☆UNEXPECTEDLY YOU☆ - 16 By Dingdi Pachuau

 ☆UNENPECTEDLY YOU☆ - 16 By Dingdi Pachuau

Min rawn hmu ta rau rau, zêp ka tum lo, hriat hun an nei dâwn tho a, tûn hun tak hi thu dik tak sawi hun chu a ni, ka nu melh rân pah chuan," Aw, ni e," ka ti ta sap a.

"Tunah hian ka rualin rawn haw nghâl rawh, i zak lo'm ni? Nau anga i en nèn in lo inngaizâwng reng a maw? Ka rei, zahna hi khawiah nge?!" tiin thinrim tih hriat tak hian min melh khui a, a mit pawh a khap hauh lo. Chutah," Mualpho i duh loh chuan tunah hian min zui haw nghâl rawh, nge in chhûngah khân in lo tawm dùn zâwk? Khawi maw, kawng min kian teh," ti lehin min rawn su lêng nghâl dâwrh a, ka dan hman loh bâkah min su na phian si a, lo chelh tùrin pawhin min su lêng hneh lutuk.

In chhûngah chuan a hawi kual vat vat a," Khawiah nge a awm? Khawiah nge i bihrûk? Rawn chhuak rawh, Biru duh khawpa mi dâwihzep i lo ni maw?" tiin a au a, a awki pawh a sâng khawp mai, kei chuan," A awm lo," ka lo ti mai a, min rawn en nghâl vatin," Tunah hian min zui haw nghâl rawh," tiin, island chunga ka bag chu a la a, kawngka lam pan chuan a kal ta nghâl a. A thin a rim êm êm mai si a, ka zui ve nghâl mai loh chuan. Tunah tak hi chuan a thu ka âwih mai a ngai a ni, a thin a rim si a, eng thil pawh ka chungah a ti duh mai ang, mualphona kan bul lawkah a awm si a. Hun remchâng ka hmuh veleh Chhanzuala hnênah chhuanlam ka siam  tawh mai ang; mahse, ka lo awm ngei a ring àwm si a, ka khawngaih roh mang e.

Inah chuan ka nu chu a'n âng tak tak mai a, a âng thãwm chu mi dangin an lo hre ve ang tih hlauhawm tak a ni; mahse, ka ngawi reng a, ka țawng ve duh lo. A thinrimna ka belhchhah mai mai ang tih ka hria a, ani pawhin Chhanzuala nèna kan inkawp chu a ring bîk lo va, thu dik ka han hrilh tâkah khân a țhâwng ve êm mai a, a thin a rim laklawh ve rih a ni ngei ang.

"Khawiah mah chhuak tawh suh ang che, zanah pawh khawiah mah i chhuak tawh lo ang, hun remchâng i lo zawng țhìn tih a hriat reng, i lo zak lo êm mai! Hmeichhia i nih kha hre ta che, hmeichhia zâwkin i la pan dâw dâw zui a...tsk..tsk... Ani nèn chuan a theih loh, a theih ngai loh ang," a ti tàwn táwn a, ka pa a awm lo hlauh chu a tihzia ka ti dâwn nge ni pawh ka hre thiam lo.

"In mu dùn tawh hial lo maw? A ina panchilh tawh hial chuan, hun ãwl in nei viau țhìn tihna a ni ngei ang a--" a tih lai chuan," Nu...!!" ka lo ti țhat a, ani lah chuan," Sawi dik loh ka nei em ni? Nula fel tak niin ka lo hre țhìn che, ani ang insual chîng leh chanchin nei pha hat  lehnghâl nèn khân in lo inkawp reng a nia? Hei hi Zda i țhen chhan chu a lo nih chiah hi; mahse, ngawi tak rawh, ani ang zîk bùl, fahrah leh mi tlahlang lutuk hi chu engtikah mah i kawppui atân, ka dam chhûng leh thih hnu thleng pawhin ka remti thei ngai lo ang," a ti leh ta piap piap a, sawi tùr nei țeuh mah ila sawi mai tùr ka hre lo, ka rilru a buai nuai nuai.  Chutianga Chhanzuala a han sawi duh chu ka rilru a lo natpui tak zet a ni, a duh réng vànga fahrah leh tlahlang a ni bîk si lo va, a nu leh pa ințhen thu-ah ani chuan thu a nei lo va, ințhen kher tùr pawhin a duh bîk lo tawp ang. Chutah, vànduainain a ûm zui leh a, a nuin a boralsan leh a, a tân chuan vànpui hi a chim tak zet asin, tuin nge fahrah nih duh bîk tehlul ang? Tu fa mah hian a nu leh pa ințhen tùrin a duh hauh lo ang. A ti deuh mah mah a ni.

