☆UNEXPECTEDLY YOU☆ - 5 By Dingdi pachuau

 ☆UNEXPECTEDLY YOU☆ - 5 By Dingdi Pachuau

A tûkah chuan dàwr kal turin ka insiam hma viau mai a, ni dang zawng aia ka hmanhmawh avàng chuan ka nu chuan," Eng thil nge ni ta? I va hmâ ve!" tiin min zâwt ta rêng a, kei chuan," Vawiin chu a ngai tlat, nimin khân pi berin a sawi a," tiin dâwt ka'n sawi teh ngawt a, ka rilru erawh chuan ka inthiam lo ru angreng khawp mai a, ka nu pawh chu ka en duh lo rêng a ni, dâwt ka sawi avàng chuan thil pawi thleng lul suh se.

Chhanzuala in luah lam panin ka kal nghâl char char a, ka thlen hma deuh chuan ka han phone chhin a, a ring ral țhak mai. Min la chhâng duh lo fo tihna a ni maw. Nge, a la mu zâwk ni ang? Nge, a phone chu a silent ang a, ri chhuak si lo chu a hre lo ni ang? 

Engati nge maw a thinrim ve viau ringawt le? Ka ngaihtuah tehlul nèn, Zda lah ka va beisei leh tain ka va be țha leh ta tihna pawh a ni si lo va. An insual chhan pawh kha min chhan ve vàng a ni tih ka hria, Zda nèna kan chanchin ngaihnawm lo zet kha a ina beer ka ina ka lu a zàn vah țum khân ka sawi chhuak vek si a,  chuvàng tak chuan ka  bialpa lemah pawh khân a rawn chang ta rêng a nih kha. A thinrim chu ka hriat thiampui ve deuh tho mai; mahse, chu pawh chu lo ni se, insual kher kher kha chu a fuh lêm lo, a mualphothlâk êm asin.

A in chu pâwn lamah chuan a inkalh tawh lo, in chhûngah a awm ngei tihna a ni. Chuti a nih chuan a la mû a ni ang, Zda hnekna kha a na ta viau tihna em ni ang? Ni lul suh se. Chutiang a nih loh chuan ka chungah thinrimin min biak a châk lo tihna. A doorbell chu ka han hmet chiau vang vang ta tho a; mahse, min rawn chhãng chuang lo, a luhlul tak tak a ni, ka hre sa vek tho nain hetiang êm êm hian a daih rei ka lo ring pha lo va.

Min hawn duh chu ka ring chuang lo nain,"Chhanzual, lo hawng teh," tiin kawngka chu ka han kik leh dat dat a, ka țawng ring vak ngam lo, mi dangin an lo hria ang tih ka hlau ve tho a ni. Beng dawhin ka han ngaichãng deuh a; mahse, thãwm ri hlek hriat tùr pawh a awm lo. 

Kal pah chuan ka phone chu phawrhin a message tùr ka type nauh nauh a, a luhlul chuan kei pawh ka luhlul ve thiam tho a, min chhàn duh loha min biak duh loh pawhin ka tlawh lui zêl tho ang a, a phone-ah pawh message ka thawn tluk tluk mai ang.

Chhùna ka hman châng chuan ka phone chu ka en zauh zauh a; mahse, min rawn chhàn lêtna a awm thei lo, pawi lo, tlaiah ka tlawh haw leh ang a, min chhàn duh loh pawhin naktûkah pawh hun ka la nei zêl ang chu.

Tlaia ka haw chuan hmanhmawh takin ka kal leh dàwr dáwr a, inah lo awm hrãm se, min be duh tawh se ka ti a ni. Zda nèna an insualna avàng chuan a nat vak loh ka beisei viau bawk, thisen an inchhuah lêm lo bawkin ka hria, ka hmuh lai kha chuan thisen a chhuak lo tlat.

