☆UNEXPECTEDLY YOU☆ - 13 By Dingdi Pachuau

 ☆UNEXPECTEDLY YOU☆ - 13 By Dingdi Pachuau

Zanriah ei lai chuan thinrim ru deuh ţùng chung hian ka nu chu ka en a, han sawi țan dàn tùr chu ka hre mai lo lehnghâl nèn, hêng thil thleng hi ka nu vàng vek hi a ni ka ti lo thei lo, chu vàngin a lakah hian ka thin a rim țùng a ni.

"U Tluanga'n U Kimi kut a thlãk țhin avàngin chawhnu khân a chhuahsan a nia," tiin ka nu chu ka han en deuh bîk a, ani pawh chuan chaw bàr ţhulh meuh chuan min rawn en ve nghâl a.

"Khawnge i u chu tunah a awm?" a tih chuan," Ka hre bîk lo, a in luahah a niang," tiin ka lo chhâng a, ka pa chuan," Hetah in a nei reng alawm, engah nge in luah hran a tum mai mai ni? Phone nghâl tùr a nih chu," a lo ti a. Ka nu erawh chuan," Phone a ngai lo, haw leh nghâl rawh se, pasal a nei tawh a, chutiangin chhuahsan mai mai tùr a ni hleinem,  kut a thlâk tih mai mai, a pasal a chhâng zawt zawt a niang chu," a lo ti ta daih a, mit khap lo lêk chuan makti takin ka nu chu ka en reng a.

A fanu chu a hre chiang lo nge, a pasal chu a țhen hlen a hlauhpui zâwk ni ang? U Tluanga zu in ţhinte hi a hre ve ngei àwm si a, U Kimi pawhin a sawi lan zauh tawh kha, engtin nge hetiang hian a sawi theih ni?!

"Tluanga'n zu a in ţhin em ni?" ka pain a tih chuan," In ţhin e, a hma pawhin U Kimi pawh khân a sawi tawh kha, a in nasa a, a ruih apiangin kut a thlâk ziah bawk. Ka nu, U Kimi nungchang i hre chiang ve viau khân ka hre sia, inthlahrung leh thu âwih thei zet a nih kha. Ani meuh a chhuak a nih chuan hrehawm a ti tàwpkhãwk tihna a ni mai, a hma daihin min hrilh tawh; mahse, hrilh che u a phal tlat loh avàngin ka hrilh lo mai che u a ni," ka ti ve ta khawl khawl a.

Ka pa chuan," A zia lo hle mai," a lo ti sap a, ka nu erawh chuan," Mite pawhin pasal zu in mi an nei fo va, a tàwp thleng an tuar țàng țáng mai ţhin. A tuar a zuau lutuk a ni, pasal neih chuan hrehawm tuar a ngai asin, pasal neih hmaa nuam zawng zawng kan neih ang kha a neih theih tawh loh, ani phei chuan kum 3 vêl lek chauh a la tuar a, hrehawm tiin a chhuahsan ta hial a...tsk..tsk.. Amah chauhin a tuar bîk lo, mite pawhin an tuar, hrehawm tam tak an tuar, an tuar hrâm hrâm a, an tuar chhuak mai țhìn a ni, ani pawh mi hriat tam hmain haw leh vat rawh se," a ti leh ta hmuar hmuar a.

Hei hi ka nu rilru put dàn chu a ni tak si a! Ka u khân a lo hre lâwk a ni hial ang ka ti! A fanu, taksa mai ni lo, rilru thlenga nghaisak a ni chu hmeichhia a nihna anga hre thiam àwm tak zâwk a nih tehlul nèn, mak ka ti, hetiang lam deuha rilru a put hi chu ka ring tho a; mahse, hetiang êm êm hi chu ka ring pha lo, a fanu aiin inlaichinna a ngaipawimawh em ni zâwk? Ni lo, a ni lo, U Tluangate hi an hausain khawtlâng ngaihin mi țha chhûngkua, zahawm leh puitling an ni a, a fanu hian a țhen tak tak ang tih a hlauh vàng a ni zâwk.

