☆OKHEE☆ - 39 By Dingdi Pachuau

 ☆OKHEE☆ - 39 By Dingdi Pachuau

Inentîr tùr chuan min hruai a, ka lo rai ngei bawk a, a làwm êm avàng chuan," Vawiin chu làwm teh ang," a ti a, hnaah pawh a va kal zawk ringawt a, rawn haw leh thuaiin," Naktûk chu chawlh ka rawn pe vek mai asin," a rawn ti heu mai! A láwm ve êm mai a, hotupa ber niin a thu thu a ni bawk a, ka sawisèlsak teuh lo mai.

Țhenrual lainate pawhin min lawmpui khawp mai a, Ațana leh Martha-i an rawn tawrhhlelhawm lehpek." In senior dùn tawhin in chi lah a chang țha dùn tawh bawk a, in kûi țiak nghâl zut zut mai alawm," an ti a, Martha-i phei chuan," Insûm deuh teh u, in pa lah hian a awm zât zât hàwl chhuah a tum em ni?" a ti a, fiamthu tho mah ni se ka ngei reuh khawp mai, chhang zing takin kan nei dáwn pawh a ni lo va, ka rai hun anga rai hi an tam ve tih ka hre chiang ve êm!

Hminga'n lo chhângin," E, eng zât nge a lo pài chiah tih kan test ang chu, kei phei hi chuan kumchhirin a nia neih ka duh ni," a lo ti hlauh a, Sawmkima pawh chuan," E, chàwm zawh loh tih a awm thei hleinem, neih țeuh mai tùr, an puitlin hunah  an zahawm țhuau ang a, awhawm deuh tùr asin," a lo ti ve a.

Ka rai no chuan huat ka nei lo va, thei thùr lam ka châk reng thung. Thil ka ei thei a, ka ngaihtuahawm loh tehlul nèn, Hminga chuan Latei bawk kha a be leh a, Krismas dâwn khân kan inthlah fel tawh kha a ni a, vànneihthlâk takin a lo remchâng leh hlauh a, min awmpui leh ta a ni. Ka nu leh pa an rawn lawr reng tho bawk a, ka ãwl khawp mai. Hminga'n chêt a phal mang lo va, a hmuh loh leh awm loh lai chauhin chêt ka chuh țhin. Tûn țum chu hmeichhia ni ve hlauh se ka ti rilru khawp mai, a bulah erawh ka sawi lang duh chuang lo va, ani phei chuan," Hmeichhe naupang, nangmah ang zet mai kan nei ang," a ti ziah a, hmeichhia ni ngei se ka tih phah a ni.

Ni khat chu Bawihtea ka bual zo, a thuamhnaw ka sûk lai mêk chuan phone a rawn ri a, ka kut hru hulin ka han en vat a, number ka save loh ațangin a lo ni a," Tu tak ni ang maw?" ti rilru chung chuan ka han chhâng a.

"Lawmi, in dam țha em? Hminga nu ka nia," a rawn ti a, ka meng phar deuh ãk a, min rawn hmu thei lo mah se mak ka tihzia ka thup thei lo a ni.

"Aw, dam țha e, kan dam ţha e. Nangni in dam țha em?" ka han ti ve zat a, 'nangni' ka tih chhan chu a pasalin boralsan tawh mah se fate pawh an nei ngei ang a, an la chêng tlâng ngei ang chu ka tih vàng a ni.

Ani chuan," Aw, dam e, ka țha ve reng mai," a rawn ti phawt a, aw a han thian leh tê tê a, chutah," Ka rawn lèn hnuhnun ber țuma kan ințhen dàn kha a fuh ta chiah si lo va, ka rawn lêng ngam ta rih lo a ni. Hun remchâng awm se hmuh che ka duh ngawt mai, i pasal chuan min hmuh hi a phal lo ngei ang tih chu ka hre sa tho a; mahse, hmuh chea thil hrilh vek che ka duh a ni," a rawn ti leh charh charh a. 

