☆UNEXPECTEDLY YOU☆ - 4 By Dingdi Pachuau

 ☆UNEXPECTEDLY YOU☆ - 4 By Dingdi Pachuau

Pakhat chauh ai chuan pahnih zet chuan kan hnehsawh ta khawp mai, ani phei chu mipa a ni lehnghâl a, a thâ a țha a, a ti zung zung mai a, kan zawh meuh chuan dâr 7: 30 chauh a la ni!

"I ril a țâm em? En teh, dâr 8 thleng dàwra kan awm a ngai tho bawk a, ei tùr ka'n lei ang e aw?" ka tih chuan ding nghâlin," Min zâwt har tawh ka ti rêng a ni, eng nge i duh?" a lo ti vut a, en vatin," Ka leisak dâwn che alawm, lo awm la?" ka ti ve thung a, ani lah chuan," Mipa awm reng laia hmeichhia zâwk chhuah nulh te chu a," a lo ti sup a, ka nui hak ringawt. Mipa a ni tih hi a inhre ve thei si a maw, a têt deuh lai ațanga a nih dàn a ni ve hrim hrim; mahse, mak ka tih ve deuh chu a tët deuh laia a țawng tam loh theih nèn, tunah hi chuan a țawng tuitam ve viau tawh ka ti, a țawng chhuah chhun pawh ngeiawm leh chimawm tak tak kha a ni țhìn a, tunah erawh chuan a lo dang ve deuh ta, ngeiawm viau tho mah se a țawng thui ve tawh a, thu

 pângngai tak tak pawh a sawi chhuak ve tawh a ni.

Pawisa ka lâk chhuah pawh chu a la duh lo ngei a, rei pawh a va thang lo, a rawn lêt chuan polythene rawn khaiin a rawn puar khawp mai lehnghâl a, a lei țeuh pek em maw ni le. Kei chu ka ril a țâm hran lo va, nichín khân ka ei nual bawk a; mahse, ka sawisêlsak chuang lo.

Árbawp hem hmin, rice leh drinks a rawn lei a, beer pawh a tel; mahse, can khat chauh a nih avang chuan min lei kêp lo a nih ka ring nghâl a, min lei kêp pawh ni se ka in tawh lo ang, tunah chuan ka rilru a pângngai thlap tawh a, ka in tawh dâwn lo.

Chaw a lo la ei bîk lo niin, dawhkàn chunga dàwr bungrua chu dah sawn rihin kan han kîl dùn a, kan thil ei tur lah chu a la lum vat vat bawk si a, ei a châkawm zual, ka ril a țâm tawh lêm lo nain ei tùr rim chuan ril a ti țâm thar ka ti a, ka ei ve leh hlek ang, amah hian ei țeuh rawh se, a ril pawh a țâm tawh ngawt ang.

Tlêm tlêm chuan ka ei ve a, a thil ei chu ka en deuh reng a, chîp hmãn hian a thil ei chu a țhial a, beer chu a in pah zauh zauh bawk a.

"Min en reng lo khân ei ve ta che."

Ka nui ringawt a, chutah,"I thil ei kha i hmuhnawm alawm, i lo puitling ve tak tak tawh tih hi âwih har ka la ti, hun hi a kal chak ngawt mai," ka lo ti a, ani chuan a thil ei lai chàwl meuh chuan min rawn en a, meng sawr sawr chung chuan,"Kei aiin kum tlêm tê bâkin i upa lo aw, min ngai naupang viau lo mai teh," a ti sup a,  kei chuan," Umm... ka sawi tawh lo ang. Le, ei zo vek rawh le, chaw pawh i la ei loh kha,"ka ti a, ei tùr chu a lamah chuan ka nawr a.

"Nang pawhin i la ei bîk loh kha."

"I rawn lan hma hret khân ka ei hlek tawh alawm, tunah ka ei leh bawk a, ka duh aiin ka puar tawh lehnghâl, i lei sa kha chu ei zo vek ang che," ka lo ti thung a, phone chu la kãngin dâr zãt ka han en zauh a, dâr 7:48 , a la hma viau e.

Dâr 8 pelh hretah kan haw a, bike a rawn ken ve avàngin a hmaah zêl ka tlãn a, min rawn zui ve zêl a, kan in bul kan thleng a, a rawn chhuk ve mai dâwn emaw ka tih lai chuan,"A tlai deuh tawh si a, ka rawn lût lo mai ang," a ti a, kei chuan," Tlai lo, hmun dangah lènna tùr i nei chuang em ni?" ka lo ti vat a.

"Ka indaih lo zâwk!"

Ner nâng hian," A nih tak chu, chuti a nih leh, lêng dun dun la ti nia," tiin ka en ràn a, chutah, thutak deuh zâwk hian," A nih leh, lèn tui le," ka ti a, ka nuih sak a, inherin in chhûngah chuan ka luhsan ta a.

