☆OKHEE☆ - 38 By Dingdi Pachuau

 ☆OKHEE☆ - 38 By Dingdi Pachuau

"A zak lo hle mai!" a ti leh sup a, a awka chhuak ațang chuan a tider hauh lo tih a hriat êm avang chuan a ngaihna ka hre lo kher mai, ka inléngnu chu zak lo a ti a nih chu, a hriat zâwng mi a ni tihna em ni? A țawngkam chhuak atân chuan mak ka ti, bâkah, a thinrim hmel bawk si a, inhmêl hriatin inhmuh thiam lohna an lo nei tawh a ni ngei ang.

"Kan boruak ka tichhe vek a ni tiraw?" ka ti sap a, ka lo sawi chhuak ta kher kher chu ka inchhîr kher mai; mahse, awmzia a awm tawh si lo," A ni leh lo," han tih chi lah chu a ni tawh bawk si lo nèn, sawi chhuak fuh lo tak chu ka ni.

"Tûn ațang chuan kan ina a rawn kal hi ka rêmti  tawh hauh lo. Ka tét laia kan lak ațanga a kal bo chiah khân kan inzawmna a tichat tawh a ni, inzawmna kan neih tawh loh bâkah kan chunga a thil tih vàng khân kei chuan ka ngaidam thei tawh ngai lo vang. Ka pa dam lai kha chuan ka pa vàng liau liau khân huatna rilru put loh ka tum ve hrâm hrâm țhìn a; mahse, tunah hi chuan..." tiin a thaw hawk a, a awka chhuak ațang ringawt pawh chuan a thin a rim tih a hriat theih viau, a vîn hauh lo; mahse, a thinlung chhûngrilah a nu huat ngawih ngawihna chuan bu a khuar nghet thawkhat tih a hriat a, a thil sawi pawh kha sawi zo vek lo mah se a sawi tum chu a chiang viau tho a ni. 

Mahse, zanin atân chuan hetiang boruak neih hi ka duh lo, a birthday a ni a, hlim taka hmangin a hriat reng tawh tùr hun hlû siamsak ka duh a nih kha.

"Ka thil sawi kha theihnghilh vek ang aw, huatna thinlung pua muthilhpui tùrin ka duh lo che, i thei ang tiraw? I thei ang tih ka hria a ni," tiin a thinrim avànga a taksa insangmar țeuh chu ka khawih de de a; mahse, hria ang pawhin a awm lo. A thaw leh hawk a, a biangah chuan dawmin a mitah chuan ka en chho a, a rilru a na thar leh tak zet a ni tih chu ka hre chiang ngang mai. Ka inthiam lo viau a ni.

"A pawi ka ti, sawi loh tawp tùr ka sawi a, i rilru pawh ka tihrehawm leh ta vek si a; mahse, ka hmangaih che, ka hmangaihna che hian i lo nat tawhna zawng zawng chu tuam dam leh vek ka tum ang, min remtihsak phawt chuan," ka ti sap sap a, dìm takin a hmuiah chuan ka fawhsak a, a taksa insangmar viau pawh chu zàwi záwiin a inthlah dul ve ta hret  hret a.

Min kuah chial chunga a muhìl thaw ri sâk sâk ri chu ka ngaithla reng a, a muthilh lai hi chuan a thinlungah huatnain hmun chang lo se ka ti, thlamuang takin muhìl se, naktûk lamah chuan zanin boruak hrehawm kha chu paih bo hmak ni se.

Ka muthilh theih loh avàng chuan thil ka ngaihtuah kual leh ta a, ka inlêngnu kha Hminga nu a lo ni reng mai a nia! Mak ka ti a ni, Hminga nu a ni tih engtin nge ka lo hriat loh theih ni? A hmel ka han mitthlà lêt a, U Lianpuii nèn an inang viau lehnghâl sia, a nu ni tùra ka lo ngaihtuah chhin loh vàng a ni ngei ang chu.

