☆UNEXPECTEDLY YOU☆ - 12 By Dingdi Pachuau

 ☆UNEXPECTEDLY YOU☆ - 12 By Dingdi Pachuau

Han thinrim pùng pùng viau mah se a bengdài zâwng chuan țawng ka cheh tlat thung a, ani pawh a thinrim rei thei bîk lo. Min ring ang tih ka hre ve tlat a ni, bâkah, kei aiin a naupang a, eng emawti kawng tak chuan puitling ve viau tawh angin lang mah se kei aia puitling tùr hian ka dah thei tlat lo, a thin hi a rim ve thei bawk si a, ka enkawl thiam viau a ngai, a thin a rim chânga a chêt duh dàn hmua hretu ka ni si a.

A la remti vak lo chung chuan ka hawsan leh ta a, ka tlai viau chuan a fuh lo, ka nute'n min lo ringhlel ang tih ka hlau ve a ni, chhuanlam siamin dâwt ka hrilh ve nual tawh bawk si a, a theih hrâm chuan pumpelh ka duh ve tawh a ni.

Zànah ka uin min rawn text a, U Tluanga a rui lehpek tawh a ni àwm e. A ruih êm avàngin kut erawh a thlâk rei lo va, vawi hnih thum vêl bâk a bêng hman lo a, amah a benna lamah U Tluanga rui chu a invêng zo lo va, a tlu a, a tho thei tawh bawk si lo chu a muhìl zui nghâl tih a rawn sawi chuan thinrimin ka insehruh nasa mai a, ruih apianga nupui kutthlâk ziah hi ka tawn ni lo mah se ka ngaithei bau lo, U Tluanga chhûngte pawh hi zirna lamah puitlingin zahawm țhuau angin lang mah se an monu kutthlâk a nih laia tu mah inrawlh ngai lo leh țhelh tum an awm ngai lo chu ka dem a ni, ka hmuh dàn a dang vek tawh.

A dàn ngai têin ka nu leh pa hrilh rih lo tùrin min rawn ti leh a, kei chuan  *A kut thak hnawihna tùr ringawtin a bulah khân engtia rei nge i la awm dâwn? Thil tihsual nei ni la chu ka la hre thiam, i nei bawk si lo*  tiin rum zet chuan ka text lêt a, theih phei ni se chuan Emoji thinrim tak, meng alh pawp pawp thei ka thawn tel hial ang chu.

*Tunah chuan ka rilru ka siam fel vek tawh, rei lo tê chauh ka tuar leh rih ang a, thla thar veleh khian ka chhuak ang*   a rawn tih chuan ka thaw hawk a, thla thar chu kárleh Zirtàwpni a la ni daih a, kutthlâk a la tuar rei dâwn viau a ni; mahse, thu tàwp a siam tawh a, ka sawisèlsak duh lo, a rilru a thlâk mai mai lo tùrah ngai ang. Chutih hunah chuan taksa him dam takin a awm ve thei tawh ang a, rilru hahdam leh hlim takin a awm ve thei tawh ang chu maw.

Zu in țhin pasala neih hi chu ka tum hauh lo va, U Kimi pawh hian tum chu  a tum bîk hauh lo maw le; mahse, ka nute hnial a hreh lutuk a, bâkah, khatih lai khân U Tluanga khân tûn ang êm hian a la in nasa bîk tlat lo va, tûn ang hian a awm anga, a nupui kut a thlâk țhìn ang tih tu mahin kan ngaihtuah thleng bîk lo, nungchang pawh hi a inthlâk ve thei êm mai a, U Kimi pawh hian dik lohna chen pawh chu a lo nei ve tho maithei bawk, chu chu ka va hre tawh lo, a pasal bulah hian a thla a muang thei thlâwt lo tih chauh ka hria, a himna tùr ber bula him leh thlamuang thei bawk si lo, kut a tuar zâwk reng mai hi chu kei chuan țhen mai se țha ka tihpui ber a ni.

