☆OKHEE☆ - 26 By Dingdi Pachuau

 ☆OKHEE☆ - 26 By Dingdi Pachuau

Min en reng ringawt a, a mitmeng leh cheziaah erawh ka thil sawi chuan țhâwng ang pawhin a awm lo; mahse, a țhâwng tawp nâng, a hriat sa vek tho a nia.

"I thil sawi awmzia chu, sum vànga ngaizâwngah che min puh tihna, a dik tiraw?" A țawng dam thlup chu ka ngei, thlep thlup mai.

"Puh che ka ni lo, i nihna ka sawi a nih chu," ka tih chuan a ngawi leh vung vung a. Kha maw, insawi fiah ngaihna a hriat loh tawp hi, bâkah, insawi fiah a ngai a nih chuan a dik tâwk lo tihna a ni bawk ang.

"Sawi fiah ngaihna pawh i hriat loh kha, thu dik hi chu a dik fak mai asin," ka ti leh a, a la ngawi reng mai. Ni e, thu dikin a han dêng a, min hnial dàn tùr pawh a ngaihtuah ve rih ang chu, mipa țawng zawt zawt chi a ni lo va, bâkah, ka hriat chhuah pawh a ring lo ang chu. Chîk takin ka en reng a, a hmelah eng mah a lantîr lo, min en rûn reng a, a ngawi ngul bawk, ka thil sawi avànga makti hmel a pu lo pawh chu a lem channa tho a ni ang, lem chan a thiam êm mai. 

"Thu dik i tih chu?" a rawn ti chhuak ta sup a, rang zet hian,"I hre zâwk ang chu, min han hrilh la?" ka lo ti a, inhnial ka inpeih ar mai a ni. A cho hian ka cho et et ti ila a dik ber ang chu, insual pawh ka cho hialin a nia ka rin ni.

"Ka hre lo va, ka zâwt che alawm," dam thlupa a tih leh tâkah phei chuan ka thin hi a rawn tâwt tet tet zualin ka hria, kei tharum hman mai pawh ka hreh loh hial laia ani dam thei ang bera a țawng thei bîk chuan ka thin hi a tirim ngawih ngawih.

"Plan siamtupa i ni a, i hre zâwk ang chu!" ka han ti leh hrãwk a, han țawng tam ve deuh se, han àn tàwn táwna han țawng deuh char char ka châk a ni.

"Eng plan nge ka siam a?" a tih leh chuan ding chhuakin," I hre zâwk ang chu, min han hrilh la? Engkim han phawrh lang tak tak teh, hriat kim loh pawh ka lo la nei maithei asin," ka ti a, tunah kher hi chuan ka pa a damlo a ni tih pawh ka hrechang tawh lo, ka thin hi a rimin han àn chhuah bawrh bawrh ka châk ber a ni.

"Ka hriat loh miau avàngin alawm ka zawh che," a lo ti leh mai a, a țawngka chhuak chu a dam dup reng bawk si a, chu tak chuan ka thin a tirim tlat si," I hriat reng kha, i hre vek! I lem chan hi duh tâwk tawh teh, ka ning lutuk tawh!" ka ti ta tàwn táwn a, ka awmdàn chu mak a ti ang tih lam pawh ka ngaihtuah tawh lo, ka thinlung chhûngrila ka thinrimna leh thu dik ka lo up beh zawng zawng chu sawi chhuah vek ka duh a ni tawp mai.

"Sawi zêl rawh."

Ka thin a ur belhchhah sauh a, a inla zaidam leh eng emaw vêl chu ka ngei hluah hluah bawk," Min duhna leh min hmangaih nia i sawi zawng zawngte kha i lem channa vek a nih kha, dâwt vek a ni dâwt vek! Mipa hi chuan dâwt hi in lo ngaina a nih àwm hi, rinawmna nei rêng rêng lo mai, ka va haw hluah hluah tak che u êm!" ka ti leh tàwn táwn a, àn phiar phiar ka châk bawk a, a thawk țha khawp mai.

"Mipa dang sawi tel lovin keimahah chauh aw," a rawn tih leh chuan,"Ka hua che, ka haw nasa che a ni. Ka lo tawng che hi ka thiam loh tak pawh a ni. Ni e, ka thiam loh liau liau a ni, lo duha lo hmangaih tawp lo tùr che hi ka nia; mahse, tuin nge mahni hma hun hre thei? Nang lah sum menin i meng a, a tìr te ațangin sum chauh i lo thlahlel a, kei lahin ka lo hre hauh si lo, a zahthlâk, ka zak tak zet a ni, min duh ve ang deuha min fawh lai leh min hmangaih thu min hrilh lai pawh khân min lo hmangaih hauh si lo, kei lahin ka ring êm êm che a..." ka ti a, ka chàwl a, ka ngawi ta rih. A chhan chu ka àn chhunzawm leh chuan ka mittui a tla ang a, ka țap mai ang, hmeichhe chak lo anga a hmaa mittui tihtlâk chu ka duh hauh si lo, ka mittui tling pawh chu a hmuh theih loh tùrin lehlam ka hawi hmak a.

