☆UNEXPECTEDLY YOU☆ - 6 By Dingdi Pachuau

 ☆UNEXPECTEDLY YOU☆ - 6 By Dingdi Pachuau

Chhanzuala chuan Sêntei in kawtah min drop a, ani erawh chu a phit chhuak leh nghâl daih thung. Sêntei inah chuan ka han awm leh deuh reng a, titiin an khaw chanchinte chu min hrilh malh malh a, hun remchâng hmasa berah zin tùrin min han sâwm ve bawk a, vawi khat chu ka zin ve tawh a; mahse, ka hre chiang vak lo, kan lêng chhuak mang  tlat si lo va, hriat chian ngaihna chu a awm lêm lo a ni, an in awmna erawh ka la hriain ka ring, tûn hnaiah a danglam viau tawh niin a sawi bawk si a, ka mitthlà dàn pawh hi a dik tawh kher lo ang.

U Kimi nèn kan inbe pawp reng a, tûn hnaiah U Tluanga chu a piang thar ve deuh a ni maithei, kut a thlâk ta mang lo tih min hrilh chuan ka lâwm ru viau mai; mahse, a taksa lamah harsatna a neih deuh vàng pawh a ni mahna, zû a in țha thei lo tlat a, a chhan chu a pum lam vàngin doctor-in in rih lo tùrin a ti a, a rui khât ta rih ni àwm tak a ni, a zia rih e, a ruih loh chuan mi țha tak a ni ve a, nupui kutthlâk duh hmel pawh a pu bîk lo.

"Engtikah nge i chhuahsan dâwn?" ka tih chuan," Tunah hi chuan a hrisêl lo rih êm mai a, ka chhuak rih lo ang, enkawltu a nei rih si lo va," a rawn ti a, kei lah pek chuan," Nu leh pa leh unaute a nei lo em ni? Tuna i chhuah loh chuan nakinah chuan a harsa zâwk ang, a han dam leh deuh mah ang a, a in leh tho ang. A ruih chuan kut i tuar leh emaw a ni ang a, in mualpho  thui mai mai zâwk ang," ka lo ti thung a, a chan ka ngaihtuah a, ka khawngaih lo thei lo a ni.

"Ni lo ve, a dam țhat deuh hun nghâk phawt ang, bâkah, a nunzia pawh a sim ve deuh tawh maithei asin, ti daih ila, kan chungchâng hi ka nute kha i la hrilh lo tiraw?" a rawn ti leh a, U Kimi hi chu aw... kei chuan ka tuar peih hauh lo ang, a nungchang lah a sim ka ring lo, Pathiana a piang tharte a nih ngawt loh chuan.

"Hrilh nâng, hrilh lo tùrin min tih kha," ka lo ti ve thung a, ani chuan," Lo la sawi chhuak miah suh aw, mihring hian kan hma hun tùr hi kan hre si lo va, amah hi han dam țha ve phawt se," a rawn ti leh a, ka sawipui zui duh tawh lo, awmzia a awm dâwn chuang lo. Han nghâk leh phawt ila, U Tluanga pawh han dam leh phawt se, a hriat mai ang chu, an mualpho thui tak tak hmaa ințhen fel tùr erawh chuan ka duh khawp mai thung.

Chhanzuala pawhin computer zirna tùr chu a la buaipui reng a, kan inhmu fo va, a inah pawh ka kal ngun viau mai. Nau ang maia ka en a ni ka tih tawh kha, a chhûngkhat laina lam chanchin a sawi ngai si lo va, an awm hnai lo a nih ringin kei tal hian a mal khawharna ka hnem ve theih deuh ka rin vàng a ni. Ka theih tâwp chuan ka ngaihsakna ka tilang ve a, ngaihsak lo mah ila a awm thei lutuk tih chu ka hre tho; mahse, ngaihsak hi nuam ka ti tlat.

Tlai khat chu zai ngaithla pah hian a pa chanchin ka zâwt chhin a, ka rin loh deuh hian," Pa ka nei hleinem," tiin min chhâng ta mauh mai! Ka en deuh reng a, a pa nèn an inkâr chu a lo chhe viau a ni tih ka hre thiam ve chiah a ni. Ka zâwt zui lo chiang, a duh hunah min hrilh ve mai rawh se, tunah hi chuan a hlim chho ve viau tawh si a, he a hlimna hi a pa chungchâng vànga tihchhiatsak ka duh lo.

