☆UNEXPECTEDLY YOU☆ - 18 By Dingdi Pachuau

 ☆UNEXPECTEDLY YOU☆ - 18 By Dingdi Pachuau

"Eng atân nge? Eng nge an rawn palai chhan ni a?" ka ti. Ka hre thiam lo a ni miah lo; mahse, ka thin a rim tlat a, hetia han tih hi ka chãk ve tlat a ni.

"Hre thiam lo der vêl lo teh; mahse, ka'n hrilh chiang ang che, Zda'n nupui atân a duh che a, palai a rawn tîr ta tihna a nih chu, i lãwm em?" ka nu chuan hlim hmel zeta nui sâng chung hian a rawn ti ta a. Ka chhàn hma chuan ka pa chuan," Palai meuh a rawn tirh dànah a duh viau che niin a lang, in inkawp ve viau ni pawh khân ka hria a," a lo ti ve a, kei chuan," Kan ințhen daih tawh alawm, inzawmna pakhat mah kan nei tawh lo bawk. Chuan, pasal atân ka nei dâwn lo," chiang kelh kawlh hian ka ti ta a. Ka rilțâm pawh chawplehchilhin a reh hmak a, țhutna ațangin ka tho chhuak zui nghâl a.

"I va zãm lo tak êm aw!! Ani meuhin nupui atân nei duh chein palai a rawn tîr a nia, a lakah hian induh thei i ni em ni? I tâna țha tùr kan ngaihtuah a nih hi, nu leh pa zahna nei lo lutuk mai," tiin ka nu chuan min hau zui nghâl a, ka pa erawh chuan," Chutia a neitu tùr berin a duh loha neih a tum loh miau chuan, kan thu tlûkna tùr chu a hriat sa ruak mai e," a lo ti thung a, thinrimna kârah làwmna tlêm ka nei ta hlek e.

Ka nu erawh chuan a duh dàn chu a sawi zawm leh nghâl char char a, ka ngaithla chhunzawm lo. Room-ah lûtin ka insiam zui nghâl a, Zda zah theih loh lutuk vàngin thinrim țûnin ka insiam a ngaih phah. Heti êm êma boruak a ngam mai hi mak ka ti, a chângin ka nui leh hawk a, ka nuih a zat vàng erawh a ni hauh lo, heti mai maia min han chawk kual hian ka thin a tirim êm a ni.

Chhanzuala'n a hriat hunah eng tiang takin ngai ang maw? Tunah hian a lo hre ve tawh ang em? Hre lehpek tawh hial ang. Ka thu hmua palai rawn tîrah a ngaih loh hrâm ka beisei. Ka thaw hawk hawk a, he thil hian kan inkâr tibuai lul suh se.

Chhùnah hun remchâng ka insiam a, Chhanzuala ka be sa bawk a, a ina inhmu tùrin ka chhuak leh ta a, ka nuin hetiang hian kan inhmu țhìn a ni tih hre nâ se chuan a thinrim leh ngawt ang chu, a hma pawhin min rawn phãwk țêp tawh kha maw.

Sawi țan dàn tùr chu ka hre lo viau mai a, a thinrim mai ka hlau pah bawk nèn, ka pehhêl ka pehhêl phawt a; mahse, hun kan nei rei lo tih hriain ka hrilh ta nge nge a, ngawi rengin rei fê chu min en reng nghe nghe. 

"Ka thu hmua rawn tîr a ni miah lo a nia, tukinah ka hre ve chauh a, mak ka tiin ka thin pawh a rim viau nghe nghe a... Min ringhlel lo tiraw?" tiin a kut chu ka chelhsak reng a, a hre thiam lo ang a, min ringhlel ang tih mawlh ka hlau mai. 

"Ka ringhlel lo che."

Làwm avàng chuan ka kuah thlawp a, ni e, min hmangaih a, min rin kha ka ring ve tho bawk; mahse, a thin a rim mai kha ka hlau pah ve tho bawk, a thinchhiatna kha a rawn tho thar leh ang tih ka hlau a ni. Kuah pah chuan a tukkhum sam chu ka chùlsak pah a, tunah chuan a lu kawlh mal țhin kha a lo buk ta deuh a, kehsak pawh a theih tawh nghe nghe. A lu kawlh mal kha a inhmeh a, tuna a lu buk ta deuh pawh hi a  inhmeh êm êm tho ka ti.

