☆OKHEE☆ - 30 By Dingdi Pachuau

 ☆OKHEE☆ - 30 By Dingdi Pachuau

Hminga hian farnu pahnih neiin kan khuaah hian pasal an nei ve ve a, an fate pawh an lian tawhin college kalte pawh an awm nawk tawh a, a naupang lamte pawhin high school an rap tawh bawk, ka pa tân hi chuan a fapa neih chhun, kum lama naupang  fahran tawh bîk lo rïla rah ngei chu hmuh a nghahhlelhawm duh viauin ka ring a, a rualpuite'n nupui neiin fa an nei vek tawh ngei bawk ang a, Hminga tân tak pawh hian fa neih chu a rualawhthlâk duh khawp ang le. 

Kan vànnei a, chaw eia min sâwmtu pawh an awm ve nual mai, a làwmawm ka tiin chutianga chaw eia kan nupaa min han sâwm chu ka ngai ropui khawp mai a; mahse, mi dang ina chaw ei tùra ka pa chhuahsan daih chu hrehawm ka ti ru viau a, min sâwm ve na nâ nâ chu ei loh thi va awm bîk suh, U Mamite leh Hmingate upa ber U Lianpuiite chhûngkuain min sàwm țum phei chuan,"Ka pa in sawm tel ve loh chuan amah chauhin inah a lo ei dâwn asin, kan inah hian ei khâwm vek zâwk mai ang u," ka lo ti a, U Mami chuan,"Ni dâwn tak! Ka pa kan lo hrechang tawh miah lo nia, a zia lo e," a ti ve mai a, U Lianpuii ve thung chuan,"Kan tihek lutuk ang che u, rawn ei vek mai rawh u, a sâwmtu zâwk, a sàwmate ina ei leh daih si chu a dik lo ang," nui chung hian a ti a, kan chhûngkuain an inah chuan kan ei ta ringawt a ni, U Mamite thung chu an chhûngin an rawn ei ve thung a, anni nèn hi chuan Sêna ațangin kan lo inpawh sa deuh tawh bawk a, kan inen chhûng zual deuh zâwkin ka hria.

Zan khat chu ka pa dàr ka hmehsak lai chuan Sêna a rawn lût a,"Pute, ka pain thil ziahtîr che a tum a, ka nuin,'Lo kal lawk mai teh se, a hman zâwk ang,' a ti che a. U Lawmi hi dìl hmasak kher a ngai em?" tia min rawn enin a nui sûng a, ner nûng hian ka lo en a," I Pitei ka nih hi, engtin nge min ko rawh ka tih kha?" ka lo ti ve thung a.

"Pitei i nih hma khân U Lawmi i lo ni hmasa tawh a, koh dàn thlâk thut che hi ka harsat ve alawm le,"a lo ti nang nang a, ka pa chu a lo nui hak hak a, Hminga chuan," Ka'n kal lawk ang e, ka rei lo ang," tiin a ding zui nghâl a, Sêna chuan,"Kan in thlen hmaa nuthlawi awmnaah kha chuan pêng kawi kher lo lan" tiin a'n fiam zui hlak a.

Sêna hi ka awm ve tâk ațang hian a rawn riak duh ta vak lo va," Putea'n min melh rum ang," a tih loh leh," Min ning ang," a ti tlat a, innei thar kan ni ve a, chance min pe duh a nih ka ring deuh ngawt a, riak tùra ka sàwm pawh hian," Min mamawh lo tih ka hre chiang êm mai," a ti ziah a, rawn kal erawh a țhulh chuang lo, a riak lo mai a ni.

Hminga chhuah hnu chuan," Zanin chu riak ve tawh rawh aw," tiin ka han sâwm leh chhin rêng rêng a, ani lah chuan,"Putea'n riah a phal tawh lo alawm," a lo ti mai a, ka en vat a, a fiamthu ang pawhin a lang lo, a nui miah lo bawk. Hminga hian a lo ti tak tak em maw ni ka tih rûk rauh rauh lai chuan ka pa chu a rawn nui chhuak a.

"I Pitei hi tihder ziah suh, a âwih tak tak mai ang," a tih chuan Sêna chu en vatin," Ka bëng dâwn che," ka ti a, a lo nui sûng leh tawh a, ka kut ka tin uaih lai chuan,"Pite, i hmêl țha ber, nang aia hmel țha an awm lo he khawvêl ram zauah hian," a lo ti chùl a, min fakna avàng chuan ka bêng phal leh ta lo va, ka nui sûng ta ringawt a, ka pa chuan," Pitei hmel țha tak i nei a, chuvàng chuan a thu âwih viau ta che," a lo ti charh charh a.