Dàwr ka nghah tlai chhûng chuan min rawn nghâk ta ziah a, min thlah haw ziah bawk. Ka làwmah a tla a, Sêntei awm loh vànga ka khawharna pawh a zia khawp mai, chhùn lamah hi chuan kan buai thei ve êm mai a, khawharna hun pawh kan nei lo zâwk hial a, tlai a rawn nih chiah hian ka khua chu a rawn har ve țan țhin a ni.

Ani pawhin min rawn ngai ve viau tho, kan inbe reng reng a, kan inbiak apiangin Lungleia a rawn chhoh hun tùr mawlh ka zâwt ziah.

Inrinni zànah kan inah Chhanzuala a rawn lang ve nawlh mai, min hrilh lâwk miah lo va, mak ka tih rualin ka lãwm viau bawk. A chhan chu kan ina lêng tùr leh ka nu leh pate rawn hmu ve tùr chuan ka sâwm țhin a, min hnial ziah. A têt deuh laia an hmuh bâk kha chu an hmu tawh bîk si lo va, ka pate pawh chuan an lo hre tawh mang lo niin, ka han sawi chhuah leh chuan ka pa chuan," A ni maw...?!! Khawi maw, ka'n chibai teh ang che," a ti hluai a, an han inchibai leh rih bawk a, ka nu pawh chuan a chibai ve tho a; mahse, ka pa angin a be lûmlãm ve vak lo.

A tûk zîng tûkțhuan kîl lai chuan ka nu chuan," Chhanzuala kha a la sual reng em? Champhaia an awm lai khân sual ve viau țhin ni khân an sawi a, tunah phei chuan nu leh pa kâr lovah a awm tawh lehnghâl a, ngaih a tițha vak lo," a ti chhuak ta a, ka pa chuan," Um...a pa thil tihsual an tuar ve a nih hi," a lo ti ve a, kei chuan," A pa chuan eng thil nge a lo tihsual a?" ka lo ti vat thung a.

"Chhanzuala nu nèn an inneih lai reng khân ngaihzâwng a nei reng reng a, zu a in ve zauh zauh bawk nèn, chu chu an ințhen chhan pawh a ni ngei ang," ka pain a tih chuan ka ngaihtuahna a kal thui viau mai. Hêng hi ka hre ve hauh si lo va, Chhanzuala khân a hre ve ang em? Zu a in țhìn tih chu a hre ngei ang a, ngaihzâwng a nei țhìn tih tak hi a hre ve ang em? An chanchin min hrilh kha chuan a sawi tel miah lo mai a... mahse, tuin nge mahni hringtupa ngeiin bialnu a nei țhin tih  sawi chhuak duh bîk ang le?

Krismas hunpui chu hlim taka hman ka tum ve nèn, rilru a pangkhing tlat mai a, rilru lehlamah U Kimi  a awm ve reng a, lehlamah Chhanzualate chhûngkaw chanchin hlui chu ka ngaihtuah ve reng bawk a, ka hman ve bawk si a, thil dang ka ngaihtuah thei lo, țhian kawm mumal tak ka nei lo bawk nèn, Sêntei awm lo ka tuar a nih ber awm hi. Krismas hun liamin kum lo thar thuai thuai se, Sêntei rawn chho thuai thuai se ka ti.

U Kimi nèn pawh kan inbe reng a, U Tluanga chu a zin leh tawh avangin buaina pawh a nei rih lo a ni awm e. Nuam a tih thu a rawn sawi chuan ka khawngaih rilru kher asin, pasalte zin daih avànga nuam ti hmeichhia chu, a rilru a dik lo hlê a nih loh chuan a pasal a dik lo hlê tihna a ni thung ang. U Kimi hi chu a țawng tam lo va, U Tluanga leh a chhûngte lakah hian a sual miah lo ang tih ka hria a ni, an inneih ațang khân vawi 3 vêl chiah min la rawn tlawh a nia, chu pawh U Tluanga telin vawi hnih a la ni zui, khâng hun laite khân an nupa kâr boruak kha kan hriat a lo hlau àwm mang e tih ka ngaihtuah ta. Pasal ka nei ve ngai a nih chuan  U Tluanga anga ruih apianga nupuite kutthlâk chîng mipa hi chu pasalah ka nei lo tawp ang, neih ka tum lo hulhual.

Incheina ka uar lêm lo va, thuamhnaw tûnlai tak pawh ka nei lêm lo. Keimahin zahawm leh țha leh inhmeh ka intih zâwng hian ka inthuam mai țhìn a, hei vang hian mipa ka hîp lêm lo pawh a ni maithei, Chhanzuala pawhin a sawi ve ziah kha, 'Mi hìpna nei lo' min tih ziah kha. Ni e, mi hîp deuh tùr chuan pâwnlam lan dàn leh incheina thuamhnawte hi a lo pawimawh ve viau a ni ang e. 

