☆OKHEE☆ - 34 By Dingdi Pachuau

 ☆OKHEE☆ - 34 By Dingdi Pachuau

Sêna hnênah chuan,"Châm ve reng rih rawh aw, i lo zin khât si a," ka ti sauh sauh a, ani erawh chuan," Ka chàm reng chuan engtin nge ka pu a lo awm ang? Tunah pawh ka nuin a lo awmpui ringawt dâwn a nia," a lo ti thung a, inthiam lo rilru deuh tak hian Hminga chu ka melh ralh ringawt a, amah Sêna ngawt ka lo ngaihtuah chu ka inthiam lo viau a ni. 

Hminga erawh chuan,"Kâr khat tal chu châm ve rih ang che, i nu chu ka be dâwn nia," a lo ti thung a, hlim rilru tak hian Hminga chu ka en a, Sêna chuan," A pawi pawh ka ti chuang lo. U Lawmi ka han hmuh phei hi chuan chàm ka châk sauh, han sawisak ve hrim hrim ka châk bawk," a lo ti a, a nui vur vur a.

"Chutiang lam chu theihnghilh rawh, kan chhuah hlànin inah tih tùr țûl i lo ti ang, tlai lama eirawng bàwl nèn," Hminga'n a tih dût dût chuan," Ka hreh hleinem," a lo ti mai a, kei chuan," A rawn zin ve chhunah chuan ni lo ve, kan àwl ve hrâm hrâm zâwk ang chu," ka lo ti thung a.

"Khati chung khân i la chhuak țhin  tihna maw?!I puar tawh tehlul nèn, chêt vêl pawh a harsa tawh ngawt ang chu!" Sëna'n min en paha a tih chuan Hminga chuan,"Lo inrawlh lo teh," a lo ti nghut a, Sêna lah chuan," U Lawmi nèn inah kan pahnihin kan lo awm ang a..." a ti leh dêk dêk a, vîn lek leka," Sêna..!" Hminga'n a tih leh tâkah chuan za lo zeta nuiin min rawn melh zawk a, a ngawi zui ta hmak bawk a.

An putu chuan an inbe chhunzawm ta miah lo va, kei erawh chu Sêna chuan min be tho, a rûk tak chuan zia lo ka ti khawp mai a, chaw ei khamah hmun min tihfelpui hnuah Sêna'n TV a en a, ka bul lawkah Hminga lah chu a țhu ngawi deuh ngul bawk a, Sêna'n kan pahniha ina lo awm a sawi kha a duh lo tihna a ni ngei ang a; mahse, chu chu engati nge a duh loh viau ni? A thîk tihna em niang? A ni lo ang, heti chen kan innei ve tawh a, Sêna chu a tupa a ni bawk, amah zâwk zâwkin kâr khat tal châm tùrin a la ti zui a...

"Kha u le, Apple ei ang u, Sêna, lo ban mai la?" tiin Apple ka zai chu dawhkànah chuan ka chhawp a, a rawn ban a, a kal sawn leh nghâl a, Hminga erawh a la țhu ngar mai. A rawn ban ka rin loh avàng chuan plate chu chawiin a bulah chuan ka va chhawp hnai a," Ei la?" ka ti a, a ban chuan loh avàng chuan a bulah chuan țhuin lêp khat chu ka han pe a, a lo ban ve ta mai bawk a.

A thîkthu pe chhe kual a nih ka ring ta, ni e, hmânah pawh khân Sêna hi a thík deuh tlat a nih kha, tunah pawh hian a ni chiang mai, a tupa a han thîk a nia, a nuihzatthlâk e!!! Kei a nupui lah ka rai puar pum mai lehnghâl bawk a, îtawm loh lutukin, a tupa laka a lungawi lo ringawt mai hi chu a fuh lo, a la vìn zui, a tihchi loh lutuk!

Mutnaah chuan min kuah hlu hlu nain a țawng chuang lo va, a sam țhàmsak neuh neuh pah chuan," I lung ka tiâwi chiah lo niin ka hria, i làwm loh zâwng ka sawi em ni?" tiin ka zâwt sep sep a," Sêna i thîk lehpek em ni?" te chu ka ti duh bîk dèr lo.