Kan bulah chuan awm ve rengin games a khèl a, tlangvâl ve pui tawh e ti lo chuan," Ka thi leh dâwn, ka thi leh ta!" a rawn ti chhuak leh thur thut țhin a, ka pa chuan,"I va bengchheng tak e aw!  Min tiphu zawk zawk alawm le, sawlai deuhah sâwn va insawn teh," a ti a, ani lah chuan," Min kâp thi ziah alawm, a nih loh pawhin lungin min delh ziah a," a lo ti leh bul bul mai a, huatah pawh a la chuang lo va, a insawn chuang bawk lo. 

A hnu deuhah ka pa chuan," Bawiha hian a nu chanchin a hrilh tawh che em?"a ti ta sap a, en vatin," La hrilh lo, bâkah, ka lo la zâwt miah lo va,"ka lo ti vat a, a nghâwng chu hnung lam ațangin ka hmehsak nauh nauh a, anni chuan," I zawh loh vàng a nih ve bawk chu, mipa naupang fel ve tawh tak a nih laiin a nu chian min chhuahsan a, nu tel lova enkawl seilen a nih vàng hian duat dàn che a thiam lo ang tih chu ka hlauhpui viau a,"a han ti dap dap a, ngun zetin ka lo ngaithla a, nu tel lova enkawl seilen a nih chuan, a nu chu a ngai thei țhìn ngawt ang chu.

"A nih chu, a sawi ngai loh bâkah ka lo zâwt bîk bawk si lo va, a boral tawh ni tùrah ka lo ngai ve ngawt mai asin," ka tih chuan,"A dik reng mai, a nu chanchin rêng rêng hi a sawi ngai lo va, a ute'n an têt deuh laia an han sawi chhuah zauh châng pawh hian a ngaithla duh ngai lo, a tho nalh a, a kal sawn daih țhìn," ka pa chuan a ti leh dap dap a.

A nu chuan a rilru a tina viau a ni ngei ang chu, a ngei viau bawk a ni ang, tûn hnuah hian a nu chanchin chu  zâwt chhin ta ila a la sawi duh lo reng ang em le?

"Ka pa, a nih, ani chu a la dam em? A chanchin i hre zui zêl em?" tia ka zawh chuan," A, hre zui lutuk lo nain a la dam tia an sawi erawh ka hria, pasal dang neiin fa pawh a nei leh niin an sawi a," tiin min chhâng a.

"A upa ve tawh viau ang a?" ka tih leh chuan," Upa ve tawh bawk ang; mahse, kan inneih khân a la naupang ve a, bâkah, kan kum kha a inthlau deuh bawk a, tunah chuan i nu ang vêl kha a nih ka ring," a ti leh charh charh a, chutah,"Bawiha hi a sual miah lo va, a thin pawh hi a chhe hran lo; mahse, duat dàn che a thiam vak lo a nih pawhin i hre thiam hrâm hrâm dâwn nia," a ti leh a.

Hminga pawh a rawn haw har lo va, ka pa chuan,"Lehkha chu i han ziahsak ta maw? A harsa em?" tiin a lo zâwt thuai a, ani chuan,"Harsa lo ve, ka han phuah duah kha,"nui deuh suk chung hian a lo ti a, lo inrawlh vein,"Nia, thu i thiam alawm, a chhiartute pawh an hnuk a ulh hrim hrim ang," ka lo ti ve a, Séna leh ka pa chu an lo nui a.  

A Putea a rawn haw tâkah chuan Sêna pawh chu tho vutin," Ka'n haw ve tawh ang e," a ti a, ka pa chuan," Engah nge maw i putea rawn haw veleha haw i tum ni? La lêng ve rih rawh, mawng i ti tam ve alawm," a lo ti a, ka lo nui ve hawk a, Sêna chuan nui ţhû chung hian," Mawng ti tam atân ringawt chuan ka lêng rei peih teuh lo mai!" a ti a, rei awm lo chuan a chhuak zui ta nghâl a.

Kan mu tùr khuma kan la țhut lai chuan,"Zanin chu ka pa i hmet nasa si a, i taksa pawh a kham ve ngawt ang, han bawk la, ka lo hmet ve ang che," a ti dût a, kei chuan," Kham hran lo ve; mahse, min hmeh peih chuan ka dawh peih tho mai," nuih sak pah hian ka ti a, khumah chuan ka bawk ta nghâl a.

