☆UNEXPECTEDLY YOU☆ - 21 By Dingdi Pachuau

 ☆UNEXPECTEDLY YOU☆ - 21 By Dingdi Pachuau

Nau pai ka haw chho viau mai, ka chèrzia lah chu, a mak zâwk. Thil ka ei thei lo ka tih tawh kha, zànah ni se ka muhìl thei lo va, muhìl ang tak chuan ka awm ve mai țhin; mahse, zàn a rei poh leh ka rilru a harh tawlh tawlh a, maimichhîng reng chungin ka nun hman chhoh dàn chu ka chhút chho a, thil țûl lo tak tak ka ngaihtuah țhin. Ngaihtuah loh chu ka duh ve reng mai a; mahse, ka thei mawlh si lo. A chângin ka mittui a tla zawih zawih a, hetiang tùr hrim hrima lo pian chhuah ai chuan ka têt lai khân lo thi ta daih zâwk ila emaw lo piang lo tawp zâwk ila ti tein ka ngaihtuah țhìn a, nung reng si hian ka dam lo fo a, hei tluka damlai hremhmun hi awm leh thei hian ka ring lo bawk.

Ka phone ka tihnun duh tlat loh avàngin ka beng a ngawng hle mai a; mahse, hei hi ka duh záwk. Beng vàr ka hlau, chanchin tam tak hriat ka hlau a ni. U Kimi'n vawi hnih min rawn tlawh tawh a, Sêntei phei chu a lo la kal miah lo, ka u hnênah lo kaltîr lo tùrin ka chah tlat a, ani ka hmuh chuan ka rilru a hrehawm belh mai mai ang, chutiangin ani pawh, bâkah, thil ni lo lo ka hre palh ang.

Chhùnah ka nu nèn inah kan awm țhìn a, Zda pawh a chhuak khât viau a, țûl tàwpah lo chuan nilêng phei chuan a chhuak ngai lo. Min ngaihtuah thei êm êm a; mahse, hei hi chu a fa ka pài vàng chauh a ni. Ei tùr țha țha min pêkna chhan pawh hi a fa hi a hrisël lo ang tih a hlauh vàng bawk a ni, min ngaihtuah vàng a ni lo. A châng hi chuan damdawi han bàr țeuh mai te ka rilrûk thut thut a, naute hi thi se, kei pawh ka thi ang a tih thlengin ka ngaihtuah fo a ni, ka rilru put hmang a dik tawh lo miau mai si a, ka hma hun chu êng awm lo, thim takin a hual vêl, lungngaihna leh țahna chauh hmabâk nei niin ka inhre țhìn; mahse, ka thih daih chuan Zda hun hman a nuam dâwn êm asin, hremna hi keimah ang thoa hmachhawn ve tùr a ni si a, awlsam taka ka thih daih mai chuan nuam singkhaw a ti palh ang.

"Awm ve mai mai teh, chêt ngai loah hian i che leh vak țhin."

A dik. Ka chàu, chàu hnêpin in chhúng sekrek ka khawih a, ka tifai țhin. Chuti lo chu room-ah a awm ve kur țhin si a, a bula awm ka peih lo. Chêt tùr ka zawn loh chuan ka rilru a kal ding thei viau mai bawk a, bákah, he naute ka pum chhûnga awm mêk hi a awm lo mial thei bawk, hna ka thawh vak chuan ka chhiat phah maithei asin, chu chu ka ngaihtuah a ni. Hma lam hunah beiseina ka nei lo va, a êng zâwnga thlìr lah ka tum hek lo. Ka rilru a mang chhuih tawh a, khami zàn, birthday lawm zàna ka lo kal ta kher kher kha ka buaina bul rawn ințanna a ni a, kha zàn țihbàiawm zet kha bo hmak thei se ka ti, engati nge chhuanlam țha lutuk siama kal ka lo țhulh mai loh ni tiin a châng chuan keimah ka inmawhchhiat a, khata țang khân ka nun engkim a letling ta thawk mai si a, ni e, dem tùr tu mah an awm lo, keimah ngei hi demawm chu ka lo ni, engkim mai hi keima thiam loh vek a ni.

