☆UNEXPECTEDLY YOU☆ - 19 By Dingdi Pachuau

 ☆UNEXPECTEDLY YOU☆ - 19 By Dingdi Pachuau

Nilêngin ka rilruah Chhanzuala chu a awm a, vawiin phei chu chhùnah kan inhmu lo lehnghâl a, hmuh ka duh viau rualin hmuh ka inthlahrung ru deuh hlek bawk, ka nuin a va kalchilh burh mai si a, zâwt ta ila ka nu nèn an inhmuh dàn leh a va țawng khum dàn chu min hrilh duh kher lo ang tih chu ka hre chiang a; mahse, hmuh ka duhna chuan min bùk rit ta zâwk a, nizàna a message ka dawn vàng pawh khân hmuha kuah vawng vawng ka duh.

Séntei ka thlah haw chuan ka kual chho nghâl a, hrilh lâwk kher ngai ka ti lo va, a lo awm chuan a thinrim loh hrâm ka beisei bawk a ni.

A lo awm ngei tih a kawngkhàr inkalh lo ațang chuan ka hria a, ka thaw huai mai. Ka nuin a țawng khum vànga a rilru hrehawm a lo rui thle kual mai mai ang tih ka hlauhna chu a reh nghâl sawt bawk a, kawng pawh kik duh lo chuan ka han pawt hawng nghâl hrâwk a.

Stool sáng zet chungah a lo țhu a, kawr pawh a lo ha lo. Ka lût chu min lo en a, ka pan phei zêl a, kitchen island chunga a thil lo inchhawp ka hmuh chuan ka rilrua ka lo ngaihtuah chu a dik ngei a ni tih ka hre nghâl a, chu thil rim pawh chuan ka hnâr a rawn verh nghâl zak bawk.

"D'Pui, i lo kal maw? Ka lo beisei ru reng na chein ka beisei ngam chiah lo che a..." sehchilh lek lek hian a lo ti a, a hmêlah chuan rùi chhe hmel chu a pu hauh lo; mahse, a rui ve thawkhat tawh tih chu a țawng dàn ațang chuan ka hre thei mai a. Țawng lo chuan ka pan hnai zêl a, duat tak hian ka kuah a, nizàn lamah pawh a in nasa tawh a niang, a rim ațang chuan ka hre thei ruai mai.

"Min hau dáwn em?"

Ka rilru a tina tak zet a ni. Hetia a awm chhan lah ka hria, ani hi chu vènpui reng ngai a la ni ve a, a  zia ve tawh teh réng nèn, ka nu thil tih chu pawi ka ti, a rilru hrehawmin a rehna a zawng ve a ni si a.

"I thin a rim chuan min àn khum mai rawh aw; mahse, ka thlah thei chuang lo ang che. Ka vuan tawh che a, thlah leh mai mai tùrin ka vuan ve lo che, i nu thu sawi vàng emaw mi dang thil sawi vàng emaw eng thil vàng pawhin, ka tháwk tàwp thleng pawha ka vawn tùr i ni si a."

Ka duh aia rei ka awm phah a; mahse, pawi ka ti lo. Ka hnem a ngai a, min mamawh hun tak a ni si a, ka hau duh hauh lo; mahse, a harhfìm hunah erawh zaidam takin ka zilh thung ang, a rilru tina lo thei ang berin. Mipa nêp tak ni tùrin ka duh hauh lo va, mipa nêp tak chêt anga che tùrin ka duh lo bawk, ka nu àn khum vàng mai maia rilru nâa chau mai lo tùrin ka duh; mahse, mipa pà ve tak pawh ni mah se a rilru a na ve thei tho a, dimdáwih taka ka enkawl chhoh a ngai a ni. A fahrahna hian dinhmun hnuaihnung zâwkah hnûk lût lo se, mipa takin a hmaa a tih tùr chu ti tùr leh a hmangaih tân chuan bei zêl tùrin ka fuih ang, mi hmuhsit theiha awm tùrin ka duh lo. Ani phei hi chuan rilru a nei a, vâkrawlài mai mai lovin mahni inchàwm zawh tumin computer zirna lam pawh a buaipui chho mêk zêl a ni a, puitling taka a hlen chhuah ka duh a ni. Tichuan, hmuhsit theihin a awm lo ang a, a fahrah vànga hmusittute ngei hian a hmuhsitawm lohzia a tak ngeiin hmu rawh se.

