☆UNEXPECTEDLY YOU☆ - 17 By Dingdi Pachuau

 ☆UNEXPECTEDLY YOU☆ - 17 By Dingdi Pachuau

Hlauhthàwnna avàng chuan ka thin a phu dawt dawt mai a, eng nge a lo tih? Chhùnah ka awm țhin tih a hre chhuak leh tawh em niang?  Engtin nge Chhanzuala chu a àn khum ang? Zawhna hlîr mai chuan ka thluak a vilh ngut ngut mai a, ka hlauhthàwnna avàngin ka thin a phu nasa bawk nèn, tunah hian min rawn hmu chiah phei se chuan... Bathroom-ah thãwm dim thei ang berin ka lût a, muangchânga boruak a tam thei ang ber hîp lûtin muangchâng bawkin ka thaw chhuak leh a, chutianga vawi sàwm vêl zet ka tih hnu chuan ka zia ta khawp mai a, tui herh hawin ka hmai chu ka  han tihuh leh bawk a.

Bathroom kawngkhàr rawn inhawng chuan min tiphu chiang kher mai, hlauthãwng zet hian ka lo melh hrâ a; mahse, Chhanzuala a ni tih ka hmuh chuan ka âwm chu ka dawm a, ka phun sap bawk a.

"Le, dàwra i lêt a hun tawh e."

A awka chhuak chu a pângngai thlap mai a, mak ka ti ru khawp mai,ka nu khân a àn khum hrep lo em ni ang, nge a rawn tlawh kawi ve mai mai zâwk? Kei hi ka lo ngaihtuah thui lutuk a ni zâwk lo maw?

"Ka nu khân eng nge a lo tih a?" tiin bathroom ațang chuan ka zui chhuak nghâl a, ani chuan min rawn en zawk a, nui sakin," Chaw eiah min rawn sâwm a nih kha,"a ti sup a, a kal zui leh ta nghâl a. Kei chuan ding meuhin a kal ta chu ka en zui a, ka nu chuan kan ina chaw eiah a rawn sâwm maw? Engati nge? Inhnimhnai tawh lo tùrin min hrilh kha, eng atân nge chaw eiahte a sàwm leh si? Ka rilru a buai nuai nuai mai.

"I rawn ei ang em?" a in ațanga kan chhuah dâwn chuan ka ti leh a, rawn ei ta se ka nuin engtin emaw tak țawng khum a tum a ni ang ka ti a ni, ka zakin hrehawm ka ti dâwn si a, ani pawh hian hrehawm a ti viau ang, ka nu chu àn a thiam si a,  chuvàng chuan, chaw chu rawn ei lo se ka duh a ni.

"I nu meuhin min rawn sâwm a nia," a lo ti mai a, rawn ei a tum a ni chiang mai. A kuta vawnsak pah chuan," Eng vàngin nge a rawn sàwm ngawt che a? Rawn ei miah suh," ka han ti leh rih a, min rawn en chhuk ta rùn mai, ni e, ka awm dàn chu mak a ti ngawt ang chu, ka nu leh pate'n kan chungchâng kha an hre tawh a, ka nu phei chu a thinur viau a ni tih ka la hrilh tlat lo alawm.

"Engkim a țha vek mai ang, hlauthãwng lutuk mah ta che. Le, kal tawh rawh le, i tlai ka duh miah lo a nia."

A châng hi chuan nau ang hian min en zâwk ni maiin ka hre țhin, thinchhe êm êm țhin kha a dam ta thluam mai si a, ţawng thlahdah leh chimawm zet zeta min chhaihtu khân tunah chuan duat theihtàwpin min duatin a țawngkam thiam ang angin min hmangaih thu min hrilh a, chêtziain a lantîr bawk a, hei hi a tûnhma nun dàn hretu tân chuan thil mak tak a ni.

Zanriah chu a rawn ei ta ngei a, ka nu chuan pângngai takin a bia a, ka pa pawhin boruak kan nei tih hriat theih hauh lo chuan a lo be ve bawk a, ka nu leh pate'n kan pahnih chanchin an hre tawh tih vawiina ka lo hrilh ta hrâm lo kha ka inchhîr ru țan deuh, lo biak ve pawh chu nuam ka ti lo, biak loh lah chu a ni mang  bawk si lo,  a lakah ka inthlahrung ru ngawih ngawih tawh.