Thla hnih chhûngin vawi thum lai damdawi inah ka lût a, ka rai ve bawk si nèn, a buaithlâk khawp mai. Zda chuan min ngaihtuah thei êm êm a, kei ai mah hian a buai thei zâwk a ni. Kei chuan ka dam loh chhan ka hre chiang a, ka buai ve ruai ngai lo thung. Zda bâkah ka nu leh pate an buai a, min ngaihtuah êm êm reng a, anni hi chu ka zah țhìn viau, țûl lovah keimah vàngin an buai chiam mai țhin si a, ka inthiam lo ru viau mai; mahse, chutiang ngaihtuahna chu dah bovin an tih ve tùr riakah ka dah lui tlat a, a chhan chu an fapa nupui kha ka ni ve miau mai si a ni.

In lama kan inenkawl theih hnuah chuan min enkawl tùrin nurse pakhat an ruai tawp a, ni tin kan inah chuan a rawn kal a, zàn erawh a riak lo thung. Min enkawl țha bawk a, tlêm tlêm chuan ka zia chho ve hret hret zél a, ka taksa pawh hmuh tlâk a rawn ni chho ve leh țan ta, Zda lah chu ni tin kan bulah a tâp ve chawt reng a, ka lakah inthlahrung viau țhìn mah se a theih ang angin min duat a, min puak a tum lo chauh ni maiin ka hre țhin. Min enkawltu nurse fel tak leh zaidam tak Vero-i kan bula a awm ve reng țhin avàng chuan a hriat laia hnial chu ka hreh ve țhìn si a, hrehawm ti ru deuhin a duh ang chu ka tihtîr ve mai țhìn. 

Kan inneih kha Krismas hma deuh chawlhkârah a ni a, tunah chuan May thla a ni ve tawh a, ka pum pawh a puar ve ta viau mai. Ka nu leh pa pawhin min rawn kan zauh zauh a, ka chhiatzia min hmuh chuan ei tùr țha țha nia an hriat min rawn kensak a, ka nu hlim hmel kâra min khawngaihna chu hmuh loh der ka tum tlat țhin. Ani hi chuan Zda ka neih kha a duh hlum lo chauh a nih kha, tunah a duh tihlawhtlingin ka nei ta chêng a, min khawngaih leh sî chu ka duh lo.

Zan khat chu hma takah ka muhìl ve mial a, khumah keimaha mu țhìn ka ni nain khum veilam sîr tàwpah kher ka mu țhin. Ka mumangah ka zun a lo chhuak lutuk a, chu chuan min tiharh a ni, room chu a êng dul deuh ruih tawh a, wardrobe hnaih chêt chhuata Zda mutna bul erawh a lo la êng țha viau thung tih ka thawh chhuah chuan ka hmu nghâl a. Ka thãwm chu a hria a ni ngei ang," I awm a nuam mang nange?" tiin a rawn tho nghâl vat a," Aih," ti chauha chhângin bathroom lam ka pansan ta nghâl a.

Bathroom ațanga ka chhuah chuan kawngkhàr bulah chuan a lo ding reng a, ka chhuak chu," I țha tak tak maw?" tiin min lo zâwt leh a, en pawh en lo chuan," Aw," ka ti sap a, tui bottle chu ka ban zui nghál a. Min rawn hnaih ngam chiah lo nge chu ka hre lo va, a tàwi deuh hrat hrat a, chutah," Nâ i neih chuan min hrilh hreh suh aw, ka lo meng reng ang," a ti leh a, chhàn pawh ka chhâng lo.

Ka muhìl leh thei ta si lo va, ka mu meng ta reng mai. Chêt sek erawh ka hreh ve deuh a, a mutna bul chu a êng reng a, lehkhabuah eng emaw a ziak niin ka hria. Vawi khat ka en zawk bâk ka en nawn lo; mahse, a muhìl lo tih ka hria, min ngaichang reng a ni mahna.

Ka țha chho ve zêl a, ka nurse Vero-i pawh ni tin a rawn kal tawh lo va, ni kâr danin a rawn kal tawh a ni. Țûl ka ti lo viau nain ka pa leh Zda'n an ti tlat a, an duh dànah phei chuan ni tina rawn kal kha țha an ti; mahse, pawisa a hek mai mai tiin ka hnial ve tlat a, keimah vàngin pawisa kan hmang tam tawh a, ka pate lakah ka inthlahrung ve zozai tawh a ni.

Inrinni vawi khat chu U Kimi leh Sêntei an rawn lêng a, Zda leh ka pa chu thil țûl tiin an chhuak a, ka nu nèn inah awmin a rem ti lo chung ka lo insûk lai a ni a, ka nuin min rawn koh avàngin insûkna room ațang chuan ka chhuak a, U Kimi leh Sêntei ka hmuh chuan ka ding deuh chat a, ka hawi sawn nghâl daih bawk a. Engati nge U Kimi hian Sêntei hi a rawn hruai rêng rêng ni? Rawn lèntír lo tùr khân ka hrilh mawlh mawlh si a.