*******

Ningani tlai a ni a, Zda țhianpa restaurant-ah chuan Zda nèn inhmachhawn ràn chuan kan țhu a, ei tùr min rawn chhawpsak nain ka melh zoh chauh a ni, ei tumna ka nei lo, min hmuh duh chhan sawi se haw thuai ka duh a ni.

"Ei phawt la?" a tih chuan," I sawi tùr chu sawi thuai mai zâwk rawh, hun a tlai zêl a nia," ka lo ti vat thung a, a hmelah pem leh hliam, vûng leh duk a awm loh avàng chuan thil țha lo chu a thleng chiah lo a nih ka ring deuh ngawt a.

A țhutna hnung chu a nghèng ar ar phawt a, chiang zetin keiin ka lo en reng thung a, sawi tùra tur sek erawh ka tum tawh lo, a sawi ve mai ang chu maw.

"Chhanzuala nèn kan inhmu a," a tih chuan," Ka hria," ka lo ti leh vat a, mak a ti a ni maithei, min rawn en ve vat a, engah vak ngai lo anga lang chung hian," Eng vàng pawhin hmu pawh ni la, awmzia a awm chuang lo," ka tih zawm leh zat a.

Sam-a'n Zda'n Chhanzuala a rawn hmu tih min rawn hrilh a; mahse, ngaihțha taka awm tùra min rawn hrilhin an țhian dùnin an bul hnaiah an awm ve reng tih a rawn sawi avàngin tlêmin ka ngaih a țha deuh a, Chhanzuala thinrim hian a lo khawih leh ringawt ang tih ka hlauthãwng deuh hlek a nia; mahse, chu êm chu a thleng ta lo a ni.

"Mihring chuan tihsual palh châng kan nei a, ka tihsual pakhat kha i la vàwng tlat a, kan inkâr tih tàwp nân hman i tum bawk a--" a tih lai chuan," Tih tàwp ka tum  a ngai lo, a tàwp vek tawh zâwk, sawi nawn leh țhin hian awmzia a nei lo," chiang kelh kawlh nghet charh hian ka lo ti a.

"Mihring chuan tihsual palh kan nei vek ka tih tawh kha, ka tihsual kha ka pawm a, i tihsual hi ka pawm ve ang a, ka theihnghilh vek bawk ang, tichuan, kan inkâr chu a țha leh thei chauh ang," muang ban deuh charh chuan a ti ve thung a, kei chuan," Chhanzuala nèna kan inkâr hi ka tihsual palh niin i ngai em ni? Tihsual a ni lo, a lakah hian ka rilru ka pe asin, ka rilru zawng zawng ka pe a ni," a sawi anga muang ban deuh charh chuan ka ti lêt ve a.

A thaw hawk a, a ding hluai bawk, a hmui chu pet fan fanin a mitmenga thinrimna lang chu tihreh a tum niin ka ngai, thinrim mah se engah mah ka ngai tawh lo, ka rilruah hian hmun a chang tawh lo, min phatsan hmasatu a ni a, a hnêna lét leh hi ka tum lo hrim hrim bawk, tum ni ila mi dang ka nei nâng.

Muangchânga ding vein kan inhmachhawn leh ràn a," Ka sawi nawn leh ang, țhen che hi ka tum ngai lo, eng thil mahin a tidanglam lo bawk ang," a ti leh a, kei chuan," I pawm duh lo a nih kha, a lakah ka rilru ka pe ka tih tawh kha, bâkah, ani nèn hian inkawp lo pawh ni ila țhen ka tum lai che a ni tho tho," ka ti ve leh a, ka thil sawi chu a dawngtu tân chuan a nunrawnthlâk viau maithei a; mahse, thu dik a ni miau alawm le. 

