☆OKHEE☆ - 31 By Dingdi Pachuau

 ☆OKHEE☆ - 31 By Dingdi Pachuau

Khua a rawn lum chho țan a, March thla a han rala April thla a rawn inher chhuah leh meuh phei chuan khaw lum dàn chu tawrh tham tawh tak a ni! Hmeichhe harh ve tâwk tak ka ni a; mahse, raino chhoh leh khaw lum hi a inrem chiah lo a ni chêk ang chu, min hmet zawi chho ta riau mai. Hminga leh ka pa chuan an theih tâwpin min duat a, min ngaihsak bawk a, Hminga phei chuan eng emaw han sawi hlek ila, ka thil ei châk zâwng min lo zâwt hman ziah! 

Motor a chuan loh tak tak theih teuh lo mai! Lungleiah inentîr ka ngai a, sumo service-ah kan chuang ve mai a, bike-a chuan phal hek lo, kan khaw kawng chu a zìm bâkah kawng khuar hnawhna a bawl nasain a sawt lo thei tak tak lo va. Hminga'n min kalpui ziah a, kawng sawt laia kan tlàn lai hi chuan min pawm lo chauh tak tak a ni! "Naute insiam chhoh lai a ni a, a insawh khawlo palh ang,"a ti a, kan chuanpuite pawh hian min melh hrek hrek țhìnin ka hria, ani ve thung chuan chûng chu engah mah a ngai ve teuh lo," Mi sawi leh min melh kan ngaihchàn chhûng chuan thil țha ti hman lovin ram ropui pawh kan thleng hman lo ang, nupa kan inhmangaihna leh inngaihsakna hi nupa room-ah chauh tihlan tùr a ni kher lo," a ti a, dik ka ti viau mai.

Thil ka ei țha thei lo viau mai a, ka ei ve hlek pawhin ka luak chhuak leh mai țhin, ka thin pawh hi a chhe ta deuhin ka hria, ka pa leh Hminga chungah hian han thinrimna tùr leh ànna tùr hi a awm lo êm zâwk a, ka tilang lo mai mai niin ka hria; mahse, mite pawhin raino thinchhiat lai an neih ve ţhin tho kha maw, rai awm dàn tùr rêngah ka ngai a, ngaihțhat lohna pawh ka nei chuang lo. Bâkah, Aizawl lama țhiante leh chhûngte, experience lo nei tawhte'n an rai chhoh laia an awm dàn min rawn share nasa a, ka awm dàn nèn a inang riau a, ngaihțhat loh nân ka hmang lo. Ei tur țha leh damdawi țha tak tak ka inchhawp ve dul a, a châng chuan ka nuih a za leh tlat țhìn. Tihian, ka han rai chho ve ta mai chu a ni si a, nakinah chuan ka dul hi lian takin a la rawn puar ve ang a, ka la hahpui ve hluah hluah dâwn a ni tihte ka han ngaihtuah phei chuan ka huphurh lâwk a, a châng leh 'Khawvêla nute zawng zawng lo pal tlang vek tawh a nia, engah nge ka han huphurh chiam le' tiin ka han inhnèm leh rih bawk a, buana hmain ka kherh a nih ber chu.

Ka rilru pawh hi a no tel belhin ka hria, ka hriatna chhan chu thil ho tê vàng a nia, huat tùr pawh a awm hauh lo; mahse, ka mittui a tla tlat pek a nih chu.

Thil ka ei thei lo va, Hminga'n ei tùrin min thlêm a,"Ei țeuh pawh a ngai chuang lo, ei hlek hlek tum hrâm rawh, naute kha ngaihtuah a ngai alawm," a han ti chuan ka lung a tino ta tlat pek a, room-ah ka lût a, khumah țhuin ka mittui chu ka khap per sak sak a, kei aia naute hmakhua a ngai kha ka hre thiam lo a ni," Ei tum hrâm rawh, nangma tân a țha dâwn alawm,"ti se chuan ka mittui a tla hauh lo ang le.

Min rawn zui lût ve niin, ka bulah chuan a rawn țhu a, a lam pawh ka hawi duh lo. Ka kut a rawn vuan a, sîr lam ka hawi leh daih a, chutah, thovin ka hma takah chuan a rawn țhu hniam ta a, a kut pahnih chuan ka biangah rawn dawmin amah en thei tùr chuan dìm tê hian min kuai her a, mittui tling kuang chung chuan a hmel chu ka en lo thei ta lo.

