☆OKHEE☆ - 27 By Dingdi Pachuau

 ☆OKHEE☆ - 27 By Dingdi Pachuau

"Han ngaihtuah vang vang phawt teh," a tih chuan," Awmzia a awm chuang lo," ka lo ti sap thung a.

"Han ngaihtuah phawt la?" dam dep dawp hian a ti leh sup a, Aizawl khawpui mai ni lo Zoram khawvêlah nula chhe lo tak tak, hausa tak bawk si an ther fer fur laia kei kher min han duh chhan tùr àwm chu ka han ngaihtuah a, ka hre sa ruak tho nain  ngaihtuahna sèn ve hrim hrim ka duh a, a tàwpa ka thutlûkna erawh a  ngai tho a ni.

"Ka hnar theih loh vàng che a nih kha; mahse, nang erawh chuan a tìr tê ațangin ruahmanna fel tak i lo nei sa thlap thung a, i ruahmanna hre hauh lo chuan ka lo duh che a, duhna che khân ka mit a lo tidel rei êm a ni," ka tichhuak ta kalh kalh a.

A ngawi vung vung a, mit khap lovin ka mitah min en reng bawk a, rei tâwk tak min en hnuah chuan ka mit ațang chuan zawi muang hian hnuai lam chu a melh thla ta dan dan a, a rûkin ka lo ïp chãwih chãwih mai, min hisàp tih ka hre chiang lutuk!

"Duhthawh taka ka fawh vawng vawng ţhin che pawh kha ka tider vek maw lo ni a? Duhna tinrêng nèna ka fawh ţhin lai che pawh khân ka tider vekah i lo ngai maw?" a țawngkam tin mai fiah zeta lam kalh kalh chung chuan a ti leh a. Chutiang kher khera a rawn sawi chhuak chu, nula zakzum tak leh inthlahrung chi tak chu ni ila chuan ka zak ngawt ang chu.

"Tisa tak chuan min lo duh ve deuh tho pawh chu a ni mahna," tiin, ka rilru dik takin ka chhâng a, tisa tak chuan min duh lo hulhual chu ka ti thei bîk lo.

"A dik, tisa tak pawhin ka duh che, ka rilru leh ka thinlung zawng zawng pawhin ka duh che, chu chu thu dik a ni, i âwih emaw âwih lo emaw thu dik a nih chu," chiang kelh kawlh leh dam dup chuan a ti leh kalh kalh a, a ngawi leh rih a, kei ka lo ngawi deuh reng bawk si a, sawi chhunzawm lehin," Kan induh tawn a, a dik tiraw? Nang pawhin nang ka duh tluk zetin min duh lêt ve tho a --" a tih lai chuan lo inrawlh vatin," Ka duhna che a nasa daih zâwk," ka lo ti vat a; mahse, ka inchhîr leh zat, tunah chuan kan inkârah eng mah a awm tawh lo va, sawi chhuah kher kha a țûl tawh lo bawk, a rûkin anchhia ka inlawh mawlh mawlh a.

Ka va en leh lai tak chuan mitmeng nung ser sawr tak hian min lo en reng a, nui deuh hmel pu chung hian," I thinrim châng pawh hian dàwt hi chu i sawi duh lo a ni tiraw? Hei tak hi a ni ka duh zualna chhan che ni, i thinlung hi a thianghlim a, chuvàng chuan tleirâwl tê ang mai ni hian ka hre țhin che a," a ti leh sup sup a.

"Min lèmna thar em ni?" nui hauh lo chuan ka lo ti thung a, a ţawngkam țhaah ka tawlh thlu tùr a ni lo tiin ka infuih ru pah sauh sauh a.

"Lèmna thar ni lovin thu dik tak a nih kha," a lo ti leh mai a. Ka chhàn leh dâwn lai tak chuan doorbell chu a rawn ri ta ral ral a, ka âng zuau tawh a nia, țhulh lehin kawngka lam chu ka pan a, ka va hawng ta nghâl a. In hnuai ber pu a lo ni a," I lo haw tawh khân ka hre rêng a," tiin a nui a, a rawn pên lût ta nghâl a.

Ka pa chanchin min rawn zâwt tùra rawn lêng lo niin," Zàna chhuah hi naupangin an phal meuh si lo va, i pa chanchin an sawi țhin pawh hi hre tho mah ila rawn ngaihven ve hrim hrim hi ka bat niin ka hria a, ka rawn kal zing thei lo zâwk a," a ti barh barh a.