"Chutiang ringawt chu a dik thei nâng, amah bia ila. A, rawn haw phawt rawh se, a kâ ațang ngeiin thil awm dànte kan han ngaithla ve ang a," ka pa chuan a lo ti ve thung a, ka nu rilru put dàn mak ka tih êm avàng chuan ka chaw ei pawh a tui thei tawh lo, ka kham ta daih nghe nghe a.

Ka kham hnu chuan ka nu leh pa chu an țawng an țawng a, an thu a inhmu chiah lo a niang, ka nu chuan a chhâng lët ve zêl a, a thil sawi kha ka ngaihtuah chhuak zawk a.

"A pasal a chhâng zawt zawt a niang chu..."

Ka lu ka thing nak nak a, U Kimi hian mi a chhâng zawt zawt ngai lo, a ngaih dàn a nih loh fê pawh hian a sawi chhuak ve mai mai ngai lo va, U Tluanga hi a chhàn zawt zawt lah ka ring hek lo, kei chuan ka nu thu sawi kha ka Amen ve thei lo, amah zâwk hian a ni pasalte chhâng zawt zawt zâwk chu ni, tunah pawh a chhâng zêl a nih hi. Ka nu mah ni se tunah tak hi chuan a lamah ka țang lo, ka pa hi a zah lo mah mah ţhin ka ti, a châng phei chuan ka lo îp fo. Hmeichhe nun dàn tùr thu țha tak tak min hrilh fo va; mahse, min hrilhtu ber hian a zàwm lo fo si a, hrehawm ka lo ti țhin a ni.

U Kimi chu ka bia a; mahse, a rilru tih-hah ka duh lo va, kan titi dàn pawh chu ka hrilh këlh lo, lungdam taka awm tùrin ka hrilh a, naktûk lamah a rawn kal dâwn tho a, boruak awm dàn a hre ve vek dâwn tho, zanin chu rilru hrehawm lovin mu ve phawt teh se. Riahpui a ngaih leh ngaih loh ka han zâwt fiam a, ani chuan," Ngai lo ve, ka hlau hleinem," a lo ti ve mai bawk a, riahpui a duh ka ring lo sa hrim hrim a, ka zâwt mai mai a ni.

A tûkah chuan chhuah duh viau mah ila U Kimi a lo kal dâwn avàng chuan ka chhuak lo va, Chhanzuala erawh ka phone a, thil awmzia ka hrilh tel nghâl bawk a. Ani chuan,"Ka hmu châk che asin le!" a ti vang vang a, kei chuan,"Vawiin chauh a ni mai, ka hmu châk lo che a ni bîk lo a nia, hun remchâng a awm  leh thuai mai ang," ka ti a, rei pawh kan inbe lo.

U Kimi lo kal chu a rawn inthlahrung tih a hriat mai a, a ți deuh dai nghe nghe a, ka khawngaih khawp mai. A thiam loh ni miah loah kut a tuar țhìn a, a duh dànah phei chuan ani pawh hian pasal țhen nih chu a duh bîk lo tawp ang; mahse, a thei tawh ngang lo a ni mai a, kei chuan a tàwp thlengin ka țan zêl ang.

Rin loh deuhin ka nu chuan a lo àn khum lo tlat a, a la insûm ve rih pawh a ni mahna, ka pa chuan," Hmun danga riah kher a ngai hleinem, in hi rawn pan hmasak ber tùr a nia," a lo ti a, U Kimi chuan a chhâng lo, bet lo tih hriat tak hian ka piah deuhah chuan a ţhu a, mahni in ngeiah pawh chutianga a thla a muang lo chu ka khawngaih a, ka thin a rim bawk, a chungah erawh a ni lo.

Ka pain thil awmzia a zawh chuan a sawi ve sap sap a, ngun takin ka lo ngaithla a, thil awmzia a sawi chhûng chuan ka thin a lo rim a, hmeichhia mah ni ila U Tluanga chu han ben ve siah siah mai ka châk viau a ni.