Ka nu fin thiamzia a lo lang ta.

"Chhanzual, hei tlangvâl nupui nei rual i lo ni ve ta reng mai a, bialnu țha deuhte hi i lo hual reng tawh lo maw? I hmel leh piante'n a zir bawk a, i hual țha ngawtin ka ring, hei i unaunu Dinpuii pawh nula senior a lo ni ve mai dâwn bawk a, ani pawh a senior over hma hian pasal ţha tak nei se tih hi kan duh dàn a ni a, a nu leh pate mit tlung tak pasal a neih ngei pawh kan beisei bawk. Ngaihzâwng ațang hian nupui pasal tùr hi kan lo zawng reng a lo ni a, chuvàng chuan, ngaihzâwng tùr pawh hi thlan fîmkhur a ngai viau a ni. Zêp thu chêng lo, Dinpuii pawh hi a palai kan nghâk deuh tawp tawh a ni mai a, pasal a neih hunah pawh i inbàn thei hauh lo ang, nang bâk nuțã a nei si lo va, keini lahin kan fapa neihchhun angah kan ngai hmiah bawk che a," a rawn ti chhuak ta a.

Chhanzuala chu a ngawi reng a, chaw pawh a bâr lo, ka inhûmruh a, 

hrehawm ka tih dàn chu pui tak a ni ringawt. Ka nu lah chuan nuam tih hmel fê hian," Tûnlaiah chuan mi țha chhûngkua, chhûngkaw hung leh mi zah kai chin hi an pawimawh êm êm a, thlahte thleng pawhin a pawimawh a ni. Chutiang chu ngaihzâwngah pawh zawn hrâm hrâm tùr, kan fapa ang chiaha ka ngaih vàng chein ka hrilh che a nih chu aw, nang ka sawi chhan che angah lo ngai lo la, chhûngkaw tlabal lutuk leh zîk bùl lutuk ang chite hi ngaihzàwn tum loh tùr, mi zah kai a har a nia, mite'n khûtah an hmu mai ang che. Nangni ai chuan kan kum chhir a tam tawh a, thil hi kan hre thiam tawhin kan tawng tam tawh zâwk a, ka thu sawi hi a dik a nia, zawm pawh i tum hrâm hrâm a ni ang chu," a ti leh malh malh a. Hrehawm ka lo ti leh ka lo zak lutuk chu chhûngrilah ka lo îp chãwih chãwih thei hial mai. Chhanzuala hmel pawh chu ka en țha ngam lo, chutianga ka nuin a nihna dik tak 'Chhûngkaw tlabal leh zîk bùl' a rawn sawi chhuak leh kher kher chu, ka thin a rim a, a rilru tùr ka dâwn a, hrehawm a ti ngawt ang, a sawitu lah chu ka nu ngei a ni bawk si. Aw...vawiina engkim ka lo hrilh vek lo kha a pawi vawng vawng zo ta a nih hi, ka thiam loh vek a ni.

"A dik alawm," Chhanzuala chuan a ti sup a, ka pa chuan," A, i chaw kha han ei phawt teh, nang pawh, chaw ei lai hi chuan duh tâwk rih la, chaw ei kham lamah i chhunzawm zâwk dâwn nia," tiin ka pa chuan ka nu chu a han khap a, ani lah chuan," Fate chu chaw ei laiin thil ţha kan hrilh ang a, zilh an ngaihnaah kan zilh bawk ang chu, chaw ei hun lai bâk hun thâwl kan nei thei si lo va, tiraw, Chhanzual?" a lo ti thung a.

Chhanzuala chu a nui sak a," A dik vek, zilh kan ngaihnaah chuan min zilh bawrh bawrh tùr alawm, nangni bâk chhûngkhat laina hnai min zilha min hautu tùr ka nei hleinem," a ti ve leh zui bawk a, a thil rawn sawi chuan ka rilru a tina tak zet a ni. A fahrahzia leh a malzia a rawn sawi chhuak  ve leh ngat a nia, ka nu thil sawi khân a rilru leh thinlung a tina tih ka hre thiam nghâl bawk. A nui hmel pawh kha a tilui a ni, a nuih a za hauh si lo, nuihzat tùr lah a awm hek lo.