"I hre sual a nih chu," a hnu daiha a rawn tih chhuah leh sup chuan a lam hawi vatin," Ka hre sual lo, i țawngka ngei ka hria, ka ngei che, ka haw hluah hluah bawk che," ka ti leh a,ka insûm vêl peih lo, ka mittui a tlâk loh nân erawh ka insehruh țeuh a, ka kut ka hûm ruh tlat bawk,  a mithmuhah hian ka mittui hi a tla tùr a ni lo hrim hrim. 

"Lo kal teh," a tih sup chuan," Min lo hnaih suh, min khawih tùrin ka duh lo che," ka ti tuar a," Tûn dârkârah hian kan inkâr zawng zawng ka titàwp nghâl vek bawk, kan inkârah eng mah a awm tawh lo va, eng inlaichìnna mah kan nei tawh lo bawk," ka ti leh buan buan a.

A ding reng a, che lovin min en kul a, kei pawhin thinrim tak hian ka en lêt ve kar a, ka mit pawh ka khap duh lo, ka mit ka khap hlauh chuan ka mittui a tla mai dâwn si a, ka mittui tla hi hmuhtîr ka tum hauh si lo.

"Zanin chu i boruak a fuh vak lo a nih hi, inbengdaih tum phawt teh," a ti sup a, min rawn pan dâwn emaw ka tih avàng chuan ka lo tawlh sawn vat a; mahse, kawngka lam a pan ta thung a, a haw dâwn a niang, haw rawh se, rawn kal tawh bawk suh se.

A reh ta vawng vawng mai. Tunah chuan a tàwp ta, a tàwp ta hmiah e. Ni e, hetiang tùr hi a ni, tàwp hmiah rawh se. Min mang țha lo va, ka thil sawi pawh khân ngaihpawimawh a hlawh hek lo, ngaipawimawh se khatiang khân a awm tawp nâng, 'thu dik ni lovîn dâwt  a nih kha' pawh a ti lo va, a kal tawp a ni, hetianga tàwp hi a țha zâwk a niang.

Ka biang rawn lum thla pap pap chu ka han khawih a, ka mittui a lo tla reng niin, engati nge ka mittui a tlâk a? A vawi khatna atân, sum vàng chauhin min duh a ni tih ka hriat hnu ațangin ka vawi khat mittui tlâkna a ni. A kalsan kha nâ ka ti em ni? Ni lo, keimah ka inkhawngaih vàng mai mai a nih hi, engah nge sum avàng chauha min pantuin min kalsan ta chu nâ ka tih ngawt ang? Kal tùrin ka duh alawm, a kal ta rêng bawk a. Nâ ka ti hauh lo, nâ ka ti tùr pawh a ni lo.

Ka muhìl lo chiang khawp mai. Ka mittui chu a rawn tla zêl a, ka lukham pawh a huh hnêp mai, ka mittui tla chu duh lovin ka hru tâwk tãwk reng a, awmzia erawh a awm tampui lo khawp mai, ka mittui tlâk chhan hi chu ka nute ka ngaih vàng a ni, Hminga nèna  kan inkâr ka tihtàwp vànga țap ka ni lo, țahna atân leh muthilh theih loh nân a tling hlawl lo.

A tûkah chuan ka mit chu a bui deuh lâk a, vûrin ka dep char char ringawt. Vawiinah hna thawhpuite nèn kan inhmu leh ngei dâwn si a, Hminga'n min hmuha a hriat thiam phei chuan, ka duh lo hulhual. Uar tak chuan ka dep sauh sauh reng a, ka duh anga a reh țhat loh chuan mit hnawih uar deuh mai ang.

Hmuh loh theih ni hek lo le, hna thawh a ngai miau si a. Ka pa room-ah chuan a rawn lût ta ngei a, pângngai takin lo awm ka tum char char, a rûk tak erawh chuan  hrehawm ka ti thlâwt a ni, ka pángngai thei tlat si lo va. Ani zawngin engah mah a lantîr ve lo va, a hmaa a awm dàn nèn a danglam hek lo. Chhùnah pawh dàn ngai tein ka pa room chu ka chhuahsan lo va, thil ei châkna ka nei lo bawk a, lu na bûŕin hna chu ka thawk mawp mawp a.

