☆UNEXPECTEDLY YOU☆ - 1 By Dingdi Pachuau

 ☆UNEXPECTEDLY YOU☆ - 1 By Dingdi Pachuau

*Vawiin chu kan inhmu lawk hman ang chu tiraw? Thil sawi tùr ka neiin ka hria*

Zda message a ni. Ka chhâng lêt hran lo, kan inhmuhna tùr hmun leh hun ka hria. Kan inhmu ve reng reng alawm, inngaizâwng ve ta chu kan inhmu ve bawk ang chu maw le.

Ka phone ka en chu rawn hmuin," In inhmu dâwn a niang maw? I hmel ațangin ka hre mai," a rawn ti chhuak a, ka phone chu ka bag-a dah luh pah chuan ka ţhiani chu ka en vat a," Kan inhmu fo alawm, nilênga hna han thawh hi chuan țhiante nèna tlai lam hun thâwl hman tlàn hi a lo nuam ber mai zâwkin ka hria," ka ti daih a, in tùr leh ei tùr kan lei chu kan khai a, ani chuan," Ka âwih loh chu a, bialpate nèn a nuam fë zâwk ang," ner deuh nâng chuan a lo ti ve thung a.

"Ka ti ve lo," ka lo ti vat a, ka fiamthu lo, ka ti tak tak a ni, ani erawh chuan a hmui min tihpawrh khum pah chuan," Ka âwih chuang lo," tiin a hawi sawn deuh hmak a, chutah," A nih loh tal leh, chutiang hre chiang tùr chuan i bialpa hi min han khiuriu chhin la, kan hre mai dâwn alawm. Chuan, i bialpa min khiuriu phal a nih ngat chuan hei hi i in zo vek dâwn nia," tiin a thil khai chu ka kutah a rawn hmehbel chawt chawt a, a in luah lam pan chuan a tlãn ta nghâl a, ka ûm ve nghâl vat bawk a.

A in luah hi concrete building chhãwng 4 nei hnuai ber dawttu a ni a, a zau lêm lo nain a nuam ve reuh tho a, mahni chauha luah atân phei chuan a tâwk tiu teu viau mai. Kei hi ka lêng lût peih a, a chângin ka riak bawk a, ka țhiannu ve liau liau leh hna ka thawhpui a ni a, kan inkàwm ngeih viau bawk a ni.

Dawhkàn têa in tùr inchhawpin chhuatah kan țhu a, kan hmaah lah chuan bowl lian zet, a chhûnga snacks chi hrang hrang kan pawlh  kual nuai chu kan inchhawp bawk a, tu dang kan ngai lo ve khawp mai.

"Phone ri chu, i phone a nih chu."

Ka lo ngaihtuah miah lo, kan piah deuha mite'n woofer-a an hla play chu ka lo ngaithla daih niin, dawhkàna ka phone dah chu ka han ban vat a, Zda bawk a lo ni.

"I haw tawh tiraw?" a rawn tih chuan," Um..."tiin ka chhâng mai a, ani chuan," Tunah khawiah nge i awm?" a rawn ti leh a,"Sêntei nèn a inah kan awm a," ka ti ve leh mai bawk a. 

"Ka hman leh loh tùr thu hrilhin ka rawn bia che, țhiante'n volleyball practice an tia, chhuanlam siam bîk nih a hrehawm ve si a, ka kal ta mai aw," a rawn tih leh chuan," Aw, a țha  alawm," ka ti ve leh mai. Kan inkawp rei ve tawh a, kan inhmuh dâwna a hman loh châng hi chuan a chhan min rawn hrilh ve thlap țhìn, volleyball tournament-ah an țhianzahoin chhuah ve an rêl a, nuam a tih bâkah a thiam pâwl a ni bawk nèn, sawisèlsak ka tum lo.

"Zànah ka hman chuan rawn lèn hrâm ka tum dâwn nia, kan țan dâwn chiah, a nih leh mai aw," a rawn tih chuan," Umm, a nih leh le," ka ti a, phone chu ka dah nghâl a. Kan inbe zo chu Sêntei chu a lo chek tlak tlak a," Eng nge?" tiin ei tùr chu ka ban zat a.

"Inngaizâwng ve si, in inbiak dàn hi chu a fuh lo, 'Bye bye' tih emaw 'Love you' tih emaw tal hian in inbiak tàwpna hi chu khãr ve țhìn ula? Inngaizâwng pawh in ang lo, țhian hla deuh emaw hmel hriat țha vak lo, polite taka inbia in ang zâwk!" a ti ta duah a, kei chu ka lo nui hak a,"I ti ve mai mai a nih chu, chutiang a ngai hleinem, kan inhre chiang tawh alawm," ka ti ve leh mai a.

