☆UNEXPECTEDLY YOU☆ - 14 By Dingdi Pachuau

 ☆UNEXPECTEDLY YOU☆ - 14 By Dingdi Pachuau

Thawhțanni zàna zanriah kan ei kham thlèng ka sil laiin U Tluanga nu leh pa an rawn lang hrãwk mai a, ka nute chuan țha takin an lo chhàwn a, chutia U Tluanga pate meuh rawn lang ta chu an thil sawi tùr lam chu hre sa ruak mah ila chipchiar takin ka hre châk a, sitting room lamah țhu daih mah se thlèng ka sil zawh hnuah pawh chuan ka room lam ka pan nghâl duh bîk lo, an thu sawi hre pha thei tùrin ka țhu a, thingpui chhuan vil pahin an lamah ka beng ka dawh ru renga ni.

U Tluanga nu leh pa hi mi sual an ni miah lo nain an fapain a nupui kut a thlâk tih an hre ve reng a, an inrawlh ngam loh vàng leh an fa mo thlavàng an hauh ngam lo chuan ka thin a tina tlat a, ka hmu dik lo deuh tlat tawh a ni. An fapa chu an duh dàn ang tak chuan a awm bîk lo ang, ka hre thiam tho; mahse, kut a thlâk laia an inrawlh duh ngai lo tlat chu ka hre thiam thei lo a ni. Țha duam satliahah ka ngai, ka dah sâng dùn tehchiam lo. An fapa chu an hlau viau a lo nih pawhin fapa dang an nei reng a, U Tluanga'n ka u kut a thlâk lai chu lo danga, 'hmeichhia chu kutthlâk ngai a ni lo ve' te pawh lo tih ve tùr a nia, a hmeichhia zâwk ka u a nih vàngin ka lo țan hlur a ni maithei e; mahse, a... an chhûngkua hi ka dem tho tho.

An thusawi ngaihthlâk rûk ka duh nèn, Zda a rawn lût pek a nih chu! Eng rilru nge put tùr tih pawh ka hre thiam lo, a rawn lëng ngam hi ka tia, biak pawh be duh lawk lo chuan ka en tawp phawt a, ka ngei a, mak ka ti bawk. Heti êm êma zak thei lo hi a lo ni ang tih pawh ka ring pha lo, eng nge a thluakah hian awm ang le ka ti ta.

Mahse, mi â a ni lo, a fing lutuk. Inlêng pawimawh(mahse, kei chuan pawimawh chu ka ti hran lo)kan nei a ni tih pawh a hre thiam nghâl vat rêng a, inti-nèlawm deuh hian min bia a," Zanin chu ka hman hma ve a, vawiin lamah kan hna pawh kan zo ve ta," a ti luam a, ka en cheuh cheuh a, zak lo ka ti lutuk chu ka inkhawngaih zâwk!

Ka țawng duh lawk lo va; mahse, a hnu deuhah chuan a mawi tâwk chauh tak takin ka be ve. Thinrim khuma tùm bûr chu thil sâwt a ni lo va, țawng duh lova ngawih tlat lah thil dik ber a ni lo bawk. Kan inkâr a tàwp hmak tawh tih ka hrilh ngun tawh a, a hre tam tawh, a pawm duh tlat lo a nih leh ama thu thu le, a rilru ka va control thei hleinem.

A lëng rei lo hlauh chu thil làwmawm tak a ni, U Tluanga nu leh pate țìn hma lawk tak takin a țîn ve a, ka nu leh pa chuan veranda thlengin an thlah a, ka nu pawh a țawngkam a țhain a nui sâng mai. A țha e, tûm bûra lo hmachhawn ai chuan a mawihnai zâwk alawm ti tawh mai ang; mahse, kei chuan ka thei ve chuang lo, ka awm ngaiin ka awm tawp rêng a ni.

An rawn luh chuan ka nu chuan," An puitlingin an zahawm dùn hle mai, keini fanute chu rawn kalpah mai mai àwm tâwk an nih tehlul nèn, zahawm ka ti tak zet a ni. Anmahni vàng tal pawh khân Kimi chu haw leh ngei rawh se," a ti nghâl bawrh bawrh a, ka pa chuan," Haw leh ngei se tih chu kan duh dàn a ni a, nupui pasal neih tawh hnua ințhen leh hi thil țha chu a ni lo; mahse, a haw tùr bera rilru a pawimawh ang," a lo ti ve thung a, tûnlai tak hi chuan ka pa hi ka țan thlâwt, a rilru leh ka rilru a inmil tlat.

