☆OKHEE☆ - 9 By Dingdi Pachuau

 ☆OKHEE☆- 9 By Dingdi Pachuau

Ka pate zin tihbuai ka duh loh vàng chauh chuan Hming-thingtlânga thu chu ka zàwm a ni. A thu ka zàwm ti ila ka pa sumdàwnna ka ngaihtuah vàng a ni zâwk ang chu, ani hian a lo enkawl țha lo viau thei si a, ka pa awm loh lai chuhin zelthel takin a hna a lo thawk thei tlat, chu chu enthlâk ka duh pah a ni, pui tùrin min ti tak naa, spy hna ka thawk dâwn a nih àwm chu.

Ning takin office-ah chuan țhuin ka tih tùr chu ka ti mawlh mawlh a, a hma khân ka pa kha ka pui ve hrep tawh tho a, ka hna tùr chu ka hre ve tho a ni. Ka rilru chhûngril takah chuan tunah pawh hian ka ning, ka nin avàng leh ka tui thlâwt loh avànga thawh chhunzawm peih lo ka ni rêng a, ka pa puih te kha chu ka duh ve reng, awm ngawt ngawta thil tih pângngai reng tih ngawt ngawt hi ka peih zâwng a ni lo, vawiin a țan ni chauh la mah ni se  ka ning leh tawh tho.

Sana ka han en a, chhùn chawlh a hun tawh reng sia, dâr engtikah nge an chawlh dâwn ni? Mi dangho ka han en kual a, an hnaah an lo la bûr ngar ngar hlawm a, ning ve miah lo an ang, nge ka awm vàngin an zelthel ngam lo zâwk ni ang? Mahse, min hre kher dâwn em ni? Ti ila, Hming-thingtlânga'n a lo hrilh lâwk vek tawh zâwk? Ani lah saw, a la rawn hawi chhuak pawhin ka hre lo, sawti rêng sâwn em ni a thawh țhin? Nge ka awm avàng chauha thawkrim angin a lang zâwk?

Chawhnu dâr hnih a rawn rîk chuan ka insûm thei tawh hlawl lo, ka țhutna ațanga ding chhuakin a bulah chuan ka va kal hnai a," Engtikah nge ei tùr eiin kan chawlh theih dâwn?" ka va ti ta nge nge a, rawn hawi chhuak chuang map lo chuan," I ril a țàm tawh chuan i chàwl thei ang," a lo ti sup a, min rawn en lo va, a thil tih lai pawh chu a chawlh phah chuang lo.

Ka inher nghâl vat a, hetianga rilțâma inchhawr rêng rêng, mihring hi rilțâm thei leh chawlh hahdam ngai kan ni. Kan rilru a chàwl thei a, kan chau thei a, taksa a chauh chuan rilruin hna a thawk thei lo. Hna chu kan thawk ang a, kan chàwl bawk ang chu. Kan ril a țâm ang a, kan eiin kan in bawk ang, chawl hlek lova hna thawh reng ringawt mai chu thil dik pawh a ni lo.

Office-a thawk daih tùrin coffee leh ei tùr ka order a, ka han luh leh meuh chuan dâr 2 : 30 a lo ri leh tawh a, ei tùr leh coffee chu dawhkàn remchânga dahin ka han hawi kual a, min ngaihsak lêk lovin hnaah an lo la búr ngar hlawm a ni tih ka hmuh chuan ka kut chu ka han bêng ri țhak țhak a, an rawn hawi chhuak rang hlawm kher mai.

"Chawlh a hun e, hei in tùr leh ei tùr hi rawn la vek rawh u le," tiin ka han au lauh lauh a, ka share tùr chu la nghâlin tukverh bulah chuan ka kal sawn zui ta bawk a, ka ril a țàm tawh êm avàng chuan mi dang pawh ngaichang  lo chuan ka ei tur pack chu ka hawng ta nghâl a.

A la sa țha ve bawk a, a tui kher mai, ka ril a țâm ve tawh êm bawk a, ka ei tui pawh chu a ni maithei tho bawk. Coffee sa ver vawr lah chu a tui bawk si, dam man hi a awm hliah hliah maiin ka hria.

"Lo kal lawk teh."

Ka bulah a lo awm reng tawh tih ka lo hre hauh lo, inherin a kal sawn zui nghâl a, ka en zui deuh reng phawt a, chutah, ka coffee no chu chawiin ka zui ve ta a, ka pa room luhna tùr kil sîrah chuan a kekawr ipte zenin min hnungchhawn záwng hian a lo ding a, amah hnaih vak lova dingin," Eng nge?" ka han ti ve ngat a.

