☆OKHEE☆ - 36 By Dingdi Pachuau

 

☆OKHEE☆ - 36 By Dingdi Pachuau

Ka pa boral chu Sêna'n a tuar bawk a, hrehawm a ti viau ngei ang, min rawn be zut a, han hnem dàn tùr ka hre lo țhìn ngei mai; mahse, dawhthei takin a thu sawi ngaithlain ka theih ang angin ka hnèm ve țhìn, khuareiin a la hnèm ngei ang tih pawh ka hria a ni. Țhalai a ni a, hma hun êng nei a ni a, hun a ral ang a, a zia mai ang. Hminga erawh hi chuan eng thil mah a sawi chhuak ngai lo, ka zâwta ka sawi chhuak a nih ngawt loh chuan. Thil țûl lo tak ni mah se a châng chuan ka pa chanchin min rawn hrilh tirh khân phei vat ni ila aw tiin ka ngaihtuah țhìn, phei ni ila a zuam lo chung pawh khân Lunglei lamah emaw tal tlàn thlâkpui ila, a nunna kha kan chhan thei maithei si a tiin; mahse, thil țûl lo leh țha lo a ni tih ka hria, Hminga pawh hian a ngaihtuah ve țhìn hialin ka ring a ni, a rûk tak chuan ka pa chanchin kan hriat rual rual khân phei nghâl a duh rum rumin ka ring, kei lah khân," Phei ila," tiin ka lo sawipui hran bawk si lo va, khati khawp khân a lo tuar nâ ang tih ka ngaihtuah phâk loh bâkah khati rum rum tùrah khân ka lo ngai phal bîk lo a ni.

"Min ngaidam rawh aw."

Daxton-a a muhìl tawh a, a pa nèn erawh chuan kan la meng reng thung. A kut lehlamin min kuah a, lehlam erawh a lukham thung a, ceiling a en chho reng a; mahse, a hmuh ka ring hauh lo thung.

Min rawn en nghâl vat a, kei erawh chuan a âwm lam chu ka melh thla nghâl daih thung a, a âwm chu chûlin ka hmui chu ka pet fan fan a.

"Eng thil nge i sawi?!!"

Min zâwt angin lang mah se ka thil sawi kha a hria tih ka hria, mit khap sak pah chuan," Ka fel lo êm a ni, ka pa chungchâng ka ngaihtuah lêt châng phei hi chuan--" ka sawi laklawh lai chuan," Khatiang thu kha chu i ka ațanga chhuak tùrin ka duh lo, mi tân chuan mi fel famkim i ni lo maithei; mahse, kan tân chuan i ni, fel loh thu kha chu sawi tawh miah suh,"a lo ti daih a.

"Mahse, ka ngaihtuah lêt hian ka pa--" ka hmui chu a rawn hup ta chat a, ka sawi zawm thei ta lo, ka hmel en thei tùr chuan insiam remin a rawn tawlh hniam a, kan inmelh vang vang a, chutah, thûm dam dap leh hnial theih rual loh tùr hian," Khatiang kha i sawi leh chuan ka thin a rim tawh ang, ngaihdam ngai tùrin eng thil mah i tisual lo, ka pa boralnaah khân inmawhchhiat tùr kan awm lo, a kal a, a kal a ni mai, thil țûl lo ngaihtuah tawh suh," a ti a, sawi zawm lehin,"Ka kianga i awm tlat avàng hian ka lâwm e," a ti leh sup a, ka hmui a hupna kut chu la sawnin min kuah zui ta hlù hlú a.

"Ka pasal i ni alawm," tiin a nghâwng chu ka fawhsak zauh a," I lungngaihna zawng zawngte hi lâk kiansak vek thei che ila ka ti tak zet a ni," ka ti leh sep sep a, ani chuan a hma aia ngheta min kuah pah chuan,"Ka kianga i awm phawt chuan eng lungngaihna pawh ka pal tlang thei vek ang tih ka hria asin, ka chakna hnâr i ni alawm," a ti leh sup sup a, a thil sawi chuan ka rilru hrehawmna pawh chu a tidam sawng sawng thei hial mai.

