☆UNEXPECTEDLY YOU☆ - 23 By Dingdi Pachuau

 ☆UNEXPECTEDLY YOU☆ - 23 By Dingdi Pachuau

Hun a kal a, kan ina kan khawhar hlaua rawn chuangkai țhinte pawh an reh ve țan ta deuh, rawn lêng an tam thei tawh lo tihna a nih ber chu, he hun tak hi ka lo huphurh lâwk kha a ni, mi țiavai deuh țan chuan ka nu lunglèn khawharna chu a kai tho thar a, a mittui a rawn tla leh țan ta. Kei hi lunglênga hnem ngai tùr ni àwm zâwk tak ka ni a; mahse, chutiang chu ka ni lo, ka nu khawhar chu ka hnem a ngai ta zâwk a, han hnèm ve mah ila min hmuh apiangin ka rai puar ve lah tawh tih a hmu lo thei si lo va, chu chuan Zda a hriat chhuahtîr zêl lo thei lo a ni chêk ang chu, min țah khum leh țhin a, tihngaihna a vâng thei khawp mai, kei lahin mahni inthiam lohna leh inkiltawih rûkna ka nei ziah a, a fapa bula ka awm dàn zawng zawng kha hre vek ta se, engtiang takin min ngai ang maw ka ti ru ziah, a chunga ka sualzia kha hre chhuak ta se a rilru a va na dâwn rua êm!

Zda ber a boral tâkah chuan hetia awm ve reng hi thil dik a ni lo tawp ang; mahse, Zda boralna a la rei lutuk si lo va, ka rilru a buai angreng khawp mai. U Kimi rawn lènin a bulah pawh ka sawi lang nghe nghe a, ani pawh chuan," A dik alawm; mahse, a boralna a la rei lo ve êm mai a, bâkah, a nu hi a khawngaihthlâk reuh sia, chutiang thu sawipui chu a la hun lo deuh ka ti, a ngainat êm che hi maw, chutah, naute a lo piang thuai dâwn bawk a," a lo ti ve a, kan pahniha thil sawi hi chuan awmzia vak a neih dâwn loh avàngin ka nu leh pate a lo sawipui ve tùr thu min hrilh zui a.

U Kimi hian min buaipuiin a hman phawt chuan ka bulah hun a hmang reng ti ila a sual tampui àwm lo ve. Hei vàng hian ka nuin min duatzia leh min ngainatzia a hre ve a, Zda a lo boral ta bawk nèn, inhnem nân tak min hmang a, ka pa pawh hian min ngaina tho a; mahse, mipa leh hmeichhia chu kan inang lo va, a tilang ve ngai vak lo. A fanu ang chiaha min en ka ring, ka bula a țawng dàn leh a titi dàn ațang hian pain fate min bia ang leh thu țha min hrilha min titipui hi a ang ka ti ber. Hei vàng tak hian a ni, an hnên ațanga kal chhuak tùra thu sawipui ka harsat êm êm ni.

Mahse, ka sawi chhuah ngai lovin min hringtu ka nu leh pate an lo che ta hlauh a, U Kimi khân a sawipui a ni maithei; mahse, an lo rem ti lo rih khawp mai a, ka nu phei chu a țap chhuak ta hial a, ka awm ve reng si a, hrehawm ka tihzia mai chuh!

"Kan fanu a ni a, ani bâk neih kan nei tawh hauh lo. Ani lehzêlin min kalsan chuan, engtin nge ka awm ang? Kan fapa nupui mah ni se mo angin ka en ngai lo, kan fanu a ni, engah nge a nu leh pa in chu a chhuahsan ang? Kan fapa kan chân tawh a, ani lehzêl chàn zawng, ka ngai ngam lo," a ti a, a țap karh karh a," Bawiha, min kalsan hma lua a ni tiraw? Kei zawng, hrehawm ka ti êm mai, Dinpuii awm loh chu ka phal thei lo ang," a ti leh a.

