☆UNEXPECTEDLY YOU☆ - 22 By Dingdi Pachuau

 ☆UNEXPECTEDLY YOU☆ - 22 By Dingdi Pachuau

Ka nu hi nu puitling tak niin kum lamah pawh a upa ve tawh a, min hringtu ka nu aiin kum 5 vél zeta a upat ka ring; mahse, chuti chung chuan a fapa chêtsual thuin a den meuh chuan naupang tê ang maiin a chîài vek a, ka buaipui a ngai ta hial mai. Min dêng ve tho mah se kei chu inngaihtuah hman ka ni lo, ka pain ka nu phone-ah a rawn be vat bawk a, in pawh a rawn thleng har lo. Chanchin chiangkuang takin hriat theih la ni lo mah se, Zda chu a na deuh zâwk tih kan hria a, kan driver erawh chu a hliam na lo hlauh thung ni àwm a ni.

Ka nu leh pate hi chhûngkaw hung tak chhuak an ni ve ve a, Lungleiah pawh hian an unaute chu an awm nual a, Zdate chêtsual thu hriain an rawn kal khâwm vat nghe nghe a, nu leh pa țhalai lamte paeh a chanchin hria apiang an rawn kal khâwm ni berin ka hria, chutiangin min hringtu ka pa leh ka nu pawh an rawn lang thuai bawk, khawi ațangin nge an lo hriat ni? U Kimi pawh an school bàn hnuah a rawn kal leh bawk a, U Kimi ka hmuh hi chuan tlêmin ka thlâ a muang deuh țhin. Ka nu chu ka buaipui a ngai tawh lo a, Zda cousin-tehoin an buaipui tâk avàngin, awm dàn tùr ka hre thiam lo kher mai. Ka melh ngai ka melh vung vung a, Zda chu na tehchiam lo ni tùrin ka duh a, chutiang chuan ka ngai bawk. Chutiang bâk chu ka ngaihtuah lo, thil dang ngaihtuah ka tum pawhin chutiang lamah chuan a blank vek a ni ber.

Zdate chu Sèrkàwn lamah an phur chho nghâl a, ka pain kal ve lo tùra min tih avàngin inah U Kimi'n min awmpui a, eirawng min bàwlpui tùrin Aisàmi a awm bawk. Eng ka tih thâ mah a tho tâk loh avàngin room lamah kan awm a, chanchin erawh kan ngaichang pah reng tho a.

Ka nu chu a rawn haw hma deuh a, a hmel buai nuai leh mit bui deuh lâk ațang chuan a awm dàn tùr chu ka hre thiam ruak a; kei erawh chu ka mittui hi a la tla chhin eih lo thung. A chêtsual thu kha chuan min țhâwng ve viau a, ngaihtuah pawh ka ngaihtuah; mahse, ka mittui hi a la ko chhuak thei lo hrim hrim. Ka pasal a ni a, a pasal thichhãwnga natna khuma a leh reng laia a nupui mittui pawh tla chhin hauh lo nih chu, ka awm dàn chu hre thiam lo pawh an awm ngeiin ka ring.

U Kimi nèn chuan ka nu chu kan lo buaipui vat a, Aisàmi pawhin rawng a báwl zo tawh nain a haw rih lo va, ka nu hnênah chuan Zda chanchin chu a lo zâwt vat nghe nghe a, keini chuan sawi hrehawm a tih kan hlauh vàngin kan zâwt ngam lo thung a ni a; mahse, chutia Aisàmi'n a han zawh chuan kan beng kan lo chhi dùn vat tho a.

