☆IKHEE☆ - 28 By Dingdi Pachuau

 ☆OKHEE☆ - 28 By Dingdi Pachuau

"Ka tàwp vat loh chuan...?" ka han ti lui ve leh sap a, inla zei zet hian a bengkâwm ka'n pehsak leh zauh a, kei chu ka kâwlhrâwng ve bawk a, han tihluih deuh sak hi ka duh țhin. A thil sawi awmzia kha ka hre chiang a, sawi zo lo mah se a chhunzawmna tùr ka ngaihruat thiam tho bawk; mahse, sawi zo lo hian a tàwp ziah a, a thil sawi rêng rêngah hian sawi chhunzawm lova tàwp mai lo hian sawi zo vek țhìn se ka ti a ni.

"...ka pâwngsual ang che!"

Ka hmui ka hup vat a, râpthlâk tih hmel taka meng bial kâwk chung hian ka en nghâl bawk a, ani erawh chu a nui suk ringawt a, chutah, ka kâwngah a kut pahniha chelhin a mal chung ațang chuan zo zet hian min hlâng thla nghâl a.

"Eng mah i la ei si lo va, ei tùr ka'n siamsak ang che," tiin a tho a, choka lam panin a kal ta nghâl a, ka zui ve zat a; mahse, ka va hnaih lutuk lo. A thil sawi kha a ti tak tak hauh lo ang tih chu ka hre ve tho a; mahse, hnaih loh rih hi a țha, thil țha lo lam tihtîrtu nih chu ka duh bîk hauh si lo va.

Siam awlsam a siam a niang chu ka ti mai a, Artui kangin Chhangthãwp a toast bawk a, chair sâng êt ãwta țhu chung hian a che vêl zawng zawng chu ka lo thlîr reng a, ka hmaah a thil siam chu rawn chhawpin coffee min rawn chhawp tel bawk a," Le, ei rawh le, zanin atân chuan kha kha a tâwk mai," a ti sup a.

Ka en vang vang a, chutah," Thil ei tui lehzual nân vawi khat leh chiah," ka ti a, a lamah chuan ka hmui ka dawh a, ka mit ka siai khum sak bawk a. A lo hrethiam ve chiang, rawn kûn hnaiin ka hmuiah chuan a rawn tawk zauh a, ding char leh nghâlin ka nûr hmêl a hmuh a nui hawk a.

"I va uikawm tak!" ka ti hlak a, nûr nang hian ka la en reng a, ani chuan nui hmel la pu chung chuan,"Ka inphalrai viau mai chuan a dik thei nâng," a lo ti sup a, a fiamthu avàng chuan ka nui ve ta hak thung a.

"A ral thei chuang hleinem maw le! Pawi lo, tlangvâl dang fawh tùr ka zawng mai ang," ka ti nghat a, amah pawh en duh ta lo chuan ei tùr min siamsak chu ka ban ta nghâl a.

Thingpui sen hâng nèn ka hmaah chuan a rawn țhu ve a," Ei zo vek rawh, a tlèm êm kha," a rawn ti a, ka melh zawk a, țawng ka'n tum deuh zuau nain ka țhulh leh ta zâwk a.

"Sum vànga duh che ka ni tih chu khawia ka sawi nge i hriat min han hrilh tawh la?" hmui kum deuh phât chuan a ti a, a meng zîm pah deuh bawk a.

"Martha-ite inah, Sawmkima nèn in sawi reng kha."

A kuta a khabe dawm pah chuan min en reng a, a ngaihtuah lêt ve a ni ngei ang," I sawi chiang alawm, Martha-i'n lëng tùrin min sâwm a, ka rawn kal tâk loh kha. Lo kal lo tihah, ka rawn kal ngei a, ka rawn lût ta lo tih tùr a ni zâwk ang chu," ka ti leh a.

"A rei ve deuh tawh tiraw? Chuan, i rawn lang lo va, zànah pawh ka rawn  be nghe nghe che a?" a tih chuan ka lu ka lo bu nghat a.

"Sawmkima nèn fiamthua eng eng emaw kan sawi chiam țum kha a nih dâwn chu, khami țum khân kan nui viau nghe nghe a ni, ngaithla tluan vek la chuan thutakin kan sawi lo tih pawh i hre ngei ang, Sawmkima phawk chhuak pek khân hostel-a kan awmho hun laia kan tih dàn țhin angin fiamthuin zawhna leh chhànna hun a siam a, zawhna min zâwtin Harriet-i kha videographer-ah a țantîr a, ani a lo  phûr viau niin, a pain," Tàwp tawh ang aw," a tih pawh khân a phal tlat lo va, Martha-i chhuak zawk rawn haw phei chuan min nuih nasa maw le, an pafaa min bâwl kual vêl mawlh khân a nuih a tiza a," a ti ta duah a.

