☆UNEXPECTEDLY YOU☆ - 20 By Dingdi Pachuau

 ☆UNEXPECTEDLY YOU☆ - 20 By Dingdi Pachuau

"Min thlah rawh," zàwi sap hian ka ti a, a hre thei em chu ka hre lo, min pawm zêl si a, a hre lo a ni maithei. Khawiah nge kan awm tih hre tùrin men pawh ka meng țha peih lo, men luih ka tum viau pawhin ka mit vun chu a chhah lutuk a, a rawn inkhup lup lup zêlin ka hria.

"Heti ringawt chuan in inah ka thlen thei lo ang che, i intiharh deuh ang a, ka thlah haw chauh ang che," a ti a, țhutnaah min nghat ni ta berin ka hria, ka meng hlei thei lo ka tih tawh kha, ka taksa che thei lo mah se ka rilru erawh a la fîm viau a, chuti a nih chuan tuna kan awmna hi kan in chu a la ni lo tihna a nih chu, khawi lai nge ni ang?

"Khawiah nge kan awm?" ka ti leh a, thãwm ri dang a awm lo bawk a, tlêmin ka țawng pawh a ring ve deuh e. Ani pawh chuan a lo hre ngei a ni," Ka room-ah kan awm mêk, hetia i awm lai hian hmun danga hruai che chu ka duh hleinem, i mualpho dèr dáwn asin," a lo ti ve ngei a, ni e, ka rui chu a nih hi, ka lu lah chu a rawn vir țanin ka la hre zui.

A tho a, a ri rak rak a, ka hmuh thui theih loh êm avàng chuan eng nge a va tih pawh ka hre lo; mahse, a hnu lawkah chuan ka bulah a rawn țhu a ni tih hriat tak hian ka țhutna chu a rawn hniam deuh suai a," Hei hi in la, i zia deuhin ka ring," a rawn ti a, min țhut țhattîrin ka kutah chuan no ni àwm tak hi a rawn hmeh bel a, kei pawh chuan hetiang ka nih chuan kan inah ka haw ngam dáwn lo tih hriain min tulh chuan ka lo lem ve mai bawk a, tui ni maiin ka hria, ka tui a hãl deuh bawk nèn, ka in țeuh mai.

Mahse, ka harh phah miah lo, ka rilru pawh chu a hma aiin a chiang lo riai ta záwkin ka hria ka ti, ka theih ang ang erawh chuan harh ka tum a, rilru fîm pawh put hrâm hrâm ka tum ve a; mahse, ka taksa erawh a che sawn hlei thei chuang lo. Heti a nih hrim chuan kan inah ka haw thei lo tawp ang, ani hian min thlah loh phei chuan...

"I harh em?" 

Chhanzuala aw ka hriat tâkah chuan ka harh deuh kâwkin ka hria, mak tihna ka nei nghál bawk, nge ka mumang em ni? Ni lo ang, hei, ka harh reng alawm, ka mumang a lo ni ta a nih oawhin Chhanzuala ka bulah a awm tal alawm, ka han khap deuh sak sak a, men erawh a har ngang mai a, ka thil hmuh pawh a chiang lo khawp mai.

"Ka bulah i lo awm reng elo?" ka țawng zàwi khawp mai; mahse, ka theihtâwp chu ka chhuah ve chiang, chuti chung pawh chuan a ri chè ché  ni maiin ka hria.

"Awm reng e, ka hruai haw tawh ang che aw?"

Ka peih rih lo, a bula ka awm chuan ka thla a muang alawm. Kan inhmu khát ta deuh a, vawiinah pawh khân kan inhmu lo a nih kha, Aizawlah a phei ni khân ka hria a, a rawn haw leh tawh tihna a ni ngei ang.

"Haw rih lo ang, ka la awm duh rih."

Ka bulah a rawn țhu a, ka biang a rawn khawih chuan ka nui sak a, zawi zet hian a kut chu ka lo vawnsak ve a, ka ngai tawh alawm, a bula hun rei lo tê la awm pawh hi ka thlahlel. 

"Ka va zawi tak! Chhanzual, eng thil nge ka chungah thleng a? Ka zawi dàn hi mak tak a ni, ka mumang a ni si lo maw?" ka ti leh sap sap a, min chhâng lawk lo chuan a ngawi deuh vang vang a, a kut chuan ka biang chu ka dawmtîr reng a.