"Heti khawpa huatna leh natna nei tùra nangmah hringtu ngei che i nu hian engtiang fakaua nâin nge a siam che le? Heti khawpa i nu ngèi pawh huaa i thinrim thei a nih chuan kei chuan i natna tùrin eng thil mah ka ti lo ang," ti sep sepin a kut chu zàwi tê têin ka chûl hliau hliau a, he khawvêlah hian mipa tam tak an awm ngei a; mahse, chûng chu ka mamawh lo, amah ngei hi ka pasal tùra ka mipa thlan chu a ni a, a hming hian min muanin chakna min pe a, ka tân chuan a hming hian awmzia a nei tak zet bawk. Ka kalsan ngai lo ang a, a duh loh záwngin ka awm hek lo ang.

Ka pa ka ngaihtuah chhuak leh a, ani khân a fapa hi a lo hre chiang hlê a lo ni, a nu huatna kha a la pai reng tih a hria a, a boral dâwn minute-ah pawh a nu chu ngaidam turin a la ngèn hrâm hrâm a nih kha, ka pa pawh kha a hun lai kha chuan a rilru chu a nâin hrehawm a ti ang a, a zak viau bawk ang chu. A lo puitling àwm hi ka tia, a fate pathum chu țùlpuiin a enkawl chho a, nupui dang pawh a nei zui miah lo a nia, a thih ni thlengin. An nuin a chhuahsan khân a kum a la upa vak miah lo ang, 'Hminga pawh a la tê' ka pa khân a ti a nia, la țhalai zek zawk leh lunglêng rual a la ni ngei ang a, chuti chung chung chuan a fate țùlpuiin an nu chu a ngaidam hmak thei a ni a, a ngaihsànawm ka ti hnuhnawh kher asin, a nun chu entawn tlâk ka ti, kei ni ve ta ila  tuna Hminga rilru ang tho hi ka pu ve hialin ka ring. Ka pa boral hma khân Hminga rilru hriat nân a nu chungchâng ka zawh ve tawh tak kha, khâng hun lai kha chuan ka pa a la boral lo va, a nu a huatna kha tûn ang êm hi chu a ni tawh lo maw le; mahse, tunah chuan a huatna mei de sët sët tawh kha a pa boral avànga a rilru nâ chuan a rawn chhêm alh leh ta tlat si a, a pa ngenna, a thu chah hnuhnung pawh kha hlen chhuahin a awm thei lo ang tih pawh a hlauhawm ta khawp mai.

A tûkah chuan kan boruak a pângngai thlap. Nizàn lam chanchin a sawi chhuak lo va, kei pawhin ka sawi chhuak hek lo, ka be bawrh bawrh reng a, a nu a huat avàngin ka dem lo va, dimdâwih tak leh hmangaih taka enkawl ka tum ruh sauh a ni.

A birthday kan lawm zànah Bawihtea chu a kal thei ta leu leu mai le! Mak kan ti kher asin, a loh theih loh, a chhan chu a hmain kal a tum chhin ngai tlat lo va, din erawh a ding ve zauh zauh tawh thung. Kan làwm lutuk chuan kan kîl bial luih a, kan kaltîr deuh chhên a, ka pa pekin a lo khawngaih a," A ke kha a kham lutuk ang," a lo ti nghut a, ka nu pawh chuan," Ni e, zànah a muhìl țha thei lo palh ang e," a lo ti ve bawk a, mi dang, birthday lawmnaa kan sàwmte chu an lo nui țhâ hlawm a, kei pawh ka nui ve tawp tho. Tûte duat hi an pe na ve thei a nia, an fa neih chhunin an tupa ka han hrinsak a, an duat hlum lo chauh pawh hi an demawm tehchiam bîk lo.