Muangchângin a rawn inher a, ngun zeta ka mit taka rawn enin," Eng thil nge i tih hi i hria em?" a rawn ti chhuak dût a, a țawng ring lêm lo, mi dangin an lo hriat a hlau pawh a ni mahna.

"Eng nge ka tih? Ei tùr leh in tùr ka rawn lei," tia ka chhàn chuan min rawn hnaih sauhin," Kan hna thawh dàn min rawn tibuai vek, i duh chuan nangma ei tùr chauh kha lei mai ta che," sehchilh deuh nak chuan a rawn ti leh dût a, a lung a awi lo tih chu ka hre nghâl mai a.

"Eng nge ka tihbuaina che u? In duh loh leh ei lo tawp mai rawh u, ka ei vek mai ang!" insehruh țeuh chung chuan ka ti a, ka coffee no chu remchángah ka hûng phawt a, chutah, ka hmachhawn zui leh zat, mi dang vêngthãwng lo ila chuan thinrim vàngin ka au nghek ang, a pawisa ka hmang pawh a ni lo va, làwm hlê tùr a ni zâwk lo'm ni? Làwm nachâng hre lo an lo tih țhin hi amah ang hi an lo nih dáwn chiah hi.

Ka bâna a rawn hmer chuan thinrim zet hian ka en chho a, ka mit pawh ka khap duh lo. Chutah, ka han tãl deuh laih laih a; mahse, min hmer nghet viau mai a, ka tàl nasat poh leh min hmerna chu a na ting maiin ka hria.

"Min thlah rawh!"

"I thinlung helna kha tukzal phawt a ngai," mitmenga thinurna lang chunga a tih chuan,"Min thlah rawh, ka au vak mai ang," ka ti ve leh thung a, ni e, au chiam chiam mai ka rilrûk deuh thut, a awm dàn hi ka duh lo, ka hlau pah deuh bawk.

"Han au la?"

Ka au ngam lovah a ngai a ni chêk ang chu, mai mai chuan. Rum theihtàwpa melh chhovin ka hmui ka chîp hmãn a, ka au ngam dâwn lo niin a ngai a ni ngei ang chu, a nui suk a, chu chu remchângah lain ka tãl phat a, ka au dâwn chiah tihah ka bân a hmer lohna lam kut chuan  ka hmui rawn hup nghâl chatin bangah min nawr bet zui nghâl a.

A chêt dàn chuan min tihamhaih lek lek a; mahse, a rei lo. Ka theihtâwp chhuah chuan ka han tãl ve a, ka bân a hmerna chu thlahin a taksa lian pui chuan min nêk bet zui zat a, a bawp sei thlurh leh tha ngah zet  chuan a rawn zui nghâl bawk a, ka bet chiang ta khawp mai.

A kut chu sehsak thei ngat ila chuan ka sehsak chiang ngawt ang; mahse, ka hmui chu a hup nghet lutuk a, bangah min nawrchilh bawk nen, thinrim zeta melh rum chiah chu ka tih thei chhun a ni, tàl pawh ka tãl  thei tawh lo.

"I cho chhuah a nih hi," ti supin ka hmui a hupna kut chu la sawnin a rawn kûn hniam zui zat a, a hmuiin ka hmui a rawn sîktîr chiah chuan ka ding khawng awt maiin ka hria! Ka beisei loh lutuk thil a ni si a, maktiin ka meng bial nasa ngawt ang chu!

Muangchângin a kut pahnih chuan ka biang tawn tawnah rawn dawmin muangchângin min fâwp ta a, ka ding khawng reng a, ka thluak a chàwl thut ni berin ka hria, chuvàng chuan lo dan tumna leh tàl sawn tumna pawh ka nei lo, ka ding khawng tawp a ni ber. Ani erawh chuan muangchâng tawh lêm lo chuan min fâwp ta bawrh bawrh a, a hmui mai duhtâwk lo chuan, a lei zei zet chuan a tih tùr chu a hai lo kher mai; mahse, chhàn lêt tumna ka nei hauh lo thung.

Min thlah hnuah chuan,"I ni khatna a nih avàngin ka hre thiam ang che," tiin a kawr chu a pawt mar țha a, a kal sawn ta nghâl a. Ka hmai a sen nasat loh hrãm ka beisei, a bianga bêng tùr ka ni asin le, chhàn lêt loh kha ka tum a; mahse, ka chhàn lêt teuhzia kha, tàwp lo se chuan ka chhâng hman ngei ngei ang.