Pu ber rawn lèn tâkah chuan tiin thingpui ka han lum a, Hminga chu ka mitsìr pah a, a bet vak lo tih ka hre thei, kan thil sawi kha a laklawh ve bawk si a, hawsan daih chu a ui ve deuh pawh a ni maithei a ni; mahse, pu ber a rawn lan tâkah chuan han sawi zawm pawp kha a rem țeuh tawh bîk si lo, a rilru a inbùk a ni ngei ang chu. Ka ner deuh sak a, haw daih rawh se, a sawi a sawi chuan min hneh palh ang.

A haw ta tak tak a! Thingpui a in zo țâwk a ni mai," A la hma alawm, la lêng rih la," pawh ka ti chuang lo, in hnuai pu ber chu a rûk tak chuan a ngei deuh hialin ka ring.

Pu ber haw hnu chuan ka nute ka bia a, an rawn haw theih hun tùrte ka zawh chuan," Kârleh lam khian kan han tum chhin phawt ang, i pa hian rawn haw chhoh hi a châk riau tawh mai si a, dam deuh ver vawra rawn hawpui ka duh viau nain--" a tih lai chuan ka pa aw chuan," Ka dam țha tawh lutuk! Helaia an ei tùr siam rim chêk chûk hian min tidam chak thei lo takngial dâwn, rawn haw vat a ngai," a rawn ti vau vau a, ka nui sak a. Ni e, tunah pawh hian an ei tùr siam rim chu hre ve thei hialin ka inhria ka ti, lu a tinâ, chauh a tizual, ka pa thil lo sawi hi ka hre thiam lutuk mah mah a ni.

Ka nute ka bia chu ngai viau mah ila ka lunglèn min chhâwk ka ti a, an rawn haw hun tùr ka hre riai ruai thei ta bawk nèn, ka rilru a kàn phah khawp mai. Anni hi ka tân damdawi țha ber chu an lo nih hi, nu leh pa hlutzia hi ka hre chiang telh telh mai zawng a lo ni.

Zàna Hminga rawn lan chu beisei lo viau mah ila a rûk chuan ka beisei tih ka hre tho, vawiina a thil sawi kha a laklawh êm êm mai si a; mahse, a rawn lang miah lo, min rawn be lo va, min rawn text hek lo. Ka ngei alawm, hetiang tak hi ka ngei chi a nia, beiseina angreng tlêm min pe a, a reh leh ta daih si a, ka ngei a ni tawp mai.

A tûkah pawh chuan melh pawh ka melh duh lo va, ani erawh a ngai reng tho. Tlaiah ka ruala haw a tum leh a, ka luh aia hmaa a luh avàngin ka hnial lo mai mai a ni. Kan tlàn chhuah pawh chuan ka be lo va, a lam pawh ka hawi chhin miah lo.

Traffic a jam a, ka ding a, chutih lai chuan," Kan heti ni tin chu a ni mai si a," a ti sup a, ka en duh lo tih kha ka theihnghilh thut a, ka va en zawk a, ka hre chhuak zui leh vat bawk; mahse, min rawn hmu hman tho.

"Hmaihma zâwng hian i hmel țha a, a sîr zâwng pawh hian i hmel țha leh a, min hnungchhawn zâwng pawhin awm mah la i hmel țha thoin ka ring," a rawn tih leh tâkah chuan ngil ata țhuin hma lam chauh ka en a, steering chu ka vuan nghet sauh bawk, zak lo thei viau e ti lo chuan ka hmai a sa ve hat hat thei tho nia.

"I țawngkam țhaah ka tawlh thlu tawh dâwn lo," ka ti hmak a, a nui hawk zui a, rum zeta melh châk miau mah ila en loh ka duh zâwk a ni, ka thinrim tih kha ka theihnghilh tùr a ni lo.

"Luhlul hi ka làwm a, nula hmel țha luhlul phei hi chu an 'cial' hi ka tia, a chhan chu luang thli chhem nghìn ang mai mai rilru an pu ve ngai si lo va, an rilru hneh nân beih fat fat ngai mah se, hlawhtlin hnuah hian a hlimawm vawng vawng duh bîk a ni," a ti deuh duah a, luhlul min ti a, luang thli chhèm nghìn rilru chu hre lêm lo mah ila min sawi dàn hi chu a țha lam chu a ni phawt mai a... mahse, min hneh a tumna hmanrua bawk a nih dâwn hi, chuti maiin min hneh lo ang.

Inah chuan min zui lût leh ta a, mi hmuha inhniala ina luh han phal loh deuh bur bur kha chu a rilru têtthlâk ka ti ve bawk si a, bâkah, ka bialpa 'hlui' kha a lo ni ve bawk nèn, han en hmelmâk viau kha chu a fuh meuh lo, kan la thawk tlâng zui bawk a.

"Ka sawi nawn leh ang, sum vàng chauha duh chea min ngai kha a dik lo, sum tel hauh lo pawhin, nangmah chauh pawh khân ka duh che. Engati nge sum vàng chauha pan chea min ngaih tlat ni?" 

