☆OKHEE☆ - 29 By Dingdi Pachuau

 ☆OKHEE☆ - 29 By Dingdi Pachuau

Ralvawnga kan phei hma khân ka pain ka Pazawn tùr Pa Mawia a lo zawntîr tawh a, thisen lama hnaih kan neih loh avàngin kan chipui awm chhun Pu Rodinga (Rda) chu Pazawnah vuanin an inah kan inneih hma chu kan innghat ta rih a ni. Pazawn neih chu ngai ka ti lo mai mai khawp a; mahse, ka nuin,"I mãwl mai mai êm mai, Mizo dàn a ni a, hma lam hun tu mahin kan hriat loh hi, in inneih hnuah pawh boruak eng emaw pawh thlenga awm ve thut thei a ni, chhiat țhata i belh ber tùr, keimahni ang maia i en tùrte an ni a, en hrang miah suh ang che," tiin min zilh êrh a, ka sawi zui ta lo a ni.

Kan inneih hma zàn chuan mut chu kan tintuah hma ve khawp mai a; mahse, ka muhìl thei lo chiang viau thung, thingtlâng khaw lian lêm lo tak a ni a, mut pawh an mu hma hlawm viau, chhùn lama hna an thawh țhin avàngin, mi dang an mut reh vek hnuah pawh chuan ka la meng kar reng mai a, naktûk lama kan hun hman dàn tùr chu ka ngaihtuah a, ka châk tawh a, ka huphurh tho bawk a, chutih rualin ka phûr viau tho bawk si a, ka helhhawlh lutuk a ni ber ang chu, nula senior pasal han nei tùr zet zawng helhhawlh loh theih pawh a ni lo.

Ka han tho hma êm êm khawp a, ruai sa tùr Bawng leh Vawk talh tùrte thawh rualin ka tho a, tih tùr ka hre chuang bawk si lo, bâkah, mi dang lakah ka inthlahrung ve deuh bawk si a, han mut țhat leh ngawt lah chu a ni meuh bawk si lo, ka awm dàn chu a lai laklawh kual vêl a ni ber.

Dâr 12 chiahahah inneih hunserh hman tùr a ni. Tûkțhuan ei kham ațangin kan han buai chho țan ta a, min cheitu tùrte an rawn thleng hma viau a, a zia khawp mai. Ka chhûngte lam, Lunglei ațangin an rawn thleng țuk țuk a, Pa Rdate in chu a zau țha hlauh a, a tihzia tak tak a ni, kan tibuai lo thei si lo va, kawng lehlamah chuan a inthlahrunawm khawp mai.

Biak In dâr chu kan pahnih tân liau liau a ri ta val val mai a, kan hun hman dàn engkim mai chu mumang nuam tak hi ka tehkhin ber mai. Ka bulah Hminga a ding a, ka pasal niin a nupui ka ni mai tawh dâwn, chu chuan min tihlim tak zet a ni. Hminga a mawi a, Sawmkima a mawi bawk a, chutiangin Hlimhlimi leh kei pawh, min cheitute'n min chei nalh bawk a, kan hmêla hlimna chuan min tilang nalh zual ngei bawk ang . 

Pathian leh kohhran hmaah Pastor-in nupa kan ni tih a puan laite chuan ka mumang mai a ni ang tih hlauvin a rûkin ka insik leh rih a, Biak in ațanga kan chhuah laite leh duhsakna chibai min bûk laite leh thlalâk laite chuan ka hlim lutuk avàng chuan nui luih a ngai miah lo, Hminga pawh chu ka han en chhoh châng apiang hian a lo nui suk suk ve tho niin, vawiin phei hi chuan an chei uluk ve si a, a hmel pawh a țha ka ti thlâwt, hetiang tak hian a lo hmel țha a ni tih vawiin hian ka hmu chiang zual ta a ni. Ka hlim vàng nge tih phei chu ka hre lo va, mi dang  pawh chu an hlim tlâng viau hlawmin ka hria a; mahse, kei tluka hlim hi chu an awm kherin ka ring lo, Hminga pawh tiamin. 

Hmingate in hi a lian lêm lo va; mahse, palai an rawn tirha remna thu an sawi ațang khân an lo extend ve niin, a zia ve ta viau a, kan nupa room tùr pawh a zau ve dâwn viau mai; mahse, Mizo hmeichhe thuam chhawm tùr ang chin bâk ka chhawm lût dâwn lo, chhawm chiam kha țûl kan ti hran lo va, a mawi tâwk erawh ka keng ve tho, puan sem tùr pawh ka keng hnem viau. Thuam chhawm țeuh kha chu dahna tùr a buaithlâk, a hnawk mai mai, duh leh nakînah mamawh kan nei a nih tâk leh, kan lei chhunzawm ve tawh mai ang chu.