Kan chaw ei chu kan puar lo hlawm ngawt ang chu, ka nu lah chu a țawng suah suah reng a, nuam a tih hmel bawk si a," Zda kha i hmu ve tawh em kha? Zanin pawh hian a rawn lêng dâwn asin--" a tih lai chuan," Ka nu..!" ka lo ti țhat a, ka thin a tirim a, min tizak bawk, ani lah chuan," A zahthlâk hleinem, i nuțã ang tho a nia, ani pawh nupui ţha tak nei se kan ti ve tho a nia, engah nge kan tih loh teh lul ang? Kan fapa ang chiah tho a nia," a lo ti leh a, țawng nuam a ti lutuk chu tunah tak hi chuan ka haw so bawrh bawrh, ka țawng ve chuan buaina zakhua ka thlen dâwn a ni mai si a, ka la insûm țàng țáng a ni, ka puak keh a nih hlauh chuan chhûngkaw mualphona ka thlen ang, ka nu lah a insúm leh dâwn hauh si lo, chuvàng chauh chuan ka la insûm hrãm hrâm a ni. 

Chhanzuala chu chaw ei kham hnu lawkah chuan an rawn phone a, thil pawimawhah a ni ngei ang, thupha chawiin a haw zui nghâl a, a haw tùr chu ka nu chuan," A va zia lo ve aw... I rawn len ve chhunah, a nih leh mai le, mut tui, mang țha țha le," tiin a au zui a, a rûkin ka ner sawk mai. Ka nu râpthlâkzia leh a rilru makzia chu mak ka ti a, râpthlâk ka ti tak zet bawk a ni, hetiang mi hi ka nu chu a ni tak si a.

"A inhre chhuak ve ram ram ang chu," Chhanzuala tlàn liam hnua ka nuin thawven hmel zeta a tih chuan," Khatiang kha sawi chhuah kher a ngai hleinem, ka nu, i lo mak tak zet a ni," ka ti chhuak ve ta thlâwt a, zanin zet chu ka nu fanu ka lo ni kher kher hi ka zak ve chiang a ni.

"Hei hi tu thiam loh nge? A bul țantu chu nangmah i ni, ka hrilh chiang viau tawh che, in inkawp hi rem ka ti thei ngai lo ang, mi ngaih dàn tùr che pawh ngaihtuah ta che, in kal thui hma hian tàwpsan ang che, i tàwpsan lo a nih chuan i nu hi ka duhnaah chuan ka rãpthlâk thei viau a ni tih i hmu chho zêl ang," a ti leh charh charh a, țawngka hi chuan kan sawi fel dâwn chuang lo va, ka ngawihsan ta rih. Chhanzuala erawh ka ngaihtuah tak zet a ni, eng angin nge kan chhûngkua chu a ngaih ang? Ka nu a ngaih dàn tùr mawlh chu...

Mut dâwna biak ka tum chuan a tlang thei tlat lo. Ni dang, hun dang pawha ka biak theih reng laia zanin zet chu, hrehawm a ti ve viau a ni ngei ang, biak theih lohin a'n awm ta a nia, message ka thawn hrâm tho a.

Chhùnah a inah ka han kal leh a; mahse, a lo inkalh bar a, a chahbi chu kawl reng mah ila luh ka tum hran lo. Ka be tlang thei lo chuan min tihrilhhai ber a, khawiah nge a awm ang? A bike chu a dahna țhinah chuan a awm lo ngei mai a, a țhiante nèn khawiah emaw an chhuak a ni maithei. A țhiante number chu ka lo nei miah lo mai a, ka han ngaihtuah kual a, Remlali chuan Hriatpuia number chu a nei ngei ang, ka dîl mai dâwn em ni ang? Chhanzuala chin a lo hriat tâk hlauhin.

A lo hre teh meuh mai, Aizawlah an lo awm tawh niin, tukin zîngah, zîng takah Aizawlah an phei a, computer thil vêl chungchângah a ni àwm e. Chutia a chanchin ka han hria chu ka thla a muang deuh huai a; mahse, ka be tlang thei lo mawlh chuan ka rilru a tihrehawm.