"Zu a ruih hian ka hmel hian a thin a tirim țhìn a nih ka ring ber," a tih chuan ka nu chuan," Thil âwihawm loh lutuk a nih chu, eng emaw in inkârah a huat theih tùr a awm zâwk a niang, i pasal chu i ngaihtuah táwk chiah lo a ni lo maw? Nilêngin a chhuak hah ve ang a, i lo ngaihsak țhat loh chuan thinrimthlâk ve deuh mai tùr a nia," a lo ti hlak hlak a.

"Ka buai ve thei êm a, chhùnah school kal a ngai a, chawhnu bàn veleh hawin zanriah tùr rawng ka bâwl nghâl char char a, ka tih tùr a ni miau a, ka nuin min puih a tum pawhin ka lo hnial ve țhìn, a theih hrâm chuan àwl ve hrâm hrâm ka tum ve ràn a, ka chungah pawh a sual lo rêng bawk. Mi dang vànga rawn chhuak ka ni lo va, U Tluanga kut min thlâk hi hrehawm ka ti a, a bulah hian ka thlâ a ngam thei lo a ni," ka u chuan a ti leh sap sap a.

"A ruih loh châng a tam daih zâwk ang chu, ruih châng chauhin a ni lo'm ni kut a thlâk che?" ka nuin a lo tih leh chuan,"Nu...!" ka lo ti țhat a, ani chuan," Eng nge sawi dik loh ka nei hleinem. Nupaa insiam tawh chuan inţhen tumna rilru hi put miah loh tùr asin, rilru hi tihpachan tùr," a lo ti leh hmak hmak a, U Kimi chu ka va en a, a kun deuh chal a, a ngawi dâk bawk si a, ka khawngaih tak zet a ni.

"Um, hmeichhe kutthlâk chîng hi chu mi țha tak an awm lo asin, hmeichhia chu dawm kàn ngai leh hriat thiam ngai an ni a, an thiam lo viau a nih loh chuan kut hi thlâk miah loh tùr a ni, Tluanga pawh chuan a ti dik lo a nih chu, thil dang chu thil dang ni se, kut a thlâk ţhìn che chu thil țha lo tak a ni," ka pa chuan a lo ti ve thung a, chutiang  thu ka pain a han phuh chhuak chu ka lo lãwm kher mai. U Kimi thlavâng a hauh ve si a, keiin ka hauh bawk a, ka nu chiah a mal țan ta a nih chu.

Chutah," A nih leh, i rawn chhuak ta a, i hna engtin nge ni dâwn? I thawk chhunzawm zêl ang chu maw?" a tih leh chuan U Kimi chuan," Bànna ka theh lût tawh a, hun remchâng a awm veleh hna dang ka zawng nghâl ang," tiin a lo chhâng vat a. Ka nu chuan," Engati nge chutianga i tih kher a? In inţhen hlen tak tak dâwn tihna pawh la ni lo, chutiangin thu tàwp lo siam ve nghâl vat tùr a ni ngai lo, i mãwl êm mai, mãwl lutuk!" a lo ti mawlh mawlh a.

Ka pa pawh chuan," Chutiang kher chu a ngai lo asin, tûnlaiah hna a vàn tawh tehlul nèn, a va buaithlâk êm!" tiin tháwk a la hap a, a rilru a hah a ni tih ka hre thei mai. U Kimi chuan," Sawrkâr hna kher lo pawh ka zawng mai ang chu, thawh hreh ka nei hleinem," tîm deuh dai hian  lo ti a, ka nu pek chuan," I mãwl êm mai, engti tiha bànna lo theh lût nge maw i nih ni! Rilru hi tibuai viau lo teh u," a lo ti a, dungin chhuatah chuan a vei tawn vat vat a.

Ka pa thu angin a in thleng ka thlah a, ka pa khân sáwm nasa viau mah se a luhlul ve tlat, ina rawn luh chu a tum lo ve tlat mai a, ka pa pawhin tihngaihna a hre rih lo, ka nu erawh chuan," Ni e, tikhân han awm rih la, an rawn koh hunah che i tân haw leh a remchâng zâwk ang," a ti ve thung a, ințhentîr chu a tum lo ve chiang khawp mai.