Hmingate inah chuan ka lâwi lût dâwn ta a, Lawichalah Pa Mawia kan hmang a, fiamthu nên Hminga pa hnênah chuan Zo-artui pum 1 a han dîl phawt a, an lo inring sa ve a ni ngei ang, an rawn pe vat a, chutah, ka lam rawn hawiin," Kan fanu hian,' Ka pa, kan lo lût thei ang em?' han ti se, chuan, ka pu khân,' Rawn lût thei teh rêng mai, ka fanu,' tiin lo chhãng ve thung se, kan rawn lût thei ang," a han ti ta a, ka lam an rawn hawi ta ţhup mai.

Ka zak ve chiang alawm; mahse, zak anga awm lo chuan," Ka pa, kan lo lût thei ang em?" ka han ti a, ani chuan," Rawn lût thei teh rêng mai, ka fanu," a han ti ve charh charh a, Hmingate in ni țhìn, tûn ațanga 'kan in' tia ka chhàl ve tawh tùrah chuan ka pên lût ta nghâl a.

Engkim mai chu a dik thluam mai a, duhthusàm ang chiahin hun pawh kan hmang thei niin ka hria. Ka hlim bawk a, hun pawh a kal chak. Hma deuh takah inneihna ruai chu țheh a ni a, chuti lo chu vawiin hun rawn hmanga rawn kal ka chhûngte leh ka țhiante lam chu ruaițheh zawha haw tùr an nih deuh vek vàng a ni. 

In chhûngah a 'cial'-in ei tùr min siamsak a; mahse, ei tam a har khawp mai, ka bulah Hminga leh min dinpuitute an țhu a, Hminga chuan min duhsak takin kan sa hmeh zînga a sa tui lai nia a hriat chu min suahsak țhìn a, chu chu fiamin kan nui dar dar reng a, a hming takmeuhin a mawiah ka ei ve a nih ber chu. Hminga chu ka en leh zauh zauh a, ei siamtute'n sa tui hâng chu duhsak takin an thlit nasa bawk a, a in tam viau bawkin ka hria, nui chung hian," In țeuh țeuh rawh khai, i mamawh nasa dâwn si a," an ti țhìn a, ani pawh chuan nui sûng pah hian," Ni ang chu,"tiin a in leh țhin a, kei pawh chu ka nui ve mai mai tho nain ka zak ru pah tho, mi hian thil an hisàp nasa thei si.

Chaw ei khamah chuan muangchâng lovin ţhiante leh chhûngte haw tùr chu Hminga nèn chuan kan thlah a, Sawmkima leh Hlimhlimi pawh an haw nghâl dâwn, mi tih dàn ni lêm lo mah se an chhûngte lak ațangin an awm bo rei tawh a, kan inthlahrung ve tawh a ni, an nupui pasalte bula haw phei ve nghâl mai kha an tân a remchâng êm êm si a.

An han tlãn liam duak mai chu lung a lêng ve lek lek mai, a reh duak mai si a, Hminga chuan ka kut chelh pah chuan," Țah âwih loh," a ti sup a, ka en chho a," Ka țap dâwn teuh lo, ka bulah i awm alawm," tiin ka nuih var var a, in lam panin muangchângin kan kal ve ta a. Kan inah chuan kan inneihna min lawmpuitute an lo la tam mai a, kum lama upa zâwkte chuan kan inneihna ropui an tihzia leh inneih inkhâwmnaah pawh mipui an tamziate chu an lo sawi barh barh hlawm a, ina kan han lût min lo hmuh pawh chuan lawmpuina chibai min lo bûk tâwk lah bo lo, a nuam ve laih laih a nia; mahse, khaw lum lai a ni ang tih a hlauhawm khawpin ka hria, ka ngaihtuah a, kan inneih hun hi a fuh ka ti ta telh telh, a chhan chu khaw lum lai chu ni se chuan a lum over leh dâwn si a, thlan a tla leh dup dup ang a, makeup pawh kan hmang ngam nâng.

Thingtlâng khua e ti lo chuan an fel hlawmin mi ningkhãwng an hria ka ti khawp mai, dâr 8 a rîk dâwn chuan haw zai an rêl sap sap a, lêng rei fâl pawh an awm lo, Lalsêna intibengvâr chuan," Zanin chu Lawițhat zàn a ni bawk a, ka'n riak chhuak ve teh ang," a ti leh pek a, a bânah chuan mansak pahin," A ngai kher lo, i tizahthlâk," ka ti chùl a, ka pa (Hminga pa) chu a lo nui var var a, Hminga ve thung chuan,"A nachâng i hria a, i beng vâr khawp e," a lo ti duh lek a.

