☆UNEXPECTEDLY YOU☆ - 10 By Dingdi Pachuau

 ☆UNEXPECTEDLY YOU☆ - 10 By Dingdi Pachuau

"Khawnge i awm? I rawn lêng dâwn lo em ni?" a rawn ti a, ka thaw huai phawt a, chutah," Hei, ka chhuak a, tlai lamah rawn pèn ka tum dâwn nia," ka ti ve a, ani pawh chuan," Aw le, tlai lam daih a nih chuan ka'n chhuak ve lawk ang e," a rawn ti ve leh a, rei inbe lo chuan kan tàwp zui ta nghâl a.

Thei tui chu ka han in khalh khalh a, a tui reuh kher mai, ka in ngai àwm pawh ka la hre lo, a hming chu ka han en chhin a, a man zât ka en nghâl bawk. Tui àwm rêng a lo ni, a to reuh êm mai.

A ngawih reng avàng chuan ka thlêk zauh a, min lo en reng niin. Min lo en reng avàng chuan ka zak deuh hlek a," Eng nge?" ka han ti zauh a, ani lah chuan," Eng thil vak nge ni ang?  Ka en che," a lo ti sup thung a. Thei tui chu in leh zauhin," Min en suh," ka han ti leh ringawt bawk a.

"Ka en duh che alawm," a ti phawt a, chutah," Khawi maw, i kut kha min lo pe teh," tiin a kut chu ka lamah a rawn phar chhuak nghâl a, phâwk deuh hrâa en chung hian," Eng atân?" ka lo ti vat a, ani lah chuan," Min pe phawt mai la?" a lo ti thung a, ka en deuh reng hnuah a kut phar chhuah chu tîm deuh hlek chung hian ka va ban ta dà dá a. Lo vuan chatin a han hûm vang vang a, eng mah pawh a sawi chuang lo, a hnuah erawh chuan," Hetia i kut hùm vang vang theia ka la dam hi ka lãwm hle a ni," a ti chhuak ta sup a.

A va ho roh mai mai! Ka kut hùm chu a nuam viau em maw ni? Ka kut hùm avànga lãwm ka tawn vawi khatna a ni! A làwmawm viau rualin ka nuih a za deuh a, nau anga ka en, a têt deuh lai pawha ka puak lãwp lãwp nèn khân tihian kan induh tawn ta mai chu a ni si a, ka nu leh pate bâkah Sênteite hian hre ta hlawm se, eng angin nge an ngaih ang le? Ka nu leh pate hi chuan an remti lo ang tih ka hre sa a, Sêntei pawh hian mak chu a ti ve khawp ang le, kei pawhin mak ka la ti tho, hetianga kan awm dun hi ka la ring chhin ngai hauh si lo va.

"Mak vung vung ve! I inchhîr țan tih min hrilh miah suh," a rawn tih chuan ka en vat a, ngun zeta min enin a hmel chu a thutak ngang mai, nui deuh sak chung hian," Kan inkâr hi a mak  êm alawm, i uin hre ta se mak a ti dâwn êm asin, chutiangin ka chhûngte leh Sêntei ngei pawhin, anni chu sawi loh, kei pawh hian mak ka la ti fan tho a nia," ka ti duah a, min la en reng chung ,"Mak an ti a nih pawhin an thiamawm tho mai, kan in-date hi inchhîr hauh lo tùrin ka siam dâwn che a ni," a lo ti a.

Tlaiah chuan Sêntei inah chuan ka pêng thla a, rei tak awm lo chuan ka haw thuai a, Chhanzuala'n min thlah haw tum viau mah se ka hnial tlat a, mi min hmuh chu ka pawisa teh chiam lo nain ka nu leh pate'n min lo hmu dùn ang tih ka hlau a ni. 

Ni tin deuhthaw kan inhmu chu a ni ta mai. Ka hlim a, a bula ka awm hi chuan hlimna mak tak mai neiin thil dang ka ngaihtuah thei lo va, Zda nèna kan inzui lai ang lo takin ka thinlung tak takin ka hlim niin ka hre bawk. Min ngaihsak êm êm a, chutih rualin țawngka erawh chuan a sawi chhuak lo, chezia leh thil tihin a lantîr a, min ngaihtuah êm êmtu bula awm hi heti tak hian a lo nuam thei ngai a ni tih pawh ka hriat chhuah phah a ni.

