☆UNEXPECTEDLY YOU☆ - 11 By Dingdi Pachuau

 ☆UNEXPECTEDLY YOU☆ - 11 By Dingdi Pachuau

Ka nu chuan Zda chu a lo be tak tak a ni ngei ang chu, zanriah ei khamah a rawn lang ta nawlh mai a, ka nu chuan a lo chiau-au țha khawp mai. Over khawpa be țha ni chuang lo hian hlim nui sángin a lo chhàwn a, kei erawh chuan hlim hmel ka hmuh miah lo thung. Nula ka nihna anga inlêng lo chhawn pawh chu ka peih lo hial a; mahse, thil dik a ni bík lo, nula tih dàn tùr a ni lo tih hriain a mawi tâwk chiahin ka bia, chu pawh hawihàwm chhuah hrâm hrâmin.

Ka nu chu a mu ve mai dâwn emaw ka tih lai chuan țhu țha sauh sauhin a țawng suam suam a,"Nulât tlangvàl lai, inlaichìnna neih lai hi chuan kârah thu buai neuh neuh leh han tauh chângte hi a awm lo thei lo va, han inhauh deuh leh thinrima han chêt pelhè zeuh châng pawh hi a thleng ve zauh zauh ngai a nia. Chutiang a thlen châng chuan kan inkâra induh tawnna awm țhìn kha a awm ta lo a niang tih tùr khawpin kan awm ve țhìn; mahse, a ni miah lo tih hriat kar tùr, kâra buaina a awm chiah hian țan kan ngaihzia leh hmasâwn kan ngaihna a lo lang țhìn a, min tichaktu atân leh a hma aia nasaa țan sauh nân hman theuh tùr a ni, chu chu mi fing zia a ni ngai e," a ti suam suam a, Zda lah chu a lo bu nghut nghut zui a, ka nu chuan ka thin a tirimin  min tizak ngawih ngawih. Kan ințhen tawh tih kha ka hrilh reng si a, a hre chiang alawm, a tlawn ang zâwng leh kan inkâr siam țhat tum ang zâwnga a țawng chu ka ngaih dàn a ni hlawl lo.

"Kan inkârah harsatna a awm tawh hleinem, tlêm lai deuh khân kan inkâr en chhin nân tiin, Dinpuii thinlung en nân a nih ber chu, eng emaw ka ti a, chu chu ani hian a lo hre sual ve bawk a, kan han thinrim ve deuh hlek a; mahse, tunah chuan engkim a fel leh vek tawh, buaina a awm tawh lo. Ni e, eng emaw a han thlen deuh rap rap hian chaknaah hmang ila, kan inkâr tinghettu atân hman hi a țha viau a ni. Kha thil a thlen ațang khân Dinpuii ka hmangaihzia leh a tel lova ka awm theih lohzia ka hre chiang viau tawh a ni," Zda chuan a lo ti ve a, mit khap hauh lo hian ka en reng ringawt! A daw thei ziap zuap lutuk chu mak ka ti a ni, zah theih lohna hi a pa tã vek a nih loh pawhin 99% hi chu a ni ngei ang chu, mipa ve si, ţawng thei leh daw thei lutuk, ka hmuh dàn a dang nghâl vek. Heti tak maia a lo daw thei hi, ka lo hre chiang lo nasa a lo nih àwm hi maw.

"A kum chhir hi tam ve viau tawh angin lang mah se a rilru erawh hi chu a la naupang chhia ve riau a nia, i lo dawh hrâm hrâm a ni ang chu, fanu naupang zâwk a nihnaah hian kan lo duat ve a, i lakah pawh hian pangchan chin tâwk a hre kher lo ang," ka nuin a tih leh chuan ka hmui chu ka pet fan fan a, ka lo zak a ni, heti khawp maia ka nuin ka tâna Zda a duhna a tilang hi amah a intihmualpho bâkah min timualpho tel ka ti a, Zda'n kan chhûngkua min hmuh dàn tùr leh min ngaihnêp dàn tùr chu ka ngaihtuah a, ka lai a lo na lo thei lo. Han țawng chhuah ve khawl khawl chu ka duh viau mai a; mahse, chu pawh, kan mualphona tùr bawk a ni leh dâwn si, thinrimin ka insûm ru ţàng țáng a ni.

