☆UNEXPECTEDLY YOU☆ - 3 By Dingdi Pachuau

 ☆UNEXPECTEDLY YOU☆ - 3 By Dingdi Pachuau

Sêntei rawn thlen chuan hlim takin ka lo chiau-au a, ka thluak lam tihdanglama a awm deuh tlat tawh avàng chuan ka boruak hap chu a nuam veng veng ni maiin ka hria. Beer chu ka lo chhawp ve vat bawk a, titi pawh a kal par par viau mai.

"Vanlalchhanzuala hi maw, a têt lai pawha ka awm phâk a nia, a u nèn hian kan inkàwm țhin a, kan zîngah hian a rawn tel ve ziah țhin. A chângin kan naute a nia, a chângin kan fapa a ni bawk a... Ka puak nasat theihzia tak kha! Hetia a lo tlangvàl tâk hnu pawh hian ka nau mipa neihchhun kha a la ni reng tho a ni, a lo in-tlangvâlin a lo lian tawh roh bawk sia, a têt lai hre lo tân chuan,' I va lian buang buang ve,' tih tùr rênga mawi a ni a; mahse, a têt lai chuan a tê ve lutuk, hetiang chen hi a nia," tia dingin a têt lai chen tùr ni àwm hian ka kut chu ka phar a, Sêntei chu kan têt lai chanchin ka hrilh ve a ni.  Chhanzuala lah chuan," Khatiang êm êm khãn ka hniam bîk lo aw," a lo ti a, nui chung hian," I tê lutuk! Kan zo bawk che a, paw chungin kan tlànpui dàwr dáwr țhin che a ni, khâng hunte kha hmãnni lawk ni maiin ka hria asin le, tunah zawng kan lo upa ve ta a ni ang e," tiin beer chu ka'n in leh khalh khalh a, an bulah chuan țhu thlain," A la rei loh nèn, a lo rei ve ta hle mai. Zawmdiki pawhin pasal min neihsan tawh a nia, khâng hun lai kha chuan pasal chu sawi loh, ngaihzâwng pawh kan la ngaihtuah pha chhin eih lo a nia, kan rilru an tinâin an tihrehawm thei ang tih phei chu a rim a râ pawh kan la hre lo," ka ti leh barh barh a, ka țawng a kal tluang bawk a, a speed pawh a chak par par e, speed-breaker atân beer ka hmang zeuh zeuh a, chuti chu ni lo phei se chuan ka țawng tluan parh thei hialin ka ring.

"I rilru tinâtu an awm em ni?" Chhanzuala'n a lo tih chuan ka nui sak a, khap sak sak chung hian," Tu mahin an tina lo, ka thinlung leh ka rilru chu ka tâ alawm, tu mahin an nei lo, Sêntei pawh hian a hre vek ang chu, tiraw Sênte?" ka ti a, ani chuan min rawn en vang vang phawt a, a hnuah chuan a lu a bu ta nghat a.

"Hria maw? Tu ma min tihnat ka duh lo, min tinâ an awm chuan ka khai ang a, a bengah ka pawt vak ang," ka ti leh a, ka nui var var a, chutah," Nichîn khân Zdate ka hmu a, a kalpuinu chhiat lohzia mai chuh,  an kutah an inkai rial lehnghâl a," ka ti leh a,  ka ka a kal êm avàng chuan sawi chin tùr pawh ka thliar thiam tawh lo, za lo fe hian ka nui zui hawk bawk a, chutah," Engkim hi a țha vêl vek mai," ka ti leh zat a.

Zànah Sêntei inah ka riak ta ringawt a, haw a phal tlat loh avàng chuan ka riak lo thei lo a ni. Mutnaah chuan vawiin lam chanchin min zâwt sek sek reng a, ka țhian a ni bawk a, zêp țhen pawh nei chuang lo chuan ka hrilh ta vek a, ka rilru a nâin min shock hle a ni tih erawh ka sawi lang duh hauh lo.