In tùrte ka pêk hma chuan ka nu chuan a rawn pe sawk sawk a, ka u chu a hriat tawh avàngin hlim tak leh nêl takin a be nghâl bawrh bawrh a, U Kimi pawh chuan a chhâng ve zêl a, Sêntei nèn erawh chuan kan ngawi reng thung a, en pawh ka en duh lo, min en reng tih ka hre kar si a.

"Lo inkàwm ula, nakina ei tùr ka'n ngaihtuah ang e, kan khual țhate in ni si a, lêng reng r'u aw, in fel ka ti êm mai, in rawn lêng vang vang si a," tiin nui chung hian a țhutna ațang chuan a tho a, U Kimi chuan," A, kan rawn lêng zing thei lo záwk a, ei tùr lam kha chu a ngai miah lo a nia," tiin a lo chhâng vat a.

Ka nu kal sawn hnu chuan kan ngawi vang vang hlawm a, upa ber U Kimi chuan," I insu zo teuh tawh em? Kan lo pui dâwn che em niang?" a ti a, kei chuan," A ngai lo, a zo țêp," ka lo ti a, Sêntei lam chu en loh ka tum hrâm hrâm a, kan inneihnaah pawh khân ka sâwm lo va, a thin pawh a la rim rengin ka ring.

"I va chêr ve! Mi dang daih i ni ta emaw ka ti lek lek che a ni, engtin nge heti khawp hian i lo danglam theih a?" Sêntei a rawn tih chuan U Kimi chuan," Tunah chuan a zia tawh alawm," a lo ti vat a. Sêntei hi chuan zêp hi a nei khât a, kan pahnih inkárah phei hi chuan thil hi a nih dàn, a hmuh dàn dik takin a sawi țhìn a ni. Ni e, chhia chu min ti viau ang, kei pawhin chhia ka intih țhin êm avàngin dárthlalangah pawh ka inen ngai lo rêng a ni, ka peih lo, nung ve si, dam reng chunga thî hi ka intehkhin hial țhìn.

"Ka rawn lèn chu duh lo viau mah la ka țhian i ni a, ka thlah thei lo che a ni. I chanchin hi ka lo ngaichang ve reng țhìn a, U Kimi hnên ațangin ka lo hre ve zauh zauh a, i dam loha damdawi ina i luh ţhin lai pawh khân rawn kan ve che chu ka duh; mahse, i rem ti lo chung rawn kal kha i taksa chak loh lai a ni bawk nèn, ka inkhap hrâm hrâm țhin a ni; mahse, vawiinah chuan i lo chak ve ta deuh a, i hauh huamin U Kimi ka rawn zui lui ve ta a nih hi, duh leh min hau hrep mai rawh, ka hmu tawh tho tho che a, pawi ka ti lo," Sêntei chuan a ti mawlh mawlh a, U Kimi chuan," Ni e, kan pahnih hian min hau mai teh, kan ngaihtuah ve bawk si che a," a lo ti ve a.

"A ho êm mai, in rawn lêng ta rau rau, in lêng reng a niang chu," ka ti a, an rin loh deuh chhànna an hmu a ni maithei, an inen a, min rawn en leh a. Sêntei chuan," Um, khatiang tùr kha a ni, ni dangah pawh rawn lèn ka duh leh ang," a lo ti vat a, U Kimi chuan," Nia, kan lêng leh thuai dâwn nia, ni leh lo, lêng tlut tlut ang aw," tiin a nui a.

Min kawm hlim an tum khawp mai a, an titi barh barh reng a, kan nupa chungchâng leh kan chhûngkaw chanchin lam chu min zâwt hauh lo va, ka lãwm khawp mai. Ka nu rawn haw hnuah pawh chuan ka nuho chuan an titi a, an nui a, naute lo pian hun tùrte chu sawiin a hming tùr an inphuahsiak a, hming țhing zet zet mai rawn sawi chhuakin an nui vak vak a, vawiin zet chu kei pawh ka nui ve sak sak mai. Pasal ka neih ațanga ka nuih ve vawi khatna a ni hial ang chu ka ti, kan inneihni khân ka țhen lui ve ngei mai a; mahse, ka hmui chauh a țhen a ni, ka thinlung lam erawh a rûm tlawk tlawk thung a nih kha.