Ka țhutna pana ka kal lai chuan ei tùr ka leisak avàng chuan mi dangho chuan làwmthu an lo sawi sap sap a, an lo ei zo hlawm tawh niin, ka han nuih lêt lui hlawm ve tak nain harsa erawh ka ti ru kher mai. A rûkin chhûngril lamah ka țang țùng mai a, ka thin a rim bawk. Hming-thingtlânga thil tih dàn khân min tihrilhhaiin min tham lo ka ti bawk, a thinrimna hrîkthlâk nân min han hmang ngam a nia, ka hmui hi ani ang tlangvâl senior thinrim hrîkthlâkna tùr lah a ni hek lo. A la hre ve khawp ang, ani chauh hi thinrim thei a ni bîk lo, a thu lah ka ãwihna chhan tùr ka hre hek lo, hna ber ka thawh phawt chuan a țha a ni mai, hna ka thawha ka puih kha alawm a duh ber le.

Heidi Birthday-a kal ka tum avàngin nichîna thil thleng chu dah țha rihin ka hna chu ka thawk chhunzawm leh mawlh mawlh a, nizàn lam khân Birthday gift tùr kha chu ka pack fel vek tawh a, ina pèn hawa kal nghâl kha a ni mai, han thawk zo tê tê phawt ila.

Ka duh hunah ka haw hmiah a, haw hun zawh buaia hrilh kual vêl ka tum lo, bâkah, a țhutna lam pawh melh pawh ka melh tawh lo. Ka phone ka han en chuan Missed call a lo awm a, Julian-a hnên ațangin a ni. Tlân pah chuan ka han be zawk a, zanriah ei tùrin min ti bawk a, inah inbual zawk zawk ila tlãn chho nghãl mai ang.

Ka han chhoh chuan in pawh an lo chei nalh tawh khawp mai a, Heidi lah chu a lo phûr nasa tawh mai bawk niin. Present mawi taka tuam nèna lût ka ni bawk a, min lo hmuh veleh chuan," Yesss...ka tâ tùr," a lo ti chûl a, kei pawh chuan nuih sâng pah hian," Niang chu le; mahse, nakinah birthday lawm zawh hunah chauh eng nge a nih i hre thei ang," ka lo ti ve a, Hlimhlimi leh Julian-a pawhin min lo welcome vat a, ka thil ken lai chu Heidi pein Julian-a pawm lai , a fapa mipa naupang duhawm zet chu ka pawm zui ta nghâl a.

Zanriah ei tùrin Heidi Ní Bawihteite nupa leh Âțana pawh an rawn thleng ve chawpchilh nghâl a, an nu erawhin a rawn telpui thei rih tlat lo, ni dangah a telpui ziah tho a, pawi ti viau mah se theih loh châng a awm ve țhìn alawm tiin an inhnèm a.

Birthday hun hlimawm tak kan hmang ho a, Heidi chu birthday neitu a nih angin a zai a, a lam bawk a, a Nite Nonoi'n a lo pui zauh zauh bawk. Birthday cake chu a pain a duh ang thãla mawi leh lianin a order-sak a, Present lam pawh a dawng țha khawp mai. 

Ina ka haw meuh chuan a tlai ruih tawh mai a, vawiin lamah thinrim viau mahin zanin lama ka hun hmanin min tihlim ta êm a, tui tak pawhin ka mu thei tawh ngei ang chu.

Ka mut hma chuan intifai turin bathroom-ah chuan ka lût a, ka ha chu nâwtin dârthlalangah lian puiah chuan ka inen a, ka tàwp chat. Ka inen hnai deuh a, vawiin khân he ka hmuiah hian Hming-thingtlânga khân ka phalna la hauh lo khân a rawn fâwp kha a nia. Ka hmui chu ka han khawih a, chutah, hmanhmawh zet hian tui chu herh hawin kan han sil tak tak mai a, a thîp hlur thlengin ka sil nawk nawk. 

Zàna ka mutnaah pawh chuan vawiina thil thleng mawlh kha ka ngaihtuah lêt a, khatiang kha ka chungah tih atum leh a nih vaih chuan ka lo dawh mai mai tawh hauh lo ang, ka khûpin a kapah ka tauh chho nghek tawh ang maw le, a inchhìr ram ram theihna tùrin.