"Nangma sawi ngei ka hre miau alawm, chubâka proof-na țha ka hre lo," ka lo tih chuan," Tu bulah mah hian sum vàng chauha duh che ka nih thu ka sawi chhuak miah lo asin," a lo ti ve thung a, pàwr zet hian,"Sawi lo la chuan ka hre nâng!" ka lo ti vat a, chutah,"Sawi tawh lo ang, awmzia a awm chuang lo, ka ning a nia," ka ti leh a, thâwk ka la hap a.

A ngawi vung vung a, a beidawng ve ta deuh a nih ka ring. Ni e, sawi tawh lo ila a țha, ka ning, min tichau, a sawi chhuah hi chuan ka thinrimna a chawk tho a, ka pàwr lo thei țhìn lo, ka chakna neih chhun chhun pawh ka hmang ral zêl si a, a buaithlâk.

"Ka sawi hria angin i insawi si a, tu bulah nge chu thu chu ka sawi?"

Lu thingin," Duh tâwk ang, theihnghilh rawh, kan inkârah eng mah a awm tawh lo bawk a, sawi chhuah kher kha a țûl lo ve," ka ti ve thung a, ka hah hluah hluah tawh a ni, a thil sawi ngei a pawm duh si lo.

"Kan inkâr titàwp mah la keiin ka la titàwp ve hleinem," a tih charh chuan ka en hau ringawt a, chutah, sawi zawm lehin a hmel leh țawngka chhuak thutak zet hian," I buaina ka chhàn nân che, ka hmangaih che a, i nihna ang zawng zawng khân ka hmangaih che, sum vàng a ni lo, i sum vang ni lovin nangmah i nih vàng khân ka hmangaih che, chu chu i âwih thei ngang lo a nih chuan i âwih theih ngei nân i lak ațang hian ka inthiar fihlîm vang vang ang a, min hmu ngai tawh lo ang, i bula ka awm avànga rilru hrehawm taka i awm hi ka duh hauh lo," a ti leh duah a.

Chhàn ngaihna ka hre lo, ka ngawi reng a, ka en reng ringawt. Hei hi ka duh dàn kha a ni si a; mahse, a han sawi chhuah meuh chuan ka hlim phah chuang miah si lo, hlim phah chu sawi loh, chutiang thu a han sawi chhuak chuan min tihrehawm țûn zâwk mai, kal tùr leh a hna pawh bànsan hial tùr khân ka duh ngei a; mahse, tuna ka rilru takah hi chuan  min kalsan mai hlauhna ka nei ta tlat zâwk.

"I kal bo dâwn em ni? I hna hi engtin nge ni ang?" ka ti sap a, ani chuan,"Ngaihtuah duh suh, i pa zah viauin a awm loh lai taka kalsan chu hreh teh mah ila i thawk kawp thei vek dâwn tho tih ka hria, i thawkrim a, i thiamnain a tlin tih pawh ka hria," a ti leh a, chutah, a ding zui zat a," Ka kal tawh ang e," a ti sup a, thil ka sawi ve hma chuan a chhuak zui ta nghâl a.

A reh vawng vawng kher mai. Kal lo tùrin ka ngèn lo va, a duhna ka pawmsak mai a ni. A zahawm alawm, kal a duh chuan engah nge ka dan tehlul ang? Tunah tak hian eng nge a tih ang? A rilru a hrehawm ve tho ang em? A thil sawi ka âwihsak duh si lo va, min kalsan tak tak ang em?

Min hmangaih thu a sawi a, sum vàng a ni lo tih pawh a sawi. keimah ngei hi min duh, kan sum ni lovin, a sawi chiang alawm, a hmelah khân a ti tak zet tih a lang chiang a, ka âwih a ni; mahse, ka âwih leh âwih loh pawh min zâwt lovin min kalsan ta daih tho si. Thil chi hrang hrang ka ngaihtuah kual a; mahse, min hmangaih thu a sawi leh sum vàng a ni lo tih a sawi kha ka thinlungah chuan a ri ring ber zêl tho a, min hmangaih vàngin a thil sawi ka âwihsak theih nân kal bo a tum a ni. Min kalsan tak tak ang em?

Thim zînga ka țhut reng lai chuan ka phone a rawn ri thut mai a, ka phu chiang khawp mai. Ka han en a, amah a lo ni nghe nghe a, tîm deuh hlek chung chuan ka han chhâng a.

"Kawng min lo hawn teh."

Ka phone-a dâr zât chu ka han en a, dâr 8 a lo ri țêp tawh niin, ka han tho mai dâwn a, ka țhut rei tawh avàngin ka ke a lo mu nasa mai a, ka  kal thei lawk lo, ka insehruh a, ka kut pahnihin ka mal thla leh chàwn vêl chu ka hmet nawk nawk a, a reh deuh hnu chuan zawi muangin kawngka lam chu ka pan ta a.