"Nang chauh hi ka hmangaiha ka duh chu i ni, min rin avàngin ka lãwm e, ka hmangaih zual sawt bawk che," ka ti sap sap a,  ani pawh chuan nghet zeta min kuah pah chuan," Min phatsan lo ang tih ka hria alawm," a ti ve sup a, heti taka min ring hi mak ka ti hial zâwk. Min hmangaih êm vàng a nih ka ring bur a, ka hmangaihzia a hre ve tho bawk nèn, min ringtu hi phatsan ka tum ngai hek lo ang.

"Mahse, i chhûngte'n engtin nge an lo tih ang? Lo remti ta se?" a hnu deuha a tih chuan," A neitu tùr berin ka duh loh chuan engtin vak nge an tih chuan ang?" ka lo ti vat a. Min en vang vang a, chutah," Ka chân thei lo ang che, ka phal ngai lo ang, tu mipa lakah mah," a ti leh sup a, min kuah leh vang vang a. Chumi hnuah chuan duhthawh takin min fâwp leh a, kei pawh chuan duhãm takin ka lo chhâng lêt ve nghâl zat a.

Kan inkâr boruak chu nuam deuh leh duhthawh tak si chuan a lum chho ta riau mai, kan inthlah hlei thei lo va, rilruah thil dang a leng thei lo bawk. A duhthawh êm êm a, kan boruak vàng chuan hah vàng ni hauh si lo chuan kan thâw pawh a rangin kan thinphu pawh a inchhàwn rang ut ut khawp mai.

"D, ka tâ ni rawh."

Boruakah chuan ka zãm ral riai riai ni berin ka hria, min tih dàn ang ang chuan ka awm a, ni lo, ka chunga a thil tihah chuan ka lo pui zêl a ni zâwk. Sofa chungah chuan min mut riai riai a, a nghâwnga ka kuah tlat avàng chuan ani pawh a rawn kún hniam zui zat bawk.

"Mi dang tân ka phal lo che, ka tâ chauh ni rawh," tiin min fâwp mawlh mawlh a, kei chuan chhàn ngaiah pawh ka ngai lo; mahse, ka cheziain ka chhâng a, ka lantîr a, ka 'Yes' thlap a ni tih a hre chiang viau ang chu, a thil tih apiang ka lo thlâwp țha êm êm zêl miau a.

"Hei hi a hnawk," tiin ka t-shirt chunga ka hâk cardigan dum chu min hlihsak nghâl a, kei lah chu a tih ang zêlin, a khawih rem thei tùr ang ber zêl chuan ka lo awm zêl a, ka kawr hlîma ka taksa a kut läwnga a rawn chùl pawh chuan nuam tiin ka lo thaw hak hak mai, ka lo țanpui țha tak zet a ni.

A kawr a hlih lai chuan ka theih ang angin ka lo pui ve a, ruaka a han awm ta chu, a taksa läwng chu chùlsak ve ka châk tak zet, a rawn kûn hniam leh chiah chu a nâk ațangin a hnûngzângahte chuan ka lo chùlsak ve ta riak riak a, ani pawh chu a thaw ve hawk hawk tho, nuam a ti ve chiang mai.

Eng dang mah ngaihtuah lova kan thlen chin piah lam ram pan tuma kan pahnih chauha kan inchùl kual ruai lai chuan dawhkàn chunga ka phone dah chu a rawn nghawr ri ta dawt dawt mai, kei phei chu ka phu zawk lehnghâl, kan thil tih lai pawh chu kan chàwl chiang kher mai, a nghawr ring êm a ni.

A phun sup a, a sawi ka hre lo. Kan la inthlah lo nain ka phone nghawr ri dawt dawt chuan kan boruak 'hot' tak ațang chuan min kai pêng ta tlat a, ka en chhoh lai tak chuan min rawn melh chhuk ve rùn a," I phone chuh, a ngeiawm kher mai," ti supin a inbengkãng ta nghãl a, kei pawh tho vatin ka phone chu ka ban ta nghâl bawk a.