In chu ka phiat fai phawt a, chumi hnuah chuan Hminga room ni țhin, kan nupa room tùr ni taah chuan lûtin ka thil chhawmho chu ka dah fel a, khum pawh mut châkawm tùrin bedsheet thar nèn, mar et awtin ka han phah a, chumi hnuah chuan ka inbual huna ka thuamhnaw thlâkna tùr ka dah chhuak leh nghâl a.

"I hman tawh em?" tia a rawn luh chuan," Um, ka ti hmasa ang aw," ka lo ti vat a, ani chuan,"Lût dùn mai ila?" a lo ti sup a, meng sawr sawr pah hian min en bawk a," Het, ka pa a la men kha, chutiang sawi suh," ka ti sap a, a thaw hawk ringawt a.

Lu sûk a ngai lo bawk a, ka inbual rei lo, tui luma inchiah reng erawh a châkawm khawp mai. Hminga inbual tùra a luh laiin mutkawr ka lo inbel a, tlai lama chaw kha ka ei tam loh avàngin zanlaiah ka ril a țám ang tih ka hlau ru khawp mai a, chuvàng chuan Martha-i trolley min pêk ațang chuan cookies ka la chhuak sa bawk a, zanlai laia ei ruk ruk a ngai maithei sî a ni.

A rawn luh lai chuan dàrthlalang hmaah ka lo ding a, ka hmai chu uluk takin night cream ka lo hnawih hlarh hlarh a, boxer chauh haa ka hnung chiaha rawn dingin,"Zanin chu i muthilh ka phal dâwn miah lo a nia," a rawn ti sar sar a, dârthlalangah chuan kan mit chu a intawng sak a, ka mitko sàn ãkin ka han nui sak a, rawn kûn hniam deuhin ka nghâwng lang lai chu a rawn fâwp zoh a.

"I rim tui hle mai," a ti leh sup a, inherin dingdihlîp âk âk chung chuan a nghâwngah ka bân pahnih chuan ka han kuah a, min pawm kàn thut chuan ka țê deuh țhat a, a kâwngah ka mal chuan ka kherh bet nghâl bawk a.

"Zanin chu..." a tih chuan nui chung hian,"Lawițhat zàn a nia,"tiin ka lo chhunzawmsak a, khum tlânga țhut pah chuan,"Ka nghâk rei tawh bawk a, nghah man a awm dâwn khawp e,"  a ti leh sup a," Yes.." tiin a hmuiah chuan ka fawhsak zoh a.

Nupa kan nih hma pawha thlèmtu leh insûm lo zâwk zêl kha ka ni a, zanin pawh a vawi khat nân ka pasal tân liau liau kan nupa khumah nawhchizuar ka ni, ka pasal tân chauh chuan kan nupa khumlaizâwla nawhchizuar nih hi ka zak ngai hauh lo ang a, ka ni zêl bawk ang, a tân, ka pasal tân chauh.

Ka ril a țâm tak tak a! Thovin cookies ka phawrh chhuah sa chu ka han ei rak rak a, min lo en reng a, ka pe ve bawk a. Zàn a rei tawhin khua pawh a vâwt ve bawk a, thuamhnaw inbel ka nei mang si lo nèn, ka khùr lo chauh a ni; mahse, a kianga ka han inthawlha a taksa lum ham ham leh a mal sei zetin min han khan leh chial tâkah chuan khaw vâwt chu ka hre rei lo khawp mai.

A tûkah chuan,"Honeymoon hmang tùrin chhuak ang aw," a ti sauh sauh a, ka lo 'aw' ve mai bawk a, rin loh deuhin leilet lamah kan liam thla ta daih a, a hmain a sawi lâwk hauh si lo va, ka hlimzia mai chu, thlâm lah an lo sak țhat belh leh tawh a, tuna kan awmna tur phei hi chu a chhãwnga sak niin a thawven bâkah a fel fai êt a, honeymoon hman nân pawha nuam tak tùr hi a lo ni reuh a.

"Ka hmangaih vawng vawng che," ka hlim êm avàng chuan ka ti chhuak hliai a, min enin a nui suk a,"Ka hria alawm, zanin chu thãwm dìm lêk lovin kan inhmangaih thei tawh ang," a ti zui sup a, ka chhiah khum zoh a," Râpthlâk! Min dim viau khân ka hre sia," tiin ka bân leh ka nghâwng duk lai chu ka hmuh zui nghâl a.

