☆UNEXPECTEDLY YOU☆ - 9 By Dingdi Pachuau

 

☆UNEXPECTEDLY YOU☆ - 9 By Dingdi Pachuau

Khami tlai ațang khân ni hnih a liam leh tawh a, ka pêng haw leh ta rih lo. Khatiang thu a sawi hnu khân hmuh ka hreh deuh ta tlat mai a nih chu, a thil sawi kha ka han ngaihtuah lêt a, han hmuh hrehna chhan tùr ka han ngaihtuah lah chuan thil ni thei niin ka hre lo, a thil sawi kha kei hian ka lo ngai kawi mai mai a ni ngei ang. Min duh thu a sawi lo va, min ngaihzàwn thu lah a sawi hek lo, Zda nèn kan inhmuh dun lai a lo hmuha a thinlung nat thu mai a nih kha a sawi ni. Zda min tih dàn, min rinawm lohsan dàn a hre ve vek a, a u ang mai ka nihnaah, ka rilru min lo natpuiin a thinlungah hrehawm tihna a lo awm ve a ni mai, Sêntei pawhin min khawngaihin hrehawm  a lo ti ve fo tawh țhìn a, chutiang chiah chuan Chhanzuala pawh hian hrehawm a lo ti a ni ngei ang.

Ka ngaihtuahna ka sèn nasat lai Famkimi chuan,"Dinpui, Chhanzuala nèn khân in inpawh viau tiraw? Tûnlai hian eng nge a an chhoh zêl le? A la chhe lo tluang zêl tùrah ka'n ngai deuh ngawt a," a rawn ti sar sar a, nui deuh chung hian ka en ringawt a, ani lah chuan," Han hmingchhe zauh mah se a chhiat loh phah chuang hauh lo a nia, a single êm chuan ka ring lo nain min tihpuitu an awm phawt chuan ka duh reng mai a," a la ti leh zui a, nui chung hian," Ka hre bîk lo le, chutiang lam chu ka sawipui ngai miah lo mai," ka lo ti lêt ve a. Famkimi hian chhe lo a tih thu hi chu a sawi zauh zauh a, hetiang lama ka lo en ngai loh vàng hian tlângvâl en hian ka lo en ngai lêm lo va, kan inkâra nulât tlangvàlna lam awm tùr phei chuan ka la ngaihtuah ngai lo hrim hrim bawk.

"Lo sawipui chhin mai mai teh, i nau ang tho a nia, i tân chuan a zahthlâk dâwn chuang hleinem," a ti leh a, kei chuan,"Lo sawipui ang; mahse, i beih ve deuh hlak chu a ngaiin ka ring, tih awlsam tak a ni lo ang aw," ka ti ve leh a, ani pawh chuan," Ka ring thiam alawm, a remchâng apiang kawp duh mi chu a ni lo tawp ang le," a ti ve leh mai bawk a.

Chhùn chawlh dâwn laiin Chhanzuala a rawn lang thut mai a, ni danga rawn lang ngai hlei lo, ka han hmu thut chu mak ka lo ti ru khawp mai a, ka lo en hau ringawt. Dik tak chuan a ina ka kal hnuhnun ber țuma a thil sawi vàng khân hmuh hi ka hreh deuh tlat tawh a, ka huat vàng leh ka ngei vàng a ni lo, ka zah thar tâk deuh tlat vàng a ni.

"I la chawlh ka ring lo a?" a rawn tih chuan," Aw... chàwl lo ve," ka lo ti vat a, ani chuan," I hman tawh em? Kal nghâl mai ila?" a ti leh mai a, ka han hawi kual a, țhiante  chuan min lo en țhap mai, chawlh lo tum mêk kan ni bawk a, Chhanzuala hnênah chuan," Chawlh kan lo tum ve chiah a, chàwlho ang u aw," ka ti a, ka sawi laia Famkimi phûr hmel chu ka hmu ru khiau a. Chhanzuala pawh chu a lu a lo bu nghat a, Hruaia leh pi ber erawh chu dàwrah ei tùr an pêkchilh leh mai dâwn a ni.

Pâwnah chuan Chhanzuala țhiante pahnih Sam-a leh Hriatpuia pawh an lo awm reng niin, kan han inzui țhâm țhâm a, dàwr ațanga hla lo têah chuan M&R Restaurant nuam zet reuh hi a lo awm reng niin, step chëp zetah chhovin restaurant chhûng erawh a lo chêp miah lo, belh chian a la dãwl reuh viau zui a, hmeichheho chu inenin kan han inzâwt chhin a, chutiang hmun nuam chu a lo awm reng a ni tih tu mahin kan hre miah lo a nih chu.