Remchâng hmasa berah chuan kan inhmu ta ngei a, kan inah erawh a ni lo, ka pasalin kan ina rawn kal a phalsak tawh si lo va, amah pawhin a duh loh bâkah kei pawhin ka duh bîk lo, chuvàng chuan, kan in ațanga hla vak lovah, restaurant-ah kan inhmu ta a ni.

A hmêl a lo dang deuh hlek, a chêr deuh ta bawk a, tlêmin a ha pawh a lang kuh ta lek lek mai, a chèr vàng chu a ni ngei ang, khua a la vawt ve deuh bawk a, shawl a bât hlãn reuh a, a dam țha lo em maw ni chu aw ka ti rilru hial a ni.

"A pain a boralsan tawh tih kha ka lo hre hauh lo va, i ãwih chiah lo maithei; mahse, a boral thu a sawi khân min țhâwng tak zet a ni, mi țha lutuk a ni si a, ka ui tak tak a ni," a ti chhuak ta sep sep a.

"Nia, ka pa kha chu mi  țha tak chu a ni chiang alawm, kei pawhin ka ui asin," ka ti ve a, ka pa hmel kha ka han mitthlà lêt a, ani pawh khân min ngaina ve viau a nih kha.

"Hminga'n min haw tlat mai hi ka hre thiam reng a nia, ka hre ve alawm, a têt lai pawha luhlul zet kha a ni ve a, a rilru hi a sawhsawn mai mai lo ang tih pawh ka hria; mahse, i bulah hian thil engkim hrilh vek che ka duh tlat a," a ti sap sap a, table danga mite ri nuai nuai mah se a lamah beng ka chhi kar a, kan inhnaih bawk nèn, a țawng ri chu ka hre chiang thei viau.

"A țha alawm, i sawi duh apiang chu sawi hmiah hmiah rawh," ka ti ve a, ei tùr a rawn thleng a, kan ril chu a la țâm lêm lo nain ei tùr order lova dàwr chhûnga țhut ve reng ringawt theih ni hek suh, kan hmaah chuan kan hûng ve ràn a.

"Kan chanchin kha chu i hre deuh vek tawh ang tiraw?" a rawn tih leh chuan," Hre nial nual," ti chauhin ka chhâng a, ka hre vek tlat lo alawm. 

Thâwk lain a han ngawi leh vang vang phawt a, keiin dawhthei takin ka lo nghâk reng thung a, chutah," Ka pasal fanaute ka chhuahsan chhan kha eng vàng nge ni a i rin?" a rawn ti chhuak ta daih a, chhâng lovin ka en reng phawt a," Ka hre lo le, mipa dang vàng a ni em?" ka ti lêt ta thung a.

Za lo tih hriat tak hian a nui hak a," Chu chu mi zawng zawng rin dàn a ni ngei ang," a ti sap a, thâwk a la leh vak phawt a, chutah," Ka unaupa sual tawrawt lutuk vàngin loh theih lohin ka chhuahsan a ni, ka chhuahsan chhan kha ka hrilh hman lo, khatih hun laia hrehawm ka tihzia leh ka țah nasat țhinzia kha..." a ti chhuak ta dap dap a. Kei chuan mit pawh khap phal lovin ngun zetin ka lo ngaithla a, ka en kar bawk, thâwk pawh ka thaw ring ngam lo, a țawng chu hriat hmaih ka nei ang tih ka hlau a ni.

"Ka sawi thui deuh hlek dâwn a, i lo dawhthei hrâm dâwn nia," a yih chuan ka lo bu nghat a, sawi zawm leh nghâlin," Ka nu leh pa an boral hma viau a, ka unaupa neih chhun nèn chuan kan chëng dùn rak rak a, ka thisen zawmpui ngei a nih vàngin ka hmangaih a, sual viau mah se ka dawh hrâm hrâm țhìn. A chhan chu min enkawltu tùr ber ka nu leh pate an boral hma êm avàng chuan kawng engkima hruai țha tùrin ka inpe ve a, ka nu leh pa ai ka awh ve tihna a nih ber chu; mahse, zu leh sa, nula leh damdawi lam nèn a tikual vek a, ka zilh a, țha taka a awm theih nân kei ngei pawh a entawn theih tùrin ka invawng ve êm êm a; mahse, ka hlawhchham țhak. Nula tlangvâl chho kan ni ve a, chutianga a awm reng mai chu hrehawm ka ti a, thih daih maite ka châk rum rum țhin, ka țawngțaina chhàna a awm thei lo chuan min tibeidawng zual a ni."