"I no lutuk vàng a nih kha! Khatiang kha chu a dam har hran lo," a lo ti hluk a, ka chhâng tawh lêm lo, nizàn lama kan chêt dàn ngaihtuah kha chuan ani pawh hi pilh ve nual tùr chu a ni, a hnunglam ka hmu châk, ka tin ka lo hlep nual tawh zâwk a, a vànnei mai mai a ni.

Kan awm chhûng daih tùr buhfai leh chawhmeh siam awlsam an lo stock sa vek a, mutna tùr khum lah a nuam dâwn bawk si, thãwm dim ngai dâwn bawk si lo, duhthusàm hi a ni chiang alawm, ka bulah ka hmangaih ber ka pasal a awm bawk a, eng thil dang mah ka mamawh tawh lo.

Zanriah ei khamah mei kan chhêm a, Hminga coffee siam tui zet in pahin kan ai a, nuam ham ham tak a ni. Honeymoon hmanna atâna hmun ka la suangtuah chhin ngai loh leh ka ngaihtuah thlen phâk lohah hun ka hmang mêk chu a ni tak si a, dam man hi a va awm hliah hliah tak!

"Rai nghâl pawi i ti lo ang chu maw?"

Ka en vat a, sawi chhunzawm lehin," Ka duh dàn mai a nia, kan tih theih ni miah lo mah se thlentîr tumin kan bei thei thung a," a ti leh a. Kei chuan,"Pawi ti nâng aw, ka hmangaih ber fa chu engah nge ka pai châk loh ang? Kan pahniha inhmangaihna rah chhuak a ni dâwn asin," ka lo ti vat a, duh tak hian ka nuih sak a.

Zanin zet chu a danglam ta, nizàn lam nèn chuan danglam tak a ni. Nâ ka hre tawh lo va, nawmna hlîr maiin min tuam ni berin ka hria, kan che pawh kan duhthawhin kan uar a, kan pahnih hnih chuan intihlàwm kan tum ve ve a, mitmei vèn tùr awm hek lo le, nupa nun chu chau hnêpin kan chèn ve chiang a ni, thil sual ni hek lo le, Pathian pawhin a phal alawm.

Chutiang chuan kâr khat vêl zet leiletah chuan hun kan hmang a, zan tin hmangaihna kan chèn ziah a, hna thawk țhang tih takah a chak a; mahse, min dìm thiam êm êm thung. Min duat a, min duat tluk zetin ka duat lêt ve bawk a, chhùn lamah ka tih duh ang apiang min tihpui a, zàn lamah erawh a duh ang zânin ka chêtpui ve țhin thung. Nupa kan ni a, insùmkar ka duh lo va, ani tluka ka taksa hre chiang tura duh pawh ka nei hek lo, chuvàng chuan a bulah hi chuan zah țît țét pawh ka tum lo. Ruaka awm pawh ka zak chuang lo, ka taksa hi a tâ a ni a, a taksa pawh ka tâ a ni, kan innei tawn tawh a, pumkhat kan nih chuan kan inkârah zahna awm tùrin ka duh lo, inpawhna thûk tak leh inhmangaihna tluantlingin min phuar dùn reng se tih hi ka duh chu a ni.

Kâr khat hnuah chuan kan honeymoon pawh a lo tàwp ta, in lamah kan haw leh tawh a, Sêna erawh a rawn riak țha duh tawh lo, a rawn kal reng reng tho a, min fiam zûrh zûrh țhin,"Pitei i ni ta daih sia, U Lawmi kha ni reng la ka tih tehlul nèn," a ti țhìn a, kei chuan," Tunah hi chuan thû tawh tak ka ni, 'Pite' pawh min ti mai suh, 'Pite hmel țha' ti ngat hlîrin min ko tawh ang che," ka ti a, a nuih a za thei ngang mai.

Kan inneih thlalâk pawh an peih fel tawh a, Lungleiah kan zu lam a, hmuh a nuamin thla latuin a thiam bawk a, a mawi thei khawp mai. Mawi ka tih ber chu lian deuh taka siamin kan frame thlap a, bangah kan târ ta nghe nghe a.

"Hmuh a nuamin a fiah țha bawk a, en apiangin  a hunlaiah khãn  min hruai lêt ziah maiin ka hria," Hminga'n a tih chuan," Chuvàng tak chuan alawm hei kher hi ka thlan ni, a mawi danglam tlat a, bâkah, kan awm dàn leh inmelh dàn khi en la, kan inhmangaih tih khi a hriat hliah hliah tlat a ni," ka ti a.