Kan tam tham ve deuh a, dawhkàn sei ve deuh mai, mi 10 kîl theih tùra duan chu kan kîl a, duh zâwng chu kan han order sap sap a, ka sîr veilam chiahah Chhanzuala a țhu a, a veilamah a țhiante pahnih țhuin, min hmachhawnin ka țhiante pathum chu an țhu bawk a, ka hma chiahah Famkimi chu țhuin Chhanzuala chu a en deuh reng tih ka hmu reng a, ka nuih a za angreng viau mai.

Ei tùr rawn thlen hma chuan eng eng emaw an sawi a, an țawng mar mar hlawm a, Sam-a chuan fiamthu thawh pahin  hmeichheho chu a'n fiam a, kei erawh chu ka țawng ve mang lo, țhiante titi chu ngaithlain, an fiamthu thawhah chuan ka nui ve leh sak sak a, chutiang chiah chuan ka bula țhu pawh chu a awm, a zia hi a ni ve hrim hrim bawk a, ka bulah țawng duh ve viau mah se mi zîngah hi chuan a țawng tam ngai lo a ni.

Ei tùr a rawn thlen hnu chuan țawng tam tawh lo chuan ei tùrah chuan an bûr ta ngar hlawm a; mahse, țawng duh tih takah Famkimi chuan," Chàwl ziah ang u, nichina in rawn kal hun angah khân in rawn kal țhìn ang a," a ti sauh sauh a, Hriatpuia chuan," Ni e, kan laklawh loh phawt chuan, rawn sàwm ziah che u kan lo tum ang e," a lo ti ve a, Sam-a pek chuan," A hma phel sàwmna hi chu a hnar ngai lo," a lo ti zuk a, nui hak hak chung hian Hriatpuia chuan," Ve a che, chutiangin min sawi hauh suh aw, nizàn lama mi pawh kha--" a tih lai mêk chuan Sam-a chuan," Ei mai mai teh, hei hi i duh em? I duh zâwng tak a ni țhinin ka hria,"tiin Mushroom soup a chah chu Hriatpuia lamah chuan a nawr phei ta nghâl a, amah a nui țhû bawk si a, kan lo nui tet tet hlawm a.

"Ka lâwm e, min chhuh tawh hlek suh ang che," tiin ani lah chuan a lo la vat a, Sam-a ban phâk lohna tùra hlaah chuan a nawr phei ta nghâl a, chutah," Ka ka hup i duh chuan a dang pawh a la ngai maithei a ni," a'n ti zui leh zat a, Famkimi chuan," Hriat ve a va'n châkawm! Min han hrilh la," tiin Hriatpuia chu nui chung hian a en phei a, Sam-a chuan," A ti ve mai mai a nih kha, tukin lamah a tho fuh chiah lo a nih hmel, a pain a tur tho lehpek a ni ngei ang," a lo ti hmawk hmawk a, a sawi dàn a nuihzatthlâk bawk si a, kan nui dar dar a.

Chutah," Ka chungchâng ngawt sawi lo teh ang u, titi dang han vawrh teh," ti lehin Chhanzuala chu a rawn en phei a," Sawi tùr i ngah theih êm kha, sawi bawrh bawrh rawh," a ti a, a nui sûng bawk a, hmeichheho chu kan lo nui dar dar a. Chhanzuala lah chuan," Min sawi kêp vek tawh kha!" a lo ti mai thung a, ani hian sawi tùr a neih ka ring hlawl lo, lo nei ta teh rêng pawh ni se hêngho bulah hi chuan a sawi lo tawp ang le.

"I zak a ni maw? Nula chhe lo deuh deuh bulah hi chuan a zak leh tlat țhìn a, hre thiam r'u," tia Sam-a'n a fiam chuan Sênteite chu an lo nui dar dar a, Famkimi chuan," Kan chhiat hlawm êm hi maw," a lo ti vat a, chutah," Star a nei a niang, a nih loh tal pawhin star-tu an awm a ni ngei ang," a lo ti vat a, a nui sâng a, Chhanzuala chu a en pah reng bawk a. Ka rin loh deuh hian Chhanzuala chuan," A dik maithei a ni," nui deuh chung hian a lo ti vei sup a, ka en vat a, dawhkàn hnuaia ka mal chunga kut ka dah chu a rawn vuan ta chat mai.