"Vawiin tlai chu kan pahnihin ni tla tùr thlîr dùn ila?"

Hnial ka hreh avàng leh awmpui ka duh êm avàng chuan ina ka haw huna ka nu min hauh tùr pawh ngaihtuah duh lo chuan a duh chu ka tihpuitlinsak a, tlêmin a la rui deuh bawk nèn, min thlahlel khawp mai. Min kuah chial reng mai a, ka khap lêm lo. Inbual erawh a inbual tawh a, hmuh pawh a nuam tawh, a rim pawh a chhe tawh lo.

Ka haw dâwn thleng chuan min la thlahlel tih hriat tak hian min la kuah reng a, thil dang țawngkain sawi lo mah se ka bulah a hlim ve tih ka hria a, min thlahlel êm êm bawk. Min thlahleltu hi ka thlahlel ve tho bawk a, a rilru nâ leh hrehawmte tihdamsak vek thei lo mah ila,"Ka bula i awm hi chuan ka hlim a, thil țha lo lam pawh ka theihnghilh țhin," a ti ve thlâwt a, chuvàng tak chuan hawsan hi ka hreh ve țhin a ni.

Ka nuin min lo melh kur kur nain min lo àn khum lo teh tlat a, a hnuah phei chuan ka en duh lo ve tlat a, min melh kur kur reng em tih pawh ka hre tawh lo. Melh mai mai chu a na lo êm mai, hetia ka chunga a awm leh Chhanzuala a duh lohzia a seprawtui viau hian ka rilru hi a hneh hauh lo va, hneh ahnêkin a luhlul zual sauh sauh zâwk ni maiin ka hria. Fanu sual angreng tak chu ka lo nih dâwn hi, hetia nu leh pate duh loh ka han duh viau mai hi, an duh loh dàna ka awm chuan fanu sual ka ni chu a ni ber ang chu.

Zan khat chu U Kimi inah zanriah ka ei a, chaw kan ei kham chu dàwrah ka kal lawk a, dàwr neitunu nèn online shopping lam kan sawi tui deuh avàngin minute 15 vêl zet chu ka țhu ve nghe nghe a, ka hawa in ka luh hma chuan U Tluanga aw ngei maiin rùi tih hriat taka," I lo haw duh loh chhan hi bialpa i neih vàng a ni ngei ang, a ni tiraw? Engati nge i zêp tlat a? Ka țhen hauh lo che a, nangmah zâwkin min tlàn chhuahsan a nih kha, i bialpa chu kei aiin a hausa em? I nu khân min min chhuahsan hnu khân a hau hrep lo che maw? A rawn tirh haw leh nghâl che ka ring a nia, hausa kha a làwm ve si a," a ti chhur chhur chu ka hre vek a, a țawng zawh meuh chuan in chhûngah ka ding reng tawh. Engtin nge U Kimi in luah hi a lo hriat theih ni? A thil sawi  chuan min tizak ru chem chem nain min tihthinurna chuan a bùk rit zâwk. A nupui chunga a thil tih țhin hre duh lo lêkin bialpa neiah a rawn puh ngam a nia! Zak lo lutuk, rui chung lehnghâlin a rawn kal zui, an hausakna pawh a rawn chhuang khawp e!

"Khawngaihin, min chhuahsan mai teh," dam takin U Kimi chuan a ti a, a țawngkam a dam viau nain a mit erawh chuan chiang takin U Tluanga chu a melh kal mai a, a ding ràn bawk a, kei pawh a bulah chuan ka va ding hnai vat a.

"Oo...Hei tu nge ni? Ka hriat hnu a ang hle mai ka ti, ni dáwn tak e, Dinpuii kha i ni tak! I u hian bialpa a nei tiraw? Chu chu min țhen chhan pawh kha a ni tiraw?" a rawn ti leh chhur chhur a, a hmel chu zu in nasa hmel a pu a, a hnár pawh a sen tawh khawp mai.

