☆OKHEE☆ - 25 By Dingdi Pachuau

 ☆OKHEE☆ - 25 By Dingdi Pachuau

Ka mut hmun thleng chuan a thil sawi chu ka ngaihtuah reng a, min hmangaih thu a vawi khat min hrilhna a ni, ka thaw hak a, min bum chhunzawm zel chu a la tum fan chu a nia, a rûk takin hrehawm a ti ve ang em le? Keimah min duh tel lova sum vàng liau liaua min pan a ni si a, kan pahniha hun thâwl tak kan neih pawha insûm tluan thei kha a ni a, ka pa a zah thu a sawite kha ka lo âwih ve êm êm kha a nia, a tân chuan insùm kha harsa viau tùr a lo ni miah si lo va, kei lah khân ka duh êm avàng khân insùm ka lo tum miah lo thung a, a va zahthlâk chem chem tak! A rûk tak chuan min nuihzat ngawt ang chu!

Ka muthilh hma chuan ka lukham hnuaia ka phone chu a rawn nghawr dat a, WhatsApp message a ni ngei ang, amah bâk a nih ka ring lo, tûn hnai deuh lawk ațang khân zan tin deuhthaw min rawn 'Good night' ziah alawm, meng siar siar chung chuan ka han en a, amah a lo ni tak tak a.

*Ka Good Night hma chein he thu hi ka hrilh leh ang che, Ka Hmangaih Che, Lawmi. He thu hi a rinawm êm êm reng fo ang, Ka Hmangaih che, ka thinlung zawng zawngin. Chuan, zanin atân Mang țha, Mut tui le*

Ngun takin ka chhiar chhuak dap a, tûnlai tak hian a hma ai khân a țang sauh niin ka hria, ka awm dàn ațang hian a hre ve deuh pawh a ni maithei a ni, chutiang chu a nih chuan ka țan sauh a ngai dâwn tihna a ni, rinhlelh kaiin ka awm a ni ngei ang.

Tûk khat chu ka pa chuan tûkțhuan kan kîl laiin," Tukin ka tho chu ka tho fuh zân lo deuh niin ka hria, office pawh ka kai peih ngût lo ang," a ti charh charh a, ka nu chuan," Nimin tlaia i lo haw kha i hmel a dik lo khân ka hre rêng a ni, nizàn mutnaah pawh khân i pang ka rawn dek a, i lum tlat a," a rawn ti ve a, ka pa chu enin," Ka awm tawh alawm, lo ngaihven miah suh. Chuan, vawiin lamah lo inentîr ula?" ka ti a, ka nu chu ka en leh nghâl vat a, ani chuan," A duh leh ngût lo ang," a lo ti sap a, ka pa chuan," A, awm nuam lo mai maiah inentîr a ngai hleinem, vawiin ka chawlh chuan ka zia mai ang," a lo ti mai rêng a, inentîr hi a hreh ve si a, a duh loh chung han tihluih lah hi a dikin ka hre meuh bîk lo nèn, ka ngawi ta rih a.

Engkim min hrilh fiah tawh avàngin harsatna ka nei lo va, ka harsatna ber chu Hminga rawn lût zauh zauh chu a ni, han hai der theih a ni si lo va, hna chungchânga rawn lût a ni bawk nèn, a bula ka awm hian chhûngrilah nuam tihna ka la nei tlat bawk si a, rilru tihpaukhauh ngai leh infuih rûk reng ngai hi ka ning a ni.

Ka pa chanchin ngaichangin zànah a rawn lêng ve bawk a, kan chanchin ka nu leh pate'n hre vek tawh mah se a rawn lêng zut chuang lo. Ka pa zah chhuanlamah a hmang ziah a, tunah hi chuan ka hre thiam ve tawh viau, a rawn lèn hi chuan a pawimawh viauah hian ka ngai hmiah tawh. Zanin pawh hian ka pa rawn kan pahin mâkpa interview hna a rawn thawk a ni tih ka hre kar.

Nia, ka pa hi ni thum lai a office ta lo va, inentîr ka sawi lahin," Ka rin theihin i awm tawh a, ka pangchang ve a nih hi, nâ ka nei hran hleinem," a ti ziah a, ka nu erawh chuan," Nâ ka nei lo tih ringawt, nei lo la chuan i office peih ang chu, i pa hi chu a heti tlat zêl a," tiin ka lamah chuan a lo țang ve a; mahse, awmzia a awm lo, kan la tur hlawhtling lo chu a nih ber hi. 