"I mumang a ni lo."

Ka hmuia a rawn fawh dà dá chuan ka lo chhâng lét ve a, a duhthawh sawt a, ka theih ang angin ka lo chhâng lêt ve a; mahse, ka zawi êm êm mai si a, ka chhâng lét thei ve vak lo zâwk, a hnuah phei chuan ka lo dawh tawp a ni ber. Min pawm kãng a, min nghat leh a. Min fâwp zui leh a, a duhãm ta zêl bawk a, ka hmuia min fawh mai duh tâwk lo chuan ka nghâwng aţangin a fâwp chhuk dan dan a, ka kawr chung ber pawh chu hnawk ti ni àwm tak hian min phelhsak zui ta nghâl a. Min tih ang ang chuan ka awm ve mai a, ka kâwng achin chung lam hi chu ka ui țùng bík lo ang, ka bialpa a ni a, a khawihin a fâwp ral bîk nâng.

"Chétsual ka duh loh kha aw," ka ti sap a, inneih hmaa humsual lo dai lâwk ka duh lohzia ka hrilh tawh a, a hre tawh, ani pawhin min tihluih ka ring lo, tunah phei hi chuan tilui tlat ta se lo danga lo țang tùrin thâ ka nei hauh si lo, ka zawiin ka awm hlè hlé a, min khawih ang angin ka awm ringawt chu a nih hi.

Mahse, ka thuamhnaw a rawn hlîp thla zêl a, ka kekawr min hlihsak hnuah phei chuan vâwt ka ti a, hlauhthàwnna ka nei ta bawk. Ka rilru chu tihfìm hrám hrâm tumin ka inngaihtuah harh lui a," Chhanzual, ka duh loh chu i hriat kha tiraw? Min hmangaih a nih chuan ka duh loh chu i ti lo tùrah ka ngai a," ka ti leh a, ka țawng ri chang chang chauh a ni; mahse, a hre ngei ang, a hre tùr a ni.

"Ka hmangaih che tih i hriat kha, zanin chu haw lovin riak ve mai rawh aw, a nih loh pawhin kan innei nghâl mai dâwn nia," a tih sar sar chuan Chhanzuala aw ang ta lo riauin ka hria a, ka meng thei dèr si lo. Meng thei pawh ni ila ka che thei lo, ka thil in kha a lo ruih theih chiang a lo nih kha, hetiang hian an lo awm țhìn a nih teh chuan an va in duh ngai êm! Thil nuam tak chu a ni lo chiang alawm.

"Ni lo, Kohhran Dàn thianghlim ngeiin kan tih kha," ka ti leh hrâm a, ka chhia leh țha hriatna ka la hloh êm lo va, ka la hmang thei hrâm hrâm a ni, ka hman theih chhûng chuan tuna a awm dàn hi ka hnial ang.

"Tunah ngei hian," tiin a thaw hawk hawk a, ka kawrhnuai hâk chu a rawn phelh zui a, a kut pahniha min chùl duh tâwk lo chuan a hmuiin a kut sùlhnu chu a rawn chhui nghâl zêl a, lo dan ka va duh êm! Hetiang a nih chuan ka duh miah loh thil a thleng dâwn.

"Ti suh," ka ti sap a, ani lah chuan," Ka tih ngei a ngai, ka tâ i nih ngei a ngai a ni," a ti leh a, a aw chu Chhanzuala aw a ni ta lo tawp mai! Zda aw a ni, Zda bulah ka lo awm reng a, tuna ka chunga chêt la mêk hi Zda maw lo ni a! Lalpa leh! 

"Zd, ti suh, ti lul suh, khawngaihin?" 

Ka thu sawi ngaipawimawh hauh lo chuan a duh chu a tipuitling ta a, ka taksa chunga a chêt chhûng chuan ka maimichhîng a, ka mittui a tla zawih zawih bawk. Ka thianghlimna ka pasal tùr tâna ka lo vawn ve ngar ngar chu lâksakin ka awm ta, ka thinlung chu a rûm vawng vawng mai. Ka che thei hauh si lo, ka chunga a thil tih chuan ka taksa a tina viau a; mahse, ka rilru, ka thinlung a tihnat dàn hi sawi thiam theih a ni lo zâwk. 

"Ka tâ i ni ta, tu tã mah i ni thei tawh lo. Tihian, zanin ațangin kan innei nghâl tawh ang."

