☆UNEXPECTEDLY YOU☆ - 7 By Dingdi Pachuau

 ☆UNEXPECTEDLY YOU☆ - 7 By Dingdi Pachuau

Min chhâng lo chuan kawngkhàr chu ka luh theihna tùrin a hawng zau deuh a, ka lût ta vat a, ka luh hnu chuan a khãr zui leh nghâl zat a.

Kan inhmachhawn ta ràn a. A meng bui deuh chûk chuan ka nuih chu a tiza viau a, ka khawngaih deuh tho bawk nèn, ka thin a tirim pah bawk a, țawng lo chuan ka en reng phawt a, ani pawh chuan țawng lova min en reng chu nuam a ti zâwk a niang chu, țawng tum àwmin a awm lo.

"Ka rilru tihrehawm țhìn lo teh, naupang pawh i nih tawh loh hi, hetiang hi ka hlauh vàng a nia nizàn pawh khân ka rawn biak che ni, i lo chhuak leh hman tho a," amah dem deuh si, demna tilang lo thei ang ber tùr chuan ka ti a, a biang ki deuh lai phei chu a kak hlek a, thisen pawh a chhuak hlekin ka ring.

"Cho leh cho kan insual ve a ni mai," tiin min kal pèl a, dawhkàn chunga tui bottle chu banin a chhìn chu a hawng nghâl zat a, kei chuan pan hnai phei lehin,"Ka chunga i thinrim chuan sawi chiang mai la, mi dang chunga țuan lovin," ka ti chang fak a, a ngawih reng avàng chuan sawi zawm lehin," Insual hi a țha lo asin, tikhân, nang pawhin nâ i tawrh phah a, hlêp a chhe êm mai," ka ti leh a.

"Min chotute ka tlànchhiatsan dâwn tihna em ni?"

Ka en chho a, ani erawh chuan tui chu a in khawlh khawlh a, a in zawh hnu chuan," A theih hrâm chuan buaina hi pumpelh tum a țha. A hnuleh a awm lo ber, insual hian rah țha a chhuah ngai lo va, buaina leh mualphona a thlen zâwk țhin," ka ti leh a.

"Mipa leh hmeichhia kan inang lo."

Ka hria, hmeichhia leh mipa chu inang tùra duan kan ni lo hrim hrim. Ani phei hi chu inti-pà ve ngawih ngawih chi a nih bâkah a luhlulna hian a tlàwmtîr thei lo tawp ang, amah chotute phei chu, an tlàwm țhak thlengin a sual duh ngei ang.

A tih dàn ang chiah chuan dawhkàn chunga tui bottle a dah chu ka han ban a, ka in ve nghâl zat bawk a, min lo en kur ringawt.

"Tute nèn nge in insual a?" ka han ti leh a, min hrilh duh ka ring chuang miah lo. Ka rin ang ngei chuan," I hre chuang lo ang," a lo ti mai a, chutah," In tùr i duh em?" a ti zui zat a, amah chuan fridge chu hawng zuiin beer a rawn la chhuak nghâl a.

"Chhùn thingpui in a hun tawh, khatiang in lo khân thil dang in zâwk ila?" ka tih chuan," Coffee i duh em ni?" a ti zui leh zat a, beer chu kheuh hawngin a in zui ta nghâl a, chutah," Eng mah pawh ka la ei bîk chuang lo, coffee chu aw?" tiin min rawn en a, kei chuan," Ka lo insiam mai ang, lo țhu rawh, i hmêl te kha, a nat hmèl si, hmuh i nuam lo," ka ti duah a, a lo nui hawk a, ka melh ralh ringawt, chhuara a dah coffee no chu ka ban ta nghâl a.

Coffee ka in a, aniin beer. A hmel duk sen deuh leh mit bui deuh lâk chu ka en țhin, hetianga awm reng tùr hi chu a ni tawh bîk lo asin, mahni inenkawl ve thei tawh, buaina pawh hre thiama tlànchhiatsan rual a ni ve tawh, heti hrim chuan a nunkhua a nuam àwm lo êm mai.

