☆OKHEE☆ - 33 By Dingdi Pachuau

 ☆OKHEE☆ - 33 By Dingdi Pachuau

After 3 months

~~~~~~~~~~~~

Room-a a rawn lût chu ka lo en reng a,  min rawn nuih suk a, kei pawh chuan za lo zet hian ka lo nuih lêt ve a, a hming tak tak chauhin a ni ka nuih ni. "Haw i duh tak zet tawh maw?" tiin ka khumah chuan a rawn țhu a, ka kut chu muangchâng hian a rawn chelh bawk a, a aw zàwi dam raih chuan min tidam sawng sawngin ka hria.

"Um..." Ka pasal chu ka en reng a, a mit khur tla deuh dûk leh a mit hnuai val phei kalh ațang chuan mut a hmu țha lo tih a hriat bâkah a nun hman dàn tùr chu a hriat thiam theih ruakin ka hria, ka va khawngaih tak!

"I hman tawh chuan kan kal nghâl mai dâwn em niang?" Ka kut chu dìm të hian a chûl hliau hliau a, a hmel ka hmuh lohna a rei ve deuh tawh a, a bula ka han awm leh chiah chuan a lo ngaihawmzia leh ka mamawhzia, ka thlamuanna a nihzia chu ka hre chiang leh ta kuar kuar bawk, engtin nge ka lo hmuh duh miah loh theih ni, a ngaihawm tehlul nèn! Ni tin a bula awma thlahlel êm êm țhintu kha ka ni si a, engin nge min mawlh teh rêng ni!

"Umm..."

Kan kal mai dâwn emaw ka tih lai chuan muangchâng hian min rawn kuah a, kei pawhin ka lo kuah ve vat. A nghâwngah ka hmai thukruin a rim chu ka han hîp vang vang a, a rim chuan amah ka ngaih chu a tizual sauh mai. Perfume a ngaina ve hran lo va; mahse, mi zînga a awm dâwn hi chuan a kawrah perfume ka spray-sak ziah thung. Tuna a rim hi chu perfume rim a ni lo va, shaving gel rim leh inbualna sahbawn rim inchawhpawlh ngei mai a ni, a taksa pawh chu a fai ser sawr ang tih pawh ka hre nghâl mai.

"I rim a tui."

A nui hawk a, a nui ri phei chuan ka țah a tichhuak. A nui ri ka hriatna a rei tawh êm asin, engtin nge a nui ri hre thei lêk lova inkhung bo ka lo duh theih zâwk ni?

"Ka hmangaih che," a lo ti ve thung a, ka mittui a lo hnai leh tawh, amah ka ngaih vàng leh ka hmu leh ta ka hlim êm vàng a ni a, ka kuah theihin a awm leh tawh a, duat takin min kuah leh tawh bawk a, ka hlim a ni.

"Min ngaidam rawh," ka ti sap a, ani erawh chuan min chhâng lovin a hma aia nghet zâwk hian min kuah a, min kuah nghet tak zet a ni. Ani pawh hian min lo ngai ve tak zet tho a lo ni. Ni e, min ngaih kha chu ka ring; mahse, a hun hman kha a harsa êm a ni.

In kan han thleng a, engkim mai chu a lo la dik vek a, an awmna tùr hmun thlapah an lo la awm vek, kan room ka han lût a, hmuh loh erawh ka nei ta, kan naute thuamhnaw tùr kan dahna plastic drawer kha a lo awm tawh lo, a lo dah bo a ni ngei ang.

"Zanin tlai chu i lo haw lawm nân eng nge zanriah hmeh atân i duh ang? I duh apiang ka siam thei a nia," Hminga'n a tih chuan," I siam apiang kha ka ei duh vek, ka ei châk tawh," ka lo ti thung a, ka nuih sak a.

A bulah awmin ka siampui ve a, lo siampui e ti lo chuan naupang ang maiin ka lo tibuai a ni mah ang chu; mahse, a sawisêl hauh lo, sawisèl a hnêkin ei tùr siamna hmanrua chu ka bulah a rawn dah belh sauh sauh a, a flour hman tùr chu a biangah ka tahsak thùl, ani pawh chuan ka lo inhup hma chuan min rawn tât ve hman a, ka țê chùl mai. Chutiang chuan kan infiamin kan inchhaih a, naute ka chhiat tâk hnua ka nuih leh tak takna hmasa ber a ni.