Light ka on loh avàng chuan a la thim vek a; mahse, thima ka awm rei tawh avàngin ka hmu fiah thei tho a, kawngka ka han hawn chuan páwn lama êng chuan min rawn chhun fuh a, ka mit ka khap deuh sak sak a.

"Rawn hmuh lawk che ka duh a," tiin light chu a on nghâl a, kei erawh chu ka la ngawi reng thung. A hawi kual a, vawiin lama ka thuamhnaw hâk lai zawng zawng nèn ka la inthuam reng tih a hmuh chuan min en vung vung a, chutah," Ka thil sawi kha i âwih em tih rawn zâwt tùr chein ka rawn kal a," a rawn ti chhuak ta sup a.

Ka mittui chu a rawn parawl leh deuh ringawt mai, ka mittui pawnlâng leh lutuk hi chu ka haw tak tak a ni. Thutlûkna ka siam a ngai; mahse, ka thutlûkna zawng ka hre sa daih tawh, tihtak zeta min hmangaih thu a sawi lai khân a thil sawi kha ka âwih daih tawh a ni, sum chungchâng kha chu Sawmkima nèn khân an sawi ngei mai a; mahse, tunah tak hi chuan ka pawisa thei meuh tawh lo, chàn hlen tak tak hi ka hlau zâwk. Sum chu a duh tâk leh, kei min neih phawt a ngai dâwn tho tho a, ka pasal a nihte chuan ka sum hi chu a sum vek tùr tho alawm a nih le.

"Ka âwih che alawm," ka ti ta sap a.

Min rawn pan hnaiin,"Min en teh," a ti sup a, ka en chho ve mai bawk a, ka mittui parawl erawh a hmu dáwn ta a ni; mahse, a pawi tawh lo, ani hi ka hlimna ber a ni a, ka hmangaih ber leh ka duh ber a ni bawk a, min kalsan tùrin ka duh lo tih hi ka hrilh ang a, ka kianga awm reng tùrin ka ngèn mai ang.

"Lawmi, ka hmangaih che."

"Kei pawhin ka hmangaih che, min kalsan suh."

A tu zâwkin nge inpana hmasaa inkuah hmasa zâwk pawh ka hre lo, kan inpan rual a, kan inkuah rual bawk a ni ang, nghet takin ka kuah a, a âwmah ka hmai ka phûm a, ka hlim a, ka lung a chhe tel bawk a, ka mittui lo tla tel bawk nèn, ka ţap titih ta ringawt mai.

Ka hnung chûl hliau hliau pah chuan,"Kalsan che ka tum hleinem, ka kalsan ngai lo ang che ka tih kha i la hria em? Kha kha a la ngai reng a ni," a ti sup sup a, duat tih hriat zet hian min kuah bawk a, nuam ka va ti veng veng tak! ka harsatna zawng zawng vawilehkhata paih bo vek ang a ni ta mai si a.

"Ka țahbelh tiraw?" tiin ka nui hak a.

"I duhawm sauh ka ti."

Kan inkuah a, chu mai chu duh tâwk lovin kan boruak a țhat leh ták avàng chuan kan infâwp bawk a, kan infawh lohna a rei ve ta bawk a, khâng hun chhûng zawnga kan infawh lohna zawng zawng kha hnawh khah kan tum a niang, kan ãm dùn khawp mai, kan inthlah hlei thei lo.

"I zãng hle mai," a mal chunga min pawm chung chuan a ti sup a, kei pawh chuan zêp chuang lovin," Thil ka ei thei lo alawm," ka lo ti ve mai bawk a, ani chuan,"Chakna i mamawh nasa tawh dâwn a nia, naktûk ațang chuan ei tùr ei loh mai mai phal a ni tawh lo ang,"inti-thu nei zet hian a ti leh a.

"I intithu êm mai a," ka lo ti hlak thung a, a nui hawk a, ka kâwnga chelh pah chuan," Thil țha lamah hi chuan a ngai alawm," a ti sup a, kei chuan a nghâwnga nawr châk châk pah hian,"Naupang ka nih tawh loh hi aw," ka lo ti leh a.

"Naupang i ni lo tih chu ka rilru mai ni lo, ka taksa pawh hian a hre chiang ngang mai, tuna i chêt dàn kha i tàwp vat loh chuan..." a nghâwng na lo tea ka sehsak nar nar chu ka tàwp vat a; mahse, tih chhunzawm châknain ka khat thung.

*HRINGNUN HI LEHKHAPUAN VÂR THIANGHLIM TAKA  NAWHREHNA TEL LOVA LEM ZIAK ANG A NI*