Na lo tê têin min hmet a, ka dàr, ka kâwng leh ka bân bul chu a hmet a, ka nghâwng a rawn hmeh thlen chuan zã ka ti lutuk a, țê țhatin ka tãl nghâl a, ani chuan," Lo tãl lo la, ka hmet dam vek ang che," a ti a, a hmeh chhunzawm leh chuan," Aih, ka duh lo, a zã, hmet tawh lo teh!" ka ti ruai a, ani lah chuan zã ka tihzia chu hre chiangin min țhut bet sauh sauh a, a za tùr tâwk chuan a rawn hmet ta zêl a," Ka duh lo, tàwp teh!" tia auin, nui uar uar chungin ka tãl vak vak a, a duh tâwk meuh chuan mittui tla phungin, sam thur bur chungin ka țhu chhuak a, ka tãl nasa lutuk a, mutpuan pawh a chuar vek hial mai.

Mutpuan ka phah țha chu min lo pui ve vut a, kan phah zawh chuan," Zanin chu zankhua atân hrem i ni!" tiin khum sîra lehkha sen chu ka la kãng a, ka han hmuh a, meng zîm deuh san hian," A fair lo," alo ti sup thung a, uar zet hian," Referee ka nia, i sawi buai thei lo ang," ka ti phawt a, sawi zawm leh nghâlin," Thuneitu sâng zâwk ka pa leh i farnute hnêna i thlen a nih ngawt loh chuan," ka ti leh a.

"Ka tihpalh lutuk, Ma'm, min ngaidam rawh, Red card kha hnûk kîr hrâm rawh, please-in?" kut suih meuh chuan a ti dût dût a, nui hmel a pu bawk si lo va, a rûk tak chuan ka nuih a za nasa; mahse, ka nui duh bîk miah lo va.

"A theih loh! Khum sîr tawpah khân mu la, helai hi rawn pèl bawk suh ang che," tiin khum lai tak chu ka kut chuan ngîl takin ka han rîn a, ka mutna side-ah chuan ka ţhu ta nghâl a, ngawi rùnin min en a, chutah," Ka thei lo ang, Ma'm, zanin chauh chu min ngaidam hrâm mai teh," a ti leh bul bul a, kei erawh chuan," Border hi i rawn pelh vaih!" tiin ka han rîn nawn leh a, chutah, tho leh rihin bathroom-ah ka luhsan a.

Ka chhuah chuan ka mutna lamah chuan a lo mu thûn niin, min lo nuih suk a, nui duh hauh lo chuan a mutna țhin lamah chuan muin rizai chu ka han pawt ve nghâl a, khum sîr tàwp, a tlângah chuan ka mu tlat a, ka nui ru char char thung.

"Light kha off la, border kha, theihnghilh suh ang che," ka han ti hmak a, a lam hawi duh lo chuan sîr zâwngin ka mu lui ngât bawk a, rizai erawh kan la inzàwn reng a, kan inkâr pawh a ãwng huau mai. Light chu a off ve mai bawk a, a mu chu a che deuh sat sat a, tlêmin a rawn tawlh hnai deuh a niang, kan inkâr âwng pawh a zia ta deuh e.

Chutah, min rawn kuah thutin a mal khauh țang, sei thlurh chuan min rawn khan bet nghâl bawk a, ka tla lo chauh a ni!

"Ka kuah loh che chuan vâwt i ti palh ang," ka beng bulah chuan rawn ri sar sarin vawilehkhatah min lehpui thut a, ka mutna țhin lamah chuan ka mu leh ta dêr mai. Min kuah tlat bawk si a, han tàl der ka tum ve ngial pawhin ka thei dêr lo. Ani lah chuan min kuah pah chuan a kutin ka âwmbâwr chu fet zet hian a'n țhãm deuh kher pah a, ka pain a hriat ka hlauh avàngin ka au ring ngam tawh si lo," A nâ ka tih vaih chuan aw..." ka han ti chu, a nuih a za a niang, nui huka," Duhawm khat tlat!" tih pah chuan ka bengkâwm chu a hmui chuan a rawn nûl nghâl thuak thuak a.

Tihdanglamna thlarau ka chang leh dêr tawh! Red card ka pe der mai mai a ni bawk a, referee zâwk chuan ka thu chu ka rilruin ka sût leh ta zàl zâl a nih ber chu, ani lah chuan ka awm dàn ațangin a lo hai lo nasa, ka nghâwng fâwp zohin a lam hawi turin min kuai her ta nghâl a.