A hnuah Sêntei'n insûk min tleuhpui a, chutah chuan," Mak ka la ti reng mai; mahse, min chhâng kher suh, a ngai lo. Engati nge Zda nèn in inrûk kher chhan kha ka hre thiam pha lo cheu a ni, țha té té pawha innei thei reng in ni si a, chutah, Chhanzuala awm loh lai a la ni zui...Tihpalh lutuk aw, ka sawi loh tùr ka sawi palh," tiin a hmui chu a hup a, thawmhnaw spin tawh chu la chhuakin laundry basket-ah chuan a vawm lût zui nghâl a.

Chhanzuala hming hi ka lam ri ngam ngai tawh lo va, tu mahnin ka bulah pawh a hming hi an sawi ri ngai lo bawk; mahse, vawiin chu a hming ka han hre leh ta chu a ni a, rilruah thil tam tak a rawn lût nghâl zut zut a, engtin nge tunahte hian a awm ve ang le? Lungleiah hian a la awm reng ang em? A dam țha ang em? A țha chho zêl ang em? Nge keimah vàng hian a nunhluiah a lêt leh tawh zâwk? Nichîna ka nuih ve theihna boruak kha paih bo ang hmak a ni leh ta, ka rilru pawh chu a rawn tâwt leh ta up up mai.

Zanriah kîl lai chuan ka nu chuan vawiin lama ka ute rawn lèn chanchin chu a sawi siam siam a, an titi bawrh bawrh hlawm a, awmthei tak chhûngkua ni mah se chaw ei laia titi chu an tih dàn pángngai ve tho a ni, kei chu ka dàn ngai têin ka kham leh thuai a, room lama kan awm hnuah Zda chuan,"Vawiina ka awm ve lo chu a pawi hle mai, ka nuin i nuih thu a sawi a, i ute chu rawn lêng zauh zauh se a țha ang," a ti a, min rawn en reng nain ka chhâng hran lo.

Pûkpui lama in hmun an leiah chuan in an sak leh țan tawh avàngin Zda pawh inah a awm khát ve ta deuh a, ka pain a vil tak tak hman si lo va, a hman ber Zda chuan a vil mai loh chuan, ka tân chuan a țha zâwk. Inah min chîm buaitu awm hauh lovin ka awm ve thei a, ka rilru kal ding danna tùrin tih tùr erawh ka intuk fo, Chhanzuala ngaihtuah chhuah ka duh lo, ngaihtuah chhuak ngam tùr pawh ka ni tawh si lo va.

Ka nute hian Zda nèn kan mu dùn ngai lo tih hi an hriain ka ring lo va, a chhan chu zàn tìrah a mutna tùr hi a phah ngai lo va, mut dâwnah tak tak chauh a phah țhin. Zîng lamah ni se a tho tlai lo va, kei aia hmain a tho ziah. A châng chuan mak ka ti ru ve fo, fapa mal lehnghâl, tlai zet zeta a thawh hi ka ring țhin a nia, chutah, hna thawh a hreh hauh lo zui bawk a, an hausak teh rêng nèn, fak duhtu tân chuan fak àwm ngawih ngawih a niin ka hria, kei erawh chuan ka sawi chhuak ngai hauh lo ang.

Tlai khat a rawn haw chu a nawmsam meuh loh thu a sawi ve nuah nuah a, ka nu chuan damdawi a lo pe vat a, a nupui ka nihna anga lo buaipui vayt tùr ka ni tih chu ka hre reng; mahse, min khaptu a awm tlat a, ka hre lo der tlat pek a nih chu. Chhùn lamah khua a lumin nî a sa thei si a, chuvàng chu a ni ngei ang.

"Zanin chu hma taka mut i tum dáwn nia, vawiin lamah i thawk nasa deuh a nih kha, khua a lum thei si a, taksain a zawh loh hun hi a awm ve alawm, naktûk lamah pawh i chàwl dâwn nia," ka pa chuan a ti a, ani chuan," A, damdawi ka ei a, ka țha mai ang, vawiin lam kha ni kha a sa deuh hlek a, kan hna thawh khân a zir mawlh bawk si lo alawm le," a lo ti ve a.

Taksa nuamsam lo chung chunga chhuata han muttîr chu ka ti ve deuh a, khum chu kâwkin," Hetah hian mu rawh," ka ti sap a, a mutna țhin lam chu ka pan nghâl a, ani erawh chuan," A ngai lo, ka dam reng alawm, damdawi ka ei tawh a," a lo ti thung a, a mutphah dahna lam chu panin a la chhuak zui a, a rawn pawm phei a.