"Chu pa mai mai chuh, ka rin dàn ang chiah a ni, a hma pawh khân ka ringhlel ru deuh tawh rêng a. Ngawi tak rawh, bumhmang hi chuan bumtu an tawng duh châwk a nia, a tluang miah lo ang, nang pawhin i thei ve tâwk a ni tih lantîr nân mipa dang nei vat ang che," a ti bal bal a, ama ngaih chuan min hnèm ve ngei a ni; mahse, ka ngaihtuah duh lo, tunah hi chuan eng mah ngaihtuah loh ka duh, mipa rinawm leh fel êm êm nia ka hriat khân min phatsan tihna a ni ta si a.

In-break a sawi kha, a thleng dik ta chu a nih hi. Min rawn be lo va, kei pawhin ka be lo, ințhenna thu chiang fakin sawi dùn lo mah ila ka thil hmuhah khân ka chiang a, kha aia chiang leh tùr kha a awm tawh chuang lo. Duat taka kaih tùr farnu a nei lo tih ka hre chiang a, a bialnu bâk a ni thei lo.

Ka hman hmasak berah Sèrkawnah chuan ka han kal a, u Kimite inah ka han lêng a, kawr min pêk a tum kha ka han lam pah ve bawk a ni. A chhûngte dang an lo awm lo teh tlat a, an pa lah ka thlen hnu lawkah a chhuak ve nghâl daih bawk si a, hun thâwl kan neih dun avàng chuan an nupa chanchin chu min hrilh ta keuh keuh a.

"Duh lo teh mah ila țhen mai ka rilrûk a ni; mahse, tûn hnaiah chuan a ni lo ang, ka țhen a nih chuan ka hna pawhin a tuar phah maithei; mahse, Pathian zârah mahni inchàwm theihna tùr hna chu ka zawn hmuh ve leh theih mai ka ring, ka nu leh pate erawh hrilh miah suh aw, an rilru a hrehawm lutuk ang," a tih chuan," Anmahni vànga nei alawm i nih le, an tilui tlat che a, i hnial ve deuh pawhin an thu an titlang lui tlat a nih kha, nupui pasal chungchângah kher hi chuan innei tùrate rilru hi a pawimawh asin, 'an chhûngkua an hungin an hausa a, mi zah an kaiin an zahawm' tih vàng mai maia duh huam ringawt hi ka ngaih dàn a ni ve miah lo, hrehawm i tih chuan țhen hmiah rawh, mi tih loh dàn pawh a ni lo," ka lo ti tàn tán thunga.

Ka u chu ka khawngaih tak zet a ni, dâwt min hrilh ka ring lo, a nungchang hi ka hre chiang ve êm! Hrehawm a ti ve tak zet tihna a ni mai. U Tluanga rêng rêng pawh, amahin a duh tlat avànga palai rawn tîra nei a ni a, zu a ruih sual apianga a nupui kut han thlâk ziah ringawtte chu, a dik lo hrim hrim, mipaah pawh ka ngaihsàn loh ber chi a ni, a chhûngte pawh ka dem khawp mai, an inneih hma khân lo hre lâwk vek thei ila...

"Ka nute chu hrilh miah suh aw, kut min thlâk reng pawh a ni chuang lo a nia, hun ka tih hunah chuan ka chhuahsan mai ang, ka chhuak ngei ngei dâwn. Min tiam rawh, ka chhuah hma chu ka nute i hrilh rih lo ang tiraw?" a ti malh malh a, ka ngaih dàn ni miah lo mah se tihtak zetin min ngèn ve si a, lungni lo tak chung chuan ka tiam ve ta sap a.

Zda nèna kan chanchin pawh min zâwt ve a," Kan țha e," tiin ka chhâng mai a, ka chanchin țha lo ka hrilh hriat ve zêl chuan ani rilru hrehawm rêng rêngin a awm a, min ngaihtuah ve leh chhâwng palh ang tih ka hlau a ni.