"Hla chu ka duh ka play ve dâwn aw," ka ti ta daih a, ani pawh chuan," Va en la," a rawn ti ve mai bawk a, a computer lam chu ka pan ta nghâl a, zai hi thiam ve fahran lêm lo mah ila zai thiam zai hi chu ka ngaithla ve peih viau thung.

Lalnunsanga hla zînga mawi ka tih ber mai 'Di Hlui' tih chu ka han play ta a, he hla kher hi chu zawm pawh ka zàwm phal ngai lo, mawi ka tiin a phuahtu hi ka khawngaih a, a satupa lah hian duhthusàmin a sa chhuak thiam bawk si a, meng chung pawhin ka ngaithla phal lo, maimichhîng dar dar chung chuan ka ngaithla a. A sak tàwp hnuah pawh chuan ka play nawn leh a, Châng khat leh a thunawn ka ngaithla mêk tihah chuan a rawn nui chhuak ta hawk a.

"Eng nge?"

Ani lah chuan," Ngaithla phawt rawh," a lo ti leh mai a, zai ka ngaihthlâk zawh chuan," I nuih chhan chu?" ka han ti nghâl zat a, ani chuan," Kha hla i thlan chat chhan àwm chu ka hria e," a rawn ti a.

"A zai thiam êm a ni," ka tih chuan," Thiam tih chhan pawh a awm ang chu," a lo ti leh a, a kut chuan spring hi a nem pah reng bawk a, kei ve thung chuan," A aw a mawi a, a zai thiamin amah pawh hian a hla hi a duh ve viau a nih ka ring, a sa lungrun tlat alawm," ka ti leh a.

"I D hlui i ngai a nih kha."

Ka en vat a, min lo en hlek lo. Ka nui chhuak hak a, Zda ngaiah min lo ngai a nih àwm chu, ka ngai lo, ka ngai tawh teuh lo mai, hmuh leh pawh hi ka duh tawh lo zâwk asin.

"Ngai lo râp," ka ti phawt a, chutah," Thlalâk i nei țeuh àwm sia, ka'n en teh ang," tiin computer lam chu ka hawi leh ta a. Engtik laiin nge ka bul a rawn thlen phei hman pawh ka hre lo, a computer bul ațang chuan min pawm sawn ta nghâl a.

"A ngai lo."

Sofa chunga min nghah hnu chuan amah chuan computer chu a va shut down ta daih a, ka hrilh a hai ru khawp mai a, sawi mai tùr pawh ka hre lo.

"I en loh tùr thil a tam lutuk a," ka lam pana a rawn phei chuan a ti mai a, thuamhnaw mamawh lo,  kêng kûng video a dah țeuh a ni ngei ang chu, he pa tak hi chu aw, ka ensak àwm tawp si lo va, lo hmet chhuak pawh ni ila a hmet chhuaktu zâwk hi ka zah dâwn mahnâklaia.  

"Video țha lo pui pui en i hrât àwm hle mai," ner deuh sak chung chuan ka ti sap a, ani chuan," Ka en ngai lo," a lo ti leh mai a," Thlalâk pawh en i phal loh kha aw, bâkah, i en ngun phei chuan i hre bel tlul tawh ang a, hmuhnawm pawh i ti tawh nâng, delete vek rawh, thlalâk ka en theih loh phah mai mai," ka ti nang nang a.

"Chutiang ka en ngai lo."

Ka âwih lo lutuk chu ka nuih a za zâwk. Mipa hian an làwmin an en peih viau tih ka hre ve tho, ani phei hi chu amah chauhin a awm lehnghâl a, hmeichhe hriat lah a ngah si, amah a lo chhe lo bawk nèn, thlèmnaah a tlu lût fo ang.

Ka va ngaihtuah thui tak! 

Zda pawh a reh leh ta vang vang a, eng emaw châng zeuha a bike khalh ka hmuh pawh hian nula phurh a nei ngai lo, a hmaa mi nèn khân an ințhen leh tawh tihna em maw ni le? Hm, keia lo ngaihtuah tùr a awm lo êm mai, ngaihtuahawm a ni hleinem.