Famkimi pawhin kan inkàr hre hek lo le, a la beisei ve fan a, min han sawipui ve viau țhìn a, a rûk tak chuan ka inthiam lo ve viau mai; mahse, kan inkawp a ni tih sawi chhuah erawh ka la tum bîk lo, a theih chhûng chu zêp ka duh. Zda nèn kan ințhenna a la rei over bawk si lo va, bâkah, Chhanzuala nèn ber kher kan ni leh bawk si a, mi hriat loha hlim taka hun hman dun hi ka la duh zâwk a ni.

"Kan inkâr hi engtik thleng nge kan zêp a ngaih dâwn?" a tih chuan," A theih chen chen," ka lo ti mai a, min en vang vang phawt a, chutah," I nu leh pate hriat i hlauh êm êm chhan hi min duh i rin loh vàng a ni tiraw?" a ti leh a.

"Umm...ka nau ang i nia, khati chen kha chhûngkhat ang chiahin kan awm tlâng a, anni pawhin fapa ang maiin--" ka tih mêk lai chuan," Ka ni tak tak chuang hleinem, thisenah kan inzawm hauh lo lehnghâl," a lo ti vat a.

"Kei ngei pawh hian kan inkár hetiang a nih hma kha chuan thisena zawm tluk deuhthawin asin ka en țhin che ni, ka nau tak tak angin," ka lo ti thung a, a ngawi vung vung phawt a, chutah," A nih leh, tunah?" a rawn ti ve ta thung a.

"Sawi chhuah kher a ngai lo, i hre vek," nûr deuh nanga ka tih chuan a nui hawk a," Cute viau suh," tiin ka biang chu a rawn piai a, ka lo țê țhat a. Min thlah hnu chuan rum deuha melh pah hian," Cute tih rual pawh ka ni tawh lo, bâkah, mi hìpna pawh nei lo ka nih kha, i sawi ve ziah," ka ti leh khà khâ a.

"Min hîp lo ka ti lo aw, mi dang chu i hîp lo a ni maithei; mahse, ka ring chiah chuang lo va, kei chu min hîp tak zet, i thinlungah khân magnet chak ber chi a awm a niang ka ti hial țhìn," a tih leh lai chuan nuihzat hmel tak hian ka lo en a, ka lo ner khum bawk a, a țawng lai chu tàwp chatin min rawn hnaih nghâl kuar a, kan hmai chu a insi lo chauh a ni.

"Hmân ațang tawh khân, ni lo, a hma ațang tawhin u angin ka en ngai hauh lo che," a ti sup a, ka hmui chu melh thlain,"Ka bialnu i nih hun tùr ngaihtuahin ni tina ka hun hman hrehawm tak tak pawh nuamti takin ka hman theih phah țhin," a ti zui leh zat a, chutah, rawn kûn hniamin  a hmui chuan ka hmui chu a rawn sîktîr nghâl a.

A computer ka en a phal miah loh chhan pawh kha ka hre chhuak tawh. Krismas dáwn hnaiha zàn lama dàwr ka nghah laia a rawn kal khân intithawveng pahin ka lo lâm a nih kha. Kha ngei mai kha a phone video-in a lo cover char char niin, chu chauh a ni lo, video tawi tê tê pawh a awm țeuh, ka thlalâk hrang hrang, khawia ka awm lai nge tih leh engtik huna mi nge tih pawh ka hriat chhuah theih tawh loh a lo nei țeuh bawk a, amah ka zawh lah chuan," A ho mai mai," a lo ti deuh tlat a, ka thlalâk deuh vekin a computer chu a khat ti ila a dik ang chu, a thlalâk pawh hmuh tùr a awm mang lo.

"I țhiante'n an hmu ve tawh em?" ka tih chuan," Ka phal teuh lo mai! Ka computer hi kei tih lohah chuan nangmah chauh khawih ka phal," a lo ti vat a, ka ngaih a țha deuh ngawt ringawt a. Mi dangin an hmuh chuan engkim mai chu laihlanin a awm nghâl tihna a ni ngei ang.