A pâwn lam lan dànah chuan a mal ruh a tliak a, a lu a tauh tel bawk avàngin a la harh chiang vak lo ni àwm tak a ni, test neuh neuh tùr a tam a, pâwn lamah tih theih nei bawk si lo chuan a rawn hawsan rih a lo ni a, kan driver pawh nâ a nei lêm lo nain zanin erawh chu damdawi inah a riah a ngai dáwn a ni. Driver Zaia chu a harh țhat avàngin an accident dàn engkim a zawh theih vek a, an rawn haw lamah, Hrângchalkàwn an pèl hlawt tihah Vai Motor lian nèn an intâwk a, an intawhna lai hi kawng zîm ve deuh lai a ni a, anni lung phur rit deuh chuan Motor lian driver chu an tân a remchàn zâwk avànga back hlek tùrin a hrilh a, chu Motor lian driver chu a lo tlàwmngai thei mai bîk lo niin, a motor khalh chu side-drain -a a tlâk a hlau a ni àwm e. An intawh dàn a zîm tawh bawk si a, chutia a back duh bawk si lo Zaia han tawlh sawn deuh ta chuan kawng thlang lama Parapet bul chu dâiin chu lai lei ber kher chu a lo dûp țha nasa a lo ni a, chu chu an chêtsual chhan chu a ni ta a ni. Zaia chu motor chuan a vawrh chhuak thuai a, Zda erawh chu a lumpui thui deuh hlek a, khaw bul mai a nih avàngin Hrângchalkàwn mipuiin an lo hre vat a, an rawn la chhuak thuai thuai ta a, motor erawh tihngaihna a awm rih lo, chhiat pawh a chhe viau ni awm tak a ni.

Zda ka hmuh ve theih meuh chuan an accident ațangin ni hnih lai a liam tawh a, ka hming a lam ţhin ni àwm tak a ni, a țawng vài fo a, ka nu leh pa chuan ka hmuh an rem ti fahran lo nain min lam fo tâkah chuan ka hmu ve ta a ni. Ka hmuh an rem tih ngai loh bâkah ka awmpui pawh an phal lo va, a cousin fel tak takte'n an awmpui a, ka nu leh pate pawhin an ngaihven reng nain an riahpui lo. A cousin-te chuan," Țhalai zâwk awm reng laia nangniin in riahpui te chuan le..." an ti tlat a, an inpe hlawm khawp asin.

A lu chu an lo tuam lûk a, a hmai a vûng duk rui a, a kut leh bân erawh a pângngai a, a ke lehlam pawh chu a lu ang thovin an tuam a, an cher niin ka hre bawk. Ni dangah ka be hmasa ngai si lo a, tunah pawh hian a nupui ka nihna anga han biak hmasak pawh chu ka hreh ngang mai. Sual hi chu ka sual ve a ni, ka va sual ve tak!

A lu a chét sawn theih loh avàng chuan a bul hnaihah tak, a hmuh theih tùrin ka țhu hnai a, min rawn hmu ve nghâl mai a niang, a kut chu a rawn chêt a, chu pawh zàwi muang hian, tîm deuh tak chungin ka lo vuan ve a, ka vawn a duh ni hmiang ka ti mai. Ka vawn hnu chuan a mit chu ka en leh a, mit khap miah lo chuan min lo en reng a, en nuam ka ti miah lo, a hmel hmuh hi nuam ka ti lo hrim hrim, a vûng duk nasa bawk si.

"Dinpui, ka hmangaih che."

A aw chu a zàwi êm êm mai a, țawng harsa a ti viau bawk, chutah, a la thâm zui nèn, ka hre thei lo lek lek a ni, kan inhnaih êm a, ka hre thei zâwk mai mai niin ka hria. A mitah chuan ka en a, a mittui a rawn tla a, a bek lamah chuan a luang thla ta. Hetiang hi ka duh miah lo, kei hi khawvêl mihringte ngaihah chuan mittui tla zawih zawih tùr zâwka ngaih ka ni ngei ang, pasalte na tuara an awm laia a na tuar zâwk mittui han tlâk hlauh chu.

"I lu a rawn na thar deuh em ni?" tiin ka zâwt ve vat a, eng emaw lai a rawn na viau a niang, a mittui tlâk chuan chhan a nei tùr a ni, a ke zâwk chu em ni? Ni e, a taksa chu a na noh noh ngei ngei ang, accident shock hi zawng, râpthlâk an tih theih êm hi.

"Ka țha, min ngaihtuah suh, naute nèn in țha zâwk em?" harsa tih hriat taka a rawn tih chuan ka pum chu ka melh thla vat a, kan țha zêl alawm, naute pawh a țha, zàn lamah mu țha thei lo mah ila naute chu a țha zêl, vawiin chawhma lamah pawh Vero-i'n min check thlap.