"Shh...ka naute, engtizia nge? Nâ i nei em ni? Engati nge min hrilh loh?" a ti dam thluam mai a, a aw chhuak zaidam lutuk leh min ngaihsakna aw ri chuan ka lung a tino zual a, mittui chu a rawn chhuah belh leh sauh a. A tlinna kuangah chuan a leng lo va, a far thla ta zãwih a.

"Min han hrilh teh, khawi lai nge nâ? Min hrilh loh chuan ka hre lo aw, han sawi teh le?" tiin ka mittui chu a kutzungpui chuan dìm tê hian min tuai hulsak a, ka insût hraih a,"Nâ ka nei lo," ka ti sap a.

"Ni lo, i mittui a tla alawm, i pasal hi ka mãwl êm a, ka ngaihven thiam lo chein duat dàn che pawh ka thiam tâwk chiah lo a ni tiraw? Min ngaidam rawh, i mittui titlatu nih hi ka duh miah lo asin," a tih leh sup chuan ka khawngaih khawp mai a, a hmêlah inthiam lohna a lang chhuak chiang bawk si a, a biangah chuan ka dawmsak ve a.

"I mãwl lo, chutiang sawi tawh suh," tiin ka mittui chu a rawn hnâm leh nghâl a, chutianga mahni a indah hniam chu ka duh lo, ka khawngaih, engtiklai mahin a indah hniam tùr a ni lo, ka phal lo.

"I mittui a tlâk chuan... hrehawm ka ti a nia, i lung a lêng em ni? Aizawla phei i châk tawh a nih pawhin ka bulah chuan sawi hreh miah suh," a ti leh koh koh a, tunah tak hi chuan amah ka khawngaih êm avàngin a ni ka mittui hi a lo hnaih leh tawh zâwk ni, ka hmangaih êm êm si a.

"I bul a nih phawt chuan khawi laiah pawh nuam ka ti, ka lung a lêng lo," ka ti leh a, ani chuan," Sawi hreh suh aw, i mittui tla hian min tibuai, i sawi chhuah duh loha nangmah chauha i lo tawrh keuh keuh chuan ka buai vek a ni mai," a lo ti ve leh a, a biang chùlsak hoh hoh pah chuan," Ka ti tak tak! Ka lung a lêng lo va, nâ pawh ka nei lo, ka mittui hi chu a lo tla châk a, a lo tla ve mai mai a nih hi," ka ti leh sap sap a.

Min hmangaihna leh ka hmangaihna chuan tûn lawka ho têa ka mittui tlâkna chu min theihnghilhtîr thuai a, hlim takin ka awm chhunzawm thei leh ta mai a, ani erawh chuan min ngaihsak sauh thungin ka hria. Min duat dàn hi a tâwk a, min ngaihsak a, min ngaihvenin min ngaihtuah a, hetiang bâk hi chu khawi lamah mah ka tawng tawh ngai lo ang.

Khua lum viau mah se, zàn mutnaah erawh min kuah chial lo thei lo, ka sawisêlsak duh hauh lo, min thlahlelin min kuah duh a ni mai a, min thlahlel lo se min kuah peih tawp nâng, min kuah loh ka hlau daih zâwk. Fan kan on tlaivar mai a; mahse, ka hritlàn phah a hlauhthàwn deuh avàngin kan hmai lam erawh a chhèmtîr ngai lo thung.

"Vawiin khân nâ i nei lo tak tak maw?" tiin min zâwt țha leh a, min kuah chial a, a bân veilam chu min khamtîr bawk a, kei chuan," Ka nei lo tak tak," ka lo ti mai a, han sawi chhuah leh pawh chu a zahthlâk tawh ka ti, ka țahna chhan lah kha a ho ropui si.

"A nih, min han hrilh la? Kan inkârah hi chuan zëp awm miah lo se, tiraw?" 

A bân chu ka chulsak a, ka hrilh chuan ho a ti ang a, min nuihzat viauin ka ring si a, bâkah, kei ngei pawhin ka han ngaihtuah lêt leh hian ho ka ti viau tawh mai si a.

"Min nuih lo la? Chuan, thinrim lo bawk la?" ka han ti tê tê a, ani chuan," Eng aiah nge ka thin a rim ngawt ang? Zêp miah lovin han sawi teh le," a lo ti leh a.

