☆OKHEE☆ - 8 By Dingdi Pachuau

 ☆OKHEE☆ - 8 By Dingdi Pachuau

Eirawng kan bàwl zawh meuh chuan a tlai ve ruih tawh a, Harriet-i pawh a rawn harh har lo. A harh hnuah chuan keiin ka awm ve thung a, a duhna hmun apiangah min hruai kual a, a chângin kan inbihrûksiak a, a chângin kan inûm thùl, ka tlãn kual nasa a, ka thlan pawh a tla thei deuh hial a ni.

Khua a thim ațanga rei vak lovah chuan chaw ei kan siam a, Sawmkima a inbual hmasak zet avàngin kan  tlai deuh hret; mahse, kan ril a țâm vak hlawm lo va, kan indah rilțâm leh deuh rih a ni ber ang chu.

Chaw ei pah chuan an titi bawrh bawrh hlawm a, kei erawh chu ka țawng mang lo. An titi pawh ngaihtuah lo chuan ka chunga thil thleng chu ka ngaihtuah daih thung a, ka kea rawn tlawhtu an awm avàng chuan ka ngaihtuahna ram ațang chuan harh chhuakin ka hawi kual deuh a, Martha-i chuan min lo melh kar chung hian," Eng nge i lo ngaihtuah vung vung bîk a? Kan titi i lo ngaithla ve reng emaw ti a," a ti a, kei chuan," Ngaithla e," ka lo ti ve mai thung a.

"Ngaithla lo, chaw bàr nachâng pawh hre lo lêkin a nih kha i melh ngai i melh ngur ngur ni, i chaw ei a tui vak lo a nih ka ring," a tih leh chuan Sawmkima chuan," Tu emaw ni a ngaihtuah a niang," a lo ti zauh pek a, rang zet hian Martha-i chuan," Kha kha chu cartoon vek! Paih bo hmak rawh, a hrisêl lo," a lo ti vat a, kei chuan," In thu sawi awmzia pawh ka hre lo e a," ka lo ti hlak thung a.

"Tih dàn țha deuh ka hria," tiin Sawmkima chu a nui sûng a, kan lo ngaichãng țhap a," Zawnglai ve ve in nia, a remchâng lutuk tlat, mi dang mi dangah buai a ngai miah lo, ni lo'm ni, Halan?" tiin Hming-thingtlânga lam chu a en a, ani chuan," Pawi miah lo," ka rin loh deuh chuan a lo ti ve dût a, Martha-i pek chuan,"In tih thuai loh erawh chuan fa in nei thei lo mai ang, ani hi kei aiin kum khatin a upa zâwk a nia," tiin min rawn melh deuh kher a, ka va ngei reuh kher kher tak! 

Martha-i remti lo chung chuan thlèng chu ka chuh a,"Zanriah tui taka kan ei tawh mah te chuan, thlèng sil lam te hi chu kan ti ve ang chu le," ka ti tlat a, apron ka ha a, Sawmkima chuan," Ni e, i tih mai loh chuan ka tih tùr a ni leh mai sia, nang nulaah min chhâwk mai a ni ang chu," nui chung hian a lo ti a, Martha-i chuan," Zah lohzia hi aw, Bawihtei kha lo ngaihven rawh, zanin chu ka'n àwl ang che," nui chung vêk hian a lo ti ve a, an nupa infiam dàn chu a lawmawm ka ti, an nun a nuam reuh phianin ka ring. 

Thlèng ka sil chu rin loh deuhin Hming-thingtlânga chuan min lo pui ve vat a, a ngaih loh thu ka sawi pawh chuan a lo ding lui tlat a, an ina ka riaha chaw kan ei khãn eng mah a ti fel ve hauh lo tih ka hre ve reng tawh si a, helaiah hian a inthlahrung ve deuh a nih ka'n ring deuh ngawt a.

