☆UNEXPECTEDLY YOU☆ - 15 By Dingdi Pachuau

 ☆UNEXPECTEDLY YOU☆ - 15 By Dingdi Pachuau

"Nu leh pate min duhpui kher hi an lo țha vek chuang lo, keimah ațang pawh hian a hriat êm hi; mahse, chutia ka tih vàng chuan min duhpui kher kha an sual vek a, min duhpui loh kha an țha ta vek e ka tihna a ni chuang lo, nangmahina i duh ngei kha a țha. In induh tawn kha a țha a nih ber chu, inneihna hi chu risk thil mah ni se fîmkhur tluk hi a awm lo va, Pathian hnêna thlen hmiah mai hi a fel ber nghe nghe. Kei erawh chu ka thu tiam pawh ka hlen zo ta si lo va, hetiang lama zilh ngam tùr che pawh hi ka ni lo, ka tla vawng vawng si a. Khawlaia chhuaha țhiante, hmel hriatte hmuh phei hi chuan ka zak ngawih ngawih, hrehawm ka ti, kan inneihnaah khân an rawn kal kimin min lawmpui hlawm hle a, keini lah heti mai hi kan ni leh ta bawk si a," a ti sep sep a, a aw chhuak ațang chuan hrehawm a tiin a beidawn hmel reuh si a, ka khawngaih reuh tak tak a ni.

"A, mite tih loh dàn pawh a ni chuang hleinem, inneihna zawng zawng hi a hlawhtling vek kher lo a nia. Mi pahnih inneihna a ni a, pakhat zâwk a duh dàn leh a thu thuin a awm thei tawh bîk lo, pum khat ni mah se, mi pahnih an la ni tho. Indawh tawn, inzah tawn leh induat tawn a ngai a, chutiang ni lova kut inthlâk ziah te chu! A, sawi pawh ka sawi peih lo, ka ngaih dàn hi a ni lo êm êm a ni tawp mai. Chu vàng chuan, zak duh suh, tunah chuan hrehawm i la ti deuh pawh a ni maithei e, nakinah chuan a reh vek mai ang, tu pawh mai hian taksa dam ver vawr kan duh a, chu bâkah, rilru hrisêl leh hahdamna kan duh vek bawk, chumi nei tùra ke pên chu a sualna àwm ka hre hauh lo," tiin a inthiam lohna chu paih bosak tumin ka thiam ang tâwk chuan ka fuih ve sauh sauh a.

Kan titi rei khawp mai, meng rei ţhang ka ni bawk a, ani ai chuan ka meng thei deuh. A muthilh hnu pawh chuan ka la meng reng a, Zda thil sawi nia a sawite chu ka ngaihtuah duh lo viau nain ka ngaihtuah zui tho, kan inkâr a tihbuai loh hrâm ka beisei a ni. 

Hun a ral a, ka pain U Kimi chu kan hnêna rawn insawn mai tùrin a hrilh a; mahse, a rawn insawn duh lo. U Tluanga palaite pawh an rawn kal leh tawh a, U Tluanga inchhìrzia leh hrehawm a tih thu pawh an rawn sawi kûr dup mai a, kutthlâk a tum tawh loh thu pawh a intiam hial a ni àwm e; mahse, chuti chung chung pawh chuan U Kimi chu a haw duh tawh chuang lo. Kei chuan a haw duh mai ka ring deuh a nia, țawng tuitam vak lo hian," Haw leh tum ni ila ka chhuak buangbâr lo ang," a ti deuh tlat a, ka nu chuan," I hma lam hun thui takin ngaihtuah rawh, anni anga chhûngkaw țha chu i hmu tawh hauh lo ang, bâkah, i haw loh chuan nuthlawi mai i ni tawh dâwn a, mi en dàn tùr che ngaihtuah la, miin hnung lam ațangin,' A induh ve asin, a pasal leh a chhûngte'n an ko lawm lawm a, zu haw duh țhak lo chuan, a chapo ve hle a ni,' te an ti ngei ang che, Tluanga pawh a inchhîr a, a thil tih țha lo a tih tawh loh tùr thu sawiin a intiam hial a, a inphah hniam tawh tehlul nèn, i lo induh khum tlat a, eng ang fakauah nge maw i inngaih le?" a ti hlawih hlawih a, U Kimi chu a ngawi ngal mai a, a kun chhal bawk. A lo luhlul ve reuh lutuk chu ka làwm phian mai, a thu tlûkna sawh sawn a tum bík miah lo a nia.