"Fiamthu pawh ni se..." ka lo ti țâlh a.

"Kan fel tawh kha," a lo ti vut thung a, a thingpui sen hâng chu a in zauh a, chutah," Zanin riahpui i ngai ang em?" a ti leh daih a.

Zàn dang zawngah pawh riahpui  ngai lova zanina min han zawh kher kher chu," Zàn dangah pawh keimahin ka riak ngam reng a," ka lo ti a, riahpuite zawng, ka duh lutuk a; mahse, ka phùrzia ka tilang duh bîk teuh lo, a sawi dàn takin min 'pâwngsual' palh ang.

"Zanin hian mahni chauha riah hlauh thutna mak tak i lo nei thei a?" a tih chuan ka nui hak a, a fiamthu thawh ve hi ka làwm a ni, inhmeh lo viau chung hian a inhmeh ka ti viau tho bawk si a.

"Ka lo nei ta a nih leh tlangvâl number ka nei nual tho a," melh ralh pah chuan ka ti a, a lo nui ringawt a. Ka fiamthu tih a hre ve tho a, a engah vak a thawk lo ang.

Riahtîr duh viau mah ila ka sãwm duh bîk lo, nu leh pate awm loh laia tlangvâl riahtîr chu a mawi lo tih ka hre ve tho bawk, ka bialpa a la ni zui a, hlauh ka nei lo bawk nèn, a riahna chhan tùr a awm lo.

A haw dâwnah erawh chuan," Hmãn deuha thil min tiam tùra ka tih che kha i la hria em?"tiin ka zâwt a, kawngka bulah kan ding tawh a, ani chuan," Umm...hria e," a lo ti ve mai a," Tunah chuan min tiam tùra ka duh che kha ka hre chhuak tawh a," ka ti leh a.

"Vàna arsi hial pawh lâk ngai dâwn mah se..." a lo ti sup a, a kut chu hmersak salhin," A, chutiang leh lutuk te chu, arsi ka duh hleinem," ka ti phawt a, sawi zawm lehin," Min tiam tùra ka duh che chu hei hi a ni, min hmangaih reng rawh, tûnah leh kumkhuain," thutak zet hian ka ti a, a mitah chuan ka en kal bawk a.

Min en vang vang hnuah chuan,"Ka hmangaih reng ang che, chatuan thleng pawhin, engtikah mah ka kalsan ngai lo bawk ang che," chiang kelh kawlh hian a ti charh charh a, a sawi zawh hnu chuan rawn kûn hniamin ka chalah chuan a rawn fâwp zauh a, ka lo maimichhîng tlat a, hlimna avànga ka lungphu su dap dapte chuan Hminga hming chu an sûk hnan ni maiin ka hria.

Hna thawhna lamah erawh kan inkâr boruak chu thawhpuite hriatah leh hmuhah chuan ni dang ang thovin kan kalpui a, room-a a rawn luh châng erawh chuan ni dang ang kha chuan kan awm thei bîk lo, kan induhna kan tihlan hrâm loh chuan hun tam tak kan lo chân tawh si a, khâng kha a uiawm lutuk a ni, ni tinin kan upa chho zêl a, kan pahnih pawhin hun kan nei tam lo dùn telh telh tih kan hre thiam ve tho a, ãm dùn viau mah ila hna thawh hun tibuai tùr erawh chuan kan ãm bîk lo.

Tûn țum phei chu min sawipui thui ve ta khawp mai. Inneih vat a sawi vuai vuai tawh a, ka lo Amen-pui ëm êm a ni, ka pa hrisèlna erawh ngaihpawimawh hmasak berah a dah lo thei bîk lo va, chuti chu ni lo phei se chuan kumin Krismas hma ngeia inneih a duh asin! 