"Kal mai teh, min dîp," ka tih chuan,"Insilpuitîr mai mai teh, inhriat chianna a ni pah zêl mai a, titi bawrh bawrh pah ta che u," Martha-i chuan a lo ti pek a, ţeuh deuh hlar chung hian," Hmun kha phiat mai mai rawh," ka lo ti hlar a, a nuih a la za êm ëm zui, Sawmkima pawh a lo nui ve hawk hawk mai.

"Tuna taka min puih a ngai lo, lo va kal sawn rawh," Martha-i leh Sawmkima hriat hlau tak chuan ka ti sar sar a, ani lah chuan luhlul zet hian,"Chìn dàn phung ngai rengin a kal theih loh, inthlâk hun a awm ve alawm," a lo ti mai thung a, sahbawna ka nuai tawh apiang chu tui thianghlimin a lo tleuh fai chhunzawm zêl tho a.

Nula lian ve pângngai tak niin ka in hre țhin a nia; mahse, a bulah chuan ka lo la lian fahran lo a nih àwm hi, a bula din chiah hian a lo lian riau mai ka ti. Julian-a ai pawhin a sâng hretin ka ring, a vun erawh thingtlânga hna thawk țhang a nih vàngin a la sen uk kharh a, a tukkhum lam sam sei lek lek leh khabe hmul vêl erawh a tihfai vek tawh avàngin a lang fai vûk tawh thung. Tuna a lan dàn hi ka ngaina fahran lo, inla zahawm hmel taka a awm hian a nèlawm zual loh ka ti tlat. 

"A fai thawkhat tawh ang?"ka beng bul deuh maia a rawn tih sup chuan ka phu zawk mai a, ka en chho zawk bawk a, ani chuan ka thil sil lai chu a lo melh zawk thung. Ka thlèng sil lai chu sahbawnin ka lo nuai ka lo nuai tawh niin, engtia rei nge ka lo nuai hman tawh ang le, ka thil ngaihtuah vàng vek a ni. 

"Thil țûl lo ngaihtuah hah duh suh," a rawn tih leh sup chuan thleng chu ka pe vat a, a dang chu banin ka sil leh nghâl mawlh mawlh a, kan sil zawh thlengin ka țawng tawh lo. Ka awm dàn âtthlâkzia chu, a bulah khatiang khân awm ka duh tawh hauh lo, nula phanchang leh fing chin ka ni ve tawh a, khatiang mãwl lutuka awm kha chu, a thleng nawn tawh lo ang.

Chaw ei kham lama in tùr Sawmkima chuan a lo peih diam tawh a, an țhu khâwm tal a, kei erawh an bula țhu ve lo chuan Harriet-i chu ka infiampui leh a, chutih lai chuan ka phone a rawn ri a, ka'n chhâng leh rih bawk a, Julian-a niin kan țhian thuma kan ride hun tùra a duh hun a rawn sawi a ni, Aţana pawh kan be tel ve nghâl a, kei a free ber ka ni bawk a, an remchàn hun hun chu ka tân chuan a rem vek mai.

Kan inbiak zawha an țhutna lam ka va pan phei chuan an lo ngawi dâk hlawm a, min lo en deuh țhap bawk, ngaih an ti țha lo, ka rin rûk ang ngeiin Martha-i min lo melh dàn ațang chuan ka chanchin an lo sawi tih ka hre nghâl mai a, ka melh kual a, Hming-thingtlânga pawh chuan a hmel leh mitmeng ațanga eng mah hriat theih loh tùr hian min lo en ve rùn a.

"Ka chanchin in lo sawi a ni maw?" tiin Martha-i chu ka melh leh a, ani lah chuan," Eng aiah ngawt maw?" a lo ti ve thung a, chutah, rin loh deuh hian Hming-thingtlânga chuan," I hmel a țha tih thu kan lo sawi a," a rawn ti ve ta thung a, ka melh nghâl zawk thei! Ani pawh chuan min lo la en reng a, ka hawi lêt leh vat, ka biang erawh a sen loh hrâm ka beisei. Ani hian hmel țha min tih thu a la sawi ngai hauh si lo va, Sêna leh ka pu kha chuan an sawi ngei mai a, hmaichhana hetiang a han sawi chhuak ve mai a âwihawm loh, a rilru tak tak pawh a ni hauh lo ang, min bum a tumna hmanrua a nih hi.