"I khawngaih vàng mai mai a nih kha, nau anga i lo en țhin a ni a, enkawltu chhûngte a neih tawh loh vàngin i khawngaih a, chuvàng mai chu a ni," a ti ve leh thung a, chutah," Ni e, i khawngaih vàng a ni. Inkawp lo ni ta ula chuan min țhen thei maithei e; mahse, tunah hi chuan min țhen hi ka remti thei lo va, ka pawm lo bawk. Mi zawng zawng zîngah ani ber kher, ka pawm thei lo, ka remtihsak thei lo che, a nungchang i hria...A, ka remti ngai lo, ka thlentîr thei lo," a ti leh nawk nawk a.

Kan chungchângah lo sawi tùr a nei lo rêng rêng. Ani remtihsak lah kan ngai hek lo, a nau emaw a laina hnai emaw pawh ka ni lo va, ani remtihna lâk hi ka bat pawh a ni lo.

"Nang nèna kan inkâr hi sawi sawia țha leh tùr a ni lo, kan ințhen fel tawh, min ngaihtuah a nih chuan ka thu sawi hi ngaipawimawh mai rawh, i sawi ngai i sawi i sawi a, a atthlâkzia i hria em?," ka tih chuan vîn țhat hian," Duh tâwk rawh!" a ti țhat a, thinrim insehruh țeuhin a ni a sawi chhuah ni; mahse, hlauhna chhe tê mah ka nei lo.

"Kan inkár siam țhat tumin ka bei mêk a nih hi," sehchilh naka a tih leh chuan," Eng nge chu chu a țùlna? A țha tawh dâwn lo, engati nge kan inkâr hi a tàwp a ni tih pawm i tum ve mai loh? Hmeichhia ka nih vàngin ka ti tàwp thei lo niin i ngai em ni? Hmeichhia ka nih vàngin thu tàwp ka siam ve thei lo ang maw? Kan inkawp laia chhuanlam i siam zozai ka lo âwih ţhin avàng khân tunah pawh hian hêng i thil sawi zawng zawng hi ka lo âwih leh mai i ring a ni ang e. Ni e, kei pawhin kan inkawp lai khân dik tâwk lohna ka nei ve ngei ang, kan lo mãwl dùn rei êm mai a, hetia kan awm ta hi a țha ber a ni," duhthawh zet chuan ka ti leh ta bawrh bawrh a, ka țawngkam a vîn chuang lo va, ka zak lêm lo. Bâkah, a țhianpa dàwr a nia, mi dang an awm ve lah a ni hek lo.

Jan ngawih deuh vang vang hnuah chuan, "Chhuanlamah Chhanzuala chu i hmang ta a?" a ti ta sap a, kei chuan," Ka nun a nia, i lo buaina tùr a awm lo," ka lo ti vat a, chu chuan a thin a tirim a niang, ka dàr tawn tawnah chuan chelhin min han thing deuh nawk a," I chhia leh țha hriatna kha han hmang chiang teh, i hmangaih vàng a ni lo, khawngaihna vàng a ni zâwk," sehchilh nak hian a ti leh a, kan awm dàn chu ka nin êm avàngin tàwpsan mai ka duh a, a tàwp nân thâwk han la leh te tein," I lakah hian thupha ka han chawi lâwk ang e, hmangaih ngai miah lo che hian hmangaih leh duh ber angin ka lo en țhìn che a, pawi ka ti khawp mai," ka ti ta nge nge a, min chelhna chu a thlah nghâl ta chiah rêng a, ka thil sawi chuan hna a thawk țha ngang mai, ka bag chu lain ka chhuak zui ta nghâl a.

Kawnga ka tlàn lai chuan Chhanzuala inah ka pêng ang nge pêng lo ang tih ka ngaihtuah pah a, tunah hian a tlai tawh viau mai a, ka pèn leh phei chuan ka tlai zual phah ngei dâwn tih ka hria a; mahse, biak hrim hrim ka duh avàng chuan Sêntei in bulah chuan dingin ka phone chu ka la chhuak a.

Min chhàn veleh chuan," Min rawn biak ka ring deuh a?" ka han ti teh tâwng a, thinrim deuh țùnga min chhàn ka rin tehlul nèn, dam zet hian," I rawn pêng dâwn emaw ka ti?" a rawn ti thung a, thil in a nei a ni ngei ang, a lem khalh chiang a ni.