Sêntei a lo ni a, aw khùr ru deuh chuan," Hello?" ka han ti a, ani chuan," I rawn kal tawh dâwn lo em ni? Kan kim tawh a nia," a rawn ti sar sar a, ka meng phâwk nasa ta mai. Sana ka en vat a, minute nga zetin ka lo tlai tawh niin, ka zuang tho ta vat a, ka kawr inhlîm chho vek chu pawt thla a, ka kekawr kâwng pawh chu kan lo phelh tawh a lo ni a, zipper pawh a chanve vêl zet a lo tla thla tawh bawk a.

"Ka tlai tawh!" ka ti chùl a, ka kekawr chu siam țhain ka cardigan dum Chhanzuala'n min lo pêk chu banin ka ha zui nghâl a, chumi zawhah ka sam chu huih țha sawk sawkin," Ka kal nghâl mai ang," ka ti leh vat a, ani chuan," I la tlai chhe lo, buai nuai suh," a lo ti sup a, ka bânah chuan manin a lamah chuan min pawt leh rih a.

Dàwr ka thlen chuan minute sàwm zetin ka tlai ta tih ka hria; mahse, engtin mah min lo ti lo hlauh, han tlai zeuh zeuh châng hi chu a awm ve fo a, țhiante pahnih Remlali leh Famkimi phei hi chu an tlai zauh zauh fo, pi ber pawh hian engtin mah a ti ngai hran lo; mahse, nuam ka ti lo, kei phei chu ka vawi khatna mah ni se ka inthlahrung ru dai mai.

Sêntei chuan min lo melh ralh a, inthiam lo ru fê hian ka nuih sak ringawt, ani hian min rawn phone lo ta se, engtin nge kan awm ang? Ka thianghlimna kha ka hum thei kher ang em?  Kan boruak thlìr lêt kha chuan ka hum thei kher lo maithei a ni. Chuvàng chuan, Sêntei chunga lãwm hlê tùr hi ka ni ringawt mai.

Haw kawngah chuan Sêntei chuan," Rawn pêng la?" a ti sap a, min sâwm lo mah se pèn ka tum hrim hrim, a chhan chu kan chanchin, Zda palai lo kal thu kha ka la hrilh lo va, hrilh ngei hi ka bat a ni, ka țhiannu ber a ni miau si a.

In kan thlen hnua ka hrilh chuan a ngawi vang vang a, kei chuan," Mak i ti ve tho a ni maw?" ka ti leh a, ani chuan," A, mak pawh ka ti vak lo, in inkawp reiin a duh ve êm mai che a, a han pelhê ta zauh mai pawh a, chuti chu ni lo se chuan... in inkárah 'spark' awm lém lo mah se tûn thleng hian in la inkawp ka ring asin, a duh hlum lo chauh che chu a nih ber hi a," a lo ti a, a nui pah deuh bawk a.

"A tihzahthlâkzia hi, engtin nge a chhûngte'n min ngaih ang? Palai phei chu hetiang thilah a mai maia intirh chi pawh ni nghâl lo chuan. La inngaizâwng reng chu ni ila chuan a la hriat thiam theih deuh a...Ka thin a tihrimzia hi," ka ti ve thung a, Sêntei chuan," I chhûngte'n engtin nge an lo chhàn a? Eng angin nge an lo ngaih?" a lo ti leh a.

"I hriat vek tawh kha, ka pa erawh chuan ka thu a ngaipawimawh deuh a, chhûngte han ràwn chiam ngai pawh a ti lém lovin ka hria, ka neih duh loh thu kha ka sawi nghâl sia, chuvàng chu a nih ka ring," tiin ka chhâng a, rang zet hian," Chhanzuala'n engtin nge a ngaih ve?" a lo ti leh vat a.

"Min ring, ka tihtîr a ni lo tih a hria a, bâkah, kan inkârah thil fel lo a awm lo tih a hria alawm, min ring tâwk a, kei pawhin ka ring tâwk bawk a," ka tih chuan," A țha a nih chu, a lo thinrim ang a, in inkâr a chhiat phah thei mai ang tih ka lo hlau deuh a," a lo ti ve leh mai a.

Ka haw tlai leh ta deuh si a, ka nu a lo âng leh nasa mai. Ka ngawi reng a, a duh chen chen âng mai mai teh se, ka haw tlai ve miau si a, a àn rei deuh hnuah a inâng lungâwi ve mai ang chu.