Kan intibàl vek si a, chaw ei hmain tuilumin kan inbual leh rih a, kan inbual lai chuan a sam sei ve deuh hlek tawh, a tleuh fai tawh chu shampoo hnawihsak lehin pial zên zâwnin ka huihsak leh țhin a, kan rei bawk a niang, kan inbual zawh meuh chuan kan tuilum pawh a lum che ché chauh a ni tawh.

Chaw chu kan han ei a, a chawhmeh siam ka han ei leh thei ta chu ka hlim a, ei pawh ka ei tam viau bawk. Hetiang hlîra ka ei leh thei ngat a nih chuan rei lo te hnuah ka thau leh vat mai ang, kan inah kha chuan chaw ka ei ngai miah lo.

Zànah tih tùr awm hek lo le, hma takah ka mutpui a, bâkah, zànah a mu țha ngai lo tih a hmel ațangin a hriat reng mai si a, chu pawh, keimah vàng chauh a ni. Khua a vâwt a; mahse, min kuahin ka ke vawt zet pawh chu a mal lum zet kârah chuan min cheh behsak tlat a, a lum țha si a, nuam tak a ni.

"Ka kuah leh thei tawh che a, zanin chu ka muhil thei ngût pawhin ka ring lo," a tih sup chuan," Muhìl tùrin ka duh thung che alawm, chuan, i kuah theihin ka awm reng tawh ang a, ka kalsan tawh miah lo bawk ang che," ka lo ti ve thung a.

"I tel lova zàn mut kha chu hrehawm ka ti tak zet a ni, ka ngai che a, kuah che ka duh bawk a," a ti leh sup sup a, a țawng chhuah dàn ațang chuan țawngka mai ni lovin a tak takin min ngai tak zet tih ka hre thei, ka lo tirethei hle a lo ni. Kei pawhin ka ngai; mahse, a lakah  khân ka inthlahrungin naute ka chhiat ta kha ka inmawhpuh lo thei lo va, ka inthiam thei lo a nih kha.

Ka âwmah chuan ka pawm bei tlãn a, a lu chhîpah chuan ka fawhsak zauh a, a sam lah chu kan shampoo hman rim a la nam cham cham a, a sam sei ve tawh tak kârah chuan ka kut chu rawlhin na lo tê têin ka țhàmsak neuh neuh bawk  a.

"Mut tum rawh le," ka tih chuan,"Ka mumang a ni ang tih ka hlau!" a lo ti sup a, chutah," Ka țhangharhin ka bulah i lo awm ngai si lo va, chutiang chu a ni leh ang tih ka hlau. Muthilh pawh ka hreh țhìn a ni," a tih leh phei chuan ka rilru a tihnatzia chu, ka mittui pawh a lo hnai leh kuar tawh.

"Ka thiam loh vek a ni; mahse, a thleng tawh lo ang, i bulah ka mu ziah tawh ang a, i lo țhangharh châng pawha i kuah tùrin ka lo awm ziah tawh ang," ka ti ve sap sap a, nghet zet hian ka âwmah chuan ka pawm bet a, heti khawpa min lo ngaia ka dah hi ka inthiam lo va, ka rilru a tina ngawih ngawih a ni.

"I thiam loh a ni lo, sawi tawh lo ang, tunah chuan ka kuah chein i bulah ka mu thei tawh a, hei tluka thlâkhlelh hi ka nei lo."

A mut a chhuak ngang a ni ngei ang, rei lo te hnuah a thâwk dàn a rawn danglam a, a thâwk dan ațang chuan a muhìl ta ngei a ni tih ka hria, ka lãwm ru kher mai. Muhil vang vang se, tui takin muhìl se, thlamuang takin muhìl se ka duh.

Kei ka muhìl thei lo thung. Kan hun hman chhoh dàn chu ka ngaihtuah a, mihringin kan hma hun kan hriat lohzia chu ngaihtuah kai zêlin tûn thla thum kal taa ka hun hman dàn pawh chu ka mitthlaah a rawn lang zut zut a.

