☆UNEXPECTEDLY YOU☆ - 8 By Dingdi Pachuau

 ☆UNEXPECTEDLY YOU☆ - 8 By Dingdi Pachuau

Ka sawi zawm tawh lo. An ngaih dàn hi nu leh pa tam tak ngaih dàn tùr a ni tawh dâwn a, ka hre thiam reng mai, a țha lama lãr ni hek lo le, insual avànga lãr chu mi țhaa ngaih theih ni hek lo le. Ka hriat chian mi tak ni lo se kei pawh hian an ngaih dàn khân ka ngai ve tho ang, ka nu sawi pawh kha a dik chiah. A têt ve deuh lai pawh khân naupang awm chet chet chi kha a ni lo hrim hrim a, pawi lutuk ni si lova han chêt zeuh kha a chîng tlat a ni.

Zàna a chhuah leh ka hlauhpui tawh êm avàng chuan ka va be leh a; mahse, a lo chhuak bîk lo a ni àwm e, a sawi dàn chuan; mahse, ka ringhlel deuh hlek a, ka va video-call leh ta zâwk a, inah chuan a lo awm ve ngei mai, dâwt a sawi loh avàng chuan ka inthiam lo deuh hlek a.

"Min ring tawh em?" a rawn tih chuan," Ka rin loh vàng che pawh a ni chuang lo, i ngaihawm ve a," tiin dâwt âwihawm loh zet chu ka han sawi leh ta ringawt a, a rawn nui huk nghe nghe, ka thu sawi chu a âwih lo ve ngang a ni ngei ang.

Chhanzuala'n  a fapa hnâr a hnek thìsak avàng khân Hmuaka pa chu a lungawi thei ngang lo a ni ngei ang chu, Chhanzuala pawh a buai ta zak zak mai a. Hrehawm ka lo tihpuiin ani, chhûngte pakhat mah pun tùr nei ve bawk si lo chu ka lo khawngaih lo thei lo a ni. Chhanzuala lah chuan engah mah ngai lo zet hian," Thu dik lo sawiin an zualko mai mai a nih hi," a ti mai a, thu dik ka zawh lah chuan," Nakinah i hre mai ang," a ti a, min hrilh duh dèr lo, a hahthlâk a nia.

An buai laih laih reng a; mahse, Chhanzuala boruak chu a ngai reng thung. Chhanzuala chuan thiam inti viau mah se țanpuitu nei ve hek lo le, Hmuaka thisen a chhuah avànga ngaihdam dîl tùr leh a sawisak avànga zângnadawm nân pawisa chawi tùrin an phût ta tlat mai, chu zet chuan Chhanzuala chu a thin a tirim tak zet a ni, kei lah chuan buai thui ka hlauhpui avàng leh laina hnai tak, amah țanpuitu tùr a neih ve loh avàng chuan," Buai buai ai chuan ngaihdam dîl mai chu a țha zâwk mai lo'ng maw? Pawisa kha chu ka chawipui mai che ang a," tiin, a nêm zâwng chuan ka thlêm chhin a, rum zetin min melh ta khui mai.

"Engah nge ngaihdam ka dìl ang? Kei hian ngaihdam ka dîl ang maw? Ka thiam loh a ni lo, ka thiam loh hmasak chu ni se an sawi hma khân an lakah ka tlâwm daih tawh ang, he thil hi ka cho chhuah lah a ni lo va, min khawih hmasatu, kut min thlâk hmasatu pawh anmahni an ni, thiam loh ka chan theihna tùrin an țang rual a ni," a ti a, chhuat dungah chuan a vei tawn nghut nghut a, q thinrim si a, han biak leh pawh chu huphurhawm țeu țeu tak a ni.

"Thu dik sawi pawh ni la, thuhretu i nei ve si lo alawm," inti-huai luia ka tih leh chuan," A pawi lo, thu dik ka sawi chuan a tâwk! Ngaihdam dìl leh pawisa chawi kha chu sawi chhuak tawh miah suh, ka sual viau a ni maithei; mahse, dâwt sawi hi chu ka chîng lo a nia," a ti leh nghut nghut a, a vei tawn thuak thuak bawk si a, a thinrim hmèl leh mitmeng chu hmuh a nuam lo ve khawp a ni.