Ka pa rawn haw hnuah pawh chuan a la âng hmuar hmuar reng a, keiin ka chhâng chuang bawk si lo va, ka pa chuan," Eng thilah nge i lo àn leh tâk hmuar hmuar a?" a ti a, ani chuan," Ka sawi peih lo, nêp lutuk!" a ti leh hluk a, ka pa chuan," Âng âng lo teh khai, tûnlai chu i âng nasa tlat. Nu ber i àn hi chuan boruak a nuam lo țhìn, i hrisèlnain a tuar palh ang," a ti leh a, chu chuan a thin a rawn tiso thar leh ta a ni ang," Âng lo thei lo hian i fate hian min siam a nih hi, àn hi nuam ka ti emaw in ti a ni ang e, thinlung thlamuang taka awm ve te hi ka châk asin, chutiang chu khawi lam, rilru hahna min thlen reng mai a nih hi. Ni e, hetiang a nih chuan ka hrisèlna pawh hian a tlin lo thuai ta ve ang, ka la thihsan thuai ang che u," a ti leh bawrh bawrh a.

"A khai! Thih lam thu kha chu sawi lo teh, thih hma i tum êm mai a," tiin ka pa chuan fiamthu-ah a lo lâksak a, ani lah chuan,"Hetianga rilru hrehawma min siam reng chuan thih thuai mai ka hmabâk rêng a ni, ka dam rei lo ang," a lo ti leh a, keimah min sawi chhan tih ka hre reng mai si a, nuam lo chu ka ti ru ve reng.

Zanriah ei laiin ka nu chu a'n àn chhunzawm leh a, ka pa pawh chuan Chhanzuala nèna kan chanchin chu a hre ve lo thei ta lo va, chaw ei lai e ti lo chuan ani pawh chuan min zilh ve ta hrep a; mahse, ka pa min zilh dàn zawng a dang deuh.

"Ka thu hriat chu mak ka ti hle mai. A chanchin i hre vek a, keini ai pawhin i hre chiang ngei ang chu. Nu a nei tawh lo va, a pa chin lah hriat a ni lo bawk a. A nun dàn a bãwrãw viau pawh hi kawng lehlama ngaihtuah chuan a àwm thei viau, a chhan chu zilh leh enkawl a ngaih chhoh laiin zilhtu tùr a nu leh pa bulah a awm tlat si lo va, nungchang hloh theihna chhûngkaw keh darh nun a tem chho a, hriat thiamna chin pawh ka nei viau mai; mahse, chutia ka tih avàng erawh chuan 'A țha e' ka ti chuang lo, insual a chîng a, tlêm lai deuh pawhin a hmingchhiat êm kha, khatiang kha ka fanu bialpa ni tùr hian ka dah phal lo. Nau anga en tùr i ni a, keini pawhin fapa ang maiin, chutih laiin a nungchang leh awm dàn dikhlel vàng hian amah ngei pawh kan lakah a inthlahrung ve ang a, keini pawhin a chunga kan rilru put dàn chu i hriat tho kha, kan lo dik tâwk chiah lo pawh chu a ni maithei e; mahse, i duh dàn anga i kal chho a nih chuan i u chunga thil thleng ang kha i chan tùr a ni, puitling i ni a, ngun takin thil thleng thei ngaihtuah ang che," a ti charh charh a.

Chhanzuala chuan min rawn biak a tum nasa niin, missed calls a awm țeuh mai. Ka khawngaih roh mang e, message ka thawn a, țawngka chuan ka be ngam rih lo, 'Eng emaw chhûngkaw lamah rokhawlhna a awm thut a' tiin ka hrilh a, a âwih êm ang chu maw. 

Ka rin ang chiahin a lo âwih ve mai a ni chêk ang chu, ani chuan a rawn voice thung a, message type neuh neuh hi a peih zâwng ni miau hek lo le. Min hmuh a châk thu a rawn sawi hmasa ber a, a dawtah rokhawlhna avànga kan inhmu thei lo chu pawi a tih thu leh a ina hmuh tùr ka lo awm lo chu a hamhaih thu a rawn sawi leh a. A aw ka han hre thar leh chu kei ngei pawh chuan hmuh ka châk zual phah, tuna ka dinhmunah hlauh phei hi chuan a bula awm ka châk vawng vawng.