"Eng nge i in a?" A thil in tùr chu hre chiang viau mah ila ka zâwt ta tho a, ani chuan," Coffee ka in, i rawn pèn ringin ka lo nghâk che a," a rawn ti leh a, Zda nèn kan inhmuh thu chu mi dang ka ațanga a hriat leh chuan a thinrim ngei àwm si a, chu vàng chuan hrilh nghâl mai țhaa hriain," Zda nèn kan inhmu a," ka ti ta sap a. A rawn thinrim leh viau ringin ka lo inring lâwk a; mahse, a ni miah lo, thil mak a thleng! A awka chhuaka danglamna awm hauh lo hian," Ka ring rêng a," a rawn ti ta sup a. Mak ka ti ru kher mai, thinrim zeta a rawn àn ka rin tehlul nèn, a awka chhuakah thinrimna hriat tùr awm hauh lovin a dam raih mai si a.

"I thin a rim lo em ni?" ka tih chuan," Ka ring che alawm," a rawn ti mai a, nui hak chung hian," Umm, tunah chuan i puitling ve tak tak tawhin ka hria, min rin avàngin ka lãwm e," ka han ti phawt a, làwm pawh ka lãwm tak tak bawk a ni. Chutah," I țha em?" a rawn tih leh phei chuan a bula awma kuah vawng vawng ka châk tak zet.

"Aw, a rûkin ka inbuatsaih nasa alawm," nui hak chung hian ka ti leh a, chutah," Vawiina in inhmuh chuan eng nge in sawi? In insual buai ang tih ka lo hlauthãwng khawp mai a, i rilru tina zâwngin thil sawi a nei em?" ka ti ve ta thung a, ani pawh chuan," A, sawi tùr vak a awm lo, in lo inkawp rei ve êm a, in ințhen thut bawk si nèn, a rilru kha a na ve a nih kha, ka hriat thiampui ta ruak mai, a thil tihsual khân a vaw lêt ta si a," a rawn ti leh a, mak ka ti nawn leh ta awn awn mai ka ti. Vawiin zet chu mak tih vànga thih tùr ni ta se ka thi nawn awn awn dâwn a nih àwm hi.

"Vawiin hian i puitling thut a nih àwm hi, i awka chhuak pawh ngaihthlâk a nuam tak zet mai, khatiang rilru kha paih bo miah suh aw," ka ti a, hmuha kuah vawng vawng ka châkna chuan min tur ut ut ni maiin ka hria; mahse, chu ka châkna chu tipuitling lo tùr chuan ka insûm hrâm hrâm thung a.

Zànah pawh chuan mut dâwnah kan inbe leh a, thil ho mai mai sawiin dârkâr chanve zet kan inbia nia. Video-call a inbiak a tih tlat avàngin ka room chhûngte chu ka hmuh kual a, kan naupan laia mi kha chu kan tidanglam ve tawh bawk a; a tân pawh thil thar a ni ve tho ang chu.

A tûkah chuan U Kimi chanchin chu dàwra awm pah chuan ka ngaichãng ru reng a, min rawn biak ka ring a ni.  July ni 1 a ni a, a sawi 'thla thar' kha a ni tawh miau mai a, ka ngaichãng lo thei lo; mahse, min rawn be miah lo, tunah hian school-ah a la awm ngei ang a, a rawn chhuah paehin tlai lamah a nih loh chuan zàn lamah pawh a ni thei tho, U Tluanga emaw a chhûngte emaw awm loh lai a chuh ve thei tho bawk, ka lo hmanhmawh deuh a ni ang.

Tlai kan bàn hunah pawh chuan a la reh vung vung mai si a, ka ngaih chu a țha chiah tawh lo deuh a; mahse, sawi chhuak lo chuan Sêntei chu ka phur a, kan tlãn haw ta nghâl a. Chhang dàwrah erawh kan pêng zawk thung a, a inah pawh  rei lo tê chauh ka țhu a, Chhanzuala hmuh ka duh avàngin ka chho leh zâwk a, nakinah, zànah U Kimi chu ka phone mai ang, kan inah min lo thlen khalh daih tawh thei tho bawk.