A tûkah pawh chuan a ngai têin kan inkima ei tùr chu ka lei leh a; mahse, tûn țum chu an dawhkànah ka sem vek ta thung. Hna thawk tur chuan chakna kan mamawhzia leh chawlh zauh zauh a pawimawhziate chu ka sawi hluah a, thawhrim a țhatzia leh thawkrim tùra chakna kan mamawh 

sizia chu ka sawi uar viau bawk. Hming-thingtlânga chuan a lo ngaithla ve em maw ka hre lo va, ka ngaihven chuang hek lo, ka thil lei pawh chu a ei em ka hre lo, a ei duh loh leh a thu, inhrêk rilțàm a duh leh a thu tho.

Chutianga kâr khat ka thawh hnu chuan an thawhrimzia chu ka hmu chiang ta viau mai. Ka pa awm lai leh awm loh lai chu a inang rengin ka rin phah ta hial a ni, an thil ei chhûng leh an inthiar chhûng chu an chawlh hun a ni mai a, an thawhrimzia ka hmuh hnu chuan ka inhmu tê ta reuh reuh mai. Hming-thingtlânga pawh chuti tho, ka pain kutke bera a lo neih chhan pawh ka hre thiam ta ruak mai, a thawkrimin a hna a thiam a, a tui a nih loh tal pawhin a hna a nih miau avàngin nuamti takin a thawk lui a ni tal ang.

Mahse, a langah chuan ka fak duh hauh lo. A hnaah a lo rinawmin a lo țha viau pawh a ni ang, ka chungah erawh khatianga chêt theihna dàn kha a nei bau lo, a pu fanu ka ni a, a duh loh dàna ka awm a nih pawhin min zah der ve tho tùr alawm a nih le, KS pawh ka ni lo va, nula lêrh tak leh amah hope ngawih ngawih pawh ka ni hek lo, a bialnu phei chu ka ni lo leh zual, khatianga min ti tùr kha a ni lo hulhual.

Tlai khat chu ka pain min rawn be teh tlat a, an zin chhuahna pawh ni tam a lo liam ve leh ta, ka phone ngai lo, tihbuai ka hlauh avàngin. Anmahni min rawn biak hun hi ka chãng tawp a, ka pain min rawn be ta chu ka hlim hle a ni.

"Halan-a chu i lo pui em?" a rawn tih chuan," Aw, pui e, in țha maw?"" ka lo ti vat a, ani pawh chuan an țhat thu chu min hrilh ve nghâl a, phone a nih vàng nge a aw chu a chhãng  leh chau aw deuha ka'n hriat chu! Mahse, an chhuahna lamah an vâk chau pawh a ni ve thei tho a, min rawn bia a, a ti țha tho tho, a dam țha tih ka hriat phah tal alawm. Hming-thingtlânga'n a hnuaia thawkte a enkawl dàn leh ka chunga a thil tih dàn te chu hrilh ka tum ûk ûk a; mahse, țhulh lehin," Hna chungchâng chu lo ngaihtush miah suh aw, ka pui țhain kan thawk țha lutuk a nia, helam chu lo ngaihtuah miah suh, hlim takin hun hmang rawh u," ka ti leh ta zãwk a, ka lungawi lohna ka hrilh chuan helam a rawn ngaihtuah lutuk ang a, hlimin hun an hmang thei lo ang tih ka hlau a ni.

"Keini pawh kan hlim lutuk a nia, min rawn ngaihtuah rêng rêng suh, ning viau mah la i lo puih avàngin ka lãwm e," a rawn ti leh a. Ka pa pawh hian min hre chiang viau asin, a bula hna thawha puih kha chu duh viau mah ila ka tui lohzia kha a hre chiang ve êm a, min tilui duh lo kha a ni rêng bawk; mahse, tûn țum zawng, amah a awm lo bawk nèn, thawh tùr a lo tam ve bawk si a, min àwltîr chu a thei bîk ta lo a ni e.

Ni khat chu hna ka ngah deuh a, hun ngaihtuah hauh lo chuan ka thawk mawlh mawlh a, kut bêng ri ka hriat chuan ka phu zawk mai! A ngaihna hre lo zet chuan kut bêng ri lo chhuahna lam chu ka hawi a, Hming-thingtlânga aw ngei mai chuan," A ei theih e," a rawn ti thûm dût a. Din chhuah pawh tum lo chuan ka țhutna ațang chuan ka han hawi kual deuh a, mi dang ding sap sap ka hmuh chuan," In Boss chu in hlau hle mai maw?" tiin nui sak chung chuan ka phun sap a, ka tih tùr ka la tih zawh loh avàng chuan ka tih chhunzawm leh ta nghâl a.