Pathianni chhùn inkhâwm bànah Martha-ite inah kan lêng a, Daxton-a a tlangvâl ve tawh a, Harriet-i chhang, tlêm lai lawka piang chu kan la en mumal lo va, en pahin kan va tlawh a ni. Harriet-i chuan Daxton-a chu a awm a, chhuatah a țhutpui a, nuam an ti khawp mai.

Martha-ite fa pahnihna hi hmeichhia ni lehin a hmingah Lalruatkimi an sa a, a nu leh pa hming chawiin Sawmkima pain a phuah ve ngei a ni. Tunah thla hnihna tùr hmang ve mêkin a fel leh tawh reuh khawp mai a, a ngo reuh si a, a tê reuh bawk nèn, a lawmawm reuh lutuk ringawt.

"A hmel țha reuh tiraw?" tiin Hminga chu ka zâwt a, ani pawh chuan," Țha reuh khawp mai," a lo ti ve mai a, Martha-i chuan,"In neih leh hunah chuan hmeichhia in nei ve tawh ang a, hei aia țha daih hi in la nei dâwn nia. Tuna mi hi chuan a pa lam aiin keima lam min chhùn deuh zâwk a, a tê fel êt mai a," tiin a nui var var a, Sawmkima chuan,"A duhawmin a hmel țha tho alawm," a lo ti vat a.

"Nia, a duhawm khawp mai. A pa pawh a chhùn ka ti reng tho mai, a hmaifangah tak phei chuan a pa a chhùn mah ka lo ti asin," ka lo ti ve a, Martha-i chuan,"Mipa ka hrinsak thei mang rih si lo va, a hmel tal hi chuan a chhun ve a ngai a ni," tiin Sawmkima chu a en a, ani chuan," E, lungngai mah ta che, football team khat daih fa i san chhuah hunah chuan e, mipa fa an rawn chhuak tel tawh hrim hrim ang," a lo ti vat a, a nui sûng bawk a.

Anni nupa hi zawng, fiamthu hi an duh a, an bula awm hi a hlimawm thei a nia, Hminga pawh a lo nui ve suk suk mai, football team daih an sawi chhuah vàng pawh kha a ni mahna le!

"Tak tak chuan, kan neih leh hunah chuan mipa kan nei ngei tawh ang," Sawmkima'n a tih leh chuan," Engati maw?" ka lo ti vat a, ani chuan," E, tih dàn ka thiam tawh dâwn alawm, Halan-a'n mipa neih dàn min hrilh a, kei pawhin hmeichhe neih dàn ka hrilh ve bawk a," nui hauh lo hian a ti a, Hminga chu ka melh a, chutiang sawi tùr chuan ka ring chiah si lo, Sawmkima lah chuan a sawi thutak ropui bawk si a.

Martha-i chu a rawn nui chhuak hawk a," I sawi âwihawm lutuk a, kei ngei pawhin ka âwih thei tak tak dâwn alawm le!" a ti a, a nui hawk hawk a, kei pawh chuan nui chung hian," Kei deuh, ka âwih tak tak țêp a ni, " ka lo ti ve a.

"Engah nge in âwih loh ngawt le? Zanin ațangin kan mut dàn pawh kan sawn nghâl ang, mipa neih dâwn chuan kan tih dàn phung zawng zawng thlâk vek a ngai," Sawmkima chuan a ti leh a, a la nui duh hauh bawk si lo va, a tih tak lutuk avàng chuan a thil sawi ai chuan amah chu a nuihzatthlâk zâwk!

Chhùna thil kan ei lai chuan thil ka ngaihtuah mai mai a, ka ngaihtuah chhuah tâk chu Sawmkima hian Hminga nu chanchin hi a hre ve ang em tih a ni, an inkawm țhin laite khân Hminga hian a sawi chhuak ve ang em? Ani hian, a lo hre mial lo'ng maw? Chu thil chu han zawh chhin mai mai ka duh ta viau mai, a lo hriat loh leh ngai ka awh dâwn tihna a ni mai a, a lo hre ve mial a nih chuan... Hminga ka ațang hi chuan a nu chanchin hi ka zâwt hlawl a nih loh chuan ka hriat belh pawhin ka ring lo, a sawi ka hriat rûk dàn ațang phei hi chuan ka ring lo bur.