"A na sup sup em?"

Min rawn en zawk pah chuan," Mipa ka ni alawm," a lo ti mai a, kei chuan," Mipa pawhin nâ in hre ve tho ang chu, thîra siam in ni bîk lo va," ka ti ve thung a, bûk nghat pah chuan," Dik chiah," te chu a lo ti lawi a, nâ a ti ve a ni chiang mai.

Dâr 4 vêl thleng chu ka awm ve, a rem ti lo chung chuan ei tùr siamsakin ei ngei ngei tùrin ka hrilh a, tunah chuan a la hma êm mai a, a la ei peih lo ang. Ka haw dâwn chuan ka tei tùr siamsak chu a ei dâwnah tilum leh vek tùrin ka chah mawlh mawlh bawk a, ani pawh chuan țha tak chuan min thlah ve bawk a.

Zanriah ei kham chuan phone chu la chhuakin Sêntei chu a nu chanchin chu ka zâwt leh ta a," Rawn phone che ka tum lai tak a nia, a mak hle mai," a rawn ti phawt a, a nu thlen tluan thu min rawn hrilh chuan," A làwmawm hle mai, dam țha chho zël rawh se, i tân pawh ngaihtuah a na duh dâwn êm mai," ka ti a.

"Nia, damdawite kha a han ei chho ang a, a zia mai ang. Ngawi teh, chanchin thar kha i hre tawh em?" a rawn ti zat a, kei chuan," Eng chanchin thar maw?" ka lo ti ve thung a," I la hre lo a ni ngei ang chu? Video ka rawn thawn ang che," a ti a, vawiin lamah WhatsApp ka la en lo hrim hrim a, chanchin thar a tih pawh ka la hre hman lo a ni ngei ang.

"Eng lam nge a?" ka tih leh chuan," En phawt la?" a ti deuh tlat a, kan inbe tàwp chu a ni mai. WhatsApp lama video min rawn thawn chu ka han en chhin a, net a muan deuh avàng chuan download chhûng a la rei zêk zui a, net muang lutuk țhìn hi chu a ninawm ve tâwk a ni.

Tlangvâl insual an lo ni a. Sêntei mai mai chuh, hetiangte min lo thawn rêng rêng, film-a insual mai mai hi chu engah mah ka ngai bîk lo; mahse, a tak tak a ni tih hriat ngei hi chu ka en duh lêm lo asin. A thim khep khup bawk si, en a hrehawm, insual lai a la ni zui a, ka hriat zâwng mi an ni lo hlauh chu a tihzia khawp e, nuam ti lo zet chuan ka en zêl a; mahse, second 45-naa insual buai zînga Chhanzuala hmêl lo lang chuan min tiphu chiang kher mai, ka meng bial kâwk kâwkin ka ring, a hnekpa lah chu a hnâr a thî nasa viau lehnghâl a.

An bengchheng hlawm viau lehnghâl a, țawng ri bâkah thinrim rãk ri a inpawlh nuai bawk si," Min la cho em?" Chhanzuala aw ngeiin a tih ri chu a hriat chian theih viau a, mi dang dang țawng pawh a hriat theih ve ruai ruai tho a; mahse, an sawi tak erawh hriat a har khawp mai, 'Lo inthiar fihlîm rawh', 'Mi sualpa','Hnek leh rawh', 'Ka cho reng che', ' Lo inrawlh suh' tih leh 'Duhtáwk r'u ' tih angreng chu a hriat leh theih bawk a, a dang chu a hriat chian theih loh, a ri deuh nawk nawk a ni mai . Nizàn khân hêngho nèn hian an lo insual a nih chiah hi, khawiah nge an insual ni? Tute nge? Eng vanga Chhanzuala chu cho tak ni hlawm ang maw? An ruih vàng a ni thei ang em? Mahse, Chhanzuala hmel kha rui hmel a pu hran lo, a țawng pawh kha a pângngai viau si kha.