Nau kha ka chhiat ta ngei a, khatia nau ka han chhiat kha Hminga thu ka âwih loh vàngah ka inpuh a, a lakah ka inthiam thei lo. Ka rilru a na êm êm a, depression ka neih phah hial bawk. Damdawi in ațanga kan chhuah hnuah kan in pângngaia lêt ka duh avàngin min lêtpui a, ka awm dàn kha ka buai nuai a ni ber ang chu, kan beisei leh kan nghahhlelh êm êm ka nei puitlin si lo leh accident avànga kan chân ta kha ka thiam loh liau liauah ka ngai hmiah a ni, a chhan chu Hminga remti lêm lo chunga hna thawka chhuak țhin kha ka ni si a, ka chhuah avànga chêtsualna thleng ta kha a ni leh bawk si nèn, room-ah inkhung chawtin Hminga hmuh pawh chu ka duh lo va, ka awm chawrh chawrh a ni ber ang chu. Ka țap ka țap a, ka nu leh pain min buaipui nasain ka nu phei chuan min riahpui tawp țhìn, Hminga ka hmuh duh loh miau avàngin min hmu tùra a rawn kal pawhin inthlahrunna leh inthiam lohna avàngin ka hmu duh ngai lo. Mi țawng tam lo chi a ni bawk si a, tuna ka ngaihtuah lêt hian hrehawm a lo ti țhìn tak zet ang tih ka hria, hna thawh a ngai a, ka nu leh pa lakah a inthlahrung pah dâwn bawk si nèn, a rilru a hahin mut chu a hmu lo tawp ang le. 

Damdawi in leh ina ka awm chhûng chuan ka țhiante leh chhûngte, hmun hrang hranga mite'n min rawn ngaihven ém êm reng a, Hminga u U Mami pawh damdawi ina kan awm laiin min kanin a rawn kal vang vang hial a ni; mahse, ka intipachang zo lo lutuk a, ka lo țah khum hrep thung, a hrilhhai ngawtin ka ring. Ina kan haw hnuah Martha-ite chhûngin min rawn ngaihven zual a, Martha-i nèn chuan biak pawh kan inbe thei ber bawk. Ka nuin min hnèmin dam thlapin min zilh reng a, Hminga chu ka pasal a ni a, ka awm dàn chu a fuh chiah loh thu leh inngaihtuah harh hrâm hrâm turin min fuih reng bawk a, ka nau chhiat chu ka thiam loh a nih loh thu sawiin," Naute chu țha taka nei tùr che chuan kan duh vek alawm; mahse, vanduaithlâk takin a puitling ta lo va, thu kan nei tlat si lo va, thil thlengah khân thiam lohna i nei lo va, hun kal tawh chu hun kal tawh a ni, hma lam hun êng zâwka thlìr tum hrâm teh. In dam ang a, naute chu in nei leh mai dâwn a ni, doctor-te pawhin pai leh i harsat an rin loh thu an sawi kha, a êng zâwngin thlìr tum hrâm  la, Halan-a pawh a khawngaihthlâk êm mai," a ti dap dap țhin.

Chutia ka nuin min hrilha min sawipui keuh keuh reng hnuah chuan ka rilru pawh a danglam ve hret hret a, Hminga erawh ka la hmu duh chuang lo. Min rawn phone pawhin ka chhâng ngai lo a nia, a message erawh ka en ziah thung. Kan nupaa kan ina haw tawh ka duh thu pawh kha ka nu hnêna ka sawi a ni a, ani'n Hminga hnênah a hrilh ta vat a, min rawn hruai ta vat kha a ni rêng a, heti khawp hian hrehawm a lo tiin min lo ngai ang tih hi ka ngaihtuah phâk lo a ni.

Ka mu tui bawk a niang, ka harh meuh chuan tukverh ațangin êng a lo lût ut tawh a, ka khap deuh sak sak a, ka mutna chu ka hai țêp a ni; mahse, taksa lum ham hamin min kuah chial tih ka hriat rual chuan ka  hre zui nghâl mai a, che lo chuan ka bula mu chu thaw ri chu ka ngaithla a, a lo la mu tui nasa mai niin, a lo la thaw sâk sâk a, chêt pawh ka che duh lo, thawh pawh a hun ve viau tawh mai; mahse, ka tum lo, a lo harh huna a bula ka lo awm loh a hlauh êm avàng khân thawhsan chu ka tum hauh lo.

"Ka mumang i ni miah lo!"

A rawn harh tawh tih ka hriat chuan," Morning, Honey,"ka lo ti vat a, che chuang lo chuan," Ka bula i mut chuan zànah pawh ka harh ta miah lo, ka thlâ a muang tak zet a ni ngei ang," a ti sup sup a.