An buai buaiin han buai chho phawt teh se, pakhat lah hian thu dik tak a zîktluakin min hrilh duh bawk si lo, nakinah a fel ve duak mai ang chu maw. A hrehawm êm mai, nau anga ka lo en a nih vàng leh chhûngte a neih loh avàng chuan ka ngaihtuah lo thei bîk si lo, ka nute lah chuan chanchin chu hre vein chaw ei laiin min zilh phah ziah lehnghâl.

An buai chhoh mawp mawp ka rin tehlul nèn, kâr khat hnuah chuan an ințha țhen tawp mai! A chhan ka hre lo, Hmuaka pa chuan an thubuai theh luh chu a hnûk kîr leh niin an sawi, eng vàng tak chu ni ang maw? Sêntei pawh chuan an chanchin chu ka hriat chian tâkin tiin min zâwt ru ve a; mahse, ka hre thui bîk lo, thu dik tia Chhanzuala sawi kha an pawm ta a niang ka ti ta ringawt.

Mahse, a lo ni bîk lo. Chhanzuala hmel hriat ngai pawh ni lo hian an insual lai chu mit ngeiin a lo hmu a ni chêk ang chu, phone-in a lo capture vek bawk si a, evidence a nei țha ta si nèn, chutah chiah chuan Hmuakate lam thu sawi dik tâwk lo chu an hriat chhuah phah ta a ni. Chhanzuala chu ka lawmpui viau rualin hetiang thilah hian inhnamhnawih tawh lo se, buainaa insawi fiah ngaiin awm tawh miah lo se ka ti tak zet a ni. Bâkah, thu dik hriat chhuah a nih tâk avàng khân Hmuaka pa chu a lungawi nghâl mai ang tih a rinawm loh, a thin a rim belh sauh thei bawk, chu vàng chuan Chhanzuala chu a fîmkhur sauh a ngai ngei ang.

Sêntei inah ka pêng haw a, a remchàn êm avàng chuan Chhanzuala inah ka chho leh rih a, ani pawh a lo awm ve khuau a, tunah chuan a buainain a kalsan rih ta bawk a, a hna lam a buaipui leh thei tawh dâwn a, a zia viau mai. Ţha takin awm se, buaina tel lovin hna thawk se tih ka duhpui a, chotu awm tawh lo se tih hi ka duhthusàm a ni. Chona a hmachhawn leh a nih chuan mualpho ber kha a ni leh dâwn si a.

"Zanin chu hetah chaw ei ve la?" a ti ve teh tlat a! A kawm theihzia ngaihtuah chuan a ka ațanga chaw ei ve tùra sàwmna ka han hria chu lung a tichhe lek lek thei hial mai ka ti.

"Chaw ka heh asin, ka ei da vek mai ang che," nui chunga ka tih chuan," A pawi lo, nanga ei khawp zawng a tam dâwn lo tih ka hria alawm," a lo ti leh mai a, ka hnialsak duh lo, min sàwm vawi khatna a ni nghe nghe ang chu, ei țeuh ang, min sàwm duh tawh loh tákah.

Ka nute ka hrilh a, Sêntei ina chaw ei tùr angin ka insawi tawp thung, chu pawh Chhanzuala hriat loh laiin a nia, a hriat chuan kan chhûngkaw boruak awm dàn a hre thiam palh ang. 

Rawng bàwl lai chuan," Inbual la?" a ti a, kei chuan," Inthlâkna tùr ka nei hleinem, ka haw hunah a ni mai," ka lo ti thung a, ani lah chuan," Wardrobe-ah a awm țeuh ang, underwear pawh," a ti leh a, phâwk zet hian ka en phei a, min rawn en lo chuan," Mak tih vak a ngai lo, a thar diai vek alawm," a lo ti leh a, he pa hi, a bialnutehovin an riahchilh țhìn tihna em ni? Mipa mahni chauha awmin hmeichhe underwear thar diai mai kawl ringawt thu a awm lo.