"Thil ei tùra min hrilh khân naute chauh kha i ngaihsak bîk niin ka hria a,' Nangma tân a țha alawm' ti lovin 'Naute kha ngaihtuah a ngai alawm' i ti daih a, kha vàng khân ka mittui a tla ringawt," ka ti ta sap a.

A bân ka khamsak lam chuan ka lu chu rawn kuahin ka chalah chuan min fawhsak vang vang phawt a, chutah,"Ka naute lian pui, ka tihpalh aw, ka lo tisual a nih chu. Thil i ei țhat chuan i tân a țha a, naute tân pawh thil țha a ni bawk, i taksa leh thisen ringa nunga rawn insiam chho a ni a, nangmah i țhat phawt chuan ani pawh a rawn insiam țha chho zêl mai dâwn a ni. Ei tum hrâm hrâm la, tlêm tê i ei pawhin i tân leh naute tân, ka tân leh kan chhûngte tân pawh a ni zêl a, chuvàngin, chakna i neih theih nân ei hrâm hrâm tùrin ka duh che a ni, i ei duh chu sawi hmiah hmiah rawh, khawi hmunah pawh awm se, la tùrin ka tlãn dàwr dáwr mai ang," a ti duah a, ka dul chu a chûl hoh hoh bawk a.

Ka ei theih ber chu thil thûr lam a ni a, ka ei nasa viau bawk a ni. U Mamite chhûng leh U Lianpuiite chhûng hian thei thûr lam an neih apiang chu min rawn pe ziah a, ka ei nasa lutuk chu ka tân a țha pawhin ka ring chiah lo, ka han duh êm êm khawp mai a, Hminga pawh hian min sawisèlsak duh lo mai mai a nih ka ring, ka thei ei lai hi mit khap deuh sak sak chung hian min lo thlîr reng ringawt țhin. 

Thla thum chuang zet kan awm tâk hnu chuan Hminga'n Aizawla phei a rawt ta a, ka hnial ngam tawh bîk lo. Ka pa hnênah chuan," Ka pa, kan chhûngkuain phei ang u aw, heta nangmah chauha i lo awm chuan kan ngaihtuah dâwn si che a," ka ti a, ka rin loh deuhin ani pawh chuan,"Phei ila ni mai alawm," a lo ti ve mai a, mak ka ti, lãwm bawk si chuan țawng mai nachâng pawh ka hre lawk lo.

Phûr takin kan insiam a, ka pa thuamhnaw pawh chu ka siamsak vek bawk a, a phei tel ve tùr chuan min tihlim a ni, a duh duh ka leisak ang. Kan phei dâwn zànah chhûngte an rawn lêng khâwm ve țak țak a, U Mami'n chhang kan tùr a rawn thawh bawk a, kan hlim dar dar viau mai. 

Sêna pawh chu ka han sâwm ve leh hnuhnawh a, ani lah chuan,"Kei ai ngaihsak tùr ka pu leh putea i nei tawh sia, ka duh lo," a lo ti deuh tlat a, ka pu chuan,"A va mak mai mai e aw," a lo ti sap a, nui chung hian," A âwihawm loh e, kan nau 'cial' i nia, engah nge ka han ngaihsak loh ngawt ang che ni?" ka lo ti ve a.

"Leilet lamah lo office nî tin mai rawh se," Hminga'n a tih chuan U Mami chuan,"Ni e, leilet hotu ber a ni tawh alawm," nui chung hian a lo ti ve a, kan nui dar dar a. Sêna'n," Ka lo eiru char char ang," a tih phei chuan kan nui uar sauh a, ani hi zawng a nuih loh theih loh, hlimna siamtu ber a ni.

Sumo kan be sa tawh a, kan hire tawp mai dâwn a ni. Veivahna a buaithlâk si a, Hminga tân pawh a tlàn kual zung zung theihna tùr lìrthei eng emaw tal chu ngaihtuah a ngai a ni, nakinah ka la sawipui ang.

Kan chhuak tur chu chhûngte chuan min rawn thlah a, Sêna lehpek chuan," U Lawm, in lo phei leh hunah chuan i silai kha lo keng phei tawh rawh aw," a rawn ti lauh lauh pek a, "Aw le," ka ti vat a, a sawi zawm ang tih ka hlau khawp mai a; mahse,"Yess," ti bâkin a sawi chhunzawm ta bîk lo.