Mahse, Sawmkima pawhin a lo hre hauh lo," A nu chanchin a la sawi ngai hauh lo, ka zâwt ngai lo bawk," tiin min chhâng a, dâwt a sawi pawh ka ring chuang lo. Ka pa pawhin a sawi tawh kha,"A nu chanchin sawi hi chuan a kal sawn daih zêl," a ti alawm, ka han ngaihtuah thui deuh a, tlêm lai deuha a nu chanchin min han hrilh ve mai te pawh kha a mak ka ti ta hial zâwk mai, tunah hian a la haw reng tih ka hre lehnghâl tawh a, a chanchin hi ka hriatah a sawi duh tawh hauh lo ang le.

Ka pate pawhin min ngaihtuah a, an rawn lang zut a, kawng tam takah ka hahdam phah khawp mai. Ka duh dàn takah phei chuan chhùn lamah nau awm tùr hi chhawr ila, Hminga hi a theih ang angin thawhpui ve ila ka ti; mahse, a phal dâwn si lo. 

Ni khat chu Hminga kan in lamah thil țûl ti tùrin a kal lawk a, Daxton-a a muthilh avàng leh khuma ka mut avàng chuan ka chhuahpui ve thei lo va, mutpuan sûk ka duh bawk si avàngin a muthilh chhûnga insûk chu ka tum a. A chhuah hnu lawkah chuan sûk tùrho chu machine-ah vawm lûtin ka hertîr nghâl vut vut a, insûk tùr thuamhnaw lian a tam hran loh avàng chuan ka hmanhmawh lutuk hran lo. Chutih lai chu doorbell a rawn ri ral ral a, Hminga'n min rawn fiam a nih ringin nui sâng chung hian kawngkhàr chu ka va hawng a, pâwna lo ding ka hmuh chuan ka nui hmêl erawh a reh ta deuh; mahse, ka la nui deuh tho.

"Lo lût rawh, eng nge ni ta?" tiin ka chhawn vat a, chu nu chuan nui hmel pu ve deuh chung hian," A, eng dang ni lo ve, ka lo lût deuh lawk mai mai a ni, in hi ka rawn tlawh leh duh deuh a, in luahna a rei tawh em?" a ti a.

Țhu tùra țhutna kawh hmuh pah chuan," Lo țhu rawh, thingpui ka'n siam ang e," ka ti a, ani chuan," A ngai lo, ka rawn dâk zawk tak tak a ni, in chhûng hi ka hmuh leh châk deuh vàng a nia, a nuam reuh asin," a lo ti leh a.

Thingpui pêk pah chuan,"Nia, nuam reuh khawp mai, kan luah luhna chu a rei ve tawh ti ila a dik tho ang chu, a hmain in lo luah ve tawh tihna em ni?" tiin ka zâwt nghâl a, thingpui chu a in hlak phawt a, chumi hnuah chuan muangchâng hian min rawn en leh a," Umm, kan pa la dam lai khân kan luah țhìn a; mahse, a lo rei ve ta a ni ang, a lo danglam ve tawh êm mai," a ti ta sap a.

"Oh, pawi ka ti hlê mai," ka lo ti vat a, Hminga ka hre chhuak zawk mai. Nupa niin kan hlim dun hle a, inhmangaih takin kan awm chho zêl ang a, kum te ralin nakinah chuan kan taksa a rawn chak lo ang a, chutih hunah chuan tu emaw zâwk zâwk kan la inkalsan ve ngei ang, ani'n min kalsan hmasak chuan ka bula țhu ang mai hian ka mal viau ang a, keiin ka kalsan hmasak thung chuan ka pa ang mai kha a ni ve ngei ang, chu hun zet chu, thleng thei lo se...mahse, dam chuan a lo la thleng ngei ang.

"Khawvêl hi zawng kan kum hlunna tùr a ni lo va, nupaah pawh tu emaw zâwk zâwk kan inkalsan hmasak châng a awm lo thei lo a ni," ka bula țhu, ka nu rual tùr vêl zet, hmel chhe lêm lo tak chuan a lo ti leh a, dik ti takin ka lu chu ka lo bu nghat a, nichina ka thil ngaihtyah chiah kha a rawn sawi chhuak leh chat mai, dik ti viau mah ila thleng ngai lo se ka ti.