"Tlai khat rùi zeta ina a rawn haw chuan kan inhau ta a, min thah a tum ta mai a, a hmaa ka zilh châng pawhin kut chu min thlâk fo va; mahse, ka tuar mai țhìn; mahse, chumi țum chuan ka hlau tak zet a,  ka mangang au ri chu țhenawmte'n hriain police an lo pun ta a, police-in an lâk dâwn pawh chuan,' Ka rawn chhuah veleh ka rawn zawng chhuak ang che a, ka rawn that ang che,' min ti hial a ni."

"Kut min thlâk a tum vàng chauh ni lovin rûkrûk leh thil dangah mi dangin thu buai an lo theh lût ve tho lo niin, jail chu a tâng ta reng a, khawngaih viau mah ila ka hlauh êm avàng chuan rawn chhuak tawh lo se ka ti țhìn. Chûng hunlai chuan Lungleia kan la awm lai a nia, ni tin mi hnuaiah ka inhlawh ve țhìn a, dawr ka nghâk țhìn a ni, chuta țang chuan Hminga pa nèn hian kan intawng ta a, ka duh ngam lo zâwk a; mahse, min duh ve êm mai a, rei pawh rial lovin kan innei ta mai rêng a, ka nun chu a hlimin ka thla a muang tak zet tawh a, ka unaupa chu ka hre chhuak ngai ta lo a ni, bâkah, min rawn zawn chhuah theih ka ring lo hrim hrim bawk."

A ngawi ta rih a, tui chu inthlitin a han in khalh khalh phawt a, ka lo nghâk reng a, a in zawh chuan a sawi chhunzawm leh ta a.

"Mahse, min rawn zawng chhuak tho, kum 10 vêl zet hnuah a nih chu, a hmel ka han hmu leh chiah chu hlauhna mak tak hian min țhãm a, ka pasal fanaute chu chhuahsan vat tùra min hrilhin ka chhuahsan lo a nih chuan a thah chimih vek tùr leh kei ngei pawh min thah a tum thuchu a sawi chhuak leh ta a, khatih lai khân eng thil dang mah ka ngaihtuah thei lo, amah hlauhna khân ka khat tlat a, ka chhûngkua, ka pasal leh fate zawng zawng thih ai chuan tiin amah kha ka zui nghâl tawp mai a ni, a hrehawm asin, hrehawm ka tih theihzia kha, ka ã lo hi mak ka ti țhin hial zâwk a ni," a ti leh sep sep a, a ngawi ta dat a, a bianga a mittui rawn luang thla chu ka hmu vat a, amah chuan dìm tê hian a han hru a.

"Kum chanve zet chu ka awmpui ang chu, min vau reng a, ka hlauh êm avàngin tlàn bosan lam kha chu ka ngaihtuahnaah a awm phâk ngai lo; mahse, tlai khat chu a rui leh viau mai a, ka inngaihtuah ta a, kan kawmthlanga pik-up chu Aizawl panin a chhuak dâwn a, Aizawl lama tlàn bosan daih tumna rilru ka pu ta a nih chu. Ka pasal fanaute ka pan chuan min rawn zawng chhuak leh ang tih ka hre sa vek a, bâkah, anni chu pan chi-ah ka ngai tawh lo, ka chhuahsan tawh si a, mipa vànga tlãn boah min ngai vek tawh bawk ang, chuvàng chuan, Aizawl lam ka pan ta ringawt a ni. Ni tin biru rêng rêngin hun ka hmang a; mahse, dam tlat chuan ei tùr chu ka hmu ve mai zêl. Khatih hunlai kha chu ka ngai lo tak zet a ni, mite hi an lo țha hi ka tia, an inah min awmtîr a, ka awm ve tawp mai a, ka inhlawh a, pawisa ka khâwl ve zêl a, pasal nei tawh lovin tûn hun hi ka thleng ta a ni," a ti dap dap a.