"Ka lung i tiawi lo ngai lo," a lo ti sup a, a țawng zàwi sep sup bawk sia, ka hre thei lo țêp a ni. A țawng hi a zàwiin a awki hi a sâng vak ngai lo hrim hrim a, a châng phei chuan hriat a harsa lek lek țhìn, khuma a bul chêta ka mu chung pawh hian a țawng hi zàwi tih châng ka nei tho nia, kan inang lo ve thlâwt a ni, kei ve thung hi chuan zàwi têa țawng hi harsa ka ti, kan inhrilhru a nih ngawt loh chuan.

"Chuti, 'ngah nge hetia i ngawih reng a? Hrehawm ka ti țêp alawm, Sêna rawn phei lai laiin, a rawn zin khàt tehlul nèn, hlim takin awm ila?" ka ti leh a, ka dul a zungțanga rîn riak riak pah chuan," A en dàn che hi ka duh lo," a ti teh mauh a!

"Engtin nge min en a?"

"Mipain hmeichhe hmel țha tak kan en ang hian," a tih chuan ka nui hak a, ani chuan sawi zawm lehin,"A pitei i ni a, i hming ngatin a ko zêl bawk che, bâkah, kan inkâr hi a duh duha a lo inrawlh vena tùr a ni lo," a ti leh nghut nghut a.

A lu duat taka tuaisak hoh hoh pah chuan," Ka naupui duat lai tak hi chu aw...!! Amah pawhin a sawi tawh kha, a tìr ațangin a 'U Lawmi' ka ni a, 'Pite' tia min koh tâk daih kha harsa a ti ve a ni. Bâkah, a putea nupui ka ni tih a hre ve tho a, min nêl a, min ngam ve a nih hi," ka ti dam dap a, a lungawi lo tih ka hre reng a, min duhin min thlahlel a, chuvàng tak chuan ka lakah pawh a thîkthu tichhiain a tupa lakah meuh pawh a tilang hreh lo a nia, ka tân chuan thinrima chhàn lëtna chi a ni lo," I va mãwl tak! Engtin nge i tupa chu i thîk theih a?" ti phei chuan a zawh chi loh hrim hrim.  A àwm ang lo lutuk tih pawh hre mah ila fiamthua tihchi a ni lo.

"A en dàn che hi a fuh lo, bâkah, a ngam mah mah che a, a zah tâwk lo bawk che a ni," a tih leh chuan a chhîpah ka fawhsak leh zoh a," Min zah tùrin ka duh hleinem, min nêl se, a putea nupui ka nihna angin min hmangaih se ka duh. Kei pawhin ka nêl a, ka ngai a, a bula awm pawh nuam ka ti a, tlangvâl ang pawha tûn thlenga ka la en theih loh chhan pawh hi a 'U Lawmi' ka nih vàng a nia, ka tân chuan naupang rilru thianghlim tak pu ang chauh a la ni," ka ti duah a.

Chutah," Naktûkah chuan țha takin be rawh aw, a rawn zin ve chhuna hetianga awm chu a țha lo, min kan tùra rawn kal vang vang a ni bawk si, țha takin bia ang aw, hlim takin siam ang, kan thei ang tiraw?" ka ti leh sep sep a, chutah,"Ka hmangaih che a, ka hmangaih ang tluk che hian i chhûngte chu ka hmangaih zo lo pawh a ni ang; mahse,min ngaina se, ka bulah an mamawh leh an duhte leh an rilrute pawh sawi chhuak ngam se, hlim se tih hi ka duh a ni, chuvàngin, nang pawhin min pui la, kan ngaihsaka kan hmangaih loh chuan kan nun chhohnaah kan tluang lo ang," ka ti leh dap dap a, min chhâng tawh lêm lo chuan a hmai chuan min rawn nawr deuh châk châk a.