Chaw einaah âng pahin min han zilh leh tlauh tlauh a, ka pa pawh chuan eng eng emaw a lo sawi ve zauh zauh a; mahse, keimah chauh ni lovin ka nu âng reng chu a khap pah deuh bawk a," Tleirãwl të a ni tawh bîk lo va, mi puitling chin leh mahni tâna țha hre rual a ni alawm, a zawn thiam leh a hma hun a nuam ang a, a fuh loh deuh leh hrehawm a ti ang a, lo inrawlh chiam theih pawh a nih loh hi a," a ti a, ka nu chuan,"Kan fanu a ni a, a hma hun hrehawm tùr ka hmuh lâwk vànga zilh ka ni, nulât laia kan duh leh kan hlimna nia kan hriat hi pasal neih hnuah chuan a lo ni tawh lo va, pasal neih hnua thil danglam dàn engkim, hun harsa leh hrehawm kan lo tawn tawha kan hriat tawh avàngin ka zilh a ni, kha pa Chhanzuala nèn kha chuan an hma lam hun a thim chiang êm mai, țhen mawlh ang che. Zda neih i tum lo rau rau a nih pawhin kha pa kher kha chu țhen ang che, nu leh pate duhpui nèn ngeia dam chhûng hun hman hi a țhain malsàwm dawnna a ni ngai, engtin nge Zda hi i duh loh tlat theih ni? An chhûngkaw khawsak en pawhin mi țha an ni tih a hriat hliah hliah a, fapa mal a la ni zui, ani'n a lo duh hlauh che chu i vànneih tehlul nèn, bêr bûr che hian," a ti leh bawrh bawrh a.

Mi tih dàn pângngaiin ka pa chuan ka u Kimi leh kan chhûngte mi dang dang Lungleia awmho chu a'n râwn kual ve a, an rawn kal khâwm ve a; mahse, ka thutlûkna an hriat sa avàng erawh chuan an thutlûkna chu a hriat sa ruak, a hming maia țhu khâwm ve an ni ber ang chu.

Pu Mawia, ka nu chhangtu chuan," Engah nge maw Zda chu i han duh loh viau ni? I neih loh chuan i senior mai dâwn, a pa lah ka mi hriat chian a ni a, mi fel tak a ni asin," choka lama a rawn kal chuan a rawn ti a, thingpui lumin U Kimi nèn dawhkàn kïlin kan țhu a, ka chhàn hma chuan," Nang lah hi, i pasal țhen hi i ngeih a nih àwm hi, a hma ai khân i țha ta tlat mai," tiin U Kimi chu a rawn fiam zui nghâl a. Ani chuan," Pasal neih ai chuan neih loh hi a lo nuam zâwk daih sia, kan zalèn zâwk bawk si nèn, chu chu ka ngeih a ni ang," U Kimi pawh chuan nui chung hian a lo ti ve a, kei erawh chuan chhâng ve lovin ka nui tawp ringawt a.

Pu Mawia kal hnu chuan zàwi sap hian," Ka nu chu a âng leh nasa àwm mang e..." a ti vang vang a, chutah," Mahse, ka nu âng hi chu engah mah hian ngaih duh loh tùr a nia, a duh dàn ni lovin kan awm miau mai si a, mêna thlâk thiam mai tùr a ni. Chuan, Chhanzuala nèn chuan in inkâr a la țha zêl a, Zda palai rawn tirh chungchângah hian eng nge sawi a nei em?" tiin min zâwt zui sar sar a.

"Ka hrilh fiah nghâl a, a hre thiam viau, thinrimna pawh a nei lo. Ka thu hmu lova palai rawn tîr ve ringawt a ni tih a hria a, min ring tâwk ve viau bawk," tiin ka lo chhâng a, thingpui a rawn so chian tâkah chuan ka tho vat a, ka buaipui zui ta nghâl a. 

Palai an rawn kal leh chuan ka pa chuan țha takin a lo dawngsawng a, an hmêl hmuh chu nuam ka ti lêm lo, bâkah, rem thu an hàwn dâwn bawk si lo va, anni hi chu an zahawm ka ti, Zda vàng vek a ni, ințhen tawh hnu, inngaizâwng tawh lo pui hnêna palai han tirh tlat chu, thil tihchi pawh a ni lo.