A tûk zînga ka kaltîr pawh chuan a pa chuan," A kal nasa lutuk tawh," a rawn ti ve sup a, a rawn pawm zui nghâl a, kei chuan," A kal nasat khân a kal nghet hma thei dâwn alawm," tiin kawngkaa an chhuak tùr chu kan han chhâng zui a, ani lah chuan,"Kal nghehtîr i tum hma lutuk a nih kha, a kal thei ve țan chauh a," a rawn ti leh a, chhâng tawh lovin ka nui hawk ringawt. Ani pawh hian a duat ve têk têk khawp a, a hauh thei bawk si nèn, senior lama fapa nei a nih avàng hian hriat thiamna chin ka nei a, a châng phei chuan a fapa a awm lai hi ka thlîr reng țhìn a ni.

Bawihtea kal thei chu rin ang a ni miah lo, a kal nghet viau mai a, pai deuh uan uan leh han petek deuha balance hloh ang kha a nei mang lo, kal mai mai lah chu a duh mang dêr lo lehnghâl a, a tlãn deuh dat dat reng zâwk a ni. A pa hian a ti peih a, zîng tin hian kawtah chuan kalpuiin 'exer ka lâkpui e' a ti a, an pafa tân tracksuit inang a duh thu a han sawi chhuah phei chuan a sawi ni la lain ka lei nghâl a, a duh hi a sawi mai mai ngai si lo va, ka phùr zâwng tak a lo ni nèn, pasalte'n duh zâwng an sawi leisak chu nupuite tih tùr a ni rêng a ni.

An pafain tracksuit inang an han ha chu an hmuhnawm asin, an inhmeh dùn si, ka thlîr ning thei lo, nupui leh nu mit ațang chuan anni tluka hmuhnawm hi an awm thei ngai lo ang, mi tihlimtu ka hmangaih êm êm ka pasal leh ka fapa an ni si a. 

Hminga nu pawh a rawn lang leh tawh rih lo, pawi erawh ka ti lo khawp mai. A rawn lêng leh nulh ang a, Hminga awm lai tak te hian rawn kalin an inmelh rum viau ang tih ka hlau a ni; mahse, a chanchin dik tak erawh ka hre chiang châk khawp mai thung, a pasal fanaute chhuahsana an in a chhuahsan chhante, a... ka hre vek châk a ni mai, Hminga hi chu ka zâwt duh lo, hriat pawh a hre bîk kher lo ang; mahse, a nu kha chuan a hre chiang dâwn lutuk tlat. 

Latei kha kan la chhawr reng a; mahse, in lamah Hminga chu ka pui ve tawh thung, a chhan chu Bawihtea  a lian ve tawh a, a kal thei tawh bawk a, enkawl a ngai ve viau tawh si a, mi kuta dah ringawt ka duh tawh bîk lo a ni. Hna chu ka thlahthlam hlauh bîk chuang lo va, in lamah ka theih ang angin ka pui ve tho a, ka inthiam lo lêm lo, ani phei chuan in lamah pawh thawk lova Bawihtea lo awmpui mai mai tùr chuan min ti a; mahse, a hma a ko ve si a, tlêma lo chhâwk ve hlek hlek kha țha ka ti si a ni.

Krismas dâwnah ka pa thlànlung tùr pawh chu peih vek a ni tawh a; mahse, a boral chama phuna hun hman ve kan tih avàngin kan la phur phei duh rih lo, Krismas hmang tùra kan phei hunah kan phur phei mai ang chu. A rûk tak chuan hman phei chu ka huphurh viau mai, min lo chhàwntu ber tùr leh in pui lo nghâk tùr ber ka pa a awm tawh dâwn si lo va, khua a har dâwn êm a ni.

Hminga hnaah a kal a, inah awmin hna ka thawh zawhah chuan Ralvawng kan phei huna mi tùr thuamhnaw ka siam țan deuh a, Latei'n Bawihtea chhuahpuiin kawtah chuan a awmpui a, an nui ri rai rai pawh ka hre pha hial a, ka fapa hlim nui ri chu hriat nuam ka va ti tak êm! Ani hi zawng duat rawn ngang a ni a, a nakin hun tùr ka ngaihtuahpui hian kan duat sual mai ang tih ka hlau hial mai.

