☆OKHEE☆ - 32 By Dingdi Pachuau

 ☆OKHEE☆ - 32 By Dingdi Pachuau

A lo hmu reng tawh te hi a ni zâwk mial lo maw? An chhûngkuain an mamawh êm êm laia a chhuahsan daih avàng khân a huat chu ka ring khawp mai a, tunahte hian a la haw reng ang em? A nu amah hringtunu dik tak a ni a, hun a rei ve tawh bawk nèn, a haw tawh kher bîk nâng. Zawh chhuah kher ngai lo hian min hrilh ve mai se, a rilru pawh a thâwl ve deuh huai ang a... mahse, chutiang ngaihtuahna chu ka paih bo leh rang khawp mai,  hmeichhia a ni lo va, han titi bawrh bawrha a rilrua a ngaihtuahte han sawi chhuak bawrh bawrh chi a ni lo  tih ka hrechiang ve tâwk tawh!

"A nih, ka pa hian Aizawlah a awm tih a hre ve em?" ka ti leh sar sar a, ani chuan," Ka hre lo le, sawipui ka duh lêm lo va," a lo ti leh mai a.

Ka zâwt chhunzawm tawh lo. Zâwt zêl ila chuan min hrilh ve zêl chu ka ring  tho a; mahse, ka pasal mah ni se min hrilh hun a la ti lêm lo niah ka ngai ta mai, chutiang chuan ngai ila a țha ber, rilru a dam.

Ka pa nèn chuan ni tin inah chuan kan awm a, Hminga'n chhuah a phal vak bawk si lo va, kan inkhung tlawk tlawk mai. Ka pain TV a en peih hlauh chu a tihzia hi ka tia, chuti chu ni lo se chuan a khua a har ngawt ang chu. Kei pawh țhut mai mai ai tiin chhùn lama kan ei tùr ka siam a, a nih loh chuan phone ka khawih a, naute thuamhnaw chi hrang hrang ka en kual țhìn. An cute thei si a, ka awt thei hlawm teh a nia, chah tùr pawh ka hual nual tawh nghe nghe.

Ka lo tum lâwk tawh angin ka pa chu ni khat ka bazàrpui a, a duh apiang leisak ka tum teh rêng nèn, mamawh a neih loh thu min hrilh mai a, kei chuan inthlahrung miah lo tùrin ka hrilh thung a, chuti chung pawh chuan," Bawihi, mamawh ka nei lo ka tih chu, nangniin naute in nei mai dãwn a, mamawh in nei thuai zâwk dâwn a ni," a ti a, kei chuan," Ka pa, lo pian hunah chuan a mamawh chu a nei ngei ang a, a tlachham hauh lo vang, heta i awm chhûng ngei hian eng emaw tak leisak che ka duh a, i fanu ka nihna angin i mamawh chu ka bulah hian sawi ngam la ka duh a ni," ka ti ve thung a. A tàwpah chuan kamiz leh kekawr, inkhâwmnaa a hâk tùr kan lei ta țâwk a, a rem ti lo chung pheikhawk ka'n leisak leh hrâm bawk a.

A haw phei hmain ka pain chawhlui a buatsaih leh a, kan chhûngkuain kan zuk ei a, ka pa rawn hruai tùrin Sêna a rawn phei hman chiah tawh bawk a, kan hlim tlâng dar dar viau mai.

Chaw ei hmain inkhâwmna angreng deuhin hun tawi tê ka pain a hmang a, dinga thu sawiin,"Hei, kan lo upa chhovin kan chak lo chho ve ta viau mai a, mihring dam hun chhûng tùra Pathianin a lo sawi lâwk pawh kan lo hnaih ve ta, hetiang kum kan han dam thleng thei te hi a malsàwmna kan dawn liau liau a ni a, dam miau loh chuan a upat theih miah loh a nia. Hna lamah hian min chhâwk thei tùr leh rintlâk ka mamawh ve tawh a, chutih lai tak chuan fapa fel tak leh rintlâk êm êm Pathianin min pe hlauh mai a, ani bâk hi keini chuan innghahna kan nei lo, a kutah hian engkim nghah vek tawh mai hi ka duh a, inngaihtuah nân hun a duh deuh a nih pawhin lo inngaihtuah ta mai se, dik tak chuan chawlh hi ka châk ve tawh a ni," a ti dap dap a, thil hre chhuakin Hminga chu ka melh phei zawk a, ani erawh chu a lo maimichhîng daih a, a kut erawh a lo hûm ruh viau thung.