Zda pawh a rawn lêng ngai ta rih lo, a zak ve pawh a ni ang, a sârhù lai a ni ve a, mi hausa fapa mal niin keiin ka lo hnâwl ta si a, a la na ve viau maithei bawk, engah nge palai a rawn tirh ngawt ni?  Mi tam zâwk chuan mãwl min ti ngei ang; mahse, thil hre chiang lo chiahin mãwl min tih ka ring thung. Inneihna hian mi pahnih dam chhûng a daih tùrah ka ngai a, chu pawh mi pahnih inhmangaihte inkârah chauh, duh hun huna tih tàwpa duh hun huna bul țan lehna chi pawh a ni lo, chuvàng chuan, uluk tak leh fîmkhur taka inneihna hi chu puitlin chi niin ka ngai tlat a ni. Zda hi ka hmangaih lo va, ani'n min lo duh a nih pawhin U Kimite inneihna ațang hian mi pakhat ringawtin a duhna a tihpuitlin fuh tâwk loh theihzia ka hmu chiang tawh e.

Inrinniah hun thâwl ka neih avàngin Chhanzuala min sàwmna angin kan lêng kual a, Inrinni bâk hi hun thâwl leh hun ngaihchàn rún ngai lova  inhmuh theihna hun kan nei si lo va, hun dangah kan chhuak dùn khât bawk nèn, vawiin chu kan tlãn kual nasa viau a ni. Tlai lamah U Kimi inah chaw ei ka tum sa bawk a, ka hmanhmawh lo ve khawp mai.

Kawng kual zau țha deng dawng laiah chuan dingin thing buk hnuaiah kan chàwl rih a, țhutna a lo awm ve zêl bawk nèn, boruak pawh a lum deuh nain a zia viau e. Ka han hawi kual a, favàng boruak chuan lung a tilêng ve deuhin ka hre nghe nghe, thing lian deuh leh a tê deuh zârah chuan țângțialin a rîl a lo zam ve chuai bawk a, a ţhen chu hmuh awlsam deuh deuh a nih laiin a ţhen erawh hmuh a awlai lo deuh a, kan têt laia Chhanzuala u Zawmdiki nèn Țângțial in a rïla in a sak ve kan tihchhiatsak nasat theihzia ka ngaihtuah chhuak a, mitthlaah fiah zetin a rawn lang uar uar mai. Țângțial rîl zam hmuh hi chuan Favàng ti-favàng ngawih ngawihtu ni hian ka hre țhin. Chutah, kan chawlhna thing zârah chuan thereng chi khat Lelte a kiu vang vang bawk a, boruak chu a eng emawti lunglènthlâk riau mai.

"Țângțial rîl zam kan tihchhiatsak nasat theihzia tak kha," ka ti chhuak sap a, ani chuan," Eng maw?" a lo ti vat a, ani hi chuan a hre chhuak tawh kher lo maithei, a la tê ve deuh a, a la naupang ve deuh bawk nèn, ka sawi nawn duh ta lo va," I bawp a kham tawh ngawt lo maw? Kan tlãn kual nasa si a, i ning tawh ngawtin ka ring," ka ti ta zâwk a.

"Nang nèn chuan Hremhmun thleng pawhin ka tlãn peih ang chu!" a lo ti a, phâwk deuh hrá hian ka en a, a lo nui suk thung a.

"Ka ti tak tak alawm," a tih leh chuan," Hremhmun thleng êm êm chu ni lo ve, bâkah, ka duh lo bawk," nui chung hian ka ti ve a, chutah, kan hma zâwna Țângțial che dar dar chu kâwkin," I ei ve hman em kha?" ka ti leh ta a.

"Ka ei ve hman, inngai upa viau suh," a ti hluk a, nuih var var pah hian," I u nèn khân kan suasam nasa thei êm a, i hriat hman kha ka ring chiah lo deuh a," ka ti a, ani chuan," A serh zînga a serh ang ka nih kha, bâkah, min en naupang viau suh," a lo ti leh hluk a.

"Favàng boruak hi chu a nuamin a lunglènthlâk ve ngawt mai, ngaih ëm êm nei lo mah ila lung hi a lêng ve deuh veng veng thei nia, nang, i lung a lêng ve ngai em kha?" tia ka zawh leh chuan a lo chek tlak a,"Nang ka ngai che tih lohah hi chuan ngaih ka nei ngai lo va, lunglèn pawh ka tum ngai lo," a lo ti leh mai a.