Kalkawngah chuan ka rui ta bîk lo ve. Hminga chuan driver chu tlân chak vak lo tur chuan a hrilh reng a, keimah vàng a ni tih ka hria, service a ni lo bawk a, khua a lum viau nain mi dang phurh kan nei lêm lo bawk a, a zia viau, ka pa pawh a rui lo ve.

Aizawl kan thlen meuh chuan a tlai ve tawh khawp mai a, kan tlàn chak loh vàngin kan thleng tlai ta rêng a ni. Ka pain kan in lama zanriah ei tùra min tih avàngin kan in kawtah kan ding a, driver pawh chu kan ina zanriah ei ve tùrin kan chàr nghâl bawk a, rei lo te tak tak kan țhut muan hnuah chaw ei chu kan siam ta nghâl a.

Ka pa chuan kan driver Fela chu kan ina riak ve nghâl tùr chuan a ti a, ani erawh chuan," A ngai lo, ka lâwm e, Chaltlângah khian ka țhianpa a awm a, han tlawh pahin ka han riak zâwk ang e," a lo ti thung a, riak tùra sàwmna avànga lawmthu a sawi rualin chaw eia kan sàwm nghâl avàng pawh chuan làwmthu a sawi niah niah bawk a.

Chaw ei khamah chuan Fela chu a chhuak deuh nghâl mai a, kei pawh chuan,"Hetah kan riak dâwn em ni?" Hminga lam hawia ka tih chuan ka pa chuan," Zanin chauh chu riak teh u, kan ngai tawh che u alawm, i nu pawhin riah loh chu a phal bîk tawp nâng," a lo ti vat a, ka nu pawh chuan," Ni e, lunglovah la lo hrâm ula, zanin chu riak hrâm mai teh u, naktûkah muangmarin in chho zâwk mai dâwn nia," a lo ti ve bawk a.

Ka room-ah chuan pasal ka neih tâk hnua a vawi khat nân malpui pahnih chauha mu lovin malpui pali nèn ka  mu ve dâwn ta. Mut hmain a rualin kan inbual dùn zawk a, nupa kan nih tawh avàngin ka zak bîk lo, kan inbual chhûng chuan țawngkam tawi tê tê hian min fiam zauh zauh a, thlum zet zet hian min fak pah bawk a, ka nui sâng reng ringawt mai.

"Zanin chu dìm têin ka duat hlak ang che aw."

Hmangaihna kan chen lohna a rei ve deuh tawh a, a chhan chu naute insiam chhoh hun lai tak, fîmkhur ngaih hun lai a ni tih a hria a, a insûm thei hi ka tia, ka fak viau bawk a ni. Mipa dang hi amah ang hi an ni ve ang em tih ka ngaihtuah phah hial a ni, min ngaihtuah êm êm a, ka khawngaih hial zâwk a ni. 'Dìm tak leh fîmkhur taka chêt chuan a hlauhawm loh' ka han tih châng pawh hian ' Ka insûm mai ang' a ti tlat țhin; mahse, zanin chu a insûm zo ta lo bîk lo a ni ang e.

Dim tak leh duat taka hmangaihna min chenpui hnuah chuan,"Hmâna i pate zin hlàna ka lo riah lai kha ka ngaihtuah chhuak zawk mai," a ti ta sup a, kei chuan," Khatih lai khân kan la inngaizâwng lo tiraw?" ka lo ti ve a, a âwmah chuan ka lu ka nghat a, ka bei tlân a.

"Kei chuan ka ngaizâwng daih tawh che," a lo ti vat a, chutah, chek hluk pah hian," Ka lo insùm theihzia kha, a mak zâwk ngawt mai! Nula hmel țha êm êm mai nèn in pakhatah kan han riak dùn a, chêt ka tum miah lo thei a nia, ka va thei tak! Mahse, i hun tawn khân a zir lo ve êm bawk a, ka ngam loh phah ve bawk a ni," a ti leh charh charh a.

"Ka bulah muin min kuah la, min thlamuan la ka lo ti khawp che a," ka tih chuan," I rilru kha lo hre thei ila," a ti sup a, ka hnung chu a chûl hoh hoh a.

A tûkah chuan tûkțhuan ei khamah kan inah chuan kan chho ve ta a, Hminga'n car a khalh a, ka pa nèn a hnungah kan chuang a, ka nuin ei tùr leh chawhmeh min ken chhohtîr nual bawk a, kan bâwr ve khawp mai.