Ka nu men chhûng chuan Zda chu a lêng a, an pahnihin an titi bawk a, kei chu min mamawh lo, lo inrawlh ka peih lo bawk, an duhthusàm chu han sawi mai mai ang hmiang, a tak ram nèn a inhlat êm mai.

Ka mut dâwn chuan Chhanzuala missed call ka hmuh vàng chuan ka han phone lêt a,"Zanin chu inlêng i nei a ni maw?" a rawn ti nghâl a. Engtin nge a lo hriat? A rawn kal tihna em ni?  A rawn kal êm chu ka ring meuh si lo.

"Nei ve bawk ang chu, nula ka ni ve a," tiin ka chhâng ta ringawt a, ani chuan," Ka tidik a ni maw? Ka phone min rawn chhâng si lo va, inlêng neiin i buai a nih ngei ka lo ring a," a rawn ti leh a. Hmm, a rawn hre tawp si lo va, a rawn risk kual dik vêl mai mai a lo nih chu, ka chhàn dàn pawh kha a dik ve tho mai.

"Elpui ka nei dâwn tihna a ni maw?" a rawn tih leh chuan ka nui hak a, a hmêl mitthlà rauh rauh pah chuan,"I nei hauh lo, nangmah leh nangmah i inel a nih ngawt loh chuan," ka ti lêt ve sak a, a rawn nui ve hawk mai.

"Ni tin hmu țhin che mah ila, ka kianga i awm loh hlek hi chuan ka ngai hman zêl che chu a nih àwm hi," a rawn ti leh sup sup a, min ngaih thu a sawi hian ka tui ral lo chauh țhìn, kei pawhin ka ngai, zanin pawh khân ka ngai alawm, Zda leh ka nu thil sawi laite pawh khân ka ngai tak zet, a bula awm veng veng ka châk, Zda leh ka nu thil sawi hrechang lo lêka a àwma bei vawng vawng ka châkzia kha, zanina rawn lêngpa kha tu nge a nih han hre ngat se chuan a thin a rim leh ngawt ang chu.

Zan dang ang lo takin kan inbe rei zêk a, thil ho mai mai sawiin zawi tê têin kan nui kar kar a, zanin boruak hnèawm zet pawh kha min theihnghilhtîr thei deuh hial nia, ka tân chuan hlimna damdawi mûm lian a ni, ni leh lo, hlimna mai ni lovin tinrêng damdawi a ni zãwk ang chu.

Ka u neihchhun U Kimi pasal U Tluanga pawh a zia chho ve hret hret a, a hna thawhna lamah erawh a la kal peih chiah lo va, in lamah an la enkawl rih a ni. A lêng ve leh thei țan tawh a, zû erawh a la ti ngam rih lo a ni ang, a la rùi rih lo ni àwm tak a ni. Ka nute pawhin an han kan ve nghe nghe a, kei erawh chu ka kal duh lo, a ruih apianga a nupui kutthlâk ziahtu hi hmuh ka châk lêm lo a ni, U Kimi ka biak châng erawh chuan  U Tluanga chanchin chu ka zâwt ve zeuh zeuh tho.

Tlai khat chu Chhanzuala ina ka pèn haw chuan a khua a lo sik hluah niin, vawiin khân chhùnah kan la chàwl tlâng reng si a, khatih lai kha chuan a khua a la sik lo a niang, min hrilh miah lo bawk, chawhnu lama a khua a lo sik hluah mai chu ka ngaih a țha lo ru khawp mai a, thisen lâktîr paha inentîr țha ka tih thu ka sawi chuan," A reh ve mai ang, inentîr kher ngai pawh ka ti lo, zanin chu min riahpui la?" a'n ti zui zat a, a mit sen râm leh hmai sen deuh âm ațang chuan khawsik chuan a la chènchilh tih a hriat theih mai.