A țawngţai zawhah chaw ei chu kan siam a, chaw ei lai chuan ka pa vêk chuan,"Hei, Pathian malsàwmna dawngin naute hmel pawh kan hmu thuai dâwn a, in tân kea kal reng emaw bike-a inphurh reng emaw pawh thil tihchi a ni dâwn miah lo, lìrthei ke pali nei lam in ngaihtuah a ngai dâwn a ni. Tuna kan kawl lai pawh hi in kawl thei tho ang a; mahse, eng emaw chânga han chhuah ve duh chânga ken chhuahah hian a țangkai riau a, in duh zâwng chu in lo sawi ve ang a, in la thuai dâwn nia," a ti leh dap dap a. Ka nu chuan," Ni e, pawimawhah hi chuan inthlahrun tùr a ni lo, thil țangkai hi chu lei hmiah mai tùr a nia, nakin lawkah in khaw lamahte pawh haw phei in la duh ang a, he lam nèn kàr tawn deuh reng in ngaih hmel si a, motor chak țha leh a chhûnga len tam theih deuhna lam ka lo suangtuahpui che u a," a lo ti ve a.

Hminga duhthusàm leina hun tùr dik tak niin ka hria, Bolero kha a duh a nih kha, tunah tak pawh hian a ngaihtuah rauh rauh ka ring tlat. Ka melh dêk dêk a; mahse, a thil ei chauh chu a ngaihtuah ni berin a lang, han țawng tum hmel pawh a pu lo.

"Nia, a hmanhmawhthlâk êm êm chuang lo va, kan lo sawi ve dâwn nia, pa ber hi in chhûngah hi chuan an thû ber a," nui chung hian ka lo ti a, Sêna chu a lo nui vur vur a, ka'n melh rum leh rih bawk a.

Kan haw chho lam pawh chu Hminga duh lêm lo chung chu motor min ken chhohtîr a, kan thlen chuan,"Exer la paha kea kal kha ka duh asin le," ka han ti zauh pek a, Sêna chuan," Kan thleng hma zâwk alawm, thlan tla hauh lovin kan thleng thei a," a lo ti thung a. 

Mutnaah chuan a ngawi vang vang reng a, a kut pakhat chu lukhamin in chung lam hawiin a mu meng kar mai a, a âwma bei pah chuan,"I lung a awi vak nange?" ka ti sap a, a kâwngah ka kuah pah zat bawk a.

"I pa thil sawi kha, ka pawm thei lo ang," a ti chhuak ta sup a.

"Eng kha maw?" ka tih chuan,"Ka kuta engkim nghah chungchâng kha," a lo ti boh a, sawi zawm lehin," Khami duh vànga nei che ka ni lo va, ka pawm a nih hlauh chuan i thil sawi engkim kha ka thlentîr dik vek dâwn tihna asin," a ti leh sup sup a.

"Khami vànga min nei i ni lo tih ka hre chiang tawh tho alawm," ka lo ti ve thung a, ani erawh chuan," Ni angin a ngaih theih tlat dâwn asin, i pa hi ka zah a, a thil sawi pawh kha zahawm ka ti, hnial pawh ka hreh tak zet; mahse, he thil kher hi chu hnial ka duh, ka kuta nghat lovin i kutah nghat vek zâwk rawh se, tuna ka dinhmunah hian ka lung awiin nuam pawh ka ti ber a ni," a ti leh nuap nuap a.

"Mahse...ka pa a khawngaihthlâk ve alawm, amah pawhin chawlh ve tawh a duh thu a sawi kha, bâkah, kei chu hei hna thawk thei pawh ka nih dáwn loh hi, nang lahin i phal lo bur bawk si, nakinah fa ka neih hunah phei chuan..." ka lo ti leh sap sap a.