Sêntei chu va phone leh vatin," Khawi ațanga i neih nge a?" tia ka zawh chuan ani chuan," Fb lama ka hmuh a nih kha, WhatsApp news group lamah pawh a tam tawh mai, in chungpa a ni tiraw?" a rawn ti a. Kei chuan,"Nih àwm hi," ti ringawtin ka chhâng a, engtia chu video chu darh nge a nih ang? Chhanzuala hmel lah chu a lang chiang nasa mai si a, mi dang pawh lang chu an awm ve tho nain Chhanzuala hmel ang êma lang chiang an awm ve lo.

WhatsApp news group chu ka han en thuak thuak a, Rahsi vêng thlànmual  lamah zànah insual an lo hrât viau a ni àwm e, chutiang thil thleng țhìn chu Mama Jongte intiin a duh lohna thu leh YMA hotute emaw thuneitu sâng zâwk lamte'n en fiah se tih a duh thu chu Fb  lamah ziakin video nèn chuan a post a lo ni a, video chu khawi ațanga a neih nge ni ta ang? Nizàna kalte ațangin a ni ngei ang chu. Nizàna mi a ni lo thei lo, a hmaa Zda nèn an insual deuh kha chu a rei leh deuh tawh a, khami zan pawh khân mi dang chu a sual leh ngei mai a; mahse, kha daih daih kha chu a ni thei lo ang, tuna video hi chu nizàna mi a ni ngei ang, a va zahthlâk haih haih tak êm! Phone khawih tawh phawt chuan an hmu vek àwm si a.

Chhanzuala chu ka va phone leh ta ringawt a, a la chhâng thei lo zui a, a in-ring char char ringawt, a ring tàwp hnuah chuan ka han tinawn leh sak a, a la chhâng thei chuang lo. He pa hi, a chhuak lehpek em maw ni le? Insualpui tùr a zawng leh tawh em ni ang? Rilru a va tihah thei tak! Ka va kalchilh tawp mai dâwn em ni ang? Mahse, chu êm chu țhain ka hre meuh si lo.

Dâr 8 pelhah ka va phone leh a, min rawn chhâng ve ta țâwk e.

"Khawiah nge i kal a? Ka phone i chhâng thei bawk si lo," ka han ti tâwng a, ani chuan," Khawiah mah ka kal lo," a rawn ti thung a. Video-a an insual lai ka hmuh avàng leh nichîna ka phone a chhàn theih loh avàng chuan ka thin a rim deuh hlar ringawt a, han hauh nghâl táwng erawh chu niin ka hre meuh si lo," Ka thil siamsak che kha i ei tawh em?" ka han ti leh ringawt a, ani lah chuan," Ei lo, ka ril a la țâm lo va," a lo ti leh mai bawk a.

"Ei rawh, ril țâm lo tih ngawt loh tùr, i pum a ngaihtuahawm," ka ti a, zat loh hmel tak hian a rawn nui a," Inlêng duhawm tak tak ka nei a, an haw deuh chiah, ei nân hun ka la nei thei lo a ni," a rawn ti deuh duah a.

Tute tak ni ang maw? 'An' tih a hmang a, pakhat chauh chu a ni lo phawt mai a, chutah, 'Duhawm tak tak' a ti leh a, nula inlêng a nei chiang mai, nulain an lènchilh tihna a nih chu, beer an inho phei chuan a ril a ţâm lo ang a, ka thil siam pawh kha a ei peih leh miah lo ang.

"Ei ngei ngei rawh, tûnah khân chhuang lum nghe nghe teh, ei tùr hi kan nunna hnâr, chakna kan neihna bul a ni a, a hun takah mumal takin kan ei țhin tùr a ni, ei châk loh vàngin nghei ringawt loh tùr," tia ka hrilh dap dap chuan," Okay, ka inhlàn fel fai fihlîm thlap," a rawn ti a, a thil rawn sawi dàn chuan ka nuih a tizâ a, ri lo chuan ka nui leh rih a.

"Ei la, i ei zawhah mu nghâl rawh aw. Chuan, zànah chuan chhuak tawh lo hrâm ang che, ka ngaihtuah țhìn teh che a nia," tiin ka chah leh malh malh a, a ngawi vung vung phawt a, chutah," Aw le, ka chhuak lo ang," a rawn ti ta a, chu chuan tlêm chuan ka rilru a tinuam deuh hlek.