"Ti mai mai lo, in inngaizâwng rei tawh lutuk a, chuvàng a nih kha, chuvàng tak chuan kei hi chuan ngaihzâwng hi rei tak neih ka duh ngai lo, nangni hi chu in ni rei tawh lutuk a, in inning hlûi tawhin ka ring," a tih leh chuan," I ngaih dàn mai mai a nih chu," awlsam zet hian ka ti leh a.

Sawi zawm lehin," Bâkah, a tìr tê ațangin Zda nèn hi chuan kan induat hliau hliau ngai lo tih i hriat kha, kan inbiak lahin induatna țawngkam uchuak lah kan hmang ngai hek lo," ka ti leh a, ani chuan,"In nih rei tawh vàng a nih hi, nula tlangvâl induh tawna inthlahlel tawn pawh in ang lo, in inthlahlel tawn pawhin ka hre lo," a lo ti ve leh thung a," Mai mai che chuan, chutiang chuan kan awm lo aw," ka ti ve leh a. Ani lah chuan,"In inngaihzàwn dàn hi chu ka la awt chhin eih lo," a la ti deuh deuh a, ner deuh nânga en chung hian," Nichîna khiuriu tùra min dîltu kha tu nge?" tifuh inti zet hian ka han ti leh a, nui sûng chung hian," Ka ti ve mai mai a nih kha, nei vek rawh, ka duh hauh lo," a lo ti vat a, insûm thei lo chuan kan nui chhuak ta ve ve a.

Sêntei nèn hian Higher kan kal lai ațang tawhin kan inkàwm a, college zo dùnin MZU-ah Master Degree kan zo rual leh a, hna zawng pahin dàwr kan nghâk dùn leh zêl a, private school-ah chuan inhlawhna tùr hmu ve reng mah ila zirtîrtu han nih chu kan peih chiah lo a ni. Inkàwm dùn reng kan nih vàng hian kan inngainain kan inah pawh a rawn riak fo a, ka chhûngte pawh hian fanu duat takin an duat ve a, kan ina a rawn riah châng pawhin ka nu leh pate hian min en dàn a dang lo niin ka hria, lo riak ziah tùrin an sâwm ve ziah a, chutiangin kei pawh a inah hian ka riak ve fo bawk a ni.

Zànah chuan a rawn lêng lo va, a rawn lèn hman loh chhan pawh chu min rawn hrilh leh thlap tho. Zda nèn hian kan inkawp rei ve tawh a, kan inhre chiang ve tawh viau bawk. Fapa mal a ni a, a chhe lovin an hausa ve tho bawk si a, sports lam a lo ti thei ve zul bawk nèn, hmeichhe lama a a luck viau mai pawh hi a mawh lo ve. Mi zaidam leh țawng dam thlap mai hi a ni a, min han duh ve tlat mai pawh hi eng emaw kawng zâwnga ngaihtuah chuan mak deuh mai a ni.

Chhùn chawlh laiin kan thawhpuinu pakhat chuan ngaihzâwng neih boring  a tihzia chu a sawi malh malh a,"Hun thâwl pawh a neih theih loh, chanchin min rawn zawh loh leh kan awmna chin min rawn zâwt a, eng nge kan tih tih leh tute nèn nge kan awm tih thlengin, dâwt han hrilh ngawt lah dâwt sawi kan ni dâwn bawk si, kan chanchin leh thil tih engkim hriat an tum ve zêl hi ka ning ngawih ngawih," a ti barh barh a, Sêntei chuan min rawn melh zauh a, a bu deuh nghat nghat bawk a.

Tlaia kan bàn chuan Zda'n min lo nghâk reng tawh a, Sêntei'n a hmuh chuan," Vawiin chu pèn hàwna tùr ka nei tlat," a ti sap a, ka biak hman hma chuan thawhpuite kiangah chuan a kal ve nghâl daih a, ka ngei reuh tak tak! Pènna tùr a nei àwm tawp si lo, chance min pêk a duh vàng a ni ngei ang chu.

