☆OKHEE☆ - 35 By Dingdi Pachuau

 ☆OKHEE☆ - 35 By Dingdi Pachuau

A tûk zîngah chuan Siamtei leh Sêna chhâng chiah Mawipuii chu nau awm tùrin an rawn lang nghâl vat a, a pain pawm thei tho mah se pawm châka rawn kal ve na nâ nâ chu a lo pawmtîr ve mai a, rawng ka bâwl chu min rawn pui nghâl vat a.

"Siamte, Mawipui, chaw ei ve nghâl r'u aw, nizàn lama sa kan ei bãng pawh kha a la tam viau si a," ka tih chuan Hminga chuan," Ei ve nghâl ang, chaw pawh kan chhum kêp che u a nia," a lo ti ve sup a, Mawipuii chuan," Pute, naute hian a ang che e tiraw? Mahse, Pitei ngo lamah a chhùn a, a hmel țha reuh bawk sia, a piang thiam ngawt mai," Daxton-a biang khawihsak pah chuan a ti a, Hminga chu ka melh nghâl ralh a, a nui suk chu ka hmu ru reng.

Chaw kan ei a, chaw ei kham hma deuh takah naute chu ka bual a, Siamtei'n a paw nghâl a, Hminga'n motor a sil a, thuamhnaw sûk ngai a la awm mang loh avàng chuan chhùn lama thingpui hmeh tùr chhang ka buaipui zui ta nghâl bawk a.

Țhenawm hnaite an rawn lêng lût ve țak țak a, thingpui hâng ka lo thlit ve thuai thuai hlawm a. Naute muhìl chu," Khawi maw, lo en ang hmiang," tiin Siamtei puak lai chu an en dan dan hlawm a, a nu ka awm ve reng vàng nge ni phei chu ka hre lo," A va han duhawm reuh ve! A hmel țha reuh hle mai, nu leh pa chhe lo na nâ nâ chu," an ti ve sap sap a, fak derna a ni emaw ni lo emaw a nuam ve hrim hrim, fakna ri hi chu ngaihthlâk hi a nuam riau a.

Ka nuin min rawn bia a, naute hmuh an duh vàng a lo ni a; mahse, a muhìl daih si a, a harh huna ka biak tùr thu ka hrilh chuan ka pa chuan," Ka ngai asin le aw, ka hmuh châk tawh nèn," a ti bal bal a, ka nui hak ringawt a. An tu hmuh chhun a la ni a, an ngai ang tih chu ka hre reng mai.

Chhûngte pawh an rawn lêng khâwm leh a, a țhenin chawhmeh min rawn pe a, a lawmawm tak tak a ni, a bîk takin U Mami baibîng rêp min pêk chuan min tilãwm zual, zanina hmeh atân siam nghâl teh ang. 

"Inbual la, i hman lai hian?" Hminga'n a tih chuan," Nang?" ka lo ti vat a, ani chuan,"I inbual zawhah a ni mai," a ti a," Lût rual ila ni mai alawm," ka lo ti awlsam leh mai a.

"Kan rei palh ang!"

Ka va en lai chuan meng zîm deuh san chung hian min lo en a," I ngaihtuah ril lutuk a nih kha," nui chung hian ka ti a, ani lah chuan," Ril lo thei nâng, inbual rual i sawi kher a," a lo ti ve thung a.

Aizawl ai khân nuam ka ti mah zâwk em aw ka ti hial mai. A chhan chu inlêng kan nei ve neuh neuh reng a, chhûngte'n min tlawh reng bawk a, hei tak hi nuam ka ti a ni. Țhenrual ngaina tih takah, ka tân chuan a nuam êm asin, Daxton-a lah an làwmin ka chang ve hman mang lo va, ka duh duh ka ti thei a, Krismas nia kan inkhâwm phei chu," E, in lo hmang phei a ni maw?" tiin min chibaitu kan tawng nawlh nawlh mai a, naute lah chu," A va hmel țha reuh êm êm ve!" an ti vek bawk si a, Aizawlah khân hmang ni ta ila hetiang hi ka tawng pha teuh lo mai! Miin min lo hre ve chu nuam ka ti a, ngaih pawimawh ve nihna hmun leh min hretu an awm tamna hmun hi a lo nuam ber a nih hi ka ti rilru vawng vawng mai a ni.