Ka inbual duh ta chuang lo nain ka insil ve tho a, ka insil chhan pawh a room-ah ka lût chhin châk rêng rêng bawk a ni. A zau nuamin a thawveng hle a, in chung ber tih takah a boruak a nuam a, a êng nuam bawk. A fel fai thlarh lo va, khumah pawh rizai thleh lohin a lo awm bawk, mipa tam tak room ang tho a nih ka ring. A thuamhnaw erawh a zam nuai lo va, wardrobe lian tak awmin ka han hawng chhin a, thuamhnaw chi hrang hrang a lo inkhai dul a, a hmuhnawm ka ti, ka en deuh reng a, chumi hnua a pheikhawk dahna ka han en leh chhin chu ka rin ai chuan a lo fel fai tlat mai.

A mutpuan leh parda rawng inang  chuan ka mit a la viau a, tu thlansak tak ni ang maw ka ti a ni. Hmuh a nuam a, khua a lum chho tawh bawk nèn, a lang dài raih mai. Dârthlalang lian zeta ka thla lo lang chu ka han inen a, hetiang dârthlalang bulah hi chuan inchei a nuam duh ngawt ang chu, Famkimi ka ngaihtuah chhuak zawk, ani phei chuan nuam a ti zual ngawt ang.

"I țha maw?"

Min tiphu zawk mai. Ka inher vat a, a room-a ka lo awm rei lutuk chu ka inthiam lo ru viau, dârthlalangah ka lo la inen reng zui a.

"I room chu a nuam khawp mai, a thawveng bawk a," zahzèlah chuan ka ti daih a, ani chuan," A làwmawm nasa a nih chu, i hman tawh chuan ka thil siam saw lo en chhin la ka ti a," a ti a, a room ațang chuan kan inzui chhuak ta nghâl a.

Chawhmeh a siam chu ka enpui a, chêtpui ve ka tum chuan a phal hauh lo," Min siamsak ziah a, ka siam ngei ei ve la ka duh alawm," a ti tlat a, țhu chungin ka lo vil a, a hnu deuhah chuan," Zai ngaithla pah ang?" ka ti a, a woofer-ah chuan ka phone-a zai chu ka va play a, hla hlui lam ka hrût a, ka zàwm pah rât rât a.

Thil hre chhuak thutin amah chu ka han thlêk zawk a, min rawn en lo tih hriain hmanhmawh tak chuan a computer-a thlalâk chu en ka tum a, chutih lai tak chuan," Ka phalna tel lovin ka computer check suh," a rawn ti a, ka phu leh zawk mai! Ka en vat a, a rawn hawi chuang miah lo, engtin nge ka check dáwn tih a hriat ni?

"Thlalâk ka en duh alawm," ka tih chuan," Nakinah," a ti tlat a, mi phal lo chung han ensak țâlh pawh chu a fuh chiah lo, ka tho leh ta țaih țaih a.

Zanriah tui tak a ni. Ka ei puar viau mai a, ani erawh chuan a ei tlêm hle thung," Ka ei ngai mang lo, i bulah ka ei a, ka ei tam zâwk a nih kha," a la ti zui a, kei ka ei tam teh rêng nèn.

U Kimi pawhin U Tluanga chu a la rawn chhuahsan thei rih lo, a la dam țha zîktluak thei rih si lo va, a dam fel var hun a nghâk miau mai si a ni. Ka u mah ni se nupa an ni tawh a, an inkára lo inrawlha chhuahsan tùra lo tur ve sek chu ka tum lo, a neitu berin hun a tih hunah chiah a rawn chhuahsan mai ang. U Tluanga a inhmu chhuaka a nupui laka a awm dàn a sim phahna a nih hlauh phei chuan, tuna a damlohna hi malsàwmnaah a chang ve thei tlat, chang hlauh se ka ti tak zet a ni, chu tluka hlû chu a awm thei lo ang, inneih tawh hnua ințhen leh hi chu thil țha ber a ni si lo va.

