☆UNEXPECTEDLY YOU☆ - 2 By Dingdi Pachuau

 

☆UNEXPECTEDLY YOU☆ - 2 By Dingdi Pachuau

Ka nui hak a, a hmuh sual a ni ngei ang chu. Dàwra chàwl mai mai  hman a ni lo, a buai lutuk, bâkah, vawiinah pawh min rawn phone a, bungraw mamawh phur tùrin Pûkpui lamah nilêngin an awm dâwn tih min rawn hrilh alawm, a hmu sual chhiava a ni.

"Keimah ka nih kha," nui chung hian ka han ti ve a, ani lah chuan," Ka tider lo aw, ka hmu tak tak alawm, a hnung lam chauh mah ni se Zda chu ka hre chiang ve viau tawh asin," a la ti tlat thung a, Zda chu a ni thei lo ang, an ve deuh deuh hi a ngah a, hnunglam ațang phei chuan, amah a nih ka ring lo; mahse, Sêntei bulah erawh chuan ka sawi lang duh tawh lo.

"Zâwt chhin mah teh, ka hmu chiang alawm," a rawn ti leh a, chutah," Naktûkah chuan i rawn kal thei tawh ang chu tiraw? I awm loh chuan khua a har lutuk a," a rawn tihzawm leh a, ka theih tawh tùr thu ka hrilh hnu chuan kan duhtâwk ta rih a. Zda chu mut dàwn hnaihah ka phone chhin a, zan dang ang lo takin zanin chu ka mu hma ve tlat.

Ka rin dàn ang chiah a lo ni. Vawiinah chuan nilêngin a lo buai tak tak a, a sawi dàn phei chuan tunah tak pawh hian hna an la thawk ni àwm tak a ni! Chutiang êm êma rei tak thawh chu țha ka tih zâwng a ni miah lo, laklawh thil hi chu a awm ve ngei mai a; mahse, laklawh thil pawh ni lêm lo, ãm taka thawh țawk erawh a țha lo, zàn hun hi chu chawlh hahdam hun a ni si a.

A tûkah chuan ka chhuak ve leh ta a, thawhpuite chuan ka chanchin min lo zâwt liam liam a, an fel liam liam a nia, a hnuah chuan nimin lama an buaizia thu sawiin fiamthu an thawh pah a, thuamhnaw zawrh tùr lâk tum nu pakhat an buaipui nasatzia leh an buaipui dànte chu sawiin an nui vak vak a, sawi chhuaktu Famkimi'n a sawi thiam bawk a, kan nui nasa viau a ni.

Sêntei chuan,"Nimin khân a hmunah hian awmin kan thil tawn ngei kha i sawi chhuak a, nimin ai khân i sawi chiah khân a nuihzatthlâk zualin ka hria," a lo ti pek a, Famkimi chuan," Kei chu țawngkam bungrua nuihzatthlâk deuh deuh ka hre tam alawm,"nui chung hian a lo ti a, kan nui leh dar dar a. A ni lah tak a, thil sawi a thiam bîk khawp a, a titi tawh hi chuan kan nui nasa thei viau a ni.  

Dàwrah hian hmeichhe pali leh mipa pakhat kan thawk a, mipa hi chu dàwr neitute nau a ni a, Lunglei khaw chhûng ni lo, hmun danga thawn chhuah tùr hi a buaipui țhìn a, hmeichheho hi chuan customer kan lo buaipui thung a, a châng chuan kan mipa neihchhun hi kan pui ve lâwp lâwp tho bawk.

"Zda i zâwt chhin tawh em? Amah chu a lo ni ngei ta em?" Sêntei chuan a ti sar sar a, min rawn nêk salh pah a, ka kat deuh dâwrh mai. Kein kan haw mêk a, a ina pèn hawa kan ei tùr kan khai haw pah bawk a, ka melh phei hrâ a.