A thaw hawk a,"Ni leh bawk si, rilru a tibuai ve dat a ni. Ka khawngaih reng, a hah ve bawk si a," a ti leh a, a rilruin a lo ngaihtuah ve nasa viau a nih ka ring. A hnu deuhah chuan," Ka thil sawi kha chu theihnghilh vek tawh rawh aw, a dik lo tih kan hre ve ve tawh a, awmzia pakhat mah a nei tawh lo. Ngun takin ngaihtuahna sêng la, ka pa duhna che kha ngaihtuahin thu tlûkna i siam dâwn nia, chumi hma chuan, kei chuan he thil hi chonaa ngaiin pawm la ka duh a ni; mahse, i thu thu a ni, ka ti lui miah lo che a nia, i thu tlûkna chu eng pawh ni se, ka zah ang," ka ti ve ta a.

Sêna leh ka pa haw tùr chu kan nupain kan thlah a, Sêna chu ka silai kha ka hawn pheitîr bawk a, a mu tam tâwk nèn, a hlim khawp mai a, a nui vur vur reng mai. 

Kan nupa chuan kan awm ta rek rek a, ka pa awm lo chuan khua a tihar ve ruih mai, Hminga hnaah a kal ziah a, keimah chauhin in ka nghâk rek rek a, TV ka en peih der si lo. Ka chhûngte ka biak loh leh youtube lama ei siam dàn ka en a, ka siam ve bawk a. Ţhian ngaina chi nih chuan, mahni chauha awm chu a khawharthlâk ngawih ngawih, ka pa lo țhu ve mai mai pawh khân khawhar chu a lo hnèm hle a ni tih ka hre chhuak chiang kher mai. Chuvàng tak chuan, phakar ve deuh chhuahin Hminga hnênah chuan hna thawh ve ka dîl fiam ta ringawt a," Hahthlâkin ka thawk lo ang, i hmel hmu pha rengin ka awm thei ang a, bâkah, nang pawhin i hahdam phah ve hlek thei ang a," ka ti a. 

Zanriah kîl laiin a ni ka sawi chhuah ni, min en vung vung ringawt a, a phal lo mai ang tih hlauvin," Ka ti tak tak! Hahin ka thawk lo ang, tlêma ka lo chhâwk ve theih che ka ring a, bâkah, naute hi a khua a har ve țhin a," ka ti leh a, a nui ta hawk a.

"Naute chhuanlamah hmang kher lo la," nui deuh suk chunga a tih tâkah 

chuan phûr deuh sârh hian," A ni alawm, a pa a ngaih thu min hrilh ziah bâkah a pa hna thawhna hmun pawh a hmuh châk thu a sawi bawk a," ka lo ti leh a, meng deuh sawr sawr chunga min rawn enin," A nu hian min ngai a ni zâwk lo maw?" a tih sup chuan," Dik leh chiah tho mai, kan pahnihin kan ngai che a," nui sâng chung chuan ka lo ti vat a.

"I lo kal ve chuan hna ka thawk sâwt thei nâng, i bula awm reng ka duh dâwn a, nangmah si chêtin."

Tunah hi chuan zàn lamah pawh a insûm viau tawh bîk lo; mahse, duat leh dìm thei ang berin hmangaihna min chenpui thung a, a fîmkhur êm ëm reng tho.

"I pa thil sawi kha, ka ngaihtuahna ka sèn viau hnuah hetiang hian thu tlûkna ka siam a, engkim hi i hminga awmin i kutah dah ni se, keiin a thawh lam ka tum thung ang a," tiin ka dul chu a chûl hoh hoh a, ka dul puar ve ãk tawh chùl hi nuam a ti țhìn a, a sawi dàn chuan 'A sexy' a ni àwm e, ka âwmbâwr lian sawt pawh hi sexy a ti.

"Thû ber i nia, ka sawisèlsak dâwn lo che, ka duh chu i hre vek tho a," ka lo ti thung a, a beng chu ka hmet niap niap a, a nêm reuh sia, khawih nuam ka ti țhin rêng a ni. 