Ka pa chuan zanriah kan kîl laiin," Bawiha, i hna kha i bànsan chuang lo ni khân ka hria a, engtikah nge thawh chhunzawm leh tùrin in phei ang? Ka rin aiin in awm rei tawh a," a ti charh charh a.

"Ka pa, thla khat chawlh ka la a," Hminga'n a tih chuan,"Keimah vàng hian phei hi in inthlahrung a ni ang ka lo ti a, inthlahrung miah suh u, Sêna a awm a, ani'n engkimah min buaipui thei alawm," ka pa chuan a lo ti leh a.

Zàn mutnaah chuan an pafa titi chu ka sawi chhuakin,"Hna i thawh leh hunah chuan ka pa hi ka lo awmpui dâwn em niang?" ka ti chhin a, ka hnung a chùlna chu a titàwp chiang khawp mai.

"Ka bula awm lovin maw?" a tih chuan,"Nih mai loh chuan," ka ti phawt a, chutah,"Chutiang a nih loh chuan kan bulah ka pa hi awm thei se ka ti, Aizawla hruai phei hi a duh ang em le?" ka ti leh sap sap a.

"Duh kher lo ang, nuam pawh a ti lo ang," a tih sup chuan,"Amah maia han kalsan leh ringawt hi chu țha ka ti lo êm mai, kum lama upa a ni ve tawh si a, a rûk tak chuan a thlahlel ngawt ang che," ka ti a.

"Kum upa tawh chuan thingtlâng ațanga khawpuia luh hi nuam an ti lo, thingtlâng boruak leh nun hian an thinlung a muan a, khawpuiah chuan hlimna leh nuam tihna an nei ve tawh lo," ani chuan a ti leh sup sup a, kei chuan," Chuvàng tak chuan han kalsan leh ngawt ai chuan ka lo awmpui mai ang a," ka ti ve thung a.

"I tel lovin zànah engtin nge ka awm ang? Ka muhìl thei lo ang, tuna hetia ka bula ka kuah leh khawih theiha i awm pawh hian hei aia inhnaih theih dàn hi la awm se ka la ti cheu a nia," a tih chuan ka nui hak a," I duhawm roh lutuk!" ka ti pah zat a.

"Thla khat dâwn zan tin ka bulah i mu ta a, ka thisen zungzâm hian a hre hneh chein i zunah an uai bet tlat tawh a, zan khat lek ka kianga riak lo tùr ang pawhin ka ngaihtuah duh lo che, a phal pawh ka phal lo," tiin min kuah nghet sauh a, chutah, min pawmin a chungah chuan ka bawk ta zân a.

"Zanin chu phìr siam ve tawh thung ang," a tih leh chuan ka nui hak a, zan tin hian," zanin chu mipa kan siam ang," a tih loh leh," Zanin chu hmeichhia ve thung aw," a ti ziah a, zanin erawh phìr kan siam ve thung dâwn a ni, fa kan ngah tawh a nia, kan siam zât ang hi nei phei ila chuan fa kan nei țhahnem ve tawh khawp ang chu.

Ka che hmasa ve ta thung a, tihhlim ka tum tlat avàngin chêt hi ka chuh hmasa ve fo a ni, a âwm ruak kâng chu ka chûl kualin ka fâwp pah zoh zoh a, ka chûl thla zêl a, a thâwk deuh hawk tâkah chuan ka nui ru sak a, ka thiam ve tawhin ka zei tawh alawm, a insùm theih lohna chin hi chu ka hre hneh ve tawh riau.

A tuar thei ta ngang lo va, kan position kan inthlâk ve ta thung a, a kut leh a hmui nèn min han sâwngbawl leh meuh chuan kei pawh ka insûm rei thei bîk teuh lo mai, vàn ram tla fual lei edenah chuan kan chêng ta veng veng a.

"Tikhân, fa eng zât kan neihna nge ni ta?" ka âwm nghènga a bei hlü hlû  tâkah chuan ka ti sap a, a lo nui hawk a, ka sawi awmzia a hre chiang ve awm sia, a nuih a za ngei ang chu.

"Tam deuh nei ang aw."

"Teh rêng mai, mipa football team khat daih leh hmeichhia dozen khat nei ila, i duh tâwk mai ang em?" tia ka zawh chuan," Chu aia tam daih chu le, siam lam hi han zin viau phawt mai ila an lo piang zawt zawt mai ang," a lo ti leh sup sup a.

*THIL ȚHA LAM CHU BÀNSAN I TUM HMA CHIAH KHÂN TIH TAK TAKIN HAN BEI LEH CHHIN PHAWT TEH, NAKINA I INCHHÌR LOH NÂN*