"Min nêk tlu țêp alawm le! I khal tih chu ka hria, min zuam viau suh," ka ti phawt a, chutah," Amah a ni lo, khami ni khân nilêngin a buai alawm le, i mit kha entîr vat la a țha ang," ka tih chhunzawm leh a. Ani lah chuan," Ka va âwih lo tak! Ka hmuh kha chu amah chu a ni ngei si a ni," a lo la ti nang nang thung a.

"I mit kha entîr rang mai rawh."

"D'pui...?"

Chu aw lo rîkna lam chu kan hawi rual nghâl țhawt a, min rawn kotupa chuan nuihzat hmel deuh lek lek pu hian min lo en reng a, spec dum a vuah avàng erawh chuan a mutmeng ka hmu thei lo thung, ding meuhin  ka mit chu ka han khap deuh sak sak phawt a, chutah," Vanlalchhanzuala kha i ni... em?!! I ni... tiraw?" ka han ti ban deuh charh a, ka chiang ngam chiah lo deuh dâwn a; mahse, ani bâk hian 'D'pui' tiin min ko ngai lo, chuvàng chuan amah a nih ngei ka ring. Miin min koh dàn 'Dinpui' tih hi a tét deuh lai khân a lam thiam tlat lo va,' D'pui' a ti deuh tlat țhin a, chutiang hlîr chuan min ko a ni.

"I lo nula tawh hle mai; mahse, mi hìpna erawh i la tlachham reng a nih dâwn hi."

Amah ngei a ni, a chiang e, a chiang e. Ngeiawm deuh deuhin mi a țawng khum țhin, a la ni reng a nih dâwn hi, a țawng dan ațang pawh hian a la sim hauh lo mai.

"Inhmuhna a va rei tawh ve! I dam țha em? Khawiah nge i awm tâk a?" tiin ka be ta bawrh bawrh a, ka pan hnai a, kum 7 chuang zet kan inhmu tawh lo ang chu, a lo tlangvâl ve tak tak tawh a nih hi!

"Duah a che!"

A țawngkam hi chu ngeiawm viau țhìn mah se, mi sual tak chu a ni lo, têt lai ațanga ințhenawm tawh kan ni a, kan inkàwm ve nasa țhin a ni; mahse, ani hi chu a nau deuh a, a u nèn kan inkàwm rual a, naupang ta na nâ nâ chu mipa mah ni se kan bulah erawh a tâp tam hlê thung. A pa kha Champhai lamah an sawn ta daih a, kan inbe pawh ve reng reng nain khua hmuna awm lo ta na nâ nâ chu chanchin inhriatpawh reng hi a lo har ve a, a nu leh pa an ințhen tih kan hriat kha an chanchin kan hriat hnuhnun ber a ni ta a ni, Lunglei lamah hian an rawn kal ngai lo a niang, kan inhmu ta lo vang vang a, tunah hian kan inhmu leh ta a nih hi. Ni leh lo, Aizâwlah vawi khat chu kan inhmu leh, a lo la sual ve deuh reng a ni ngei ang chu, a ruih deuh avàngin ka be lûmlãm duh vak lo va, bâkah, ka hmanhmawh ve tawh lutuk a, miin min lo nghâk reng tawh bawk si a nih tak kha.

Sêntei a awm ve reng avàng chuan kan inbe rei thei lo va, number erawh kan inpe hrâm thung. Kal pah chuan Chhanzualate nèn kan inhriat dàn chu ka hrilh siam siam a, lung hlui a tilêng reuh mai mai, mitthlaah kan têt deuh lai chu a rawn lang nawn uai uai a, a u Zawmdiki nèn khân kan inkàwm ve nasa êm asin, a u a tel tawh chuan Chhanzuala lah hi a serh zînga mei an sawi ang chiah a ni bawk.

Zànah Zda a rawn lèn ka ring deuh nain min rawn be lo va, a rawn lêng dâwn lo a ni ngei ang, a rawn lèn dâwn hi chuan min rawn hrilh hmasa ziah țhin a ni. A buai êm mai a, phût ru ve deuh tho mah ila ka sawi lang ngam lo, amah pawh a inthiam loh êm kha maw.