"A inang deuh reng alawm, nupa chu pumkhat kan ni tho a," a tih leh chuan," Nia, i tâ chu ka tâ, eng mah buaina a awm lo," ka ti ve leh a. A hminga sumdàwnna awm chu a duh lo a ni mai a, ka hmingin awm mah se engkim a kut vek a ni dâwn tho tho a, a rilru damna a nih chuan a țha vek e, ka engkim hi a tã vek a ni tho alawm.

A tûk ațangin a bulah hna thawk ve tùr chuan ka kal ta a, thawhpui hluite chuan min lo be ve sap sap a, kan inneihnaah khân an lo kal thei vek si lo va, lawmpuina thu min hlàn nawn leh a nih ber chu, nuam ka ti lehpek kher mai. 

Ka pa pawh a rawn kal ve zawk a; mahse, a awm rei lo. Ka pa room-ah chuan kan insawn lût a, a chhan chu eng emaw chânga fawh zeuh zeuhte kha ka duh dâwn a, ka pasal ni tawh mah se thawhpuite hmuh laia han muah kha chu ka hreh ru ve tho si a.

A sawi ang tak takin kan awm! Min si chêtin a awm a, ka chêt deuh hlek apiangin min rawn nghèng țha leh a, chu chu duh tâwk lovin min han muah leh kher bawk a, chutiang chuan kan nilêng chu a ni ber e.

Motor thar kan neih hma chu ni tin kein kan kal ta mai a, ka tân lah exer țha tak a ni a, kein ka kal khât ve bawk nèn, a vawi khatnaah chuan ka rawl ve deuh a, ka hah angreng viau bawk; mahse, ka sawi lang duh miah lo thung. Kâr khat lai kan kal hnu chuan ka zia viau tawh a, hah pawh ka hah tawh lo, khawlaia kal chu nuam ka ti pah ve bawk a, ani ka bulah a kal ve bawk nèn, nuam ka ti. Hmel hriat hmuh fuh châng phei chuan nuam ka ti zual, mahni chauh chuan la ni ila chuan nuam ka tih vak ka ring lo. 'Pasal nei tawh rawh' tih emaw 'I senior telh telh a, i lang  young tawlh tawlh thung a', 'Pasal kha i nei tawh emaw ka ti a' tih emaw kha ka hre ve nual àwm si a.

Hminga duhthusàm Bolero Neo kan lâk ve tâk hnuah erawh chuan ke chuan kan kal ta lo, kan in luah neitute'n garage an nei zau hlauh a, kan dah ve thei a, a tihzia khawp mai. Vawi khat chu ka khalh ve chhin a, a hnu lamah erawh chuan amahin a khalh ta char char. Naute tân a pawi theih a hlauh avàng chuan khalh a phal lo, bâkah, hmeichhe khalha mipa han chuan vûk vûk vël kha a duh hran lo.

"A hma pawhin ka khalhah i chuan reng kha,"nui chunga ka tih chuan," Kha pawh kha, i khalh a nih vàng chauh a nih kha, nang chu ka ring che alawm, hmeichhia ka rin awm chhun i nih ka ring, i bike khalh ka hmuh ațang che khân ka ring ve tawp che a ni," a lo ti duah a, min fakna a nih avàng chuan hlim zet hian ka nui var var a.

Ka rai tih kan hriat ațang khân chawlhkâr tin, Thawhțanni apiang hian ka dul len chhoh dàn hriat kan duh avàngin ka dul hlîmin thla min lâksak ziah a, a hlimawm dangdai ve ka ti a, nuam ka ti bawk. Naute thuamhnaw tùr lah hi kei ai hian a ngaihsak a, kan en dùn a, a chah a, ka nu lah chuti bawk, kan ngah tawh a nia. Hmeichhia nge ni ang mipa tih kan hriat loh avàng erawh chuan a têt lai tak taka a thuamhnaw tùr chauh kan lei thung, a puan tùr pawh kan lei ngah vek tawh.