"Hun a kala kan dam bawk si chuan ni tinin kan upa telh telh a, innghah tih vêl luklak hi țha ka ti lêm lo, nupui pasala innei tùrin kan inhre chiang ve tawh a, inzui rei viau pawh hi a țha ber chuang lo. Țhiante'n an duh ber nupuiah an han nei a, an rîla rah fa an han pawm phei hi chuan eng vak sawi lo mah se rilruah nupui neih ve thuai châkna min pein min turna chen hi a awm ve tlat tawh a ni," a tih chuan ka nui sak a, a țhian ve ber Sawmkima'n nupui neiin fa a nei tawh a, a rûk takin a lo awt țhìn tih ka hre mai.

Ka pate chu an lo haw hun tùra an sawiah chuan an rawn haw thei ta tak tak a, Airport-a lo hmuah ka duh viau laiin ka pain țûl a ti leh tlat pek lo va," Hna thawh tùr i neih kha, mi dang kan be fel vek tawh," a ti mauh mai si a, ka kal ta lo a ni.

Ka pa dam țha taka a rawn haw thei chu ka lãwm tak zet a, ka rilru pawh a thâwl huai mai. Min duhsaktute, kan chhûngte bâkah kohhran lama mite, ka pa chanchin ngaihven êm êmtute pawh ka pa a rawn haw tâkah chuan kan inah an rawn chuangkai țak țak a, an fel hlawm ka ti a, kan chhûngkuain mi kan làwm lohzia ka ngaihtuah phei chuan 'mite țhatzia leh bengvàrzia hi chu aw' ka ti ru vawng vawng mai. Kei phei chuan mi hi ka lâwm lo tak zet a, kohhranah ni se țhalaiah ka inhmang bawk si lo, khawtlangah ni se chuti bawk, ka nung ve tawp ni berin a lang.

Ka rin ai daiha ka pa chu a țhat chhoh avang chuan ka lâwm zual a, a chhan chu ka pa a țhat chak chhoh zêl chuan Hminga thil tum pawh a rang lamin a tih theih dâwn a ni, inneih lam kan sawi ri vuai vuai tawh tih ka nute hian hria se eng angin nge min ngaih ang le?

Ka pate rawn haw ațanga kâr thumnaah Hminga palai hmel kan hmu ta, min hrilh lâwk vek tawh nain chutianga palai hmel han hmuh meuh chu a dàn a dang ka ti, ka sawi thiam chiah lo nain ka phûr ru tak zet a, chutih rualin an rilru tùr ka ngaihtuah tel ve tho bawk a, mak an ti viau ang nge ti vak lo ang? 

Ka room lama ka insaseng daih avàng chuan engtin nge palaite chu an lo chhàn tih ka hre miah lo va, Hminga'n  chanchin min rawn zawh pawh chuan," Ka hre lo, ka room-ah ka awm daih alawm," ka ti a, an lo chhàn dàn tùr chu ka hre châk viau mai, Hminga duh hmanhmawh ve tawhziate hi hre thiam phâk se...

A tûka tûkțhuan kan kîl laiin ka pain," Nizànah Halan-a palaite an rawn kal a, i hre ve tho ang a, in induh tawn a, in inhmangaih a, nupaa insiam in duh tihna a ni a; mahse, dàn kan nei ve a, 'Chhûngkhat lainate kan lo inrâwn ve phawt ang e' tiin kan thlah ta a nih kha," a ti dap dap a, 

Ka nu chuan," Krismas a hnaih tawh bâkah i pa an zaina pawh a la rei lo hle si a, engati nge ani hi a rawn hmanhmawh viau a?" a lo ti ve thung a, ka pa chuan a mitmeiin a khap ru deuh tih ka hmu tho nain ka nu chuan engah vak a ngai duh lo va.

"Nupui neih a duh ve tawh tihna a ni ber ang chu," nui chung hian ka lo ti a, ka pa chuan," Nia, Krismas a hnai tawh a, palai tîr tih avànga rem nghal chûk chûka inneih deuh nghâl mai kha chu thil tih chi pawh a ni lo va, pi leh pu i la nei a, chhûngkhat pianpuite ngei pawh i nu nèn kan la nei ve ve a, kan han inko khâwmin kan han inrâwn khâwm ve ang a, an remtih loh phei chu ka ring hauh lo va," a ti leh charh charh a.

Ka nu chuan," Palai a rawn tirh deuh thut dànah hian ka ngaih a țha lo deuh a, nang hi, i lo ruak tawh lo te hi a ni lo maw?" a rawn ti ta khauh mai, mak ti zet hian ka en hau ringawt a, ka rin loh lam daih thil arawn sawi chhuak si a. Ka nu vêk chuan," Sawi hrehna chhan tùr a awm hleinem, ka hmu chêr riau che a, ka ringhlel ru deuh mai che a ni, i lo ruak tawh lo a nih phei chuan han rem loh viau pawh tum mah ila tihngaihna a awm tawh lo tihna a ni dâwn a," a ti leh a.