An sawi an sawi a, a tàwpa an thu tihtlûk nia ka hriat chu naute ka neih thlengin an hnênah hian ka awm rih ang. A hnulam erawh chu hunin a hril chho ang, min hringtu ka nu leh pate pawhin tuna ka nu hi an khawngaih ve êm mai a, a duhna an zahsak ve a ni. Kei pawhin ka hreh lutuk chuang lo, bâkah, kan inah pawh awm mah ila, nuam ka ti chuang lo ang, khawi hmun mah hi nuam ka ti tak tak thei tawh lo ang, hei hi ka hringnun tùr chu a ni tlat.

Mi hi an lo fel hi ka tia. Kan chhûngkua tê chauha awm lai kan la nei lo, lêng rawn tam lêm lo mah se khawhar lutuk lovin min siam a, chuta kârah Sêntei a rawn lêng ve zauh zauh a, U Kimi'n a rawn kalpui țhin thung.  Khati khawp khân ka be duh lovin ka hawisan kha a ni a; mahse, ani chuan thinrimah a la miah lo, chutih ahnëkin U Kimi bulah pawh ka chanchin a zâwt reng a, min ngaihtuah êm êm záwk a ni. Tunah phei chuan anni hi min kàwm hlimtu niin kei mai ni lo, ka nu ngei pawhin an fiamthu thawhah lungngaihna mittui kâr ațangin a nuih ve theih phah bawk a, kan tân hi chuan an hlu tak zet a ni.

Zda thlànlung tùr chu mawi takin kan siamtîr a, a siam lam chu an hmanhmawh mah mah em aw ka ti rilru a; mahse, ka pain," Rei rial lova phun thuai hi a țha, mihringin hma lam hun tùr kan hre lo va, a puala a hun kan hman theih hnuhnung ber tùr mah ni se a sârhù hnaih deuha tih vat hi a țha. Pathian zârah kan dam ang a, kan dam țhat laia hun hman hi a țha ngai," a ti a, ka nu pawh chuan," Ni e, hei, tu hmêl pawh kan hmu har tawh lo ang a, a pian hnu lawkah kan phun dâwn nia. A fa lo piang tùr a nghahhlelh ve tehlul nèn, a hmu hman ta si lo va. Chuvàng  a nia, a fa pian hnua thlànlung pawh phun kan tih deuh kher ni, i hre thiam ang chu tiraw?" a ti  ve a.

"Ka nu, ka hre thiam alawm, in tih hun hun kha a țha ka ti vek mai, kei chuan duh hun bîk ka nei lo," ka ti ve a, ka pa chuan," Nupa la țhalai deuha inboralsan hi chuan lung inphunsak thuai hi a țha, Pathian hmaa kan thu tiamah 'Thihnain min țhen hma loh zawng' tih a ni a, thihnain min pawh țhen hnuah chuan nupui pasal atân mi dang kan duh zâwng neih leh kha a thiang tawh a, nang pawh i la țhalai a, hetia hrèn beh reng che hi kan tum miah lo a nia, tunah chuan i rilruah a la awm lo ang; mahse, hun a kal ang a, duh zâwngte i la nei leh ngei ang, dam chhûnga hmeithai tùr hian kan phal hauh lo che a ni," a ti leh charh charh a.

Ka mitmei an lo vèn vàng a nih chiah chu. Pasal dang neih leh maw, ka nui ringawt a, ni e, tuna ka rilruah hi chuan pasal dang zawng, ka la ngaihtuah chhin hauh lo, ka fa lo piang tùr tân nu țha tak nih ka tum zâwk a ni. A pa tân nupui țha ka ni tawh lo va, hun hrehawm rêng rêng hmantîrin mual a liam zui a, thil tisual ve miah lo, khawvêl sualna pawh la tem chhin hauh lo, ka pum chhûnga ka thisen ringa rawn țhang lian tân hi chuan nu țha nih ngei ka tum ruh ve tlat tawh a ni.