Message rawn thleng chu en vatin Zda a nih ka ring deuh a nia; mahse, U Kimi a lo ni a, chhànna ka'n type ve zawk zawk a, kawr min pêk a tum avàng chuan ka hlim ru kher mai, a rûkin ka nui var var a, a chhan chu ani kawr hi chu mawi ka tih chi hi a ni ve țhin si a. Khuma bawk pah chuan u Kimi kawr min pêk tùr chu ka mitthlà lêt rauh rauh a.  Chutah, tlaia Chhanzuala ka hmuh kha ngaihtuah chhuak zawkin ka phone chu ka han hmet a, a number chu hmet chhuakin keimah chuan ka va be hmasa ta zâwk a, nau ang tak taka ka en ve kha a ni a, amah vàng hian unau mipa neih ka châk ve theih ţhinzia kha! Chutiang  lam chu ngaihtuah chhunzawm lo chuan a chanchin chu ka zâwt ta nghâl a, a sawi dàn chuan nimin piahah Lunglei a rawn thleng tawh a lo ni; mahse, Delhi lamah lehkha zira a awm reng reng țhin avàngin Lungleiah hi chuan a awm ngai lo ni àwm a ni. A nu leh pa ințhen hnuah a nu bulah, Lungleiah a awm a, a nu boral aţanga Lunglei leilung a rawn rah lehna hmasa ber a lo ni nghe nghe.

"Phone-a sawi duah zawng, kan inhmuh leh hunah min zâwt tawh mai rawh, nula senior lutuk tawh dîlchhût hi a ninawm," thatchhiat hmel zeta a rawn tih chuan," Vanlalchhanzual!" ka'n ti vak a, a rawn nui hak hak a," I nihna dik tak a nih chu ka sawi ni, naktûk chu, inhmu ila," a rawn tihzawm leh zat a.

"Dàwr ka nghâk dâwn alawm," ka tih chuan,"Vawiin tlai ang hunah khân," a rawn ti leh thung a, ka han ngaihtuah a, naktûkah ni lovin Inrinniah inhmu ta zâwk mai ila ka ti rilru a, hun thâwl pawh kan nei rei deuh zâwk ngei ang chu.

A tûkah chuan kan han buai leh lai lai a, kan mipa neihchhun Hruaia chu chawhma chauh a thawk hman dâwn si a, bungraw phurh chhuah tùr a ngah deuh avàng leh a dahna hmun tùra inkàrkí hlawm êm avàng chuan ka pui a, scooty khalh thiam ber ka nih avàng hian hetiang kawngah hi chuan tirh chhuah deuh bîkah ka țang ziah lo thei lo.

Thingtlâng lama bungraw thawn tùra tam avàng chuan kan thawhna pi ber scooty chu khalh chhuakin Convention Centre lamah ka phur chhi a, sumo counter-ah chuan dah felin sumo driver-te chu ka phone kual leh bawk a, pakhat chu a rawn tlãn mai a, bungrua chu fel takin sumo hnungah chuan kan hlâng a, a dangte erawh chu an awmna hmun a la hlat deuh avàng chuan ka nghâk hman ta lo, driver-te chu be lehin fel fai taka thu ka chah chian dap hnuah chuan ka tlàn lêtsan ta chauh a.

Ka lêt lamah chuan Zda ni àwm tak ka hmu a! Mahse, hnathawh thuamhnaw a inbel miah lo, bike-ah chhe lo zet hian hmeichhe pakhat a phur a, chu nu lah chuan a la kuah fet êm êm zui bawk a! Ka lam pana an rawn tlãn chho lo hlauh chu ka vànneihna a ni, chuti chu ni lo se chuan min rawn hmu ve ngei àwm si a. Ka en zui deuh reng a, amah chu ang ka ti, a bike khalh lai erawh chu a bike kha niin ka hre lo, a bike kha chu a dum a ni a, tuna a khalh lai hi chu a pãwl a ni daih, amah a ni lo a niang, bâkah, amah ngei a ni tih pawh ka chiang fak lo bawk. Shades a vuah a, a hmel ka hmuh chian theih dâwn lai tak khân scooty-a chuang pakhatin min hliah daih bawk. 