Chawhnu dâr 3 vêlah chuan zanriah ei tùr ka buatsaih țan a, Latei chuan kawngah Bawihtea a chhuahpui leh tawh a, an kal hlâ ang tih hlauin tukverh aţang chuan ka bih a, ka hmuh phâk avàng chuan ka lût leh a.

"I awm maw?" tih ri ka hriat avàng chuan ka hawi chhuak vat a, Hminga nu ka hmuh chuan ka phu deuh zawk mai a, ani lah chu a lo nui sâng thung a, inhre chhuak vatin," E, nang i ni maw? Lo țhu rawh khai," tiin ka lo be sawk sawk a. Hminga thil sawi kha chu ka ngaihtuah chhuak rauh rauh nain thil tihchi a ni lo va, hlim taka lo biak hi ka tih tùr chu a ni, tuin nge mi lo lêng tùr," Lo lêng suh," ti ang? Bâkah, a fapa in a ni tih a hre kher dâwn em ni? An in luah hlui a rawn hmu ve châk a, chutah, a pasal la dam laia an luah ngei a ni bawk si, a lung a lêng a, a rawn kal ve a ni mai.

Thingpui ka pe vat a, eng eng emaw sawiin kan titi a, kan nui bawk a, chutih lai chuan Hminga chu Bawihtea pawmin a rawn lût ta chhak chhak mai le! A nu chu vawi khat a melh zawk tih ka hria, a hmêl lan dàn zawng zawng chu a inthlâk nghâl vek tih ka hmu reng, nuam lo tihna ka nei nghâl nain a nu ka lo țhutpui avàng erawh chuan inthiam lohna ka nei hran lo, a rawn lêng ve a ni mai a, inlëng lo hnar tùr khawpin ka hawihhâwm lo bîk lo.

Ka lo be vat a," I lo haw hma hle mai, hnain ngah lo a ni maw?" tiin ka nuih a," Umm..." ti ringawtin min chhâng a, room lama luh nghâl a tum lai chuan a nu chuan," Hminga...?" a rawn ti chhuak ve ta a, a ding chawt a; mahse, a rawn hawi lêt chuang lo.

Kan ngawih deuh reng hnuah chuan,"Patling tak tak i lo ni ve ta, nupui fel tak leh fapa hmel țha tak i neih avàngin ka lawmpui che," a nu vêk chuan a rawn ti leh a, Hminga chu a ngawih reng avàng chuan kei chuan," Ka lãwm e," ka lo ti sap a.

"I fel ka ti tak tak a ni, nupui fel tak ni chhunzawm zêl ang che," tiin min rawn nuih sak a, rawn inher miah lo hian Hminga chuan," Ka nupui leh ka fapa nunah hian rawn inrawlh tum suh, nang nèn hian inzawmna pakhat mah kan nei lo bawk," zàwi dap si, thinrim tih hriat taka țawng sehchilh deuh nak si hian a rawn ti chhuak ve ta a.

Hrehawm ka lo ti ru khawp mai a; mahse, lo inrawlh erawh ka tum lo, an nufa inkâr a ni a, an inhmuhna hmasa berah hian lo inrawlh ve ngai ka ti lo, Hminga hian a duh duh han sawi phawt teh se, a thâwl hawk mahna.

"Rawn inrawlh ka tum lo asin, thil nih dàn ka han sawi ve mai a nia, min hua ang tih chu ka ngaihtuah sa vek tawh alawm, min haw rêng bawk a; mahse, thil awmzia i hriat loh vàng a ni, hre tùr khân i la naupang ve êm bawk a," a nuin a tih leh chuan," Sawi tawh suh! Insawi fiahna tenawm ka ngaithla duh lo, khawngaihin, kan in ațang hian i chhuak thei ang em?" a rawn ti chhuak leh ta khawl khawl mai a.