Dàwr nghahnaa Famkimi titina ațangin Hmuaka leh Zdate inkawm țhin thu ka hre chhuak ta tlat mai, chîk tak chuan ka zâwt duh lo va, khami zàn, an insual zàn pawh khân a hmain Zdate nèn an an inkàwmho reng a, an insualnaah erawh kha chuan Zda a awm ve tawh lo ni àwmin a sawi, engtin nge a lo hriat pek ni? Thil hi a hre thei ngawt mai.

Chuti a nih chuan, ka ngaihtuah chhuak thiam ta chiah e. Hmuakate khân chhan neiin Chhanzuala kha an lo cho a ni chiang mai, khami tlai khân Zda'n min biak duh chhuanlamin Sentei in bul thleng min zui a, Chhanzuala pawhin a lo hmuh nghe nghe kha, a thinrim zui a, chuan, zànah an insual ta a...

Hmuakate kha Zda fuihpawrh an ni ngei ang, fuihpawrh han ti ila inkàwm an nih chuan an lungawi lohpui tihna a ni ber ang chu. Keiin a lam ka hawi duh tawh si lo va, kan chanchin a ţhiante bulah sawiin anni'n Chhanzuala chu kan inkâra inrawlh lo tùrin an hrilh ang a( ka bialpa angin awm miau hek le)an cho zui a ni ngei ang. Chhanzuala'n an cho avànga insual an nih thu a sawi ziah kha, chutiang chu a ni ngei ang.

Sêntei chuan," I va ngaihtuah mûk ve!!" tiin ka hnungah chuan a rawn bêng thak a, harh chhuak zawkin," Thil ka lo ngaihtuah kual mai mai a," ka ti a, ka beng bulah chuan,"Pâwn lam saw en chhin teh," a rawn ti sap a, hre thiam lo deuh chuan amah chu ka en zui a, ani erawh chuan pâwn lam chu a melh ralh a, hawi ve vatin Zda lo ding reng chu ka hmu ta nghâl a, ani erawh chu rawn hawi reng mah se min hmu thei chuang lo ang.

Eng thil nge maw a nghah ni? Min nghah loh hrâm ka beisei, a bulah sawi tùr ka nei lo, ni leh lo, min be duh a nih chuan kei pawhin ka be ngei ang, zawh tùr ka nei alawm.

Min lo nghâk tak tak a! Kan bâng, pâwna kan chhuah chuan haider theih rual loha ring chuan min lo ko a, Famkimi rawn kal loh ni a ni chu ka lãwm tak zet a ni, a țawng duh si. 

Sêntei nèn chuan kan kal tlâng a, ani pawh kan bulah a rawn kal ve nghâl zat a, biak pawh ka tum hran lo nain amah zâwk chuan,"Dinpui, biak che ka va duh êm!" a ti sap a, min biak avàng chuan din ka tum chuang lo.

"Hei, min biak reng hi, kei pawhin ka be duh che alawm," tiin a lam chu ka hawi sauh sauh a,"Hmuakate kha Chhanzuala cho tùrin i fuih a ni tiraw?" ka ti ve ta sak a, Sêntei awm ve reng mah se engkim a hre ve vek tho a, pawi ka ti lo.  Zda chuan," Eng thil nge i sawi hi? Ka fuih niin i ngai maw? Inrawlhna ka nei hauh lo," a lo ti vat thung a.

"Dâwt sawi suh, a hmain Hmuakate khân Chhanzuala hi an hre ngai lo, cho chhuak tùr hlauh phei chuan," ka ti leh a, ka thil sawi hi ka hre chiang bîk hauh lo; mahse, Zda hi ka ringhlel ru êm êm a ni. A țhianpa a ni a, a țhianpa hnênah hian kan chanchin chu a hrilh lo hauh lo ang.