Kâr khat chhûng chu hrehawm ti ru deuhin nilêng hun ka hmang ve. Zda ka duh êm vànga hrehawm ti ka ni lo va, phatsan ka ni chu ka lai a nâ a, ka run êm a ni. Bâkah, kan lo inzui rei ve tawh a, kan inhre chiangin ani phei chuan inneih hial a sawi chhuak tawh a nih kha, tûn anga awlsam hian kan ințhen thei ang tih ka ngaihtuah phâk hauh lo. Rilru na taka hun hman chhoh erawh ka tum lo bur, aniin a thei a nih chuan engah nge ka theih loh bîk ang? 

Ka rilru kal ding lutuk avàngin dàwrah ka thil chhût ka tihbuai phah a, ka piin min la zilh êrh zui, a zahthlâkin hrehawm ka ti ru kher mai. Thleng nawn leh ngai tawh suh se, min phatsantu ka ngaihtuah vàng a la ni zui, amah vànga zilh ka tâwk chu ka rilruin anchhia ka inlawh mawlh mawlh a, ka ngaihtuah loh tawp tùr ka ngaihtuah vàng a ni. Kei hian ani kha ka phû lo hrim hrim bawk, ka phù hauh loh lakah ka lo inham tâng rei mah mah a, min ning a, min thing thla ta rêng a nih hi.

*******

"Engati maw i bialpa nèn chuan in ințhen a? Zei lo, mi hîpna nei lo a ti che a ni maw?" a tih chuan ka kut chuan ka tin uaih a," Vawi khat mah sawi chhuak tawh suh," tiin a bân bulah chuan ka chumsak dawp a, ani chuan," A sawi chhuak har khawp zâwk alawm, i nihna dik tak--" a tih lai chuan," VANLALCHHANZUAL..!!" ka lo ti nghek a, a sawi chhunzawm ta bîk lo, rum deuha melh pah hian," Min zui ruk ruk reng lo hian bialnute zawng ve ta che," ka ti leh a, ani lah chuan," Ka neih leh neih loh i hre lo, hmeichhia chu ka duh aia tam mah hriat ka nei, an number pawh," a ti a, a sawi zo chiah tihah chuan a phone a rawn ri zui zat bawk a, a phone chu enin a han ner sak a.

"Pakhat chu," tiin min rawn melh a, chimawm zet hian hian min han nuih leh phawt a, a phone chu a chhâng zui ta nghâl a," Yes, Teresa..?" a'n ti sap zui a, hmeichhia chu a ni phawt mai, a rawn țawng nghâl zat zat a ni tih chu ka hre thei. An inbiak chhûng chuan, "Um..." ti bâkin a chhâng lo, a tàwp dâwnah erawh," Ka rawn kal dâwn nia," a ti ve ta chauh.

"I bialnu a ni maw?" ka tih chuan," Ka hre lo le," ngeiawm zet chuan a ti  a," Țha deuhin min hrilh ve mai la, mi hrang pawh ka nih loh hi," tûm lui deuh bâr chuan ka han ti a, ka en ràn bawk a, ani lah chuan,"Ka hriat loh miau chuan," a ti deuh tlat a, en pawh min en țha duh lo.

"A hmel țha em?" 

"Um..."

"Lungleia mi hi maw?" ka tih leh chuan," Senior dîlchhût!" a ti sup phawt a, muangchânga min rawn enin,"Lungleia mi hi a nia, a hmel pawh a țha, a pian pawh a nalh, a zei, chuan, nang ang lo takin mi hìpna pawh a ngah," chiang kelh kawlha a tih chuan ka nui hak a," I va sual tak! I sual ve chiang e...!!" uar fahran hian ka han ti a, ani pawh a nui ve suk tho.