"Kan la mu dùn hauh lo," ka tih chuan ka pa chuan," I duh tak a nih chuan rem tih loh hi ka tum lo hrim hrim a, an chhûngkaw dinhmun i hre vek tawh bawk ang a, chuti chung chung pawhin i duh tihna a ni a, rilru hrehawmna chhan tùr a awm hauh lo a nia," a ti leh dap dap a. Ka pa hi chuan thil hi a hre thiam thei teh mang e, Hminga a hre chiang ve tawh bawk a, a sual lohzia pawh a hre chiang tawh  khawp ang chu.

"Sum vànga pan che a nih loh hrâm ka beisei," ka nuin a lo ti sap thung a, a lam hawi pah chuan," Nu, i ngaihtuah ang kha a hmain kei pawhin ka ngaihtuah ve tho asin, in awm loh lai khân ka țhen deuhthaw hial nghe nghe a ni; mahse; a hnuah min hmangaihin min duh tak zet a ni tih ka hre chiang ta a," ka ti ve keuh keuh a.

Kan chhûngte inrawn khãwm chhûng chu rei ka ti tak zet a ni. Inneih kha chu an remti mai a; mahse, a hun tùr kha lung a rual thei meuh lo. Ka rin anga hmain kan innei thei dâwn hauh lo mai, Krismas hmaa inneih phei chu khawi lamah, dàn neuh neuh leh tih tùr neuh neuh a lo awm nual mai a, hriat belh ka neih phah nual bawk,  inneih hun atân a hma thei ang ber tùra nî an han ruat chhin pawhin kum thar January thla tàwp a nih loh chuan February thla tìr lam a ni daih mai!

Hminga ka khawngaih viau mai a; mahse, tihngaihna awm hek lo le, a hun kan nghah mai loh chuan, inneih kan duh miau chuan kan nghâk mai ta lâwng.

Julian-a leh Ațana chu ka țhiante an nih angin ka hrilh hmasak ber ber an ni a, min lawmpui viau mai. Nia, lawmpui ka phû ve viau tawh ka inti ve tho, a hmaa mi kha a tlawlh si a, kawppui nei ve tawh tùra min duhsakzia ka hria, tunah erawh chuan hlawhtlinni hmêl kan hmu ve thei dâwnin a lang ta si a, min lawmpui tak zet ang tih ka hre ve tlat a ni.

Krismas laiin Hminga chu ka pi leh pute'n an hmuh ve duh avàngin ka lènpui a, Hminga zawng a kumin a lo chaldelh ve deuh tawh bawk a, a ngaihtuahawm lo khawp mai. A tìrah ka piin khân duh lo dâwn dâwnin a han sawi țiat deuh kha a ni a; mahse, a hmel a han hmuha a chezia, hawiher leh țawngkamte a hriat hnuah erawh chuan chutiang lam chu a sawi ri ta lo; mahse,"A vun erawh a langsàr tehchiam lo chu a nih kha," a la ti hrãm a, ka nuih ringawt, a rûk tak erawh chuan," Vun langsàr lo tih mai mai, a nêp thè thè êm mai, ka duhna a tikiam chhin eih lo," ka ti rilru țhuai țhuai a.

Inneih kha kan pahnih khân kan duh hma viau ringawt kha a ni a, puitling zâwkte hun lo ruat chu a fuh hmel ta zâwk viau mai. Krismas hunpui kan han thleng a, mi tin mai kan buaiin kan hlim a, rilruin Bethlehem lam a hawi tlat bawk a, chutih rualin inneih thuam lam ngaihtuah a ngai pah tho a, rilru a chàwl hman miah lo nia. Hei aia hma khân lo ti thei ila chuan kan va buai dâwn tak!

Sawmkima'n Hminga a dinpui dâwn vàngin Martha-i chu min dinpui tùra han sàwm ka duh chiah lo deuh a, ţhian ka nei bawk si lo, Suzanne-i ka han ti deuh rèn ráwn leh kha a nia; mahse, a buai ve êm avàngin Julian-a nupui duhlai Hlimhlimi ka be ta ringawt a ni a, ani pawhin hlim takin a lo pawm a, ţhian ka neih lohzia Julian-a'n a hrilh a nih ngei ka ring.