Ka pa chuan," I duh thlanna a ni alawm le, inrawlh ka tum lo. I tihsual leh i tuar mai dâwn a, nuthlawi chu i ni ve dàwr dàwr tawh mai a niang chu," a lo ti ve thluam thung a, ka nu erawh chuan," Chutin lo ti duam duam ziah suh, anni ai chuan thil țha kan hria, an duh anga awmtîr hi thil fuh ber leh țha ber a ni ngai lo," a ti leh hlak hlak a, ka pa lah chuan," Aw...a neitu ber a haw duh tawh miau loh chuan engtin vak nge kan tih chuan ang?" dam thluam hian a lo ti leh a, ka nu a thinrim deuh hi chuan aw dam thluam hian a chhâng țhìn a, U Kimi pasal neih chungchângah khân an duhna an tipuitling tawh a, tunah chuan U Kimi duh tihpuitlin a duh ve tawh a ni chiah mai.

Hãw tùr bera an duhin haw a tum loh bur avàng chuan tihngaihna awm hek lo le, ka nu hmêlah chuan lungawina hmuh tùr a vâng thei khawp mai; mahse, engah vak ka ngai duh lo ve tlat thung. Thinrim viau mah se, nakin deuhah a la reh ve leh mai dâwn tih ka hria a, chutiang chuan U Kimi pawh ka hrilh a, a rilru tihrehawm lo tùr leh ka nu lungawi lohna lam chu rawn ngaihtuah miah lo tùrin ka hrilh bawk a.

Ka ute ințhen ta chu mi pângngai chin deuh ngaih dàn leh rilruah chuan hrehawm tihna deuh nei ve àwm tak tùrah min ngai vek ang; mahse, chutiang chu ka ni hauh lo, ka thaw a veng a, ka rilru a hlim a, kutthlâk a tuar tawh lo tùr leh a taksa himdama a awm thei ta chu ka lawmpui a ni. Zànah ni se, a ina riak tùrin ka chhuah theih phah a, chu chu remchângah hmangin Chhanzuala nèn pawh kan inhmuh zin theih phah. Tlai lama ka hmuh theih loh châng pawhin ka u ina ka riah dâwn chuan zànah ka hmu thei ta thung a, a zia ka ti phian mai.

Mahse, Zda'n rawn lèn a chîng thar tlat mai hian min tihrehawm. Ka nu lah hian kan inkâr chu țha leh taah ngaiin a lo be țha thei bawk si a, a lo mâkpa chei ka ti mai, ka lo zak ru ngawih ngawih, a rawn lèn zàn hi chuan ka u chunga a lungawi lohna hmêl kha paih bo ang hmak a ni ţhin. Ka pa erawh chuan pângngai takin a lo be mai a, a over hran lo. Inlêng a ni ve bawk si a, lo biak duh loh thu a awm si lo, ka nuin a lo be huam țhìn erawh ka lo zakin Zda'n ka nu a ngaih dàn tùr chu ka ngaihtuah ngam lo hial țhìn, hei tak hian a tingampa zualin ka hriat phah a,  chumi vàng chuan peih lo chung chung pawhin keimah hian biak ka lo chuh deuh ta zâwk țhìn.