"Chhuata i mut zawngin nautein hrehawm a ti palh ang," tiin a nui deuh a, kei erawh chu ka nui ve lo. A mutna tùr phahpui ka han tum chuan," Lo țhu mai mai rawh, ka phah thei alawm, naute khân hrehawm a ti palh ang," a lo ti leh a, chuti na nâ nâ chu tiin ka țhulh a, khum lam chu ka pan zui nghâl a.

Ka muhìl hma deuh a ni ang, rûm rî ni àwm tak hian min tiharh hlawl mai a, ka han ngaithla chiang deuh a, ka meng nghâl káwk mai. Mihring emaw eng emaw rûm rî a ni chiang lutuk, ka ngaihtuahnaah thlahrâng tih a rawn lang nghâl vat a, ka mûr nghâl sung sung thei nia. Room chhûng chu a êng dul ruai a, Zda lam pawh a êng tawh bîk lo, a hre ve lo a ni ngei ang chu.

A reh mai loh avàng chuan hlauh avànga khùr deuh dar dar chung chuan ka han ngaithla chiang leh deuh a, room chhûngah ngei hian a niin ka hria, Zda chu a mu tui àwm hle mai, a hre ve lo a ni ngei ang. Ka hlauh avàng chuan ka che ngam lo va, ka mit chiah ka lèn kual ngam tawh a ni. Chutah, Zda han inlet paha a rûm niin ka han hre leh a, ani hi rûm rî ka hriat kha a rûm rî lek a lo niang e. Ka han inher țial țial a, chiang deuh hlek zâwka ka han ngaihthlâk  chuan amah ngei a lo ni tih ka hre ta, ka han inbeng tho ve vat a, a nuamsam lo kha a ni a, ani hi khawsikin a lo tlun a ni mai lo'ng maw ka ti a ni.

Ka va hnaih phei a, light chu on-in ka han en chuan a lo khùr a, a lo rûm pah bawk a lo ni a, ka dam loh laia a buai theihzia leh min ngaihtuah theihzia hre chhuak nghâl uar uarin a lu-ah ka han sâwi a, a la harh thei lawk lo zui a; mahse, a hnu deuhah chuan a rawn harh ve ta a.

"Damdawi ei rawh, i khua a sik a nih hi," tiin ka tho leh a, damdawi kan dahnaa mi chu lain tui, bottle-a a inchhawp chu ka thli chhuak zui nghâl a, a la mut reng avàng chuan ka han tung tho a, damdawi chu a kutah chuan ka han pe a, a lo ei ve thuai a.

A la khurh avàng chuan a sin tùr puan lum ka lâk belh a, a rizai chungah chuan ka han vûr a, mit sen râm leh meng bui deuh lek lek chung chuan ka chetlâ chu min lo thlîr reng a.

"Mu rawh, a chhâwk thuai ang che," ka ti a, ani pawh chu a mu zui leh mai a, mu ve ta mai lo chuan a bulah chuan ka han țhu rih a, a la khùr deuh reng bawk a, ka dam loh laia a tlaivàr ngunzia ngaihtuah chhuakin duh lo viau mah ila zanin chu ka ngaihtuah ve a ngai a ni.

"Va mu rawh, a reh mai ang, i men chuan i taksain a tuar leh zâwk ang," aw khùr dat data a tih chuan," Reh phawt rawh se," ka lo ti thung a, amah hnaih lutuk loah chuan ka țhu a, ka mut pawh a chhuak lo.

Ka rin aiin a reh har tlat, a khùr lah chu a reh mawh si, tuilum ip kan nei dèr si lo, puan lum ka lâk lah chu a pãwng thúr tawh bawk si a, tihngaihna tak pawh ka hre tawh lo.

Kei lah ka chêt vêlna avàngin lum ka ti bawk si a, kan inang lo ve khawp mai.

A tàwpah chuan insehruh ru țeuh chung chuan, "Ka lo delh ang che," ka ti a, puan lum ka thuah țeuh chu ka han delh a, ani chuan," Hrehawm i ti ang, va mu rawh, a reh țêp tawh ang," a lo ti thung a, min hnialna vàng hrim hrim pawh chuan ka delh tho ang.

A reh lai pawh ka lo hre pek lo, ka lo muhìl zui ve daih lo niin, ka harh meuh chuan a lo tho tawh a, a puan lum sin chungah chuan ka lo mu a, khuma ka puan sin chuan min lo khuh ve thung niin, chhuatah ka lo mu ve reng a lo nih chu, a thawh lai pawh ka hre țhak lo a nia, ka va mu tui àwm êm!