"Nula hmel țha takin hmel țha tih an inhriat lohna tak hi an hmel țhatna tibelhchhahtu chu a ni," Sawmkima  chuan a lo ti charh charh a, Martha-i pawh chuan,"I va sawi dik tak! Ka nulât lai pawh khân ka ni ve tho tiraw?" nui chunga ti pah hian a pasal lam chu a'n thlêk deuh hâ a, ani pawh chuan," Tunah pawh i la ni reng lo'm ni? I hmël țha tih hi i la inhriat miah loh hi, duhawm bawk si, fa kan neih hnu phei hi chuan i țha sawt sawtin ka hre nghe nghe asin,"a lo ti hnâp a, chu mite pahnih han zah lohzia mai mai chu a.

"Insûm r'u, kan awm ve reng hi," ka tih chuan an nuih a za khawp mai a, Sawmkima'n," Ni dâwn tak e, nei ve lo chil pût a luang dem dem hman țêpin ka ring a ni,"a tih leh phei chuan Martha-i chu dul dawm meuhin a nui a," In ninawm," ka han ti zui leh hlak phei chu an insûm thei thlâwt lo.

Kan haw dáwn hnaih lamah chuan Sawmkima chuan,"Hman tlàn deuh hunah kan la ei kháwm leh ang chu, hun thâwl hek hawk insiamin, chutih hunah chuan in tùr lamah pawh a strong deuh hlek kan phalrai tawh ang a?" a ti a, Martha-i chuan," Phûr viau suh, tlangvâl zâwk ang mai a," tiin a lo khap a, kei chuan," Teh rêng mai, mi dang hruai phal bawk ila?" ka lo ti ve a, rang zet hian," I hmuh a thu le,"Martha-i chuan phûr tak hian a lo ti a.

A hnu deuha,"Haw mai ka duh," ka ti chhuah tâkah chuan Hminga pawh chuan," Ni e, kei pawh pawi ka ti lo," a lo ti ve vut a, ka phurh haw a ngaih loh hrâm ka beisei. Kan ina chaw eia a rawn kal kha chuan Martha-ite rual khân a haw ve kha a ni a, tunah hian engin nge a haw ve ang le?

Ka hlauh ang ngeiin Sawmkima chuan," Lawmi rualin i haw ve thei ang chu, ni lo'm ni?" a rawn ti ta chiah mai a, min rawn en bawk si a, chhàn loh theih ni hek lo le," Ni e a," ka lo ti ve a, phùr erawh ka phûr lo khawp mai. A fála awmpui ka duh lém lo, Martha-i'n mei nei zet zeta min țawng khum ațang khân min hmehbel dun a tum tlatin ka hria a ni.

Ka phur ta ngei a, kan tlàn chhuah hnu lawkah chuan," I hming dik tak hi eng nge ni?"tiin titi bul chu ka țan ta nghâl a, a bulah hian ngawih reng hi nuam ka ti tawh lo, a chhan chu chîk tak taka min en hi ka duh lo a ni.

"Ka hming dik tak chu Hmingmuanpuia a nia, 'Halan' tih erawh ka țhiante min koh dàn a ni thung," a tih chuan," Ka pa hi i țhian a ni pawhin ka hre si lo va," ka lo ti vat a, min chhâng lo chuan min rawn en vang vang phawt a. Ngeiawm pawh min ti ve ngawt ang chu, ka chhàn duh dàn kher kher chu.

"Min koh duh dàn a nih miau chuan," muang charh hian a rawn ti ta a, chhàn lêt dàn tùr ka vàn ta raih mai. Ka ngawi deuh reng a, amah vêk chuan," Engati nge min rinhlelh êm êm reng a?" a rawn ti chhuak leh chiah a, inher deuhin min rawn en reng bawk a.

"A mak êm alawm," ka ti thla rawk a, ani lah chuan," Eng chu maw mak a?" a rawn ti leh a, ka awm a tinuam lo ru kher mai.