A tho zui a, khawiah nge a kal pawh ka hre lo. Khumah chuan ka mut ngaiin ka mu reng a. Ka țap lo va, ka thinlung rùm nasatzia erawh țawngkaa sawi chhuah thiam rual a ni lo. Tunah chuan nula thianghlim ka ni ta lo, mi tenawm, mi bawlhhlawh mai ka ni ta. Țah vawng vawng ka va duh tak êm! Țap tùr pawhin thâ ka nei si lo, mi vànduai chu ka va ni tehlul êm!

Chhanzuala ka ngaihtuah chhuak a. Ri chhuak lovin ka rûm kâwk kâwk mai, tuna ka awm dàn hi hre ta se engtin nge a awm ang? Hrehawm a va ti dâwn êm! A tân ka thianghlim tawh hauh si lo, engtin nge ka hmachhawn ngam tâk ang le? Ka taksa nâ hi chu eng mah lo mai a ni, a rilru a va na dâwn teh rêng êm! Ka thinlung ang chiah hian ani thinlung pawh a kehsawm vek ngei ang chu. A va hrehawm tak! Ka chau, ka chau tak zet ta. Ka taksa a chau a, ka rilru pawh a chau chhe ta. Aw, Chhanzual, a va pawi tak êm! I tâna ka thianghlimna ka vawn ve țàng țáng chuan awmzia a nei ta si lo, ka va khawngaih tak che êm!

"Muthilh tum rawh, vâwt i ti a nih kha," tiin ka bulah chuan a rawn inthawlh a, rizai ni ngei tùr hian min rawn khuhin min kuah zui nghâl a, chêt sawn ka va duh tehlul êm! A khaeih leh a deh phâk lohna hmuna awm vang vanga a hmel pawh hmuh theih loha bo vang vang ka châk! Ni lo, tunah tak hi chuan thih daih ka châk zâwk. Aw Pathian, min țanpui ta che, tuna ka awm dàn hi ka duh dàn a ni ngai si lo, mang lamah pawh ka la mang chhin ngai lo, mangchhia ni se, harh rualin reh daih se.

Ka mit ka men rual chuan ka awmna chu ka hre thiam lo dâwn a, min kuahtu kut chu dah sawnin ka han che sawn dáwn a, ka taksa hnuai lam na zawk zawk vàng chuan ka tàwp chawt mai! Ka en ngai chu enin thil awm dàn chu ka han ngaihtuah a, ka tho chhuak nghâl zawk a, ka taksa nâ avàngin ka țhen sawk bawk. Ruak veka ka awm vàng chuan rizai chu ka pawt a, tunah chuan ka harh fîm ta bawk a, nizàn lam thil thleng pawh ka ngaihtuah chhuak nghâl vek a, ka rilru na viau mah se thil thleng tùr a thleng vek tawh a, țah ka tum lo, ka țah loh nân ka insehruh țeuh zâwk.

"A la hma lutuk, lo mu leh rih rawh."

Rizaia intuam chung chuan ka thawmhnaw chhuata darh niai chu ka chhar khâwm a, bathroom-ah ka tlan lût nghâl bawk a. Țah ka duh lo, thil thleng tùr a thleng vek tawh a, he ta țang hian a rang thei ang berin ka chhuak tùr a ni. 

Mittui erawh ka dang zo lo a nih hi, mittui tla zawih zawihin nizàna ka taksaa ser awm chu sil fai ka tum a, sahbawn nasa taka tiphuanin ka inhnawih a, min khawihna ka taksa pêng tin chu tui chuan tlen fai vek ka duh a ni; mahse, intleuh nasa eng ang mah ila awmzia a awm lo, ka taksaa a sùlhnu hi sahbawn phuan leh tui tam taka tlen fai zawh chi a ni lo.

Shower hnuaiah chuan rei tâwk tak ka țhu sawp niai a, țah chhuah hlauin ka kaah ka kut ka hnawh a, ka mittui a tla zawih zawih reng mai. Ka dang kîr thei lo, a hrehawm êm mai, rilru nat leh hrehawm vànga dam thlahlel miah lo dinhmun hi tunah chuan ka hre thiam ve ta chiah mai.