Ka ngaih a țha lo lek lek a; mahse, amah a nih ka ring phal lo fan. A buai êm kha, lêng mai mai hman a ni lo, hna a thawk leh daih tawh ang chu.

Dàwr ka thlen veleh chuan biak ka han tum zet a; mahse, mi dang an lo buai laih laih ka hmuh chuan ka țhulh ta rih, ka han buai leh zar zar a, ka hman meuh chuan minute 10 chuang zet a lo kal hman tawh a; mahse, ka han be lui ta tho a.

"Nichîn khân nangmah ang deuh ka hmu a, i chhuak em?" ka tih chuan a ani chuan," Ka chhuak lo, khawiah maw min hmuh a?" a rawn ti a, kei chuan," Ka hmuh sual a niang, hna i thawk em ni?" ka ti leh daih a, ani chuan," Aw; mahse, hei kan chàwl mêk a," a rawn tih leh chuan," A nih tak chu, țha deuhin i thawk dâwn nia, thawk hah lutuk lo la," ka ti a, rei pawh kan inbe zui lo.

Inrinniah chuan Chhanzuala hmu tùr chuan ka chhuak a, scooty pawh ka keng chhuak chuang lo. Kea kalin Sêntei in luahah ka pêng leh phawt a, ka țhut muan dar dar hnuah chuan ka chhuak leh ta chauh, kan inhmuhna hmun tùra a rawn ruat building lam pan chuan ka kal ta nghâl a.

Kawngka chu ka han kik karh karh a, Chhanzuala'n min rawn hawn chuan nui sâng hian ka pên lût ta nghâl a; mahse, in chhûng awm dàn ka hmuh avàng chuan hre thiam chiah lo hian ka ding leh rih a, a lam chu ka en hau bawk a.

"Eng in nge ni ngai?" 

Min rawn kal pèlin,"Computer zirna ka buatsaih ang chu ka ti a," a ti sap a, chutah, rawn inherin," Eng nge i ngaih dàn?" a han ti zui leh bawk a, kei chuan dàr chhìn ãk hian," A țha alawm, a țha viau ang chu," ka lo ti mai a, ani chuan," I rawn zir ve ang chu," a rawn ti zui a.

"Ka thiam," ka tih chuan," Chuti, zirtîrtuah rawn țang la?"a rawn ti leh zat a, ka nui ta hak hak a," Ka zirtîr ã vek mai ang," ka ti a, ani pawh chu a nui ve tho a, a ha vâr rual nalh zet chu a la mawi reng mai ka ti.

"Bialpa i nei em?" a rawn ti ta daih a, ka en vat a, ani erawh chuan min rawn en lo chuan room chhûnga dawhkàn hùn chu a lo en daih thung a, aw ka thian deuh kharh phawt a," Nei ve bawk ang chu, pasal pawh ka nei țêp tawh maw le," tiin fiamthu titak deuh tho si hian ka han chhâng

a, ani chuan a kuta dawhkàn chu teh kual dan dan pah hian," A hun tawh alawm, i rualpuite chuan an nei vek tawh hial ang chu," a lo ti leh mai a.

A ngeiawm thiam ka tih tawh kha. Min chhàn dàn kher kher chu haw duh ila chuan ka chùm pawp ngei ang le; mahse, kan inhmu khât êm a, chubâkah, a nuin a lo boralsan ve tawh bawk si a, chu chuan a chhan ve pakhat bawk a ni.

Thil eia chawlh dun a sawi chuan kei chuan,"I chènna hmun a hlâ em?" tiin ka zâwt ta thung a, min rawn enin," Eng atân maw? Min rawn luhkhung i tum chu a ni êm lo maw?" a rawn ti a, kei chuan lei sei fê hian ka chhuah khum phawt a, chutah,"I ei tùr siamsak che ka duh alawm, siamsaktu tùr che pawh i neih loh kha," ka han ti lêt zêk a, a nui tãwi deuh tak ka hmuh chuan ka inthiam lo zui zat a, a chhan chu chènpui chhûngte a nei tawh tlat lo, a nu boral tawh a ngaihtuah chhuak a ni ngei ang, kei lahin chûng ka lo ngaihtuah thleng phâk hauh si lo.