Mahse, inenkawl țhat ka tum ve tawh tehlul nèn, thil ka ei thei lo êm êm a, ka zia chhoh ve tawh nèn khân, Zda boral chho vêl boruak nèn, ka chhe leh viau tawh a, ka chêrin ka dawldâng a; mahse, ka rilruah erawh tumruhna tuh ka tum tlat a, ka theih ang tâwk chuan thil ka ei lui ve a; mahse, taksa tâna țha tùr khawp chuan a tlêm lulai êm a ni; mahse, mak ve deuh mai chu, chêr viau mah ila naute chu a la hrisêl țha ve zêl thung a ni. 

Púkpui lama in kan sak pawh chu kan chhunzawm leh țan tawh a, ka pa chuan a han vil ve zauh zauh a, ka nu hi chuan hralh leh daih mai a duh thu a sawi țhin.

"Hralh daih mai ila ka ti, a man kha dah khâwl ta zâwk ila te ka ti mai mai a. I han kal ve hian i han thawk ve a, i hah phah mai mai niin ka hre tlat. Hei, in lian pui kan nei reng a, hei pawh hi Bawihite nufa chan tùr tho a nia, keini nupa chu kan kumte a tam tawh a, rei tak pawh kan dam kher lo ang a, lu nghahna tùr kan nei tawh a, ngai pawh ka ti tehchiam tawh lo e a," a tih chuan ka pa chuan," Ni khawp mai; mahse, ram chu a hlu chho zêl a, hralh ai chuan khitia a awm pawh khi a ţha zâwk ka la ti fan. Bâkah, Bawihi pawhin phìr pawh a nei thut thei a, an unauin an insem thei dâwn asin," a lo ti thung a, 'phìr' a sawi lai chuan ka en zawk a, a nui miah lo, phìr lam chu neih ka inring lo  hrim hrim, phìr nei tùr chuan ka puar lian lo êm mai.

Ka mutna hmunah chuan an thil sawi chu ka ngaihtuah zui a, keimaha an innghahzia leh min en hran lohzia, an thisena an hrin an fa ang hiala min en chu mak ka ti a, min hmangaihzia ka hre thar bawk. Ka tân pawh kalsan chu an har ngawt ang le. A, ngaihtuah vak lo teh ang, a enga pawh chu lo ni se, naute lo piang phawt se, a fel vek mai ang.

Zda thuamhnaw lam ka hainaah naute thuamhnaw tùr a lo lei sa pawh ka hmu chhuak ta nual a, ka nu leh pate lahin an chhuah remchàn chângin an rawn lei ziah a, ka nu phei chuan puan tùr pawh a lei țeuh tawh. An phûr thei si a, tam ka ti viau tawh nain ka sawisêl duh lo, an rilru ka tihnatsak ang tih ka hlau.

Ka chhe lutuk a, dârthlalanga inen pawh ka peih lo, ka hmai chu a rawn duk deuh em maw ni, fiah vak lo hian ka biang tawn tawnah chuan a bial a, ka ngei tak tak! Ka lu a lawk lel a, ka ring lah a tê si, heti khawp maia ka han chêr chhe mai hi a mak ka ti ru țhin, ka dul chu puar lo phei se ka va chêr țhawl țhawl dáwn tak! 

September thlaah harsa fêin Christian Hospital, Sèrkàwnah fa chu ka han hring ve a, ka'n har mai mai khawp a, ka vei rei bawk si, ka chau lutuk, ka thi țêp țêpin ka ring, a chhan chu chiang taka harh ka nei mang tlat lo. Thisen unit 3 min pe a, chiang taka ka harh hnuah chuan ka hrin chu mipa fa a ni tih ka hre ve chauh, a pi leh pute chu an lãwm ngawt ang le, chutiangin kei pawh ka lãwm.

Vànneihthlâk takin ka inhliam nasa lutuk lo va, hnute tui ka nei țha viau bawk. Ka thisen ngeia ka hrin, ka fa chuan ka hnute a'n hne dek dek mai chu mak ka ti a, hmuhnawm ka ti a, ka en ning thei lo. A kut te reuh tê a'n phar hiang hiang a, a kuttin lah a sei reuh si, hlehsak ka châk khawp mai a; mahse, ka nuin," Hlep lo ve, kutkawr kan buntîr reng rih ang a, a len deuh hnuah kan hlep chauh dâwn nia," a tih tâkah erawh chuan ka ngaihtuah zui duh ta lo va.