A tûkah ruai chu kan țheh ve a, thingtlânga Krismas ka hman vawi khatna a nih avàng chuan țheh ve rêng rêng ka duh a, ka pate nèn kan chhuak ve a; mahse, kan haw hma viau thung. Zaikhâwm lam erawh kan thei lo a ni, ka pa pawh a tel lo," Ka zai thei chuang lo va, zai theih loh chuan a ho tlat," a ti a, nula chu la ni ila chuan ka zaikhâwm ve chhin châk reng tho mai.

Sêna leh a țhiante an rawn kal a; mahse, zaikhâwmnaah an kal dâwn avàngin an chhuak leh thuai a, anni pathum nèna Chite luia kan inhmuh laite kha ka ngaihtuah chhuak a, hmãnni lawk mai kha a ni a, khatih lai khân anni pawh râwlthar chhuak deuh hlawt kha an ni a, tunah chuan an lo tlangvâl ve tak tak tawh si a,  kum kal chakzia chu ka ngaihtuah rauh rauh a. Naute hlim țê ri-ah chuan ka ngaihtuahna ațang chuan ka harh chhuak a, ka pate țhutna lam chu ka hawiin ka pan ta vat a.

Khua a vâwt a, ka pa chu ka ngaihtuah viau a; mahse, ka han zawh châng chuan ani chuan," Vâwt ka ti lo, kawrlum leh mawza lum ka nei a, mutna lum nèn, rizai lah a lum nuam si," a lo ti thung a, Hminga chuan," A vâwt a ti lo ang, i ngaihtuah lutuk a nih kha," a lo ti a.

Mutnaah chuan," AC hi la ngaihtuah ila a țha ang, khua a la lum chho leh ang a, ka pa a ngaihtuahawm tlat," ka ti a, ani chuan," I ngaihtuah lutuk ka tih tawh kha, kan tuar țhang a, kan taksa a chhel tawh alawm," a lo ti a, kei chuan," Nang chuan i tuar thei mai ang a, ka pa chu a kum a tam ve tawh a, a taksa pawh nang angin a chak tâwk tawh lo a, a ngaihtuah loh theih loh alawm," ka lo ti thung a.

"Nupui fel tak hi chu aw..." tiin min rawn fâwp zoh a, kei chuan,"Ka fel tak tak em?" ka lo ti vat a," Fel e, ka pa tân fanu fel tak niin ka chhûngte tân mo sawisèlbo i ni a, ka tân lah nupui fel leh hmel țha, fapa hmel țha min hrinsaktu i ni bawk a, ka lãwm hlê a ni," a ti deuh duah a.

Daxton-a pian ațanga a vawi khatna atân nupa nun kan chèn leh ta a, kan duhthawh dùn viau a ni. Min nghâk rei a, a fîmkhur êm avàng leh min ngaihtuah êm avàngin min mamawhnaah pawh a insûm hrâm hrâm țhin a, zanin erawh a insûm thei tawh bîk lo, kei lahin insawisèlna ka nei tawh lo bawk a, min mamawhna chu phûr takin ka lo chhâng lêt ve a ni.

31 zànah kan inah chuan Kumhlui thlahho an rêl a, phûr takin ka lo sawipui ve a, zàna ei tùr an lei nân pawisa pawh ka pe ve hlawm a, an lãwm thiam kher asin. An hlim hmel chuan làwmna min siam a, ka hlim ru veng veng mai. 