A tûkah pawh chuan ka inkhâwm a, chu bâk chu ka chhuak lo, ka nu a thinrim êm rih si a, a sárhù lai hi chuan chhuak rih lo ang. A thinrim hian hrehawm ka ti ve tho, kan chhûngkua kan tlèm tawh nèn, a nuam lo zual sawt mai si a, a thinrim chhan lah ka hre chiang mai si.

Mahse, hei hi thil thleng tùr a ni tih ka hre lâwk a nih kha. Hre lâwk vek chunga ka thlentîr a nia(ka thlentîr ti mai ang, Chhanzuala hi kawp lo ila chuan a thleng dâwn si lo va) ka tuar tùr alawm, ka thih phah lo tawp ang. Hmangaihte vàng chuan eng pawh kan huam ve ang chu, min hauin min àn khum a ni mai a, kut pawh min la thlâk êm hleinem.

Thawhțanni tûkțhuan ei khama dàwr ka kal tùr chu ka insiam uluk ve leh deuh hlek a, kan inhmuh lohna a rei tawh si a, bawrchhawr taka min hmuh ka duh loh vàng a ni, ka chhuak tùr chu ka nu chuan," In bàn veleh khawiah mah pêng kawi lovin rawn haw tlang nghâl ang che," tiin min au zui deuh kher a, tleirãwl chho țan ni lovin nula puitling, pasal pawh nei rual ka ni tawh. Chutianga min han ti zui kher chu ka ngei ve deuh hlek a, țûl lo ka ti viau nain ka chhâng lêt chuang lo.

Sentei chuan min lo hmuh veleh chuan," Wow..!! Vawiin zet chuh, i inuluk hle mai maw? Aw...ka hre thiam e, in inhmuh lohna a rei ve tawh bawk a, chuvàngin a hmuha nalh loh i hlau chiang mai," tiin min lo fiam chùl a, kei pawh chuan," Ni ve bawk ang chu maw le," ka lo ti lêt ve a, ka hmêlah eng mah ka tilang duh lo va, hlim hmêl takin ka nui sâng reng a, Chhanzuala pawhin a hriat chhuah ka duh lo.

Dàwrah lah chuan Remlali chuan Hriatpuia thil rawn hawnsak chungchâng chu a sawi chùl a, handbag mawi zet mai niin a thlalâk pawh min hmuh vek nghe nghe a, Chhanzuala thil min rawn hawnsak pawh ka hmuh châk phah ve vek, eng thil tak ni ang maw tiin ka ngaihtuah zui rauh rauh a. Hriatpuia leh Remlalite pahnih pawh hi official takin an inzui ve tawh a, Chhanzuala nèn kan pahnih aiin an inzui hnuhnung hret chauh ang; mahse, anni erawh chuan an thup lêm lo, an induh tawn  viau reuh a, anni zawng chhûngte duh loh tih pawh an nei ve lo, Remlali sawi dàn hmangin a hriat theih mai.

Chhùnah kan sawi lâwk ang ngeiin Chhanzualate chuan chawlhpui atân min rawn sâwm ta ngei a, a hmel ka han hmu leh thei chu ka lãwm tak zet a ni, a lu a lo mêt thar lehnghâl a, a inhmeh sawtin ka hria, a hmaa mi pawh kha a inhmeh tho a, tuna a lu meh dàn hian a hmel a tilang chiang ka ti a, a hmel țhatna a tilang fiah sawt ka ti a ni.

Inhmachhawnin kan țhu a, mi dang an țawng bawrh bawrh lai chuan ani erawh chuan min en vung vung reng a, kei pawhin ka en ve deuh reng nain mi dangin min rawn hmuha an rawn hriat thiam ka hlauh avàngin ka hawi sawn leh zauh zauh bawk a. Sam-a leh Famkimi an țawng leh nasa a, Chhanzuala lu meh thar chungchâng chu sawiin an fiam a, inhmeh tiin an fak a, an sawisa pah bawk a, Sêntei pawh a lo inrawlh ve zauh zauh tho, kei erawh chu țawng ve lêm lovin an thil sawi chu ka lo nuih vêl mai mai thung.

"Tlaiah rawn pêng la, i thil tùr pawh chu i hàwn pah ang a?" a rawn tih sup chuan," Nia, rawn pêng ang, eng thil nge a?" ka ti lêt a, ani chuan," Sawi chi a ni lo, hmuha hriat chauh chi," tiin a nui suk a," Ka hmu châk tawh," ka lo ti sap  thung a.