"Ka fuih miah lo, i rin sual ka lo ring rêng a, țhiante bula rilru natna sawi zuah zuah mi ka ni lo. Kha pa pawh kha haw viau mah ila sual rawn ang tùr phei chuan ka la ngaihtuah chhin miah lo, pawi ka tihpui khawp mai, an la buai hrep zui a," tiin âwihawm zet chuan a sawi zui a, âwih vak lo chuan a hmel chu ka han en a, fiamthu thawh hmel chu a pu bîk lo.

"Dinpui, ka tihsual kha ka pawm thlap, khawngaihin, kan inkâr hi a bul ațangin țan țha leh ang, nang lo chu duh ka nei lo, a hmaa mi kha chu i rilru ka en chhinna ka tih tawh kha, ka rilru tak takin kalsan che tumna ka nei ngai lo, a hma ang chiah khân ka la duh reng che a ni," a ti leh dap dap a, a aw chu a hma ang chiaha zaidam a la ni reng.

"Zd, kan inkârah hian inhmangaihna leh inthlâkhlelhna tih vêl eng mah a awm lo tih i hriat ve tho kha, kan inkawp rei tawh êm mai a, min hmangaihin min duh niin i inhre mai mai a ni. Kei chuan ka hre chhuak tawh a, kan inkâr hi hmangaihna a ni lo, chuvàng chuan, inthlah vang vang hi a țha, kan inkawp rem ngai dâwn chuang lo," ka ti ve thung a, chhe taka inchhuah ai chuan țha taka ințhen hi ka la thlang fan a ni.

"Kha pa nèn khân in induh tak tak tihna em ni?"

Ka nui hak a, Chhanzuala'n hre ve ta se a nuih a za ve tho ang; mahse, Zda hi hrilhfiah kher ka tum chuang lo, a ngaih ngaihin lo ngai ve mai mai teh se.

"Zd, chhe taka inchhuah lova țha taka inthlah hi a țha. Mi sual i ni lo va, hmeichhe țha tak tak, nangmah hmangaih êm êmtu che  i tawng țeuh ang tih ka hria, chutiang nei tùr chuan ka duhsak bawk che, kei chu hetia awm hi nuam ka ti a, kan ințhen pawh hi ka lãwm viau a ni, chuvàng chuan, min beisei duh tawh suh," ka ti ta thlâwt a, thu tàwp ka hrilh ta mai, thu dik tak hrilh hriat mai hi a țha a ni, țha taka ințhena a hnuleh awm tawh lo tùra chiang taka inhrilh hi a fel ber mai.

"Chance ka nei ta miah lo tihna a ni maw? Mawihnai taka inhnarna a ni tiraw?" a ti zàwi ta sap a, kei chuan," Kha kha ka thu tàwp chu a ni, sawi tùr ka nei tawh lo," ka lo ti vat a, a ngawi ve ta rauh rauh mai.

Vawiin chu Chhanzuala pawh ka tlawh haw ta lo mai. Ka tlawh haw ve deuh ziah a, nin pawh min lo ning palh ang, nulate pawh a awmpui ve duh ang a...

A tûk tlaiah erawh chuan ka pêng haw leh ta tho. A lo awm ve kur a; mahse, min be mang lo, ti ila a țawng mang lo a nih chu. A tûk chhuak a fuh zân lo pawh a ni ve mahna, kei erawh chu ka titi luam a, ani țawng duh lo chu engah mah ka ngai duh lo lui tlat a.

"Nimin tlai khân rawn pèn haw ka tum deuh nain ka rawn pêng ta lo va," ka tih chuan min en rulh a, a thil tih lai chu a tih chhunzawm leh ta mawlh mawlh a. 

Thinrimna a nei em maw ni le?  A lung ka tiawi lo nge, mi dangin an ti lungawi lo zâwk? A ngawi ngur mai a, pa lian leh sa țha tak ni phei se chuan a hlauhawm ve ngawt ang chu; mahse, ka hre chiang ve hrim tawh a, hlauh ena en lovin a thinrim chhan zawh chhuaha țawngtîr ka duh a ni.