Haw kawngah Sêntei chu nizan lama thil thleng chu ka hrilh malh malh a, tûn thlenga Chhanzuala ka biak tlang theih loh thu chu hrilhin hrehawm ka tihzia pawh chu ka hrilh tel bawk a, ani pawh chuan," A àwm ve viau tho alawm, amah ni ta ila kei pawhin hrehawm ka ti ngawt ang, mihring tu pawh mai hi kan duh dàn ngawtin dinhmun țha leh sângah kan awm ngawt thei lo, chhûngkaw keh chhiat te phei hi chu tu mahin kan chunga thleng tùrin kan duh hauh lo, chutiangin fahrah leh mal tak nih pawh," a lo ti duah a.

"Chu chu alawm, nizàn kha chuan ka nu kha ka haw tak zet a ni," ka lo ti ve sap a, a in bulah chuan ka ding a, péng tùra min sàwm chuan," Ni lo ve, hun dangah le, bâkah, a tlai ve deuh tawh bawk si a," tiin ka hnial a, ani pawh chuan," Ka sâwm mai mai che a nih kha, min hnial dàn ka hre châk a," nui sak chung hian a lo ti a.

Biak theih tumin a number chu ka han hmet chhuak leh rih țhìn a; mahse, a tlang thei chuang lo. Hriatpuia kha be tlang thei lo phei ila chuan ka rilru a hah tawh ngawt ang chu. Zan mut dâwnah pawh chuan bei tidawng atân rêng rêng pawh tiin ka han try leh a, a ring ta, ka thin a phu dèp dép mai, ka ngaithla reng a.

"Hello?"

A aw ka han hre thei ta chu ka mittui a lo hnai nghâl kuar mai. Nghet zeta ka phone chu hûmin," Tihpalh lutuk, min ngaidam rawh," ka ti phawt a, a ngawih reng avàng chuan," Kan chanchin engkim kha an hre vek tawh tih ka hrilh loh che avàngin min ngaidam rawh," ka ti leh a.

"D, ngaihdam i ngai hleinem, i nu pawh khân thu dik vek a sawi bawk a," a rawn tih chuan," Ni lo, thu dik vek a sawi lo, thu takah ngai hauh suh aw, min hriat chian kha," ka lo ti vat a, a thaw deuh hak a ni tih ka hria, hrehawm ka ti tak zet a ni.

"I tân hian ka țha tâwk lo a ni tiraw?" a rawn ti ta sup a, rang zet hian," Chutiang sawi suh, i hriat kha, ka tân chuan i țha ber, min duat a, min hmangaih a, nang hian hlimna tak tak awmzia min hriattîr bawk a ni," ka lo ti hlawp hlawp a, chutiang thu chu ka lakah chuan sawi tawh lo se ka duh.

"Ka nu thil sawi kha theihnghilh vek tùrin ka duh che, theihnghilh har chu i ti maithei, i theihnghilh thei lo a nih pawhin kan inkâr tichhetu-ah chuan țantîr suh aw, ka dinna ngaiah ka ding reng a nia," ka ti leh a, ka thu sawi chu âwih se ka ti, ka nu thil sawi khân kan inkâr hi a tichhe vek ang tih ka hlau. Tichhe lul suh se.

"D, ka hmangaih che."

Ka mittui chu a far zãih a, țah chhuah insûm tak chung hian," Kei pawhin ka hmangaih che," ka ti ve sap a, a rilru a hrehawm tih ka hre reng mai si a, heti chung chung hian min hmangaih tih ka hre tho, kei pawhin a hmaaiin ka hmangaihna a pung sauh sauh tih ka hria, ka nuin khatiang thu a sawi khum hnu phei kha chuan amah ka khawngaihna leh lainatna kha hmangaihnaah a inlet zo vek tawh a, a hmaa ka lo hmangaihna sa nèn khân, tunah chuan ka hmangaihna hi a sâng viau tawh a ni.

Ka nu thil sawi khân kan inkâr chu a tichhe ta êm lo; mahse, amah lamah inkiltawihna a siamsak niin ka hre deuh tlat; mahse, ka theih anga nasain ka ngaihtuah a, ka nu min man chhuah theih loh tùr siin ka be reng a, ka ngaihsak reng a ni tih hria se ka duh, a inkiltawihna hi tihrehsak ka duh bawk.