Engtin nge ka tih tâk ang aw? Ani khawsik han kalsan daih pawh chu, enkawltu leh bâwihsâwmtu a nei hauh si lo. Keimah chauh tak tak hi a neihchhun ka ni tawh mai si, han riah ngawt lah chu, nula tlangvâl induh tawn, in pakhata han riah dun chu dikin ka hre meuh si lo. Bâkah, thlèmna a hnai dâwn lutuk, khum khata kan mut dun hlauh phei chuan...

"Ngaihtuah thui viau lo teh, engtin mah ka ti lo ang che, chu chu i ngaihtuah a nih chuan, bâkah, ka dam loh hi," a lo tih chuan ka hmai chu a sa hat hat thei hial a, ka thil ngaihtuah lah kha thil țha lo tak a ni bawk si a, ani lah hian a rawn hre thei chat bawk si, a zahthlâk ngawt mai. Ani dam lo hian riahpuiah min sâwm ve a ni mai a, min khawih kher ang tihna a ni lo, zahthlâk zâwk hian, ka ngaihtuahna hi a bawlhhlawh tlat, ka lo ngaihtuah ril mah mah a ni.

Ka nute bula chhuanlam siam dàn tùr chu haw kawngah chuan ka ngaihtuah nasa mai a, Chhanzuala dam lo riahpui tùr anga insawi chu a tih chi hauh loh, an phal lo dâwn chiang sa a, Sêntei bula riak tùr angin ka insawi mai ang, ani bulah hi chuan ka riak fo a, ani pawh a rawn riak ve fo tho, an remti ngei ang, zanriah erawh kan inah ei thung ila.

Ka sawi ta ngei a, ka pa chuan," Amah rawn riah mai zâwk tùr a nia, a awlsam daih si a," a lo ti a, ka nu ve thung chuan," Țûl tàwp a nih loh chuan riah chhuah fo hi tum tawh lo la a țha ang, nula i ni a, nula tân riah chhuah fo hi a mawi lo hrim hrim, zanin chauh hi  riak chhuak tawh ang che," a ti charh charh a, eng mah ka sawi ve lo, kan țawng leh duah palh ang.

Scooty-in ka chhuak a, naktûka dàwra ka hâk tùr ka keng tel bawk. Ka phûr viau a, ka huphurh tel tho bawk, a chhan chu ka bialpa bulah ka riak dâwn miau si a, helhhawlh  pah deuh si, hlauthãwng ru deuh leh phûr ru tak siin ka awm, ka thin lah chu a phu su dup dup a.

Sêntei ka hrilh duh ang em? Hrilh ta ila, eng angin nge a ngaih ang?  Min hmuh dàn a dang vek ang em? Nasa min ti viau ang em? Ka nute bulah lah a bula riak tùr angin ka insawi si a, engtiang pawhin min lo ngai mah se ka hrilh ngei a ngai a ni.

A inah chuan ka lût hmasa phawt a, min han hmu thut chu mak a lo ti nasa mai; mahse, thil awm dàn ka han hrilh zung zung a, nui pût pût chung hian," Dam loh chhuanlam hian in lo che na viau ang e aw, Biak in hawng ngeia pasal neih kan tum kha," a lo ti a, a nui nain a fiamthu hran lo tih ka hria, kei pawh chuan," Chutiangin kan awm dâwn lo, khum khatah pawh kan riak dùn nâng," ka lo ti ve a, ani chuan," Tak tak chuan, a mal ve êm a, dam loh nikhuaa han ngaihsaktu tùr pawh a neih loh hi, țha tak leh duat takin i  enkawl dâwn nia, dam pawh a dam vat mai ang, ka ngaihtuah hauh lo che a nia," a ti leh a.