"U Tluang, hetiang mai maia awm tùr hi i ni lo asin le, hna țha tak i nei a--" ka ti a, ka ngawi leh dat a, ka lo sawi ve chiam tùr a ni lo tih hre chhuakin," Bialpa a nei lo. Chuan, khawngaihin, i haw thei tawh ang em? Lungmuang taka awm kan duh si a," ka ti ta zâwk a, ani chuan," In unau chu in inchhan hle mai maw? Hetiang ina ka rawn kal duh hi lãwm hlê zâwk ta che u, ka awm pawh in tinuam nek lo ve. Kimi, hei hi lo hre rawh, i bialpa nèn chuan nuam in sa hauh lo ang," a ti leh nung nung a, thle deuh lãk lãk hian U Kimi chu a en a, chutah, rin loh takin a inher nghut a, kawngka lam chu a pan zui ve ta nghâl a.

A chhuah hnuah pawh chuan țawng lovin kan din ngaiin kan ding deuh reng phawt a, harh chhuak hmasa zâwkah țangin," Engtin nge helaiah i awm tih a rawn hriat theih le?" tiin ka țhu ta nghâl a, ani pawh chu ka piah deuhah chuan țhu thla vein," Ka hre miah lo mai, min lo zui ru te hi a ni lo maw le?" a ti ve sap a. Kan boruak chuan a zir êm avàngin U Tluanga thil sawite chu kan sawi zui a, ka nu chungchâng a sawite chu dik viau mah se a zahthlâkzia chu kan sawi dùn melh melh a.

"I hlau em? Kan inah rawn haw leh daih la?" ka tih chuan a nui sak a," Kan ințhen tawh a, hlauhna ka nei tawh hleinem, a duh duha kut a thlâk theih kha ka ni tawh lo," a lo ti mai a, a rilru hi nêm viau țhin mah se tunah hi chuan a danglam ve ta viau a ni.

Mut hmunah chuan ruih țhat lohzia leh hlâwkna a awm lohzia chu ka ngaihtuah reuh reuh a, mualphona leh zahna thlentu, chhûngkua tihrehawmtu leh nupa inkâr tichhetu a nih piah lamah buaina zakhua thlentu a nihziate chu ka ngaihtuah a, a țha lo tak zet a ni. Chhanzuala pawh a beer in țhin chu thuhran, eng emaw chânga whiskey leh eng zû zû emaw a in zauh zauh chu sim tum hrâm hrâm se, sawisêl mai lovin țha taka hrilhin pui bawk ila, chuti lo chu kan inneih hunah U Kimi pasal nei ang mai kha ka ni lo ang tih a sawi theih hauh si loh a, a awm dàn danglam chho ve hret hret erawhin min tilãwm viau nain insùm theihna leh chhia leh țha hriatna hlohtîr theitu, he thil hi a kalsan ka duh a ni.

Chhanzuala rilru hi a châng chuan a puitling ve riau țhìn a, a châng erawh chuan a naupangchhiain a ina ka kal chânga ka haw dáwn hian min chelh leh țùng țúng țhin bawk a, han hawsan mai hrehawm lek lekin min siam zauh zauh. Tlãi khat pawh ka haw tùr chu min pawm bet tlat pek a," Haw tawh lo la, kan innei nghâl mai dâwn alawm," a ti pek a nih chu. Inneih chungchâng a sawi lang chu mak ka ti viau nain ka haw a phal loh vàngah ka ngaihsak a, ka sawipui zui lo.

"Ka haw tlai chuan a țha nâng," ka ti a, ani erawh chuan min pawm kãngin Sofa lam min panpui a, chutah chuan min bawh bet a," Haw tawh lo mai rawh," a ti leh sup a, min rawn fâwp zui nghâl a. Min thlah duh hauh lo, a che zui zêl bawk si a, ka rilruah hlauhthàwnna, hei aia thui kal mai hlauhna a rawn lût zawk a.

"Hetiang hian awm lo teh ang, thil țha a ni miah lo a nia," ka tih pawh chuan," Ka chelh theihna che awmchhun niin ka hria, chuan, kan innei nghâl mai dâwn alawm, min hmangaihin min thlahlel ve tho a ni lo'm ni? D, rem ti mai teh," a lo ti leh a, ka kawr chu hlîmin ka âwm chu a hmai chuan a rawn nawr zui a, ka thaw hawk a.

"Thil dik a ni lo, kan insûm thei lo ang," ka ti leh țâwk țâwk a, ka kut pahnih ka lu chung lamah a kut pakhatin a nem bet tlat si a, a chak roh si nèn, ka che hlei thei lo.