"I vànneihzia hi i ngaihtuah ngai em? Lunglei nula heti zawng zîngah Zda hian a thlang nalh mai che a nia, a duh chein, a hmangaihzia che lah a hriat reng bawk a. Heti khawpa duhtu che hi i tawng leh tawh lo ang, i tâna a țhatzia leh i phù lohzia ngaihtuah la, khaw dang hawi suh ang che. I uin a tifuh tawh lo va, nang tal hi chuan tih fuh tum la, rilru hah lovin min siam tum ang che. Zda ka hmuha a duhzia che ka hmuh hi chuan i u laka ka thinrimna pawh a kiang ve deuh huai țhìn, mi țha a ni tih lah a hriat reng. An hausak tehlul nèn, pângngai takin a awm a, zu lah a in ve ngai si lo, a rawn lêng ve ta zauh zauh a, rim dang a nam ngai hauh lo tih ka hria, i vànnei tàwpkhãwk a ni tih hria ang che," tiin ka nu chuan min hrilh mawlh mawlh a, chhàn pawh ka chhâng peih lo, chhâng pawh ni ila awmzia a awm chuang lo ang, kan inhnial ang a, a thin a rim leh ang a, chu zawng chu, ka peih vêl lo.

Inrinni zànah Sêntei ina riak tùrin ka chhuak a, Chhanzuala ka be sa vek tawh a, min lo nghâk reng tawh. Tlai lama ruah a sùr ţeuh avàngin khua a vâwt ve sûk mai a, kawrlum ka ha chhuak hial, scooty-a tlàn thâwt phei chuan rin aiin a vâwt duh reuh kher mai. Chhanzuala min kuah lum hun ka nghâkhlel kher mai, vâwt tia ka awm kha hmuh har a ti leh dâwn si a.

Nizàn hmasa lamah Sêntei a rawn riak tawh a, ka sàwmna chhan pawh Zda lo lêng hi ka ning a, Sêntei a awm ve chuan tlêma zia deuh tùrah ka ngai ve tawp a; mahse, ka luck lo lutuk, a rawn riah zànah chuan Zda chu a rawn lêng hauh lo thung. Sêntei ina riah chhuah chu ka tân chhuanlam remchâng tak a lo ni leh thei bawk a, Zda a rawn lêng ta thut a nih pawhin ka awm dâwn chuang lo va, hawihil ve dêr rawh se.

Chhanzuala in ka thlen chuan pâwnah min lo nghâk reng niin, hoodie black, Famkimi'n a star deuh țuma a hâk ngei kha a lo ha ve thûn a, a lu pawh a lo khuh vek, vâwt a lo ti ve a ni chiang mai. Scooty ka hùn rem hnu chuan min lo ban vat a, ka kut vâwt zetin a kut lum thar thar a han dek chu nuam ham ham tak a ni.

"I khawng lo chauh a nih dâwn hi, tlaia ruah sùr vàng vek kha a ni, i lum thuai loh chuan i hritlâng mai ang," tiin kawngka chu a hawng zui nghâl a. In chhûng boruak chu a lum nuam kher mai, ka helmet chu ka hlîp a, island chungah chuan min dahsak nghâl a, chutah, ka kutah chuan kai lehin țhutna lam min panpui zui a.

"Pâwnah khân min lo nghâk rei em?" kan țhut fel hnu chuan ka ti a, ani chuan ka kut pahnih chu chelhin a hûm vang vang phawt a, chutah," Rei hran lo mah se ka hmuh châk che avàngin rei chu ka ti tho," a ti sup a, ka kut pahnih chu a hmui bula la chhoin thâwk khum lum tum chuan a thâwk khum tawn ta sek a. A chêt dàn tê chuan min hneh ngang mai, ka en reng a, nuam ka tih avàng erawh chuan," A ngai hleinem," ka ti duh hauh lo. Minute nga vêl bâk a in leh kan in inkár chu ka tlãn kher lo maithei; mahse, chuti chung chung chuan min nghâk rei niin a inhria, min hmuh châk tawh vàng chauhin, vawiinah kan la inhmu tlat si lo va.