Ka pasal hi ka hmangaih bâkah a chhûngte, a laina hnaite hi ngainat vek ka duh bawk. Amah chauh hmangaiha mi dang a àwm táwk leh a mawi tâwk chauha ngainat ringawt chu a fuh lo, a pa innghahna, a fapa neih chhun niin a farnute pahnih innghahna a ni bawk. 'Mo țha' chuan a pasala chhûngte a hui khâwm țhìn' an tih ka nuin min hrilh ve ziah kha ka thinlungah ka hre ve reng a, mo țha tia mi sawi huai huai nih chu a harsa mahna; mahse, ka pasala chhûngte tân mo țha, fanu țha nih erawh ka tum tlat thung.

Ka thu hrilh chuan hna a thawk teh meuh mai, a tûkah pawh chuan Sêna a bia chu ka hria; mahse, țawng tam lêm lo ngang hi a ni a, a be hmasa tih ka hriatna chuan min tilãwm tâwk viau tho mai. 

Sêna rawn phei ka hlimpuizia chu, fiamthu a duh a, a thil sawi apiang lo nuihin ka nui nasa thei lutuk chu insùm a ngai zâwk hial ang tih tùr a ni, țawngkamin min sawisa țhìn a, chu chu a hlimawm ka ti a ni. Hminga erawh chu nui ve deuh suk suk țhìn mah se, Sêna chu a melh leh rulh rulh ţhìn thung a, a châng phei chuan min fiam dàn chu a lo la na zâwk țhìn a, ka nuih a tiza thei ngang mai. A che cute ka ti lo thei lo, a nupui hi min hauhin min țan tih a tilang tihna a ni a, chhûngril lamah erawh chuan min tihlim vawng vawng mai. Sêna chuan a theihna apiangah min àwl a, ka chêt ai tam takah min àwlin a putea pawh a àwl zar zar mai; mahse, kan thatchhe zo vek ang tih erawh a hlauhawm thung.

Camera țha ve tâwk tak ka lei sauh sauh a, naute lo pian huna a chetla lai video hrang hrang leh a thlalâk hrim hrim pawh kan la duh ang tiin, Hminga chuan kei aiin a làwm zui a, ka dul puar lian zet chu hnai zet zetah thla lain," Kan fa lo piang tur hnênah,' I la pian hmaa i chènna,' tiin kan la hmuh duh dâwn alawm," a ti a, a nui suk suk țhìn a, a muhìl laite chu ka hmehsak a, enin a nui leh suk suk țhin. Sêna pawhin," A tâwk reuh khawp mai, nakinah kei pawh nalh deuhin min la lâksak ve dâwn nia, dp atân ka duh a," a lo ti lehpek a, kan han nuih leh chiam kha.

Sêna haw tùr chu ka pa mamawh tùr thil chi hrang hrang kan thawn haw țeuh a, amah Sêna ngei pawh chu thil țha tak leisak tùrin Hminga chu ka hrilhru kha a ni a, a'n hnial deuh zet nain  a hnuah erawh a rawn lei ta tho. Sêna pawh a lâwm khawp mai a, kei pawhin a silai mu tùr ka leisak ve bawk a, a nui vur vur reng mai.

"Ka lãwm e aw, pasal fel tak ka nei che tih hi ka hre reng asin," tiin a kut chu ka chùlsak hoh hoh a, ani pawh chuan min en vang vangin," I bulah hi chuan mi hi an sual thei pawhin ka ring lo, mipa vànnei chungchuang chu ka lo ni," a ti sup sup a, ka kut chu la kângin a fâwp zoh a.

Engkim Hminga kuta awm vek a nih tawh avàngin a buai ve tâwk tawh viau a, kei lahin ka pui thei tawh meuh si lo, țûl a ti lo chungin a theih ang angin in lamah chuan ka lo theih ang angin ka thawhpui ve a, a bulah pawh ka kal thei tawh lo, a phal tawh lo va; mahse, ina keimah chauha ka lo awm pawh chu a phal țha meuh si lo, awmpui tùr a dap ruai mai a, ngai ka ti lêm lo nain min ngaihtuah vàng a ni tih ka hria a, ka sawisèlsak duh lo.