Ka phone lâwk duh ta lo va, min chhâng duha ka rin chuan loh vang a ni. A rûka ka beisei ang ngei erawh chuan kawngkhàrah Tala lian pui a lo inkhai ta lo va, ka nui sak mai, doorbell pawh hmet duh lo chuan ka han pawt hawng hrãwk a, ka lût zui nghál. Ka chêt dàn chu nula hawihhâwm chêt dàn a ni lo tih ka hre nain doorbell ka tihrîk chuan keimahah ngaiin min hawnsak leh duh chuang lo ang tih ka hriat sa vàng a ni.

Ka thil hmuh avàng chuan ka ding ta chawt a! Stool sâng er awrah țhuin, a kâwng achin chung lama thuamhnaw inbel nei hauh lo hian a lo awm niin, min rawn en ve vut nain a hawi lêt leh daih, a tlangvàl hnua ruaka ka hmuh vawi khatna a nih avàng chuan nuam ka ti chiah lo. Bâkah, tûn ang khuaah engtiziaa kawr ha lova awm nge maw a nih rêng rêng ni? Hmeichhe awmpuite hi a lo nei rêu rêu ang e...?

Mahse, ka kal chhan ngaihtuah chhuakin," Engati nge ka phone i chhàn duh miah loh a?" tiin ka pan phei ve ta nghâl a, ka bia a ni tih hre àwm pawhin a awm lo, min chhàn pawh tum lo chuan island chunga beer a dah chu banin a in leh nghâl zat a.

A bulah chuan va dingin," Luhlul chhuah kher lo teh, ka biak che chu. Ka ngaihtuah tehlul che nèn," ka ti leh a, a hmel chiang taka hmu thei tùr chuan a hma lamah kualin amah hmachhawn tak chuan ka ding leh a, a mit bul duk deuh  leh a khabe vûng deuh ka hmuh tâkah chuan," A nâ em?" ka ti ta vat a, nimin khân an lo inhnek fuh hle a ni ngei ang chu, vawi hnih khat chauh emaw an inhnek hman ka ti asin!

"Min ngaihtuah suh!" ti pahin a hawi sawn ta nghat a.

Ka nui sak ringawt. A chêt dàn chu a naupang roh lutuk a, 'Min ngaihtuah suh' a tih hi chu a ti ve mai mai, ka ngaihsak a phût tihna, a têt  laia ngaihsak a phût nasat theihzia ka ngaihtuah chhuah phei chuan, ka khawngaih thei zâwk hial mai. Tunah zawng ngaihsaka enkawltu tùr nu a nei tawh si lo va, tlangvâl mahnia inchãwm zo pawh ni mah se ngaihsaktu a mamawh ve tho alawm, tung chhova kal tawh phawt hi chuan ngaihsak nih chu nuam kan ti vek ang chu.

"Vûrin i dep em?" Ka rilru erawh chuan zawhna ka zâwtin ka hau char char thung. Ka phone a chhâng duh lo va, awmze awm lovah a thinrim a, mi a insualpui bawk. Mi pângngai awm dàn tùr a ni lo rêng rêng, a thinram lutuk chu sim vat se a țha ngawt ang.

"Dep lo."

A thinrim dàn ve lah hi, min chhâng bung nghut nghut ringawt a, ka thinlung chhûngril a thleng phâk lo chiang êm mai. Ka thinrim chuan ka zilh ve ang a, ka ngaihsak ve bawk ang chu, u ngaihsaktu tùr a hmuh theihah kei bâk a nei lo, ani pawh hian a u anga min enin min thinrim khum ngam ve a ni mai.

"I haw veleh khân deh vat tùr che asin le," ka ti phawt a, nimin tlaia a in Tala lian puia inkalh kha ngaihtuah chhuakin," Nimina kha thil a thlen hnu khân khawiah nge i kal daih a?  Ka rawn ûm zui che a," ka ti leh a. Ani chuan," Insualpui tùr dang ka zawng," a lo ti nghat a, ka en deuh hrâ a, he pa pui hi, a ti tak tak chiang mai. Nimin khân Zda nèn khân vawi hnih khat bâk an inhnek hman lo va, a hmai duk leh vúng pawh hi mi dang a sual leh vàng chu a ni ngei ang chu.