Kum thar ni chuan ka pa leh Hminga chu kum thar thilpêk ka pe ve ve a, an lãwm thiam viau mai. Hminga chuan," Engtik laiin nge i lo lei hman a?"a ti a, kei chuan," I hriat loh lai tak khân maw le," nui chung hian ka lo ti a, min melh vang vang chung hnuah chuan," Eng mah ka pe ve si lo che a," a ti zawi deuh ta raih a.

"Fapa hmel țha tak min pe alawm," tiin ka pan hnai a, a hnung chu chùlsakin," Hei tluka thilpêk hlu hi ka la dawng ngai lo, chhûngkua min pe a, ka hmangaih êm êm che u a ni," ka ti sap sap a, rawn kûn hniamin min rawn fâwp vang vang a.

******

Kan nun hi hetiang reng hi ni thei se ka ti. Pasal țha tak neiin fapa hmel țha tak ka nei a, min hmangaihtu chhûngte ka neiin chhûngkua kan hlim a, kei aia vànnei hi an awm tawh kherin ka ring lo hial a ni.

Aizawla kan pheina pawh thla hnih zet a ni leh tawh a, Hminga pawh a buai leh tawh khawp mai. Kan nufa tân erawh hun a insiam thâwl ve hrâm hrâm țhìn a, ka theih ang china puih ka hreh loh tehlul nèn, thil dang han ti tùrin Daxton-a a la te deuh mah mah a ni, bâkah, Hminga'n a remti lo bur mai. Ni tin deuhthaw ka nu leh pate rawn kalin min rawn tlawh țhin a, chhawnchhaih nuam rual a ni ve tawh bawk nèn, hlim nui riin kan in chhûng chu a khat țhin.

Mahse, hringnunah hian hlimna hian thla a zâr reng bîk lo va, hlimna bulah hian lungngaihna a lo bawk ve reng țhìn a lo ni. Kan hlim êm êm lai chuan ka pa dam țhat loh thu kan han hria a, 'ngaihtuah a ngai vak lo'  chu an rawn ti tak nain rilruin a ngaihtuah lo thei lo. Hminga chuan Aizawl lam rawn panpui tùrin U Mamite chu a hrilh a; mahse, ka pain a zuam tlat lo, motor-a chuan chu a zuam lo a ni. A pum chu nâ a ti ber a, amah pawhin chêt sawn harsa a ti a, chuvàng tak chuan motor-a phurh chu a ngam lo a ni. Nachháwknain an chiu tawp mai a, amah berin motor-a chuan a zuam loh tlat avàngin tihngaihna a vâng viau.

Ka pa chanchin min rawn hrilh ațanga ni hnihna Zirtàwpni chawhnu dâr 1-ah chuan Ralvawng lam panin kan tlãn phei ta chûk chûk a, Hminga pawh a hmanhmawh bawk a ni, kan tlân chak viau mai a, kan phei rum rum chhan pawh U Mami'n,"Ka pain a lam a lam che u a, lo phei mai teh u, a chau sâwt riau mai a, ka hlauthãwng tlat," a rawn tih vàng a ni. Hminga rilru tùr àwm chu ka ngaihtuah a, hrehawm ka ti tak zet, hnem vak ngaihna ka hre si lo," Eng êm a lo ti lo ang chu," tiin ka hnèm ve a; mahse, kei ngei pawh chuan kan thlen hmain min lo peih lohsan ang tih ka hlau ru viau si, min lam min lam phei chuan min ngai hle tihna a ni dâwn a, lo la chau viau lo se, a theih ang angin Aizawl lama inphurh phei dàn ngaihtuah thei zâwk ila...

Kan va thlen phei chuan kan inah chuan inlêng an lo awm țeuh tawh a, min lo peih lohsan ta mai em ni tih chu ka ngaihtuahnaah a awm hmasa ber a, ka hlauthãwng kher mai; mahse, U Mami hmel ka hmuh tâkah chuan a lo la kal êm bîk lo tih chu ka hre leh thei mai a.

Ka pa chu a khumah lo muin a lo muhìl a ni ngei ang, a maimichhîng a, in chhûngah chuan țawng ri a awm mang lo va, a bulah chuan kan țhu nghâl a, a kut chu kan vawnsak a.