Thi ila a nuam zâwk ngei ang. Chhanzuala ka ngaihtuah a, U Kimi leh ka nu leh pate ka ngaihtuah chhuak leh nghâl a, tuna ka awm dàn hi eng angin nge an ngaih ang le?  Nizànahte khân inah ka haw si lo va, an ngaih a țha lo ngei ang. Min rawn phone em? Ka va hre si lo ve!

Ka ding chhuak a, ka thuamhnaw ngai ka hâk leh mai loh chuan a dang awm hek lo, ka inthlâk zo ka chhuak chu kawngkhàr bulah chuan Zda chu boxer hain a lo ding reng a, melh pawh ka melh lo, nizàna ka chunga a chêt dàn vàng khân a hmel hmuh loh rih hi ka duh.

"I rei lutuk a, ka ngaih a țha lo alawm," a rawn tih chuan," Min khawih chhe ta rau rau, min nei nghâl rawh," ka ti sap a, rilru na tàwpkhâwk chung leh thinlung keh sawm vek chunga sawi chhuak ka ni tih a hriat loh nân ka aw chhuak chu ka thunun nasa viau a ni.

"Ka sawi tawh kha, nizàn ațang khân kan innei nghâl a ni. Ka nu leh pate pawh ka hrilh tawh a, i nu leh pa hnênah pawh ngaihdam dîl tùrin tukin hian mi an tîr nghâl dáwn a, ngaihțha takin awm rawh," tiin ka bulah chuan a rawn ding hnai a, min rawn hnaih leh min deh ka duh loh avàng chuan ka lo tawlh hla vat thung a.

Ka awm dàn chu mangchhe tak mang reng ang mai niin ka inhria. Ka chhûngte leh he khawvêl mihring tawh phawt mai, tungchhoa kal thei tawh phawt chu ka hmaizah êm êm vek avàngin ka haw duh lawk lo va, khawiah mah ka chhuak lo a ni tawp mai. Zda room-ah chuan ka tawm ngawt ngawt a, ka awm dàn chu a dikin țha ka ti bîk hauh lo; mahse, chutiang chuan ka awm tlat si, mi hmuh tam ka duh lo va, ka phone pawh a sim ka thlawn daih a, tu biak mah ka duh lo va, kei pawhin tu mah ka be duh lo. 

Loh theih loh hnua ina ka hawa U Kimi ka hmuh chuan eng mah sawi lovin ka țap ringawt a; mahse, ani pawh eng mah ka hrilh lo. Ka chunga thil thleng kha mihring dam lai beng hriata sawi chhuah ka tum lo, ka thisen zawmpuite ngei pawh ni se ka hrilh chuang lo ang.

Sêntei a lo lêng a, mak a ti tih ka hre reng mai si a, ani pawh ka chanchin, ka chunga thleng chu eng mah ka hrilh chuang lo. Khami thil thlen tûk ațang khân dàwrah ka kal tawh lo va, engtin nge ka chanchin an sawi ang tih pawh ka ngaihtuah duh lo, mak an ti viau ang a, min hre thiam lo bawk ang. Ni e, hriat thiam ka harsa ngawt ang.

Hrehawm ka tih ber chu zàn mut dáwna mut chhuak mawlh si lo, rilrua thil chi hrang hrang ngaihtuah kual hun lai tak hi a ni. Chhanzuala ka ngaihtuah chhuak lo thei si lo va, a awm dàn tùr chu ka suangtuah ngam lo zâwk a ni. Min dem ngawt ang, a thin a rim bawk ang, ni e, a thinrimthlâk a ni, a rilru hrehawm tùr ka ngaihtuah apiangin ka thinlung hi a rûm vawng vawng lo thei lo. Hnâwl leh phatsan niin a inhre ngei ang a, a rilru a ná ang a, tlâwm a intiin a thin a rim khawp ang, ka awm dàn a hriat hnuah phei chuan min ten ang a, hmuh pawh min hmu duh tawh lo ang a, anchhia hial pawh min lawh maithei a ni. Ni e, amah phatsanin Zda pasalah ka nei dáwn miau si a. Tûn dam chhûng hunah hi chuan ani chu ka pasal a ni tawh dâwn si a, thih hnu piahlam ramah hringnun dang a awm a niha tûna leia hringnun kan hman ang hi kan hmang leh a nih ngai chuan chutah chuan ka chunga thil thleng hi ka hrilh ang a, a la hre thiam ve mahna! Chu chauh chu ka beisei a ni.