Chutah," Bialnu țha lo deuh i nei ang tih ka hlau alawm, tûnlaiah hi chuan fîmkhur hi a ngai tawh khawp mai a, ngaihzàwn tùr takngial pawh thlan fîmkhur a ngai tawh ani, i hmalam hun a tichhe vek thei a, a țha lam zâwngin a tidanglam dâwrh thei bawk. Nang ai chuan U-A-MA ka hmang tam ve tawh a, ka thil hrilh che hi hre reng ang che, thu dik tak vek a ni ka hrilh che ni," ka han tih chhunzawm leh a, ka va en lai tak chuan ngeiawm zet hian a hmui chu a lo tipawrh pek a, inpetruhin ka kut chuan ka han tin leh uaih a; mahse, ka țhulh ta.

A phone a rawn rîk leh tâk vàng a ni, ngeiawm zet tho hian, "Pahnihna," ti leh supin a chhâng zui leh ta zat a, a hmaa a biak ang tho khân,"Umm.." ti hlîrin a chhâng lehpek. Kan naua hi a lo luck phian a nih àwm hi maw; mahse, a hmel a chhe lo êm asin, chutah, tûnlai hmeichheho duh chi takin a la pà zui roh a, a pian ni se a inkhaithli nalh a, a sâng vei dâwlh a, mipa tih takah a vun a ngo ver vawr hran lo bawk, chuan, keimah ang lo takin țawng ngeiawm viau ţhin mah se mi hìp theihna riau a nei bawk.

Ka ei tùr chu ei zovin,"Ka chelh khawtlai lo ang che, kalna tùr i neih kha, ei man erawh min pêksak la," ka ti a, ka tho ta nghâl a, rawn ding ve nghâl zatin,"Nula senior inren pha chin!" a ti leh sup a, ka nuihza chu ka insûm nasa kher mai, ka nuih chhuah loh nân ka hmui chu ka pet fan fan ringawt a, chutah, ka bag chu lain ka kal zui ta nghâl a, min rawn zui ngeiin ka ring.

Pâwnah chuan min rawn ûm pha leh tho a,"I bialnu hmel țha, zei leh kei ang lo taka mi hìpna ngah nèn chuan hun hlimawm takin in hmang dâwn nia," ka han ti lui ve ngat a, ani lah chuan," Hmêlah tak chuan i țha daih zâwk," a'n la ti zui a! Min tidang lek lek maw le. Hnehsawh takin ka chhâng ve emaw ka tih pawh hian min chhâng dang thei tlat zêl. 

Zda nèn kan inbiak lohna pawh kâr thum chuang zet a ni tawh a, Sêntei leh Chhanzuala ka nei a, ka rilru pawh a kal ding viau tawh lo, bâkah, ani vànga lunglèn ka tum lêm lo bawk a; mahse, nula leh tlangvâl, inngaizâwng tih hriat takaan inzui ka hmuh hi chuan ka hre chhuak leh ziah, kan lo inzui rei ve tawh êm mai a, a àwm ve tho.  Ka ngaihzâwng neih hmasak ber nèn kha chuan kan ni rei lêm lo va, kan nih loh hnuah pawh ka theihnghilh zui thuai mai. Zda erawh hi chu ka hre zui rei vein ka ring, kan inkawp rei ve tawh êm mai.

Vànduaithlâk takin ka ti dâwn nge, Sêntei chu an khaw lamah Krismas a hmang dâwn a, a tum aia hmain haw a ngai tlat mai. A nute unau zînga upa ber pasal a boral thut mai a, a tum aia hma daihin a haw ta chûk chûk mai a, dàwr lamah induhthawh viau mah ila thihna meuh zawng, inchelh theih ni hek lo le, a haw hnu chuan kan ko a rit ta sawt a; mahse, Krismas a hnaih zual tawh avàngin kan hlawh erawh min tihsànsak a, a zia khawp mai.