Kan tlàn chhuah hnu chuan,"In hna thawh chu in zo țêp tawh em?" ka han ti a, an college building an sak chhunzawm a, a pain mistiri-ho  hna chu lo enpuia lo vil tùrin a ti ni àwm a ni, a fapa neihchhun mah ni se awm mai maitîr a duh lo, hna thawh tùr a tuk ziah a, ani lah hian a pa thu chu a hnial ngai hauh lo bawk.

"Zo țêp lo deuh, tlaia volleyball practice ka duh țhin avàngin ka bâng hma mai mai alawm," a tih chuan," I buai hlê mai maw?" ka lo ti sap a, ani pawh chuan," Buai ve reng mai," a ti ve leh mai bawk a, chutah, thâwk han lain min rawn en zawk a, kawng lam en leh nghâlin," Chutia buai sawi tâkah chuan, inneih lam hi kan sawi chhin ve tawh dâwn em ni ang?" a rawn ti chhuak ta a, ka en vat a, ani pawh chuan min rawn en ve leh a, a nui sak a.

"Mak i ti em?" a tih chuan,"Ti lo ve," ka lo ti mai a, thil dang sawi chhunzawm lo chuan ka ngawi ta daih a, ani pawh chuti tho; mahse, ngawi rei lovin," Innei tawh ang ka tihna a nih kha," a rawn ti țha leh a, ka la ngawi reng tho.

"'Ngah nge i ngawih daih a?"

"Eng nge sawi se min duh a?" ka lo ti thung a, en pawh ka en duh lo, a buai êm êm reng a, kan inhmuh ve hun tùra amahin a ruat pawh hi a bawhchhe fo mai, a buai êm mai a, tunah tak pawh hian a buai ru viauin ka ring! Ka hre thiam țhin a, ka hre thiam leh țhin bawk, a châng hi chuan 'a ni êm êm tawh lo' te pawh ka ti ru ve fo mai.

"Eng nge, thil dik lo a awm em ni?"

"Tunah maw?"

"Aw, tunah tak khân, i țawng dàn kha..." a tih leh chuan ka chhâng tawh lo, ka phone chu ka hmet neuh neuh a.

"Sêntei in zâwnah khân i ding dâwn nia," ka tih chuan," Ni e, in pahniha in awm hi chuan ka ngaihtuah vak lo che, chaw i ei nghâl dâwn em ni?" a lo ti vat a," Maithei, chuan, nang chu i haw nghâl ang a?"ka han ti zui zat a, ani pawh chuan," Um, tih tùr ka ngah êm mai a, ka buai ve êm a ni. E, taka, i ril a țâm em? Chawlh i duh chuan--" a tih lai mêk chuan," Ka ril a țâm lo, haw nghâl zâwk rawh, i buai kha," ka lo tih khalh a, ani chuan,"Buai mah ila i tân chuan hun ka nei alawm, chàwl ang," a lo ti thung a.

"A ngai lo," ka lo ti leh vat a," Engah nge maw a ngaih loh ang le?" a lo ti dam leh thluam thung a, kei chuan maimichhîng vang vang chung chuan," A ngai lo ka tih tawh kha," ka ti leh bawk a. Nui hak chung hian," Engati nge i tùm tlat a?" a tih chuan," Tu nge tûm a?" ka lo ti ve thung a.

Thâwk a la huai phawt a, chutah,"A ho êm mai, thil ho deuh deuhah hi chuan inhnial lo teh ang, nang pawh thinrim lo la," a ti leh a, ka chhâng lêm lo, ka thin pawh a rim hran lo va; mahse, kan boruak hi chu ka ning ve lek lek a ni. A buai êm êm reng a, an hausa a, sum an ngah àwm teh rêng nèn hian, eng eng emawah hian a buai a, kan pahnih hian hun thâwl pawh kan nei khât tawh rêng a ni. Sêntei sawi ang deuh khân kan inkârah hian inthlâkhlelhna leh inhìp tawnna hi a awm pawhin ka hre tawh lo, kan inkawp rei ve ta phian a, chu zawng chu ni maiin ka hria a ni. Ani pawh hian min thlahlel niin ka hre tawh lo, kei lahin a hma ang khãn ka thlahlel tehchiam tawh lo bawk, kan inkâr hi tlêm lai deuh ațang khân ka ngaihtuah ve fo tawh a, kan inkawp laklawh mai mai niin ka hre tawh a ni; mahse, min țhen ta chiah se chuan nâ chu ka ti ve viau tho maithei, kan lo inkawp rei ve tawh êm mai.