Ka chunga thil thleng chu tu mahin an hre lo va, Zda lahin a sawi chhuak lo bawk a, min lawmpuitu an awm ve nual mai. Kan innei tùr chu Zda leh a chhûngte an phûr hle mai a, chutiangin ka nu leh pa pawh; mahse, a hma lawka palai an rawn kal laia ka duh bawk si lo, tuna ka duh leh ta thut mai hi mak an ti thung. Ka nu chu a phûr khawp a, inpuahchah nân hun awm lêk lova inneih kan ti hma erawh a sawisél thung. Ni e, hei hi ka duh dàn a ni, min khawih chhe ta rau rau a, a rang thei ang bera inneih mai ka duh a, dam chhûngin hrehawm chu ka tuar tawh mai ang, chutiangin ani pawh. Hei hi ka hringnun hman dàn tùra Pathian min ruatsak a ni mahna, ka hmangaih ber tân ka tlin tawh loh chuan, a tân ka thianghlim tawh si lo va, a hmel hmuh pawh ka ngam tawh lo, ka tenawm tawh, a tân chuan mi tenawm mai ka ni tawh. Rilru hrehawm, thinrim leh diriam taka min en tùr leh ten tih hriat taka min han melh tùr chu ka ngaingam ngang lo a ni. Ka dem lo ang, engtin pawhin ka chungah duh chhe mah se, ka dem ngai hauh lo ang.

Nung ve reng sia thi ang maiin ka hringnun chu ka hmang chho a, ka hmelah phùrna leh hlimna a awm lo va, ka țawng vak ngai lo bawk. Inah ka tawm chawrh chawrh a, ka mamawh tùr engkim chu U Kimi'n a ngaihtuah a, kan pahniha kan awm fàl tawh hi chuan thil awmzia min zâwt fo a, ni e, a tân chuan hriat thiam a har dâwn êm asin; mahse, Zda neih ka duh tih bâk eng mah ka hrilh chuang lo. Chhanzuala chanchin a sawi chhuah zauh phei chuan ka lo khap thuai a, a sawi zawm tawh lo chiang khawp mai. A awm loh hnuah erawh ka mittui titla tamtu a ni leh țhin, ka ngaihtuah chhunzawm lo thei si lo, min haw tùr mawlh chu hrehawm ka ti a ni. Min hmangaih tih ka hre si a, chu tak chuan min tinâ a ni, ka tina ta si a, min hmangaihtute hi an duh dàn ang lova kan awm hian an na țhìn tih ka hre chiang ve tawh a, keimah avànga a nat dàn tùrzia chu ka ngaihtuah ngam lo zâwk, tunah te hian engtin nge a awm ang?

Kâr hnih ral hmain kan innei ta a, Zda bula ka sawi tawh angin țhiante sàwm ka duh lo va, ani pawhin a sâwm lo. Kan chhúng-leh-khat hnaivai tak takte chauh lo chu inneih inkhâwmah pawh an rawn kal lo. Inhruai tawp ang chi kha ka duh dàn chu a ni zâwk a, inneih inkhâwm tih vêl hi a țùlna ka hre lo, thil a nih tùr ang ang a ni zo vek tawh si a, ka thianghlim tawh bawk si lo.

Ka nu leh pa tharte(Zda nu leh pa) chuan min duat khawp mai a, in chhûngah pawh ka chêt an phal lo va; mahse, an mo niha chêt miah loh chu thil nih dàn tùr a ni lo tih ka hria a, hrehawm ka tih leh chu an bula awm laia hlim hmel put luih chu a ni. Ka hlim lo nasa mai si a, ka hmangaih vàng ni miah lovin an fapa hi ka nei a ni tih an hriat chhuah kher ka duh lo a ni.

Zda nèn room khatah awm mah ila kan mu dùn ngai lo, a tìr ațanga ka tum dàn sa a ni ve bawk. Hei hi ka hremna tùra ka duan sa a ni. Nupui sual theihtàwp chu ka ni ngei ang, bible phei chuan a duh hauh lo tih pawh ka hria; mahse, a bulah hian ka mu thei lo. Mak tak maiin ani pawh chuan ka duh lo chung chu min tilui bîk lo va, a theih ang ang chuan min duat ve zâwk a, ka lakah lungawi lohna pawh a tilang ngai lo; mahse, ka sual lutuk a, min duatna hian min tihrehawm zâwk țhin pek a nih chu. 