Cake tui tâwk tak mai nèna ka luh rap avàng chuan min lo en duhin mak a tih hmel khawp mai a, inhmachhawnin a dawhkàn chu kan kîl a, coffee tui taka a siam chu kan inchhawp bawk a, cake 'cial' tak nèn. Duh tak leh hmangaih tak hian ka en vang vang a, ka mitmengah chuan ani pawhin a hre ngei ang chu.

"Vawiin tlai chu i awm dàn hian min surprise chiang hle mai," a tih chuan," A țha a nih chu," nui deuh sak chung hian ka ti a, coffee chu dût hlakin amah chu ka en leh nghâl zat a, chutah," Ka ngaihtuah țhìn a, dàwr ațanga ka haw apiang hian chau ve viau țhìn mah ila kan ina haw nghâl ai chuan i ina rawn pèn hi ka châk ziah a, i bula awm hi ka thlahlel a ni ber ang chu, chutiang chu i ngaihtuah ve ngai em?" ka han ti a, ka kut veilam khalh neuh neuh pah chuan," I bula awm chu engtik lai mahin ka ning lo ang," a ti sup a, chutah, ka kut chu la kãngin a han fâwp zauh a, ka nui sak a.

"Kei pawh, lukham deh nuam leh kham nuam zet kham ang deuh hi i nia, a nuam veng veng a ni tawp mai," ka tih leh chuan a nui vei suk a," Lukham maw?" a ti leh sup a, kei chuan," Aw, hei, lukham kham nuam deuh chu han muta han kham chiah hian a nuam veng veng mai a, mut pawh hi a titui ţhìn a ni, chutiang tluk zet chuan ka thlahlel che a ni," ka han ti leh a, induh tawn tak hian kan mit chu a indêt tawn sawr sawr a.

"Ni tina hmuh theih che ka duh a," a tih chuan," Ka rawn pèn loh chuan kan inah i rawn kal ve ngai si lo va," ka lo ti vat a, ani chuan," Ka thinlung duhna hi tihpuitlin ka châk țhìn asin. Kan inkár hi i chhûngte hriat i la duh si lo va, chu vàng chauh chuan harsatna siamsak che duh lovin ka insûm nasa țhìn a ni. Ka duhna tipuitlingin nang hi hloh ta daih si che ila? A chhan chu ka hloh che chuan ka ban phâkah i awm tawh lo ang tih ka hria a ni," a ti leh ta a, duh tak hian ka lo en ngawih ngawih a, ani hi ka lo tawng lo ang tih ka hlau ta ngawih ngawi mai, hlimna tak tak leh nulât tlangvàl kawnga hmangaihna tak tak min hriat thiamtîrtu chu amah ngei hi a ni si a.

"Min la hre chiang lo hle mai," ka tih chuan," Hre chiang che, i rilru kha a luhlul ve tho tih ka hria a nia," a lo ti ve thung a, ka kut chu a la khàl niap niap reng a, kei chuan thutak zet hian," Ka thinlung zawng zawngin, ka rilru zawng zawng leh ka thlarau zawng zawngin ka hmangaih che, Vanlalchhanzual," ka ti chhuak ta a. Ka rilru tak tak sawi chhuak ka ni bawk a, ka sawi mai mai lo khawp mai. A mitmengah chuan chiang zet hian ka en reng a, ani pawhin min rawn en ve reng a, chutah ka rin loh takin ka kut a vawnna chu thlahin a tho ta daih a.