Sêntei chu ka text a, a rawn thleng har lo, a rawn hah viau mai a, a rawn kal chak viau a ni ngei ang. Min rawn hmuh veleh chuan,"In inhau em ni?" a rawn ti nghâl tâwng a, kei chuan," Engah ngawt maw?" ka lo ti thung a," I hmel kha maw le, țap tùr hmel te pawh i ang alawm le," a ti ve leh mai bawk a.

Zanriah chu Sêntei bulah ka ei nghâl a, kan in hi a inhlat lutuk lo va, vêng khata awm kan ni bawk a, chaw ei khamah muangchângin kan in lam panin kan chhuak dùn leh ta a, riak tùrin ka sâwm a, a chhan chu naktûk Inrinni a ni tho a, dàwra kal kan ngaih dâwn loh vàng a ni.

Kan thawhna dàwr hi dàwr lian ve tak leh lùn tak mai a ni a, wholesale dàwr niin Venglaiah, Apex Bank bul lawkah a awm a, min dàwrtu an tam ve thei bawk si a, kan hah ve viau țhìn a ni, chuvàng chuan Inrinni hi chuan zirlai, class kal paha inhlawh duhte tân hun siamsakin keini kan ãwl ve thung a, a zia phian mai.

A tûkah chuan tûkțhuan a ei ve leh nghâl bawk a, tûkțhuan ei lai chuan ka pa chuan," Nangni pahnih hi, engtikah nge pasal neih in tum ve ni? Hmeichhia chu in vul lai a rei lo, kum naupang tak pawh in ni tawh lo bawk a, in hmuh phawt chuan pasal neih vat hi a pawi rêng rêng lo," a ti sauh sauh a, Sêntei chuan min rawn melh ralhin," Hmuh zawh ve chuan kan la nei ve ang chu maw.." nui țhâ chung hian a ti a, ka lo nui ve sak a.

Ka nu chuan," Nui liam mai mai suh u, kan zilhna che u hi hre reng ula, nu leh pain țha kan tih zâwng hi chu mi țha an ni mai, in tâna țha lo tùr hi chu kan duhpui lo ang che u, kum kan lo chhir tam ve tawh a, nangni ai chuan thil thui zâwk leh țha zâwk tùr hi kan ngaihtuah pha vek tawh a ni," a lo ti ve a, ka pa vêk chuan,"Mipa lakah fîmkhur ula, mawi lo leh mi mit tikham zâwnga in awm hi chu ka ring phal hauh lo va, awm tum lo bawk ula, pasal țha deuh in nei mai ang," a ti leh a.

Zda chuan min rawn be miah lo, inneih chungchâng a sawia ka chhàn țhat duh loh vàng kha a ni thei mai ang em ka ti hial a ni; mahse, ka ring chiah lo deuh, mipa rilru tê tak a ni lo va, bâkah, hun a nei lo ve te pawh a ni mahna, a buai a zual bawk si a, a àwm lo hran lo ve. A thuhrimin, kei pawh khân țha taka chhàn ve mai tùr a nia, ka țawng țha duh lo ve bawk atin a nih kha, lo lungawi vak lo pawh lo ni ta se a àwm thei tho.

Biak ka tum chuan a ring ral țhak a, a buai lehpek a niang, ka biak duhna lah thil pawimawh tehchiam a ni mang si lo va, nakinah missed call a hmuh hunah min rawn be ve mai ang chu maw. Kan han inbiak loh hi chuan ka ngaihtuah chhuak fo va, han ngaih riauna chin  ka nei ve tlat bawk.

Mut dâwn hun tak takah min rawn bia a, mi tam zâwk chu an mu tawh ngei ang chu, ka mu har țhìn tih a hre tawh miau a. A buai thu bawk a rawn sawi leh a, ka rin sa tho a ni a, ka 'um 'e' liam mai mai, bâkah, ka mut a chhuak tawh lutuk tlat.

Thawhțanni tlaiah ka rin loh deuhin Zda chuan min rawn nghâk leh khut mai a, a buai àwm tehlul nèn, ka phût hauh lo asin. 

Dàwrah min chawlhpui a, a tûk tlaia an practice lai enpuiah min sáwm nghâl bawk a, dàwr ațanga kan bàn hun a hre vek a, ka enpui thei a nih pawha ka en rei hman loh turzia thlengin, chuti chung pawh chuan min phût ve miau si a, ka han 'aw' ve tâk kha, ka biak țhat loh deuh avànga inthiam lohna ka neih deuh tlat avàngin ka hnial duh bîk lo.