"Dinpui, naktûkah dàwr ațanga i rawn haw pahin i u rawn phur haw ve nghâl ang che, chhûngkuaa thil sawi tlàn a ngai a nih hi. Chuan, nang pawhin i u chu fuih ve la, ințhen țhat lohzia leh Tluangate chhûng tluka amah hmangaih thiam tùr an awm loh thute hrilh ve ang che. A nu leh pate pawhin an fak êm kha, an fanu ang maiin an hmangaih a nih kha a hriat reng alawm, Tluanga pawh a inchhîr tih an sawi kha, haw leh pawh ni se kut a thlâk tawh bîk nâng," a tih chuan,"A la hriat ngawt loh, tunah chuan a sârhù lai a la nia, ruih pawh a rui ngam rih nâng, zu in a sim hmak a nih loh chuan nakinah hun a rei deuh ang a, kut a thlâk chhunzawm leh tho ang," ka lo ti thung a, ka rilru dik tak a ni ka sawi ni.

"Nang tê hian i lo fuihpawrh a ni hial lo maw? I u huaisenna ringawt hi chuan a pasal han chhuahsan êm chu a ngamin ka ring lo, a rûk hian i lo fuih char char a niang ka ti," ka nuin a tih leh chuan," A teuh lo mai! Kei phei chu ni ila hmânah hmânah  khân ka chhuahsan daih tawh ang, ani chuan a la tuar hrâm hrâm zâwk a, a dawhtheihnain a tlin tawh ngang lo tihna a ni mai," ka lo ti leh a, chutianga ka nuin ka u fuihpawrha min han ring kher kher chu ka ngei ve deuh hlek.

"Kimi thu thu a ni ang, amah kha han awm leh tùr ber a ni a, hreh taka haw luihtîr ka tum lo," ka pain a lo tih tâkah chuan ka nu chu a ngawi ta hmak mai a, an room lam panin a kal zui nghâl bawk a, a rûkin ka nui var var. A duh thu ang diak diakin chhûngkuaah rorèl a tum a, mahni fanu hial pawhin rawn pan ngam lovin in dang a luah hial a nia, a awm dàn hi a dik lo leh tlat ţhìn a ni.

Ruah a sùr avàngin dàwra rawn kal pawh vawiin chu an tam viau lo va, tlêm chuan kan ãwl ve. Famkimi chuan Hruaia chu a fiam zãrh zãrh reng a, ani Hruaia lah ruah sûr hnuaiah chuan chhuak thei bîk hek lo le, kan zîngah a tãl ve lo thei lo va, ani lo mi dang hmeichhia vek kan ni nèn, mipa ber hi a dang leh lel țhin a ni. 

"Min fiam ziah lo teh, i țawng a ring thei si, mi zawng zawng hrilh vek tum zêl suh," Hruaia'n a tih chuan," A, an hre lo ang tih ka hlauhpui che alawm, luck lo hmuh hian an hmuh che ka hlau a," Famkimi chuan a lo ti a, Hruaia lah chuan," Luck lo hmuh chuan min hmu lo ang, ka luck sa reng alawm," a ti phawt a, chutah, sawi zawm lehin," Chutia luck lo sawi chhuah tâkah chuan i bialpa i kalpui lai ka la hmu ve miah lo che, nang hi i insawi ang hian i luck tak tak lo a nih ka ring ta," sawi fuh inti zet hian a rawn ti leh a, Famkimi tih loh hmeichhe pathum chu kan lo nui nghâl țhat a, Famkimi chuan," A khai! Duh tâwk teh, mi hmuh laiin kan kalpui duh ve hleinem, mi hmuh ka phal lo, nanga hmuh hlauh phei chu," hnehsawh zet hian a lo ti lêt a, chhàn lêt ngaihna hre tawh hek lo le, Hruaia chuan," A hmel chhia a nih mai chu a!" a ti sup a, a hmel leh a thil sawi chu a inhmeh lutuk a, dul dawm meuhin kan nui tlãwrh tlãwrh a.

Chawhnu lamah chuan khua a rawn țha ta deuh a, min rawn tlawh pawh an rawn awm ve leh ta, àwl deuh laiin Famkimi chuan min rawn hnaih sârh sârh pah hian," Ih, en teh, Chhanzuala kha, i sawi chhin tawh em? Tûnlai chu kan chàwl tlâng ngai tawh si lo va, hmuh pawh ka hmu khât ta, hmuh leh tawh a châkawm khawp mai, a in ngai kha a la luah reng ang tiraw?" a rawn ti sar sar a.