Ka phu deuh zawk a, mi dangin an lo hmuh hlau chuan ka han en kual deuh a, chutih lai tak chuan Sêntei chuan," Tlangvâl nih chuan nei ve bawk ang chu, keini pawhin kan nei ve bawk ang, nula kan la ni miau a," a lo ti vei khut a, Sam-a lah chuan," Min hre ve lotu va star daih ai chuan kan bul hnaia mi hi star keuh ila a zia daih zâwk, min lo star lêt ve phei chuan..." a lo ti ve a, Chhanzuala chuan," Dik chiah," tia bu nghatin min rawn en a; mahse, ka en duh lo lui tlat thung. Chu chu a haw deuh a ni maithei, ka kut chu a'n vuan nghet salh a, ka tâl ngam chiah si lo, mi dangin min lo hmu ang tih hlauhna nèn, ka thin chu a phu dap dap mai.

Kan ințhen dâwn chuan," I rawn pêng ang tiraw?" a ti sup a, a țawng chu mi dang chuan an hre ve kherin ka ring lo. Kei chuan," Eng nge ka rawn tih ang?" ka ti ve thung a, nui hauh lo hian min melh reng phawt a, chutah, a hma ang chiaha zàwi tho hian," Ka lo ring ang che," a ti leh sup a, inher nghatin a kal zui ta nghâl a.

Tlaiah chuan ka pêng haw ta nge nge a, ka pèn haw loh chuan a lungawi loh ka hlau ve deuh a, bâkah, ka pêng khât ta deuh bawk nèn, min lo rin dâwn vàng pawh ni chuang lovin, a u ka nihna angin ka pêng chauh ang.

A lo awm ngei a, kawngka chu min lo hawnsakin ka luh veleh chuan chhûng lam ațang chuan a kalh ri ta rak mai a, ka inher vat a, ani chuan," Nula țhenkhat hian rawn kal thut an chîng a, chuvàng a nih kha," a lo ti mai a, min kal pèlin," In tùr i duh em?" a ti zui nghâl zat a.

A hma ang kha chuan ka awm thei lo, danglam a awm tlat tawh mai si a, danglam lo anga lan erawh ka tum nasa, ani lah chuan," Vawiin chu i lipstick colour kha i inhmeh ka tih zâwng tak a ni," a la rawn ti zui a, ka en hau ringawt.  Dik tak chuan, a in ka kal hnuhnun ber tûk ațang khân makeup hmang ve deuhin ka inthuam dàn pawh ka uluk deuh hlek a, a chhan pawh ka hre chiah lo, a mit lâk ka rum vàng em ni ang? Ka makeup hman erawh natural deuh deuh a nih vàngin makeup ka hmang tih ka țhiante pawh hian an hre kher lo maithei, min chîk deuh tak erawh chuan an hre ve ngei ang chu, hei, Chhanzuala pawhin a hre chat mai a nih hi. Ka lipstick hnawih erawh a hriat loh hle si a, a rawn hre chat si erawh chu nuam lo ka ti ru khawp mai.

"...min hîp tak zet bawk," a rawn tih leh phei chuan mahni inhmu thei lo mah ila ka sen ap apin ka ring. 'Mi hipna nei lo' tiin min sawi fo a nih kha, engtik lai ațangin nge ka lo hìp viau tâk ni?

Khua a lum viau pawh hian coffee ka duh țhin tih a hriat tawh avàngin coffee min rawn pe a, stool sâng er awrah chuan ka țhu leh a, ani erawh chu ka hmaah tak chuan rawn dingin kitchen island chu a kut chuan a nem thung a, ka lamah rawn ãwnin a ding kûn deuh khuau a nih ber chu.

"Famkimi khân a star che a," sawi tùr ka hriat loh êm avàng chuan ka ti ta ngawt a, ani erawh chuan ngun zeta min rawn enin," A nih, nangin?" a ti ve thung a, ka melh chho zawk mai.

"Nau anga ka en che i ni a--" ka tih lai chuan," Tûn ațang chuan chutiang chuan min en tawh suh," a lo ti vat a, kei erawh chuan," I tët lai pawh ka hria a, ka țawng ngaih loh lamah lo ngai lo la, tunah, i bul hnaiah i chhûngte tu mah an awm lo va--" ka tih lai chuan," Mi dang tu mah ka mamawh lo, nang ka bul hnaiah i awm a, a tâwk viau," a lo ti ve leh thung a.