Mihring nia dam reng leh țhiante nei ve nafam chuan thil thleng leh mi titite kan lo hre lo thei bîk lo va, Chhanzuala inah kan vêng YMA hruaitute lêngin an zilh ni àwm tak a ni, amah chuan eng mah a sawi loh bâkah kei pawhin ka zâwt chuang lo. An insual lai video kha a darh chak êm êm mai si a, Famkimi sawi dàn hmangah chuan kha video kha khami zàna Chhanzuala insualpui țhiante zînga pakhatin a lo record a ni a, status-ah a lo hmang pek a, chu chu mi dang dangin an lo hmu lo thei bîk si lo va, a darh ta chiam ni àwm a ni. Hmuaka chhûngte hi mi awmthei leh khawtlâng lamah pawh inhmang tak niin, a pa pawh an section-ah President hial a ni àwm e, hetia an fapa thisen hial chhuah a ni hi a hre thiam lo hle a, FIR lam pawh a sawi ri hial niin an sawi. Mipui mimir chuan an insual chhanah Chhanzuala an thiam lo deuh vek niin a hriat a, Famkimi erawh chuan ka hmel hriat tih a hriat vàng nge ni,"Hmuaka thiam loh pawh a ni tho ang, a pa hian a duat sual vek tawh a, engkimah a buaipui ka ti mai, a țha vak bîk tlat lo. YMA OB ațang lah hian a tla thei miah lo lehnghâl a, tla vawng vawng tawh se ka ti asin," a ti barh barh a, chutiang lam hlîr chu a sawi a, an insual chhan ber a rawn sawi chuan ka beng a verh ta zar mai. A bulpui berah chuan hmeichhe pakhat chungchâng vàng a ni àwm e, mi sawi a hriat dànin. Hmuaka țhianpa bialnu chu Chhanzuala hian engtin emaw a lo chhaihin a bialpa angin a lo insawi ni àwm tak a ni a, chu chu Hmuaka țhianpa thinrim chuan a țhiante sâwmin, Chhanzuala ko chhuakin a bialnu laka lo inrawlh lo tùr leh inthiar fihlim tùrin a hrilh a. Chhanzuala thinrim chuan Hmuaka țhianpa chu hnek a tum a, chu chu Hmuaka'n chelh beh a lo tum thung a, chu tak chu Chhanzuala chuan a lo hnek ta hrep ni àwmin an sawi.

Chu chu thu dik a nih chuan kan Chhanzuala chuan thiam lohna a nei ngei mai, a luhlulzia ka hria, mi bialnu duhlai êm va ngaihzàwnsak chu a tih duh ka ring hran lo; mahse, chu chu thil awm dàn niin an sawi bawk si, âwih loh ngawt thu va awm bîk suh, pân lovah tho a fu lo ang. Chhanzuala hi zâwt ta ila min hrilh duh ang em? A thinchhe lutuk leh luhlul lutuk hi a pawi ta ber a ni, Hmuaka pain FIR a theh lût a niha thiam loh a chan phei chuan jail-ah a tâng daih mai dâwn asin.

Dàwrah an sawi a, hmun dangah kal ila an sawi leh bawk a, WhatsApp, Fb leh hmun hrang hrangah video lah chu hmuh theihin a awm lehnghâl si a, comments hrang hrang chhiar phei chuan rilru a tihrehawm, news pawh ka chhiar peih loh phah hial a ni. Chhanzuala pawhin a hmu ve ngei ang chu maw, eng angin nge a ngaih ang le? A thil tih țha lo tak hian nghawng a nei thui viau ang em?

"D'pui...?"

A hmel chu ka en a, an insualna avànga a hmai duk leh mit bui deuh pawh kha tunah chuan a reh ta viau mai, a chhuak lo teh tlat a ni ngei ang chu, miin a chanchin an sawi nasa si a, chhuah tam loh pawh a pawi lo.