"Umm..." ka lo ti mai a, han sawi chhunzawm mai tùr ka hre lo. Ani lah chuan," Bialnu a neih loh chuan, ti ila a nei ru tho chuan ka ring a, ka duh reuh ngawt mai, a pà ru reuh tlat a, bâkah, mahni chauha awm niin hrawn tùr dang an awm lo va, a fuh dâwn tlat a ni, in lah a nei nuam bawk si," a ti leh duah a, chutah," Fùr hunpui hi han ral phawt se, a inah khân chaw ei khâwm rawt leh ila a țha ang, a nuam reuh tlat. Sawi leh ta țhin ila, a țawng duh lëm lo nain kha tak khân a tipà reuh ka tia, mipa ţawng zawt zawt hi chu ka ti thei țhak lo," a ti leh bawrh bawrh a.

Chhanzuala sawi nân 'reuh' a hmang țhìn chu ka nuih a za ru khawp mai a, Chhanzuala'n hre ngat phei se chuan a duh lo dâwn chiang lutuk. Keini ai chuan naupang mah se keini aiin a lianin a sâng daih zâwk si a, mahni aia nau deuh taka en pawh kha a duh fahran lo a nih kha.

Vawiin tlai chu ka pêng haw leh thei dâwn tlat lo, U Kimi lam kual ka ngai dâwn si a, min lo hre thiam leh mai ang chu maw, thil awmzia text-in ka hrilh tawh a, min la chhâng lo nain a deliver thlap tawh a, min la rawn chhâng mai ang chu.

U Kimi chuan a hreh khawp mai a, a chhan chu ka nuin a tih-luih tlat a hlau a ni; mahse, ka fuih a, ka pa thil sawite chu hrilhin," I duh loh chuan ka nu pawhin a tilui thei bîk lo che, a neitu berin i peih tawh loh miau chuan tihluih theihna a nei lo, i dinna ngaiah ding reng la, kei pawhin ka dinpui tlat ang che," ka ti sauh sauh a.

Chaw ei pawh a tui nek lo. Ka nu chu a âng deuh char char a, U Kimi chu àn hneh a tum ni maiin ka hria, ani lah chu a ți deuh dâk reng a, eng thil mah a sawi lo. 

"A nu leh pate meuh an rawn lang a, chumi hmain mi dang an rawn tîr tawh bawk, vawi eng zât nge rawn kal tùra i beisei? Ngaihdam min rawn dîl lawm lawm a, lo induh khuma ring lo tih khawng khum tlat thei tùr khawpa hausa kan nih loh hi, anni mi zahawm chhûngkua lehnghâl, an rawn tlâwm êm êm tawh a, lo induh viau tùrin eng êm nge i nih a?" a ti phiar phiar a, ka pa chuan," A mak thei țhìn! Chaw ei lai chuan ngawi ve rih teh, chaw einaah leh zêl zawng, chaw lem pawh a nuam lo zo vek tawh. Kimbawihi pawhin hrehawm a ti lutuk ang asin," a lo ti a, kei erawh chu naupang ber ka ni bawk si a, ka lo inrawlh ve lo, sawi chhuah ve phiar phiar erawh ka châk khawp mai.

"Bâkah, kut inthlâk ringawt mai hi thil dik a ni lo, kha tak kha ka ngaihtheih loh thil a ni, ka ngaihtuah ka ngaihtuah a, a dik thei hlawl lo. Kimbawihi pawh, i haw tùr leh haw loh tùr chungchângah hian keini nupa chuan thu tàwp kan siam thei lo, ințhen hi țha ka ti miah lo; mahse, hei heti hi in ni a, nangmah i pawimawh ber, i thu thu a ni," ka pain a tih leh chuan dawhkàn hnuaia ka u ke chu ka tlawhsak zauh a, min rawn en chuang lo nain ka tlawh tih erawh a hria tih ka hria.

Chaw ei kham lamah erawh sawi tùr a awm tawh hran lo. Ka nu hmel erawh hmuh a nuam fahran lo, a lungawi lo tih a hriat a, âng chiam tawh lo mah se a țawngkam chhuak hrim hrimah chuan U Kimi haw leh tùra a duhzia chu a hriat theih zêl; mahse, ka pain a lo sawi tawh angin haw leh haw loh chungchãng kha chu amah U Kimi thu thu a nih avàngin a tilui ngam bîk lo niin ka hria. Zanina kan titi khâwma U Kimi thu tàwp chu hun hi han liam ve deuh hlek phawt se tih a ni deuh mai. U Kimi chuan ka nu leh pate a zah vàngah mai ka ngai, a rilru tak tak a ni lo tawp ang, haw a tum tawh loh êm kha.