"D, ka ngèn che, inneih chu i duh ve lo em ni? Ka hmangaih che ka tih kha, ka thisen zungzâm zawng zawng pawh hian an hmangaih che asin, ka hmangaih vàng chein ka zah chein ka insûm țhin bawk, innei tawh mai ang," a ti ve thung a, a thil tih lai chu a chhunzawm mawlh mawlh tho a.

A mal chu kherh behsak tlatin,"Min neih duh phawt chuan ka nei duh lutuk che alawm; mahse, thianghlim taka Pathian leh kohhran mipuite hmaa pasal neih hi ka lo tum ve țhin a, ka thianghlimna pawh ka hum ve țàng țâng bawk a ni. Tuna hetia kan awm mai chuan khâng ka lo tum vena zawng zawng kha eng mah lo mai a ni dâwn tihna a ni. Han ngaihtuah la, kan inneih zànah i tã pumhlûm ka ni ang a, ka taksa leh ka thianghlimna zawng zawng pawh i tân chauh a ni tawh ang, chu hun chu nghâk hrâm hrâm ila, tuna kan chétsual hlauh chuan ka inthiam thei ngai lo ang," ka ti mawlh mawlh a, ka thil sawi chu a bengrawngah thun se ka ti tak zet.

"Min duh tak tak lo tihna a nih chu."

"Ni lo, ka duh che a, ka hmangaih êm êm bawk che, i hriat kha. Ka mipa hmangaih awmchhun i ni a, i ni reng bawk ang, kan pahnih tân Pathianin hun țha a rawn her chhuahtîr ngeiin ka ring bawk, chu hun chu nghâk hrâm ang aw, a hun hmaa ka lo inpumpêk mai chuan kan inneih zànah i tân ka hlu lo tawh ngawt ang, i tâna hlu tak nih ka duh, rei lo tê chauh nghâk leh lawk ang, ka duhna hi min zahsak hrãm la, aw?" tiin ka ngèn leh sauh sauh a.

A tân hian eng mah ui ka nei lo, ka thianghlimna pawh hi ka ui chuang lo; mahse, thianghlim taka pasal neia làwițhat zàna ka pasal tân ka thianghlimna chu hlan ka duh vàng a ni, ani pawh hi lãwm ber ber tùr a ni dáwn asin. Pathian duh dàn pawh a ni a, chu chu ka duh dàn pawh a ni. Pathian thu hi âwihin a thu angin va nung chhuak viau lo mah ila hemi kawngah kher hi chuan ka fair ve viau tawh a ni, a hmaa kan chêtsual teuhzia ka ngaihtuah lêt phei kha chuan ka zak reuh reuh a, ka thil tum ngei ka insùm theih loh luatah keimah ngeiin ka bawhchhiat teuhzia kha, lo bawhchhe ta ila ka inthiam thei tawh ngai dáwn si lo.

Ka duhna min zahsak a, țha takin min kaltîr ve mai a; mahse, ka taksaah erawh hnuhma a hnutchhiah zui hlak a! Ka inbual zo dârthlalanga ka han inen chu ka ngháwngah leh ka bânahte chuan duk deuh thliah thliah ka hmu a, ka hè hnuailam pawh a sehna avàngin a thí deuh sar sar bawk a nih kha, nâktûkah chuan tún ai hian a vúng lian deuh ngei ang a, min hmuh hunah țhiante'n min fiam hlak ngei ang chu.

Min fiam tak tak a! Kei lah chuan," Ka tlu a, ka tauh palh alawm," ka ti tlat a, an âwih lo lutuk meng tãl vêl chu an innuih vak vak a, Sêntei chuan," Bialpa neih ve hunah chuan mawngah insehtîr ila a țha ang, mawng a lang lian ang a, kan khal țha dâwn êm asin," a lo ti pek a, chu chu an nuih zui nghek nghek a, Famkimi chuan," Âwmbâwrah pawh ti law law rawh," a lo ti zui a, kei pawh ka nui ve sak sak nain ka hmui nâ chuan min tur deuh a, ka hup leh rih bawk a.

Zda chu zànah vawi khat a rawn lêng  leh tawh a, ka lo hmehbel deuh nge ni, a rawn inthlahrung deuhin ka hria. A rawn lèn zàn chuan ka pa pawh a awm ve a, ţha takin a lo chhàwn a, Zda pawh chuan țha takin a chhâng ve zêl a, sitting room lama an inthiar fihlìm hnu chuan," I pate hi an fel ve ngawt mai, țha takin min la be duh a nia," a ti sap a.