"Coffee sa ver vawr in la, a tilum hma chein ka ring, tui deuh ka siam ang che aw," a ti a, a tho zui nghâl a. A kal ta chu ka en zui reng a,a che vêl leh a hawiher chu a dik thlap vek ni maiin ka hria, mi famkim chu a ni bîk hauh lo, a thinchhia a, zu a in bawk a, a thinrim chângin insual mai a duh bawk; mahse, hêng hi ka tân chuan engtihna mah a ni lo, min ngaihsak vàng leh min hauh êm vàng a ni, hetianga min ngaihsaktu ka nei hi ka lãwm, kei aiin kumah naupang mah se mi ngaihsak kawngah chuan a puitling daih zâwk.

Thãwm dim takin ka pan phei țhem țhem a, coffee a siam rak rak chu a hnunglam ațang chuan ka han pawm chat a, a phut deuh ka rin nèn, a phu hauh lo. A kâwnga kuaha a hnunga bei tlãn pah chuan," Lo țhut ai chuan heti hian ka lum hma zâwk ngei ang," ka ti sap a, coffee siam pah chuan," Nuam ka ti zâwk bawk," a lo ti ve sup a, a hnu deuhah chuan,"Ka siam zo ta, a sat lai hian in rawh," a ti a, a rawn inher a, kei pawh chuan ka kuahna chu ka thlah ve ta nghâl a; mahse, amah chuan min rawn kuah ve ta thung a.

Sofa-ah chuan insi riala ţhuin kan titi sap sap a, Zda rawn lëng țhin chu a hre ve tho a, a rawn lèn avànga a thinrim hmel erawh ka hmu lo, a tilang duh lo ve a ni ang, ni leh lo, a rilru a puitling tawh tak alawm, rilru puitling tawh chuan thil țûl loah an lung an tiawi lo ngai lo, lungawi lohna pawh nei se an tilang ngai lo bawk.

"I thîk em?" ka han ti leh kher a, ani lah chuan," Thîk tho e; mahse, engtin nge ka tih chuan ang? Tlangvâl a nia, nula i la ni bawk a, a rawn lêng thei alawm. Kei chuan i thinlung ka nei tho a, tlêm chuan ka tuar thiam," a lo ti deuh duah a, nui sak chung hian," Nia, ka thinlung 99% hi i tâ vek a nia" ka lo ti ve a, min en ràn chung hian," 1% chu?" a lo ti vat a, nui chung vêk hian," Ka tâ ve thung maw le, thil tam tak ka ngaihtuah a ngai ve tho a," ka lo ti a.

"Ka thinlung 110% hi i tã a ni thung."

Coffee chuan min tilum chak viau, bâkah, a taksa lum nghèngin rengin ka awm a, ka kut ni se a hûm tlat bawk a, a kut lum nuam zet chuan ka kut chu a tilum hneh ve chiang viau a ni!

Doorbell a rawn rîk avàng chuan ka tang deuh hrâ a, amah ka en vat bawk.

"Tu nge lo beisei deuh i nei em ni?" ka tih sap chuan ani chuan," Nei lo," a lo ti mai a, chutah, dingin," Thil pawimawh pawh a ni maithei, ka va en lawk ang e," a ti sup a, a ding chhuak zui ta nghâl a. Tu nge ni ang? Ka hmel hriat a ni ang em? Nula em ni zâwk? Amah rawn pan tum hmeichhia tu emaw pawh a ni thei, a nih loh pawhin, a țhiante. Kan lo awm dun tih an hmuh chuan... Ka thin a phu dèp dép mai a, Sofa-ah chuan min hmuh mai theih loh nân hmuh har thei tùr ang berin a tawm tê thei ang ber chuan ka țhu a.