Kan inzui ațang hian a nungchang a thlâk ve viau mai a, thinchhe ve tak țhìn kha a ni a; mahse, tunah hi chuan khâng kha a bo vek a ni ang, hmuh tùr a awm lo, țawng tam lua lo mah se min ngaihsakzia a lantîr reng a, min thlâkhlelhna lah tihlan a hreh hek lo, a nuih tam loh nèn hian, ka bula a awm hi chuan a nui hmel leh a lungawi hmel bâk hmuh tùr a awm lo. Min thlahleltu hi kei pawhin ka thlahlel lo thei lo va, min ngaihsaktu bulah hian awm hrehawm ka ti hauh lo bawk, hrehawm tih a hnêkin a bula awm reng theih ka châk a, ngaihsaktu neih hlutzia ka hriat chian phah viau mai, hetianga min ngaihsak êm êmtu bialpa hi ka la nei ngai lo tlat a ni. Min ngaihsak êm avàng hian nuam ka ti a, nuam tia ka awm ang hian awm ve se ka duh a, chuvàng chuan, ka theih ang angin ka ngaihsak lêt ve rêng bawk a ni.

Kan chanchin erawh ka țhian ve ber Sêntei takngial pawh ka la hrilh lo va, ka inthiam lo ru viau tawh a ni; mahse, min hauh ka ring, bâkah, ka hrilh loh avàngin, ka hrilh har avàngin min ngei maithei bawk. A la hre tho dâwn tiin, hun remchâng ka hmuh hian hrilh ka han tum ûk ûk țhìn a; mahse, ka țhulh leh ziah, sawi țan dàn tùr ka hre mai tlat lo, tûn thlengin ka la hrilh lo zo chu a nih hi.

Ni khat chu chhùna kan chawlh laiin Sam-a chuan hun remchânga chaw ei khâwm a rawt pek a, an han sawi tal tal a, an lo phûr hlawm nasa niin, Hriatpuia chuan," CJ-a(Chhanzuala an koh dàn)inah a remchâng viau ang, mitmei vèn tùr a awm dâwn lo va, a rem ang tiraw?" tiin Chhanzuala chu a melh zauh a, ani pawh chuan a lu a lo bu ve mai bawk a. Famkimi chuan a âwm dawm pah hian," A țha ngawt ang! Awii, ka phûr tawh over," a lo ti chùl a, Remlali pawh chuan," Eng zât nge kan thawh ang tihte sawi nghâl ila?" a lo ti ve bawk a, an phûr hlawm bawk a, chhùn chawlh chhûngin kan rêl zo hman vek.

Inrinni zànah kan tih avàngin ka nute bulah chuan țhiante nèn chaw  ei khâwm kan neih tùr thu chu ka hrilh a, Chhanzuala inah tih erawh ka sawi tel lo thung. Ka nu chuan," Fîmkhur la aw, hmingchhiatna hi kan bul lawkah a awm reng a nia, hlim takin hun hmang ula, țhiante zîngah over fâl bîkah țan loh tùr," tiin min han zilh zui a, ngawi rengin ka lo ngaithla a, thu țha inhrilh lamah hi chuan kum upa tâwk tih leh hrilh ngai lo mihring hi awm theiin ka hre lo va, ka nu thil sawi pawh chu ngun takin ka lo ngaithla mai a ni.

"Zdate nèn em ni?" a tih leh chuan," Ni lo, kan țhianho a nia," ka ti a, Zda hming a rawn sawi chhuak leh kher chu ka duh lo tak tak a ni. Kan la inkawp rengah a ngai a ni ngei ang chu.

Chawhnu lamah kan kal khâwm a, Famkimi inlâk chhiat lohzia chu, Chhanzuala mit lâk a tum a ni tih ka hre thei mai, han tum mai mai teh se, kan chanchin a hre lo lutuk chu ka nuih a za ru hial zâwk.

Mipaho chu an lo bazâr fel diam tawh a, sa lam buaipuiin hmeichhehoin chaw leh a hmeh lam kan buaipui thung a. Woofer-ah hla play-in a țhenin an zàwm àwl áwl bawk a. Kan buaipui zawh hnuah chuan a phûr zual chu music remin an han su nghawng nghawng pah a, Remlali leh Hriatpuia chu an inbit riau maiin ka hria, an lâm dùn a, infiamin an nui dùn tlãwrh tlãwrh a, hmuh pawh an nuam viau mai.