A tûk tlaiah chuan Sêntei nèn chuan kan en ve ta ngei a, thiam pawh a thiam khawp mai. A in-fit zek zawk bawk a, a khèl pawh a hmuhnawm, a zuang sângin a ball vuak a na thei viau bawk a, a tumpuite lam chu a rûk takin ka lo khawngaih deuh ringawt pek a.

Zirtàwpni tlaia ina ka luh chuan ka u Kimi, Sèrkàwna pasal nei tawh chu ka hmu thut mai a, mak tia meng phâwk chung hian," Nge i lo tih dâwn? I rawn tlãn chu a ni êm lo maw?" ka ti a, a bulah chuan ka țhu nghâl a, kan unau hi pahnih chiah niin hmeichhia ve ve kan la ni zui a, ka uin pasal a neih hnu hian kan reh zual a, Séntei awm lo phei se chuan ka khua a har thei ngawt ang chu.

"Chaw eiah kan sâwm a nih kha, i u Tluanga erawh a rawn tel ve hman ta lo va, hna thila a zin lai a ni àwm e," ka nuin a rawn tih chuan," A nih tak chu, pasal nei tawh mah la rawn lèn ve zauh zauh tho tùr a nia, i inla hrang nghâl lutuk a," ka ti barh barh a. Ani chuan," Tûnlaiah chuan mihring hi kan buai hlawm tawh êm mai a, intlawh zung zung pawh hi a harsa ve tawh a nih hi," a lo ti mai a.

Zanriah ei lai chuan ka pa chuan an nupa chanchin leh an chhûngkaw chanchinte chu a zâwt luam a, ani chuan," Kan țha pângngai e," tiin a lo chhâng ve mai a, ka u chu ka en vat a, a hmel hlim lêm lo ka hmuh chuan an nun hman chhoh dàn tùr àwm chu ka hre thiam ruak mai. A pasalte hi an awmthei viau mai a, u Tluanga hi JE niin a nu leh pa pawh hi sawrkâr hna thawk pension tawh an ni a, u Tluanga unaute pawh an zahpuiawm lo khawp mai, an upa ber chu Gov't College-ah senior lecturer a ni a, chu mi chhang chiah chu Bank Manager niin an tê ber pawhin BE a chhuak țêp tawh. An nu leh pate hian an enkawl puitling ka ti khawp mai, an zahawm khup ang chu.

"I u ang hian pasal țha tak nei ve ang che, tûnlai in inkâr a țha ang maw?" ka pain a tih chuan," Um, pângngai," ka lo ti ve mai a, ka nu chuan," Zda tluka țha hi chu i hmu tawh kher lo ang, thlah miah suh ang che, fapa mal a la ni zui," a lo ti zat a.

"A țhat bîkna ka hre lo," ka lo tih chuan,"I u pawhin țha takin pasal țha tak a nei a, kan duhpui ngei pasal i neih ve ngei kan ringin kan beisei tlat a nia, lâk tlâk loh leh thle kàwi mai maite hi i rawn hruai ngawt ang e, chu chu hre reng rawh," ka nu chuan a ti leh a.

"Kei chuan ka duh tak ngei neih ka duh ang, inneihna hi chu dam chhûng daih tùr a ni si a," ka tih leh chuan ka pa chuan,"I duh tak kha zu ngawlvei leh thle kawi mai mai ni ta se? Kan phalna tel lovin neih i tum tho ang maw?" a lo ti vat a.

"Chutianga zu ngawlvei chu ka nei duh bîk nâng," nui chunga ka tih chuan," Nu leh pate hian in tâna țha chu kan hria, kan thu hi âwih phawt mai la, pasal țha tak i nei ve mai ang, i u pawh kan thu a âwih a, mite zah chhûngkuaah a lawi a, mi mai mai angin tu mahin an en ngam tawp nâng," ka nu chuan a lo ti ve leh a.

Ka u hi chu ka chhùn lo ve chiang a ni. Pasal a neih hma ațang tawhin kohhran school-ah zirtîrtu hna a thawk tawh a, a nun a nêmin a zaidam a, ka nu leh pa thu pawh hi a hnial ngai lo, tuna a pasal neih pawh hi a duh vàng pawh ni lovin ka nu leh pa thu a hnial ngam loh vàng a ni. U Tluanga hi kohhrana inhmang a ni lêm lo va, ka u lah kohhran bèl mi niin kohhran school-ah a thawk bawk a, hausa viau mah se hrehawm chu a ti ru ve țhin thoin ka ring. A chhan chu a hmel ka en vang vang hian hlim hmel ka hmu ve thei lo a ni.