Kan thawh chhuah meuh chuan a tlai ve viau tawh mai, thawh nghâl mai kha a phal tlat lo va, kan han mu leh rèn ràwn phawt a, boruakin a lo zir bawk nèn, kan han inkuah duhãm leh rih a, kan tho ve ta chauh a ni.

"Vawiin chu Office-a hruai che ka duh êm mai," a tih chuan,"I duh phawt chuan," ka lo ti var a. Ani chuan," Mahni chauha ina i lo awm ka phal lo, ka awmna hmun apianga hruai zêl che ka duh rih tlat," a lo ti leh a, nui sen sen chung hian,"I hna thawk ka lo tibuai dâwn che tihna a nih chu," ka lo ti a. "A pawi lo, ka hmuh theiha i lo awm chuan a țha a ni mai," a lo ti leh mai a.

Ka thuamhnawho ka thâwl ve viau tawh hlawm a; mahse, thâwl deuh pawha hâka mawi chi ang ka nei hlauh a, a tihzia khawp mai. Ka inchei zo min hmuh chuan," Chhiat hi chu i chhe mawlh lo," nui suk chung hian a lo ti zoh a, ka nuih sak a.

Office chhûngah ka awm ve reng a, hna ka thawh a phal loh avàngin a bulah țhuin a hna thawk chu ka lo thlîr a ni ber ang chu, ka țawng leh țhin avàngin a thawk sâwt tehchiam lo ang; mahse, amah zâwkin țawng tùrin min ti alawm," I țawng barh barh hian a nuam, ngawih reng i inhmeh ve lo," a ti tlat a, a thu sawi chu ka han tihdiksak leh rih a ni.

Zan khat chu kan mu deuh chiah tihah chuan min kuah hlûn pah hian,"Ka nu awmna kha ka hre tawh asin," a rawn ti chhuak ta a. 

Kha maw, țûl a tih hunah chuan min hrilh mai ang ka tih kha, chutia min han hrilh ve ta mai chu, a taka han tawn meuh chuan a mak ka ti, ka en hâ rêng a.

"A ni maw?! A lo dam țha em?" ka ti ve vat a.

"Aw, dam țha ang, kan la inhmu chiah lo va, an véng, an in awmna erawh ka hre tawh thung a, in pawh an nei țha viau e," a ti ve duah a, a ngaihtuahna hre lo mah ila  a nu awmna a hria chu ka lo lawmpui ve tawp, amah hringtunu a ni a, haw viau mah se a thinlung takin a haw reng thei bîk lo ang tih ka hria a ni.

"A nih chu, inbe chhin ula ka va ti!" ka ti zauh a, ani chuan,"Hriat pawh min hre nâng," a lo ti mai a, kei chuan," A, hmu che se chuan a hria chein ka ring, thisena inzawm hi chu maw thinlung lamah hian inhriatna hi a awm ve tlat țhin an ti alawm," ka lo ti thung a.

"I va fing bîk tak!"

A hnung chu na lo tê hian ka sihsak a, a lo nui hawk thung. A nui ri hriat hi nuam ka ti a, hetia tu dang mah ngai lova kan han titi dùn leh thei pawh hi nuam ka ti, ka ât rei lutuk avàng khân ka lo tawrhtîr rei lutuk a, khâng hun laia a hrehawmna zawng zawng kha hlimnaa rulh lêt vek ka duh.

"I nu chu i hua em?" 

Kan inmelh ràn mai. Min chhâng lawk lo chuan a khap sak sak phawt a, chutah," A rei tawh êm mai; mahse, hmaichhanah inhmu ta ngat ila chuan ka rilru erawh a thar ngawtin ka ring," a ti ta sup sup a, chu chu ka ring khawp mai. A hun lai khaa ngaihtuah lêt ang a, a thin a rim deuh thut bawk ang a; mahse, a hnuah erawh chuan... a rilru hi a sual lo va, a nu chungah hian a sual reng lo tawp ang tih ka hria a ni.

"Ka hre thiam khawp mai che, eng rilru pawh pu la ka thiam lo miah lo bawk ang che," tiin a khabe chu ka fawhsak a.

"Zanin chu...?" ti supin ka mutkawr hâk chhanah chuan ka hnung chu a chûl vêl ruai a, sawi lang lo mah se a beisei zawng ka hre na meuh mai. Ni e, a rei ve tawh a, a àwm ve tak zet a ni, mipa hrisêl tak a ni bawk si a, hnial ka tum bîk hauh lo.