"Kan țha e, țawng tawh suh, țawng i harsat ém kha," ka ti sap a, ka kut a vawnna kut thâ chu a chak lo viau tih ka hria, chhûngril lamah hian a lo na viau a nih ka ring hnuhnawh ta. Ka pate hian a nat dàn dik tak hi min hrilh duh lo a nih ka ring, ka hmuh pawh kha an phal ngai lo kha a nia.

"Dinpui, in pahnihin ka hmangaih che u, naute nèn, naute chu hmuh ve ka châk dáwn..." a sawi zawh hma chuan a rawn khuh ta chhawk a, thisen a rawn phuh chhuak țhawt zui a, a kuta min hmerna pawh chu a na zawk thei. Mit khap lo lêk chuan ka en reng a, thâwk harsa tih hmel zet hian a áwm chu a thâwk záwng chuan a sêp deuh dâwrh dâwrh a, chutah zet chuan hlauthãwng zetin mumal nei lêk lo hian ka au chhuak ta vak a.

Hmu tùra ka luh ațanga dârkâr pawh tling loah chuan a nunna a thlah ta, chutiang rup rup tùrah chuan ka lo ngai pha hauh lo. A mak ka ti a, ãwih a har ka ti, pasal sûn ka ni ta ringawt dâwn si a, a fa lo piang tùr pawh a hmu hman ta si lo. A lo na viau a lo nih kha, ka bula mi rêng rêng chu an che sung sung a, țap ngâwih ngâwih ri pawh ka hria, ka nu lungchhe zeta a țap pawh ka hria; kei erawh chu ka țhu chawrh chawrh a, ka bul vêla engkim mai chu a buai nuai nuai ni maiin ka hria.

Thil awm dàn chu mumal pawhin ka hre lo. Ka țap lo va, ka mittui pawh a tla lo, ka vai riai thung a, ka nu țap chhuak țha hlei thei lo chu ka en leh ngawih ngawih țhin. A bulah kan chhûngte țhûin an kuah a, inhnèm tùr chuang erawh an awm lo. Kei pawh ka bulah U Kimi a awm a, min hnèm tùrin a țawng lo va, kei pawh ka țawng chuang lo; mahse, ka bula a awm hi a tâwk ka ti. Min be tùrin ka duh lo, ka chhâng thei chuang lo ang.

Ka pângngai loh êm avàngin kan inah chuan mi an tam em tih pawh ka hre lo, kuang chhûnga Zda muhìl chu ka en a, mipa hmel chhe lo tak a ni țhin; mahse, tunah hi chuan amah a ni tih pawh hriat a har, a dum tawh si a, hre sa tân lo phei chuan hriat a har ngawt ang. A kut chu ka han zawng a, a lo vâwt thlar tawh mai, min vuan lêt miah lo bawk. Nimin lamah kha chuan chak lo tak chung pawh khân min vuan hrâm hrâm a nih kha, a hmel chu ka en leh a, nimin kha chuan a mit khu mengin min en a, a țhat thu kha a sawi a nih kha, a lo țha tawp si lo, a nunnain a tlin loh dâwn thleng pawhin dâwt chu a lo la sawi zêl chu a nia, min hmangaih thu a sawi a, a mittui a tla bawk a...

Țap riin min tiharh zawk a, ka hawi kual a, kawngkaah ka nu leh ka pa lo ding reng ka hmuh chuan ka nui deuh sak a, ka nu mitah chuan mittui rawn luang chhuakin a rawn kal hnai a, min rawn kuah a,"Ka nu, engati nge i țah? Thil țha lo thleng a awm em ni?" tiin ka zâwt vat a. Ani chuan," Bawiha, han en teh, hriat thiam harsa ka va ti tak em!! A la hun lo asin, i nupui leh i fa lo piang tùr hian an mamawh dáwn chauh si che a," tiin a țap rawng rawng a.

Ngaihtuahna sêngin thil awm dan tùr àwm chu ka ngaihtuah a. Ni dâwn tak, Zda kha a boral tak alawm, damdawi inah, kan inhmuh hnu lawkah a nunnain tlin lovin a liam ta a nih kha, engtin nge ka hriat loh theih? 