Tûkțhuan kîl laiin Zda chuan," Vawiin chu chawlh min han pe tak nain lung phurhnaah khân kal ve ka duh deuh a," tiin ka pa chu a han en a, ani chuan," I kal kher a ngai hleinem, i nat zual phah mai mai ang," a lo ti thung a, ka nu pawh chuan," Ni e, nimin lamah i nuamsam lo va, i indim thiam a ngai,  lung phurhnaah chuan Rina kha kal mai se," a lo ti ve a. Lo inrawlh ve ka duh viau nain ka ngawi ta zâwk a.

"A, kan rei lo ang, ka kal ve mai mai dáwn alawm, Rina chu in sakna lamah a țangkai, kan driver ka zui ringawt dâwn tihna a nih chu, hna hahthlâk ka thawk dâwn lo," Zda'n a tih leh chuan ka pa chuan," Um..a nih chuan han zui la, i huam phawt te chuan, awm hahdam la chu ka ti khawp mai," a lo ti a, ka nu chuan," Va fîmkhur ang che u, nizànah ruah a sùr kha, kawng thlang lam kha nêk vak lo ula, khalh chak pawh a ngai lo," tiin a zilh malh malh a, Zda chuan nui chung hian," A, ka khalh ve dâwn hleinem, min hrilh duah zêl lo la," a lo ti a, ka nu chuan," Motor lian hawl chhuah hi chu ka hlauthãwng hma alawm, fîmkhur hlê tùr a ni ringawt mai," a ti leh a.

Nizàn lamah a khawsik a tlun hluah a, tukin lamah lah a lang dam leh viah tawh bawk si a, a inti dam mah mah a ni, vawiinte chuan chàwl ve ta mai mai se, zaninah a khua a sik leh a nih pawhin ka ngaihtuah tawh lo ang, ka thawh tlai phah a, ka nu lahin ka nuamsam leh ta lo emaw a la tih phah zui.

Chhùnah chuan Nurse Vero-i a rawn kal zawk a; mahse, ka țha viau tih a hmuh chuan," Nau i neih dâwn hunah meuh chuan hmuh i nuam tawh viau ang, i changkãng sâwt êm mai," nui var var chung chuan a ti a, ka nu chuan," Ni e, hmuh pawh hi a nuam tawh teh a nia, i awm lo ang tih ka hlau țhin, kan ngeih viau che a nih àwm hi," a lo ti ve a, an nui dùn a, kei pawh chu ka țhen ve sak a.

A haw hnu chuan room lamah awmin bathlàrah ka chhuak a, khua ka chuan vêl a. June thla tàwp lam a ni ve leh tawh a, chhùn lamah ni sain lum viau țhin mah se zànah hian ruah a sûr ve zauh zauh a, vawiin pawh ni sa viau mah se zàn lamah a sûr leh maithei a ni, a sa vâwt vâwt khawp mai. July thla ni tawh se, tlai lam ruah sùr zawh hnuah ni rawn langin thing hnah hring nghualte chu han chhun tle leh ser ser se, thlìr a nuam ang. Chhanzuala ka hre chhuak zawk mai, tunah tak hian eng nge a tih ve ang aw? Min rawn hre chhuak ve țhin ang em? Ka lu chu ka thing nawk a, ngaihtuah ngam tùr ka ni tawh lo tiin ka inhau mawlh mawlh a, ka rilru pawh a rawn tâwt leh țan ta.

Ka nu nèn eirawng kan bâwl țan tawh a, a phone chu a rawn ri ral ral a, a tarmit vuah phen ațang chuan a han thlêk phawt a," Tu chu ni maw? Number ringawt," ti niah niah chung chuan a han chhâng zui nghâl a.

"Aw, a nu ka nia. Eng maw?!! An chesual maw?!! Engtin nge an awm? An nâ em?"

Ka nu chu ka en nghâl vat a, a hmel aţang chuan thil dik lo a awm a ni tih ka hre nghâl vat a, chutah," Ni lo, a ni thei lo ang!!" a ti chuai ta raih a, mit khap hauh lo chuan ka nu chu ka en reng a, nghet zetin ka kut chu ka hûm tlat bawk a.

*I TÂNA RUAT DIK TAK CHUAN I TLIN LOHNA ZAWNG ZAWNG A HRIAT HNU PAWHIN A HMANGAIH CHE ANG A, A KALSAN LO BAWK ANG CHE*