A ni tèlin ka chér telh telh a, thau sa ka ni lo lehnghâl a, thil ka ei thei lo pawh a ni chiah lo, ei châkna ka nei hlawl lo a ni ber. Ei tùr țha ber ber min chhawp fo va, ei tumna pawh ka nei chuang lo. Khawlaiah ka chhuak ngai lo va, inah ka tawm char char ringawt, khawlaia chhuah châkna pawh ka nei hek lo. Ka țhiante hmuh ka duh lo va, Chhanzuala hlauh phei chu mumangah pawh hmu lo ila ka duh, ka tina êm êm mai si a, ka hmuh phei chuan kei ngei pawhin hrehawm ka ti dâwn si a, a takah ni lo, mumanga hmuh pawh ka inthlahrung.

Ka rai ka ring sa rêng a, ka lo rai tak tak bawk. Zda leh a nu leh pate hlimzia ka hmuh chuan ka thinlung hi a na tlawk tlawk thei mai, ka hmangaih miah loh, min tiluitu fa chu tunah hian ka pum chhûngah nunna nei tùrin a rawn insiam chho ta mêk chu a ni si a, engtin nge ka tih tâk ang? A rûkin ka tithi mai dâwn em ni? Ka hmangaih loh leh ka huat êm êm fa chu engtin nge hmangaih takin ka pai puitlin theih ang?

Ka rilru hrehawm avàng chuan zànah pawh ka mu thei lo va, thil ei theih loh leh ngaihtuahna chawlh loh vàngin ka chhe tak zet a ni. Zda chu a mangang thei êm êm mai a, ka ei tùr thil tui țha țha a lei țeuh țeuh a; mahse, ka ei ngai chuang si lo va, a paih leh nge nge țhìn. Ka awm dàn hian a tihrehawm tih ka hre ru kar a; mahse, hrem zêl ka duh, nupuia min nei hi keiin hrehawm ka tiha ka hlim loh tluk zet hian hlim lovin hrehawm ti ve rawh se.

Ka va sual tak ém! Ka sual êm avàng hian Pathian hnênah ka țawngțai ngai lo va, rilru sual tak pu chunga Pathian biak chu ka duh lo a ni tawp mai. Ka inkhâwm ngai lo bawk, ka nu leh pate an inkhâwm ziah thung a, min sàwm ve pawhin ka nawmsam loh thu ka hrilh hmiah mai țhin. Thu dik lo pawh a ni chuang lo, thil ka ei thei lo, rai ve bawk si, mu thei bawk si lo leh ngaihtuahna chàwl bawk si lo tân chuan dam țhat var a har ngawt ang le.

Thih miau si loh chuan hun chu a kal ve zêl a, ka nun erawh a hlim lo tak zet, a châng chuan Chhanzuala chu kan inah hian rawn lang nawlh tùr angin ka suangtuah a, a châng leh Zda hi Chhanzuala ni ta mai se te ka ti thùl; mahse, chutiang ngaihtuahna chu ka  paih bo thuai țhin. Ani kha ka ngaihtuah phâk a ni tawh lo, a tân chuan hmuh thiang lo, hmuh leh khawih thiang lo hnàwmhnê mai pawh ka ni pha tawh lo ti chung hian ka ngaihtuah zui lo thei țhin si lo va, chutiang hunah tak chuan ka thinlung hi a rûm leh tlawk tlawk țhin. K. Hminga hla 'Ka hringnun diary' tih chu ka hre chhuak rauh rauh fo a, ka tân liau liaua a phuah ni maiin ka hre țhin bawk.

Aw, hringnun hian kawp rem tùra tuahrem a nei ang hian,

Kawp rem lo tùra duan sa an awm a nih dâwn hi

Fùrkhua leh ruahtui chu kawp tùra duan,

Pangpâr leh khuaite pawh kawp tùra duan;

Vànzáwla chhûm leh ni zung pawh kawp tùra duan,

Nang leh kei erawh hrang tùra duan.

Mittui tlain ka ngaithla fo a, 'Nang leh kei erawh hrang tùra duan' tih lai hian min vèl zual ţhin.

*THINURNA HIAN BUAINA A TIFEL LO VA,  ENG THIL MAH SIAM ȚHA LOVIN ENGKIM A TICHHE VEK ȚHÌN BAWK*