"I kum chhir a la tlèm deuh vàng a nih kha. Chuti a nih chuan khawtlâng lunglèn an tih angte hi i hre lo tihna a ni ang a. Khawtlâng lunglèn hi chu a hrehawm viau rualin a nuam ve deuh tho bawk a, nun hi a tihnawm rualin a khawharthlâk riau bawk a, hrehawm leh nuam inpawlh a nih deuh ber chu," ka tih chuan,"A nawm dâwn loh tawp chu," a lo ti leh vut a.

"A nuam ve tho bawk e aw, hringnun hi a tihringnun ve alawm. A nih leh, favàng ni tla tùr hi nge mawi i tih Fùr hun laia ni tla tùr?" tiin ka zâwt leh a, ani chuan," Ka thlîr ngai lêm lo, a inang vek lo'm ni?" awlsam zet hian a lo ti leh mai a. 

A ngaihna a awm hlawl lo. Khuarèl mawina hmu thiama hre thiam tùr hian a la thlîr chhin ngai lo a ni ngei ang chu, bâkah, ani zawng, hetiang lam hian a lung a lèn ngai lo tawp ang, lunglèn a tum loh thu a sawi tawh kha, kei lo mi dang ngaih a neih loh thu a sawi bawk.

"Ngawi tak rawh, tlaiah ka thlìrpui dâwn che nia. Favàng ni tla tùr hi a mawi viau a; mahse, kei chuan fùr hun laia ruah sùr zawh hlim deuha ni tla tùr êng thiang zet mai leh ruah châmbâng hnah hringa la bet, ni zungin a han chhun tle sât maite hi mawi ka ti daih zâwk, hnimhnah rêng rêng a lang hring nghalh hlawm bawk si a, bàl paw deuh hmuh tùr a awm ngai bawk si lo," ka ti duah a.

"I sawi tui bawk a, a ngaihnawm hle mai!" a lo tih chuan ka nui hak a," Mawi i ti dâwn teh a nia, i thlîr vang 

 mai ang," ka tih leh chuan," Chûng ai chuan ka bula țhu hi mawi ka tiin thlìr vawng vawng ka duh zâwk ngei ang," a lo ti thung a, min en pah reng bawk a, min tilài deuh nain lài ang erawh chuan ka awm duh bîk lo va.

Tlaiah chuan ni tla tùr chu ka thlìrpui tak tak a, mawi a tih thu chu a sawi chhuak lêm lo nain a rûk tak chuan mawi a tih ve tho ka ring, kei chuan ka phone la chhuakin," Ni chhinchhiah tlâk tak a ni dâwn si a," ka ti a, ka click zuai zuai a, ani pawh chuan," Camera ka'n la ang e aw," a ti a, in chhûngah lûtin a camera chu a va la chhuak a, a han click ve bawk a, kan pahnihin, ni tla tùr lang chuan kan la dùn bawk a. Vawiin zet zawng, Chance thâwl tak nei dùn mah ila kan induhna chu cheziaa lantîr kan tum tawh bîk lo, kan han induat deuh châng pawhin a hmaa kan chëtsual teuhzia kha ka ngaihtuah chhuak a, kan tlãn chak deuh dâwna ka hriat chuan a break ka rap zauh ta zêl a, kan him viau bawk a ni.

Kan in ațang hian tlai ni tla tùr hi thlìr a remchâng lutuk lo va, chumi tûk tlai ațang chuan Chhanzuala chuan thlalâk min rawn thawn ta ziah a, tlai ni tla tùr thlalâk ngei mai chu. Ani zawng, a awmna ațangin thlìr a remchâng êm a, thla lâk pawh a thiam viau mai, a click mawi thei phian asin.

Kan inkawp chho tluang viau a, in lamah ka nu erawh a lungawi lo hmel hmuh tùr a tam thung. Zda ka nei duh lo chu a hre thiam thei tlat lo va, a sawi chhuah azâtin Chhanzuala chu țhen tùrin min ti a, mâkpa atân a pawm theih ngai loh tùr a sawi chàmchî țhin. Hrehawm ka ti thei a nia, ka pa pawh hian Chhanzuala hi chu min duhpui lo tih ka hre ve tho a, ka nu angin a sawi lang chhên ve lo mai a ni. Room-a ka awm hnu hian Leona Lewis  hla 'Bleeding Love' kha ka ngaithla ziah a, Chhanzuala hi pângngai takin en ve se ka ti a, a nunhlui leh thil tih kha chu a liam tawh a, a pa thil lo tihsual tawh avànga  amah thlenga rin loh a han kai chu ka natpui a ni, khati khawpa ka nuin awmze nei taka a țawng khum hnuah pawh khân min kalsan phal lo a ni a, ka chhûngte hian ka kalsan theih bîk lohzia leh Chhanzuala'n min mamawhzia hi hre thiam se ka ti; mahse, an hre si lo, chu chuan ka rilru a tina țhin a ni.