Kan induh tawn êm avàng hian a niang chu, kan inkârah inthîkna tùr hi a vâng a, hmeichhe dang a melh ngai si lo va, keiin mipa dang ka melh bawk si lo, buaina tùr hi a vâng thlâwt a, kan pahnih hian kan hlim dùnin tu dang mah kan ngai mawlh lo a ni ber mai. 

Ni khat chu Inrinni a ni a, kan in luah neitupa niin ka hria, a nih loh pawhin a fapa tal a niang, in luah man kan pêkin in chungah khân ka hmu ve tawh tlat a ni, chu pa chu a rawn lût ve tlat a, a hming pawh ka lo la hre chuang lo, Hminga dàwra a kal lawk hlàn a ni a, ni dangah a rawn lût ngai si lo nèn, ţha takin ka lo chhàwn tho a

"In pa a awm nange a?" tiin ka bulah chuan a rawn vei thuak thuak a, kei chuan," Dàwrah khuan a kal lawk a nih kha," ka ti ve mai a, a hmel chu hmeichhiate'n 'tenawm' kan tih ang chi hi a nih avàng chuan ka nêl hran lo khawp mai, bâkah, Hminga awm loh hlàn a ni a, ka bul hnaia a rawn vei thuak thuak chu ka duh lêm lo.

"In reh thei hle mai, in chung lamah te hian in hman châng hi chuan rawn lêng chho ve ţhin ula, hetiang chuan kan innêl thei nâng," a rawn ti leh a, ka nui deuh ringawt a," Nia, hun hi kan neih loh bâkah kan hman lo ve thei lutuk a," tiin ka chhâng a.

Min en vung vung pah chuan,"In inneihna a la rei lo viau si a, i puar hma hle mai ka ti, nupa nun chenna hun pawh in nei rei thei vak dâwn lo chu a nih kha; mahse, hmeichhia chu in han puar deuh ãk lai tak hian in îtawm, in pa pawh hian a ît thei viau lo che maw? A thlîr vung vung țhin chein ka ring tlat," nui deuh sûng chunga a tih chuan ka phu deuh zawk a, amah tenna chuan ka khat nghâl bawk. Ka nui hmêl pawh a tàwp chiang kher ang le, a rûk takin ka hlau bawk. Chutiang țawngkam ka bula chhâk chhuak tùr chuan kan innêl tâwk ka ti lo va, ka țhian țha tak leh ka nèl êm êm Julian-a emaw Ațana emaw pawhin chutiang țawngkam chuan min han țawng khum se chuan ka duh vak chuang kher lo ang, ka melh rum khawp ang.

Vànneihthlâk takin kan ngawih reng lai chuan Hminga a rawn lût a, a rawn hmuh chuan," E, Pu Rova teh tlat chu," a rawn ti nghâl a, a thil lei chu dawhkànah chuan a dah nghâl bawk a, ka lo la vat a, room-ah ka luhpui ta daih a, a hmel hmu theia awm pawh kha ka duh lo.

Rei awm lovin a chhuak zui ve leh mai bawk a, room-a a rawn luh chuan," I lût daih a," a rawn ti sup a, ka hmel a hmuh chuan," Eng nge ni ta?"tiin min rawn hnaih nghâl kuar a.

"Eng mah a ni lo ve," tiin ka nuih lui sak a, hrilh kher a țûl ka ti lêm lo va; mahse, kha pa kha chu hmuh tawh loh hrâm ka duh thung. A hmel pawh ten tawh nâklaiin a țawngkam zawng zawngte kha, tenawm hlãwm a ni tawp mai.

"Engti tihin nge Pu Rova kha a rawn luh ve nulh a?" a tih leh chuan," Ka hre lo," ka lo ti leh mai a, ka kuta chelh pah chuan," Eng nge in lo sawi a?" tiin dîlchhût zet hian min zâwt leh a.

"Kha pa kha ka ten!"

Mit khap hauh lo chuan ngawi rengin min en reng phawt a, kei erawh chuan en rei ve duh lovin ka hawi sawn a, a țawngkam ka ngaihtuah lêt a, ka thin a rim avàng chuan ka hmui chu ka pet fan fan a.