"A va țûl lo tak! Insual hi thil țha a ni hleinem, a zahthlâkin a mualphothlâk asin," tiin a huat loh tùr zâwng chuan ka'n zilh kual ve a, ani lah chu a ngâwi rûn a, ka thil sawi chu a hria ang em aw ka ti, ngaithla àwm pawhin a lang lo ; mahse, ka hrilh tho ang, thil țha hi chu an ngaithla emaw ngaithla lo emaw hrilh zêl tho tùr.

"Chuan, insualpui tùr chu i hmu ta em?" te chu ka ti leh lawi a, ani pawh chuan," Hmu e, an sil khawp ang," a lo ti ve tak deuh deuh a, ani pawh a hmai a dukin a vûng a, a sualpuite nèn chuan eng tianga nâin nge maw an inkhawih ang? Eng zât tak ni ang maw? 

A taksa chu ka en ru dan dan a, hliam leh pilh àwm ka hmu lo va; mahse, hmun hnih khatah chuan duk deuh chu ka hmu ve, a sualpuite khawihna hnuhma a ni ngei ang chu, ani pawh hi an hnek ve emaw an pêt ve emaw a ni ngei ang le.

"A țha ka ti lo êm mai, hmêlma i insiam mai ang asin, ti ta daih ila, i thil tih tum kha i tifel zo thei tawh em?" ka ti ta daih a, thil dang ka sawipui loh chuan, a buaithlâk, hma kan sâwn mawh awm êm mai.

"Fel țêp."

Fridge chu hawngin beer a rawn phawrh chhuak leh a, pakhat chu min pe ve nghâl zat a; mahse," Ka duh tawh lo ve," ka lo ti vat a, eng mah pawh sawi lo chuan min en vung vung a, a hnuah chuan fridge-ah chuan a va dah leh mai bawk a.

"Zda kha engati--"

"Sawi tawh suh, ka lo inrawlh tawh lo ang, i duh phawt chuan nei suh," a rawn ti chhuak vut a, ka en vat a, a thil sawi chu awmzia a awm lo nasa mai si a, fiamthu a thawh emaw ka ti a ni; mahse, nui hmel a pu hauh lo.

"Fiamthu ka thawh lo, kha pa ve kha, mipa pawh a nih loh tawp kha," a lo ti leh a, chutah," Tihpalh thil a ni lo a nia, hnek leh ka châk khawp mai, i pawi ka lo sawi a nih chuan min ngaidam suh," a la ti deuh deuh a, chutiang chu ngaihthlâk nuam ka tih zâwng a ni lo, bãkah, Zda kha kei pawhin pà ka ti lêm lo, mi rinawm lo hi pà ka ti thei lo hrim hrim.

"Keimah vànga thinrim i ni tih ka hria alawm, min hmuh kha a duh a, mi zînga inhnial ai chuan ka zui ta mai a ni," ka tih lai chuan," Chuan, i kut pawh chu i lo vawntîr leh ta a..." a lo ti hluk a, kei chuan," Ka vawntîr a ni kher lo aw," ka lo ti vat thung a.

Chutiang chuan thu eng emaw laiah chuan kan thu a inbât zauh zauh a; mahse, ka thin a rim chuang lo. A thinrimna hi tihrehsak ka duh a, mi dang sualpui tùr a lo zawng leh palh ang a, harsatna a tawh phah ang tih ka hlau a ni.

Sêntei lo haw chhohna pawh kâr khat zet a liam leh tawh a, a in luahah chuan ka pêng leh zut tawh a, chumi pah chuan a lo awm remchàn chuan Chhanzuala pawh ka tlawh ziah, a chhan chu kei lo chu amah ngaihsaktu tùr a bul hnaiah an awm tawh lo va, a chungah thil țha lo a thleng palh ang tih ka hlau a ni. Kan ina lêng tùr chuan ka sãwm ve fo a; mahse, ka hman ve hun zàn lam a nih avàng hian a lo lêng ngai lo. Bâkah, tlangvãl a ni ve a, zàn lamah chuan nula ina lèn pawh a duh ve ang chu, hmeichhia lah hriat a ngah si, a sawi dàn takin, lènna a indaih lo ang. Ka nute hian a chanchin min zâwt ngai lêm lo va, kei pawhin ka hrilh hran lo bawk, lo lêng tùr hian ka sâwm ve tak na a, ka nute erawh hi chuan min rawn tlawh tùr pawhin an duh vak lo ang, mi hausa fapa a ni lo va, an chhûngkaw dinhmun an hriain a nun dàn lah an hre tho bawk a, an ngaisâng lêm lo ang ; mahse, kei chuan ka khawngaih roh tlat a, biain min chhâng ngeiawm țhìn viau mah se, ka ngaina tho. 