Chhanzuala ina ka han luh chuan tàwnzau dum mai mai leh kekawr bùl ha hian chhuat dungah chuan a lo vei a lo vei a, ke lâwngin a lo la awm zui, min hmuh veleh chuan," I lo kal thei dâwn ta lo emaw ka lo ti a," a lo ti hliai a, kei chuan," Sêntei inah ka rawn pêng kawi lawk a, i khawsik a la awm em?" ka ti nghâl vat a.

A khawsik chu a lo la awm reng niin, a inha bùl bawk si, kawr pângngai ha tùra ka tih chuan," A lum alawm, bâkah, ka bulah i awm tawh a, a reh thuai mai ang," a lo ti deuh tlat mai a, thiamhnaw lum lam a ha duh dèr lo, buaithlâk ka ti khawp mai. Hetiang chuan a khawsik a reh thei lo tawp ang. 

"I inthuam lum deuh loh chuan i khawsik kha a reh thei lo ang," ka ti a, ani chuan," Chuti a nih leh, min kuah lum mai rawh," a lo ti leh a, ka hmui chu pet fan fanin ka han en a, ani lah chu a lo nui sûng thung a.

"Damdawi ei phawt la, chuan, ka kuah lum chauh ang che," ka ti leh a, naupang ang mai hian damdawi a dahna lam chu panin mûm khat chu a la chhuak a, tui bottle ban nghâlin a chhin chu a hawng zui nghâl a.

Khuma mu nghâl tùra ka duh avàng chuan a room lam chu ka panpui ta nghâl a, min en zawk pah hian," Kan mu nghâl dâwn tihna em ni?" a ti sup zui a, kei chuan," Ka riahpui che tih vànga khum khata mut dun kher kha chu ngaihtuah suh ang che," tiin ka han hrilh lâwk leh rih a, a nui hawk mai.

Khumah chuan headboard nghènga țhuin ka kuah a, ka kuah a phût miau si a. Ka âwmah chuan a bei hlûn a, puan erawh sin a la duh chuang lo. Mipa naupang ngawhngawl zet a ang ka ti, a hmel en thuak hi chuan tih nuam leh thu âwih thei zet hmel hi a pu roh a; mahse, en chiana a mit hmul dum buk zet leh a mitmeng inthurual zet han hmuh hi chuan a luhlul ve thawkhat ang tih chu a hriat.

"Muhìl nghâl tur chuan min phût lo ang chu tiraw?" a rawn tih chuan," I mut a chhuah leh chhuah loh athu a ni ang chu," ka lo ti vat a, ani chuan," Ka bula ka kuah theih reng lai chea muthilh daihte chu ka ui e a, chutah, i la riak ve dâwn zui a," a ti leh a.

"I hna thawh tùr hi engtikah chiah maw i țan theih dâwn a?" tiin thil dang chu sawipui tumin a hna lamah chuan ka pakai ta daih a, ani lah chuan," Hna lam sawipui daih che chu ka duh lo, hna chungchâng mai mai sawipui nân che hun a uiawm," a lo ti thung a, chutah, ka kâwngah a kut pahnih chu rawn rawlhin min  kuah a," I rim a tui hle mai, ka duh chi tak a ni," tiin a hmai chuan min nawr châk châk a. 

"A zã a nia," tiin zã ka ti chu ka han tãl deuh a, ani lah chuan min kuah nghet sauh pah hian," Țha deuhin min kuah rawh, ka dam loh hi, nang lo chu min duattu tùr pawh ka nei lo, min duat viau mai teh," a ti a, kan taksa insi chial vàng chuan ka awm dàn a danglam țan tih ka hre ru reng, ani pawh ka âwma a hmai a phùm tlat avàng chuan ka lung phu rang ta viau chu a hre chiang ve ngawt ang chu, ka thunun hlei thei hauh si lo.

"Keimah vànga i thin han phu rang deuh dat datte hi ka tân chuan rimawi ber a ni, ka ngaithla ning thei hauh lo ang," a ti leh sup sup a, ka awm dàn chu a lo hai lo nasa a ni, a pawi ka ti lo, ka thin phu tidanglam theitu awmchhun a ni tlat. 