"Ka nu, Zda chu ka thlah fel em?" tia ka zawh chuan ani chuan min chhâng lovin min țah khum zui a, min kuah bawk a, ka pa lam chu ka en a, ani pawh chu a mit a sen rûm mai.

"Aw, țha takin i thlah e," a tih chuan ka bu nghat a, ka nu țap chu hnem tumin kuah lét ve ka han tum a; mahse, eng emaw ni hi ka lo pawm țûn mai niin, ka han en chiang a, khuma țhu chungin Zda thuamhnaw chi hrang hrang ka lo pawm kháwm a lo ni a, a ngaihna ka hre lo kher mai!

"Khawi, ka lo dah ang e," tiin ka pa chuan min rawn lâksak ta vek a, ka nu pawh chu ka kuah ve thei ta, a hnunga chùlsak pah chuan," Ka nu, ani awm lo mah se, nangni ka nu leh pate in awm alawm," ka ti sap sap a; mahse, chu chuan ka nu chu a vèl zual sauh a, a țap khùr ngawt ngawt a.

Zda boral ațanga ka pângngai chhuah ve meuh chuan ni thum a lo liam tawh a, kan inah chuan min tawrhpuia rawn chuangkai pawh an la awm reng a, la rei lo viau mah se ka nu taksa chuan a tuar khawp mai, a chêr kuam mai a, a mit lah a bui lâk reng bawk a, ka nu lungngai hnèm thei lo khawpa ka lo mumal lo chu hrehawm ka ti ru khawp mai. Ka mumal loh chhûng chuan U Kimi'n min lo awmpui deuh reng a lo nia, ka lo hre mang hauh si lo. Zànah ka mu tawp a, chaw ei hunah ka ei leh tawp a, rilru mumal ka lo pu miah lo a lo ni, U Kimi'n Zda boral nia ka țhiante rawn kal thu a sawi pawh chuan mak ka ti khawp mai, ka hmu hauh si lo.

Mi zînga ka awm hleih theih loh vàngin kan room-ah ka awm deuh reng a, tunah pawh ka awm leh tawh. Chhùn lamah hi chuan U Kimi a school țhìn a, ka pângngai ve ta bawk a, tu awmpui mah ka ngai ta bîk lo. Zda mutna țhin lam chu ka thlîr a, tún hnuah chuan saw lai chhuatah sâwn a mu ngai tawh lo ang, a mutna tùr pawh a phah tawh lo ang a, a hmel pawh ka hmu ngai tawh lo ang. Min kalsan tawh, a liam tawh a, damlai hremhmun temtîr tùr pawhin ka bulah a awm tawh lo.

A thuamhnaw dahna chu ka va hawng a, a thuamhnaw chi hrang hrang chu a lo la inkhai dul mai. Ka khawih dan dan a, ka hnìm pah a, a rim pawh a lo la nam hlawmin ka hria. Ka en zêl a, a drawer chu ka han hawng leh chhin a, lehkhabu, a kâwm savun ațanga siam ni àwm tak lian vak lo ka hmuh chuan ka han la chhuak dà dá a, ka han kêu chhin a, a hming 'Zodinsanga' tih mawi zeta a ziak chu ka hmu hmasa ber a, diary emaw ka ti zet a; mahse, a lo ni chiah lo. He lehkhabu hi a ni ngei ang, zàna eng emaw ziah nâna a hman țhin kha, ka han kêu leh a, ka thlalâk ka hmu thut mai chu mak ka ti kher mai! Ka en reng a, tlêmin a rei deuh tawh nain ka la hre chiang khawp mai, ka duh lo chung a phone-in min click-sak a ni a, ka tûm deuh hlek nghe nghe, a delete phal lo a nih kha.

'Ka thinlung neitu,

Ka hmangaih êm êm' tih hi ka thlalâk hnuai chiahah chuan a lo inziak bawk a, a hawrawp nalh dàn leh a pentui rawng hman ațang chuan a uluk ve viau a ni tih a hriat mai a, phêk dang ka han kêu leh a.

'Ani chauh hi ka hmangaih awmchhun a ni a, a ni zêl bawk ang, kumkhua leh chatuanin.'