"Ei ve phawt rawh," tia ka kuta a rawn chelh avàng chuan ka thil tih lai chu ka tàwp a, a aw ațang chuan tu nge tih ka hre chiang viau bawk.

"Ka ti zo phawt ang," ka tih chuan," I ei zawhah i tih chhunzawm dâwn nia," thu pe aw zet hian a rawn ti leh khauh a, ka thaw hawk ringawt,  ka zo țêp asin le.

"Tu-ah nge i inngaih a?" tiin rum zet hian ka melh chho a, ani lah chuan," Hmuhnawm siam i duh loh chuan tho thuai mai teh," dam dup si hian a ti leh a, a aw chu dam viau angin lang mah se hnial a duh lohzia a lang chiang viau tho mai.

"Ka Boss i ni lo a nia," ka han ti leh  tê tê phawt a, ka kut a chelh tlat avàng chuan thawh chhunzawm thei chuang hek lo le, ka ding ve nghâl a, ani pawh chuan min chelhna chu a thlah ve nghâl tho a; mahse, mi dangin min en lo tih ka hriat chuan ka țhu thla leh vat a.

"Ka Boss i ni lo ka tih kha, ka zo phawt dâwn," tiin ka chhunzawm leh nghâl a, a chek hluk ri chu ka hria a; mahse, engah mah ka ngai duh lo, a rûkin ka nui ver ver thung. Amah hnial lo tùrin min han duh vei a, ka hnial hlawhtlin avàng chuan hnehtu ka ni si a, ka hlim veng veng mai.

Mahse, ka cho sual ka ti dáwn nge, a sual thiam ve hrim hrim, chawhnu lama ka thawh tùr chu a tam ta ngang mai. An hna chanpual rêng rêng zo lovin an hawsan ngai lo tih ka hre ve laklawh tawh bawk si a, ni dangah ka lo haw hma ve țhìn bawk nèn, vawiin zet chu a haw tlai berah ka țang dâwn ta, Hming-mi-suala vàng vek a ni. 

Ka zawh meuh chuan tu mah an awm tawh lo niin ka hria, thinrim ru țeuhin ka țhutna ațang chuan ka tho a, ka bag lain ka han hawi kual a, light off-in ka chhuak zui ta nghâl a, ka dàr a kham țhûm mai ka ti.

Pâwnah chuan rin loh deuhin Hming-mi-suala a lo la ding reng niin, ka chhuak min hmuh chuan," I zo tawh maw? Min phur haw ve mai teh," a lo ti dût a, en pawh en țha duh lo chuan," I sual thiam vàng a nih kha," ka ti nghat a, ka kalsan ta nghâl a.

Mahse, ka motor dahnaah chuan min rawn ûm phâk tho. Passenger seat-ah chuan țhu lût thurhin," Petrol a hek phah chuang lo tùrah ngai ang," a ti leh a, ka ngei avàng chuan chhàn pawh ka chhâng lo, a in luah thleng pawh ka thlah hauh lo ang, kan garage-ah ka tlãn lût nghâl daih ang.

Ngawi rengin kan tlãn a, a inpêngah pawh pêng duh lo chuan ka tlãn tlang zêl a, ani pawh chuan eng mah a sawi chuang lo. Min rawn en a ni tih erawh ka hmu ka mitsîrin, kein haw ve rawh se, a haw fo bawk ang chu.

Garage-a ka din fel hnu pawh chuan eng mah a sawi chuang lo. Ka chhuah chuan a rawn chhuak ve mai a, be chuang lo chuan in lam ka pan chho a, min rawn zui ve zêl nia! En lo mah ila ka pên rualin a rawn pên ve zêl, kan ina min zui luh loh hrãm erawh beisei ang.

Chutah, ka ding thut a, ani pawh chu a ding ve nghâl zat a, inherin," Eng atân nge min zui a? Eng nge i lo tih ve dâwn?" tiin ka zâwt a, ani chuan," Hna chungchâng sawi dùn lawk ang," tiin min lo chhâng mai a.

"Tunah hian sawi mai rawh, ka chau a nia."

"Hna chungchâng holam takin an sawi ngai lo, in chhûngah ngei le," a ti ve thung a, a mitmeng ațang chuan a sawi dâwn chuang lo tih ka hriat avàngin," Ka Boss i ni lo ka tih tawh kha aw," tiin warning ka'n pe leh phawt a, ka inher leh ta chauh a.

*HUN ȚHA I HMUH LAIIN BAWHPELH SUH, KHATIANG HUN ȚHA KHA A RAWN INHER LEH TAWH LO MAITHEI A NIA*