Hminga a rawn lût a, paper bag hi ka dawhkànah chuan rawn dahin," Hna  thawk nasa tur chuan chakna i mamawh a nia, ei rawh," a ti sup a, a chhuak zui leh ta nghâl a, chutia min ngaihtuah àwm taka a rawn che vêl chu ka ngei ru kher mai, a thil rawn dah hi ei pawh ka ei lo ang, kei pawhin ei tùr chu ka keng ve reng, ka ei peih lo a nih hi.

Bàn dâwn hnaihah a rawn lût leh a, en pawh ka lo en duh lo, ka thil tih lai chu ka ti mawp mawp reng a, ka dawhkàn hmaa rawn dingin," Hna leh mimal thil hi chu thliar hrang teh," a rawn ti leh sup a, paper bag chu ka hmaah tak a rawn dah țha leh ngat a, kei chuan," Ka ei peih lo," ka lo ti hmak a, ani lah chuan," A tui a nia, a petu che ngaihtuah lovin ei tùr kha ei rawh," a ti leh a, a chhuak zui ta nghâl a.

Ka ei châk hlawl lo; mahse, ka hmaah tak a rawn dah avàng chuan ka dah sawn rualin ei tùr rim chu ka hre nghâl a, a rim chuan ka hnâr a verh zar mai, ka rilțàmzia hre chhuak nghâlin ka pum pawh a ri nghâl raih raih maiin ka hria.

A thil min pêk chu duh lo viau mah ila, min pêk ei tùr chuan ka chil a tihpût tlat avàng chuan ka han la chhuak ta nge nge a, ani pawhin," A petu che ngaihtuah lovin," a tih kha maw, ka ngaihtuah lo ang. Ka han ei hlek chhin a, a sawi ang chiahin a tui viau tak tak mai! Ka ei ta hmiah hmiah a, ka ei zo vek mai, a rûk tak chuan ka kham lo lek lek hial a! Zanriah ei pawh ka ngaiin ka ring lo.

Ina ka haw chuan ka nuin min rawn bia a, rei tak kan inbia a, ka nu ka ngaih ber țum a la ni hial ang ka ti, tunah chuan a hmaa ka innghahna ve țhin kha a bo tawh a, kan inkârah eng mah a awm tawh lo, a tân chuan eng mah lo ka ni a, ka lo innghahna leh a tân chauha ka lo inserh hran viauna pawh kha boruakah a thâm ral zo tawh, kei ni lovin kan sum, chhuan tham awm miah lo hi a duh chu a ni si a, beiseina ka neih ve ţhin chu beidawnthlâkah a chang a, ka innghahna lungphùm chu tihchim vek niin ka hmalam hun, boruaka in sâng ka lo sak ve pawh chu sâwi țhish vek a ni tawh. Ka tân chuan ka nu leh pate lo hi chu innghahna tlâk an lo awm lo tak zet a lo nih hi.

Mi mithmuhah chuan hlim tak angin ka lang ngei ang, ka mizia pawh a ni, ka lang thawveng mah mah țhin zâwk maithei; mahse, a ni lo, chhûngrilah ka malin ka ţhiante pahnihin nupui min neihsan hnu ațang phei kha chuan ka mal zual a, chu chu thup nân ka țawng nasain ka titi bawrh bawrh țhin, nèlawm leh țawng duh leh hlim thei tak angin ka lang ngei tih pawh ka hria; mahse, a rûkin ka mal ngawih ngawih țhin. Hminga ka tawn hnu hian chûng chhûngrila mal ngawih ngawiha ka inhriatna chuan min kiansan tial tial a, amahah khân ka innghatin ka intulût viau bawk a nih kha; mahse, chu pawh chu tunah chuan eng mah lo mai a ni tawh si.

Ka pa chanchin zâwtin ka țhiante leh kan chhûng țhenkhatte leh hmel hriatte chu an rawn lêng ve zauh zauh a, a țhenin phone-ah min be bawk a, inlêng ka nei zauh zauh, lehlamah chuan a zia riau, ka rilru kal ding lutuk tùr min break ve a.  