Damdawi inah chuan min hringtu ka nuin min awmpui a, min duatzia leh min ngaihtuahzia ka hre thar deuh deuh a, a fanu na nâ nâ chu min lo hmangaih chu a lo ni. A duh loh zâwnga ka lo awm tlat țhin vàng khân min hmangaihna kha a lo tilang duh ngai lo mai mai a lo ni, kei lah khân luhlulnain ka dãl tlat țhìn si a.

Ka fapa chu a puin a hming a sà a, a pa nèn kan hming la kawpin, "Zorinpuia tih ni rawh se," a ti a, tu mahin hnial enah kan en lo, min hringtu ka nu leh pate phei chu lo inrawlh an tum lo hrim hrim, a pi leh pute kutah an dah hmiah.

Inah erawh chuan U Kim'n min rawn awmpui ta thung a, ka nu pawh a awm bawk a, ani hi chu kum lamah pawh a upa ve tawh a, nau han khawih zung zung tùr leh zàna min riahpui tùrin U Kimi hi a la țhalai a, a la hrisêl bawk a; mahse, ka nu leh pate pawh hian kan room hi an chhuahsan hlei thei lo țhìn chu a ni, naute chu hmuh reng an duh a, an en ning thei lo," Pawm theih tawh la aw..." an ti an ti mai a ni.

Naute rawn enin Remlali leh Famkimi pawh an rawn lêng ve a, naute hman tùr oil, lotion leh sahbawn tih vêl an rawn keng ve nasa mai a, anni meuh an rawn thlen leh tâkah chuan kan han nuiho leh dar dar a. Boruak an rawn tizãngkhai thiam a, an ti țha khawp mai, naute tân thil țha hlîr an rawn keng zui bawk a, țhian nih ka tlin loh tehlul nèn, anni zawngin an tlin țhìn teh e.

Zorinpuia chuan a pa a chhùn a niang, rawn en apiangin," A pa chiah chiah," an ti zêl a, a an leh an loh pawh ka hre ve thiam rih lo. Thla hnih thumte han ral zet se ka hre thiam ve chauh ang. Hnute a heh a, mut a duh ve viau bawk; mahse, kut lum hi a hre reuh a, tlêmin a buaithlâk deuh. A àwm ve tho mai, an pawm châk ve si a, a pi leh pu lah hi an inpeih reng bawk si, mutpuia a mut duh loh chuan a piin a pawm mai ţhin. Ni tin mai hian a hmel chu a danglam zêl ni maiin ka hria a, chawlhkâr thum a liam meuh chuan a pa a ang ka ti ve țan ta deuh bawk, a aw hi a lian a, a inbual chânga a han țê ve te hi kan làwm thei khawp mai a, a pi hian," A pa tét lai aw chiah chiah a ni," a lo ti ve ziah bawk.

Thla a han tling a, a puin lawmna ruai a buatsaih a, kei pawh ka dam ve viau tawh bawk a, mi lo kal pawh ka lo chhàwn ve thei tawh a, thilpék a dawng nasa viau a ni. A pi leh pu pawhin Walker changkãng zet an leisak bawk a, kan chhûngkaw khawvêl chu an tupa leh ka fapa ni bawk Zorinpuia a ni ti ila ka tisual àwm lo ve, ka pa pawh inah a awm tam phah êm êm a," Kan puak theih hunah che chuan kan va paw nasa dáwn rua che êm!" a ti țhin.