Ka chhiar zêl a, sei tak taka ziah a ni lo bawk a, ka kêu zung zung a, chutah, hawrawppuia 'KA INTHIAM THEI TAWH NGAI LO ANG, KA DAM CHHÚNGIN' tih ziak ka hmuh chuan ka țim sawk mai, a date chu ka en vat a, khami ni, zàn țihbàiawm zet rawn hrin chhuahna nî ngei kha a nih vàng a ni.

'Ngaihdam theih rêng rêng loh thil ka ti a ni, ka thinlunga inthiam lohna nei reng chung hian ka ni tin hun chu ka hmang a, keimah vànga hlim ni hmel hmu ngai lo ka hmuh hian ka hrehawm tihna a zual a, a duh lo tih a sawi ve hrâm hrâm chung pawhin ka tilui si, kha dârkâr ațang khân hlimnain min thlawh bosan a, hrehawmna leh mahni inthiam lohna chuan nasa tak hian min chènchilh ta thung a, ka thil tih kha sût rual a ni tawh si lo, hun hi koh kìr leh theih se aw... Hrehawmna leh mahni inngaihdam theih lohna hian ka thih ni thlengin, ka thlàn khur thlengin ka tuar dâwn a nih hi, ngaihdam rual loh thil ka ti si a'.

Ka hrem nia ka lo hriat țhin khân ka chunga a thil tih vàng khân inthiam lo rêng rêng leh hrehawm ti rêng rêngin hun a lo hmang reng a lo ni si a, ka hre hauh si lo, a chungah ka ràwn theihtàwp chhuahin ka hrem char char kha a ni a, a rilru lam a retheih leh a hliam nasat tawh nâklaiin, keiin a hliamah chuan chì ka phul belh sauh sauh bawk a.

'Inthlahrungin hrehawm ti mah ila a bula awm ka châkna a bo phah lo va, ka theihtâwpa duat leh ngaihsak ka duh tho a ni. Naute a pai lehnghál, a hmangaih miah loh pasalah min nei a, a hmangaih miah loh fa a la pai zui bawk a, a tán a harsat dàn tùrzia hi, hmeichhe luhlul zet ni lo se chuan he thil hi hmeichhe tam tak chuan an paltlang zo hauh lo ang le.'

Ka hmangaih hauh lo tih chu a lo hre chiang ngang a ni. Ka chunga a thil tih avànga hrehawm ti tak chung leh mahni inngaidam thei lovin țha tak leh duat theihtàwpin min enkawl a, keimah avànga zàna a tlaivàr ngunzia kha, ka ngaihtuah lêt zut zut a, a tân eng thil țha mah ka ti ve hauh si lo, a tâna ka tih chhun ve lah runluihna leh amah hremna chauh.

'A hlim mawlh si lo, keimah vàng a ni tih lah ka hre kar si, hrehawm ka va ti thei tehlul êm! Hei hi Pathian min hremna a nih ngei hi, tu hmeichhiain nge a duh lo chung tiluitu chu hlim hmel pu chunga en thei ang? A rilru hrehawm dàn tùr leh a rilru nat dàn tùr hi ka ngaihtuah pha thiam lo zâwk, tuna hrehawm ka tih ve hi chuan a nê pawh a ek lo ang. Room chhûnga ka riah a phal ve ringawt pawh hi lãwm hlê tùr ka ni, hei hi pâwngsualtu chan atân chuan a la țha viau zâwk a ni lo'm ni? A pasal chu ka ni ve tak si a, a pasal nihna dinhmuna ding tlâk pawh ka ni mawlh lo.'

Ka awm dàn chu a lo va hre chiang tehlul êm! Heti khawpa inthiam lo leh hrehawm ti kha kei chuan hre hauh lovin hremna tinrêngin ka lo ûm zui mawlh mawlh mai si a, ani ai khân țhatna ka nei mawlh lo, mi sual tak ka lo ni. Ka thinlung chu inthiam lohnain a rawn khat a, mi chunga hremna lek tùr hian eng ang fakauva țha nge ka lo nih le? Ani kha țawngkam țhain vawi khat pawh ka be lo va, ka pasal a nihna ka tilang ngai hek lo, ani kha chuan mahni inthiam lo chung chung leh thinlunga mahni inngaihdamna nei thei hauh lo chung khân a duat theih ang anga min duatin hlim hmelte kha a chhuah țhìn a ni si a, a lo hlim ngai hauh si lo.