Kan ngawi vang vang phawt a, a hnu deuhah chuan,"Ka kut kha engati nge i rawn vawn a?" ka ti leh a, ani lah chuan," Ka vawn châkna a rei tawh alawm, nang hian i rawn vuan hmasa dâwn si lo va," a lo ti leh mai a, min chhàn dàn tùr lah chu a hre zêl maì si a, keimah zâwkin sawi tùr ka hre lo hial zâwk a ni.

"Mi dangin min hmuh i hlau lo em ni?" ka tih leh chuan," Hlau nâng, ka hlau hauh lo, i hlauthãwng hmel kha chu hmu lo ila chuan an hmuh lai ngei khân i kut kha ka vuan ang," a la ti tak deuh deuh a! E khai, chutiang chu a tihchi hauh lo ang le.

Ka awm rei duh lo va, ka chhuah dâwn chuan hnung lam ațangin min rawn kuah a, ka la phu zawk zui. Nget zeta min kuah pah chuan," Ka tihpalh, tihphut che kha chu ka tum miah lo; mahse, kuah che hi ka châk êm a, ka insûm hrâm hrâm țhin zâwk a ni," a ti sup sup a, che lovin ka ding tawp a, ka thinphu su dup dup chu a hre thei ngeiin ka ring.

"Hetiang hi thil țha a ni lo ang," a hnua ka tih chuan," Thil țha lo a nihna tùr a awm lo, nula leh tlangvâl kan ni alawm," a lo ti ve thung a, chutah, a kut chu ka thinphu su dup dup laia chawlhtîr vang vangin," Hei hi keimah vàng a ni tiraw?" a ti leh sup a.

Hetianga thinphu su dup dup thei hian Zda khân min la siam ngai lo, min kuah ve fo a, kan infâwp ve fo bawk; mahse, tuna ka awm ang pawh hian ani bulah kha chuan ka awm ngai lo tih ka chiang sak.

Ni tin a hun ngaiah chuan min rawn sâwm ta ziah a, țhiante an lo phûr thei hlawm bawk si a, hnial ngaihna a awm hauh lo. Țhiante hmuh lai chuan a awm țha thei viau mai a, an hmuh loh lamah ka kut a vuan a, a nih loh leh, a kein min tlawh thùl a, țhiante'n an lo hmu ang tih ka hlau thei tawp mai.

A bulah ka awm tam telh telh a, min care-zia ka hre chiang telh telh a, țawngkain sawi chhuak duah lo mah se a thil tihin a lantîr țhìn, kei ngei pawhin a bula awm chu nuam ka tiin ka thlahlel telh telh a, hmuh hlàn ka nghâkhlel a, chhùna a rawn lan har deuh hlek hi chuan mawnga hawlh ang maiin ka țhu hle hle thei țhin lo a ni, hetiang hi ka ni thei ang tih ka lo ngaihtuah pha hauh lo va, nau ang maia en tawh lovin tlangvâl angin ka en tawh a ni tih hi ka awm dàn leh chezia ațang pawhin ani pawh hian a hre ve ngei tawh ang chu, ka duh lêt ve ngei tawh bawk si a, a chhan chu ka kut  min vawnsak zeuh châng pawhin ka vawn lêtsak ve mai a, mi â a ni lo va, ka mitmengah pawh amah ka huat lohna a chhiar thei ngei ang ; mahse, a inah erawh ka lêng leh tawh rih lo thung, min sâwm hran lo va, min sâwm pawh ni se lèn rih loh hi ka tân a țhain ka hre zâwk a ni. Kei lahin kan ina lêng tùrin ka sâwm ngai tawh lo va, ka nu leh pate'n a chunga an rilru puthmang ka hre tawh si a, nuam a ti dâwn lo tih ka hriat avàngin ka sâwm ngai ta lo a ni.

Zan khat erawh chu mut dâwn hnaihah min rawn be ve teh tlat a! 

"Naktûk chu rawn lêng ve leh tawh la, ka in pawhin a ngai tawh teh che a nia, a sawi a sawi mai che," a rawn tih chuan ka nui hak a, thil âwihawm loh lutuk a ni si a, fiamthu a rawn thawh ve ngei a nia, a inhmeh lo ka ti.

"Dàwrah--" ka tih lai chuan," Inrinni a nia, dàwra kal i ngai hleinem," a lo ti vat a, kei pawh chuan," Nia, bazàr ka ngaih loh chuan," ka lo ti ve mai a, ani lah chuan," Bazàr i ngaih pawhin ka pui thei ang che," a lo ti leh zêl a. 

A puih ngai lovin zîngkârah ka intifel vek a, Sêntei tlawh tùr anga insawiin ka chhuak a, ka nuin dîlchhût zetin ka kalna tùr min zâwt ve miau hek le, chhuanlamah Sêntei hi ka hmang chho zut mai dâwn a nih hmel riau.