Zirtàwpni a ni a, Sêntei chu a nu dam țha lo, damdawi ina kalpui a ngaih avàngin a rawn kal thei lo va, nilêngin Famkimi titi chu kan ngaithla a, nuihna tùr lah a tam, Chhanzuala chhe lo a tihzia leh a star-zia chu zak lêm lo chuan a sawi chhuak hmiah hmiah a, Hruaia rawn lût chuan," Intithei takin a star hmel chhe deuh chanchin a lo hrilh lehpek che u a ni maw?" nui chung hian a ti a, Famkimi chuan," Sawi ve bawk ang chu, mahni duh zâwng tak chanchin sawi hi chu a nuam ve êm asin, nang pawh Ramzotlâng tleirãwl kha... Einch, a biang a la sen awp awp zui maw le, an inkreich lai ka hmu maithei a ni," tiin Hruaia chu a fiam lêt  ta zêk a, a nui hawk hawk zui a. Thu dik a ni ngei ang, Hruaia pawh chu a lo nui ve mai a, chutah," I chawngkawr mit kha chu aw..." a ti zui vawng vawng a, mi dang chu kan lo nui sûng hlawm a.

"Mitte hi hman țangkai a ngai alawm, men kuau ringawt tùr a ni lo, hmuhnawm en nân hian a țangkai lehzual, entîr nân, tute emaw inmuah lai ang te," Famkimi vêk chuan a ti leh kher a, Hruaia chuan," I hmang țangkai mah mah a ni, hmuh loh tùr tùr i hmuh phah lehnghâl a," a lo ti ve thung a, kei lah chuan," Kei pawh chhawr țangkai deuh dàn ngaihtuah a ngai a ni, hmuhnawm chu hmuh ve a châkawm e tiraw, Remlal?" tiin ka han mitmei zauh a, ani pawh chuan," Ni ngawt tak mai, mit lèn țha deuh ila kan hmu ve maithei a ni," a lo ti ve a. Hruaia tihngaihna hre lo chuan," Engati nge hmeichhia hi in țan rual khep ziah a?  In ninawm, ka la bànsan daih ang che u," nui hmel pu deuh si hian a ti leh ringawt a, chu a thil sawi chuan nuih a tiza zual a, kan nui tlâwrh tlãwrh a. Sêntei a awm ve lo tih pawh  ka lo theihnghilh țêp a ni.

Tlaia kan bâng chu pâwnah Zda a lo awm leh khar mai a, hmu lo ang tak chuan ka awm lui a, mi dang nèn țawngkaa kan inthlah hnu chuan hmanhmawh ru tak hian ka haw nghâl vat a; mahse, ka hnungah min rawn zui tho.

Rei fê kan kal hnuah chuan,"Biak lawk che ka duh a," ka rual chiaha rawn kal chuan a rawn ti a, ka chhâng lo, kei chuan biakna chhan tùr ka nei tawh lo va, ani pawh hian sawi tùr a nei tawh lo ang, a ti ve mai mai a ni.

"Sawi dun tùr a awm tawh lo," ka tih chuan," Rei lo tê chauh tak tak a ni ang," a lo ti leh a, kei chuan," Ti khân, kal pah khân sawi mai rawh, a rei dâwn loh phei chuan," ka ti leh a.

"Dinpui, khawngaih takin chance min pe leh rawh, nang tluka hriat chian leh zui rei ka nei lo va, nang tlyka duh leh hmangaih pawh ka nei lo tih ka hre chiang tawh a ni, kan inkâr hi khawngaihin, ngaihtuah țha leh teh," a ti dãt dãt a. Ka chhâng lo, ka chhànna a ngai reng dâwn tho, kei chuan inzawm leh hi ka duh tawh lo. Ka rilru en nân hmeichhe dang a kawp a, min en chhin fuh viau a ni.

"Kei chu ka rilru a ngai reng ang, ngaihtuah nawn leh chu tum tawh lo ting tang zâwk ang hmiang, kan inkâr kha eng mah lo mai a lo ni tih ka hre chhuak tawh bawk a ni, tuna kan awm ang hian awm ila a țha ber, chuan, i sawi zawh tawh chuan min rawn zui tawh suh," ka ti sap a, kan bul vêlah chuan  keimahni ang thoin mi veivâk an awm ve reng a, sawi rin ngam chi pawh a ni lo.

Sêntei in bul kan thlen chuan ka bânah min hmersak vutin Sêntei in luah veranda-ah chuan min kai lût a, meng phâwk zet hian ka en a, au erawh ka au chhuak lo, chutah, ka täl ta phat a," Min thlah rawh, ka au vak mai ang," thinrim sehchilh deuh nak chuan ka ti a, ka thinrim hlauthawng pah bawk si chu ka thinphu a ri dut dut mai lehnghâl.  