"Pasal neia boralsan che ang khân i insawiin ka hria a?" ka lo ti vat a, a lo nui sak a," Chhuanlam a nih kha, i lo âwih viau a ni maw? Tûnlaiah hi chuan chanchin a inhriat zung zung theih tawh a, ka chhui ve reng țhin alawm, bâkah, Hminga hi chuan a pa hmel a chhùn fuh ve a, ka vawi khat hmuhna ațang khân ka hre nghâl vat a ni, nupui a lo nei țha viau mai lehnghâl a, ka lawmpui viau a ni," a ti leh dap dap a.

Zàna ka mutnaah chuan ka ngaihtuah zui vang vang a, pasal nei miah lovin ani pawh a awm tluan ve țhak mai a nia, a thil tawn chu han ngaihtuah chhunzawmpui chuan a khawngaihthlâk ka ti, ka dem hauh lo mai. Hlauhnain mi a thunun tawh chuan thil a postive zâwngin thlìr a har a, khatih hunlai khân ani pawh a la naupang ve tho si a, thil a ngaihtuah thui thiam bîk lo tawp ang le. Kan ina a rawn kal lah khân a pasal nèna an chènna hmun hlui a hmuh duh vàngah ka lo ngai ve char char a nia, ka lo ngai sual ve khawp mai. A fapa a rawn hmuh duh vàng leh a khawsak phung, a chhûngkua te min rawn hmuh duh vàng lek a lo ni si a.

Kan inhmu lo leh ta vang vang a; mahse, a dam țhat leh dam țhat loh zâwtin ka be zauh zauh thung. A chanchin ka hre chiang tawh a, Hminga nu dik tak a ni bawk a, fa dang ngaihtuahtu tùr a nei bawk lo nèn, ka ngaihtuah lo thei lo a ni. Ka khawngaih a, a tihsual ni miah lovah a tuar hrep mai si a, Hminga pawh sawipui ka tum; mahse, hun remchâng ka la hmu rih lo a ni.

Tlai khat a chanchin ka va zâwt leh chu, a nawmsam meuh loh thu min lo hrilh a, ka ngaihtuah rilru ta khawp mai. Inenkawl țha tùra hrilhin a damdawi ei tùrte chu ka hrilh tel bawk a, kan inbiak zawh hnu pawh chuan ka ngaihtuahna a luah zui vang vang mai.

Zànah mutnaah chuan intihuai luiin Hminga chu a nu chanchin ka sawipui chhin ta a, ani lah chuan," A ho êm mai, theihnghilh daih rawh," a lo ti hmuk thung a, a beidawnthlâk chu ka ti viau nain ka tuang ka tichhah lui a," Kâr hmasa hmasa lawk khãn inhmuhpuiah min rawn sâwm a, thinrim suh aw, kan inah a rawn kal lo a nia," ka ti tê tê a, a ngawih reng avàng chuan sawi zawmin," In a chhuahsan chhante kha min hrilh a, bâkah, tunah hian a damsam lo mêk a ni àwm e," ka ti leh a.

"A chhuanlam a nih chu, i hmu tawh a, ka sawisêl lo mai ang; mahse, hmu nawn tawh lo tùrin ka duh thung che a ni, a thil sawi chu eng pawh ni rawh se, ka rilru hi chu a la ngai reng, a tâwk em?" a tih tâk hmukah chuan kei pawhin sawi zui ka tum ta bîk lo.

Ka pa lung phun tùr chuan kan chhûngkuain kan phei leh ta a, Hminga rilru a insual nasa khawp mai a, nau ka pai țan mêk si a, motor-a chuanpui chu naute insiam chho țan mêk tân a țha lo ang tih a ring si; mahse, ka tel lova kal chu a zuam bawk si lo, a rilru a inkhâp a inkhâp a, a tàwpah chuan muangchânga motor khalha phei vek chu kan titlu ta a ni. Chhûngkhat laina kan sâwm ve tho nain kâr a hla si a, ngaipawimawh ve viau mah se tihngaihna a awm ngang lo a ni, kan hre thiam vek tho mai.