"Kei pawhin tih tak zetin ka hmangaih che," a tih ka rin tehlul nèn, chutia a thoa a kal sawn ta daih chu ka hre thiam lo deuh hlek a, thlang lam tukverh sei zet mai lam hawia a ding deuh ngur chu pan hnai deuhin," Thil dik lo a awm em ni?" hre thiam lo tak chung chuan ka han ti sap a, min chhâng hauh lo, chêt pawh a che eih lo, a din ngaiin a ding ngur mai.

Ka thil sawi kha ka sawi sual lo tih ka hre chiang bawk a, rilrua inthiam lohna nei lo chuan ka pan hnai leh a, a chêt sawn bawk si loh avàng chuan a hma lamah chuan hêlin a hmaah tak chuan ka va ding a, ka han en chho a, a mittui lo tling deuh pam chu ka hmuh sual emaw ka ti hial mai! A mittui a tling ve a nia, thil âwihawm loh tak a ni!

"I țap em ni?" zàwi sap hian ka ti a, engati nge tûn hnai hian thil mak leh âwihawm loh deuh deuh hi ka tawn ziah ni! Tunah lah a mittui a tling leh ringawt tawh a! Min chhâng lo chuan min en chhuk ringawt a, a hmai chu banin dim têa chùlsak pah chuan," Thil dik lo a awm lo tiraw?" ka ti leh a, chutah, nghet zet hian min rawn kuah ta châwih a, min kuah nghet lutuk a, thâwk pawh a harsa țêp chu a ni.

"Ka lãwm e, D," a ti sup a, rei fê chu nghet zetin min la kuah a, ka thil sawi vàng khân a lãwm a ni ngei ang chu kati mai; mahse, a mittui titlatu êm chu a nih ka ring phâk lo.

"I duh loh zâwng ka sawi lo tiraw?" ka tih leh chuan," Ka hmangaih che, D, ka engkim hian an hmangaih che, ka sam zai khat chauh pawh hian a hmangaih che," a ti ta mial mial a, chutah, a thu sawi nemnghehna ni àwm fahran hian duhthawh zet hian min fâwp ta vawng vawng a. Kan inthlah meuh chuan ka lu a hai miai miai thei hial mai.

Tlai takah ka haw ve thei ta țâwk a, in ka thlen chuan U Kimi a lo la awm hauh lo, a lo thlen tawh ka'n ring deuh ngawt a nia. Room-ah lûtin ka jnthlâk a, Chhanzuala zùn zâm chuan min la chiah hneh deuh bawk a, ka la ni deuh chiaiin ka hria, nuam chiai chiai tak a ni; mahse, ka inthing harh lui hrâm  hrâm a, phine la chhuakin U Kimi chu ka han be nghâl a. 

"I lo haw dáwn ta lo em ni?" ka tih chuan," Nichîn khân ka chhuak tawh a, inah ka awm tawh e," a rawn ti ta mai a! Khawi lai in nge maw a sawi ni? In dang luah a tum tihna em ni?

"Khawi laiah maw i awm?" ka han ti nawn leh a, ani chuan," In ka luahah maw le, rawn tihbuai che u ka tum hleinem, min lo ngaihtuah suh, ka nute kha thil awmzia lo hrilh mai ta che, naktûk lamah rawn biak chian tho chu ka tum a," a rawn ti leh a.

"Aw, i chhuah tawh ber chuan a țhat chu, ka lo sawi fel vek mai ang; mahse, nangmaha in han luah hran tum kher chu țha ka va ti lo êm! Ka pate pawhin an phal hauh lo ang, rawn haw mai la?" ka tih chuan a thaw hak ri chu ka hre chiang khawp mai.

"Haw tùra min nawr luih ka hlau alawm, an thin a rim dâwn si a, an tân zahna thlentu fanu mai ka ni dâwn ta si a," a rawn tih chuan ka hmui ka pet fan fan ringawt, amah khawngaihna avàng chuan ka mittui a tla lo chauh a ni.

*A CHÂNG CHUAN I MI TAWN, NGAINATAWM BER BER NIA I HRIATTE HI BEER IN ŢHÌN LEH TATTOO NEI THLIAH THLUAHTE HI ZU NI VE THO A...*