"A mak a ni tawp mai," ka tih leh chuan," Sawi chhuak chiang mai ta che, thingtlânga kut hna thawk ka nih vàngin i pa hnuaia thawk tlâk lovah leh qualify lovah min ngai tih hi, ka thiamnain a tlina i pain min duh a nih phawt chuan eng nge ka thawh theih lohna bîk tùr? Khawpuia chêngte chauh hian an thawk thei i tihna a ni tiraw?" a ti ta duah a, a awka chhuak chu a ring lo va, a vîn lo bawk; mahse, ngaihthlâk erawh a nuam ka ti fahran lo.

"I ngai sual a nih chu," ka ti ve thung a, chutiang bãk chuan sawi dàn tùr pawh ka hre chuang lo. A sawi hi a dik deuh vek bawk si a, kut hnathawk a nihna ka ngaihsan loh vàng leh ka dah hniam vàng ni lovin a lo zir sâng a ni tih ka hriat loh vàng a ni zâwk mah, tunah ka pa hnuaiah

ka pa kutke ber a ni a, ka pa lahin a fak êm êm reng a, ka nin êm êm leh ka tui miah loh hna tlin taka a thawk thei bîk chu ka thîk deuh nge ni dâwn ni te ka ti hial mai.

"A nih chuan, eng nge mak chu han sawi la?" a rawn ti leh a, chhàn kher ka tum lo. Chhàn kher ka ba lo bawkin ka hre bawk, mak ka ti ve thei tho a, mak ka tih chhan a hriat kher pawh a ngai lo.

"Khawi laiah nge i chhuk dâwn?" ka ti ta daih a, chhuk thuai thuai se ka duh, amah nèn chauha awm reng hi zawng nuam ka ti hlawl lo.

"Ka zawhna che chu?" a la rawn ti thung a, min chhàntîr chu a tum ve hmel viau mai ka ti; mahse, ka chhâng kher lo ang. A hnuaia thawk ka ni lo va, a bialnu lah ka ni hek lo, ka chhàn kher a ngai lo.

"Min hrilh loh chuan ka hre dâwn lo a nia," ka ti ve leh thung a, ani lah chuan," A mak i tih chu han sawi phawt la?" a rawn ti leh hrâm thung, kan zawhna kan inchhâng lo dùn lutuk chu ka nuih a za lek lek hial mai.

Kan țawng lo ta char char a, a in luah awmna lai àwm chu a sawi bawk si lo va, ka tlãn char char tawp. Duh leh sawi miah suh se, kan garage-ah ka tlãn lût tawp mai ang, mai mai chuan a, ani țawng duh lo mai mai, ka phur lêt tawh dâwn teuh lo mai.

Kan in kan thleng țêp tawh tihah chuan," Kawng chungah khân tlân chho rawh," a ti ta sup a, sawi buai lo chuan High field lamah chuan ka tlãn chho ta nghâl a, min tihbuai a châk ve rêng rêng nge ni tih tùr hian thui pawh kan tlàn chhoh hma chuan ding tùrin min ti a, ka din hnu chuan min rawn en lehin," Min phurh avàngin ka lãwm e," a ti leh sup a, car kawngkhàr chu hawngin a chhuak zui ta nghâl a, ka thaw zui hak ringawt. A in luah a hnaih tawh viaute chuan kea kal chhoh ve mai tur hi a nia, a sual thiam ve khawpin ka hria.

*******

Ngaihtuahna thar ka neih chu ka nu bulah chuan ka hrilh malh malh a, ani chuan," I pa bulah sawi la, keia bula sawite chu awmzia a awm tampui lo êm mai," a lo ti a, kei chuan," Nia, ka sawipui dáwn tho a, ka hrilh hmasa che a ni, țha i ti ve tho em?" tiin ka zâwt nghâl zat a, ani pawh chuan," A dik alawm, a thawk nasa ve êm a, chawlh hahdam hi chu a phû ve tawh êm asin," a lo ti ve a.