"Ka pa, Lawmite pawh an lo thleng tawh a nia, hmuh châka i lam i lam țhin kha, hei Hruaitea pawh a lo thleng tawh, han meng tawh la?" U Mami'n a tih chuan a lo muhìl lo a ni chêk ang chu, vài riai hian a rawn meng lap lap a, a chàu tih a mitmeng ațang pawh chuan a hriat ngawih ngawih. A kut chu a hma aia nghet chuan ka vawnsak a, a pum nâ chu a lo na viau a ni ang, a hmêl pawh a tla dâk mai a, a mit khur pawh a thûk viau hman mai, mittui pawnláng tih takah ka pa hmel chuan ka mittui chu a titling leh piau tawh a.

Zawi tê, hriat theih chang chang hian,"Ka lo nghâk fan fan che u a, Lawmi, ka fanu, ka lâwm e, Bawiha hi lo hmangaih tlat reng rawh aw," tiin a chàwl deuh vang vang a, ka mittui chu a far koh a,"Ka pa, tuar fan fan rawh aw, min kalsan tum miah suh," ka ti sap a, U Mami chuan ka dàr rawn dawmin, ani pawh chu a insûm nasa viau a ni ngei ang, a hmui chu a hup tlat a.

"Bawiha, i nu kha ngaidam hrâm rawh aw, i thinlunga khâkna kha paih bo daih ang che, kei pawhin ka ngaidam vek a nia," a rawn ti leh sep sep a, a țawng chu a zàwi khawp mai a, a bul chêta țhute bâkin kan hre thei lo ang tih tùr khawpa zàwi a ni. A sawi zo deuh chiah tihah chuan a thâwk dàn chu a rawn dik lo chho țan a, a âwm a rawn sêp a, kan buai chho lat mai, a kut chu min peih lohsan hlau tak chuan ka chelh tlat a; mahse, mihringte dan rual loh thihna kut vâwt chuan ka pa chu a rawn man ta, ţapin au rawng rawng mah ila a nunna kan chelh thei lo, in chhûng chu lungngaia țahna riin a khat zui ta nghâl a.

Engkim mai chu mumang ang ruai ni maiin ka hria. Hmeichhia ka ni a, ka țap rawng rawng mai, Hminga erawh a ngawi reng a, a rilru nat dàn tùr leh hrehawm a tih dàn tùr chu ka ngaihtuah thiam phâk lo zâwkin ka ring, amah hringtupa ngei mai chu a enkawl hman lohin thihna nunrâwng zet chuan a nunna a lâksak ta si a, ka pain hrehawm leh na ti taka a pum nâ a lo tuar chu ka khawngaih a, a pa na tuar enkawl hman miah lova thlah liamtu ka pasal Hminga hi ka khawngaih tak zet bawk, engtiang taka nain nge hrehawm a tih ang le?

Hminga leh ka pa chu kalsan hreh viau mah ila Daxton-a ngaihtuah a ngai bawk si, ka tlaivâr ve ta lo a ni. Tlaivár lo ti ila mut hmunah ka meng tlaivâr tho, ka mittui a tla reng mai a, ka pa kal thut chuan inrinna hun min pe tlêm lutuk a, hriat thiam a har ka ti. Text message-in kan chanchin chu kan țhiante ka hrilh kual zung zung a, biak chu ka ngam chiah lo, a tlai tawh ropui si a.

Mang țha lo mang ang mai niin ka inhria, ni dang ang lo takin Daxton-a lah chu zîng a thawh a țangin a'n dik lo nghâl a, a tlei țha duh miah lo, chu chuan rilru a ti-ipik zual a, Hminga bula awm pawh duh viau mah ila, mi zînga awm ve a inthlahrunawm lutuk.