A nu hmel danglam chu ka hmu thiam mai a, a fapa thil sawi chuan a dêng na ve thawkhat a ni; mahse, min rawn enin min nuih lui sak a, min hnem ve a tum a niang ka ti mai," In chanchin hi ka lo chhui ve char char țhin a, in hlim tih ka hriat hian ka lãwm a ni. Țha takin i pasal hi lo enkawl zêl rawh aw, hetia a awm chhan hi keimah vàng a ni tih ka hria a nia, ka thil tih kha thil dik lo a ni ngei mai; mahse--" tiin a ngawi dat a, chutih lai chuan Hminga vêk chuan," Min lo chhui tawh suh, min hringtu chu i ni mahna; mahse, i fapa ka ni lo, ka pa fapa chauh ka ni, hrehawm theihtàwpa ka pa i siam hnuah ka lo lawm che hi ring ngai suh ang che," sehchilh nak chuan a rawn ti leh a.

Chutih lai chuan Bawihtea chuan a pa pawmna ațang chuan chhuk a lo ngèn ve mêk a, ani pawh chuan muangchânga chhuktîrin a rawn inher ve nghâl bawk a, a mitmeng thinrimna avànga sen râm mai chu hmuh a nuam lovin a hmel insehruh țeuh pawh chuan a tilang hlauhawm thei hial mai.

"Min lo lawm chu ka ring bîk lo asin. Ni e, ka tihsual a ni, thiamthu sawi ka tum lo; mahse, ka hmu châk țhin che a, hna thawka i chhuak pawh hi ka hmu fo, in in awmna thlengin ka hre vek, min hmuh duh ka rin ngai loh avàng leh inthiam lohna ka neih avàngin kei pawh i mit hmuhah ka rawn inlâr ngai hek lo, i pa pawh--" a la tih lai chuan vîn deuh țhat hian Hminga chuan," Ka pa sawi chhuak suh! Nangmah vànga zahna leh hrehawmna a tawrh zozai te kha eng thil mahin a tidanglam thei tawh lo, a thih ni thlengin kan unau thumin min enkawl a, nang hian ka pa chungchâng sawi tùrin eng dikna mah i nei lo!" a ti leh țhat țhat mai a, chutianga a vîn chu ka la hriat ngai loh avàng chuan ka phu zawk nghe nghe a, Bawihtea pawhin a hlau a ni ngei ang, min rawn panin a țap zui ta nghâl a, khùr dar darin ka lo pawm vat a.

"A pawi ka ti hle mai," ti sapin a nu chuan min rawn en a, tho vatin," Ka tihpalh a ni e, min ngaidam rawh," tiin kawngka lam pan chuan a kal ta nghâl a, țawngkam țhaa thlah ka duh viau nain Bawihtea țap chuan min tibuai a, thlah lohvin a chhuak zui ta a ni.

Bawihtea țap ka hnem malh malh lai chuan thâwk a la hawk hawk a, room-ah chuan a lût zui ta nghâl a, ka zui duh rih lo. A thinrimna han zuai deuh phawt se ka lût chauh ang. Amah pawhin khatianga a han vîn kha hrehawm a ti viau tawh ang, Bawihtea'n a țah phah lehnghâl a.

Bawihtea țap a bàn hnu chuan room-ah chuan kan lût ve ta chauh a, khumah bang lam hawiin a lo țhu ngût a, a thuamhnaw pawh a lo la thlâk lo. Bawihtea chu a duhnaah kaltîrin kei chu a bulah chuan ka va țhu a, a hnungah chuan ka va chùlsak a, a rawn hawi chuan a thinrim mitmeng pawh kha a lo reh tawh a, a hmel rum leh hlauhawm zet pawh kha hmuh tùr a lo awm tawh lo.