A in luah chu Rahsi vêngah daih niin, Assam Type chhãwng chung zâwk hi a lo ni a, te fel khar mai niin, luah man pawh a lo to lêm lo, a nuam reuh phian zui a, school-a a thawhpuinu hnên ațangin a ruak tih a hria a, a lo hauh lâwk a ni àwm e.

Zanriah chu a bula ei ka tum ve avàngin ka pate bulah khân ka hrilh nghâl kha a ni a, kan pahniha kan awm hnu chuan ka theih ang anga fuihin ka hnèm pah a, a lam ka țan zêl tùr thu ka hrilh pah bawk a.

"Min hawtîr leh an tum tak tak ang em?" chian loh hmel taka a tih chuan," E, chutiang ngaihtuah duh suh, hetia i awm hnu hi chuan ani lam rêng rêng chu ngaihtuah duh mah ta che, i duh loh phawt chuan an tilui thei lo ang che, i thu thu a ni alawm," ka ti a, ka nui lui sak a.

"Ka nu ber hi a nia, a buaithlâk êm mai," a ti leh a, a kuta vawnsak pah chuan," A thu ringawtin eng mah a ti thei lo, ani chu ngaihtuah duh suh, hlim takin awm tum zâwk teh," ka ti a, chutah, hawi kualin," Chawhmeh tih vêl i nei si lo va, kan lei lawk dâwn em ni ang? E, nang chu lo awm rawh, keimahin ka'n chhuak zâwk ang e, ka rang thei zâwk ang," ka ti a, min chhàn hma chuan scooty chahbi lain ka chhuak zui ta nghâl a.

Chhanzuala hmuh lawk pawh ka duh viau nain vawiin hun hi chu ka u bula vui liam mai țha zâwkin ka hria a, ani hian tunah chuan min mamawh rih êm a ni.

Eirawng kan bàwl lai chuan ka phone chu a rawn nghawr dat dat a, ka han en vat a, Chhanzuala message a lo ni a, chu lo pawh, Sêntei mrssage leh Zda message pawh a lo awm, Zda number hi delete tawh mah ila number ringawt lo lang chu a number ngei a ni tih ka hre chiang ve tâwk a ni.

Chhanzuala message chu ka han en a, min ngaih thu leh min hmuh châk thu a rawn sawina a ni, ka nui sak a, ka chhâng ve nghâl a.

*Min hmuh châk viau chuan Rahsi vêngah chaw rawn ei ve la?* tiin. A țha dâwn riau, ka u bula awm pahin kan inhmu pah thei dâwn a, țha lutuk!

"A thu a va thlum àwm ve! Zda em ni?" U Kimi a rawn tih chuan ka en vat a, a lo nui a, kei erawh chuan,"Ni lo deuh," ti ringawtin ka chhâng a, kan chanchin chu hrilh ka han tum deuh zuau hman a; mahse, ka țhulh leh ta, ani rilru hah buai laia lo hrilh ve chu, hrilhna hun a la tam êm mai.

Sentei message pawh chu enin ka chhâng nghâl a, Chhanzuala pawh chuan min rawn chhâng vatin kan awmna chu min rawn zâwt chiang a, ka han hrilh ve ngial a, rawn kal a tum tak tak a nih hmel, min hmuh châk chuan a rawn kal poh a niang chu.

Alu kan chawh sar sar pah chuan," U, kan têt deuh laia kan ţhenawma awm țhin Zawmdikite kha i hria em?" tiin ka han zâwt chhin a, ani chuan," Tu Zawmdiki...Pa Hluate kha chu ka hria," a lo ti a, Maian chu a hîk pah a, kei chuan," Aw, Pa Hlua fanu kha Zawmdiki chu a nia," ka lo ti a, ani chuan," A hming ka lo hre tawh hleinem, nau mipa a nei tiraw? Chhantluanga em ni kha?" a rawn ti leh a, kei chuan," Chhanzuala maw le, Lungleiah hian a awm ve a, a nu leh pa ințhen kha chu i hriain ka ring a, a nu bulah awmin a nu pawh chuan a boralsan tawh a, kan inpawh viau asin. Chuan, chaw ei tùr pawh hian ka sâwm ve a..." ka ti nghâl zat a, ani pawh chuan," A nih tak chu, a va khawngaihthlâk reuh ve a. An unau khân ka hre chiang ve vak lo va, ka kawm rualpui kha an ni chiah lo bawk nèn, bâkah, inah khân ka awm tam loh êm kha maw..." a ti leh sap sap a.