"Chu chu alawm ka sawi chhuah chhan tak chu, nang pawhin i nawr ve tho ang a," ka tih leh chuan,"A țha alawm, ka lo sawipui ngei ang, " a ti ve leh a. 

"Hna thawh chuan thawh zawh tak tak a awm thei chuang lo va, chawlh inpêka indim thiam ve te hi a ngai asin, bãkah, in pahnih hian in zin chhuak mai mai lo ve êm mai, dam chhûng ni hi chen thiam ve a ngai a, thil ngaihtuah rùn lo leh enghelh nei hauh lova zin kual ve tùrin ka duh che u a ni, in duh duhna hmunah in zin ve ang a, honeymoon in hmang thar leh dâwn tihna a ni mai," nui chung hian ka ti leh a.

Zanriah kîl laiin ka sawi chhuak leh a, ka pa erawh chuan engah vak a ngaih loh hmel viau mai. "Ka zin daihte chuan tuin nge ka ai lo awh ang?" a ti deuh tlat a, kei pawh chuan," Hna chauh hi ngaihtuah lo teh, chawlh hahdam pawh i mamawh ve alawm, bâkah, túnlai phei chu i hah êm hi," ka ti ve thung a, a hrisèlna hi a sawisêl ngai lêm lo nain chàwl hahdam ve se ka ti a ni.

"Kan la ngaihtuah țha dâwn nia," a tih chuan,"In zin pah chuan in hrisèlnate pawh in check pah ang a, hêng lai ai chuan a țha dâwn hrim hrim bawk, hrisèlna hi check check tùr, nang phei chu i duh hunah damdawi i ei leh ringawt zêl lehnghâl  a," ka ti leh a, ka nu pawh chuan," Chu, ngaihtuah țhat a tum chu, nawr lutuk lo la," a lo ti ve thung a.

Nui chung hian," In hrisèl loh hlauh chuan ka fate in hmu hman lo ang tih ka hlau alawm, pasal neih thuai tùr lah an vâng si a," ka ti a, ka nu chuan," Thih vat kan tum hleinem, pasal i neiha fa i neih hun, an țhang chho lai leh nupui pasal an neih hun thleng kan dam ang chu le," a lo ti a, a nui sâng bawk a. Ka pa pawh chuan,"I la upa hauh lo, i inla upa mai mai a nih kha, hmanhmawh lo la, pasal țha deuh i la nei mai ang," a lo ti ve a, tunah hi chuan fiamthu pawhin hetiang lam hi kan sawi chhuak ve mai mai tawh a, kei pawhin engah vak ka ngai tawh lo. 

Hminga pawh hna thilah a lo kal zauh zauh a, ka nu leh pa hriat lai hi chuan ka be țhain ka polite ve viau țhin. Ani pawhin pângngai takin min be reng a, a țawng tam tehchiam lo mai pawh a; mahse, 'Halan' ti hi chuan ka ko ve thei thlâwt lo, chuvàng chuan ka ko lo tawp mai. 

Kan sawi chhuak leh ta lo vang vang a, ka theih ang tâwka țhahnem ngai leh rim chuan hna chu ka thawk ve a, ka pa chu ka theihna apiangah pui vein chhâwk ve ka duh a ni. Favàng hun a rawn inher chhoh chuan ka  sawi chhuah ngai lovin amah zâwk chuan," Bawihte, flight ticket chu min tihsak tawh la tiraw? I thil sawi kha țha ka ti ta riau mai, i nu pawh hian zinpui vang vang chu a phû ve tawhin ka hria a ni," a ti chhuak ve ta hlawl mai a, ka làwmzia mai chu, ka lãm lo chauh a ni. A thawkrim.a, chàwl hahdam ve rih se ka ti êm êm a ni.

"Mahse, kan zin a nih chuan min ngai lutuk ang tih pawh chu a hlauhawm," a tih leh chuan,"Ngai ve bawk ang chu; mahse, țûl tàwpah lo chuan ka rawn be buai miah lo ang che u, chuan, ka theihnaah leh puih a ngaih phawt chuan Halan-a pawh ka lo pui ve mai ang," ka ti sauh sauh a, kal a duh lo leh thut ang tih ka hlauh lutuk vàng a ni.