In tùr lam kan hnianghnar a, mipaho chuan an dawm far mai, hmeichheho erawh chuan thei tui kan in thung a, a hmeh tùr lam ni se kan chhawp dul bawk a, ril pawh a țâm lo khawp mai. Kan innêl tlâng ve tawh bawk a, inzah țît țêt a awm tawh lo va, thil in pah chuan a phûr zual chu an lãm a, a țhen kan lo titi a, fiamthu thawh pahin kan nui dar dar bawk a, boruak a nuam phian. Sam-a leh Hriatpuia pawh an țawng duhin an fel khawp mai ka ti.

Khua a thim thet thet tâkah chuan chaw ei kan siam a; mahse, kan ei tam lo hlawm viau ang, kan ril a țâm hlawm vak lo tlat mai a, kan ei zawh chuan kan dah fel zung zung a. Duh leh nakinah, ril a rawn țàm tâk leh, kan  ei țha leh mai ang chu kan ti ta ringawt a ni.

Veranda thlang lama ka din vang vang lai chuan ka hnungah chuan Chhanzuala chu a rawn ding ve zat a, ka taksa thlâwp zaiha rawn ding a ni bawk a, chutia a taksa lumnain min rawn nghen chuan ka marphu a rang ta dat dat maiin ka hria!

Chêt sawn ka tum chu," Che lo teh," tiin ka beng bulah chuan a rawn phun sup a, ka tàwp chiang khawp mai. Ka nghâwng rawn thâwk khum lum hak hak a," Vawiin chawhnu pum khân hetia tih hi ka châk a, ti lo tùrin ka insûm hrâm hrâm a ni," tiin ka nghâwng chu a rawn nûl zai zai a, a zã ka ti leh nuam ti chu ka mûr chhuak chuai chuai ni maiin ka hria, tawm deuh chãih pah chuan," Mi dangin min hmu hlauh ang e," ka ti sap a, ani lah chuan," In chhûngah an hlim lutuk, min hrechang teuh lo mai," a ti a, ka nghâwng ațangin ka bengkâwmah chuan a rawn nûl chho zël a, nuam ka tih avàng chuan ka lo maimichhîng chial ringawt. 

A hnuah chuan ka hmuiah a rawn fâwp thleng ta a, insùmna nei hauh lo chuan duhthawh zetin ka lo chhâng lêt a, kan duhãm dùn kher mai; mahse, kan infâwp zo kan inthlah chiah tihah chuan kan bul lawka Sëntei, makti hmel zeta min lo en rengtu chu ka hmu ta thut a, kan infawhna avànga ka phùrna leh nuam ka tihna chu paih bo ang hmak a ni chawpchilh nghâl a.

"Tihpalh lutuk!" ti pahin min en tawn dùn zak zak a, in chhûng lamah chuan a lût zui ta nghâl a, Chhanzuala nèn chuan kan inen a, ka hmel ațangin a hre thiam a niang," Ani pawh kha i la hrilh nange?" a ti sup a, hmui pet fan fanin ka lu ka bu nghat ringawt a.

"I hrilh fiah ngei chu a ngai dâwn a nih kha, lungngai suh, a thinrim rei hauh lo ang," tiin min hnèm zui a, ka hmuiah rawn tawk leh zauhin," Kan lût tawh dáwn em niang?" a ti zui leh zat a.

Sêntei chu a thinrim chiang khawp mai. Zàna mut dâwna biak ka tum pawhin min chhâng duh lo va, message min rawn thawnin  *Tunah tak hi chuan biak che ka duh lo*  a rawn ti a, ka thiam loh a ni tih ka hriat avàngin ka thinrim duh lo, ka țhian ve ber a ni a, a thin chu a rim ngei ang, kei pawh ni ila a rim ve tho ang.

A tûka inkhâwm bàna ka va text chuan țha takin min lo chhâng a, lêng tùrin scooty lain ka chhuak zui nghâl a, a hmasa berah chuan ngaihdam ka dìl phawt a ngai tih ka hria, Chhanzuala nèna kan chanchin ka hrilh loh avàngin. Țhian țha ti ve siin eng mah ka hrilh lo a nia, a thinrimna hi a àwm viau a ni.

Inah chuan a lo awm ngei a, ka luh pawh chuan min lo en țha duh lo va; mahse, kei chuan ka inthiam lohna chu dah bovin ka be bawrh bawrh a, a bulah chuan ka țhu hnai sauh sauh bawk a. A țawng mang loh avàng chuan a hnu deuhah chuan ka ngawi ve ta rih a.