Zan khat chu min rawn message ve mial a, min be lova min rawn text chu mak ka ti ru viau mai. Tlai ni tla tùr pic min rawn thawn bâk hi chu min rawn text khât viau asin.

*D, keimah vànga i tawrh tùr ka ngaihtuah hi chuan engati nge ka vawn tlat che le tiin ka inngaihtuah țhin; mahse, kaltîr che hi ka thei si lo, ka mihring mamawh ber leh min hre chiang bertu i ni si a*   a rawn ti a, vawi thum lai ka chhiar chhuak.

A rùi em ni le? Hetiang lam hi a sawi chhuak khât asin, nge vawiin lamah thil tawn a nei ni zâwk le? Ka chhuak lo va, kan inhmu hauh lo, engati nge le?

*Ka hmangaih che, nang pawhin min hmangaih kha, min kaltîr han tum vaih teh, i châk lo ang*  tiin thinrim insehruh sticker nèn ka chhâng lêt a, han biak ka duh viau nain amahin a duh lo a nih ka ring teh ngawt a, chuvànga text lêt ka ni.

Mahse, ani a thutak hmel si a, ka chhàn dàn chu duhkhawp lovin *Kan inhmangaih chuan eng thil pawh tuar kan huam tùr a ni dâwn lo'm ni? Ka nu vànga min ngaihtuah a nih chuan engah mah ka ngai lo a nia, a lungawi lo deuh țhìn a, a bul ber chu keima thiam loh a ni ve bawk a, chutiang lam chu ngaihtuah duh suh*  ka ti leh a, ka thawn leh a, chutih rual chuan a message a rawn thleng ve chiah bawk a.

*A châng chuan ka kawp miah loh tùr hi ka kawp che niin ka inhria; mahse, ka inchhîr miah lo va, kawp loh che ka tum hek lo, i bula ka awm loha ka hmuh loh hlek chein ka ngai che a, tunah pawh hian ka ngaih dàn che hi mak reuh tak a ni, i bula awm ka thlâkhlelh êm êm chhan chu i bula ka awm chuan mi pângngai tak leh hma lam hun êng nei veah ka inngai thei a, engkim ka theihnghilh țhìn, mi dang awhna nun pawh ka nei ngai hauh lo bawk. Ka bula i awm hian min tifamkim a, nu leh pa leh chhûnglehkhat nei hauh lo kha nu leh pa nih fãwmin ka tân chuan engkim i ni; mahse, ka bula i awm loh hi chuan chûng ka kalsan nunhlui, ka nuna bet tlat lawi si chuan min rawn chènchilh leh țhin*   

A type thui dal dal kher mai; mahse, chhiar nuam ka va ti si êm! A tàwp sentence erawhin min pawt deuh mai pawh a.

*Ka lãwm e, kei pawh i bula ka awm chuan ka khawvêl hi a pâr a, englim hi a thar sur mai țhìn. Thil eng pawh tawrh huama ka thlan i ni a, phatsan che hi ka tum ngai lo. Hmangaihna dik kawng chu a bumboh a, a tluang purh ngai lo, chu thu-ah chuan ka innghat hmak mai*         tiin ka chhâng lêt a. Chu mai chu duh tâwk lo chuan   *Rin loh tak maia nang ka tawng leh che hi Pathian ruat a nih ngei ka ring, hmangaihna  awmzia min temtîrtu i ni si a*  ka ti zui leh a.

Min rawn chhâng har deuh hlek a, a phone a kalsan lawk a nih ka ring deuh, kei pawhin bathroom-ah ka luhsan ve lawk tho a, ka chhuah chuan a message a lo awm vàng tawh, ka han chhiar a.