Favàng hun nawm lai berin zin tùrin an chhuak ta a, ka ngaihtuah viau nain hlim se, hahdam se, hun nuam tak hmang se ka duh si a ni, khawhar takin inah ka lo awm ngei ang; mahse, pawi ka ti lo, an pahniha zin kualna hun hi an nei khât si a, ka khawsak nawm loh hlauin kum heti chen hi an theihtâwp an chhuah dùn tawh a, an duh ve chhunah hi chuan zin vang vang rawh se.

Min rawn ngaihtuah miah lo tùr chuan ka chah mawlh mawlh a, ka pa chuan," Nang pawh min lo ngaihtuah suh ang che, i duh ang takin hlim takin i nu nèn hian kan zin kual ang a, 'zin tâk vêkah chuan' tiin hmun hrang hrangah kan zin kual dáwn a ni, i nu pawh ka zinpui lohna a rei ta a, nupui rinawm tak niin kum heti chen phunnawi hauh lovin in lamah kan tân hna a lo thawk ve reng a, chawlh hahdam pawh hi a phû ve viau bawk a ni," a ti dap dap a, ka nu kut chu a vawnsakin a fawhsak zoh a, dârthlalang aţang chuan ka lo hmu reng a, nupa hlim tak leh nun awhawm tak nei an ni ka ti țhin rêng a ni. An inhmangaih thiamin ka pa thil sawi hi chu a hnial ngai lo tluk a ni a, a zah thiamin a ngaihsak êm êm a, ka nu ațang hian zir tùr tam tak ka nei ka ti ve țhin bawk a ni.

Hmun nuam deuh lai tùra ka rinte chu ka hrilh ve a, ka pain," Foreign lamah pawh kan chhuak thut thei a ni," a tih chuan,"A tihchi loh! Hun dangah le, kan pathumin kan kal ho ang chu," ka lo ti vat thung a, ka nu nuih a lo za kher mai.

Ka nu leh pa tel lova kan in lian puia hun ka han hmang chho rak rak chu khua a har duh kher mai; mahse, mahnia awm țhang ka ni ve bawk a, khawhar hi chu ka tuar ve thei riau chuan ka hria. Titipui tùr erawh ka mamawh ve țhìn chiang alawm, țawng hi ka duh ve êm mai a, ka zêp hran lo.  Ka nute chu ka ngaihtuah viau nain tihbuai ka hlauh avàngin ka zu be sek duh lo va, anmahni min rawn biak hun ka nghâk zâwk mah țhin.

Tlai khat chu eirawng ka bàwl laiin Julian-a a rawn lang ve thut mai a, Ațanate nèn kan pathuma kan chhuah ho hnu khân mumalin kan inhmu leh tawh lo va, a rawn lang thut mai chu mak ka lo ti viau mai a, a rawn lêng mai mai lo ang tih ka hre ve tlat bawk.

"Teh tlat che chuan, eng nge ni ta a?" ka lo ti vat a, ani chuan," In va reh ve a?" a ti thung a, kei chuan," An zin a, lo țhu rawh, nge anmahni i  be duh deuh kher em ni?" ka lo ti leh a.

A țhut hnu chuan in tùr chu ka thlit a, va pein a bul hnaiah chuan ka țhu ve nghâl a, ani chuan," I bike kha i tiral daih tawh a ni maw?" a lo ti a," Ral daih tawh e, enkawla khalh chhuak tùr awm hek lo le," ka ti ve a. Chutah," Ka pain a khalh thiam bawk si lo va, ka nu lah khalh chi a ni bawk si lo," nui chunga ka tih chuan ani pawh chu a nui ve hak hak a.