"Ka va man chhuak chiang tak che êm!" a rawn tih chhuah tâkah chuan ka en vat a, inthiam lo ru tak chung chuan," Ka tihpalh, hrilh che ka tum țhìn a; mahse, hrilh che ngai lovin min man chhuak ta zãwk a," ka ti a, chutah, zàwi deuh sap hian," Ka lãwm e, i thinrimna i tihlan hi min hmangaih vàng leh țhian țhaa min ngaih vàng a ni tih ka hria," ka ti leh a. Ani chuan,"Mi chungchângah hian inrawlh ka tum lëm lo va, ngai pawh ka ti lo; mahse, nang chu 'mi' i ni ve tlat lo va, ka țhian țha i ni bawk. In pahniha chungchâng ka ngaihtuah hian mak ka ti a, awmzia a awm lovin ka hria a ni," a ti duah a.

"Awmzia awm lo i tih tak chu?" ka lo tih chuan," I nau a nih thu kha i sawi a, i nau tak tak chu a ni miah lo, i pianpui a ni lo va, thisena inzawm lah in ni hek lo, chanchin lo nei dùn ta pawh chu ni ula thil ni thei lo chu a ni miah lo ang; mahse, amah hi nang aiin a naupang a, a nungchang lah i hre vek bawk. Amah enkawl hi i mawhphurhnaa ngaiin in inkawp mai mai a ni zâwk lo maw? Amah lah hi a ropui tehchiam bawk si lo," a ti leh duah a, ka lo nui hak a.

"Ropui e, ropui tak a ni, hetia en ang ngawt hi a ni lo a nia," ka tih chuan," Fiamthu thawhna hun a nih loh hi," a lo ti vat a. Kei chuan," Ni e, fiamthu ka thawh lo a nia, hei hi thu dik tak chu a ni. Amah ka hmuh apiang hian ka thinphu hi a danglamin ka marphûte nèn lam hian an danglam zo vek țhin. Ka sawi fiah thiam chiah lo, he lai zâwnah hian eng emaw lian pui, rawn che dut dut țhìn a awm a," tiin ka âwm chu ka han khawih a, ani lah chuan," Khawi maw, lo en chhin ang, chutiangte chu ka hre ve duh, ka hmu ve châk bawk," tiin min rawn hnaih a, ka âwm chu rawn keu a tum a, kan han inchelh bet leh rih a, a hnuah chuan kan nui dùn ta var var a.

"I hnênah hian ani kher nêna kan chanchin hi hrilh che ka inring ngai bîk hauh lo, ka ti tak tak, ani nèna inkawp pawh hi ka suangtuah chhin ngai loh thil a ni," ka ti leh dap dap a, ani chuan," Kan hma lam huna kan mi tawn tùr chu kan hre hauh lo nain ani kher hi chu a mak ve êm bawk a ni, i la zêp zui a, i chhûngte'n eng angin nge an ngaih? An hre ve tawh em? Hre lo maw?! Ka rin dàn chiah, an hriat i hlauh hle kha," a ti leh nang nang a. 

Chutih lai chuan ka phone a rawn ri a, ka han en chuan Chhanzuala a lo ni a, ka han chhâng a,"Lo lêng la, ei tùr tui deuh ka lo siam ang che," a rawn ti a, kei chuan," Hei, Sêntei bulah ka awm mëk a, ka haw dâwnah ka rawn pêng chho dâwn nia," tiin ka chhâng a, ani pawh chuan,"In inrem thei maw? A țhat chu, in pahnihin rawn chho mai ula?" a rawn ti leh a.

Sêntei bula ka sawi chuan," Kei chu min mamawh ve tawp nâng, ka lo kal ve lo zâwk ang e, ka dîp zâwk ang che u," a lo ti tlat a, ka han sàwm luih ngial pawhin a duh tlat lo.

Ka chho leh ta nge nge a, innghèng riala țhuin, thil in pah chuan laptop-ah movie kan en dùn a, Dear John kha a ni nghe nghe a.

"Hmeichhia khi ka ngei lek lek mai, mipa khi ka khawngaih, nang?" tia a lam ka en chuan laptop lam rêng rêng en lo chuan min lo en reng tawh niin," Min en reng suh, hei movie hi en ta che," ka ti a, ka kut chuan ka hmai chu ka hliah a, ani chuan," Movie ai chuàn i hmuhnawm zâwk, en reng che ka duh," a lo ti thung a.