Amah duh tak takna rilru pu leh tlangvâl anga ka en tâk hnua ka lèn lehna hmasa ber a nih avàng chuan tlêmin ka zum deuh hlek a, kawngka min rawn hawnsak a, min en vang vangin," I lo kal ta a?" a han ti a, kei chuan," Kal tùrin min sâwm a nih kha,"tiin ka lo chhâng lêt vat a. In chhûngah min kai lûtin in chhûnga kan luh veleh chuan min kuah vang vang phawt a," Ka lo ngai viau hman tawh che a ni," a ti leh sup sup a, kei pawhin a vawi khatna atân ka kuah lêt ve ta, kan inkuah vang vang a.

A hnu deuhah chuan kan inthlah a," In tùr ka lo lâk ang che aw," a ti a, ka lu ka bu nghat a, țhut pawh țhu lo chuan ka ding ta rih a, ding chung chuan ka hawi kual vêl ruai a, ka hmuh hnu vek tawh mah ni se ka rilru puthmang danglam hnu hian la lêng lût ngai lo ang mai niin ka hre thar a, tlêmin ka zum deuh a ni.

"Lo țhu rawh, i vawi khat rawn lènna ang mai chuan awm teh suh," a raqn ti a, fridge chu a hawng pah nghãl a, kei erawh chu a hma ang khân awm harsa ka ti deuh tlat mai a, mikhual ta riauin ka inhria a ni mahna le. Bâkah, tihian nula leh tlangvâl angin kan awm dùn dáwn a ni àwm si a, a hma kha chuan pianghmun ni lo mah ila u leh nau ang khân kan awm a, ka țawng bawrh bawrh țhìn a nih kha. Tunah chuan nula leh tlangvâl, ni lo, a fuh chiahin ka ring lo, hetianga awm hi...

"I thil ngaihtuah lai kha paih bo daih teh, thil țha lo a nih kha," a rawn ti a, fridge aţang chuan beer leh theitui vâwt a rawn keng chhuak a, thutak zet hian min rawn en a, mak tiru deuh hian ka lo en lêt ve a, engtin nge ka ngaihtuahna chu a rawn hriat theih ni? Ka țawng lêm loh vàng kha em ni ang?

"Dik thei lo tlatin ka hria a," ka ti ta nge nge a, stool sângah chuan ka țhu zui nghâl a, ani lah chuan," Eng chu maw?" a lo ti leh daih a, zêp duh lo chuan," Hetia awm hi maw le, tih miah loh tùr a nia, nau anga ka en țhin--" ka hmuia a rawn fawh zauh avàng chuan ka țawng lai chu ka tàwp chiang kher mai! Tunah khân min rawn fâwp a nia! Mit khap hauh lo chuan ka melh kal ringawt mai.

"Thil hlimawm tak a ni alawm, khawvêĺ hi a ngai rengin a kal lo, thil inthlâk danglam hun a awm," a rawn ti a, min rawn fâwp leh zauh a, kei chuan," Min tiphû alawm," ka lo ti sap a, ani lah chuan ka biang tawn tawna rawn vawn pah chuan,"I phu tawh miah lo ang, ka tiam a che," ti supin a rawn kûn hniam zui leh zat a, ka la hriat leh tem ngai hauh loh infawhna awmze dik tak chu muangchâng leh dam raih hian min rawn hrilh ta mawlh mawlh a. A hnu deuhah chuan kei ngei pawh chuan ka hriat dàn chuan ka lo hrilh fiah ve zêl a, in tùr lam pawh kan ngaihtuah thei ta rih lo.

Rei mawi tâwk tak kan inhrilh fiah lai chuan island chunga ka phone dah chu a rawn ri ta hlauh mai a; mahse, kan ngaihsak lo dùn kher asin, a ring tàwp a, a rawn ring zui leh nghâl zat bawk a, kan han tàwp a, ka han en chuan ka phu deuh zawk mai, Sêntei a lo ni a, Chhanzuala lah chuan," Chhâng lo mai la?" a lo la ti nghut zui a; mahse, a pawimawh a ni ang, ka chhàn ngei a ngai a ni.

*THIL PAKHAT LEK A TIHSUALAH A CHUNGAH NGAIH DÀN NGHET SIAM MAI LO LA, A THIL TIHSUAL TAWH AȚANGA A INSIAM REM CHHOH DÀNAH NGAIH DÀN SIAM ZÁWK RAWH*