawh zâwk, min kuah fo va... a vun sen uk kharh maite chuan a tilang pàin a ti-mipa bîk hliah hliah ka ti...

Inhre chhuak thutin," Thuamhnaw ha thuai mai teh!"  tiin ka hawi sawn ta vat a, ani chu a lo nui hawk thung a, ka inngei țhìn alawm, ruaka a awm hmuhnawm ka ti țhìn lutuk hi, a rûk tê hian ka lêrh viau a niang, a nih loh pawhin mipa hi ka lo râwp viau a ni ngei ang; mahse, Zorema kha zawng eng atân vak ka tih loh tawp kha maw, min khawih ve a tum pawhin ka engah mah a thawh ngai loh kha.

Khaw thim tak tak hmain chaw chu kan ei a, kan inkârah inzah țît țêt a awm tawh hran lo bawk a, ka ei țeuh mai. Chakai lah chu a bawppui min theh khâwmsak țeuh a, a lian hlawm bawk si a, ka ei zo sêng lo, ka han pe lêt țhen leh bawk a, ani erawh chuan a ei ve vak lo," Kei chuan ka ngaina ve tehchiam lo, i duh êm avàng chauha chah ka ni," a tih chuan," I tizahthlâk e, vir min va ti dâwn tak!" ka lo ti khauh a.

"Engah nge chutiangtea i sawi? I vir rêng rêng lo. Ka pain a ei țha thei lo va, Sêna deuh chauhin a ei a," a lo ti thung a, chakai pakhat chu phel lehin," A thau ve viau hi," tiin a țâng lam chu min rawn pe leh a," Ka duh tawh lo, ka puar tawh lutuk!" ka lo ti vat a, ani lah chuan," Chaw ei tawh lovin chakai chauh kha ei tawh mai rawh," a lo ti sup thung a.

Ka puarzia mai chuh! 

"Hna i thawk nasa a, puar taka ei hi chu i mamawh a ni. Chhùnahte hian ei tùr i ei puar ngai em? Hetia i rawn thawkrim ta thut hi i taksa hian a zo lo ang tih ka lo hlauhpui țhìn che a," a ti sup sup a, ka thlèng seng fel chu min lo puiin Apron a hrêng țah bawk sia, ka nuih a tiza lek lek a ni, lehlam takah erawh a inhmeh ru phian lawi a, a tih ngai loh hmel deuh deuh a ti lai hmuh hi chuan en vung vung loh hi a harsa ka ti; a zei loh hmel aiin a la che fel thlup zui a.

Ka haw dâwn chuan Lakhuihthei chu min hawntîr deuh vek a; mahse, pum hnih erawh ka dah lêt leh hrâm tho, chakai pawh chu hàwn vek tùrin min ti nasa a; mahse, chu êm êm chu ka duh ta bîk lo va.

Car-a ka lût tùr chu min chelh leh vang vang phawt a, dik tak chuan kei pawh hian a rûk tak chuan ka la thlahlel alawm, hei tak hi hrehawm ka tihna chu a ni, rilru nain hrehawm ti viau mah ila amah ka duhna leh ka hmangaihna hi a bo nghâl vek si lo va, rilru na tak chung hian hlim tak angin ka lang mai mai a ni.

"Ka hmangaih che, Lawmi. I hria tiraw?" 

Kan awmna a êng țha lo hlauh chu ka lãwm tak zet a ni, chuti ni lo se chuan ka meng phar ãwk leh a hnua ka meng rum kual vêl chu a hmu ngei àwm si a.

"Ka la hre lo a nih ka ring," ka tih chuan," Ka hmangaih tak zet che a ni, tûn ang kuma hmangaih ka tawn leh hi ka inring ngam tawh lo va; mahse, nang ka tawng ta si che a," a ti sup a.

Aw...hêng te hi a hma khân lo sawi daih tawh se... A thil sawi râpthlâk tak kha hre lo ila chuan khawvêla hmeichhe hlim ber niin vànnei ka va inti dâwn tak êm!! Tunah zawng engkim mai hi a dang vek tawh si a.

*MI HLAWHTLING KAN TIHTE HI VAWI TAM TAK AN BEIH HNU PAWHA BEIDAWNG LOVA BEI ȚÀNG ȚÁNGA HLAWHCHHAMNA HLAWHCHHAMTÎRTUTE HI AN NI*