"Ka hmangaih che, D," tiin min kuahna bân chu la sawnin ka nghâwngah a rawn kuah ta thung a, min kuai kûn zêl a, hnai zetah kan inen dun ta ràn a, chutah," Ka hmangaih che," ti nawn lehin min kuai kûn leh sauh a, kan hmui chu a intawng ta, duat leh muangchâng hian kan infâwp a, a hmai chu a khawsik vàngin a sa var mai nghe nghe a; mahse, a chêt dàn erawh khawsik nei angin a awm țhak lo chu a nih hi.

"Laldinpui, ka hmangaih che."

Ka hming pum ngata min han koh roh chu, min fawh leh chuan ka hming puma min koh man phubâ lain a heh hnuai lamah chuan ka sehsak ta zauh a, chu chuan a thâ a tizã a ni chêk ang chu, khumah chuan min kuai thlu a, dam lo a nih hre lêk lo chuan min han buan chiam pek a nih kha. Ka țê tuar tuar a, hlauh avàng erawh a ni hauh lo, kan inlehthal zak zak mai.

"Dam lo ka nih hi, min duat ta che, min dìm ve bawk la," a tih lai chuan ka la bawh bet ràn mai a, ka hah avàng chuan ka la thaw sâng sâng mai. Ka sam țàwn a phelh nuai tawh avàngin ka kùn lai chuan ka sam chuan a hmai chu  a zu hawlh suau suau a, ka sam chu ka kut lehlama huih kian pah chuan," Ka hah lutuk! Duh tâwk tawh ang aw," ka ti a, thawhsan ka tum chuan amah zâwk chuan min rawn kuah bet leh a.

"Tho suh, heti hian kuah che ka duh," tiin a awm dàn chu a siam rem a, kei pawh ka awm rem ve nghâl zat bawk a, khumah chuan kan mu dùn a nih tâk ber chu. Inhma tawnin kan mu a, a mal khauh zetin min khan bawk a, a lum duh ngei mai; mahse, lum ka tih thu chu ka sawi duh lo, AC a on ringawt ang a, amah a khua a la sik bawk si, a reh har lutuk palh ang.

Kan meng rei dùn phian mai, eng eng emaw kan sawi dùn a, ka nuihpui a, a damdawi eiin a chhâwk thlengin kan meng. A chhâwk tâk hnuah chuan hmai phiha hate nâwt turin ka tho leh a. Khum ni lova mut a phal tlat loh avàng leh, a kianga mu tùra ngen tak tëa min ngen avàng chuan a kiangah chuan ka inthawlh leh ta nge nge a, min lo kuah leh vat pah chuan," Hlauthãwng suh, engtin mah ka ti dâwn lo che," a ti sup sup a, ka nghâwngah chuan a fâwp zauh bawk a.

A tûk zînga ka harh chuan ka mutna chu ka hai țêp a ni, min lo la kuah chial a, a lo harh daih tawh thung, min thawhsan daih a lo duh lo ve ngei a lo ni, nizàna mut hmaa a khawsik reh kha a la reh chhunzawm zêl a, a làwmawm khawp mai. 

Eirawng bâwla ka buai rak rak lai chuan ka hnung lam ațang chuan min rawn kuahin ka samah chuan a fâwp zauh a," Ka lo pui ve ang che," a ti sup a, kei chuan," Puih ka ngai lo, lo țhu mai mai rawh, dam lo i nih kha, tui deuhin ei tùr ka siamsak dâwn che alawm," ka lo ti vat a, ani chuan," I hah lutuk ang tih ka hlau alawm, ei tùr chu keimahin ka insiam fo a, ka hreh hleinem, tunah phei chuan ka dam var tawh lehnghâl a," a lo ti thung a; mahse, a chêt ve phal lovin ka țhut luihtîr a, in tùr ka thlitsak nghâl bawk a.