Chhanzuala chu a rawn thleng har lo, a rawn bo deuh lek lek zâwk a, chu vàng chuan a rawn thleng har deuh zâwk niin a sawi. U Kimi nèn chuan an inchibai a," Hmun dangah chuan hmu che ila ka hre dâwn miah lo che, i lo tlangvâl ve tak tak tawh si a," U Kimi'n a tih chuan ka lo nui hak a, 'tlangvâl ve tak tak tawh' tih chu a duh lo viau ang tih ka hre ràn mai si a.

Ka u bul a nih vàng chuan engtin vak mah a awm ngam bîk lo, bâkah, ka mitmeiin ka khap sa diam a, ka u hi kan chanchin eng mah ka la hrilh si lo va, nau ang maia ka en niin hria se ka duh rih a ni. Nakinah muangchângin ka la hrilh chauh ang.

Ruah a rawn tla seng seng a, U Kimi chuan," In ril a țâm viau tawh em?" a ti a, kei chuan," Țâm vak lo, engati nge?" ka lo ti vat a, ani chuan," Chuti chu, ka inbual lawk ang aw, chumi hnuah chuan kan ei mai dâwn nia," a ti leh a, room lamah chuan a lût ta nghâl a.

A inbual hlàn chuan insi riala țhuin kan titi sep sep a, ruah a tla seng seng reng bawk si a, khua a lum hran lo nèn, boruak chu a nuam reuh tawp, kan inngai dùn bawk a, mitmei vèn ngaihna tùr ber lah a inbual rih daih bawk si a, kan hun neihchhun hi àm a ngai.

"Ka hmuh loh hlek che pawh hian ka ngai thei si che a, i u pawh zah zo lovin ka rawn pan ruak ruak che chu a nia, zak thei lo min ti ngawtin a nia ka rin ni," a tih chuan," A ho êm mai, i zak thei lo over lo tih ka hre tho alawm," nui chungin ka lo ti a, ka kut chu a hmer nghet salh a, kei pawh chuan nghet zet hian ka hmer lêt ve a. Chutah, rawn thle ãwn deuhin rem loh hmel zet hian min rawn fâwp zauh a, ka chhâng lêt ve hman lo, awm pângngaiin a awm leh vat a.

Ka melh hâ a, ani erawh chuan nui suk chung hian pâwn lama ruah sûr chu tukverh dârthlalang fai zet chhanah chuan a thlîr leh daih a, kei pawh chuan ka thlîr zui ve nghâl tho. Kan awm dàn leh ruah sûr chu a inrem riau hian ka hre tlat a, țawng tawh lo chuan pâwn lam chu kan thlîr dùn vang vang a.

Zanriah kan kîl chu kan hlim tlâng dar dar viay mai. Pasal chhuahsan e ti lo chuan U Kimi pawh chu a nui ve var var reng a, Chhanzuala chuan hmun danga lehkha a zir laia a thil tawn nuihzatthlâk deuh deuh a sawi chhuak a, chu chu kan nuih a ni.

Han riah mai pawh chu pawi ka ti lo viau nain ka nute ka hrilh lâwk si lo va, dâr 8:30 vêlah Chhanzuala nèn chuan haw tùrin kan chhuak a, kawngka thlengin min thlah a, min mangțhazui ta nghâl a, kan lìrthei dahna kan thlen hmain Chhanzuala nèn chuan hun dangah Sêntei tel ngeia chaw ei khâwm kan seprawtui hman nia!

A ina pêng tùra ngen tak têa min ngen avàng chuan ka han pêng leh rih a, a inah hi chuan thla hi a ngam siah mai a, rilru chhûngril hi a hlim veng veng țhìn, thu dang kan sawi tam lo, kan induhna chu chétziain kan lantîrmai a; mahse, ramri kham sa erawh kan pèl lo thung. Hei hi chu pasal ka neih hun hma zawnga ka vawn him tùr a ni, pasal neih zànah chauh ramri hi chu țhiah a ni ang.