Inah lûtin tukverh kan han hawng dar zung zung a, in pawh a lo bàl hran lo, ni a hmu țha bawk a, a rim pawh a tui lo hran lo ve. Kan thuamhnawte kan dah fel hnu chuan Hminga chuan,"Hna thawkin ka va chhuak lawk mai ang aw, ka chàwl rei tawh si a, a inthlahrunawm ve tawh êm mai, ka kal hlànin hrehawm i lo ti ang em?" a ti sar sar a, kei chuan," Va kal rawh, ka pa a awm alawm, kan khua a lo har lo ang chu maw?" nui deuh chung hian ka ti a, min en vang vangin min han fâwp zauh a,"Lo che vak suh aw, ka rawn haw hunah rawng pawh ka rawn bâwl ang," a ti leh a, ka kut chu a hmer vang vang bawk a. 

Ka pa nèn chuan inah lo awmin mutnate ka lo phah țha a, ani erawh chuan newspaper hlui deuh deuh tawh chu a lo bih kual mai mai a, ka pa awm chhûng hian hun a khawhral nân TV lian țha ve tâwk tak lei ila a țha ang, newspaper hlui mai mai pawh a bih peih a nia, Hminga lo haw hunah sawipui vat teh ang, a khua a har loh nân pawh a țha hrim hrim.

A tûkah chuan TV chu leiin tlai lamah kan han tinung nghâl a, kan TV lei chu a lian țha ve bawk a, milem lang pawh a hmuhnawm tham ve reng mai. Ka pa chu a lãwm khawp mai a, a thawhsan ta mang lo. Wrestling chu hmuhnawm hi a'n ti khawp mai a, a lo țang ve bawk sia, Hminga nèn chuan kan inen a, kan nui dùn reng mai.

Martha-ite chhûng, Julian-a leh Ațana pawh an rawn lang hma khawp mai. Min fiam a, min sawisa a, Hminga hna thawha a chhuah hlàn a ni bawk sia, Ațana phei chuan ka pa hriat phâk loh tùr si hian," In chî chu in lo up rei dùn tawh bawk a, a chang țha hle a ni, a țiak ta vat rêng a," a ti zuk zuk a, huat theih ni bawk si lo, rum deuh deuhin ka melh ringawt, a chimawm ve a nia, nupui a neih hnu hian a chimawm ta êm a ni.

Ka thil ei theih loh kha a reh țan a, a hnuah chuan ka awm dàn chu a inletling thawk ta mai, ei tùr ka châk huam huam a, thei thûr ngawr ngawr kha chu ka ei peih ta mang hauh lo, thil thlum leh thûr inpawlh a nih loh chuan thlum tawp ang chi ka châk nasa zual a, thil kha deuh leh thûr deuh a nih loh phawt chuan ka hmawm hmiah hmiah thei vek mai. Thlum lam chu ka ei tam duh vak lo va, ka insûm ve deuh a ni, a chhan chu blood sugar ka neih phah ang tih ka hlau a ni.

Chutia ei ka han thei ta chu ka taksa pawh chuan a lo hre rang khawp mai a, ka vun dâng deuh del tawh chu tisen rawn awmin ka hmai pawh a rawn sen chho ve leh ta a, ka vunin a lo ngeih bawk nèn, ka duh aiin ka mûm dâwn tlat. Hminga lah chuan," I duhawm telh telh mai ka ti," a ti ziah a, a chhuah apiang ei tùr min rawn hawn ziah a, Apple phei chu ka nghei lo hrim hrim. Ka nu leh pain min rawn pêk chhoh loh pawhin Hminga'n a lei ziah a, chaw ei khama kan pathuma ei tùr hian ka siam ziah țhin.

Ka dul pawh a hriat chho ta viau a, inthup chu tum lêm lo mah ila kawr lian deuh hâk ka țan a, Hminga chuan a hna thawk chhuah dâwn leh a lo haw apiangin ka dul chu hlîmin a chùl hoh hoh loh leh a fâwp ziah a, a be ziah bawk, kei pawh dàrthlalanga inena kawr hlîmin ka chûl hoh hoh fo a; mahse, ka pa hmuh lai erawh chuan ka tilang ngai lo thung. 

"Mipa nge hmeichhia ni se i duh?" tiin zan khat chu ka zâwt chhin a, ani chuan chûl hoh hoh pah chuan," Mipa leh hmeichhia," a lo ti sup thung a.