"A dik alawm," ka ti ve sap a, chutah," I duh phawt chuan en kual rawh, keini hi chuan kan tidanglam teh chiam lo; nahse, kan hmaa luahtute'n engtin nge an tihdanglam phei chu ka hre lo va," ka ti leh a, ani chuan min en vang vang pah hian," Chhûngkua eng zât nge chêng che u?" a ti leh ta daih a.

Kan chhûngkaw zât ka hrilh a, chutih lai chuan machine inher ri pawh chu a lo tàwp tawh a, room lam ațangin Daxton-a țap ri pawh a rawn chhuak ta bawk.

"Min lo hre thiam lawk mai aw, naute a harh tlat mai," tiin room lamah ka tlãn lût nghâl a, a harhna a la rei lo a niang, a lo țap țan deuh chauh a lo ni. Ka pawm nghâl vat a, ka chhuahpui nghâl bawk a, inlêngnu pawh chu a lo la țhu fel ât a.

"A va hmel țha ve!"

"Ka lâwm e," tiin ka nuih sak a, Daxton-a țap deuh pawh chu țawng ri a hriat avàng chuan a bâng ve mai a, a awm laia hnute han pêk chu ka hreh deuh avàng chuan ka pawm rih a. Kan nufaa min thlêk tawn reng hnuah chuan," Naute chuan a pa a chhùn zãwk a ni ngei ang maw," nui chunga a tih leh tâkah chuan kei pawh ka nui ve a," Nia, a pa hi a chhùn fuh ve a; mahse, mipa hi chuan pate hi chhùn se a țha zâwkin ka hria, an pate hi an lãwm duhin ka hria," ka ti ve leh a, ani pawh chu a bu nghat a," Dik chiah, bâkah, an fa an rïla rah ngei a ni tih hi a hai theih loh a,'Ka fa ngei a ni,' tiin ngaihțha takin, duat takin an pawm thei bawk a ni, țhenawmpa chhùn daih se zawng buaina a awm maithei a nia," nui chung vêk hian a ti leh a.

A lêng rei lo, a chhuah hnu chuan Daxton-a chu hnute ka pe a, chhùn thingpui in hma chuan Hminga pawh a rawn haw ve mai a, thingpui in zawh hnuah chuan naute a lo awm a, ka insu chhunzawm ve leh thei ta a.

Zàn mut hmunah chuan vawiina ka inlêngnu thil sawi kha ka ngaihtuah chhunzawm leh ta a, ka bula mua min kuah chialtu Hminga chuan min kalsan tùr angin ka han ngaihtuah chhin a, lu thingin ka thaw deuh hak a, ka phal thei lo ang, hrehawm ka ti dâwn lutuk.

"Eng thil nge i ngaihtuah?"

Kuah lêt chãih chãih pah chuan," Keini chu engtikah mah inkalsan ve miah lo ang aw, min kalsan tùrin ka duh lo che a, kalsan hmasak che lah ka duh hek lo," ka ti sap sap a, ani chuan," Eng thil țha lo nge maw i lo ngaihtuah ni?" tiin ka hnung chu a chûl hoh hoh a, chutah," Ka kalsan ngai lo ang che, min kalsan lah ka phal hek lo ang, ka hmangaih che alawm," a ti sup sup a, chutah, a hmel en thei tùr chuan min kuai dâk a," Thil țha lo lam chu ngaihtuah tawh miah suh aw," ti lehin ka hmuiah chuan a rawn fâwp zui a, duhthawh takin ka lo chhâng lët ve nghâl zat a.

Zirtàwpni a ni a, ka nu leh pain Daxton-a an rawn awm leh a, an awm lai chuhin Hminga lehkha dahna chu ka rem felsak a, thil ka zawng ru pah bawk a. A nu thlalâk a lo kawl ru maithei tiin, a lehkhabu chu ka keu chhin thuak thuak vek a, a vâng khawp mai. Ka beidawn tawh lam, lehkhabu ka rem fel zo, drawer ka en leh chhin chuan lehkhabu tê deuh hlek kâra nu pakhat thlalâk chu ka hmu fuh ta, kut khùr deuh dar dar chuan ka han en chiang a, U Lianpuii nèn an inang kher mai, a nu a nih ngei ka ring nghâl bawk. A nu chu a lo chhui ru ve tho a lo nih hi, ka nui ta sak a, haw viau mah se a la chhui ru tho, chuti a nih chuan a rilruah eng emaw tak chu a la awm tihna a ni.