Tlai khat chu Sêntei haw hnu ni hnihnaah chuan kan bânga dàwr aţanga kan chhuak tawh chu Zda'n min rawn ko nawlh mai a, thawhpuite  chuan min mangțha pah chuan min kalsan ta nghâl a, Zda hmel buai deuh nak ka hmuh chuan amah a ni lo ta emaw ka ti hial a ni, a inhmeh lo, a hmel lah a lang pawr viau zui, eng atân nge maw min tih ni?

"Eng nge ?" tiin polite thei ang ber chuan ka bia a, ka din hnaih duh hauh lo thung. Kan bul vêlah mi an awm ve nual avàng chuan duhdah takin ka be duh lo ve a ni, bâkah, tham lo deuha mi han biak hi nuam lo ka ti a, ka thin tirim viau mah se biak țhat duh loh kher chu sual viau mah ila ka mizia a ni lo ve tlat. 

"Darling, engati nge min rawn biak ngai miah loh a? Ka buai thei si a, rawn biak che ka duh viau rualin min rawn biak hun ka nghâk ve a, nghah chhuah ni ka nei dâwnin ka hre lo va, ka rawn pan tawp che a ni, ka ngaih țhinzia che chu," a rawn ti a nih chu, ka en reng ringawt! Chutiang țawngkam chu a la rawn hmang ngam chu a ni si a, Lalbuai-êm-êm-renga hian.  A bialnuin a(Zda) phone ațang ngeia message min rawn thawnte kha a hre chhuak tawh lo em maw ni? Chhanzuala'n min chhaih nân tak a la hmang zui ziah lehnghâl a, ka induhtâwkna hi a tichhe hneh ve viau asin.

"Duh tâwk teh! Tihian țha tê têin inbe tawh lo zâwk ang," ka ti a, mite chu an in lam panin an haw sup sup tawh a, thlasik a nih miau avàngin khua a thim hma tawh a, tunah pawh hian a tlai ruih tawh a ni.

"Kan in-break dâwn tihna em ni?" a tih chuan," In-break dâwn tih a ngai tawh hleinem, i duhthusàm a nih kha, chuvàng chuan, min rawn hmuh tum tawh lo teh," tiin ka kal sawn deuh a, ani lah chuan min rawn hnaih deuhin," Ka tihfiam che a nih kha, i rilru en chhin nâna ka tih a ni," a la ti deuh deuh a, kei chuan," A nih chu, i hlawhtling viau a nih hmel. I bialnu chhe lo deuh nèn khân in inti thiam lo deuh tihna a ni ngei ang maw?" tiin ka han nui lui hak a, ani lah chuan,"Ka bialnu a ni lo, ka hmel hriat hlui mai a nih kha, ka chhuahpui lawk kha min lo hmu a ni ngei ang chu," a lo ti leh dap dap a, a țawngkam chu a damin a vîn ve si lo va, thinrimna awka rêng a lang bawk si lo nèn, hahthlâk ka ti khawp mai.

"Please-in, ka bialnu a ni lo, ka hrilh fiah vek ang che, min ring--" a sawi lai mêk chuan hnung lam ațang hian tu emaw hian min rawn kuah vat a," D, min lo nghâk rei tawh em? Sorry lutuk aw, kal nghâl mai ila?" Chhanzuala aw ngei mai chuan a rawn ti fiah kalh mai a, nghet zeta min kuahin min kalpui chu a ni ta nghâl mai.

"Tu nge i nih a?" Zda chuan rawn tiin min rawn zui ve nghâl bawk a, Chhanzuala chuan," Lo inrawlh miah suh," ka beng bul sétah chuan a rawn phun sar sar phawt a, chutah, Zda lam chu hawia ding deuhin,"A bialpa ka nia, sawi tùr i la nei em?" a han ti ve nghat mai a, ka hawi chhuak ngam lo. Ka bialpa angin a han insawi chu a nia, Zda bulah chuan ni kher lo se chuan ka thin a rim khawp ang le; mahse, tunah tak hi chuan ka thin a rim lo, Lalbuaia lak ațanga kal sawn thuai thuai hi ka duh ber mai.