"Hmm, phìr i duh a ni maw?" ka tih chuan," A enga pawh lo piang se ka duh vek mai, kan fa a nih phawt chuan ka hmangaih dâwn nasa mai si a, tunah pawh hian ka hmangaih êm êm tawh a ni," a ti sauh sauh a.

"A hmingah eng nge kan phuah ang? Lo ngaihtuah lâwk la?" ka ti leh a, a ngawi vung vung a, chutah,"Mipa a nih chuan 'Duata', hmeichhia a nih chuan 'Duati' a ni mai," a rawn ti chhuak ta sup a, ka lo nui hak a.

"Chutiang ringawt te chu a, hming pângngai tak an neih a ngai alawm," ka lo ti ve thung a, ani chuan,"An hmingah chu eng pawh chu lo sa ta ila, ka tân chuan hmeichhia a nih chuan' Lal fanu' a ni ang a, mipa a nih chuan 'Lal fapa' a ni leh mai, ka duat dâwn lutuk," a lo ti leh a, hming tak tak pawh chu kan sawi chhuak ta chuang lo a nih ber chu.

Zan khat chu Martha-ite chhûng an rawn lêng a, car thar an nei a, an rawn làwm pah a lo ni a, lawmna cake pawh anmahniin an rawn intum thlap mai a, an ngaihtuah chikim khawp mai, car thar chu kan zuk ensak ve nghe nghe a, a mawiin a țha khawp mai, hlim pawh kan hlim tlâng khawp e.

"Naute thar kan neih hunah phei chuan cake lian tâwk kan siam ang a, kan ri hut hut ang," Martha-i chuan ati ham ham a, Harriet-i chuan cake chu a ei țân țân reng a, a pa chuan han chhuh tum țhin mah se a ngèn leh zêl tho si a, Martha-i chuan," A, a tleina a nih chuan lo ei ve mai mai teh se, eng êm a ti bîk nâng," a ti mai a, Sawmkima pawh chuan," A pumin a zawh loh ka'n hlauhpui deuh maw le, nu berin i tih tlat te chuan ei zo vek mai teh se," nui sûng hian a ti a.

An haw dâwn chuan Car chu țha a tihzia leh mawi a tihzia chu Hminga chuan a hrilh nawn leh a, anni pawh chu an lawm hmel viau mai. An tlan liam hnu chuan step-ah chuan chhoin," An lawmpuiawm khawp mai, an mamawh ve bawk a, a țha ka tihpui khawp mai," Hminga chuan a ti dap dap a.

"Nei ve dâwn ta ila eng ang nge i duh ang?" tiin ka zâwt pah zaih a, tunah hian bike kan kawl mêk a, Hminga hna thawk pawh a thleng zung zung ve thei ta a, a hmang țangkai khawp e.

"Bolero hi țha ka ti, a chuan tam theih deuh a, chuan pawh a nuam ka ti," a tih chuan," Bus-ah hian a chuan tam theih zâwk i ti lo maw?" ka lo ti zauh a, ka bianga rawn piaiin," Hnial hrâtthlâk!" a ti sup a.

Zàn mutnaah chuan ka pa a muthilh tawh avàngin kan țawng a rawn hre ve tawh dâwn chuang lo tih hriain,"I nu chanchin hi i la sawi ngai miah si lo va, ka zâwt ngai lo bawk che; mahse, zanin chu ka ngaihtuah chhuak tlat a nih chu. A la dam em? I hria em?" tiin ka zâwt chhin ta a.

A ngawi deuh reng a, sawi a duh lo tia ka pa sawi kha hre chhuak lehin," A pawi chuang lo, ka zâwt mai mai che a nih kha, i sawi duh lo a nih chuan pawi ka ti," ka ti sap a, ani chuan," Nupa inkârah zêp neih loh tùr," a ti sup a, chutah, sawi zawm lehin," A la dam e," a ti leh sup a.

"A ni maw? A awmna i hria elo?" ka tih leh chuan ban deuh charh hian," Hre chiah lo," a lo ti leh sup a, a sawi dànah chuan han zawh zawm leh pawh chu huphurhawm tak a ni; mahse, ka hre châk alawm, a sawi duh laia zawh chhuah ka duh.

"Aizawlah hian a awm ve em?" dîlchhût tak hian ka ti leh a.

"Umm..."

*HLIM TAKA AWM I DUH EM? CHUTI A NIH CHUAN MI DANG HNÊN AȚANGIN THIL BEISEI NEI SUH*