"Zanin chu riak ve mai la?" ka tih chuan," Ni lo ve, a buaithlâk mai mai, min thlah haw leh la?" a lo ti ve thung a, a hmela inthlahrunna leh nuam a tih lohzia chu ka hmuh chian êm avàng chuan ka sawi nawn tawh lo.

Mutpuan kha chu a nei ve tho nain ka blanket pakhat chu ka phawrh chhuahsak a, U Tluanga a chhuahsan hma khân a mamawh tùr engkim kha a lo inngaihtuah lâwk viau zâwk a, a buai lo mai mai niin ka hria, bâkah, a thawhpuina khân a lo pe ve nual bawk a.

Ka haw lamah Chhanzuala inah ka'n pèn leh hrâm kha. Games a lo khèl a, min hmuh veleh chuan min lo kuah vat a, kan tûnlai boruak vàng hian ka ngsihtuah vak hman lo va, kan inhmu khât deuh bawk, kan inhmuh chhunah lah hun rei kan nei thei si lo.

"Nizànah Zda a lo lêng a," tih chu a thuphungin ka hrilh ve a, mi dang ka aţanga a hriat chuan a lungawi vak lo thei tlat si a; mahse, a lo hre hman leh tawh maithei tho bawk.

"Umm..." a lo ti mai a, kei chuan," I thin a rim lo em ni?" ka ti leh a, ka sawi zo chu ka inchhír zat. Hetiang zawhna holam lutyk te zawh rêng rêng, kei hian thinrim tùrin ka lo duh te hi a ni zâwk lo maw? Mãwl thei lutuk mai.

"A dinhmun ka hriat thiamsak tawh alawm, i țhen tawh miau si a," a tih chuan ka dâk chho hau a, ka hmuiah a rawn fâwp zauh thung.

"Țha lutuk!" ka ti hliai a, chutah," Nangmah kha i ni tak tak em?  Ka bialpa Vanlalchhanzuala kha? I ni chiah em?" ka ti leh a, ani lah chuan," I tuar hrâm hrâm a ngai a nih hi, ka ring tâwk che a nia, i hmuh châng pawhin ngei viau chuang suh," a lo ti leh mai bawk a, chutah," A rilru a buai ve viau dâwn asin," a ti leh sup a.

"Ani chu i ngaihtuah deuh tihna em ni?" ka ti ve leh thung a, a rilru put hmang hi mak ka ti chho viau zêl a ni, amah nèna inhmeh lo thil hi a sawi tam ta lutuk si a. Hmân deuha amah kha tûnlaia amah nèn hian an indanglam hleih êm atin a ni.

Ani chuan," Ngaihtuah chuang lo ve, a dinhmun tùr ka hriat thiam vàng mai a nia," a lo ti leh a, ka nui deuh hak a, amah ka nuihzat vàng a ni lo, a rilru danglam ta lutuk hi mak ka ti a, thîkna leh thinrimnaa a khah țûn ka rin nèn, chutiang chu a ni tawh hauh si lo. Ka lãwm bawk si a, mak ka ti bawk si nèn, làwm avàngin ka nui a ni.

"'I hmelma hmangaih rawh' tih ang deuh chi rilru kha i pu tain ka hria," ka ti a, nui deuh sâng chung hian ka en chho a, ani chuan," Ni chiah lo," a lo ti leh mai a, rawn kûn hniamin min rawn fâwp leh a.

*******

U Kimi'n U Tluanga a chhuahsanna pawh kâr khat zet a ni ve ta. Palai ang deuh chu an rawn kal leh tawh a; mahse, ka pain chhàn dàn a lo thiam a, anni pawh chu thil awm dàn phung hre thiam tak chuan an hawin ka hria. U Kimi pawh a haw rih lo, a haw duh ka ring lo bur a, ka rin dàn ang chiahin tûn thlengin a la haw lo chu a nia.

Zan khat chu U Kimi bula riak tùrin ka chhuak a, tlai lamah khân min rawn biain riak tùrin min rawn sâwm kha a ni a, tihhlawhtlin loh ka tum lo va, ka pa pawhin a phal bawk a, ka kal ta rêng a ni.

Sêntei ka tlawh pah zawk a, ani pawh chuan lo riah ve daih a duh viau nain mutna tùr leh mutpuan a buaithlâk deuh dâwn si a, 'hun dang a la awm leh ang chu' tiin kan ințhen ta ringawt, ka khawngaih reuh e a, a châk ve tho si a.

U Kimi kiangah chuan ka zâl ve mai a, mut tak tak hma chuan kan titi  mai mai a, chutah," Vawiinah Zda nèn kan inhmu hlawl a," a rawn ti ta sap a, chu pa mai mai chuh! Engkim a hrilh vek ngei ang.