"Ka thu âwih rawh, nang aiin ka upat hi," ka tih leh chuan," Hmâna mipa naupang, i nau anga i en țhin ang khân awm leh se min ti tihna em ni?" a lo ti sup a, kei chuan," Nang aiin ka upa zâwk," ka ti țâlh a, ani pawh chuan," Upa mah la ka bialnu i ni tawh tho," a lo ti ve leh zat a, chutah," D, kuah che hi ka duh a," tiin min han kuah hnai salh a," Kuah reng che ka duh rualin tûn aia hnaih leh zual che pawh hi ka duh bawk a," a ti leh sup sup a. 

*******

"Zda nèn in inkawp tawh nange?" 

Artui kan tùr ka buaipui lai a ni a, ani pawhin hmarcha ràwt tùr a buaipui mêk bawk. A thil min zawh chu chhàn châk lo viau mah ila thu dik an hriat hun a awm dâwn tho a tiin," Aw, inkawp tawh lo," ka ti sap a.

"Engtizia nge ni? Nang hi, bialpa dang i nei a ni lo maw? Engati nge in i țhen a? I tân a țhat tehlul nèn, ani aia țha hi chu i hmu tawh hauh lo ang, a duh zâwngin i awm thiam lo te hi a ni lo maw? Incheina lah uar deuh tùrin ka ti țhìn che a, ka thu i áwih duh lo va. Mipa chuan hmeichhe hmel țha leh mit la tak te hi an duh a, 'Ka bialpa a ni tawh tho' tih avànga ngaihțhat ringawt tùr pawh a ni lo, i pasal a nih hma chuan eng emaw in inkarah thleng thei reng a ni, tlêma intuaihnum ve pawh hi a țha asin, incheinaah ni se mi hîp thei tùr zâwngin han inchei ve la tiin, ka hrilh ve nasat che nèn," a ti bawrh bawrh a.

Ka pa chuan," A va mak bawrh bawrh ve! Eng thil nge ni ta?" room ațanga rawn chhuah pah chuan a ti a, ka nu chuan," I fanu hi maw le, mipa cheng a man lo lutuk a, ka lo hrilh fiah a nih hi, hetiang chuan pasal țha tak pawh a hmu thei lo ang," a lo ti vat a, chutah, min rawn enin," Vawiinah Zda chu ka'n be chhin ang e, inlaichìnaah chuan han ințhen ve chãngte pawh a awm ang a, renew leh châng pawh a awm ve bawk ang chu," a ti leh a.

"Biak a ngai lo, awmzia a awm lo, a tàwp vek tawh, be miah suh, a zahthlâk, nu lo inrawlhna chi pawh a ni lo," ka ti a, ani lah chuan," Nangmah chauh hi chuan sawi fel thei hek lo che maw le, ințhen a ngai lo, ani phei chu nu, fanu nula nei tawh phawt chin chuan mâkpa atâna an duhthusàm tlangvâl a ni zui a, nu ka inrawlh mai a ngai a ni," a lo ti thën a, ka thaw hawk ringawt, ka nu chuan a be leh duh tak tak mai ang, a duhna lamah chuan zah a hre hauh si lo va. Ka nu mah ni se a châng chuan ka lo zak țhìn a ni, min duhsakna vàngah pawh puh mah se ka duh chuang lo, mimal tinin duh thlang thei tùrin zalènna kan nei a, lo inrawlh buai tùrin ka duh lo.

"Kan ințhen fel tawh a, bialnu dang a nei tawh, kei pawhin ka nei tawh bawk," a be tak tak ang tih ka hlauh ëm avàng chuan ka ti chhuak ta ringawt a.

"A ni maw? Tu nge i bialpa chu? Khawia mi nge? Eng nge an chhûngkaw dinhmun?"

Chhûngkaw dinhmun. He thil hi ka va ning tak êm!! Chhûngkaw dinhmun aţanga teha nupui pasal tùr inthlansak ngawt hi ka ngaih dàn a ni hlawl lo.

*I HRINGNUN KAWNGA THLIPUI LO TLEH ȚHÌN HI I KAWNG TIHARSATU A NI RINGAWT BÎK LO, ȚHENKHAT HI CHU I KAWNG THIAN FAI TÙRA RAWN TLEH AN NI VE THO A NIA*