Julian-a, Ațana leh Sawmkima hmel kan han hmu a, ka nu leh pa leh Hminga thawhpuite kan han hmu tel bawk a, an tilàwmawm ka ti a, an buai àwm tehlul hlawm nèn, kan inhmuh khâwm dàn erawh chuan lung a tiáwi lo viau thung.

Sêna pawhin a pu thi chu a tuar khawp mai a, mipa mah ni se a pu ruang bulah chuan țhuin a țap reng mai a, a țhiante pahnih pawhin an kalsan lo.  A demawm lêm lo, a pu chu a awmpui nasain an pahnih chuan an inhrawn ve nasa êm mai a, an inawmpui nasatzia ngaihtuah chuan a tupa pawh ni lova a fapa naupang zâwk ni àwm tak a ni.

Mi dang chu mi dang lo ni ta se, Hminga ber chu a ni ka ngaihtuah ni. A rilru a phîr ngawt ang, Aizawla phei leh ngei chu kan ngaiin ka ring a, heta a pa hmun ruak han kalsana  han awm bo daih pawh chu àwm lo a ti viau ang a, lehlamah lah hnain a lo hmuak kuh țul bawk ang a, a rilru a hahin a hrehawm ngawt ang chu, a pa a neih chhunin na tak tuarin a kalsan a ni a, a tuar na dâwn bawk si.

Hrehawm ka ti ve tak zet a ni. Ka pa chu a kal tawh a, ngaihtuah zui a ngai tawh lo; mahse, a kalsan tâk a fapa ber hi a ni, țawng tlèm tawh nâklaiin, a pa boral chuan a țawng tlèmtîr zual a, tuar lo ang deuhin lang mah se ka chîk cheuh cheuh hian a thinlung a hrehawmin a tuar na tak zet tih ka hre reng mai si a, hnem ka duh; mahse, engtin nge ka hnem chuan ang?

Aizawlah kan phei leh lo thei si lo va, kan phei leh ta nge nge a. Kan fapa Daxton-a'n a nun nguina a chhâwk êm zâwk a, chau hnêpa nilénga hna a thawh pawhin a fapa hi chu a lawm loh phah lo, a pawm a, a kuah a, duat takin a pawm hlù hlú a," I pu chu i hre hman ve ta si lo, a duh tehlul che nèn," a ti sup sup a, a chângin," I hming hi i pu phuah a ni asin," a ti leh bawk a. A ni rêng bawk a, ka pa khân,"Vanlalhruaia tih ni rawh se, Pathian hi Lei leh vàn lal a ni a, min hruaina hi a ropui êm asin, tûn dinhmun kan thlen theih chhan pawh hi Ami hruaina vàng chauh a ni," tiin, 'Vanlalhruaia' tiin a hming kan sa ta a nih kha.

"I pi erawh ka ngaidam thei lo ang, khati khawpa i pu tihrehawma keini thleng pawha hrehawma min kalsantu i pi kha chu ka ngaidam lo ang. Ka fapa, i pu min enkawl chhoh ang khân a țha thei ang berin ka enkawl chho ve ang che, ka hmangaih che a; mahse, ka thinlunga khâkna, i pi huatna awm hi chu a reh mai mai thei lo ang, chu chu rawn nei ve lul suh aw," tiin a be sup sup reng a,  ka lo ngaithla ru reng tih pawh a hre kher lo ang.

A nu chu a lo la haw reng a nih chiah hi. A pa boral a tuar bawk nèn, chu chuan nunhlui ngaihtuah léttîrin a nu a huatna dai tawh nia a ngaih kha a zu chhêm alh țha leh a ni ngei ang, a thinlunga khâkna hi a pa khân a lo hmuh hmaih lo nasa a lo nih chiah hi.

*A CHÂNG CHUAN HRINGNUN HIAN KAN NGAIHTUAH NGAI LOH LEH SUANGTUAH PHÂK LOH RAM MIN DAITÎRIN DUH TÂWKA MIN NGHAISAIN BEIDAWNNA KHURAH MIN LÈN LÛT FO ȚHIN*