Hun fâl neih theih ni bîk hek lo le, tlaia pèn haw zawk tum ràn chuan kan ințhen leh ta rih a; mahse, chawhnu lamah chuan kan hman dawr dawr viau nain buaina kan nei thut mai. Bàn dâwn hnaihah chuan bungrua a rawn thleng thar thut a, pi ber pawhin a hre lâwk bîk lo. Kan pui lo thei bîk si lo va, kan haw theih meuh chuan a tlai tawh khawp mai, vawiin phei chu scooty ka keng lo lehnghâl a, ka luck lo chiang a ni; mahse, Hruaia'n min thlah haw thei hlauh a, a zia deuh.

Hah rûk ve nèn, in ka thleng chu ka nu chuan," Thu i âwih lo hle mai, i kal dâwnah pawh rawn haw thuai tùr che khân ka chah țâwk țâwk che a, i nu pawh engah mah min ngai lo tihna a ni a, Chhanzuala hrep chuan i thluak a lo sûksak nasa hman viau che a ni maw?" a lo ti nghâl bawrh bawrh a, kei chuan," Bàn dâwnah dàwr bungrua a rawn thleng thut a, kan lo haw hma thei ngang lo a ni," tiin dam takin ka lo chhâng thung a. Ka nu chuan," Chhuanlam i siam kha chu ka rin sa a ni, engtin nge i nu hi dâwt chiangbal hmanga min bum i tum theih zâwk ni?" a ti leh tàwn táwn a, ka pa, room ațanga lo chhuak chuan," Engtizia maw i lo haw tlai viau a?" a rawn ti chhuak ve nghâl a, ka chhàn hma chuan ka nu chuan," Kha pa vàng khân nangmah hringtu ngei che pawh min bum duh ta mai chu a ni tak si a," tiin a âwm chu a chùm a, a thaw pah káwk káwk a.

Hlauthãwng ru tak chuan ka nu chu ka pan hnai thuai a," Nu, engtin nge i awm?" ka han ti a, ani chuan,"Ka thinlung hi a nâ a ni, a na ngawih ngawih, engtin nge ka tih dâwn ni?" a ti a, a áwm chu chùmin a ding a, room lamah chuan a kal ta daih a. Ka pa chuan," I nuamsam lo em ni?" a ti zui vat a; mahse, rawn chhâng lovin kawng chu a khãr țhuai a, kei phei chu ka phu deuh zawk nghe nghe.

"I nu țhìn hi chu aw...!!" a ti sap a, chutah, min rawn enin," I nu thu sawi kha a dik em?" a han ti leh a, kei chuan," Pa, dàwr bungrua a rawn thleng thut ka tih tawh kha, mi dangte nèn kan haw hun a inang vek," ka lo ti a, ani chuan,"I nu rilru tihrehawm zâwng hian awm tum lo la, ani hi kan chhûngkaw hlimna laimu ber a ni a, ani a hlim loh chuan chhûngkua a buai țhìn, ngun takin ngaihtuah ang che," a ti a, room lam pan chuan a kal ve leh ta nghâl a, ka din dàn ngai chuan rei fê chu ka ding reng a, a hnuah chuan thâwk ka la hawk hawk a, inthlâk tùrin ka room lam ka pan ve ta chauh a.

Zàn mut dâwnah min rawn bia a, rei fê kan inbe nghe nghe. Thil awm dàn min rawn zâwt a, thil fel chiah lo a awm a nih a rin thu a rawn sawi chuan," Chutiang a awm lo, ka hrilh tawh che kha," ka ti a, a ina ka pèn hman loh chhan kha message-in ka hrilh zawk zawk rêng a ni.

"Naktûk chu mi dang chîm buai loha hmuh che ka duh ngawt mai," a rawn tih chuan ka maimichhîng vang vang a, ka ngaihtuahna ka han sâwrbing a, chutah," Scooty ka rawn keng ang a, chhùnah inah inhmu ila?" ka han ti a, ani pawh chuan,"Umm... a țha viau ang chu; mahse, a dâr zât kha  fix a har àwm si a, in chawlh hun àwmah chuan inah ka lo awm sa tawh mai ang," a ti ve a, chutiang chuan rem kan ruat ta a.

A tûkah chuan ka pa chuan scooty chu ken chhuah a tum deuh nain ka han dîl ve a, chahbi chu min pe ve mai bawk a," Engtin i va aw ka ti lo; mahse, i nu rilru i hriat kha, rawn haw thuai la," a ti a, kei pawh chu ka lu ka lo bu nghat a.