Kum thar chuang kaiin dam takin hun kan hmang a, khua erawh a la vawt țha var var khawp mai. Chawlh kan nei rei loh avàngin dàwrah pawh kal a ngai leh țêp tawh a, ka peih lo ru kher mai. Sêntei'n kâr khat vêla a rawn chhoh tlai dâwn thu min rawn hrilh phei chuan ka peih lo zual sawt, theih ni se kal loh ve daih ka châk thei hial mai ka ti; mahse, ka han ngaihtuah chiang a, naupang rilru ang lek ka lo pu chu ka inthiam lo leh a, nula puitling tawh, pasal pawh nei thei rual tawh ka ni a, puitling taka awm tùr ka ni alawm, U Kimi tâna thawk ka nih hi.

Dàwrah chuan ka kal ta nge nge a, dàwr chhûng phei chu a vawt si a, kutkawr leh lukhum nèn ka inthuam țap țhin a, Krismas bàwr vël ang êma lùn kha ni tawh lo mah ila chétna tùr hi chu a awm ve reng a, chu chuan khaw vâwt lutuk tùr pawh chu tlêm tlêmin min chhâwk ve deuh.

Zan khat chu Zda'n min rawn text ve leh khut mai a, ka ngaihtuah chhuah khàtzia ka ngaihtuah chuan mak ka inti hial mai! Khati khawpa rei kha kan inzui a ni a, ka rilru kil sîrah hi chuan hmun a la chang ve deuh hlek maithei tih chauh a ni ta mai hi mak ka ti lo thei lo a ni. 

Inhmuha thil min sawipui atân min rawn ngènna a lo ni a. Ka chhâng lêm lo, chhàn țûl pawh ka ti lo, a duh duha tihkawi theihah min ngai a ni ngei ang, kan inkawp rei avàng mai khân thil min ngen apiang ka lo tihhlawhtlinsakna chhan tùr ka hre lo a ni.

Mahse, a beidawng hauh lo, dàwr pâwnah min lo nghâk a, han tlànsan tùrin scooty-in ka kal si lo va, bâkah, min ngèn ve ngawih ngawih si a, chuti  taka min ngen ta chu, kan bulah mi an awm ve reng bawk nen, 'ka thih phah chuang nâng' tiin ka zui ve ta a, ka zui avàng hian a lamah ka lêt leh dâwn tihna a ni lo va, ka rilru min sawh sawnsak dâwn tihna pawh a ni hek lo, ka dinna a ngai reng. A insawi fiah duh a nih chuan han insawi fiah ang hmiang, dâwt a sawi dâwn em tih kan hria ang chu.

Kan inzui lai pawha kan chawlh ve fona, a țhianpa Ngura restaurant nuam takah chuan min luhpui a, kan pahniha inzui lút min lo hmuh chuan min lo chiau-au vat a, ka nuih lui ve sak a, ani hi chuan ka chungah eng thil mah a ti hleinem, ka ngeia ka huatna chhan tùr a awm lo. Țhutna min kawh hmuhah chuan țhuin ka ngawi ngar a, a pawisahi  ei heksak ka tum lêm lo, a thil sawi duh chu sawi thuai se, haw thuai ila tih ka duh ber mai.

"Eng nge i duh ang?" a tih chuan," Ka ril a țâm lo, i sawi duh chu sawi thuai mai zâwk teh, a tlai tak tak hma hian,"ka lo ti thung a, ani chuan," Khawngaihin, thil ei phawt ila, kan ei chhûngin ka sawi dâwn nia," a ti ve thung a.

Restaurant hi a zau lêm lo nain a nuam reuh a; mahse, vawiin chu mi chàwl an tam lo a nih dâwn hi, nge khua a tlai deuh tawh a, tu mah an chàwl peih tawh lo zâwk ni ang?

"Sawi tawh rawh."

Dawhkàn chunga ka kut dah chu rawn vuanin a chelh a, chutia a rawn ti chu ka rin loh deuh thil a nih avàng chuan ka hamhaih deuh tlat a, lâk sawn nachâng pawh ka hre lo, chutih lai tak chuan kan țhutna piah ațang chuan," A kut kha thlah rang rawh, mi tenawmpa," tih aw  a rawn chhuak thut mai a, kan hawi chhuak rang kher mai.

"Thlah rawh ka tih chu."