Ka nu leh pate pawhin min ngaihven viau mah se an rawn inrawlh lêm lo, kan nupa tân puitlin inzir chhohna tih an hre chiang viau a ni ang, kei pawhin pùr ka tum lêm lo, 'Mite pawhin pasal an nei a, chhel takin chhûngte tibuai hauh lovin an awm thei alawm' tiin ka rilru ka siam a, kei phei chu ka pasalin min ngaihtuah êm êm a, min duatin ei tùr țha tinrêngin min vûr a, min ngaihsak êm êm bawk, eng mah hrehawm han tih tùr ka nei lo, ka taksa a rit deuh e tih a ni mai.

Ka pai tluang ve viau a; mahse, ka neih hun tùr aia hma hretin ka nei dâwn ta tlat, damdawi inah kan lût deuh rum rum a nih ber chu. Ka la har êm êm zui a, ka han vei a, ka taksa hi a na vêl vek maiin ka hria, heti khawp hian nau neih hi a lo nâin a lo hrehawm ang tih ka ngaihtuah pha hauh lo. A nat zual châng phei chuan  ka nei puitling thei lo mai ang tih hlauhna ka nei ru hial mai, Doctor leh nurse-in min vil tho nain ka hlauthãwng tho. Hminga ka bulah awm se ka kut min lo vawnsak tal se ka ti ngawih ngawih, ka bula a awm khân ka thla a muang țhin si a, ka ngai tak zet a ni.

Harsa zetin a tàwpah chuan ka nei ta hrâm a, ka chau lutuk a, muthilh ka châk nghâl ngawih ngawih, naute țap ngâk ngâk ri ka hre ruai ruai a, ka bula rawn pawma,"Mipa a nih hi, a hmel țha reuh lutuk," an tih ri pawh chu ka hre hlek hman, ka chau lutuk a, ka muhìl ta ni maiin ka hria.

*******

Kan fapa Daxton Vanlalhruaia zet chuh, a pa siar, a pa siar!! An inang takzet a, Hminga nausèn têt lai pawh hetiang hmel tho hi a put ka ring, a pa a chhun lohna chu a vunah a ni mai, a dang zawngah chuan a pa vek a ni mai. A tê reuh sia, a țap duh mang reuh si lo nèn, ka en cheuh cheuh hian ka khawngaih leh thut ţhin a, hnute hne paha min rawn en chho kiau țhìn phei hi zawng, ka hmangaihna zawng zawng hi a nei vek ni maiin ka hre țhin. Ka puar len ve tehlul nèn, naute lian pui leh rit ve tak a lo chhuah ka ring ve asin, tui ka lo pai tam a ni chêk ang chu.

A pain a pawm ziah avàngin a tisuakbâk a, pangti lum a hre hneh lutuk ringawt. Chhùn lamah chuan a mu duh ve mai a, zàn lamah erawh chuan pawm loh chuan a muhil thei lo, a pa hian a pawm reng mai a ni, pawm hi chuan a muhìl ve mai zêl; mahse, a zia vena êm êm chu a muthilh loh pawh hian a țap ngai lo va, a meng kar a, khumah hian a pa hian pawm chungin a muthilhpui țhin a nih ber chu. A pa hian a'n duh hleuh hleuh khawp mai a, a pawm loh hian a awm a nuam thei lo zâwk ni hialin ka hria. Rin aiin a hrisêl phian lehnghâl a, a hrisèl loh deuh kan rin tehlul nèn, Pathian malsàwmna vek a ni e.