Thil ka ei thei lo hle a, ka nu thu min chah pawh ngaipawimawh viau mah ila tunah hi chuan ka zàwm hlei thei tawh bîk lo, zanriah ka ei ngai lo va, ei tùr ei châkna ka nei lo hrim hrim a ni zâwk ang chu, ka ei ngai loh êm avàng chuan ka rihna pawh a tla hniam chak viau mai a, ka pâwn lam lan dànah erawh ka intuai hnûmin ka hlim lohna chu ka engah mah tihlan ka tum lo va, a hma aiin ka pâwn lam lan dànah hrim hrim chuan ka inuluk zâwk bawk; mahse, thil ei ngai lo na nâ nâ chu ka thuamhnaw pawh ka thâwl chho țan a; mahse, ka care hran lo, ka ha hnawk hnawk zêl mai.

Hrehawm ka tih ber mai chu Sêna'n min rawn biak țhina a putea nèna kan chanchin min rawn zâwt țhin chu a ni, a putea chu a zâwt ngai hauh lo ang tih ka ring a, kan chanchin ka hrilh chuan a pu a hrilh ngei ang a, a puin kan chanchin a hriat chu ka duh si lo, bâkah, Sêna rilru ka tihrehawm leh  tina tel tùr chu hrehawm ka tih avàngin ka hrilh hreh ngawih ngawih a, ka hrilh lo leh nge nge țhin.

Hminga han bàntîr chu duh viau mah ila ka pa rin ber kha a nih bâkah ka pa awm loh laia lo bàn daih ringawt chu thil țha ber niin ka hre meuh si lo va, lung zai a ni lehnghâl bawk si nèn, thu țha lo, làwmawm lo lam a hre tùr kha ka ngaihtuah bawk si a ni; mahse, hetia ni tin hna thawhnaa inhmuh reng ngai hi hrehawm ka ti a, a tu emaw zâwk zâwk chuan kan bànsan chu a ngai ka ti, kei chuan ka pa sumdàwnna a nih avàngin leh ka pa a theih loh chhûng chu ka bànsan dâwn lo va, lo dam țha chho leh pawh ni se hna a thawh ka phal chuang lo ang.

Martha-i'n," I reh e, naktûk chu rawn lêng teh, in in chhuahsan theih lohna chhan tùr i neih chuan loh kha," a rawn tih chuan," Ka buai ve thei êm asin," ka lo ti ve thung a, ani lah chuan," I rawn lèn lohna rei tawhzia hi, rawn lêng hrim hrim teh, Halan-a nèn hian in reh lutuk a, kan khua a har," a rawn ti leh zung zung a, sawi zawm leh zatin," Ei tùr tui tâwk ka lo siam ang, rawn lëng ngei ngei ang che, Harriet-i pawh a khua a har ve alawm, a lam reng ţhin che," a rawn ti leh zãrh zãrh a.

Chu kher chu ka âwih lo lutuk a, ka nui hak a, ani lah chuan," Nui ringawt suh, ka tifiam lo, lo lëng ang che aw, ka ring che a nia, a nih aw, an pafa chhuak an rawn haw, ngaihven ka ngai, bye rih mai le," a rawn ti leh a, ka țawng hman hma chuan a titàwp ta daih a, ka phone chu ka melh reng ringawt.

Hreh tak chungin ka va lêng ta hrãm a; mahse, Hminga ka hmuh ve loh vàng erawh chuan ka ngaih a țha deuh hlek a, ka lèn khàt ve deuh tawh avàng chuan Harriet-i pawh chuan min lo làwm reuh khawp mai a, ka huphurh ang ai chuan kei pawh ka hlim ve thei ta viau mai a. Martha-i ei tur siam 'tui tâwk' pawh chu ka ei ve nual ta mai nghe nghe a.

"Halan-a nèn in la hlim dùn zêl maw? Kan ti hup hup țêp tawh ang chu tih laiin kan boruak lah chu a heti zo rih sia, i nghahhlelh tawh àwm tehlul nèn," nui var var pah chuan a ti a, a cake ur 'tui tâwk' chu a țhial hmãn hmãn a.

"I ho êm mai a, ka ngaihtuahnaah hian eng thil dang mah a leng rih lo ve," ka lo ti mai a, ka ngaihtuah duh loh ber mai a rawn sawi chhuak si a, ka rin lâwk chu ni tho mah se pehhêl dàn ka la zawng ve ngar ngar tho a ni, kan inkârah eng mah a awm tawh lo tih ka hrilh hlauh chuan chîk zet zetin engkim a chìn chhuakin min zâwt leh ang a, chu chu ka duh lo a ni.