Mutnaah Zda message chu ka chhiar chhin a, he pa hi a rilru a buai deuh tak tak tawh a ni ngei ang chu, a bialnu ang riakah min rawn la dah thei nia! 

*Zanin rawn lèn ka duh viau nain buaina ka nei leh thut si a, min lo hre thiam mai rawh*  tiin, ka nui hawk a, ka lu ka thing zui nar nar a, message pawh chu ka delete nghâl bawk, Buaia chu a lo la buai reng a nih àwm hi.

A tûka ka nute titi ațang chuan nizàn khân U Tluanga palaite rawn kalin ngaihdam dîlin U Kimi chu rawn koh an tum a ni àwm e. Ka pa chuan țha takin a lo chhàwn ang tih ka ring a, ka nu phei chu a lo nui sâng maithei a ni, U Kimi chu hrilhin a ngaihdànte an zâwt ve phawt ang  tiin an lo thlah a ni àwm e, ka nu chuan engtin tak ngai ang maw? A duh dàn chuan U Kimi chu awm se chuan palai rual chuan a hàwtír nghâlin ka ring.

Inkhâwm bànah Sêntei nèn U Kimi in lam chu kan pan a, mi hrang a ni lo bawk a, kan thlen veleh chuan nizàn lama kan ina palai kal vêl chungchâng chu ka sawi nghâl bawrh bawrh a, Sêntei pawh chu kațanna lamah a țang ve chiang khawp mai.

"Ka thu an nghâk a nih chuan ka dinna kha a ngai reng a ni, haw leh duh tùr ni ila chuan ka chhuahsan buangbâr lo tawp ang, ka haw tawh dáwn lo," U Kimi chuan a ti ve tlat a, Sêntei chuan,"A hrehawm dâwn êm mai, pasal kutthlâk chîng neih chu ka ngaihtuah zâwng ringawt pawh hian ka hlau e a," a lo ti a, kei chuan," Ni e, a hlauhawm alawm. I haw loh pawhin rilțâm chuan i thi bîk lo tawp ang, Pathianah a piangthar țha viaua a nun a thlâk hlawk a nih loh chuan a sim chuang lo ang," ka lo ti ve a, kan țanna a inang țhâm mai.

Number ringawt aţangin call ka dawng a, dàwr chungchângah hian number ka save lëm loh hnên ațang hian call ka dawng ve zauh zauh a, ngaihțhat lohna pawh nei chuang lo chuan ka han chhâng ve nghâl zat a.

"Dinpui, ka hmu lawk thei che ang em?"

Zda lehpek, he pa hi a va daihzai tak êm!! Number lah hi a hrang hrang hi a hmang mai a, a țhiante phone ațangin a ni pek ang chu.

"Ni lo ve, awmzia a awm lo, min rawn be tawh teh suh," ka ti nghat a, U Kimi leh Sêntei veranda lama an chhuah hlàn a ni hlauh chu ka vànnei viau a ni.

"Palai ka rawn tîr dâwn. Chuan, mi zawng zawngin ka bialnu i ni tih an hre thei ang."

A â tak tak tawh a nih chiah hi! He pa hi, a ti duh tak tak mai ang ka ti, a rilru hi a dik zân tawh lo a ni chiang.

"Chutiang zâwngin min vau hauh suh, kan inkárah eng mah a awm lo, a tàwp vek tawh tih nang pawhin i hriat chian viau tawh kha. Min hmuha min rawn biak pawh tum tawh suh, khawngaih takin," tiin phone chu ka hmet tàwp ta hmak a, ka hmui chunglam chu petin ka maimichhîng vang vang a, hetianga tih mai mai leh vau mai mai tùr hi ka ni bïk lo.

*HLIMNA HI THIL TIH HIAN A RAWN HRING CHHUAK VEK KHER LO A NI MAITHEI; MAHSE, THIL TIH TEL LO ERAWH CHUAN HLIMNA A AWM THEI LO THUNG*