Hun chu kal muang ti viau mah ila dam tlat chuan a liam ve zêl a, kan inneih nân kâr khat vél chauh a awm ta. Kan inpeih fel thawkhat ta viau mai, rilru erawh a la chàwl thei lo. Ka pain ropui taka lawm a duh a, ka rilru ang  ni ve miah lo mah se a fanu neih chhun ka nih avàngin a duh dàn chu ka hnial duh lo hulhual, Aizawlah kan innei dâwn lo va, min thlahna angreng deuh erawh chuan hun an hmang tho ang, a ropui thei ang berin. Hmingate khuaah kan inneihna tak tak chu hman a ni thung ang.

Hmingate khua Ralvawng leh Aizawl chu a kár a hlat deuh avàngin fel takin rem an ruat thlap a, inkalpawh zung zung tùrin kâr a hlat avàngin man hlàn tùr an rawn phei a, Hminga pa pawh rawn phei a tum viau a; mahse, a upa ve tawh bawk nèn, hritlâng a lo chhar fuh pek a, a rawn phei thei ta lo a ni. 

Wedding Hall, Julian-a leh Hlimhlimite inneihna hmunah ngei chuan min thlahna hun chu hman a ni ta a, a hma kâr ațang daih tawhin min thlah nia kan lan hmel țhat loh ka hlauh avàngin Hminga chu facial tihpuiin ka theih ang angin ka buaipui a, ka pi sawi dàn kher kher kha ka ngei ve rêng rêng bawk a, mipa pawh hian facial tih zauh zauh hi an lo țhatpui viau a nih hi ka tih phah hial, Hminga hmaiah chuan a lang chiang êm bawk a ni.

Hmingate chhûng tihbuai kan hreh avàngin kan inneihna kal tùr kan chhûngteho chu kan inneih ni hma chiahah Lunglei lamah an riak phei a, ka nu leh pa pawh an tel ve tho, Hminga chuan rem a ti lo viau nain awmzia a awm chuang lo, keini a pawimawh tak tak chin ti mai ang, loh theih loh chin ang chauh erawh chu mi dang ai chuan kan phei hma deuh thung, kan thlen veleh ațangin kan buai ve char char tho. Rehearsal-te kan nei ve a, a zahthlâk duh riau zui lehnghâl a, rilrua phùr viau ang kha a ni dâwn tawp lo mai.

Hlimhlimi'n min dinpui dâwn miau avàngin a lo kal ve zêl lo thei si lo va, a rûk tak chuan ka ngaihtuah viau a ni. Martha-i ka lo sâwm mai lo kha ka inchhîr ru deuh hial a, a chhan chu ani a awm lo daih si a, a chhûngte an buai phah dâwn viau a ni, a fate lian ve deuh tawh mah se han riah bosan deuh vang vang chu, ka ngaihtuahpui lo thei lo, a lung pawh a lêng ru ngawt ang. Min dinpui se, a hnu lamah erawh min buaipui ve tawh lo se a țha ang, a fate leh a pasal a riah bosan rei tawh êm mai. Kan inneih niah Julian-a a rawn lang ngei ang, chutiangin Ațana pawh, an chhûngte zawng zawng pawh ka sáwm vek nain kâr a hla ve si a, ka phüt ngam chiah tawh lo, bâkah, min thlahnaah khãn an lo kal kim țha a, helaiah hi chuan an lo kal kim țhap chu duh viau mah ila ka phût ngam tawh lo.

Kan inneihna tùr Biak in leh a vêl zawng zawng pawh an chei ve nasa a;  mahse, kan inneihni hma chiahin a chei thiam kan rawihte'n an han chei belh a, pangpâr mawi tak tak kan leite chu khawi belhin a mawi thei ang ber tùrin an buatsaih a, ka hmuh an phal rih lo nain an chei mawi ang tih ka hre sa tho. Kan inneih nia ruai țheih nâna talh tùr Bâwng lian țha tak leh vawk thau tak pawh Hmingate in piah hla deuh hlekah chuan an thlung ràn tawh a, thla pawh a muang ve deuh tawh; mahse, rilru erawh a la chàwl kim thei tak tak lo, kan la innei lo miau mai si a.

*I THIL TIHA INRINTÂWKNA I NEIH CHUAN NANGMAH PAWH I HLIM NGEI ANG, I HLIM MIAU CHUAN THIL MAK TAK TAK  PAWH I TI THEI NGEI BAWK ANG*