Kan ni tin hun hman dàn chu nuam tak hi a ni ringawt mai. Min duattu tùr pa ka nei a, min ngaihsak êm êmtu pasal ka nei bawk a, ka hlim a, eng thil dang mah mamawh neiin ka inhre lo hial a ni, fa neih kha chu lo dah țha rih ila, ka pain min duat a, Hminga'n min duatin min ngaihsak bawk a, ka chhûngte U Mamite chhûng leh U Lianpuiite chhûngin min ngaihtuahin an rawn lêng ve reng reng bawk nèn, ka nu leh pate pawh ka ngai hran miah lo thei tlat a ni. Ka hriat chhuah tâk chu kan hmangaihte leh min hmangaihtute bula awm hi a lo nuam ber a nih hi tih hi a ni, kan hmangaih ve lêm loh min hmangaihtute bula awm ai chuan kan hmangaih, min hmangaih lêttute ni bawk si bula awm chu, nuam veng veng tak a ni.

Thla khat a ral a, hna thawk tùra Aizawla phei a ngai thuai dâwn, ka pa ka ngaihtuah si, Sêna nèn an awm leh tlawng ringawt ang a, a thuamhnaw leh mutbute tu nge lo thlâksak ang a, a taksa kham țhêm țhûmte tuin nge hmehsak ta ang?  Ka awm loh chuan, U Mamite leh U Lianpuiite lah in hranga awm an nia, ngaihsakin hmangaih êm êm mah se in hrang ațang chuan an tân a buaithlâk a, enkawla ngaihsak tùr fate leh pasalte an nei bawk a, keini nupa bâk hi innghahna tak tak a nei tawh lo.

"Ka pa, Aizawlah zin phei ve lawk ila?" tiin ka sâwm țan ta a," Rei pawh zin a ngai nâng, Hminga hna thawhna hmunahte kan kal ang a, i nin deuh hunah kan haw phei leh daih ang a?" ka han tih chuan," Bawihi, min ngaihtuah mah ta che, kei chu ka upa tawh a, Aizawl angah chuan hnawksak mai ka ni tawh ang. Lungdam takin va phei ula, min rawn ngaihtuah miah suh, Sêna a awm a, a hma pawhin min awmpui a, kan awm thei alawm, in hman hunah in rawn haw phei leh vat zâwk ang a," a ti ve thung a.

"Nih, ka pa, kan pahnihin awm ang aw? Phei ve pawh ka duh lêm lo," ka tih chuan," Ni lo ve, Bawihi, nupa chu awm tlàn ngei ngei tùr a ni, min ngaihtuah vànga kha thu kha sawi i ni tih ka hria, min ngaihtuah tih ka hriat hian ka lãwm a, nang ang fanu ka nei che hi ka hlim hliah hliah a ni. Ka hrisèlna a țha a, chanchin lah kan inhrilh zung zung thei bawk a, i pasal bulah chuan phei ngei ang che," a lo ti dap dap a.

Ka nute pawhin min rawn be fo va, ka pa bulah Hminga chu thla khat tal chawlh pe leh tùrin a rûkin ka ngèn a, a remti ve mai bawk a, an buai viau ang tih chu ka hrereng; mahse, heta ka pa hi ka ngaihtuah sî a ni. Ka țhiante pawhin min rawn be fo, an bãng chuang lo, anni phei chuan fiamthuin ka rai tawh leh tawh loh min rawn zàwt hmasa ziah a, a dawtah chuan thingtlâng life min rawn zâwt leh țhìn, a nuam ka tihzia hahîpa ka sawi chuan,"A làwmawm a nih chu, kan lo zin hunah in leiletah chuan min fehpui ve ang a, nang zawng leilet vêla chettlat pawh i zei tawh àwm si a, kan tluk tawh lo ngawt ang che, min zirtîr ve a niang chu,"Ațana chuan a rawn ti kher a, a ngeiawm thiam a nia. Martha-i'n min rawn biaka,"In chî kûi chu a țiak tawh em?" a rawn tih tlawng phei chuan ka nuih a za khawp mai. Kei aiin an lo nghâkhlel zâwk a ni ngei ang chu, hèl hùl hlawm hian a.

Mahse, ka vànnei ta tlat mai! Kan inneih ațangin thla a ral a, a thlalehah chuan ka thla tin hunbi ka chhiar ta hauh lo mai a; mahse, ka la ring ngam meuh lo, a hma pawhin a insawn dáwrh dàwrh fo a, chutiang chu a nih leh ka ring deuh a, Hminga bulah pawh ka la sawi lo, a lo nih leh loh thut ka hlau a ni.