U Kimi'n min rawn tlawh ve teh tlat a, mak ka ti khawp mai; mahse, a hnuah ka nuin chaw eia a lo sàwm vàng a lo ni a, ama thu chuan min rawn tlawh ka ring chiah lo rêng a ni.

Chaw ei lai chuan a hna chungchãngte chu ka pa nèn chuan an zâwt a, a hna chu thla thar ațangin a thawk țan tawh dâwn a ni àwm a, ka lawmpui khawp mai. Tuna a school thawhna tùr phei hi chu a in luah ațangin a hla vak lo lehnghâl a, a lawmpuiawm khawp mai.

"Dinpuii a rawn lêng khât tawh sia, zanin chu min thlah pahin rawn riak se a țha ang," a tih chuan ka nu chuan," Nula tân zàna riah chhuah fo hi a mawi lo, bâkah, i lo hre tawh ngeiin ka ring a, Chhanzuala, kan țhenawmpa ni țhin, Rohlua, a lérh avànga nupui țhen ta fapa nèn khân an lo inkawp niin, duh hniam lutuk! Lo zilh ve teh," a ti leh ta zêk mai.

U Kimi chuan min rawn en zawk a, ka pa chuan," A mak thei țhin, mi  nunhlui țha lo lai sawi chhuah leh țhin hian thil țha a kai chhuak lo a nia, thu pângngaiin a sawi theih," a lo ti hlak a, ka nu chuan," An nupa ințhen chhan ni miau hek le, a nupui lakah a rinawm zo lo va, a lêrhsan a, a dik reng alawm. Chhanzuala pawh hian a pa hi a chhùn lo ang tih a sawi theih hleinem, Sunhlu kûngah thei dang a rah ngai lo," a ti leh a, ka pa chuan," A, sapthei a zàm chhoh chuan rah ve tho e," a lo ti fiamthu lehpek a, za lo deuhin ka khi sak mai.

"I ninawm ziah zuah e, thil țha thu dik ka sawi lai hi chuan rawn fiamthu lo teh, pa ber i ni a, i fate thil țha i hrilh loh chuan tuin nge hrilh ang? Hei hi nu leh pate mawhphurhna a ni, thil țha tinrêng kan hrilh ang, kan inhrilh kan inhrilh chung pawhin kan zawm hleih theih loh hi," ka nu chuan a ti leh hmuar hmuar a, a thil sawi chu  a dikna chen chu a awm ve reng tho mai, zawm tùr thu țha deuh deuh hi chu a sawi fo ve rêng bawk a.

Ka pa chuan," A dik alawm; mahse, thil i sawiin mi dang chanchin țha lo lai kha sawi tel kher zêl lo la, mi dang chanchin țha lo lai sawi tel kher lo pawh hian thu țha chu a inhrilh theih a ni," a lo ti ve a, U Kimi chuan min rawn en vang vang  a, min rawn hnèm ve nge ni a, min khawngaihna a rawn lantîr ve zâwk nge pawh ka hre thiam lo.

"Chhanzuala chu sawi leh ta țhin ila, kei chuan engtikah mah ka fanu kawp ni tùr hian ka remti thei ngai lo ang, hmingchhiatna nei a ni tawh lehnghâl a, khatiang hun te kha tawng leh se a ti leh duh tho ang, insual chîng mâkpa atân ka duh lo hulhual," a ti leh a, ka pa chuan melh deuh ràn chung chuan," Mâkpa ruih chîng leh nupuite kutthlâk chîng  erawh i hmu mâm thei a?" a lo ti zauh a, ani lah chuan," Ngawi teh, an dinhmun a inang lo chiang ëm mai a, khaikhin chi pawh a ni lo, hremhmun leh vàn ram ang vêl a ni daih ang chu," a ti leh tàn tân a.

Ka nu hi zawng, a ngaihna a awm lo a ni e. Ka khawngaih zâwk, heti khawpa dinhmun sâng a ngaina mai hi, keini a fate rual min awhpui vàng chu a ni pakhat tho ang a; mahse, a tih dàn leh lutuk hi chu, a khawngaihthlâk zâwk ka ti mai.