"Vawiin chu i chhuak lo ang tiraw?" tia ka zawh chuan," Inah min awmpui dâwn em ni?" a lo ti vat a, kei chuan," Vawiin chu chhuak lo phawt mai rawh aw, inah awm la, vawiin lamah i khawsik a awm lo zêl a nih chuan duh leh naktûkah chuan i chhuak ve tawh dâwn nia," ka ti zung zung a.

"Min awmpui dâwn tihna em ni?" a lo ti leh a, kei chuan," Dàwrah ka kal ang chu, i khua a sik tawh si lo va, ka rawn haw lamah ka rawn tlawh leh dâwn che nia, chhùn chawlh hunah pawh chanchin ka rawn zâwt ang che," ka ti a.

Chaw ei hmain ka inbual zawk zawk a, ka sam pawh ka su tel nghâl. Bathroom ațanga ka chhuak min lo hmuh chuan," Lo kal rawh, i sam kha ka lo tih-rosak ang che," a lo ti vat a, hair dryer a lo nei ve ngei niin, ka hnial duh bîk lo. Tu mipa mah hian ka sam min la tih-rosak ngai si lo va, min duatna tihlan a tum ve-ah ka ngai hmiah.

Min chhèm rosak hnuah chuan chaw kan ei a, ka thil siam chu tui a tih thu min hrilhin a han fak luam a, ei erawh a ei tlêm khawp mai. Chaw hi a ei tam ngai lo hrim hrim a nih àwm hi maw, ka ei kêp a ni mai.

Nilêngin ka rilruah a awm a, chhùn chawlh laia ka han biak chuan a lo muhìl a ni maithei, a chhâng thei miah lo, ka biak tùr thu kha ka hrilh reng si a, a theihnghilh em ni ang? A phone chu silent mode-ah a dah a nih loh tal pawhin eng emaw a tih hlàn a ni ngei ang chu.

Tlaiah Sêntei ka phur haw a, pèn haw ka tum thu ka hrilh sa avàng leh a chanchin hrim hrim ngaihven tùr chuan ka pêng chho leh rih a, inah chuan a lo awm ve ngei e; mahse, tukina ka kalsan dâwna a hlim hmel kha chu hmuh tùr a lo awm tawh miah lo, hmui chîp hmakin min lo melh rûn ringawt.

"Eng nge, harsatna a awm em ni? I khua a lo sik em? Chhùn chawlh lai khân ka phone i chhâng thei lo va," ka ti a, ani chuan ka hma dawhkàna lehkha theh thlâk țhak pah hian," Kha pa kha i hmu leh a ni tih min hrilh miah suh," a ti bùl hmuk a, hre thiam lo zet hian ka melh chho vat a.

"Eng maw?"

Dawhkàn chunga lehkha a theh thlâk chu ka han melh a, lehkha ni lovin thlalâk a lo ni a, ka han bih hnai leh deuh a, thlalâka hmeichhia chu keimah ka ni, ka nui lai a lo ni nghe nghe, engtika mi nge ka hre chhuak thei hauh lo.  Ka han en zêl a, Zda'n min kuah lai  leh kan nui dùn lai a ni leh a, hei hi chu nikum hmasa lam daiha mi a ni tawh, Restaurant-a kan chawlh lai a ni nghe nghe. Pakhat ka han en leh chuan hmãn zàn kan ina a rawn lèn zàn kha a ni chiang, ka nu lang tel lovin kan pahnih bawkin kan lang leh, engtik lai khân nge a lo lâk hman ni?

"Khawia mi nge a? I hnênah teh daih... A va mak ve!" ka ti teh ngawt a, a ni lah tak a, ka hmuh vawi khatna an ni hlawm a, chutah, ka hnên thleng tùr ni àwm tak a nih laia a hnên a thleng daih hi a mak êm alawm.

"Kha pa nèn khân in inhmu leh em?"

Thu dik hrilhin," Hmu lo, hmân zàn khân a rawn lêng a, rei pawh a lêng lo, kan inbe mang lo," ka lo ti vat a, a thinrim chhan hi hêng thlalâka mipa hmel vàng hi a ni chiang mai, kan inhmu emaw a tih vàng a nih chiah hi.