Ka pa nèn chuan an titi a, ka nu nèn chuan kan va be buai hran lo, inentîr tùrin ti ve chhin tak teh se, a inentîr duh lo tih ka hrilh ve tawh tak kha, mi hrang deuh thu sawi chu a lo zàwm duh phian mahna!

Mahse, a tûkah chuan a tho nuam ta deuh a niang, tûkțhuan ei kham chuan office kai tùrin a rawn insiam chhuak ve a, mak ti zet hian," I kai peih dâwn em ni?" ka lo ti hû a, ani lah chuan," Nâ ka nei lo ka tih tawh kha, ka tel lo hi chuan ka ngaihtuah ve deuh tlat che u alawm," a lo ti mai a, kei erawh chuan," Pa, ngaihtuah kan ngai lo asin, chàwl leh rih zâwk teh, i nawm vâk hunah chauh lo kal ang che," ka lo ti thung a; mahse, sawi loh ang chiah, a tum lui tho a, car-ah kan țhu dùn leh khar tawh mai.

"Pa, engtikah nge min rin ve tak tak dâwn a?" tiin ka en a, ka thutak viau mai nghe nghe a, chu chu a hriat chuan," Ka ring che alawm, tunah phei hi chuan ka ring tak zet tawh che, rawn lan ve hrim hrim ka tum mai chauh a ni," a ti dap dap a, ka kut chu rawn vuanin," Ka fanu duh tak hi i puitling tawh tih ka hria, làwm pawh ka lãwm, engkim hi i kovah ka nghat țan mêk bawk a ni," a ti leh dap dap a, chutah, nui sakin," Le, tlân chhuak tawh rawh le," a ti nghâl zat a.

A room-ah chuan a țhutnaa țhuin ka hna thawk chu min lo en ve mai mai a, eng mah a tih ka phal loh avàng chuan a lo țhu ve mai mai tak tak a ni. Kei pawh ka hnaah chuan ka bûr ngar ngar a, ka pa hna thawh hi rilru sèn ngai ve tak tak a awm ve nual avàngin titi paha thawh chi chu a ni lo ve khawpin ka hria a, ka bula a țhut pawh chuan kan inbe hran lo.

Ka hna thawh laklawh laiin ka va thlêk zawk a, a lo muthlu niin, a chair nghèng chuan a lo țhu ãwn duai a, ka nui sak ringawt, a muthilh theih chuan lo muhìl mai mai rawh se, hna thawh ai chuan a hahdam zâwk ngei ang chu.

Hna chu ka thawh chhunzawm mai a, a hnu deuhah chuan eng emaw ri deuh hrawih hi ka hria a, hawi chhuak vatin ka pa lam chu ka en vat a, a thâwk dàn chu a dik lo a ni tih ka hre nghâl a, pan vatin ka han sâwi a, a harh thei ta miah lo, a thaw kâwk kâwk ringawt a, ka mangang chi-ãi hlauthãwng lutuk chuan sâwi pahin ka ko chûl a, a harh thei chuang si lo, ka mangang lutuk chuan Hminga chu ka ko ta vak vak a. 

A rawn luh lai pawh chuan ka chi-ài hlauthãwng bawk si chu ka khùr hlawk hlawk a, ka khâ a chih a, tih tùr pawh ka hre lo. Hminga erawh a chi-ãi ve lo a niang, rang takin ka pa chu a bãwihsâwm nghâl a, mi dang ko tùr chuan min hrilh bawk a; mahse, ka lâk tlâk loh khawp mai, ka khùr nasa lutuk a, ka ding thei hauh lo, ka țhu ta hnawk a. Amah zâwk chuan mi dang chu a ko ta tuar tuar a, thil thleng chu ka mumang ang vek ni maiin ka hre ta hial mai. Rilru fîm erawh put ka tum ve hrâm hrâm a; mahse, ka buai nuai tho.

*******

Ka pa chu Kolkatta-ah lung zai tùrin an chhuak a, ka nu leh ka patea'n an zui a, Kolkatta-a ka cousin hna thawkin a lo buaipui pah dâwn a ni. Kal ka duh viau nain ka pain thil țha ber niin a hre lo va, in lama ka țangkai zâwk a rin vàngin ka kal ta lo a ni, a dik ang, ka nu leh ka patea an kal tho a, ka cousin-in a lo la buaipui thei dâwn bawk a, kal țeuh ringawt chu a fuh bîk lo.