"A țha, nula senior ei siam pawh ei a châkawm ve alawm," a tih chuan," Senior min ti ziah mai. Min 'û' rawh," ka han ti salh a, nui miah lo hian min rawn en vang vang phawt a, chutah," I pitar thleng pawhin D'puii i ni tho tho ang," a ti sup a, hawi sawnin dawhkàn chunga chahbi chu a la ta nghâl a.

In ațang chuan ka chhuak hmasa a, kawng a kalh chhûng chuan ka lo hawi kual a, kawng lehlam restaurant ațanga mi pahnih rawn chhuak chiahte chuan ka mit an la nghâl zar mai. En zui duh lo viau mah ila ka hawi sawn thei miah lo thung, mipa chu Zda niin hmeichhia chu a hmaa bike-a a phurh ngei kha a ni, ka mit an lâk chhan ber pawh chu an kut inkài rial chu a ni. Tunah hi chuan ka ringhlel ta hauh lo mai, tlêm lai deuha Sêntei'n a hmuh dun pawh khân he nu nèn ngei hian a nih ka ring ta bawk.

"Phûng hmu ang mai lah ni! 'Ngah nge i din ngur reng a?" tiin ka dàrah chuan a rawn vuan a," Eitùr min siamsak dâwn chuan siamna tùr lei a ngai dâwn a nia," a rawn tih leh chuan ka hawi sawn ta chauh a, nui lui sakin," Eng nge siamsak che i duh ang?" ka ti sap a, ani chuan,"Nula senior siam tui thiam ber chi," a lo ti vat a, ben tumin ka han tin deuh uaih a; mahse, ka bêng ta êm lo, khawlaiah awmin kan pahnih chauhin kan awm lo tlat bawk.

Kan kal dâwn chuan Zdate chu ka en zui leh hrãm a, car-ah an lût dâwn mêk a, hmeichhia zâwk chuan a sam eng sei angreng tak, kir kàwi deuha a siam danglam chu hnunglamah a'n hai sawn deuh a, a chhiat loh bâkah a sam chu a inhmeh tak zetin ka hria.

A in luah chu Sêntei in luah building-a in chung ber chu lo niin, kawng chung lam ațangin kan kal thung a, Sêntei in luah erawh kha chu kawng hnuai lam ațangin kal a ngai thung. Building-ah chuan inkalpawh theihna tùrin step a awm miah lo va, chu building luahtuho chu an inpawh lo hlawm ngawtin ka'n ring thla deuh rawk a.

In chhûng pawh a pângngai viau mai, a nu nen khân an luah țhin a ni àwm e. A nu bungrua erawh a tiral vek tawh a, a rim a rã pawh hriata hmuh tùr a awm tawh lo.

Ei tùr ka siam lai chuan fridge-a beer a dah chu la chhuakin a lo in a, a in nasa țhin chuan ka ring khawp mai, Delhi-ah a awm reng a, nu leh pa kârah a awm si lo, a sawi dàn ang a nih phei chuan Mizoramah a lo chuang chhuak khât viau lehnghâl a, nu leh pa uapna hnuaia awm lo ta chu a nun a zalèn viau ang a, hêng beer in mai mai hi chu engah mah a ngai lo tawp ang, tui in ang lekah asin a inngaih dâwn ni.

"A tui àwm karh karh hlê mai!" ka va tih chuan," I duh ve chuan fridge-ah khân a awm,"tiin min rawn chhâng a, sofa-ah chuan thatchhiat hmel zet hian bân phar duaiin a țhu a, a țhu kâk viau bawk, hmâna mipa naupang chimawm leh luhlul zet țhìn kha ka hre chhuak vang vang mai.

"I têt lai kha ka hre chhuak e a!" 

A nui sak a, a biangsum chu a lang chiang kher mai. A inhmeh thei reuh viau țhin a nih kha, mipa naupang chimawm tak kha ni țhìn mah se a hmel kha a țha reuh a, a biangah pawh ka piaisak nasa țhìn a ni.