Zànah chuan ka nu remti vak lo chung chuan U Kimi nèn chuan kan inphur chhuak leh ta a, rem ka ruat fel leh diam tawh. Chhanzuala kawtah kan ding a, min lo nghâk ràn tawh a, U Kimi chuan ka scooty khalh lai chu a khalh ta thung a, kei chu Chhanzuala'n nakin deuhah U Kimi inah chuan min thlah thung ang.

An hna lamah a buai ve tawh deuh a, tunah chuan chhùn lamah pawh kan inhmu hman meuh tawh lo, kan chawlh hun a innang hlei thei tlat lo va, zanin pawh hi kan ãm lo thei lo. Ka awm rei deuh hnu chuan U Kimi min lo ngaihtuah tawh ka hlau a, min thlah turin ka ti ta a, ani pawh chuan thu ãwih tak chuan a bike chahbi chu a la nghâl vat a, U Kimi in lam pan chuan kan phit chhuak ta a.

Kawtah, him deuh chinah erawh kan ding leh rih a, chhuk a phal rih tlat lo a ni." Minute khat hnuah i chhuk dâwn nia," a ti a, ka nui hak phawt a, chutah," 59, 58, 57, 56..." ka tih lai chuan," A theih loh, i chhiar rang lutuk," a lo ti hluk a, kei chuan," Âwihawm loh e, ka chhiar rang thlâwt lo," ka lo ti ve thung a.

Kan ngawih deuh vang vang hnu chuan,"Ka lo mãwl e, in ina chaw ka rawn ei zàn khân engati nge i nu leh pa bulah khân ka hmangaih che a ni tih kha ka lo sawi mai loh le?" a rawn ti chhuak hluai a, kei chuan,"' Teuh lo mai, engtikah mah in inkawp ka remti chuang lo ang.' Khatiang khân ka nuin a chhâng ngei ang che," ka lo ti thung a.

"Chutianga min chhàn leh ka bànsan vang vang che ang a ni mai alawm," a tih chuan hnunglam aţang chuan a malah chuan ka chumsak dawt a," Chutiang chu han sawi leh vaih teh," ka ti khar khar zui a, a lo nui hawk a," Engtin nge ka bànsan theih che i rin a? Bànsan leh mai mai tùr che hian ka pan lo che asin," thutak zet hian a lo ti thung a, a kâwngah chuan nghet zet hian ka kuah ta vat a. 

Favàng a rawn inher chhuak a, khaw awm dàn pawh a nuam chho deuh ta; mahse, fùr khua khán min kiansan phal meuh lo deuh a, a rawn sùr leh zauh zauh a; mahse, fùr laia baw tlãwrh tlãwrh ang kha chu a ni tawh lo.

Zan khat chu chaw ei kham veleh ka inbual a, dàwr lama kan buai deuh avàngin ka haw tlai a, in thlen veleh chaw kan ei bawk si nèn, inbualna hun ka nei lo a ni.

Ka inbual zo room ațanga ka chhuak chu sitting room-ah chuan patling 3 leh ka pa chu an lo ţhu a, ka nuin thingpui a lo buaipui mêk a, ka hmuh ngai an nih loh avàng chuan ka pa hmel hriat țhinte an nih ka'n ring deuh ngawt a. Ka nu chuan," Thingpui hi va pe teh," tiin tray chu ka lamah a rawn nawr a, hnial lêm lo chuan ka lo ban ve mai bawk a.

Tûkțhuan kan ei lai chuan ka pa chuan," Inlêng i nei tlat mai, nizàna mite kha Zda palaite  an nih kha," a ti a, ka en nghâl hû mai! Âwih lo tih hriat tak hian ka pa chu ka en a, ka nu ka en leh a, ka nu hlim hmel teh sâwng ațang chuan ka pa chuan thu dik a sawi a nih ka ring zui ve ta mai a, ka thinlungah chuan zahna leh thinrimnain thla a rawn zâr zui nghâl a. 

Chu pa zet chuh! Eng thil nge a hriat ni? A lo tum tak tak a ni maw?!! Thil tih chi pawh a ni lo, a ã let tawp tawh a lo nih chiah hi.

*I FAK DUH CHU FAK MAI LA, MI DANG RÈL TEL KHER A NGAI LO*