Mahse, ka awm dàn a dik lo chho ve țan a, ka inthupin tihlan loh ka tum ve hle a nia; mahse, inthup hleih theih a ni ta lo, Hminga mangangin Lungleiah min tlàn thlâkpui a, ka inringhlel ve tho nain ka ring ngam lo kha a ni ber zâwk a, doctor-in min han en a, ka zun an han test a, ka lo rai ngei chu niin, mi awm tam laiin Hminga'n min han pawm kãng vâw vâw teh rêng a nih chu! 

Leileta a fehna țhin bike-a inphur kan ni a, kan haw lamah erawh chuan ka chuan ve a phal ta lo, ka han hnial a, a ngaithla duh hauh lo. "A nih leh, Rickshaw hi hmang mai ang?" ka tih lahin a lu a thing nû nû ringawt a, a tàwpah, Bolero-ah kan chuang haw ta a, ka la rui zui, fuh lo tak a ni. In kan thlen meuh chuan ka chau ve khawp mai, thil ka ei thei bawk si lo, ka ei ve pawhin ka pum a thleng thla chauh ang tih vêlah ka uak a, ka luak chhuak leh vek a, ka chau lo thei lo a ni.

Chanchin làwmawm hriain chhûngte an rawn lêng ve țak țak a, ka țhu lui ve hrâm hrâm a; mahse, Hminga'n motor ka ruih thu chhuanlamin room lamah chuan min pawm lût ta daih a, a uteho chuan min nuih zui dar dar nghe nghe a.

"Min pawm lût kher a," ka tih sap chuan," I phû a ni, i duh phawt chuan ka pawm kual char char mai ang che, indim i ngai, tunah phei chuan indim i ngai tak zet," a lo ti ve thung a, ka kawr min thlâksak a, bathroom-a ka kal tùr min hruai a, keimah chauha ka luh a phal lo va, min han hruai kual zêl teh rêng a! Ka nuih a tiza; mahse, nuih pawh ka peih rih lo, motor ka ruihna chu reh tawh se, ka pum no nghulh pawh chu reh thuai se tui takin mu veng veng ila ka ti ber mai.

Ka khawngaih zâwk! Mutnaah pawh chuan duat takin min kuah hlu hlu a, ka chêt deuh hlekin," A hrehawm em ni?" a lo ti hman ziah a, a mu tui nek pawhin ka ring chiah lo, a chângin ka dul thêp zaih chu duat takin a chûl hoh hoh a, a châng leh," Tah hian naute chu a rawn insiam ve țan chu a ni sia, a lawmawmin a mak reuh ngawt mai," a ti leh sup a, amah ber chu a ni lawmawm chu ni, senior ve pui tawh si, a țawng chhuah dànte chu.

A tûkah chuan ka motor rui chu a reh ve mai bawk a, ka chêt ve hlek pawh chu a phal lo tluk a ni," Lo țhu la, i duh duh lo kâwk mai mai rawh," a ti a, a che vêl rêng rêng chu a phûr sûrh mai a," Ka lo pui ve duh che alawm," ka tih pawh chuan," I hah ang, lo țhu hle hle teh. Chu, kan naute pawhin,' Âpa, chhang tê ka ei châk,' a rawn tih chu, ka siam nghâl dâwn e, naute," a ti vut vut a, a thil sawi chu hriain ka pa pawh a lo nui vur vur mai.

Aizawl lamte pawhin min rawn bia a, lawmpuina thu min rawn hrilh tliar tliar a, a țhenin message lamah an ti thùl, ka pa pawh chuan," Rawn phei tum rih lo mai rawh u, kan buai hran lo bawk a, naute len deuh hunah in rawn phei zâwk dâwn nia, 'Helicopter-in rawn phei mai rawh u' ti dâwn ila motor-a i chuan tho a ngai dâwn a, kawng a sawt bawk si, tikhân awm hle hle rih phawt mai teh u," a rawn ti a, a phùrzia chu a aw ațang pawh chuan a hriat theih mai a.

*A HARSA I TIH PAWHIN HAN 'SEIH' TEH LE, I INCHHÎR HAUH LO ANG. MI I HÎP ANG A, I MOOD A THLÂK BAWK ANG A, NUAM TI BER TÙR CHU NANGMAH LEH I BULA MITE AN NI NGEI ANG*