Ka chau a ni, ka chau tak zet a ni. Rilru a chàwl lo va, ka pa ka ngaihtuah êm êm a, chutih laiin keima lamah buaina ka nei reng bawk a, chutah, sumdàwnna buaipui ngai bawk nèn, ka hah hluah hluah. Ka pa lah a lo upa ve tawh a, an zai hlawhtlin chu ring viau tho mah ila, 100% chuan ka thla a muang thei lo hrim hrim.

Tha tho lo zet leh rilțâm lo zet chuan chaw ei chu ka insiam a, ka ei châk lo tak zet a ni; mahse, nghei ringawt mai chu a dik bîk si lo, ka nuin min chah țâwk țâwk a nih kha, bâkah, in hnuaite'n an baibing bai min rawn suah ve bawk si a, an zahawm êm mai.

Chaw ei pah chuan ka pa, a room-a a thâwk a dik loh ațanga  Hminga min buaipui nasatzia chu ka ngaihtuah neuh neuh a, kei ai pawhin a buai nasain ka hre hial a ni. Engkimah min buaipui a, ka pa damdawi ina a awm chhûng pawhin a bãng chuang lo, kei lah hmeichhe chi-âi hma chi ka lo ni bawk nèn, ka lâk tlâk loh tak zet a ni, awm lo phei se chuan ka mualpho hial ang chu. Hei hi chu kan sum a duh vàng vek a ni thei tawh bîk lovin ka hria; mahse, mihring rilru chhûngril hi zawng hriat a har êm mai a, ka hre thiam tawh bîk lo. Ka țhiante pahnih Julian-a leh Ațana pawh an rawn lang ve reng reng a, chutiangin kan chhûngte hmun hrang hranga mite pawh, chutiang hunah pawh chuan Hminga chuan rawn lan a țhulh chuang lo, chanchin a rawn ngaihven reng a, kei lah hmeichhia tih takah hetiang dinhmunah hi chuan ka mangang hmain ka buai hma khawp a, a mak hi ka ti asin, min hnèm duam duam lo mah se ka bula a awm hian ka thla a muang ve tawp a, chhûngril lamah hian ani hi a lo awm lo ang tih ka hlau hnuhnawh hial a ni.

Chaw ka ei kham hmun ka tifel zo âwrh tihah a rawn lang ve zui nghâl a," Chaw i ei tawh em?" a rawn ti lût a, ka ei tawh thuin ka lo chhâng ve vat a, ani chuan," A tihzia hlauh chu, ei lo hian i lo awm mai mai ang tih ka hlau deuh a," a ti leh sup a, za lo zet hian ka nui sak ringawt a.

Țhutna lam pana ka kal chu," Lo kal teh," a tih avàng chuan ka pan ve mai a, dik tak chuan ka rilru leh taksa hi a chau ve êm a, he pa do tùr hian thahrui ka nei tawh rih lo a ni ber mai, dìm duat zet hian a âwm nghèng chuan min kuah bet a, a tih ang chuan ka awm ve tawp, tunah tak hi chuan hetia awm hi ka mamawh ber pawh chu a lo ni maithei, ka thla pawh a muang huai huai alawm.

Ka nute pawh an thleng tluang a, ka pa pawh a chau hran lo va, thil pawh a ei peih tih min rawn hrilh chuan ka lãwm lutuk chu ka hnuk a ulh titih deuh ringawt a, ka nu chuan," Lo ngaihtuah viau suh aw, a țha a nia, kan thlen hnu rei vak lovah Suzy(ka cousin)pawh a rawn lang ve nghâl a, engkim a lo buaipui fel vek bawk sia, kan buai miah lo," a rawn ti leh a.

Ka mittui parawl kuang mai chu Hminga'n a hmuh ka hlauh avàngin lehlam hawiin ka inhru zauh a, ka pa pawhin rei lo tê chu min rawn bia a, amah ngaihtuah miah lo tùr leh inenkawl țha tùra min hrilh chuan," Min lo ngaihtuah miah suh, țha takin hna pawh ka lo thawk ang, nangmah zâwk kha, chak taka i awm a ngai a nia," ka ti a, țah aw chhuah lo tùrin ka inthunun hrâm hrâm a.