"Inngai upa viau suh, i têt lai pawh hmânni lawk a nih ve tho kha," inla upa zet hian a rawn ti leh a, senior min ti thla zen a, tunah lah inngai upa viau lo tùrin min ti leh a, hriat thiam a har mang e.

Thil ei pah chuan eng eng emaw ka zâwt kual a, ka titipui zêl loh chuan ka rilru thil pakhatah a kal ding dâwn tlat si a, ani pawhin zëp nei hauh lovin an chanchin chu min hrilh ve vek mai. A pa khân ngaihzâwng a lo nei țhìn a, a nu khân hre chhuakin an inhau ta a, chuvàng chuan an ințhen phah ta a lo ni. A u Vanlalzawmdiki pawh a nu hnênah awm ve tho mah se pasal a nei hma viau a, a pasal lah chu mi fel tak lo niin a dinhmun hre sa vekin a nei a, ințhen pawh nei lovin an la innei tluang zêl a, tunah phei chuan US lamah an awm daih tawh ni àwm tak a ni.

"Han in ve chhin teh, hei phei chu a tui danglam teh a nia," tiin a beer chu ka lamah a rawn nawr phei a, kei chuan," Ka in ngai lo," ka lo ti vat a, ani lah chuan," Ka hria, a taste hi hre ve chhin hrim hrim la ka ti alawm le," a ti leh mai a, thovin fridge chu a va hawng leh a, beer can chu a rawn la chhuak leh nghâl zat a.

Ka bulah rawn lêt lehin,"Test mai mai teh, ka țhianpain a zinna ațanga min rawn hawnsak ve nal nal a nih hi," tiin a beer ken lai chu a han hawng leh nghâl zat a. Chuti na nâ nâ chu tiin ka han ban ve a, ka han hnìm chhin phawt a, a lo nui hawk mai.

"Tui i ti viau ang, ka sawi ngam sak," a lo ti leh a, tlêm chu ka'n lem chhin a, ka han tep hlak hlak a, ka rin aiin a lo tui daih mai; mahse, sawi lang duh lo chuan," Tui chu ka ti viau lo," ka han ti a, ani lah chuan," Vawiin chu kum 7 chuang zet zawt mumal taka kan inhmuh tawh loh hnua inhmua inkàwm leh thei kan nih lawm nân in zo vek ang che, in zo vek rawh aw, fridge-ah pawh a la tam a nia," a lo la ti deuh deuh thung a!

Ka han in leh chhin a, tunah chuan ka in pângngai ve deuh ta, in rau rau chuan rui deuh chhalha in ka duh ang! Vawiina ka thil hmuh kha theihnghilh vek thei tùr khawpin a nia ka tih ni, a buai avànga in-break lawk duh ni khân a insawi si a, ka lo ring êm êm a, a buai vàng ni lovin duh dang neia bialnu dang a neih vàng a lo ni reng si a.

Ka rilru a na lo ang, ka tina tùr a ni lo, thil awmze nei lo mai a ni.

Ka in ta mial mial a, a tui ka ti pah bawk nèn, a thlum dep dep maiin ka hria, fridge ațangin a dang a rawn phawrh belh leh a, chu pawh chu ka lo hnial miah lo, tlêma ka lu a zàn deuh hnu phei chuan phûr deuh thutin," Ka țhiannu sâwm ve ang hmiang, kan inhmuh laia ka kalpui kha, Sêntei a nih kha," tiin ka bag ațang chuan phone chu ka phawrh a, Sêntei number chu ka hmet chhuak ta nghâl a.

*I HRINGNUNA MI ȚHENKHAT KHA CHU KALTÎR AN NGAIH CHÂNG A AWM VE NGAI A NIA. I NUNA LO LANG ZAWNG ZAWNGTE KHA I HRINGNUN KAWNG ZAWHPUITE NI MAH SE AN VAIIN A TÀWP THLENG CHUAN I ZAWHPUI DÂWN LO*