"In pahnih chungchâng a sawi a, ei tùr min treat pah a, in ințhen tih rêng min hrilh miah si lo va, vawiinah, a hnên ațangin ka hre chauh a," a ti leh sap sap a.

"Nia, ka la hrilh duh lo che a nih kha, buaina i nei ve bawk nèn, min ngaihtuah kha ka duh loh vàng a nia," ka lo ti a, ani chuan," Ni ve tho mai, i u hi ka buai ve êm mai a, thil han hrilh theih pawh ka ni lo a ni," a ti ve a.

Chutah, sawi zawm lehin," In chungchâng chu a sawi a, a la hmangaih reng che tih sawiin kei ngei pawh țan lâkpui tùrin min sâwm a. Ka khawngaih koh koh khawp mai a, in inkawp rei hle si a, in inţhen pawh ka lo ring pha hauh lo va," a ti leh a.

"Nia, inkawp rei khawp mai, kei pawhin kan inţhen ka ring ngai bîk lo,  ka țhen chhan a hrilh che em?" ka tih chuan," Sawi ve e, i rilru en chhin nân hmeichhe pakhat a kawp lui niin a sawi a," a lo ti a, kei chuan," A sawi dàn mai a nih kha, ka rilru en chhin nân a ti lo, ka hriat chhuah tâkah chuan khatiang khân a puh ta mai a ni," ka ti a, ani chuan," Chutiang chuan a sawi a, chuan, nang pawhin bialpa dang i kawp niin a sawi a, chu chu tu nge ni? I lo kawp rêng em ni a?" tiin min zâwt ta nghâl a.

"Kawp lo, a thil tih ka hriat chhuah tâkah chuan ani pawh kawp ve angin min puh ta mai a ni," ka tih leh chuan," A nih tak chu, a sawi koh koh sia, ka khawngaih roh khawp a, nang hi sawipui ve tùrin min ngèn a. Kei chuan,' Kan inpawh viau nain hetiang hi chu mimal thil a ni a, a mimal nuna va inrawlh ve ka duh lo a ni,' tiin ka hrilh nghe nghe a, ani lah chuan,' Ni e, in inpawh tih ka hriat vàngin a ni ka ngen che, Dinpuii hi ka hmangaih êm mai a, kan inkâr buai tak pawh hi amah chauhin a tifel thei a, a u i nia, kei pawhin u ang chiahin ka en che, chuvàngin a nia hêng thil pawh hi ka sawi chhuah ni,' a ti a, sawi tùr chu a vâng duh khawp mai, a hmain lo hre vek tawh ni ila chuan chhàn dàn tùr ka hre mai tùr a nia," a ti leh dap dap a.

Ka ngawi vang vang phawt a," Nia, ka thiam loh a ni, hrilh loh tawp che chu ka tum miah lo, thu làwmawm tak lam a nih loh vàngin hrilh che kha ka hreh a, a tìrah kha chuan hrehawm ka ti ve lutuk; mahse, tunah hi chuan engah mah ka ngai tawh lo, kan lo inkawp rei mah mah niin ka hre hnuhnawh a, hlimna tak tak nei si lo khân kan lo inkawp ve reng a," ka ti chhuak ve ta a, ani pawh chuan," Ni e, inlaichìnaah hian rinna kan intihchhiatsak tawh chuan inrin leh hi a harsa êm êm mai si a, ka hre thiam reng mai. Chuan, bialpa dang i nei nia a sawi kha tu nge? La naupang deuh tak niin a sawi nghe nghein ka hria," a ti leh zat a.

Chhanzuala tih ka hrilh chuan mak a ti ngang mai, mak a ti tih chu thup a tum viau nain a hmel ațangin ka hre thei tho a ni.

"Ka nute'n an hre ve em?" a tih chuan," Hre rih lo, ka la hrilh duh rih lo," ka lo ti mai a, "An duh loh i ring deuh em ni?" a tih leh chuan," Ka hrilh lo mai mai, mimal thil hi chu hrilh vek kher ngai ka ti lo va," ka ti mai a, Chhanzuala an ngaih dàn leh an hmuh dàn chu ka sawi duh lêm lo, bâkah, Chhanzuala nunhlui leh khawsak dàn pawh chu sawi chhuahsak vek kher țûl ka ti lo bawk.

*I KUANG LO NAWR CHIAM CHIAM SUH, I KUANG NAWR A NGAIH HUNAH I LO CHAU HMAN VIAU PALH ANG*