Inrinniah chuan Sêntei nèn kan chhuak lehpek a, ei leh in lamah hian kan insûm thei lo ve țhìn a, pawisa inthawh semin ei tùr leh in tùr kan lei țeuh țhìn, chutianga kan tih loh pawhin restaurant-ah kan chàwl ziah, ka pa hi PHE-a a thawh ve avàngin kan harsa hran lo va, ka nu lah ni se, puan țhui a thiam a, inah hian an rawn panchilh ve mai a, ni tina a thawh khawp hi chu a hmu ve țhin. Tunah chuan keimah chauh ka ni ve tawh bawk a, min duat ve viau bawk a, rual ka awt ang tih an hlau ngawih ngawih niin ka hria.

Ka room-ah kan inkàwm a, an chhûngkaw chanchin leh u Tluanga chanchin chu ka zâwt chîk zual a, riak ve mai tùrin ka sâwm nasa a; mahse, min hnial tlat thung, kum hnih chuang zet kan in a chhuahsan ve tawh a, ka la ngai ve viau tho a ni, an ina han tlawh erawh nuam ka ti lo, an milian mah mah ka ti a, ka tlângnêl thei lo, tûn thlenga nau a la pai lo erawh mak ka ti deuh hlek a, zawh erawh ka zâwt duh lo, a rilru a nawm loh phah ka hlau ve a ni.

*******

"Darling, ințhen rih mai ang hmiang?"

Mak ti tak hian a hmel chu ka en vat a, ani pawh chuan min lo en ve reng a, chutiang thu a sawi chhuak ta mai chu mak ka ti viau a ni, a vawi khat sawina a ni bawk si a.

"Thil thleng a awm em ni?"

Za vak lo hian a nui a," Tûnlai chu ka buai thei êm mai a, i duh ang pawhin ka ngaihsak hman si lo che a, ka buai chhûng hi chuan in-break lawk ila ka ti a," a tih leh chuan," I va ho tak! Kan damte chuan kan buai ve bawk ang chu, buai loh hun pawh a rawn thleng ve leh bawk ang a," ka lo ti a, ani chuan," Chutia min chhàn chu ka ring rêng a. Ka buai ve bawk si a, tournament lo awm tùr practice ngai nèn, ka ngaihsak hman hlawl si lo che a, ka inthiam lo ve a ni," a ti dap dap a.

In-break a duh chhan chu a duh anga min ngaihsak hman rih loh vàng a lo nih àwm chu, ka ngaihtuah chiang neuh neuh a, chutiang rilru a pu chu ka khawngaih lehling zâwk. Kei lah khân a hma khân ka lo be țha duh lo deuh zui bawk a. Ka inthiam lo ru ta viau mai, heti khawp hian min duh ve a, ani lakah hian induh thei ka nih loh tehlul nèn.

Zànah chuan ka nuamsam lo deuh a, Zda'n min rawn biak pawh chuan ka lo muhil hman tawh a, hetiang a nih chuan naktûkah pawh dàwrah ka kal peih ngûtin ka ring lo, Sêntei chuan hrehawm a ti leh ngawt ang chu. Kan dàwr nghah ve hi chu dam țhat a ngai lutuk a, kan lùn si a, nuamsam lo chung chung chuan kal peihawm loh tak a ni.

A tûkah chuan ka kal lo ta ngei a, nilêng deuhthawin ka mu; mahse, tlai lamah chuan ka zia ta viau a, ka damdawi ei kha a țha riau a nih àwm hi, ka nu chuan rawng a bâwl a, chu pawh chu ka va pui nghe nghe a.

Zanriah kîl hma deuh chuan Sêntei'n min rawn bia a," En teh, vawiin chu kan chawlhna țhinah khân ka rawn haw lamin Zda leh hmeichhe pakhat chàwl ka hmu a, nangmah i ni ta emaw ka ti hial nghe nghe asin; mahse, i damlo tih kha ka ngaihtuah chhuak leh thut a," a rawn ti zung zung a.

*FAKNA LEH SÈLNA HI DAWNSAWN THIAMA PAWM THIAM VE VE A PAWIMAWH. PANGPÂR MAWI TAKA PÂR CHHUAK HIAN PÀR CHHUAH TÙR HIAN NI SÂ LEH RUAHSÛR A MAMAWH VE THO A NIA*