Ka chhiar zo țêp tawh a, ka han kéu leh a, phêk khat chiah a bãng tawh, chuta thu inziak chuan ka mittui a titla ve ta zãwih mai.

'Nizàna ka khawsik tlun kha, min hnaih lai ber a ni. Ka khua kha sik hluah mah se, hrehawm ka ti hauh lo, ka bul hnaia a awm theihna a nih phawt chuan khawsik tlun hluah hluah pawh hi thil nuam tak a lo nih kha, khawsika tlun nuam ka tih ber a la ni, khua kha vár thei lo se ka ti tak zet. Zînga ka harh lah khân min nghèng khân a lo muhìl bâm reuh a, ka thlîr reng, a hmai kha chùlsak ka châk a; mahse, ka ngam teuh si lo! Thlìr ringawt pawh kha nuam ka ti a; mahse, ka thlîr reng a ni tih hre ta se, a muhil duh hauh lo ang le. Nizàna ka damloh vàng khân zàn a meng rei a, a taksa a chak tâwk lo nèn, a chau viau a ni.  Ka khawngaih reuh mang e. Hmangaih hi a phû hliah hliah asin, kei mipa lâktlâk loh ber hian hmangaih niin ka inhria chu a ni si a, a hmangaih chunga khatiang thil ti duh khân hmangaihna thu hi sawi ngam tùr ka la ni cheu em??' 

Ka mittui far chuan lehkhabu chu a far huh a, ka hmu phê ruai mai. A ninkhua kha a lo va hrehawm dâwn tehlul êm! Chu ngaihtuahna chuan ka thinlung a luah khat a, thil țûl lo leh sáwt lo ni mah se amah khawngaihna avàng chuan ka thinlung chu sawi thiam theih loh hian a rûm vawng vawng mai.

Ka chawlh vang vang hnuah chuan a phêk tàwpna chu ka han chhiar a, a thihna tùr lam a pan hmaa a ziah ngei kha a ni si a, la dam se chuan vawiin thleng hian a la ziah chhunzawm dâwn asin...

'Vawiin chu lung phurhnaah ka kal mai mai teh ang, a bula awma han pangchan vêl pawh ka châk viau a; mahse, ka ngam hauh si lo. Nizàna min ngaihsakna ang kha dawng leh thei teh hlauh ila!! Kan naute lo piang tùr hian a ngaihsakna leh duatna chu a dawng ngêi àwm si a, naute vànnei chungchuang tùr chu a ni chiang alawm. Lo piang tawh se, ka hmu châk tawh! A nu anga hmel țha a nih ngei pawh ka ring, kei pawhin ka duat ngawt ang, ka hmangaih berin min hrinsak ngei ka fa a ni dáwn si a.'

A thi tùr kha a hre lâwk emaw tih mai tùrin he thil hi a lo ziak tel bawk a.

'He thil hi i lo chhiar a nih ngai chuan kei chuan he khawvêl hi ka chhuahsan ta tihna a ni ngei ang, chuti a nih chuan he thu hi ka hrilh nawn mawlh mawlh ang che, ka hmangaih che, ka hmangaih lutuk che, ngaihdam rual loh ni mah ila he ka thinlung hian a hawisan thei si lo che a, i pawi ka sawi ta a ni. Ka hmangaih che tih sawi pawh hi ka zak zo lo, ka hmangaih che. Kan naute lo piang tùr pawh chu ka hmu ve hman ta lo a nih hi, hmangaih taka lo enkawl turin ka chah dâwn lo che, a pa vàng hian i huat loh hrâm erawh ka beisei lui tlat teh ang. Min demin min haw ngawih ngawih mah la, he khawvêl hi ka taksain a chhuahsan hunah chuan mahni lo intihrehawm tawh suh aw, keimah avànga i nâ zawng zawng pawh kha lo dam tawh se, hma lam hun êng beiseina nei mawlh ang che, kei chu theihnghilh hlen ka ni ang a, ngaihdam theih loh leh phû lo ka nihna erawhin thlan thlengin min ûm zui ang, ngaihdam ka dîl ngam lo che, Pathian hnênah erawh ka dîl ngam mahna, hei hi i tân ka dìlsak ang che, hlimna zawng zawng nei tùrin ka dìlsak ngei ngei ang che, nei mawlh bawk ang che, hmeichhe luhlul tak i ni a, i neih ka beisei tlat bawk a ni. Ka hmangaih reng che a ni tih erawh  min hriat chhuahsak ve zauh zauh la aw.