"A pawi ka ti, khatianga vìn kha ka tum hauh lo asin; mahse, ka pa a rawn sawi chhuah khân--" tiin a ngawi leh ta daih a, kei chuan," Ka hre thiam che asin, i thin kha a rim êm êm mai si a, ka thiam lo miah lo che," ka lo ti ve sap sap a, a hnung ka chùlna kut chuan ka kuah zui nghâl zat a, ani pawh chuan nghet zet hian ka kut chu a lo chelh a.

"Bawihtea ka tihțah phah kha a zia lo tak zet!" inthiam lo zeta a tih leh chuan," A pa țawngka vîn a la hre ngai lo tlat a, chutiangin kei pawhin," tiin ka nui lui sak a, chutah," Ka hre thiam che ka tih kha, Bawihtea pawhin a hre chhunzawm tawh teuh lo mai, a chunga thinrima vîn i ni lo tlat a," tiin ka hnèm leh malh malh a.

Zanriah kan ei chuan a pângngai leh vek tawh a, kei pawhin boruak chu theihnghilh luiin ka titi leh bawrh bawrh a, Bawihtea pawh tlãn kualin a ţê leh rai rai tawh a, kan in chhûng pawh in tak tak a ang ve viau tawh a ni. Puitling țawng kârah naupang țê ri hriat tùr a awm ve tlat tawh mai a, chhûngkua tak tak kan ni ve tawh e.

Krismas hmang tùr chuan Ralvawngah chuan kan phei ta ngei a, ka pa thlàn cheina tùr mawi tak leiin thlànlung pawh chu kan phur phei nghâl a, kan thleng hnai telh telh a, thlen erawh ka huphurh telh telh thung, Bawihtea a hlim êm zâwk a, chu chuan kan boruak pawh tlêmin a tizãng deuh zâwk a, chuti ni lo se chuan kan ngui dùn lap ang chu.

In kan han thleng a, ka pa awm tawh loh vàng nge ni, a lo chul riapin ka hria. U Mamite chhûngin an lo enkawl fai ve reng tho a; mahse, luahlumtu awm lo chu enkawl fai tho mah se a dik thei tak tak lo. Sêna pawh ka hmu puitling ve ta riau mai ka ti, hlim hmel takin min lo làwm a, mi dang pawhin chutiang tho chuan min lo chhàwn a; mahse, kan hlim hmêl phènah chuan lunglènna, khawharna thûk tak a awm tih kan inhriatsak vek ni maiin ka hria.

Naupangho erawh chu an ri nak nak reng a, Bawihtea a hlim bawk nèn, an han chhaih a, ani lah a lo uang ve ráwl bawk nèn, an nuih dar dar reng mai. A uteho vek an ni si a, an làwm bawk si nèn, nuam hi a'n ti mai mai khawp a, a uang thei lutuk chuan nuih a tizä a, a țha phian mai ka ti, puitlingho pawh kan nui kan nui mai.

A tûkah chuan chawhnu lamah ka pa thlàn chu kan chei a, an thlanmual chu a fai bawk si a, a thawveng bawk nèn, Bawihtea chuan nuam a ti lehpek khawp mai. Mi dang thlàn chei pawh an lo kal ve bawk a, țap râwih râwih ri hriat tùr erawh a awm lo va, a zia khawp. Ka pa thlàn duhthusàma mawia kan chei hnu chuan thlate kan la a, Bawihtea pawh a pu thlàn bulah chuan dintîrin thla ka lâksak a, kan che vêl chu ka pa chuan thlarau khawvêl ațanga min lo thlìr reng ka ring ve tawp. A tupa, a hming pawh a sak ngat hi a rawn thlîr ve a nih chuan duhawm a tiin hmel țha a ti ve ngawt ang chu, duh tâwkin a kal thei tawh lehnghâl si a, la dam ve se chuan làwm ber bertu a ni dâwn tih ka hre si a.