*Pathian ruat ngei i nih loh pawhin nihtîr ka tum fan ang, ka thâwk tàwp thleng pawhin ka hmangaih dâwn si che a. Ka nun dàn zawng zawng hriaa min en tlêu ve lotu leh min dawm hrâm hrâmtu i ni tih hi ka theihnghilh ngai hauh lo bawk ang, nangmah vàng hian nun dàn țha pawh hi zawh ve ka tum hrâm hrâm a ni. Hêng zawng zawng hi min hmangaih vàng vêk a ni a, chuvàng chuan, KA  HMANGAIH LUTUK CHE*  tih a lo ni a, ka chhiar zo chu ka mittui a tling kuang mai, a bulah chuan awm ila chuan ka kuah vawng vawng ang a, ka thlah phal tawh kher lo maithei a ni.

A tûka tûkțhuan kan kîl lai chuan ka nu chuan," Chhanzuala khân aia upa zahna a nei rêng rêng lo nia, khatiang mipa kha ka fanu bialpa ni tùr hian ka remti thei ngai lo ang," a ti chhuak leh a, ka pa a kham tawh teh tlat a, pâwn lamah a chhuak lawk a ni.

Ka chhâng lo va, ka rilruah erawh chuan chu chu eng vànga rawn sawi chhuak ngawt nge a nih ang aw ka ti deuh a, engtik laiin nge aia upa zahna a nei lo tih chu a lo hmuh bîk ni? 

"A nu rual zet ka ni a, ka thu sawi chu a bengrawngah a thun ve tùr a ni a, min zah der ve tùr a ni bawk; mahse, zah der chu sawi loh, min hnial fithla nghâl hmak thei a nia, a awm dàn ngil ngel te hi ka rilrem zâwng a ni lo," a ti leh hmiah hmiah a, kei chuan," Nu, i duh dànin mi hi an awm vek thei bîk nâng, nang pawh mi duh dànin i awm thei bîk lo ang," ka lo ti dêk dêk a, rum zeta min rawn melhin," Nangmah vàng hian min nuihzat ngawt ta ve ang, inngaihtuah chiang ve ta che. Nang aiin a naupang a, a awm dàn zawng zawng i hre vek bawk. Mi țha a ni lo, pasal atân te hian i lo ngaihtuah ngawt ngawt ang e, chu thil ka sawi vàng chuan inrûk lamte hi ngaihtuah chhin hauh suh, a fa pai eng ang pawh ni se ka pawt țhen tho tho ang che u, khawi hmunah pawh awm mah la, ani kher hi chu i neih ka phal ngai lo ang," a ti leh hmiah hmiah mai a, râpthlâk ti zetin ka nu chu ka en tlawk tlawk ringawt.

Inrûk maw? Ka la ngaihtuah chhin hauh lo, Pathian leh kohhran hmaa, an hriatpuina ngeia pasal neih ka tum țhin, inrûk kher hi chu ka la ngaihtuah phâk lo, ka duh hek lo. Ka hma lam hun chu thim viau angin lang mah se kan hma lam hun tu mahin kan hre hauh si lo, kan taksa a danglam tial tial angin kan rilru pawh a lo danglam ve tial tial thei, tuna a rilru put ang reng hi a pu reng thei dâwn em ni? 

"Ka zak lo, ka zak hauh lo, ka fanu tâna ka duhpui loh na nâ nâ chu, engah nge ka hrilh mai loh ang? Lo inthiar fihlîm tùrin ka hrilh a nih kha, Zda i neih duh loh chhan pawh kha amah vàng a ni tih ka hria, i nu ka ni a, i tâna ka duhnaah chuan ka theihtâwp ka chhuah ve ang chu, ka fanu i ni alawm, i tân chuan a tling hlawl lo a ni," a ti leh hmuar hmuar a.

Nizàn khân hei vàng hi a ni ngei ang, Chhanzuala min rawn text chhan kha, ka nu hian a va hmu tih hriat reng, hrehawm a va ti dâwn êm! Thu țha a va sawi dâwn tawp si lo, țha tak leh zaidam takin a va dàwr hauh lo ang le!

"I va hmu a ni maw?"

"Hmu ang chu, ka hmu thei lo em ni? Ka hmuh theih loh tùr khawpa sâng em ni a nih a? Kalsan vang vang tùr chein ka hrilh a nih kha. Mahni phû tâwk pawh hre lo!"

Ka rei leh!

*INNGAITLÂWM LA; INNGAI HNIAM LOVIN, MI FING I NI MAI*