"Ni ve tho mai, i pa neih chhun ni mah se nang zawng, i pa hi i pa  bîk hliah hliah êm mai a, ka hriat thiampui viau mai che, dam takin, țha takin an rawn haw thei thuai mai ang, lungngai miah suh, doctor-te pawhin zai hlawhtling an intih êm kha, an rintlâk alawm," a ti barh barh a, hetiang zâwnga ka thil sawi a lo ngai thei chu ka lâwm khawp mai, ka thil sawi tum tak kha chu a dang daih si a; mahse, hrilh fiah nawn ka tum chuang lo. Bâkah, kan chanchin hi Hminga ka ațangin an hre lo chu a ni phawt mai a, ani'n a hrilh loh chuan hrilh ka tum bîk lo.

Tlai khat chu hna ațanga ka bâng ka haw tùr chu ka bulah rawn kalin," Ka rawn chuang ve dâwn, kan inbiak a ngai," a rawn ti sup a, ka be hmasa khât a, room chhûngah pawh amahin min be hmasa ziah țhin; mahse, chu pawh pawimawh tàwpah lo chuan min be vak bîk lo.

"Inbiak a țùlna ka hre lo, sawi tùr a awm tawh lo," ka ti sap a, ani erawh chuan," I sawi chauh ka ngaithla a, ka la sawi ve hleinem," a lo ti thung a, luhlul hmel takin ka piahah chuan a ding ngul a.

"I insawi thiam dâwn chuan engah mah ka ngai dâwn chuang lo," ka ti leh thung a, ani lah chuan," Kan la hria ang chu," awlsam zet hian a lo ti leh mai a, chu chu ka ngei tâwk a tling leh viau mai a, ka melh leh nasa viau a ni; mahse, rawn chuan a tum ve tlat si a, han phal loh luih țâlh lah chu a dikin ka hre mang meuh si lo va, lungthlu lo zet chuan kan inphur leh ta rih a.

Garage-ah ka tlân lût a, kan in step-a kan chhoh pawh chuan kan țawng lo, ka hnungah zêl a kal a, ka muan deuh leh a muang ve a, ka ruala kal pawh chu a duh lo a ni ngei ang.

In chhûnga kan luh veleh chuan," I sawi tùr chu sawi rawh, ka lo tibuai lo ang che," tiin țhutna lo awm hnai berah chuan ka țhu a, ka bag erawh dawhkànah chuan ka dah thung a, hetiang êm êma polite lo hi chu ka ni ngai bîk lo asin le, ka nu leh pa chuan min hmuin ka țawng hi hre ve ta se chuan an fanu hi mak min ti ngawt ang chu, hei pawh ka nu thu ka zawm duh loh vàng a la ni zui.

"I thinrim laia thil sawi chu awmzia a awm lova ka hriat vàng a nia hmãn zàn pawh khân ka sawi ve duh loh," tiin bul a han țan phawt a, chutah," Mahse, tunah chuan i thin pawh a rim tawh lo ang chu, hmeichhe dinhmun hi ka hre lutuk lo nain ka hre thiam ve ruak a,"tia a nuih deuh suk chuan," Pehhêl kual lovin sawi tawp rawh," ka lo ti hmanhmawh a. Ani lah chuan," Min lo tihbuai loh tùr thu i sawi zo chauh emaw ti a," a lo ti duh chauh a.

A sawi dik ve tho si a, ka ngawi leh ta rih. Sawi thuai thuai se, haw thuai se ka ti, a bula awm hian a dîp a na ropui si, boruak a hrehawm.

"I thil sawi kha khawi ațanga i hriat nge ka hre lo va, sum avàng chauha duh tùr chea min ngai kha i tisual let dêr a ni, sum tel hauh lo pawhin tu tlangvâl pawhin an duh vek ang che chu, tu tlangvâl han tihah khân kei pawh ka tel a nia, kha kha chu i hre sual duai a ni," a ti ta charh charh a.

"Nang chuan sum avàng chauhin min pan si a nih kha," ka lo ti leh hmanhmawh a, min en rùn pah chuan a chek hluk a, ka ngawi leh rang kher mai.

"Sum duh ta luaah min ngai a nih si chuan, a nih, eng vàngin nge nang kher hi ka duha ka pan chat si che a? Min han chhâng teh," a rawn ti chhuak ve leh ta khauh a.

"Chûng te chu..." ka ti hluai a, a chhan chu ka han ngaihtuah a, han chhàn mai dàn tùr ka haihchham ta tlat mai, han ne ne ral mai lah chu dikin ka hre meuh si lo,"...i hre daih zâwk ang chu," ka ti ta daih a.

A nui hawk mai.

*MI DANG NÈNA BÙK TAWN RENG I NIHNA THINLUNG NEITU KHA I NUNA DAH PAWIMAWH HMASAK BERAH NEI NGAI SUH*