Thlâlâk hnungah chuan a address ni ngei tùr hi a la inziak zui a, Khatla lam daih a lo ni nghe nghe a, kan inhnaih lêm lo nain a address ațang chuan hmuh a harsa dâwn lo tih ka hria, Hminga hian a lo hmu tawh reng zâwk a ni lo maw?!! Mahse, ka ring chiah lo deuh.

Zanriah kan ei lai chuan,"Nau awm tùr hi chhawr ila chhùn lamah hi chuan ka pui thei reng tawh che sia?" tiin a thuphungin ka han sawi chhuak chhin a, țawng lo chuan min en vung vung a.

"I bula awm ka duh alawm, i hriat kha," tiin ka han nuih tlawn a, ani erawh chu a nui hauh lo," A theih loh, nautein kum khat tling phawt rawh se," a lo ti sup a, kei chuan,"A mak thei, ka duh zâwng chu min tihtîr ve mai la, aw?? Kan nufain i bula awm kan duh a, phal ve mai rawh, Duhtak? Ka puih theih che chuan tlêm tlêmin i ko pawh a zãng ve thei ang a, kei lahin puih che chu ka châk ber a ni bawk a?" ka ti ve thung a, a phal chu ka la ring chuang lo nain ka ti leh hrim hrim a ni.

Mahse, min en rùn rûn hnuah chuan a nui ta suk a,"Duhawm deuh hian min dìl ziah suh, ka hnial zo lo ziah che a," a tih chuan ka âwih lo hial a ni! Mahse, min tihder lo tih hre nghâlin ka nui ta var var a, mit chu siai sakin," Duhawm min tih hian nuam ka ti, duhawm tak takah ka inngai ziah bawk," ka ti lêt sap a, arsa kana a duh lai ber țhìn a thial chu ka suahsak nghâl zat bawk a, tunah chuan nau awmtu zawn chiah ka hmabâk ta.

Nau awm tùr chu ka hmu ta thuai a, kârleh ațanga lo kal tùrin kan inbe thlu a, a hrehawm vak lo ang, office chhûngah hna kan thawh chhûngin a lo awmpui ve ang a, a muthilh hunah lah a mut mai thei bawk ang. Hminga'n room chhûng chu lo sîksàwiin Daxton-a mutna tùr leh a chêt tlatna tùr hmun a lo siam fel vek tawh bawk a, kârleh lo thlen hun chu nghâkhlel takin kan thlîr ta ràn e.

"Engati nge ka thil duh ka dìl che hian min phalsak ziah a?" tiin mutnaah chuan ka zâwt leh lawi a, ani lah chuan," Duhawm tak, hnial theih rual loh hian min dîl ziah si a," a lo ti mai a, kei chuan," Chuvàng chuan maw?" ka ti leh ngat a.

"Umm...bâkah, i duh tihhlawhtlinsak  loh che hi hrehawm ka ti alawm, i phûr theiin nuam i ti țhin si a," a lo tih leh chuan ka ngawi vang vang phawt a, chutah," A nih, thil dang daih, i bialnu hmasa kha a duh i tihhlawhtlinsak ve țhin em?" tiin ka zâwt ta daih a.

"Ani nèn chuan in inang lo."

Ka zawh chhan tak hi chu kan inan leh an loh lam ni lovin ani kha chu Sêna khân duat viau ni khân a sawi a, leiletah pawh kal phal lovin keh thei dawm tak meuh khân a dawm niin a sawi tlat a ni. Kei hi chu ka duhna apiangah kalin ka duh apiang min tihtîr pawp pawp mai a, a chhan ka hre châk deuh a ni.