"Dinpui, bihrûk kher a ngai lo ang, engah nge i phone i off tlat a? I nuin a be duh che," Sêntei aw ngei mai chuan a rawn ti lût làwng láwng a, ka thaw huai mai. Țhut dan pángngaia țhuin Sêntei lam chu ka hawi a, inthiam chiah lo deuh chung hian ka nui ringawt a. Chutah, Centre table mawi zet chunga ka phone chu banin,"Eng atân nge maw min tih ni?" ka ti zui niah niah a.

"Ka hre bîk lo, ka chhàn buai teuhzia chu a. I rawn riak dâwn tih nang lah chuan min rawn hrilh lâwk bawk si lo, min hrilh lâwk ni la chuan ka chhâng buai lo tawp tùr hi a nia, engah nge maw i phone i off rêng rêng ni?" a tih leh chuan," Flight mode-ah ka dah daih a," ka lo ti a. Kan awm dun laia mi dangin min rawn biak buai kan hlauh avàngin kan awm dun dâwn hi chuan kan phone ve ve hi kan flight mode ta ziah ti ila a dik ang, tunah pawh a nih chiah hi.

"Lo țawng s'u aw," tih nân an lam hawi chuan ka kutzungchal chuan ka hmui chu ka han tawk zauh a, ka nu chuan," Phone tlang theih loh rêng rêng! Khawiah nge vawiina khâwlla ka leiho kha i dah a?" a rawn ti nghâl vat a, ka dahna ka hrilh hnu chuan," Khawiah nge i lo chhuah hman a? Sêntei ina riak tùr Sëntei inah i awm bawk si lo!" a ti leh hmarh hmarh a.

"U Kimi ka tlawh lawk a," tiin dâwt ka han sawi leh ta ringawt a, ka țawng pawh tlêmin a zawi deuh. Dâwt ka sawi tih erawh a hriat chhuah loh hrâm ka beisei, a thin a rim dâwn si a.

Kan inbe thui ta lo hlauh. Kan inbiak zawh chuan Sêntei lah chuan," I u chu biak duh ta se,' Khawi maw i u chu ka lo be lawk teh ang,' ti ta se, engtin nge i tih ang?" a lo la ti zui a, za lo zet hian ka nui ringawt. Ti tak tak se chuan ka buai ve khawp ang chu. 

Rei pawh ka awm ta lo. Sêntei ina ka chhuk hnu chuan ani lah chuan," I nu chuan a hriat thiam loh hrâm ka beisei," a lo la ti zui a, min hnèm lo ve khawp mai. Min hriat chhuah chiah chu ka ring lo nain rinhlelhna deuh chu a neih ka ring thung, ani rêng rêng pawh eng atân nge a zàn a zàna khâwlla chu a tih rêng rêng ni? Zànah a ințhui ngai azeng pawh a ni si lo va.

Tûkțhuan ei laiin ka nu chuan min zâwt nawn ta chiah, min rinhlelhna a nei tihna a ni. Kei chuan ka lo sawi tawh ang bawkin ka u ka tlawh lawk thu chu ka hrilh leh ta a, a lungawina zánin ka chhâng táwk chiah lo deuh a niang," Eng atân nge i phone kha i off rêng rêng a?" a ti leh ta a, dâwt sawi leh rihin,"Min rawn biak sek tum an awm a, ka ning alawm," ka lo ti leh thên a, ka pa chu a lo nui vur vur thung a.

"Luck bîk hle mai!" a tih chuan ka nu chuan," Pakhatah lungawi tùr, Zda-ah hian lungawi la, mi dang chu mitmei pawh hmuh hlek suh ang che, Zda'n a duh che chuan a tâwk êm êm! Mi dang mi dang a ngai lo," a ti leh a, kei chuan," Kan inkawp tawh lo ka tih kha, kan ințhen daih tawh," ka lo ti ve thung a. 

"A hmeichhia zâwkin țhen tih lam chu sawi mah ta che, i u pawh tih tawh laia, nang hi chuan min tilungawi lo miah suh, kan fate in nih hi, harsa taka kan enkawl puitlin hi chuan kan thu hi han âwih êm êm phawt mai teh u," ka nu chuan a ti leh a.