Zda chuan min rawn zui ta lo a ni ngei ang chu, min kuah chunga thui angreng tak kan kal hnu chuan min kuahna chu a thlah a," I bialpa hlui kha a ni tiraw? Ka hnek châk asin aw," a rawn ti chhuak ta a, meng phâwk zet hian ka lo en a.

"A bum che tih i hriat kha, a bialnu pawh kha hriat duh lo hlë mah ila ka hriat zâwng mi a ni, a hmeichhia zâwkin mi dang a kawpsan leh tâk vàngin a rawn pan leh che a nih kha, tenawm lutuk mai!" sehchilh nak hian a ti leh sup sup a, ka lo ngawi reng thung. Engtin nge chûng thleng thlenga a lo hriat hman ni tih ka ngaihtuah a, mak ka ti lo thei lo a ni.

"I la duh reng a nih chuan ngaihdam ka dîl e," a rawn tih leh chuan,"Ka lâwm e, sawi zui tawh lo teh ang, hmuh leh pawh ka duh tawh lo," ka lo ti thung a, ka ti tak tak a ni.  Hmuh leh ka duh loh bâkah inkawp leh lam phei chu ngaihtuah chi pawh a ni lo.

 

Kan dàwr nghah dàn an tidanglam a, nilênga kan thawh dàn erawh a la ngai reng a, kan duh phawt chuan kan niléng thawh bâkah zàn lamah a dârkâr biin kan inhlawh zui thei ta bawk a, ka nute chuan remti vak lo mah se hun rei a nih dâwn loh avàngin ka inhlawh duh thung a. Thahnem pawh ka ngai khawp mai, U Kimi'n U Tluanga a chhuahsan hnuah sum lamah a buai ve rih maithei si a, sum lama ka puih ve theih tâkin ka ti ve a ni. Scooty ka keng ve mai a, zàna hmeichhia mahnia haw vâwk vâwk chu ka duh bîk lo a ni.

Kan thawhna neitunu chuan min ring ve hlawm bawk a, dâr 6 a rîk tawh chuan min hawsan daih zêl a, Hruaia tiam lohin hmeichhe pathum chuan kan nghâk tlâng a, dâr 8 kan thleng a, kan haw țhin.

Zan khat erawh chu țhiante pahnih an haw hma deuh a, thingtlâng lama thawn chhuah tùr thuamhnaw kan thliar fel sa vek pack chu a ni mai a, a harsat loh avàng chuan ka hmanhmawh lutuk lo va, dâr 8 ka thlen leh dâwn tho avàng chuan ka muangchâng lui ve deuh a, thil ei pah chuan ka phone-a Boney M zai chu ka play a, ka lâm pah bawk a. Làm hi zei viau lo mah ila nuam ka ti ve a, kan tleiràwl chhuah lai phei kha chuan school function-ah pawh kan lâm ve țhìn a ni.

Ka làm tàwp dâwn hnaihah chuan nui hawk ri ka hriat avàng chuan ka hawi chhuak vat a, ka lâm pawh chu ka tàwp vat bawk. Chhanzuala lo nui sûng ka hmuh chuan," Min tiphu țêp alawm le, eng nge i lo tih dãwn?" ka lo ti vat a, phone chu lain zai ka play chu ka off ta nghâl a.

"I lãm thiam hle mai, ka rin aiin i lo zei daih lehnghâl a."

Ka zak ve țêp, ka ngei deuh bawk si a, rûm deuha melhin lei sei fê ka chhuah khum bawk. 

"I lo kal ta rau rau, min pui ve rih a niang chu, kan zo hma thei bawk ang a," ka ti ta daih a, ani lah chuan," Min chhawr i'n tum nghâl zat a... Hlawh ka phût ve dâwn a nia," a lo la ti zui, ngeiawm thiam lutuk!

*TU MAHIN AN HMUH LOH LAI CHE KHÂN TU NGE I NIH VE ȚHIN LE?*