In chhûnga kan luh hnu chuan," Țhu rawh, in tùr ka lo lâk ang che," tiin fridge lam chu a pan zui nghâl a, kei chuan thu zêp țît țêt duh lo chuan," Hmân zàna in insual chhan tak kha eng nge ni kha?" tiin ka zâwt nghâl hmiah a,  hetia zawh dawt mai hi a țha, pehhêl kual vêl chu hun a uiawm mai mai.

"Beer aw?" Rawn chhawp mah se ka in chuang lo ang.

"Tui ka lo in zâwk ang."

Tui bottle leh beer a rawn keng phei a, ka piah deuha dawhkàn sâng deuh ar chungah chuan dahin kan țhutna tùr Stool sâng er awr a rawn la chhuak bawk a.

"Mi sawi hi a dik em? In insual chhan kha hmeichhe pakhat vàng niin an sawi a," ka tih chuan," Aw, dik," a lo ti mai a, a chhànna chuan zawhna petu pawh min tilai țêp a ni.

"I tân chuan a pawimawh àwm hle mai," ka ti leh a, lu bu zauhin beer chu a kheuh hawng zui ta nghâl a. Ka la duh tâwk dâwn lo, ka hre zêl duh.

"Umm..." Min chhànna hi a táwi ve thei bawk sia maw, ani hian sawi țha duh se chuan engkim a hmuin a tawng vek a, insuala ber pawh a la ni zui a, a hre chiang ber ang chu.

"An cho che ni àwm khân i sawi a tiraw? Chu chu an rawn hrilh che em ni?"

Beer chu a'n in khalh phawt a," Phone ațangin, eng atân nge thil kal tawh min zawh chiam a?" a rawn ti a, kei chuan," In insual lai video kha ka lo hmu ve a," ka lo ti ve thung a, a ner ta sak mai.

"Min cho a, min chona ka pawm a, kan insual a, thil dang a awm lo, mipa leh mipa kan insual a ni mai," a ti leh a, beer chu tui tih hmel tak hian a'n in leh khalh khalh a.

"I bialnu chu mi bialnu a nih loh hrâm ka beisei a nia," ka ti leh a, min en lo chuan dawhkàn chu a melh ngur mai a, min chhàn tum hmel pawh a pu lo.

Zanriah ei laiin ka pa chuan," Chhanzualate insual lai video kha i en ve tawh em?" tiin min zâwt a, kei chuan," Aw..." ka lo ti ban chat a, ka nu chuan," A zahthlâk ngawt mai, a mualphothlâk bawk si! Nu leh pa kár lova sei lian hi chu an ngaihtuahawm duh viau réng a ni," a lo ti ve a.

A thu sawi chu dik ka tih ve tho avàng chuan ka țawng ve duh lo, ka pa vêk chuan," A nuin a'n boralsan a, a pa lahin nupui dang a nei tawh lehnghal a, hetiang tuar chhuakte hi chu an fel viau a nih loh chuan an sual viau duh a nia, kàwm vak tawh suh ang che, kan ina ngampattîr hi ka duh hran miah lo a nia," a ti leh bawrh bawrh a.

"A sual hran lo, chhan țha tak vàngin an insual a ni ngei ang," rilrua an insual chhan ngaihtuah chung leh Chhanzuala thlavàng hauh ru deuh pah chuan ka lo ti a, ka nu zâwk chuan," A naupan lai pawh khân a sual hrim hrim alawm, mi ťha tùr chu a ni lo alawm, kan ina lêngah paeh sâwm sàwm loh tùr, mi min en dàn tùr hi ngaihtuah a ngai, nang pawgin kàwm ngeih lytuk tawh suh, pasal țha takte hi i neih theih loh phah ang e, ka remti hauh lo a nia," a ti leh bawrh barh a.

*INLAICHINNA HI LEHKHABU ANG MAI HI A NI A, A CHHÛNG THU ZIAH NÂN HUN REI TAK HMAN NGAI MAH SE, HUN REI LO TÊ CHHÛNGIN A KÀNG RAL VEK THEI*