"In thuai rawh, a daih hma khán," tiin a hmaa in tùr ka dah chu ka kâwk zauh a, chutah," Eng nge i lo tih dâwn rêng rêng a?" tiin ka zâwt nghâl a. Ani chuan," Naktûk khi Heidi birthday a nia, a nuin,'Rawn sâwm ngei ngei rawh,' a ti che a, ka rawn hrilh pah che a nih hi, chubâkah,  tlawh che hi ka ba ve hrim hrim a, i chunga thil thlengte pawh kha-" a tih lai chuan," Kha thil kha chu sawi chhuak tawh lo teh ang, thiam lohna i nei lo, ka theihnghilh vek tawh," ka lo ti vat a.

"Vawiin chauh hi chuan sawi chhuak law law teh zâwk ang, ka inthiam lo tih pawh vawiinah chauh hian ka sawi lang tawh ang. Ka țhian i ni a, i chunga thleng chu ka chunga thleng ang tho a ni, chuvàng chuan hrehawm ka ti a, ka hmel hriattîr che vàng liau liau i ni tih pawh ka hria, pawi ka ti tak zet zet a ni," a ti malh malh a.

"Mihring kan ni a, kan mi tawnte rilru kan hre theiin kan hmu thei lo va, kan chunga thleng tùr pawh kan hre hek lo. Ani pawh ka dem chuang lo, a thlèmna tawnah a tãl chhuak thei lo a ni ve mai a," ka ti ve ta a, tu bulah mah ka la sawi chhuak hauh lo a nia; mahse, kum hnih a ral ve tawh a, chutah, Julian-a bul a ni bawk a, kan sawi pawp ta sa sa, sawi chhuah hun a ni ve mai.

"Chutianga i ngai thei chu a țha e. Keimah vàngin mi rinawm lo i tawn phah si a, pawi ber mai chu mi i ring har leh tawh tùr hi a ni; mahse, mipa pakhat vàng mai chuan mipa i rinna tichhe vek hauh suh aw," a ti leh sap sap a. Ka chhàn dáwn lai chuan doorbell a rawn ri ral ral a, tho vatin ka va chhâng a, Hminga ka hmuh chuan," Ka pa a awm lo," ka lo ti ringawt a.

"Ka hria alawm," tiin a hawi kual a, chutah," Lût tùrin min sâwm dâwn nange?" a ti leh a, chutah, ka hre chhuak thut a, a luhna tur dãl taka dingin polite lo takin ka bia a, lût tùr pawhin ka la sâwm hauh lo niin.

"Lo lût rawh," ka tih rual chiah chuan a rawn pên lût nghâl a, a ngeiawm thiam leh pek khawp mai, luh min dìl loh law law mai tùr hi a nia.

Julian-a a hmuh chuan a ding dat a," Ka tihbuai loh che u ka beisei," a ti leh a, ka lam lo hawiin," Hna thilah biak lawk che ka duh a," a ti leh dût a.

"Julian, lo țhu rawh aw. Hna chungchângah kan han inbe lawk ang e," tiin Julian-a chu ka en phei a, a lo ding uaih tawh a, min rawn enin,"Ka chhuak rih zâwk ang e, dàwr lamah min hmu duh an lo kal a ni àwm e," a ti a, Hminga chu enin min rawn en leh a, min rawn nuih sak a, kei pawh chuan ka nuih lêt ve a.

"A nih aw, kal ngei chu ka lo tum dâwn nia," ka tih chuan," Aw le, ka rawn be chiang leh ang che," a ti a, a chhuak ta nghâl a, ka en zui deuh reng a, chutah, inherin," Eng thil nge ni ta?" tiin Hminga chu ka hmachhawn ta nghâl a.

"I bialpa a ni maw?" 

Ka nui hak phawt a, chutah," Eng thilah nge min biak duh tâk?" ka ti leh ta a, chair-ah chuan ka țhu thla nghâl bawk a, ani erawh chu a kekawr ipte zenin a la ding ngur mai a, țhut a tum lo a niang.

"Buaina neuh neuh a awm a, i pa biak buai ai chuan tiin ka rawn hmu che a ni, hna thila kan buai chuan puih min huam tih i pain a sawi a," a tih tâkah chuan ka phun sap a, kha thil kha ka pa bulah khân ka sawi ngei alawm, a lo hrilh a nih chiah hi.