Tlai khat chu zanriah ei hma hret hian ka nu chuan," Vawiinah Zda ka hmu nawlh mai a, a rawn hrilh tho che chuan ka ring a, lêngah ka sàwm kha. Chuan, a mit la thei tùr leh a làwm zâwng tak tùrin lo inthuam bawk la, mipate hian hmeichhe inchei nalh hi an duhin an mit a la a, an hîp zak bîk niin an sawi țhin, chu chu i hre reng dâwn nia," a ti sar sar a, kei chuan," Engah nge maw i lo sàwm le? Kan ințhen tawh," ka lo ti vat a, ani lah chuan," Chutiang ka ngaithla peih lo, inlaichìnnaah hi chuan han intih thiam loh châng leh han intihtauh chângte hi a awm ve ngai a nia, lâk thutak tùr a ni ngai lo, ani anga țha hi chu i hmu tawh lo ang," a ti ta êrh a, ka ngawi ta daih. Sawi leh pawh ni ila awmzia a awm chuang lo ang, a chhan chu kan ințhen tawh a ni tih hi a pawm phal thei lo ang tih ka hria a ni.

Zànah chuan a rawn lêng ta ngèi a, ka chhûngte laka a awm dàn chu a la ngai reng, a polite êm êm a, a nui duh a, ka nu phei chuan a nuihpui leh hawk hawk tawh, a lo be ţha nasa si a, ka haw tak tak a ni.

Ka nute kal kian hnuah chuan," Ka rawn lêng khât lutuk tawh a, i nu leh pa han hmuh leh chiah chuan an ngaihawmin lung an tilêng khawp mai, an fel bawk si a," a ti zui a, kei ve thung chuan," Eng atân nge i lo lèn a?" ka lo ti ve thung a.

"Dinpui, thil thleng kha theihnghilh vek ila, a tharin bul țan leh teh ang, nang chauh hi ka lungawina i ni a, ka tâna awm reng ţhin pawh nangmah chauh hi i ni, thil kal tawh chu liamtîr tawp ila, hmalam hun chauh thlîr teh ang," a ti sap sap a, kei chuan," Min phatsantu kha tu nge?" ka lo ti fak a, min chhâng lawk lo chuan a ngawi reng phawt a, chutah," Nang pawhin bialpa i neih tho kha, kan in-draw chiah," a ti leh a.

"Phatsantu leh phatsana awm hi kan inang thei ngai lo ang, chu chu thil chiang sa a ni. Min phatsan lai khân phatsana i lêrhsan rilru tùr i ngaihtuah thleng phâk em? Teuh lo mai! Hetia kan ințhen hi a țha," ka ti leh a, ani chuan," Ințhen thu ka sawi lo, ka ţhen lo ang che, engtikah mah. Ka bànsan lo che ang a, mi dang tân engtiklai mahin ka phal lo bawk ang che," a ti ta duah a.

"Zd, sawi tawh lo teh ang, sawi hian awmzia a nei lo, kan ințhen tawh a, i duh tak i kawp tawh bawk, min tilui suh, țha lo taka ințhen hnua awm hi ka duh zâwng a ni miah lo a nia," ka lo ti ve leh a.

Chutiang hlïr mai chuan kan inhnial a, a hnu deuhah chuan," Palai ka lo tîr tawp mai ang," a ti chhuak ta phut mai a, a tifiam emaw tiin ka en  vat a ; mahse, a lo nui hauh lo.