Krismas chu hlim àwm taka langin; mahse, a rûka khawhar tak chung siin kan hmang liam ve mai a, chhûngkat lainate an fel êm mai a, an khua har ve tho mah se kan khawhar hlauin min rawn tlawh reng a, naupangho lahin Bawijtea an rawn awmpui reng reng a, an inah an hruai haw thùl, kei pawhin ka hauh hlur bîk lo, a ute bula awm chu nuam a ti êm êm si a, an duatin a tih ang angin an awm peih a, an nuihpui uar uar reng mai a ni.

Zan khat chu a nu chanchin chu ka sawi chhuak zauh a, chu pawh chu ka pa chanchin kan sawi ațangin a ni. A pasal fanaute a chhuahsan chhan ber chu eng vàng nge ni ang tih ka ngaihtuah țhin thu chu ka sawi chhuah chuan ani chuan," Ngaihtuah duh suh, ngaihtuah tlâk pawh a ni lo," a lo ti mai a, kei erawh chuan," Chhan chu a awm ngei ang, amah pawhin,' Thil awmzia i hriat loh vàng a ni,' a tih che kha, eng emaw chu a awm ngei alawm," ka ti leh thung a.

"Min duh tawh loh vàng a ni mai alawm, hmeichhe pângngai takin a pasal leh fanaute a chhuahsan ngai lo ang, pasal dang a ûm duh vàng maw le, tenawm lutuk!" a tih leh sup chuan ka ngawi vang vang a, a nu insawi fiahna kha ka hre châk tak zet a ni, engkim hian chhan a nei vek a, side A lam ka hre tawh a, side B lam hriat a châkawm ka ti, a nu chu thiam lo hulhual pawh ni se mi sual thi tùr pawhin thiamthu sawi tùr neiin sawina hun pêk a ni țhin alawm le.

Kum thar kan hmang leh bawk a; mahse, a hma ang khân kan châm rei tawh lo, ka pa ber a awm tawh lo bawk nèn, Hminga pawhin nuam  ati vak lo tih ka hre reng a, phei thuai a ti pawh chu ka hnial duh lo.

January thla tàwp lamah chuan ka thla tin hunbi chhiar chu a buai leh ta tlat mai, kei hi ka ruak lo a ni ngei ang, Hminga erawh ka la hrilh duh lo va, pregnancy test kit ka lei hnuah, ka ruak lo ngei a ni tih ka chian var hnuah chauh ka hrilh ang.

A tûka ka in-test chuan ka lo ruak lo tak tak a! Test kit chu ka en nawn chhên a; mahse, a lan dàn a ngai reng, ka ruak lo ngei e. Bawihtea ka pai țantirh ang hun tho kha a ni si a, an birthday a inrual khawp ang le.

A tûka tûkțhuan kan kîl lai chuan," Vawiin chu inentîr ka duh a," ka han ti sap a, chaw bàr chàwl meuhin min rawn en a, a mitmengah chuan mak tihna lam aiin hlauhthàwnna ka hmuin ka hria, nui sak chung hian," Ka ruak lo niin ka hria a," ka ti ta sap a.

"A ni maw!!!" A awah chuan mak tihna, lawmna leh âwih ngam zân lohna a inpawlh nawk mai.

"Aw, ka inringhlel a, ka in-test a," ka tih chuan min la en reng tho a, chutah, nui hawkin," Yes, a va làwmawm tehlul êm! Ka lãwm tak tak a ni," a ti chhuak hluai a. A hlim hmel hmuh chu nuam ka ti, heti khawp hian a hlim hmel hi a lo țha a ni tih ka hre chiang thar leh bawk.

*THIL THLENG THEI LO, LO THLENG TÙRA  BEISEI TLAT THINLUNG INKHÀRKHIPNA HI TIHTÀWP A NGAIH CHÂNG A AWM VE NGAI A NIA*