"Rawn hnimhnaih leh che a tum tihna a ni em?" a tih chuan," Tum lo ang, tum pawh ni se a hlawhtling chuang lo ang, nang ka nei tawh che alawm," ka lo ti sap a, ngun zet hian min en ràn a, kei pawh chuan ka thu sawi chu ring se ka tih êm avàngin ka melh lêt ve kal a.

"Kha thlalâk min petu khân in inkâr a țhat leh tawh thu min hrilh a," a tih leh chuan," Țha ni se, nizànah pawh i bulah ka awm dâwn em ni? Hêng thlalâk pahnih phei hi chu nang nèna kan inhmuh leh hmaa mi daih tawh a nih hi, hei vàng hian ka phone pawh kha i chhâng duh lo a ni maw? Hmeichhe zahawmna vawng thei lo hmuhin min hmuh ka ring miah lo a nia, an thu sawi nge i rin ang ka thu sawi?" ka ti ve ta a.

"Ka ring che; mahse, kha pa hmêl ka hmuh khân ka thin a rim," a ti bùl hmak a, a thinrimna tihreh tum ni àwm tak hian thâwk a la hawk hawk bawk a, a thinrima a hlauhawmzia leh a chêt duh dàn ka hre vek tawh si a, ka bengdaih vat a ngai a ni. 

"Min rin chuan thinrimna chhan tùr a awm lo a nih chu. Zda kha engah mah ka ngai lo, hun kal tawha mi a ni. Kha thlalâk petu che lah khân tihthinrim che a tum tih a hriat reng a, i thinrim ta chiah bawk a, a thil tum chu a hlawhtling chiang viau niin i hre lo maw?"

Min rawn hnaih sawtin," In inkâr țha leh ta anga a sawi vàngin ka thin a rim alawm, thlalâk lah kha a hun inziah dàn ațang khân tún hnai têa mi a ni bawk si a," a ti leh a, kei pawh chuan hnaihchilha a bâna vawnsak pah chuan," A lâk rûk a nih chiah kha, bâkah, nula nih chuan tlangvâl rawn lêng hi lo biak ve a ngai a, kan in chhûng a rawn dai luh tawh chuan ka mi huat ber pawh ni se lo biak hrâm hrâm hi nula ka nihna anga ka duty a ni, nula hawihhâwm lo tak ka nih i duh lo ang chu tiraw?" ka ti leh dap dap a.

"A lakah chuan ni lo mah la a pawi lo," a tih chuan ka nui hak a, a ding khawng tlat chu kuah pah hian," Nang i awm chhûng chuan tu mah dang ka duh hleinem, chu chu hre reng tawh ang che," ka ti a, a hnuah ani pawh chuan muangchâng hian min kuah lêt ve a, kan inkuah vawng vawng a.

"Ka hnek châkna a la reh thei lo," a rawn ti chhuak leh sup a, a hma aia ngheta pawm beh pah chuan," Buaina rim hnaiha awm hi ka duh miah lo, chuan, ka kuah lai reng che hi chuan ani kha chu ngaihtuah lo bawk teh," ka ti a, ka rin loh deuhin a nui ta hawk a.

"I bialpa hlui a nih vàngin ka thîk tih ka zêp lo ang, in lo inzui rei tawh bawk si nèn; mahse, tunah chuan ka sawi tawh miah lo ang, ka kiangah i awm tawh si a, kan hun hlu tak neih hi mi dang chanchin sawi nân chuan a uiawm êm mai," a ti sup sup a, min kuahna chu thlahin ka hmuiah min fâwp zawk a, min kaiin," Lo ţhu rawh, ei tùr ka'n siamsak ang che," a ti zui nghâl zat a.

*TU EMAW TÂN TAL CHUAN MI ȚHA TAK, A INNGHAH NGAMNA NIH NGEI TUM ANG CHE, NANGMAH VÀNGIN MI ZAWNG ZAWNG HI MI ȚHAAH A NGAI THEI DÁWN SI A*