Kan inbiak zawh chuan țawng lovin Hminga chuan duat tak hian min kuah leh vawng vawng a, ka rilru a lo no sa nèn, ka mittui chu a rawn hnâm thar leh a, ka hnung ben thap thap pah chuan," I pa chu hlawhtling takin an zai dâwn alawm, ngaihtuah miah suh, nangmah hi inngaihtuah la, chak taka i awm a ngai a ni, i pain i kutah engkim a nghat a, hna thawk tùr chuan i taksa leh rilru i tih chak a ngai a nia," a ti pah sup sup a.

Martha-i pawhin min ngaihtuah khawp mai a, chutiangin ka pite pawhin; mahse, ngaihtuah ka ngai lo tiin ka hrilh hlawm.a, Julian-a leh Ațana pawhin min rawn bia a, chhûngkaw inkhâwmnaah leh an țawngțainaah ka pa an țawngțaipui reng thu min hrilhte chuan nasa takin min hnèm a, chutih rualin chutiang duhsakna kan dawng chu zahthlâk ka ti angreng zâwk bawk a, kan chhûngkua hi inkhâwm peih ve viauin thawhlawm leh sàwma pakhat pawh hi pe țha viau mah ila, kan chhûngril lamah kan ril lêm lo va, chhûng inkhâwm pawh hi kan nei ngai meuh tawh lo a ni. Kan nihna dik tak a ni a, zêp chi pawh a ni chuang lo.

Ka pa an zai ni chuan chanchin ka zâwt reng a, hna pawh rilruah a awm thei lo, dârkâr bi tinah chuan ka phone chu ka hmet reng mai a, ka rin aiin an zai rei tlat a ni. Thil țha lo pui pui ka ngaihtuah a, an zai dik thei lo ang a, chuvàngin an rei a niang, a nih loh pawhin an zai dik tho ang a; mahse, ka pa lamah Bp drop emaw eng emaw dik lo thut a awm a ni ang tiin ka suangtuah kual a, ka thâwk a nuam lo va, room-ah pawh awm thei lo chuan veranda-ah ka chhuak a, thâwk ka han la kâwk kâwk a, ka phone chu ka en leh țhìn bawk a, ka rilru hrehawm dàn chu sawi thiam hleih theih pawh a ni lo.

Chanchin min rawn hrilh har lutuk chu beidawng takin ka pa room-ah chuan lûtin ka rilruin ka țawngțai mawlh mawlh a, ka țawngțai zawh pawh chuan ka rilru a chàwl thei chuang lo, a hnu deuha ka phone a rawn rîk chuan ka phu dâwrh a, ka phone pawh ka thlauh țêp hial a ni.

Martga-i a la ni zui a, chanchin min rawn zâwt ve tho a lo ni a, ka la hriat loh thu ka hrilh chuan ka ngaih tițha lo zual tùr chuan," A va rei tawh ve!" a rawn ti hliai a, ka hlauthãwng zual sauh mai; mahse, ka thup hrãm hrãm a, hnem ngai zâwk chuan ka'n hnèm ve zui a, khua hi chu a vâr lo asin.

Hminga a rawn lût a, ka vei tawn sek tih a rawn hmuh chuan," An rawn be țêp tawh chein ka ring, mi thiam rual țhahin an zai dâwn a, an hlawhtling ngei ang tih ring ta che,, kei chuan ka beisei tlat a ni," a rawn ti a, rawn kal hnaiin min rawn kuah a, he pa bula ka awm hian engati nge ka thla hi a muan tlat bîk țhin ni, min kuah phei hi chuan mak tak maiin ka dam sawng sawng a, chakna thahrui pawh ka neih belh sawtin ka hre țhìn.

Rei lo te hnuah chuan Suzy'n min rawn be ta a, ka pa chu hlawhtling takin an zai a; mahse, nikhua a la hre rih lo va, doctor-te enthlâk tùrin a awm mêk tih min rawn hrilh chuan ka thaw deuh huai a, zâwt chîk deuhin," An zai hlawhtling ngei maw? Chu chu engtin nge an hriat?" ka han ti leh hrãm a, ani chuan," I ngaih tițha lo duh suh, an hna hi an thiam tâwk a nia, i pa lo harh veleh chuan ka rawn video-call dâwn che nia aw, ngaihțha tak khân lo awm phawt mai teh," a rawn ti leh a.

Ka pa nèn kan inbiak theih meuh chuan an zai ațangin kâr a liam tawh a, ka pa erawh chu a harh ve viau tawhin chauh erawh a la chau viau thung a; mahse, hlawhtling taka zai a ni hrim hrim chu ka lãwm a ni tawp mai. Ka theih ang tâwkin ka țawngțainaah làwmthu ka sawi ve a, ka țawngțai nasat ber thla a ni hial ang chu.