"Engtin nge a tih che?" A aw chhuak chu a danglam nghâl daih. Dam dap tho mah se, a hlauhawm ru ngawih ngawih thung.

"Engtin mah min ti lo; mahse, ka ngaina lo va, ka duh lo va, hmuh leh pawh ka duh tawh lo," ka ti sap a, a țawngkam kha sawi chhuak ila chuan a thin a rim ve ngeiin ka ring bawk, a tenawm êm alawm.

"Min han hrilh teh!"

A kut chu vawnsak pahin,"Engtin mah min ti lo ka tih chu," tiin a mitah chuan chiang zet hian ka en a, kan inmelh rân a, chutah," Nupa kan ni a, kan inkârah thu zêp a awm lo tùr ni khân ka hria a," a rawn ti ta sup a.

A thil sawi chu dik ka ti ve bawk si a," Engtin mah min ti lo tak tak! Mahse, a țawngkam kha ka ngei a, ka ten bawk! Min fiam mai mai a nih pawhin khatianga infiam kha chu ka duh lo," tiin ka chhâng ta nge nge a, zêp ka nei tawh bîk lo ve.

"A fiam dàn che chu?" 

Ani hi chuan engkim hi a chìn chhuakin a hre kêlh duh bîk a, zawh chhuah ka awl bîk viau laiin ani erawh zawh chhuah a har si. Kan va inang lo tak!

A țawng dàn chu ka hrilh ta vek a, a thin a rim tih ka hre reng mai. Mipa tân pawh a țawng dàn kha a lo ngeiawmin a thinrimthlâk ve tho a lo nih chiah kha.

Thla khat ral hmain kan in luah chu kan sawn ta daih. Mi chuan ho an ti viau maithei a; mahse, Hminga tân chuan a ho miah lo a lo ni, chutiangin kei pawhin ho ka ti chuang lo. Insawn rum rum erawh ka lo ngaihtuah pha miah lo thung.

"Kei pawhin a hmain a thlîr vung vung lai che ka hmu fuh tawh a ni. Bâkah, a chanchin ka zâwt chiang a, hmeichhe lama lo hmingchhe tawh a ni a, i tân a him ka ti ta lo a ni. Hna thawk lova ina awm reng țhìn a ni a, hun remchãng pawh a lo melh ru reng thei, chuvàng chuan inthiar fihlìm thuai kha a țha," a tihchuan kan insawn chhuah rum rum chhan chu ka hre ve ta chiah a ni, ka hlau leh hnuhnawh khawp mai.

Doctor-ah kan inentîr ve zat zat a, naute pawh a țha, ei tùr ka ei ţha a, ka hlim a, exer pawh ka theih ang tâwkin in chhûngah ka la ve nasa a, Hminga lahin min pui țha bawk nèn, ka hrisêl viau bawk. Ka puar ve nasa tawh a, dârthlalanga a sîr zâwnga ka han inthlêk phei hi chuan pian nalh lo hi ka inti khawp mai a, 'Hei ai hian ka la puar belh dâwn chu a ni àwm si a' tiin ka ngaihtuah a, ka neih dâwn hnaiah phei chuan ka chhe pèr pùr ngawt ang chu.

Sunday-ah intiam rual ang hrimin Martha-ite chhûng leh Julian-ate chhûng an rawn lêng a, kan hlim tlâng dar dar viau a ni. Julian-ate chu rei tak an lêng thei lo va, Martha-ite erawhin zanriah an ei dâwn thung a, Harriet-i pawh a la țawng ring khawp mai.

"I la puar belh dâwn sia, ka khawngaih reuh che! Ka rai lai khân Sawmkima hian ka dul ka hlìm lan châng khân chhia hi min ti thei khawp mai a, ka rai kha lãwm viau mah se ka pian mawlh kha chhia hi a ti thei a nia aw," a ti sar sar a.

"Kei chu chhia min ti ve ngai miah lo, sexy min ti zâwk tlat a nih chu," tiin ka lo chhâng ve vat a, ani chuan,"I va vànnei ve! Nia, khatianga ti kha an awm ve tlat; mahse, kan pa hi chu a ni ve lo, ka khawngaih ţhìn zâwk, min îtna pawh kha a nei lo," zêp nei map lo chuan a rawn ti leh a, Alu kâwr chu a tifai pah malh malh a.