Ka inhliam ve nual nain thla khat a ral ve meuh chuan ka zia viau tawh a; mahse, Hminga'n min àwl hneh lutuk ringawt. Hna a thawh chhûngin min awmpui tùr nula Hriati kan chhawr tawp a, chhùn lamah min awmpui a ni ber ang chu, tûkțhuan ei khamah a rawn kal a, tlai dár 3 vêlah a haw leh a, ka nu leh pain min rawn kalchilh hneh bawk nèn, kan buai lêm lo ve. Daxton-a pawh thla a tlin meuh chuan a fel ve tawh lutuk. Zànah pawh pawm kher ngai lovin a muhil ve thei tawh a; mahse, a pa hian a vil chawt a ni ber ang chu. Vawi khat tê pawh a la sawisêl chhin lo, kei hi chuan a zun châng leh a êk châng te hian," Aw...i lo zung leh tawh a ni maw?" ka tih loh leh," I va e zing ve maw le," te ka ti bawrh bawrh mai țhin a, ani erawh hi chuan,"A zung tam dem dem reuh asin," dam zeta a tih loh leh," I êk chhuak i la sawi thiam tak si lo va, tikhân, e zêl la, i pum pawh a nuam huai huai zêl mai ang," a ti sup sup mai zêl a, kan inang lo teh asin.

Ka chêt ve theih hnuah pawh chuan Hminga chuan min àwl a tum tlat a," I na palh ang, lo țhu mai mai rawh, ka che vek thei alawm," a ti mai a, eng mah tih hreh a nei lo. Ka pasal mah ni se ka fak lo thei lo a ni, pasal țha tak hi chu a ni chiang alawm.

Daxton-a a han nui thei a, lawm a hriat chhoh hnu phei chuan Hminga hi ka khawngaih zâwk! Hna thawk tùra a fapa chhuahsan chu a hreh ngawih ngawih tih ka hre ru reng si a, tlai lamah ni se a rawn haw hma thei hle bawk a, a pawm loh leh a malah a muttîr a, puak tak hi chu a paw ngai lo thung. A thiam lo ti dâwn ila a thiam chu ka ring bawk si, mak ka ti ru viau mai.

Thla thum a tlinna chamah țhiante leh chhûngte nèn chawhlui kan kîlho a, keini a nu leh pate chuan kan pawm chang ve tawh teuh lo mai! Martha-i lah chuan rai puar ùl chung hian pawm a lo chuh ve reng bawk a, Harriet-i leh Julian-a fanu duat lai Heidi chuan an inpawm chhâwk zak zak bawk, naupang an awm ve nual bawk nèn, kan ri chèl chùl mai a ni.

Ralvawnga ka pain a takin a hmu châk ve thei si a, a mu lai leh kan han làwma a nui lai video hi Sêna kan thawn deuh reng mai a, ani pawhin rawn phei a châk khawp mai a; mahse, a pu a chak lo a zual deuh a, a rawn pheisan thei rih lo. 

"Krismas hmang hian kan phei ve lawk mai dâwn em niang? Ka pa pawhin a hmuh châk bâkah keini pawhin kan tlawh ve pah a ni mai a, hna i àwl lai a ni ve bawk ang a," tiin Hminga chu ka han en a, ani chuan a fapa chu pawmin a kut te tak tê chu a khalhsak neuh neuh a.

"Mawh, ka pa pawh a ngaihawm alawm, ani pawhin min ngaih ve tawh dâwnzia chu a," ka ti leh a, min rawn en a, nui suk chung hian," Okhee," a rawn ti chhuak ve ta sup a.

"Chuti chu, ka'n hrilh nghâl teh ang; mahse, kan phei hmain eng eng emaw ken phei tùr lei nual ka duh," tiin phone chu ka ban a, Sêna chu ka video-call ta nghâl a.

Lalsêna hmel chhiatzia mai mai chu, a rawn insiam chhe kher zui a, kan inbiak hma hawtin ka'n nuih lehpek chu, kan phei dâwn tih ka hrilh chuan," Yesss... Daxton-a ka vèl țap thei dâwn ta!!" a rawn ti leh deuh kher zui bawk a, kan han invau leh rih bawk nèn, kan inbe rei zêk mai, Sêna biak hi zawng a hlimawm ve chiang a ni.

U Mamite chhûngkaw tân leh U Lianpuite tân rizai leh blanket leisakin, anni hmeichhe pahnih tân inkhâwmnaa bih tùr puan mawihnawi ve tâwk tak ka leisak bawk a, ka pa tân erawh chuan damdawi țha tak, a taksa tichak thei tùr in chi tui tak leh mutnaa a lum theihna tùr rizai lum țha tak leiin Sëna tân liau liau Jeans leh Adidas sneakers kan leisak bawk a, an lãwm ve viauin ka ring.