"Duh tâwk teh! Fiamthuna chi pawh a ni lo, dam chhûng atâna inlaichìnna siam hi fiamthu-ah i ngai em ni?" ka ti hlar mai a, a hmel chu a ngai reng a, a thinrim hmel lo va; mahse, tumruhna nei hmel lam a pu ta deuh zâwk.

Ka thu hmu hauh lovin palai chu a rawn tír ngawt tak tak ang tih ka hlau ru khawp mai, ka naupang hran tawh lo nain min phatsan hnu ațang kha chuan inlaichìnna neih leh pawh hi ka peih tawh lo, hrehawmna min thlentu mai a lo ni. Ka duh zâwng tak ka lo hmu ve leh ta a nih chuan le, hmangaihna hi chu hriat thiam hi a har a, min dêng dawt a nih hran loh phei chuan hriat hi a har viau a ni.

Zan khat chu kan țhianho chuan, ti mai ila, dàwr nghâkho kan ni ber ang chu, Kum thar hnua dam taka kan inhmu khâwm thei chu làwmin Venglaia  3 sis Hotel-ah chuan chaw kan ei khâwm a, kan tam lo nain kan bengchheng viau mai, kan mipa neihchhun Hruaia lah chuan nuam hi a'n ti khawp ah! Chaw kan ei laite chuan," Tlangvâl vànnei han nih hi chu aw... Nuam ve g veng tak a ni, in chhe lo hlaem bawk si.  Hun dangah kan eiho leh dâwn u nia, kan tih phawt chuan a man chanve ka tum ang, sawi ve rêng rêngah pawh a țha alawm, kan hma hun kan hre miah si lo va, nakkum lamah chuan țawng thu chhe lovah, kan kim țhap thei tawh lo thei a nia, nupui pasal inneih hnuah phei chuan a harsa țalh tawh ang," a ti sar sar reng a.

A dik khawp mai. Nupui pasal kher nei lo pawhin tu emaw ber hian mual kan liam tawh maithei a, kan inchhír hma hian , kan theih tlàn lai hian ti deuh sek ang, chhûngte han thlim zak zak hi a nuam ve bawk alawm.

Mi dang pawh an rawn lût ve a, he hotel hi a zau nuam ve a, mikhual kher lo pawh, țhianzaho leh chhûngkua ang pawha an ei fona hmun a ni, an hlâwk duh ngawtin ka ring.

Chhanzuala ka hmu, a hnungah amah ang rual vêl tho mipa pahnih hian an rawn zui a, makti rilru tak chuan ka lo enthla ru deuh reng a, kan țhutna epah tak chuan țhuthmun an rem ve ta chat mai, anni hi an rawn ei ve dâwn tihna a ni ngei ang chu.

A hawi chhuah loh avàng chuan min rawn hmu ve lo tawp ang, ka chïk ru deuh a, rui hmel a puin ka hre lo, a kalpuite pawh chuti tho. A țhian hnai ve takte pawh an lo ni maithei, ka hmuh vawi khatna an ni, an intiat hlawm țhè țhàw viau mai.

Famkimi chuan," An chhiat lohzia saw, hoodie black ha phei saw chu chhe lo reuh lutuk!" a rawn ti sar sar a, a mit fûkna lam Chhanzualate țhutna lam chu kan en phei ta vek a, Sêntei chuan min rawn kheuh zauh pah chuan," Chhanzualate an nih saw, kan ko phei ve mai dâwn em ni ang?" a ti sar sar a. Famkimi vêk chuan," In hriat zâwng a ni em? A nih chuan, ko phei r'u, belhchian a châkawm alawm," phùr hmel zet hian a ti leh sar sar a, chaw kan bàr țan deuh chauh a la ni bawk a, kan bul dawhkàn ãwlah chuan an pathum chuan an leng vek chiang.

Ka koh hma chuan Sêntei chuan Chhanzuala chu a ko ta lauh a, a rawn hawi vat a, min rawn hmuh chuan min rawn en vang vang a, he laia min hmu ve chu mak a ti deuh a ni ngei ang chu.