Hminga chunga ka rilru put dàn hian min tihrehawm tak zet tawh a ni. Hnaih loh telh telh ka tum kha a ni a, ani'n min hnaih telh telh thung si, ka mamawh êm êm laiin ka bulah a awm reng a, ka inhnemna pawh a tling chiang a ni; mahse, ka chunga a rilru put dàn ka hre ru reng bawk si a, chu chuan ka rilru chhûngril hi ni tin a ei chhe reng a, a hriat chhuah hun a awm ngei dâwn, chu chu a thleng har tawh lo ang, ka pate lo haw hma hian ka tihfel a ngai a ni.

Zan khat chu ka period tùr tai nâ ințham vêl avàng chuan mut nghâl mai ka tum deuh a; mahse, ka mut hmain rin loh deuh hian Zorema a rawn lang thut mai a, a rui miah bawk si lo va, a lang thar ve vûk bawk si nèn, mak ka lo ti ru khawp mai. Ka pa chungchâng a lo hre ve a, chanchin min rawn zâwt ve a lo ni a. A rui bawk si lo va, țha takin a zawhna chu ka lo chhâng ve mai zêl a. Rei pawh a țhut hma chuan thingpui ka siam a, a rûk tak chuan lêng rei lo hrâm se ka ti khawp mai.

Chutia kan titi lai chuan Hminga a rawn lût ve leh a, Zorema a hmuha a hmel danglam nghâl chu ka hmu reng a, ka biak pawh chuan a rùl tâwk chauhin min chhâng a, a lung a awi lo a ni chiang mai. Lo awi lo mai mai teh se, ka pa chanchin hriain a rawn lêng ve a ni mai a, lo biak duh lohna tùr a awm hleinem. Tu pawh lo lêng se in neitu tân chuan țha taka lo chhawn hi kan tih tùr chu a ni mai.

Zorema chu a lêng rei ta lo hlauh e. A haw hnu chuan kan ngawi dùn rauh rauh a, a lung a awi lo tih ka hria, engah nge a lung a awi loh ringawt? Tu pawh inlêng chu ka nei thei alawm, nula ka nia, a nupui ka ni lo. 

"Engati nge hetiang hian i awm a?" ka ti ta nge nge a, a chhan ka hre reng tho; mahse, ka zâwt ve duh hrim hrim. Ani lah chuan," A chhan i hria," a lo ti sup thung a, kei chuan," Ka pa chanchin a rawn ngaihven ve a nih kha, inhnial ka peih lo a nia," ka ti nghâl vat a, ka thinchhiat a chhuah loh nân ka inthunun hrâm hrâm a.

"Kha pa kha i haw viau emaw ka ti a," a tih chuan," Haw viau mah ila ka pa chanchin min zawh miau chuan haw nghâl tùrin ka ti ngawt thei bîk hleinem," ka ti leh a, a run tâwk a tling a niang, a ngawi ta hmak mai a.

A hnu daiha," I tân pawimawhna a la nei ru reng a nih chuan...?" a rawn tih chhuah leh tâkah chuan ka thinchhiatna a rawn chhuak a, ka period tùr ințham chho vêlah hi chuan a châng chuan ka buaithlâk ve țhìn rêng a ni.

"Thil hlui phawrh leh hi ka duh lo va, inhnial ka peih lo ka tih tawh kha, ka pa chanchin rawn ngaihsakin a rawn kal ve a ni mai, min ngaihzàwn lai lah khân tu emaw angin kan sum awtin min ngaizâwng hek lo," ka ti ta charh charh a.

Min en ngur mai a, kei pawhin ka melh lêt ve kar bawk, a thurûk ka hriaa ka sawi chhuah laia a mitmeng leh hmel awm dàn chu ka hre duh miau si a ni; mahse, a hmelah chuan eng mah ka chhiar thiam chuang lo.

"Tu emaw i tih chu... keimah min sawi chhan tihna em ni?!!"

"Hre lo der vêl suh, i thurûk ka hre vek! Mak ka ti viau bawk che!" ka ti leh ta hmak hmak a.

*HLAWHCHHAMNA HLAWHTLINTÎRTU NI LOVIN HLAWHCHHAMNA HLAWHCHHAMTIRTU NI ZÂWK ANG CHE*