"Ang nâng, ani chu ani a nia, kei hi chu kei ka ni leh a," nui pah deuh chunga ka tih leh chuan," Dik chiah. Chuan, nang chu ka nupui, ka hmangaih leh duh êm êm i ni a," a lo ti leh a." Hmeichhe chak tâwk tak leh inzo veh vawh tak ni mah la, min nghènga kal dàn i thiam a, i pasal hi min zahin min chawimawi thiam bâkah ka chhûngte thlengin i hmangaih thiam a, ka lâwm hlê a ni," a ti leh duah a, min fakna avàng chuan a hmuiah ka'n fawhsak zauh kha.

Hna ka thawhpui theih tâk hnu chuan amah pawh a hahdam thei ta sawt mai tih ka hmu thei a, office-ah innghèng riala țhuin hna kan thawk a, kan thawh kârlakah Daxton-a hnute pein kan han làwm leh rih țhin bawk a, a muthilh chângin hna erawh kan thawk ãm ve khawp a, biak pawh kan inbe hman meuh lo. Ka pate an khua a har khawp mai a," Mi dang awmtîr ai chuan inah kan lo thei reng si a," ka nuin a ti a, ka pa pawh chuan,"Ka tupa duat hmu lova nilèn zawng, ni a reiin a khawharthlâk thei êm mai," a rawn ti ve bawk a, a ni ve lah tak a, ni tin kan chhuahpui ang chu a ni ta a, anni tân rawn lènna hun a awm tawh mang lo, kâr tàwpah leh zànah a nih ngawt loh chuan. An tu hmuh chhun a la ni bawk a, an duat a nia, ani hian duat a la hre thiam lo mai pawh a, a hriat thiam hunah phei chuan an duat sual thei ngei ngei ang, a duh apiang kha an han tihsak ang a...

Dàwr lamah pawh kan kal zeuh zeuh a, nupa kan ni tih an hre tho nain hmeichheho hian Hminga chu an en duh thei riauin ka hria a, an hriat theih tùr ngei hian ka pasal a ni tih hriat theih nân ka țawng deuh kher țhin. Ani lah hian thîk tùr hian hmeichhe dang a melh ngai lo hle mai thung a, han thîk tùr hi ka hre mawlh lo a ni, ani pawh hian mipa dang thîk tùr a hmuh ka ring bîk lo.

Mahse, aniin a melh lo pawh chu a lo ni maithei, hmeichhe lam erawh chuan mi pâ a ni tih pawh hre mah se an lo pawisa chuang lo a ni chêk ang chu, chhùna kan chawlh hma hret chuan phone call a rawn kal a, a chhàn zawh chuan," Ka'n chhuak lawk ang e aw, eng nge i ei duh ka lo lei nghâl dâwn em niang?" a ti nghâl zat a, kei chuan," I duh duh a ni mai," ka lo ti ve mai bawk a.

Ka tih tùr ka tih zawh chuan thovin Daxton-a muhìl chu a biangah ka'n chuk zoh a, tukverh lam pan chuan ka kal nghâl a, nau awmtunu Latei erawh chuan lehkhabu a chhiar thung, hun ãwl a neih hi chuan Daxton-a bulah chuan țhuin games a khelh loh leh lehkhabu a chhiar ve mai țhin.

Tukverhah chuan dâkin ka han hawi kual a, kawng lam ka hawi thlâk chuan  Hmingatè inbe lai ni àwm tak chu ka zu hmu a; mahse, Hminga a nih ka ring lo leh deuh hlek a, ka han en chiang leh ngat a; mahse, vawiina a kamiz hâk ang rawng ngei kha hain  ka hmu, amah a ni tlat a ni; mahse, tu nge a biak khu ni ta? Mipa ni lovin hmeichhia, chu pawh chhe lo zet mai a ni tih a hriat reng. Ka en deuh reng a, eng thil nge an sawi ang? Hmeichhia lah chuan a la din hnaih deuh deuh zui a, a hnuah phei chuan a kutah a la vawnsak zui a. Ka  kawchhûng lamah rawn che zawk a awm, khu hmeichhia khu tu nge ni ta? Mi pasal a ni tawh tih a hria ang em? Tu hmeichhia mah thîk ka nei ngai lo ka lo ti ve țhin ngei mai; mahse, tunah hi chuan a ni ta hauh lo mai!

*AWMZE NEI LOVA THIL SAWI VAK VAK AI CHUAN AWMZE NEI TAKA NGAWIH NGAM HI A ȚHA ZÂWK*