Kan phei tùr chu ka nu leh pain an lo huphurh lâwk khawp mai a, ni tin deuhthawa rawn lang ve reng reng an ni bawk a, a àwm ve viau. Ka pa chuan," Ka tupa 'cial' a hming pawha ka koh phal loh, ka-tuai-nuak-nuak-pa chu ka han hmu lo vang vang dâwn a ni si a, ka khua a har lâwk êm mai, in lo phei leh thuai dâwn nia," a ti a, ka nu pawh chuan," An hmu châk ve khawp ang, an làwm dâwn tih lah ka hre reng mai," a ti a, a tupa chu a pawm hlà hlá a. Phei dâwn lo ila chuan Hminga'n pawm a chuh leh daih tawh ang chu, pawm a chuh loh chhan nia ka rin chu kan pheisan dâwn a, a pi leh pute hian an pawm khât tawh rih dâwn tih a hre re kar a ni ngei ang chu.

Chhûngkaw member pathum chauh e ti lo chuan kan bâwr phei ve khawp mai a, Bolero hnung chu bungruain a khat vek a ni mai, fridge-a chawhmeh kan dah kan keng phei vek bawk a, Krismas laia cake urna tùr leh a siamna hmanrua nèn, kan inkeng phei kim ve êm bawk a ni.

Motor chhûng a phui țha bawk a, naute pawh ka thuam lum over lo, Hminga'n a khalh chak lêm lo nain kan tlãn tluang a, kan chàwl lêm lo bawk a, kan khua kan thlen meuh chuan a tlai ve tawh khawp mai a; mahse, min lo nghâkhlel ve tlâng bawk a niang, kan chhûngte chu an lo la awm kim țhap thung a.

Daxton-a pawh a hmain a muhìl reng kha a nia, kan han thleng chu a meng ta kar mai. Ina kan luh veleh chuan U Mami chuan lo la vatin ka pa bulah chuan a pawm phei vat a, ka pa chuan a en vang vang phawt a, chutah," Ka tupa zet chuan ka thinlung a va tihlim tak êm! Hun kha leh chen ka lo nghah tawh a hlawhtlinna hmu theia damna ka la chang hi ka lãwm hle a ni," a ti charh charh a, chutah, muangchâng  leh kut khùr deuh dar dar hian Daxton-a chu a pawm ve ta a.

"A va hmel țha tak êm! Ka hmangaih nghâl vawng vawng mai ka ti!" a ti sap sap a, ani lah chuan a pu thu sawi chu hre ve ni àwm tak hian a pu chu a melh chho ve kar reuh a. Sawi zawm lehin," Ka fa leh ka tute zawng zawng hi ka hmangaih vek che u a, tling lo takin heti chen hi theih ang tâwkin ka enkawl che uin in lo ţhang lian tawh bawk a, Hruaitea erawhin in paltlang tawh zawng zawng kha a la rawn chhir chho ve dâwn a ni a, ka tute zînga naupang ber a nihna angin in ngaihtuaha in dawm thiama in hmangaih a ngai hle dâwn a ni," a ti leh dap dap a.

Kan țhut chawlh deuh hnu chuan an thil tùr chu kan han pe diat diat a, an lãwm thiam khawp mai," A ngai hauh lo asin, in insêng nasa àwm mang e," an ti a, U Mami leh U Lianpuii phei chu an lãwm zual, puan chu an duh chi tak ni mah se, an lei ngam si loh a lo ni a, an hlim leh lâwm hmel hmuh chu nuam ka ti tak zet, ka hlim ru veng veng mai a ni. Sêna erawh kan la pe duh rih lo, nakinah a hranin kan pe ang.