"A nih tak chu a," ka ti mai a, a la duh tâwk hauh lo,"A insûm thei bawk, Harriet-i ka neih hma thla hnih chhûng leh ka neih hnu thla thum chhûng ang vêl kha chu sex pawh kan hmang hleinem, mipa insûm thei tak chu a ni," a ti leh barh barh a. Ani hi zawng eng mah hi a zêp lêm lo va, sawi zah pawh a nei hran chuang lo; mahse, a tân mi dang ka ni tlat lo, a unaunu kha ka ni miau mai a.

Ka nu leh pate nèn pawh kan intlawh fo a, ka pa pawh a hrisèlna a țha a, hna ațang erawh chuan a chàwl tawh thung. Hminga chuan engkim a buaipui a, keiin ka pui zauh zauh bawk a, ka rai chu lian ve viau tawh mah se ka inzo a, ka hrisêl bawk a, Hminga remti vak lo chung chu hnaah ka la kalpui ve hrâm hrâm bawk. Ka dul hi a lian ve viau tawh a, doctor-te pawhin nau a lian viau dâwn a nih an ring a, hrisêl tak leh țha taka neih ka duh, hmuh kan châk tawh hlawm si a.

Sênate'n a remchàn apiangin chawhmeh min rawn thawn ve țhin a, a tharlâm thei si a, ka lãwm thei khawp mai. A bîkin Chakai leh Lakhuihthei chu ka duh zual, Chakai chu ka duh êm avàngin Hminga chuan min sawisèlsak lo ni maiin ka hria. 'Nautein chilthlì a ngah duh' an tih pawh chu ka hre reng a; mahse, ka nêp zo chuang lo.

"Tui ti taka chakai i han ei hliam hliam hi chu i hmuhnawm ve ngawt mai!" min ti thlâwt rêng a, ka haw teuh lo! Tui ka ti êm asin, Chakai kher hi chu min khawihpui ve ngai lo, ka share-ah a dah hmiah.

Zîngah Sênate chu biain an thil min lo thawn vàng chuan làwmthu ka han hrilh luam a, kan inbiak lai vêk chuan ka pa ka han be zui bawk a, a țhat leh țhat lohte zâwtin mamawh a neih leh neih lohte ka han zâwt pah a, lo dam țha zêl turin ka han chah zui bawk a.

"Vawiin chu lo kal tawh lo mai la, inah lo awm mai mai ta che, i dul kha a rit tawh ang, ka bula lo awm tùr chuan duh viau che mah ila," a ti a, kei chuan," Ka hah hleinem, ka țha reng," ka ti tlat a, ka kal lui leh hrãm a.

Chhùnah ni dang ang lo takin pàwnah ka chhuak a, boruak thengthaw dawng tùrin ka chhuak a ni. Thil thlum tui tak rim chuan ka hnâr verhin ei ka châk ta tlat mai a, kawng lehlam hla deuha chhang urna aţanga rim chu rawn chhuak a ni tih ka hre reng, chutah, office hnuaia dàwrah chuan zu chhukin thil thlum deuh ber nia ka ngaih Jelebi chu ka zu lei ta ngawt a.

Dawr ațanga ka chhuak chiah chu tlangvâl pakhat, chak deuha rawn tlãn hian min rawn su pawp mai a, min rawn su na deuh bawk nèn, ka tlu dawt mai, ka tlûk dàn lah chu ka dul sawh zâwng takin a la ni zui.

*ȚHIAN TAM TAK NEIH HI THIL MAK A NI HRAN LO, ȚHIAN DANG TAM TAKTE'N AN HAWISAN LAI CHEA I LAMA ȚANG TLAT, HAWISAN VE MIAH LO TÙR CHE ȚHIAN PAKHAT CHAUH PAWH I SIAM THEIH CHUAN, CHU CHU THIL MAK CHU A NI ZÂWK*