Chhanzuala leh Zda chu an inmelh ta ràn mai, kan la țhu reng a, Chhanzuala erawh a ding thung, Zda rawn melh ding ngar chung chuan a rawn pên hnai zêl a, a lo awm ve reng zãwk nge, a rawn lût ve chauh zâwk? Buaina rim lah chu a nam țha ropui mai si, eng thil nge thleng ang?

"Tu fa lu bâwk nge i nih!"

"Thlah rawh ka ti lo em ni?!"

An țawng chhuak rual chiah a, chumi pah chuan Chhanzuala chuan rawn hnaih ruakin Zda pawh a ding ta thut a, an innawr tawn chu a ni ta mai, an inhnek ri no sak sak a, Zda chuan a hmaiah a hneksak a; mahse, Chhanzuala pawhin a hnek ve hman tho, thî êm chhuak lo mah se an na dùn viauu thovin ka ring. Ngura leh mi dang pahnihin an rawn pawt hrang ta a, kei chuan thinphu hlawp hlawp chungin ka lo en tawp ringawt, mipa insual hi film lamah chuan ka hmu ve fo tawh a, live erawh hi chuan TV-ah bâk ka la hmu lo, a taka ka hmuh dâwn pawh hian ka tlãnchhe daih țhìn a ni.

Ka hamhaih leh hlauthãwng bawk si chu chêt ngaihna ka hre lo va, țhuin ka lo thlîr tlawk tlawk tawp mai a ni. Chhanzuala chu restaurant ațang chuan an chhuahtîr a, a thin kha a rim hmel nasa mai si, chutiangin Zda pawh chu a thinurna tihreh tum ni àwm tak hian tháwk a la kâwk kâwk a, pakhatin a la chelh ràn bawk a, a hnu deuhah erawh chuan a thlah ve ta a.

Ngura chuan," A zia lo êm mai, Police han pun ringawt chu a zahthlâkin a mualphothlâk si a, khatia ka tih mai loh kha chuan..." a ti sap sap a, Zda chu a ngawi reng thung. Ka pângngai tial tial a, ngaihtuahna ka hman theih hnu chuan ka tlãn chhuak ta vat a, Zda pawhin min au zui lêm lo, boruak a dik lo ta nuai mai si a, Chhanzuala kha ka um zui vat loh chuan thil țha lo a ti palh ang, eng ti tiha kan awmnaa rawn lût ve nge maw a nih le? Ani hi, min zui ru te hi a lo ni lo maw le?

Kein chak zet chuan ka kal hlawk hlawk a, a in luah bul ka thlen chuan ka ding leh rih a, ka hnârah boruak a leng lo va, ka ka nèn lam țang kawpin ka thâwk chhuahtîr a, an hîp lût bawk a, ka thâwk a zia deuh hnu chuan a in ka pan leh chiah, a kawngkhàr bulah chuan ka'n ding hmasa leh rèn ráwn phawt a, chumi hnuah chuan doorbell chu ka hmet ri ta ral ral a; mahse, min chhângtu a awm lo. Ka han hmet nawn leh a, a hma ang chiah tho a ni. Ka beidawng chu ka han hawi kual deuh a, a kawngkhàra tala lian pui lo inkhai vâ ka hmuh chuan ka nui chhuak hawk ringawt, engtin nge ka lo hmuh loh theih ni, a len tehlul nèn. Ani awm lo chuan min chhâng lûl lo ang.

Ka phone ka phawrh leh a, a number ka han hmet chhuak a, ka be tlang thei chuang lo, 'Switched-off' a ti, khawiah chuan nge maw a kal ang le? A hmai pawh kha a vûng țan tawh maithei a ni, khati chung chung kha chuan khawiah nge a lèn chhuah tehlul ang le?  A thin a rim ngei àwm si a, pawi dangte hi a va khawih mai ang em?

Amah a awm bawk si lo va, a kawngkhar bula awm reng chi lah ni hek lo le, khua lah a thim mai dâwn si, Séntei chu awm tawh se chuan ka pan thla ngei ang a, Chhanzuala lo haw hma chu Sêntei inah ka lo awm rih mai tùr hi a nia.

Zànah pawh chuan phone ka tum nasa lutuk; mahse, min chhâng duh țhak lo, 'switched off'chu ti tawh lo mah se ka be thei chuang lo a nih chu. Naktûk lamah ka bei tawh mai ang, awm a ti hrehawm, ngaihtuah a tina ve bawk si, engah nge maw a rawn thinrim chiam mai mai ni? An la insual zui, mualphothlâk zâwng lehnghâlin.

*THU DIK A NI NGEI EM TIH PAWH NGAIHTUAH LOVA RIN THU LEH ZÊLDINNA HMANGA MI DANG NUN TEHA AN NUN I HELH VIAU A NIH CHUAN NANGMAH KHA I INEN FIAH NASAT VIAU A NGAI TIHNA*