"Khawi maw, Daxton-a chu han vèl țap tawh teh ang," tiin Sêna chu a rawn țawng chhuak làwng láwng a, a la nui sûng zui, ka melh rum a," Han tum chiah la?" tiin, mi dang chu an lo nui țhâ hlawm a, Sêna lah chuan,"I pai lai ațang tawh khân vawi khat tal chu tih țah ka tum daih tawh!" a la ti zui a, ben tumin ka kuta ka'n tin leh hrâm kha.

Kan boruak chu a nuam dar dar teh e. Sêna tih loh zawng chuan," Pite, pite," tiin min ko sap sap hlawm reng a, Sêna erawh hi chu a 'cial' ve êm a, "'Pite' tia koh ka tum che hian kan inkára innèlna leh ințhianna hi hla ta riau leh dik lo ta hûihin ka hre tlat a, chuvàng chuan, ka tân chuan 'U Lawmi' ni reng rawh," a ti tlat a, ka ngaidam chiangkuang a ni.

Chaw ei hmain U Lianpuii pasal, U Thangliana'n chhûngkaw ţawngțai inkhâwm a kaihruai a, Pathian hnênah làwmthu sawia a țawngțai hnuah chaw ei chu kan siam nghâl a, kan awm ve nual si a, kan ri lai lai mai.

Chaw kan ei lai chuan U Lianpuii fanu, college pawh kal ve tawh Siamtei chuan," Pite, in hausa viau niin U Fela khân a sawi a,' An in chu a lianin a ropui bawk a, an hausa tih a hriat hliah hliah! A hmel țha bawk si nèn, U Hminga hi chu a vànnei tak tak a ni,' a ti a," tiin a nui sâng a, Hminga chuan,"A la uar lo a nih chu!" a lo ti mai a, Sêna chuan," Mi bulah kan sawi duh lo mai mai alawm, U Lawmite chu hausa tak an ni," a lo ti ve leh a, rum deuha ka han melh leh kha.

"Ni e, Fela khân a sawi tak asin, in inah chaw a rawn ei ni àwm tak a ni a, a rawn haw hnu khân a sawi chùl tak alawm," U Mami pasal U Rina pawh chuan a lo ti ve sup a. Kei chuan," Tu Fela nge in sawi chu?" ka lo ti vat a.

"Kan inneih hnua Aizawl kan phei nîa Sumo kan hire driver kha," Hminga'n a lo tih chuan ka bu ta nghat a, a hming kha ka lo theihnghilh leh hman tawh a lo ni.

"Putea vànneihzia hi chu aw...!" Sêna'n a tih leh chuan an nui dar dar a, kei chuan," Kei tak hi asin vànnei ni, pasal hmel ţha tak leh fel tak neiin fapa duhawm tak ka nei bawk a, chhûngte duhawm tak tak nèn," ka lo ti ve duah a.

"Pasal hmel țha tak!" intiamrual ang maiin Siamtei leh Sêna chuan an lo ti chhuak rual chiah a, inenin an nui dùn leh chiam bawk a. Siamteite unau zînga naupang ber Manuntea erawh chuan," Lalà-u sualzia chu, eng nge i nuih chiam kher a? Putea chu a hmel țha alawm, Pitei pawh a hmel țha tho bawk a," a lo ti chuar chuar thung a.

Ka pa chuan," Manuntea a fel ber mai, i ute hi chu maw an nui chhuak phut phut zêl a, min tiphu zawk zawk lo chauh a ni," a lo ti a, Hminga pawh chuan,"Lawm loha nui chu mi â an nia, anmahni ang hi nih ve miah loh tùr," a lo ti ve sup bawk a. Sêna pek chuan," Putea hi a hmel a țha a nih phawt chuan kei hi chu hmel țha tak ka ni tihna a niang," nui chung vêk hian a lo ti leh a.

"I u Lawmi anga hmel țha hi nupui i hmuh zawh ve leh hmuh zawh ve loh a thu a niang chu," ka pain a lo tih chuan mi dang chu nui țhâ chung hian an lo bu nghat nghat hlawm a, rang zet hian Sêna chuan," In fing phakar bîk! U Lawmi anga hmel țha leh hausa chu ka hmu zo ve teuh lo mai!" a lo ti vat a, Hminga chu za zet leh hnehtu intih hmel tak hian a lo nui hawk thung a.