Tluang takin hun chu kan hmang a, ka pa puala hun hman tàwp ang a nih tawh avàngin kan theihtâwp kan chhuah ve a, khawtlângin ruai kan țheh a, kan inah chuan nilêngin kan zai khâwm a ni.

Thlànah kalin ka pa lung an phun chu kan en ve a, a mawi viau mai. Lung erawh a lêng thar a ni, tunah chuan ka pa hmel ngainatawm tak kha leilungah a luang ral ve ngei tawh àwm si a, hei hi kan la chan ve vek tùr chu a ni tak si a.

"Ka pa, min lo thlîr reng em? Kan ngai lutuk che asin, i tel lo chuan ina awm pawh a nuam tawh lo; mahse, hrehawm réng réng awm tawh lohnaah i kal tawh a, a nuam tawh ngawt ang chu tiraw? Pum nâ pawh kha i tuar tawh lo ang a, a dik tiraw? En teh, Bawihtea pawhin chhang a nei ve tawh dâwn asin, min lawmpui em? I hmu châk ve ngawt ang tiraw? E, chuan, ka nu pawh kha kan hmu tawh asin, a kalsan chhan che kha i hre vek tawh ang tiraw? I khawngaih em? I khawngaih viauin ka ring, i hmangaih êm êm si a, pasal nei tawh bîk  hauh lovin ani pawh a lêng tar ve țhak asin, i chunga a thiltih zawng zawngah i ngaidam vek a ni tih ka hrilh lai phei kha chuan a mittui a tla zawih zawih asin," tiin ka phun sap sap a, ka pa thlànlung chu ka vuan reng bawk a. 

"Eng maw?! Han sawi țha leh teh!"

A nu inpuanna zawng zawng chu Hminga hnênah chuan tãwi kim tak siin ka hrilh ta vek a, a ngawi reng a, a pa thlànlung chu a en ngut ngut mai a, a rilru ngaihtuahna hre vek lo mah ila a rilru ngaihtuahna erawh a buai ve hlak ang tih chu ka hre tho.

A ngawi reng a, miin an biakin a rùl tâwk chauhin a chhâng a, zan mutnaah pawh chuan ngawi rengin zangthalin a mu a, ka thil hrilh hnathawh vek kha a ni tih ka hria a, biak buai ka tum lo; mahse, a kut chelhin duat takin ka kuah a, țawng kher pawh a ngai ka ti chuang lo.

U Lianpuii leh U Mami pawh a nu kan hmuh chungchâng chu ka hrilh lëm lo, țûl a tih hunah Hminga'n a hrilh mai ang chu, tûn atân chuan lo inrawlh rih lo phawt ila a țha ang.

Aizawl kan phei chu Sêna'n min zui thla a, kawng tluanin Bawihtea a pawm a, a zia khawp mai. An pahnihin an ri lê lû reng a, khua an tihar lo khawp mai.

A tûk chhùnah Hminga nuin min rawn be hmasa ve ta tlat mai a, ka biak hmasak zêl a ni si a, mak ka ti ru khawp mai.

"In zin tih ka lo hria a."

A hre ngei ang, ni e, a fapa chanchin chu a chhui hneh viau ang chu. A rawn inlan duh lo mai pawh a, kan chanchin chu a hre reng tho ngei ang.

Kan zin chanchin leh kan zin chhan ka hrilh chu ka hrilh ve a, a ngawi vang vang reng a, chutah," I lo dam țha em?" tiin ka han zâwt leh hnuhnawh a.

"A, țha a ni mai, min ngaihtuah suh," a rawn tih chuan ka ngaih a tițha chiah lo va,"I la dam chiangkuang thei nange?" tiin ka zâwt ta vat rêng a, ani lah chuan," Ka țha, ka lo upa ve ta a ni ang e," ti ringawtin min chhâng a.