         Aw kan naute lo piang tùr mawlh chu, ka hmu ve châk dâwn si a...'

            

Ka țap chhuak ta hawk hawk a, a lehkhabu chu ka pawm vawng vawng a, a tâna ka mittui a tlâk vawi khatna a ni. A nun kha a lo va khawngaihthlâk tehlul êm! Khatianga nun hrehawm khân a lo nung reng a ni si a, ka hmuh laiin hlim lo hmel erawh a pu ngai hauh si lo, kan thinlung kha tàn in, ripchhûngah, inhre tawn hauh lovin kan lo inkhungsak reng a lo ni si a, a thiam loh vek a ni bîk hauh lo, ka thiam loh tam tak a awm a ni. A sawi ang ngeiin thlànmual thlengin mahni inthiam lohna, ngaihdam tlâk lo intihna leh hrehawmna tinrêngte'n an zui lût ngei àwm si a; mahse, tunah chuan, chûng zawng zawng pawhin a tihbuai theih tawh loh tùrin amah siamtu hnênah a kal ta si a, muang takin a thlarau pawh chàwl ve tawh rawh se.

Ka nu a rawn tlãn lût a, ka țap tih  hriain a rawn lût a ni ngei ang, min rawn kuah a, ani pawh chuan min hnèm thei bîk lo, kan pahnih chuan kan țap dùn a, țah hawm hawm hi a lo țha a nih hi, a hnuah kan thâwl ve hawk thei tlat.

Zda thlarau ka zah êm avàng chuan a tûk lamah chuan thlànah U Kimi nèn kan kal a, ani lah school lamah Holiday a nih vàngin a lo remchâng sia, min zu hruai ta a ni.

Ka ţap chhuak lo nain ka mittui erawh a tla zawih zawih thung a, a hming an ziahna thing kawkalh chu ka vuan a, ka rilrua ka sawi chhuah tùr atâna ka lo khâwl khâwm zawng zawng chu ka thinlung chhûngril ber ațang chuan ka leih baw hawk hawk a, ka ngaihdam thu leh thlamuang taka awm tawh tùrin ka hrilh mawlh mawlh a, a chunga ka awm dàn avàng leh a dam laia ka ngaihdam thu ka hrilh loh avànga min ngaidam tùr pawh chuan ka ngèn bawk a. Thil sâwt lo a ni tih hre mah ila ka tihmâkmawhah ka ngai tlat, a thlarau chu zalèn taka ka kaltîr a ngai tlat a ni, ka ngaidam a ni tih a hriat chuan kei pawh ka hlim thei dâwn asin, hma lam hunah pawh beiseina êng ka neih phah thei mahna.

Kan haw dâwn chuan a thlàn hung lam chu ka thlîr leh vang vang a, tunah chuan ka puma naute lo țhang lian ve mêk nèna khawvêl hmachhawn tùrin min kalsan ta si a, kei hian engtin nge pa tel lo chuan ka enkawl chhoh theih tâk ang le? Pa a la mamawh ngei dâwn a, a lo pian chhuah hma hauh ațangin mite'n 'fahrah' tiin an sawi dâwn si a, hma lam hun chu a va la zîng tehlul êm! Keimah chauh chuan ka tuar chhuak zo ngût ang em?

*HMAITLÂNG ȚHA HI HMEL ȚHA TIH HRILHFIAH NÂN AN HMANG A NIH CHUAN TU MAH HIAN AN NU LEH PA, AN UPAT TAWH AVÀNGA HMAI VUN CHUAR ȚÛP TAWH, HA BAL SEU LEH MIT SIAI SAI TAWHTE HI HMEL ȚHA TIIN AN HMANGAIH LO TAWP ANG LE*