Ani chuan," Dinpui, engati nge hetianga i hel tlat a? Kha pa vàng kha em ni? Eng nge amahah khân i hmuh bîk? Kei chuan ka la duh reng che asin, hmâna i Zda kha ka la ni reng bawk," a ti dar dar a, ka kut chu nghet zeta a chelh tlat avàng chuan ka tãl nasa ve viau, han au vak erawh a mualphothlâk viau dâwnin ka hre si. A awm dàn hi ka hre thiam chiah tawh lo a ni, a ã deuh tawh a ni ngei ang, hlauh rúkna pawh ka nei ta deuh hial mai! 

"Dinpui, i lo pêng...Eng thil nge ni ta?!! Thlah vat rawh!" Kawngka rawn inhawngin Sêntei chu a rawn chhuak a lo ni a, rum zet hian Zda chu melhin ka kut lehlamah chuan a rawn vuan bawk a, chutia Sêntei'n a rawn tih tâkah chuan min thlah ve ta vat a, ka lãwm bawk si, Zda min tih dàn avànga hlauthãwng bawk si chuan ka lung a chhe deuh hial maiin ka hria, a hunah tak Sêntei a lo lang si a. Zda chuan min hmer na bawk a ni ang, ka bán rêk chu a sen tût mai.

"Engtin mah ka ti lo," tiin a kut chu a phar chhuak  nghâl a, chutah, a kal zui ta vut a, ka en zui lo, Sêntei rawn chhuak chu ka lãwm tak zet a ni, a in luah kawngkhàr lam kha ka lo thlêk hauh lo va, bâkah, a nu nèna chhuak kha an ni si a, an haw tawh ka la ring lo ve deuh bawk a ni.

"A chêt duh dàn chu, a va mak ve! Ka rin a ang lo tawp mai!" Sêntei chuan a ti sap sap a, ka bân rêk sen tát chu la kãngin min chùlsak hauh hauh a, hlauhthàwnna avànga la khùr deuh dar dar hian kei pawh chuan," A awm dàn kha ka hre thiam tawh bîk lo, a ã tawh a ni ang," ka ti ve sap sap a, ka thaw deuh hawk hawk a, ka thinphu rang deuh pawh kha tlêmin a zia ve deuh ta.

"D..?!!"

Chhanzuala lam chu kan hawi rual kher mai, ani erawh chuan keimah chauh chu min en ngar thung a," Eng thil nge? Thil thleng a awm em ni?" a ti leh a.

Nui lui sak chung hian," Awm lo ve, inah i awm a ni maw?" ka ti ve thung a, Zda chanchin a hriat chuan a thin a rim leh ringawt ang, keimah vànga buaina awm tùrin ka duh lo.

"Kha pa kha ka hmuin ka hria a," a rawn ti leh a, a kut chuan Zda kal liamna lam chu a kâwk bawk a, hmui pet zauhin Sêntei chu ka melh zoh a, a kut chu awmze nei tak hian ka hmersak pah bawk a, țawng chhuah tuma a âng zuau tawh pawh chu a tàwp chiang kher mai.

"Aw, Sênteite inah hian a lo lêng ni àwm tak a ni; mahse, a haw tawh a," tiin dâwt chiang tak chuan ka sawi ta ringawt a, thinlung chhûngril lamah erawh inthiam lohna ka nei leh zat tho.

"Lo pêng chho lawk teh," tiin a inher nghut a, a kal zui ta daih a, Sêntei nèn chuan kan inen a, a ngaihna a hriat loh hmel hê hû lutuk.

"Nakinah ka chho ang," ka ti phawt a, chutah," I nu chu engtin nge an lo tih?" tiin ka zâwt zui a, ani chuan," A țha, a zun kawngah hnai a lo awm ve deuh a, ngaihtuahawm a ni lo ve," a lo ti ve zat a, chutah," Han chho ve nghâl mai rawh, heta i awm khawtlai chuan a fuh lo ang, a mood a fuh loh hmel bawk si," a ti leh nghâl a.

"Nuțâ kan neih loh vàng hian min chhan ve a," nui sak chung chuan ka ti a, ani pawh chuan," A niang, tawi khawmuang lovin chho phawt teh, naktûkah i hman chuan rawn lèn i tum zâwk dâwn nia," a ti leh a, kei pawh chuan ka hnial lêm lo.

Chhanzuala ina ka luh veleh chuan," Eng vàngin nge dâwt min hrilh?" a lo ti nghut a, min hmachhawn zâwng tak chuan a lo ding ngur a, a hmui a chîp hmak a, khap lêk lovin min lo melh rùn bawk a, a mitmeng mawi tak chu a lang rum mah mah a ni.