"Aw, ka sawi alawm."

"Naktûk ațanga min rawn puih theih chuan a țha ngawt ang," a tih chuan," Naktûk a? Chutiangin a hmanhmawhthlâk viau em ni?" ka lo ti ta vat a, naktûk khi Heidi birthday a ni a, hna thila ka kal chuan ka tlai vek dâwn asin.

"Aw, hmanhmawhthlâk e, naktûk ațang ngeiin a ngai, chhuanlam i siam loh hrãm ka beisei," a ti leh a, chutah, nui deuh suk hian," Thawh dun a nuam khawpin ka ring," a ti zui leh zat a, insehruh țeuh chung hian," Ka pa ai awh i tum a nih hlauh chuan ka remti dâwn hauh lo a nia," ka lo ti hlar thung a.

"A pawi hle mai, a kal dâwn khân i pa khân thuneihna min hlàn miau si a," a tih leh chuan rum deuh hian ka melh ringawt a, hna lam thil chu ka pa kha ka hriatpui hauh si lo va, a zin dâwn khân kutke bera a neih hnênah chuan thuneihna chu a hlàn ngeiin ka ring bawk si, tihngaihna a vâng khawp mai.

"Naktûkah chuan ka hman lo," ka ti leh hrãm a, ani chuan," I pa hrilh a ngai dâwn a nih chu," a lo ti nghut a, ka tih theih tâwk rum deuha melh lehin," I va sual tak! Mi hriat thiamna nei ve ta che," ka ti leh a.

"Mipa vàng mai maiin hna i kalsan tùr a ni lo, hna leh mimal thil thliar hrang thiam rawh," a tih leh meuh chuan ka insûm nasa viau tawh a ni, chutiang thil sawi theihna chu a nei lo va, min țawng khum ngam tùr lah a ni hek lo. Ka pa hnuaia thawk hian min zilh ang maw? 

"I sawi duh tâwk tawh em?" ka ti țâwk a, ka kut chu ka hûm ruh nasain keimah pawh chu chhûngril lamah ka hah hluah hluah ni berin ka hria, min tihthinrimzia chu a hre pha lo zâwk ang!

"Naktûk ațangin lo kal ngei i tum dâwn nia, chhuanlam siam a thiang lo ang," a tih leh chuan thâwk ka la hawk a, ka thinrimzia chu thup tum tawh lo chuan," Ka chunga thuneituah inngai suh," ka ti ta thlâwt a, ani erawh chu a lo nui mai a, engah mah ngai lo tih hriat fê hian," I pa awm loh chhûng chuan ka thuneihna hnuaia i awm a ngai miau si a ni, hna chungchângah kher kher chuan," a ti leh mai a, a hmelah chuan thinrimna leh lungawina lohna tih vêl hmuh tùr a awm ve lo, a lang dam thlup mai a, chu tak chuan min tithinrim zual a ni, ka thu sawiin a engah mah a thawk ve lo chu.

"I pa zin tihbuai i duh ka ring lo va, chuvàng tak chuan naktûk ațangin i hna rawn zawm ngei ang che," tiin a hawi kual a," I bialpa nèna hun in hmang dùn lai ka rawn tihsukuk vàng che uin ngaihdam ka dîl e," a ti leh a, kawngkhàr lam pan chuan a pên zui ta nghâl a.

Ka thinrimzia chu pui tak a ni ringawt! Țawngkam țha pawhin ka thlah peih lo, ka tum lo hrim hrim bawk. Thlah a phû lo, heti tak hian a lo sual thiam thei ang tih pawh ka suangtuah pha lo, mihring nun chhûngril hi inhriat chian a lo va har tehlul êm!!

*VAWIINA NANGMAH TICHAUA TINÂA TIKEH SAWMTU CHE HI NAKTÛK ATÂNA CHAKNA PEA SIAM LIANA TIȚHANG LIANTU TÙR CHE THO A NI*