Chhùna kan inhmuh chuan țawng hmasa lovin kan inkuah vawng vawng a, kan inngai ve tawh a, kei phei chu ka lung a chhe lek lek hial a ni. Ka nuin duh lo viau mah se kei chuan ka hmangaihin ka duh tak zet tawh si a,  ani lah chuti bawk, induh tawn viau mah ila kan inkâr buaizia chu ka ngaihtuah thiam vek tawh si a, amah chu ka khawngaihna a ni, ka nu țawng dante kha hre ve phei se, ka thil ngaihtuah avàng chuan ka thaw hawk a.

"Ka ngaihzia che hi...!!"

"Kei pawhin ka ngai che."

Minute nga chuang zet kan inkuah ngei ang chu, kan inthlah dul hnu chuan min rawn en chhukin," I ril a țâm tawh em?" a ti sup a, kei pawh chuan en chhoa nuih sak pah hian," Țâm lo ve, hetia kuah che hi nuam ka ti zâwk," ka ti a, ka kuah țha leh a, ani pawh chuan min kuah leh a, min kuah pah chuan a la nui hawk zui.

"Tihian, ka naute duat i ni mai," min ti a nih chu!

Kan inlawm zawh hnuah chuan ei tùr lam kan ngaihven ta a, a lo lei sa thlap tawh a, a la lum vat vat bawk a, insi rialin kan ei dùn a, a chângin min barh a, a chângin keiin ka barh ve bawk a, tunah tak hi chuan ka nu ka theihnghilh hmin hmak.

Hun hman a nawm poh leh hun a rei lo țhìn a, dàwra lêt leh a hun tawh. Ka sam, ka hmui leh ka thuamhnaw ka han siam țhat hnu chuan helmet chu ka han ban a, ka khum hma chiah chuan a lamah min pawt lêt leh rihin min han fâwp leh rih a, lipstick inhnawih țhat man a awm lo ngei mai.

Dàwr ka thlen chuan țhiante an lo la thleng lo deuh a, ka ngei deuh viau mai, hetiang tih chu hria ila chuan kei pawh Chhanzuala inah khân ka la awm ve ngei ang chu; mahse, an rawn lang ta thuai a, ka thaw ve huai mai. Chîk taka thil awmzia min zawh loh hrâm ka beisei.

Min rawn fiam nghâl bawrh bawrh a, Famkimi chuan," Vawiin chu Chhanzuala a rawn tel lo tlat a, nang i hman lo ve leh chiah bawk nèn, nangni pahnih hi in intiam rual a ni lo maw kan lo ti a?" a ti bawrh bawrh a, kei chuan," Em maw ni dâwn le?" ka lo ti ve mai a, Sêntei chuan awmze nei fê hian min rawn melh ralh a, Remlali chuan," A țhiante sawi dàn kha chuan thil țûl tiin khawi khawiah emaw a kal kual  an tih kha, ani an ina han haw lawk nèn chuan engtin nge maw an intiam rual theih tehlul ang?" a lo ti ve thung a, ka nui sak a.

Haw kawngah chuan Sêntei chuan ka haw chhan chu min zâwt a, kei pawh chuan zêp chuang lo chuan thil awm dàn chu ka hrilh pah a, ani chuan," Ka ring deuh a; mahse, ka ring chiah lo leh deuh a," a ti a, kei chuan," A rawn haw ațangin mumal takin kan la inhmu lo va, chuvàng chu a nia," ka ti leh a.

"A nih chu, i pêng haw ang em?" a tih chuan," Pêng lo ang, tûnlai chu mother-i a hrâng deuh a, curfew a puang tlat mai si a, a thu zawm a ngai," tiin ka chhâng a, kan chanchin a hriat tawh thu pawh chu ka hrilh tel nghâl bawk a.

"A nih tak chu, a țha alawm, i nu thu chu han zàwm phawt la, Pathianin i tâna a ruat a nih phawt chuan eng ang pawhin dàl tum che mah se, harsatna siamsak che mah se kawng a awm zêl mai ang," a ti ve malh malh a, țawng lo chuan ka bu nghat a.