A lu kuai kûna a hmuia fawhsak zohin," Ka pum hian i tâ ka ni alawm, engtiklai pawhin," ka ti sap a, min en ràn a, a mitmenga min mamawhna chu ka hmu chiang khawp mai.

*******

Krismas chu hlim takin kan hmang a,  nupa inngai leh inthlahlel tak chu kan ni ve chiang a ni, kan inzui chawt reng a, hna thawhnaah ni se chuti tho. Kahrisêm țha leh tawhin ka harh leh tawh viau mai a, ka țawng peihin ka nui leh nasa viau tawh a ni.

Ka vànnei ve chiang a ni, January thla tàwp lamah ka rai a ni tih kan hre leh ta a, kan hriat zànah ka nu leh pate nèn kan inah zanriah kan kîlho a, kan hlim tlâng teh asin. Ka nuin hma lam hun a êng zâwnga thlîr tùra min fuih char charnakhân rah țha a rawn chhuah leh mêk tawh a, kan chhûngkaw nun ngui nghiai nia ka hriat pawh kha tunah chuan a rawn pâr chho leh ta. Rilru hi a lo pawimawhin kan thil thlìr dàn hian kan nun hi a lo tidanglam thei hlea ni tih ka hre chiang chho deuh deuh chu a nih hi.

Tûn țum chu rai ka haw lo khawp mai. Ka thil ei pawh a tui a, ka ei țûn țûn reng mai a, Hminga phei chuan min fiam ziah," I ei nasa si a, i thau phah hnawk dâwn a nih hi," tiin, a tidik lo miah lo, ei tùr hi ka châk huam huam reng tlat a ni.

Ka pum pawh chu a puar chak a, keimah pawh ka thau chho viau bawk. Ei ka duh êm mai a, a àwm ve tho mai, ka puar len deuh hnuah phei chuan Hminga'n ni tin exer min lâkpui a, nau ka awl nân leh ka hrisèl nân a ti a ni. Ka dul len dàn ațang chuan phìr ka pai a nih ka ring hial mai; mahse, ka ring ngam chiah lo deuh a. 

"I inzo lo sâwt riau mai, nau a lian dâwn a niang," a ti ve ngei a, ka nuih a tiza angreng. Ni e, ka inzo lo viau mai a, ka rai hmasak kha chuan thla sarih a nih pawh khân ka la inzo veh vawh khawp asin, tunah erawh chuan ka rit țeih țuih viau tawh mai. Hminga ngaih a țha lo ang tih ka hlauh vàng erawh chuan karit viau tih chu ka sawi duh miah lo thung a, a hlauthãwng ang tih ka hlau a ni.

Mahse, Pathian zârah ka hrisêl a, naute pawh a hrisêl viau a, ngaih han tihțhat lohna tùr phei chu a awm lo, ka rit deuh e tih a ni mai a, ka ke vûng chho vêl lah chu thil nihphung pângngai tho a ni bawk.

Inbuatsaih nasat deuha ruahman leh beisei ang ni lova thil a lo thlen khân a hrehawm duh êm êm si a, Hminga pawh a inbuatsaih ngam vak lo niin ka hria, kei erawh chuan a êng lamin ka thlìrpui tlat a, ka ke vûng pawh chu a ngaih a țha lo nasa tawh mai a, exer min lâkpui nasat vàngah a puh deuh a, a cháng leh, "Exer kan la nasa lo a niang," a ti leh thùl, thil nih dàn ka han hrilh fiah ve ngial pawhin a âwih hlei thei lo va, doctor-in hlauthâwng lo tùra a hrilh hnuah chauh a zia ve ta.

Sêna a rawn zin a, min hmuh chuan," U Lawmi chuh, i va han lian êm êm ve! I ngo bawk si, Sâpnu i ni dâwn emaw ka ti che alawm le, i dul lah chu," tiin a chek tlak tlak a, ka ke vûng chu enin," I ke chuh! Lian buang buang ve!" tiin min nuih bawk a, a putea chuan,"Engah nge i nuih ngawt? A hrehawm dâwn tehlul nèn!" a lo ti hluk a.

*MI ȚHENKHAT CHU AN TÂNA HLÂWKNA  RÊNG RÊNG I NEIH TAWH LOH HNUAH CHAUH AN NIHNA DIK TAK CHU I HMU THIAM VE CHAUH ANG*