An hna tùra thil pawimawh țhenkhat lei tùrin Aizawlah an țhian thum chuan an phei a, kâr khat deuhthaw hial an va awm ta, inbe reng thei mah ila ka ngai a, a bula awm theih leh tawh ka châk. Zàna Zda lo lêng zut hi ka hnê bawk si a, rawn haw thuai thuai se, ka boruak ninawm zet hi ani ka hmuh chuan a zia ngei ang.

A in chahbi spare min kawltîr ve avàngin ka duh hun hunah a inah chuan ka lût thei a, phalna pawh ka nei thlap; mahse, a tel lova luh chu ka duh kher lo thung. A rawn haw dâwnah erawh chuan ka lût ang, boruak a hnâwng si a, a lo rimtui lo hman palh ang.

"Inrinniah ka rawn haw phei ang, inah i lo awm hman ang tiraw? Kan rawn thlen har pawh ka ring lo; mahse, kan rawn thlen hun tak chu ka rawn hrilh dâwn lo che, thil țha deuh ka rawn hawn che hi i duh a nih chuan ka ina lo awm tum la," a rawn ti a, a rawn sawi ațang ringawt pawh chuan ka phûr tawh lutuk ringawt.

Chawhma dâr 10 vêlah ka chhuak a, an rawn thlen har dâwn loh thu kha a sawi si a, in lo tihfel chhûng nèn, a tâwk viau mai. Sêntei tlawh zawk pah ka duh viau nain ani tlawh nân chuan hun ka la ngah zâwk alawm le.

Dâr 11: 30 vêlah chuan in chhûng chu ka tifel zo tawh a, tukverh ka hawng vek a, ni a lan ve miau avàng boruak pawh a nuam deuh, ka rin aiin a in chhûng boruak pawh a zia viau mai.

Dâr 1 a rîk hma deuh chuan doorbell a rawn ri ta ral ral mai a, a rawn thleng tawh a ni ngei ang, an rawn thlen hun tak min hrilh tum lo mah se tluang taka an rawn thlen chuan a țha vek mai. Phûr zet hian kawngkhàr lam chu ka pan a,  ka sam leh ka kawr hâk ka siam țha pah bawk a, nui sâng hian kawngka chu ka han hawng a, pâwn lama lo ding ka han hmu thut erawh chu, ka meng bial kâwk kâwkin ka ring, mak tiin ka ding khawng lo chauh a ni.

"Eng nge i tih a? Chhanzuala in a ni lo'm ni?"

Ka nu chu ka en tlawk tlawk a, ka nui hmel kha chu khawiah nge a tlàn bo tâk ka hre hman lo, țawng nachâng pawh hre lo chuan ka en reng a.

"Eng nge i tih ka tih chu?" a rawn tih leh țhat chuan," In ka nghahsak lawk a. Eng nge i lo tih dâwn?" ka ti ve thung a, ka sawi tum tak a ni em ka hre chiang lo! Mahse, dâwt ka sawi hauh lo, a in ka nghahsak miau a. Ka nu lah helaia a rawn lang ve nawlh mai hi a mak viau a ni. Min ringhlel chu a ni êm lo'ng maw? Ni lo ang. Ani nèn chuan min ringhlel hauh lo ang, chuvàngin, confi takin, rinhlelhawma ka awmna chhan tùr a awm lo, Chhanzuala chu nau anga ka en țhin a ni tih an hria a, a in ka lo nghahsak ve a ni mai.

"Chhanzuala hi a ni maw i bialpa la naupang deuh tak nia an sawi chu? A ni em? Sawi vat rawh."

*ENGTIANG PAWHIN I NGAIHTUAHNA CHU LO BUAIIN CHINGCHIVÈT KUAL MAH SE, THO LA, INHA LA, I BÀNSAN DÀWN LO VA, A TÀWP THLENGIN I BEI DÃWN A NI TIH HAN LANTÎR TEH LE*