Chhùna kan inhmuh khân tlai bàna a ina ka pen loh tùr thu ka hrilh nghâl a, a thil min lo hawn pawh chu ka hàwn nghâl rêng a ni. Room-ah chuan ka han hawng chhin a, țhî leh bengbeh set nalh zet hi a lo ni a, han en rêng rêng pawh chuan a man chu a tlâwm zawk zawk lo tawp ang tih a hriat theih a, phûr ru zet chuan ka han la kãng a, ka han inteh chhin vêl a, a takah erawh chuan ka inbel chhin lo, amah ngeiin ka awrhtîrin min behtîr se ka duh vàng a ni.

Rilru thawven loh náklaiin, zànah Zda a rawn lang ve leh ta nawlh mai. Ka nu lah chu a hma ang kha a ni miah lo, țha takin lo be mah se rei a țhu tawh lo, room lamah min luhsan ta daih mai a, biak peih loh nèn, ka thin a tiur hlur mai ka ti.

Țha taka min biain vawiin lam chanchinte min zâwt a, țha takin ka chhâng ve mai a, a zawhna chiah chiah zêlin ka chhâng thung. Kan pahnih inkâr lam erawh a sawi chhuak hauh lo chu ka lãwm phian mai, sawi chhuak na se chuan țawngkam țhain a daih zo lo ang. Haw thuai thuai se, a hmel hi hmu tawh lo ila ka duh ngawt mai; mahse, mahni inlêngte," Haw tawh rawh," tih ringawt thu vaawm suh, ning ru zet chuan a lèn chhûng chuan ka țhutpui a.A haw tùr pawh chu țawngkam țhain ka ui peih lo, haw thuai thuai se ka duh zâwk.

A chhuak tùr chuan," Dinpui, ka la beidawng miah lo a nia, kan tân hun țha a la inher chhuak leh ngei ang tih ka ring tlat a ni, tunah chuan ka mang țha rih ang che, mang țha, mut tui le," a ti a, ka chhâng peih lo, țawngkam țha takngial pawhin ka thlah peih lo a nih chu, ka va sual tak!

Ka nuin curfew a puan hnu ațang chuan U Kimi pawh ka tlawh thei ta si lo va, a khua a har ve ngawt ang chu, biak erawh ka be reng tho a, ka nuin min curfew dàn te pawh chu ka hrilh ve a, pawi min tihpui a; mahse, min rawn fuih ve sauh sauh thung a. Ani pawhin hna thawh tùr chu a hmu mai tawh a; mahse, a thawhna tùr hmun chu a in luah ațangin a duh ai chuan a hla deuh a, hna dang a la melh pah tho a ni àwm e, thu tlûkna fak a la siam lo.

Tlai lama kan inhmuh a rem theih tâk si lohah chuan chhùn lamah kan inhmu ta thung a, ni khat chu hlim takachhùn hun  kan hman dun lai chuan doorbell a rawn ri ta ral ral a, kan inen vat a," Tu tak chu ni maw?" a ti sup a, kei chuan," Nula tu emaw a ni maithei a ni," nui chung hian ka ti a, ani erawh chuan," Chutiang an awm lo," thu tak zet hian a lo ti thung a. Chutah, thovin," Țhiante pawh an ni thut maithei a ni," a ti a, kei pawh chu tho ve nghâlin," Ka lo biru rih ang," ka ti a, ka bag chu ka ban nghâl a.

A room lamah ka kal ta nghâl a, a țhiante an ni ta a nih leh helai a bedroom-ah kher hi chuan an rawn lût lo tawp ang le. A room-ah chuan ka kal kual a, tunah tak hi chuan a khuma mu paha a thlìr theih tùrin kan pahniha kan thlalâk lian ve angreng tak a târ tawh a, ka en deuh reng nghe nghe, ka nui sak a, mu pahin min lo ngaihtuah ve reuh reuh țhìn ngei àwm si a tiin ka ngaihtuah a.

Khumah chuan ka țhu deuh reng a, min rawn pawh har ka ti ru khawp mai, tu tak chu rawn kal ni ang maw? Ka phone sana chu ka han en zauh a, dàwra ka lêt pawh a hun dâwn tawh. Ka ding ta vat a, kawngkhàr lam chu panin ka beng ka han dawh deuh a; mahse, eng mah ka hre lo, churah, muangcháng leh thãwm dìm zet hian ka han hawng dè dê a; mahse, ka khar leh rang lutuk ringawt.

Ka nu aw ka hria!

*INRINTÂWKNA HI DIK TÂWK RENG NIA INHRIATNA AȚANG RINGAWTIN A LO AWM RENG BÎK LO, DIK TÂWK LOH HLAUH LOHNA AŢANG PAWHIN A LO AWM VE FO*