Chaw ei kham veleh Hminga chuan a fapa chu a pawm nghâl a, a fapa tih hi a inhmeh bîk êm a ni, a fapa bîk ngawih ngawih lutuk a, an inchhùn bawk si, mi dang fa a ni lo tih hi a hriat hliah hliah.

"Vawiin ni sâah khân in mutna pawh kha ka lo pho a, in sin tùr pawh ka lo pho rim tuisak vek che u alawm, ka fel asin," Sêna'n a tih chuan,"I fel chiang alawm, Sênpuia hi chu, duat pawh hi kan duat che, thil țha deuh ka pe ang che," ka lo ti vat a, ani hi chu mi dang pawh hian an thïk thei lo ang, ka pa lo awmpui ngar ngartu a ni a, amah vàng hian ka pa pawh ngaihtuah vak lovin ngaihțha takin kan awm theih phah a ni.

An haw dâwn hnaih chuan Hminga chu ka bekbàwr sar sar a, U Rina leh U Thangliana chu 'Krismas sa leina tùr' tiin an haw dâwn tak takah chuan pawisa a pe ve ve a, ngai lo tiin țang viau mah se a pe lui a, mi dang haw vek hnuah pawh chuan Sêna chu a la haw ve lo thung a.

A kekawr tùr leh pheikhawk tùr kan pêk chuan a lãwm tih a hmel aţang chuan ka hre thei. 

"Ka awh phâk loh leh neih ka inrin loh a ni a, a mawi bawk si, ka lãwm tak zet a ni," a ti hluam hluam a, kei chuan," I putea leisak che a nih kha aw, kei chuan i hâk tàwk leh bun tâwk pawh ka hre hauh si lo," ka lo ti vat a, a putea en chunga," Pute, ka lãwm lutuk aw, i hmel pawh a chhia ka ti ta miah lo," a tih chuan ka lo nui hak a, ka pa lah chuti bawk. 

  

A lãwm ve ngang a niang," Ka țhiante ka hmuh châk tawh hle mai, mawi an ti ve ngawt ang chu," tiin a han bun chhin a, dingin a han kal chhin a, a lung a awi ngang a ni. Hetiang tak hi thil leisak an nuam ka ti, an rilru zawng zawngin an lãwm tih an hmelah a hriat si a.

Zàn mut hma chuan ka pa damdawi kan leisak chu pein ei dàn tùr chu ka hrilh a, mut hma chuan a han ei țan nghâl bawk a," Fanu hmel țha leh fel, min ngaihtuah êm êmtu ka nei a, tunah chuan tupa duhawm lutuk ka han nei leh tawh bawk a, heti taka Pathian malsàwmna ka han dawng bîk mai hi chu aw..." a ti vang vang a.

"Ka lâwm e, ka pa. Ka fel lohna ang anga min pawma min hmangaihtu i ni a, ka pasal atân liau liau fapa țha tak i lo nei bawk a, ka hmangaih êm êm che u a ni," ka ti ve a, ka zak duh bîk lo, ka hmangaih thu hi hrilh ka hreh tùr a ni lo, hrilh hman loh hi a hlauhawm zâwk si a.

Mutnaah chuan,"Mi vànnei chungchuang hi chu ka va ni tehlul êm! Ka chhûngte chunga i thil tihsak zawng zawngte hi ka theihnghilh tawh lo ang, ka hmangaih tak zet che a ni, Pathianin ka tâna a lo ruat che hi chu ka vànnei tak zet a ni, ka hmangaih che," a ti sup sup a, nui sak chung hian," Kei pawhin le, chhûngkaw duhawm tak tak leh fapa duhawm tak min pëk avàng hian kei pawh hi ka lâwm asin, ka hmangaih che," ka ti lêt ve a, a hmuiah chuan ka fawhsak zauh a.

*I TUM TIHLAWHTLING TÙR CHUAN MI SAWISÈLNAAH CHE I BENG I CHHU NGAWNG TLAT DÂWN NIA*