Ka thil sawi kha Hminga pawhin a lo ngaihtuah  ve reng a ni ngei ang chu, mutnaah chuan," Pasal chu a nei lo tak tak em ni le?" a rawn ti chhuak sup a, a ngaihna ka hriat loh avàng chuan," Tuin maw?" ka lo ti vat a. A ngawih leh daih avàng chuan ka han ngaihtuah a, a nu a sawina a nih ka ring ta ringawt a.

"En teh maw, Duhtak, ka dem lo che ka tih tawh kha. A chanchin min hrilh vek tawh a, kei chuan a hmel leh mitmeng ațang khân dâwt a sawiin ka ring thei lo va, chuvàng chuan a thil min hrilh kha ka âwih a ni, i âwih thei rih lo a ni maithei; mahse, i thinlunga huatna awm tlat erawh kha chu khawngaihin, paih bo hret hret tum hrâm teh aw, ka pa pawhin a chah dâwn țêpah pawh a ngen țâwk țâwk che kha, ka pa thinlung kha a ropui ka ti asin, ngaihdamna thinlung a nei thei tlat mai a, nang pawh hi sawisèlna tùr che ka hre lo, ka pasal ka hmangaih êm êm i ni a; mahse, vawi khat tal chu ka pa ngenna che kha ngaihtuah nawn hrâm la ka ti a ni," ka ti duah a.

Thla thum hnuah chuan

"Bawihte, lo kal teh, ka lo bual thuai thuai ang che, vawiinah i pi tlawhin kan kal dâwn asin," tiin Daxton-a tlãn kawi zar zar chu ka man a, ka be mawlh mawlh a. Ani pawh chu thu âwih takin a awm chhunzawm ve mai bawk a, ka bual a, Latei'n a thuamhnaw a lo su bawk a, tlêmin ka hmanhmawh ve deuh tawh a ni.

A thuamhnaw ka hâk feltîr hnuah chuan kei pawh ka intuai thuak thuak a, Hminga hna ațangin a rawn haw ang a, a nu chu a chènnah kan va tlawh ve dâwn a ni. Kan inah erawh a rawn kal ta rih lo, a ina tlawh hmasa tùrin min phût tlat a, Hminga chuan hreh ru viau mah se ka tilui ve tlat a, a thinlungin a pa thuchah kha a hre ve reng si a, min hnial duh bîk lo a ni. Kei lahin ngen tak têin ka ngèn reng bawk a, a nu lah a lo la dam țha lo ve bawk nèn, chu chuan a thinlung  pawh a tinêm ve tawh viau rêng a ni.

Hminga rawn haw chuan kan lo inpeih vek tawh a, kawnga kan tlàn lai chuan," I ti țha ka tiin ka chhuang lutuk che a nia aw, tunah chuan ka pa pawh a hlim tawh ngawt ang chu," ka ti sap sap a, ani erawh chu a ngawi reng a, Daxton-a erawh ama riat riatin a lo riat ve nawk nawk thung a.

Kan  sawi lâwk vek tawh a, kan tlawh ang a, kan tlawh hnuah a nu chanchin hi U Lianpuii leh U Mami kan hrilh ve nghâl ang tiin. A nu phei chuan eng mah a la hre lo ang, tuna kan tlawh tùr pawh hi a lo phûr viau mai a, damkawr chung chungin a lo inpuahchah ve tho a ni.

Motor a din dat tâkah chuan a lam chu ka hawi a, a bân chu chùlsak hoh hoh pah hian," Ka chhuang che ka tih kha aw, țha takin aw ni ang," tiin ka nuih sak a, ani pawh chuan," Okhee," tia phun supin a nui ve suk a, motor ațanga chhuakin kan hma lawka in, Assam Type lian vak lo, a nu chènna lam pan chuan kan inchhawm phei ta nghâl a.

*CHONA ȚHA HIAN HRINGNUN A TIHLIMAWMIN A TINUAM A, CHU CHONA ȚHA CHU HNEHA A AWM HIAN HRINGNUN CHUAN AWMZIA A LO NEI ȚHIN*

~~~~A TÀWP TA~~~~