"Lo phei r'u, in pathum khân in la leng a nia," Famkimi chuan a ti leh ta lauh a, a kut chuan a hüi pah bawk a, kei pawh chuan ka lo hûi ve bawk a, Chhanzuala țhiante pahnih chu phùr hmel zet hian an ding nghâl hluai a, kan awmna lam pan chuan an rawn phei ta nghâl bawk a.

Mipa pathumin min rawn belh ta chu hmeichheho chu an phûr khawp mai a, a bîk takin Famkimi chu a ni zual. Chhanzuala chu a en duh khawp mai a, hmingte inzâwtin an titi mam mam a, kei erawh chu ka țawng ve vak lo, chaw ei lai țawng luai hi ka thiam ve zâwng a ni tlat lo.

Sêntei, kei leh Chhanzuala chu inhre sa kan nih avàng chuan kan țawng ve lutuk lo nain mi dang thil sawiah leh fiamthu an sawiah chuan kan lo nui ve tho a, chaw kan ei zawh pawh chuan haw nghâl mai lovin thingpui sen hâng min rawn thlit chu kan in leh rih a, nula tlangvâl awm khâwm kan ni bawk a, phone number an inpe nak nak mai.

Famkimi chuan," Hmeichhe pakhat mah hruai lova chaw ei tùr chhuah chu a luck loh thlâk e," nui chung hian a ti a, Chhanzuala chu a melh pah ralh a, Chhanzuala bul chiaha țhu a țhianpa Sam-a chuan," Ni ngawt tak mai, kan tlangvâl luck ber hian hruai a phal tlat lo va," tiin Chhanzuala chu nui var var hian a en a, ani pawh chu a lo nui ve suk a. 

"Hruai ngai lovin hei, an lo awm sa mai alawm," tia nui chunga a sawi lai chuan Sam-a vêk chuan," Dik leh chiah mai, kan la inkawpkim chiah zui a," nui hawk hawk chung hian a lo ti leh a, fiamthu a duh ve àwm roh hle mai.

An titi bawrh bawrh a, thingpui sen hâng kan in zawh hnu chuan kan tho ta sang sang a, Hruaia'n min thlah a tum hlawm a, Sêntei ina riah ka tum deuh avàng chuan keini pahnih chu Sêntei inah min drop mai dâwn a ni.

Hruaia chuan," Lût ula? Ka thlah ang che u ka tih tawh kha," a ti lauh lauh a,  Chhanzuala chuan a țhiante chu a be sar sar a, chutah," Kan hàwnna tùr lam a inang tho bawk a, Sênteite pahnih hi chu kan lo phur haw thei ang," a rawn ti a, kei chuan," Kan in-pathum ang maw?" ka lo ti vat a, ani chuan," Sam-a hi Lunglàwn lama haw tùr a nia, Sêntei a phur thei ang," a lo ti leh a.

Famkimi hi Vênghlun niin Remlali hi College vêng a ni a, an in awmna a thlang tehchiam lo ve ve a, a zia deuh. Hruaia hi chu Bazàr vêng a ni thung a, a tân pawh mi pahnih chauh thlah chu an vêng a lo inhnaih tho nèn, a zia phah viau ang chu.

Chhanzuala chuan min phur haw ve ta thung a, ka duh lo dâwn dâwn a; mahse, Sêntei chu Sam-a bike-ah chuan a lâwn ta thuai mai si a, han hnial leh chi pawh a ni tawh lo, zàna bike-a chuan chu ka rin ai daihin a váwt, hnàr lah chu  a vawt duh khawp a, a hit vek ni maiin ka hria.

"Min kuah ve mai la?"

A tlãn chak lutuk lo hlauh a, tlêm chuan a zia; mahse, ka ngei ve thláwt, ka kuah duh loh avàng chuan  a tlân chak deuh thut a, chutah, brake a'n rap kher a, kan inhnaih duh khawp mai a, ka nghèng awl mai. A la nui hawk zui, a malah ķa'n chumsak țawk kha.

*INLAICHINNA TICHHE LO TÙRIN MI TAM ZÂWK HI CHUAN NGAWIH AN CHUH A, TU EMAWIN NGAWIH A CHUH TLAT AVÀNGA INLAICHÌNNA CHHE TA TAM A AWM BAWK*