Ka zawh châk êm avàng chuan insûm duh lovin," Engti tiha palai kha rawn tîr ngawt nge i nih a?" tiin ka zâwt ta phawng a, ka zah duh bîk lo. Kan inkawp rei êm a, han zah țêtna tùr ka hre lêm lo a ni.

"I bulah ka sawi tawh kha. Ka duhzia che pawh i hria, beidawngin an rawn haw dâwn tih pawh ka hre sa vek; mahse, ka duhna che hian min urthlu a ni ber ang chu," tiin min lo chhâng a, chutah," Han ngaihtuah vang vang teh, i rilru hriat chian nân hmeichhe pakhat kawp anga ka lan ațanga i laka ka hniam tâkzia hi, ka ti tak tak aw, i rilru en nâna ka tih chauh a ni, i lo ngai thutak si, ka heti lel ta zui a,min hrem nasa i ti ve tawh ngawt lo maw?" a ti zui leh a.

Hetiang hian a sawi ve ziah; mahse, min lo kawp kha ka tân chuan thil țha tak pawh a ni maithei, Chhanzuala neih phahin hmangaihna awmzia tak tak ka hriat phah ta si a, ani nèn hian la inkawp reng ni ta ila hmangaihna awmzia pawh hi ka la hre ngût lo ang.

*******

Krismas hunpui pawh kan lo hnaih leh ta, khua pawh a rawn vâwt țan leh tawh a, kumin Krismas vuakvêtah chuan Chhanzuala nèn a tam thei ang bera hun hman dun kan tum avàngin ka nghâkhlel tawh a ni, kan chungchâng hi kan sawi dùn ve fo a, a hna lamah hian tlêma sum a lâk luh tam ve deuha a hlâwk deuh hunah inneih kan tum ve a ni. Chutih hunah chuan tlêmin ka nu rilru pawh a lo danglam ve deuh tawh mahna kan ti; mahse, danglam lo mah se kan tum ve tho. Inneih chungchâng hi chu a sawi chhuah hmasak a ni a, ka hnialsak duh lo. Zda palai rawn tirhte kha a hre ve vek tho si a, ani erawh chuan palai a rawn tîr a nih chuan beidawnga an rawn kìr a duh lo bur, chuvàng chu a ni pakhat a, hun la nghah deuh a duh chhan hi. Pawi ka ti lo, kei pawh ka inkháwl bek bek zêl a, hun a tam leh ka inkhâwl tam thei dâwn tihna.  A tân nupui, neih nei lo lutuk nih chu ka duh bík lo ang, a chàwmhlàwm tùra a nupui nih ringawtte chu a zahthlâk.

Hun harsa tak kârah chuan kan inkawp chho ve zêl a, ka fuih nasa ve țhin a, zawm pawh a zàwm țha ve viau mai a, kum lama upa zâwk ka nihnaah min zah ve pawh a ni ang chu, ka nuin a kalchilh zàn leh a tûka zû a in bâk kha chu a in leh tawh lo va. Zu țhat lohna chu hrilhin U Kimite nupa chu entîr nân ka hmang ziah a, an chanchin pawh ka hrilh nasa, ani pawh chuan," Ka insûm viau tawh asin, nang ka tawn hnu che hi chuan. Khami ni erawh kha chuan ka rilru hrehawm leh zak bawk si kha zûa tihreh kha ka tum a," a ti ve a, ka hre thiam reng; mahse, zûin a tihreh lohzia chu a hre chiang ber bertu a ni a, a sâwt tak tak lohzia pawh a hria.

Tlai khat chu birthday lawmnaah chaw kan ei a, Vênglaiah a ni a, Sêntei a kal ve loh avàng chuan ka peih lo viau nghe nghe a, Chhanzuala Aizawl phei lawk hlànin a ni bawk; mahse, Remlali leh Famkimi chuan," Sêntei tel tawh lo pawh kim lo intih tawh laiin, nang leh zêl chu ni lo ve," an ti tlat a, chuvànga tel ve ta chu ka ni. Kan dàwr neitu pi ber tunu birthday a ni nghe nghe a, inthlahrunna tùr phei chu a awm miah lo.