"Engah chuan maw?" ka ti ve thung a, ani lah chuan," I bialpa hlui chu hum i la tum țâlh dâwn em ni? In rawn inzui pawh ka hmu vek che u, dâwt min hrilh a nia. Thu dik min hrilh duh loh chuan amah kha ka zâwt mai dâwn asin," a ti leh nghut nghut a.

"Engtin mah min ti lo-"

"A tâwk! Ka zâwt tawh lo ang che," tiin a inher nghut a, a thinchhiatzia leh luhlulzia ka hria, țawngkam vînin min la be lo mai pawh a, a thinrim laia mi dang a vin erawh ka hre fo, rei deuh tawh mah se a zaidam thut hi ka ring hauh lo.

"Inlamlêt tùrin min thlêm a nih kha; mahse, ka tum loh thu ka hrilh a, chuan, kut min thlâk lo a nia, tlêmin a ã deuh tawh niin ka hria," ka ti ta zung zung a, ka sawi thuai loh chuan a thinrimin mi sual tùr a zawng leh ringawt mai ang, a fuh lo.

"I bân rêk kha?"

Ka hnunglamah ka thukru ta vat a, engtik laiin nge a lo hmuh fuh ni?  Hmu tùrin ka duh hleinem, a sen nasa ve si a, hmuh a awl a ni ang.

"A hmer ringawt alawm."

 A ri dawp a, ka phu chiang lutuk ringawt. Ban lian zet chu a lo hnek dawt niin, a thinrim insehruh hnel chu hmuh a nuam lêm lo; mahse, min chhan vàng a ni tih ka hria a, ka hlau hran lo.

"A nâ em?" tiin ka pan hnai vat a, thisen êm chu a chhuak lo nain ana ve ngawt ang, ban chu a chang țha nasa mai si a.

Ka rin loh deuhin a rawn nui suk a, a biangsum lang kelh mah se a nuihzat vànga nui chu a ni hauh lo mai.

"Mi â tak ka ni," a ti chhuak sup a, a thil sawì awmzia ka hre niau lo ve, pan hnaiin a kut chu ka lâksak a, ka chùlsak a," Thisen a chhuak lo ve, atthlâk taka chét tum tawh suh aw," ka ti a,  ani chu a lo ngawi reng thung a. A chhûngrilah chuan thinrimna a inhnawh khâwm nasa ngawt ang chu.

Anger management issue tih ka rilruah a rawn lang vat.

Thil dang sawipuiin zàna chhuak lo tùr chuan ka ngèn zui bawk a, a bengrawngah a thun em tih erawh ka hre lo, hrilh erawh ka tih tùrah ka ngai hmiah thung.

Zànah pawh chuan ka be leh a, a chhuak em tih hriat ka duh vàng a ni a, a chhuah chuan buaina eng emaw

a chhuah ka hlauh vàng a ni; mahse, a țhianpa Sam-a nèn an awm dùn ni àwm tak a ni, a bula a țhiante an awm chuan a pawi lo ve, ka ngaihtuah lo deuh hlek.

A tûkah chuan Sêntei nu chanchi hre chiang tùr leh kan tùr chuan ka kal leh ta a, a lo zia viau mai a, chawhnu lamah an khuaa haw thlâk a lo tum nghe nghe a. A nulain a zia viau mai, a làwmawm tak zet e.

Chhanzuala hmuh ka duh hrim hrim vàng chuan ka han chho leh rih a, kawngkachu chhûnglama a inkalh avàng chuan a awm tih hriain ka nui sak a, tûn ang hunahte inah a awm ve a nia, a ti țha hle mai, a piang thar ve ta a ni ngei ang chu. Nimina ka thil hrilh khân awmzia a nei țan nghâl a ni mai lo maw?

Doorbell ka han hmet a, ka han nghâk deuh vang vang a, a muhìl lai ka tihbuai loh hrâm ka beisei; mahse, tún ang hunah chuan a mu tawh bîk nâng, chawhnu a ni tawh dâwn alawm.

A rawn hawng ta ngei a, nui sâng hian ka lo en a; mahse, ka nui hmel chu a reh riai riai ang chu, a hmai vûng bûr, duk sen deuh char leh a mit bui chûk ațang chuan eng thil nge a hmachhawn tih chu zawh ngai lovin a lang nghâl vek mai.

"Eng thil...in insual lehpek elo?!!"

*MI HMUH DÀN LEH NGAIH DÀN CHE KHA NGAIHTUAH LOVIN NANGMAH KHA INDUH TÂWK THIAM LA, INHMANGAIH VIAU RAWH*