"Lungawi lohna i nei em? Min han hrilh la, ka hriat zâwng a nih chuan a tih-rehna kan zawng dâwn nia," tiin naupang chhe biak tak hian ka han bia a, ani chuan," Haw mai teh!" a lo ti nghut thung a, ka en vat a, a hmui chu a lo chîp leh hmak hman tawh a.

"Ka la lêng ve rih alawm," ka ti ve leh thung a, ani chuan beer in khalh pah chuan," Hetah tih tùr i nei lo," a lo ti ve leh a, ka en deuh reng phawt a, a beer tui tih hmel zeta a han in leh khalh khalh țhìn chu eng emaw kawng zâwng tak chuan a hmuhnawm phian ka ti, a duh ve hlarh hlarh si a.

"Vanlalchhanzual, i lung a awi lo a nih chuan khatia awm kual vêl lo khân sawi mai rawh, min hua em ni?A chhan pawh sawi chiang lova hetia awm ngawt, i sawi lo a nih chuan ka chungah i thinrim a nih ring ka rawn tlawh tawh lo ang che," ka ti ve ta kalh a, naupang chhia titau ang mai, ka pa ka hre chhuak zawk mai, ani kha chuan kan tihtauh khum chuan min vaw hrep mai țhin a, tihtauh khum ngam a ni ngai lo.

A la ngawi ngul tho.

"A chhan i sawi duh bawk si lo, ka'n haw ang e, i mood a fuh lo a nih kha. Ka rawn pêng ngai tawh lo ang," ka ti a, ka rilru put dàn erawh a ngai reng ; mahse, hetia han tih vêl hi a cho tlat.

Kawngka bul ka thleng țêp tihah chuan," Nimin khân kha pa kha i hmu leh a ni tiraw?" a rawn ti chhuak ta nghâl a, ka ding chawt nain ka inher chuang lo. Engtin nge Zda nèn kan inhmu tih a lo hriat ni? Min lo hmu chu a ni êm lo'ng maw? Mahse, Sêntei in bul thleng min thlah hleinem.

"Aw, Hmuaka kha a țhianpa a nih kha."

"Ka hria," a lo ti bung nghut a, ka inher ta vat a, engtin nge ka hriat loh hi a lo hriat theih bîk ni? Engtik ațangin nge a lo hriat a?

"Kha pa kha i duh tawh lo niin ka hria a; mahse, i la hmu tho a," a rawn tih leh chuan," Ka duh vànga hmu ka ni lo; mahse, kan inhmu leh tawh kherin ka ring lo," ka lo ti ve thung a, min rawn en chiang ngang mai.

"Hmu tawh ngai suh!"

A eng vàng chuan maw ka hmuh loh ang? Ni e, a chunga thil thleng vàng khân a rilru a la dam thei nâng, Hmuaka leh Zda chu țhian an ni si a, ani tân pawh Zda chu a rinhlelhawm viau bawk ang, kei pawhin ka rinhlelh rêng kha.

"Hmuakate nèn khân a chotuahtîr miah lo che niin a sawi a, ka ring--" ka tih mêk lai chuan," Ring suh, ring ngai hauh suh," a lo ti vat a, min rawn pan hnaiin," Kha pa khân dâwt a sawi a nih kha, kei chu ka sual a ni maithei, dâwt erawh ka sawi ngai lo," a ti a, ka hmaah tak rawn dingin min melh chhuk ràn a, chutah," Kha pa kha, i bula a awm ka hmuh apiang hian hrehawm ka lo ti ziah țhìn, niminah pawh khân ka hmu che u a, ka hmuh dun che u chuan he lai hi a na ziah," tiin a âwm chu a kut chuan a chùm dawt a.

Mak ti zet hian ka melh chho hau ringawt, sawi tùr rêng rêng ka hre lo.

*MITE NUNAH HIAN A ȚHA LAM HI ZAWNSAK TLAT ILA, KEIMAHNI PAWH HI KAN HLIM ZÂWK TLAT ZÊL A NIA*