Chaw leh a hmeh tui tak chu kan ei a, a hnu deuhah chuan in tùr leh ei tùr an rawn sem kual leh a, kan hnianghnãr khawp mai. An kawt zâwlah hun chu hmangin mi pawh kan tam phian mai, hmel hriat erawh ka hmu vak lo.

Ka zun a chhuah avàngin toilet-ah ka kal lawk a, ka chhuah chuan Remlalite chuan min lo ko vat a, anni bâk hi hriat vak ka nei lo va, an bulah ka tâp leh ta a, haw chu duh viau tawh mah ila an la phal àwm si lo va, bet vak lovin ka țhu ve leh rih a ni.

Ka thil in chu theitui mai niin ka hre sia, a ruih deuh theih em maw ni aw ka ti hial mai. Ka lu a rawn hai deuh miai miaiin ka hre tlat pek a, ka in tam ve angreng si a, a ruih theih deuh a ni maithei a ni.

Mi dang pawh chu an ri lè lú a, music an play a, a țhen an lâm a, a țhenin in tùr an buaipui a, Remlalite pawh Famkimi nèn chuan an lãm dáwrh dãwrh mai, ka lãm ve châk deuh reng nain hmel hriat loh an tam si a, ka zak deuh a, ka lâm ve duh lo va.

Ka lu hai deuh miai miai chu ka bekah ka han nem nak nak a, ka mit kawpza pawh tlêmin a rûl ta deuhin ka hria a, kei hi ka rui a ni chiang mai, a țha dâwn miah lo, ka ruih tak tak hmaa ka haw a ngai a ni, scooty chu keng ila chuan ka haw daih tawh ang maw le.

Ka chhuak ta daih a, țhiante chu naktûk lamah ka hrilh fiah mai ang, anni zawng, an la hlim êm mai a, va tihbuai kher ka duh lo a ni, anni tibuai kher lovin rickshaw hman mai tùr pawh ka hmu maithei asin; mahse, ka kal țha hlei thei tlat lo, ka han ding leh rih a, tãwi tê ka kal a, ka ding leh a, ka thil in kha ka rui a ni chiang. Ruih hi a lo nuam lo tawp a nih hi, engtin nge zû te hi an ruih peih ni aw ka ti rilru a.

"Dinpuii ni rengin, khawnge i kal dâwn a?"

Zda aw a ni, a motor êng chuan min chhun chiang si a, min hre chiang lo thei lo a ni.

"Ka haw dâwn a," ka tih chuan," Scooty i keng lo a ni maw? Ka lo thlah dâwn che em niang? Nge Rickshaw ka lo kohsak ang che?" a rawn ti nghâl sawk sawk a, a rawn chhuk nghâl bawk a, hnial chu ka duh alawm; mahse, ka tûn dinhmunah hi chuan hnial thei pawh ka ni lo. Ka awmna ațang hian rickshaw koh mai tùr hnaivaiah ding an awm tlat lo.

"Rickshaw chu min kohsak theih phawt chuan," ka ti ta nge nge a, ani chuan min en vang vang pah chuan," Rickshaw koh leh buangbàr ai chuan ka lo thlah mai ang che, a rang záwk bawk ang," a ti a, ka bulah chuan a rawn ding a, kei chuan," Ka duh lo," ka lo ti thung a. Ani lah chuan," Ho mai mai, lo lût mai mai teh," a ti a, ka kutah chuan min kaiin passenger seat-ah chuan min nam țhu ta nghâl a, hnial tùr pawhin ka zawi tawh lutuk tlat, ka țhu hle hlé a, ka maimichhîng zui nghâl bawk.

Engtin chiah nge ka awm pawh ka hre chiang lo, ka han men deuh uau uau chuan kan lo ding tawh a, ka zawizia chu mak tak a ni mak tak, țawng pawh ka țawng peih lo, ka zawizia chu a hria a ni ngei ang, ka țhutna ațang chuan min rawn pawm chhuak a, hnial tùrin ka chaknate chuan min thlawh bosan vek a niang, țawng chhuak tùr pawhin thâ a ngai, min pawm ang ang chuan ka awm ve tawp ringawt.

*MI I SAWISÈLA AN CHHIATNA LAI I SAWI KHÂN NGE I HLIM ZÂWKA AN ȚHATNA LAI I SAWIA I FAKIN?*