Thla hnih thla thum a ral leh meuh chuan lawm a hre tawh hle a, an làwm nui an làwm nui țhin. Krismas hunpui lai mah ni se kan chhuak tam lo va, inah chhûngte'n min rawn tlawh a, Zda thlàn pawh mawi takin kan chei a, thlàn cheinaah kan chhûngkuain kan kal vek nghe nghe a, Zda cousin-tehoin min rawn pui bawk a, ka nu pawh a lunglènna rawn tho tharin a han țap leh rãih rãih a, a àwm viau a ni. Thlàn kan chei nî chuan mi dang thlàn cheia kal an awm ve nual a, țâp rãwih rãwih ri hriat tùr a awm ve tho bawk, hunpui lo thleng zet hi chuan lunglènna, chhûngte liam tawh ngaihna a rawn kai tho lo thei lo a ni e.

A nu ber hian ka fapa chu ka chang hman lo a ni ber mai, an pawm a, an pua a, kei chuan hnute ka pe a, zànah ka mutpui a ni mai. Min àwl hneh lutuk a, bâkah, Zda cousin Aisàmi khân min awmpui a, chhùn lamah ka nu leh pain an awm chawt a, min hringtu ka nu leh pate lah bãng thei bîk lo, an rawn lang ve reng a, U Kimi leh Sêntei lah chuti bawk. Aisàmi chuan," U Dinpuii chu a nuam àwm e, naute awm i ngai miah si lo va, fa ka neih ve hunah hetiang hian ni ve thei ila," a ti țhin, ka nuih a tiza thei a nia.

Kum a lo thar a, January thla a ral hnuah chuan Zda thlànlung pawh kan phun ve ta a, a puala kan hun hman hnuhnun ber tùr a ni tawh bawk a, ka țah a'n chhuak tlat a nih chu. Mi zînga țah chu ka hreh a, bâkah, tuar ber ang maia țah chu ka zak, ka thinlung lamah inthlahrunna a awm tlat, kan room lamah lûtin bathroom-ah ka ințap thâwl a, Zda thlarau ka be pah mawlh mawlh bawk a, ka zia ta hawk mai.

Bawihtea chu damdawi țha tinrêng ei leh hnute tui duhtâwka hnêk tùr nei a ni bawk a, thla ruk a han tling chho chu a duhawmin a chum reuh si a, a hrisêlin a nui duh bawk nèn, tu dang mah kan ngai lo ti ila a dik viau ang. Nu mitah chuan khawvêla naute duhawm ber leh hmel țha ber a ni lo thei lo, mite pawhin an han fak der ve viau țhin bawk a, a pu phei chuan," Ani aia naute hmel țha hi chu an awm thei tawh lo ang," a ti hial țhin, a tupa hi a chhuang thei a nia, puain in bul hnaiah a teipui a, a puaka lahin nuam a ti thei si, a hlim hmel chu thil hmuh nuam ber niin ka hre țhin.

Kei pawh tlêm tlêmin ka taksa chêr pawh chu a zia chho ve ta deuh a; mahse, Bawihtea hi mipa fa a ni si a, hnute tui a heh nèn, ka țha chak thei lo ang. Ka hmai duk deuh pawh chu a zia ta viau mai, U Kimi'n hnawih tùr min hrilh a, ka hnawih vàng pawh chu a ni maithei a ni. Dârthlalangah pawh ka inen ve zawk zawk tawh a, lungawi taka inen erawh a la har deuh, nakinah Bawihtea'n hnute a hnêk loh hun a la rawn thleng ve ang a, chutih hunah chuan ka la zia chhawm ve mai ang chu maw, ka hmai duk deuh pawh hi Bawihtea ka pai vàng pawh kha a ni maithei tho a, hun kal se, a reh ve thei maiin ka ring.

*******

Kum 3 hnuah chuan

"Bawihte, khawih suh le, kha kha chu a bàl a, a tenawm, i kut kha bêng fai la aw," tiin ka fapain pangpâr pot-a lei țha ka dah a kuta a khawih ka hmuh chuan ka ti a, kal hnaiin ka chawi sawn zui bawk a. Pangpâr han phun leh enkawl vêl hi nuam ka ti thar a, zîng lam leh tlai lama hun ãwl ka neih laiin ka khawih țhìn a ni.

A kut a ben fai hnu chuan in chhûngah ka kai lút a, a kut chu ka silsak zui bawk a, ka bulah ka chêt vélna hmunah hian a lo awm ve lo thei lo va, engkim mai hi lo khawih ve a tum lo thei lo va, kan chë hi a sâwt mawh ve țhìn a nia; mahse, nun a tihlim a, ka hringnunah hian a lo tel lo ang tih ka hlau ngawih ngawih.

"Âma, chiante a tuh('Fiante ka duh' a tihna)."

Fiante chu ka pe ve mai a, a kal tarh tarh a, brite bucket lian fahran lo chhìn chu hawngin buhfai thlei sa ka dah chu an suak zui nghâl a, engtin nge maw a chhìn chu a hawn theih ni? Ka lo chhìn nghet chiah lo a ni ngei ang; mahse, ka hau lo, a tibaw ngai chuang lo, a suak kual mai mai țhìn a ni zâwk. A țawng fiah lo viau na hian thumal fiah deuh deuha lam thiam hi chu a nei ve tho a, a lam fiah thiam loh hian ka hlimpui thei a nia. A pi leh pute pawhin an hmu châkin an be châk leh tawh khawp ang, nakinah bia ila a țha tak ang.

Ka vànnei ka ti dâwn nge, ka nute bula ka awm lai khân a rûkin hna tùr ka ngaihtuah ru ve reng a, nau pawm leh hna dang a inhmeh loh êm avàngin peih lo ru viau chungin zirtîrtu hna ka dîl ve a, U Kimi leh Sêntei'n min bengvàrpui bawk a, khawpui chhûngah inhlawhna tùr chu ka hmu ta mai a, Bawihtea a leikàn deuh hnuah phei kha chuan ka inhlawh ve lâwp lâwp rêng a, private-a inhlawh chung chuan zirtîrtu ni thei tùra thil pawimawh TET ka exam pah bawk a, paper I leh paper II chu vawi khat ka beihnaah ka pass ve ta mai a, ka duh hun huna ka chhuah min phalsak tawh avàngin khawpui chhúng ni lo hmun danga awm theihna ka zawng a, hmun dangah nun thara indin chhoh ka duh a ni, hlim viau angin lang țhin mah ila hlimna tak tak ka hmu chuang lo va, nun bul țan nân hmun dang boruak ka mamawh ni bera ka hriat avàngin helai hmun hi ka lo thleng ta a ni.

Thla hnih ang chauh Phailêngah hian ka la thawk a, a khawthlèng hi nuam ka ti viau reuh a, khuaah hian in a tam lêm lo va, mihring pawh an tam lua lo; mahse, a boruak a nuam ka ti, khua lût tùrin thing hmun hring dup paltlang a ngai a, a khua hrim hrim hi ramngawin a hual ni maiin ka hria, chuvàng tak chuan boruak a nuam a, a tlang hi sãng lêm lo mah se ramngaw an neih țhat avàngin a lum tehchiam lo. 

"Miss, Zorina ka lo kàwm ang?" 

Ka en vat a, Phailêng ka luh tirha chhûngte anga ka belh Pa Vàna tupa Engmawia lo niin, a utehoin,' Miss,' min tih a hre ve a ni ngei ang, hei pawh mi tihlim chi, nuih loh theih loh ang chi tho a ni.

"Lo lût la, i va fai sawr sawr ve a, i inbual fai tawh bîk elo?" tiin ka lo chhàwn vat a, a slipper chu luh dâwna hlih pah chuan," Aw, Àpiin min bual a," a ti ve leh mai a, Bawihtea pawh room ațanga rawn chhuakin a motor a rawn khai chhuak pah bawk a. Engmawia a hmuh chuan a rawn pan vat a, a motor chu pein motor dang la tùrin room lamah chuan a lût leh nghâl a, a hmu ngun tawh a, a zak ngai tawh bîk lo. 

*A MIZE CHHE LAI TAK I HMUH FUH AVÀNG MAI KHÂN  A NUN PUM PUI TEH NÂN HMANG MAI SUH*